បរទេស៖ ក្រុមហ៊ុនបច្ចេកវិទ្យាឈានមុខគេរបស់កូរ៉េខាងត្បូងដូចជា Samsung និង SK hynix គ្រោងនឹងវិនិយោគ ៤៧០ ពាន់លានដុល្លារអាមេរិក ដើម្បីបង្កើតមជ្ឈមណ្ឌលផលិតបន្ទះឈីបដ៏ធំបំផុតរបស់ពិភពលោក ដោយពង្រឹងជំហររបស់កូរ៉េខាងត្បូងក្នុងការប្រណាំង semiconductor ពិភពលោក។

នៅថ្ងៃទី១៨ ខែមករា ឆ្នាំ២០២៤ អ្នកតំណាងរបស់ក្រុមហ៊ុន Samsung និង SK hynix បាននិយាយថា កូរ៉េខាងត្បូងនឹងសាងសង់មជ្ឈមណ្ឌលផលិតបន្ទះឈីប semiconductor ដ៏ធំបំផុតរបស់ពិភពលោកនៅក្នុងខេត្ត Kyunggi នៅឆ្នាំ ២០៤៧ ខណៈដែលក្រុមហ៊ុន Samsung Electronics, SK Hynix និងក្រុមហ៊ុនបន្ទះឈីបផ្សេងទៀតគ្រោងនឹងវិនិយោគចំនួន ៦២២ ពាន់ពាន់លានវ៉ុន (ស្មើនឹង ៤៧០ ពាន់លានដុល្លារ) ដោយផ្តល់មូលនិធិដល់រោងចក្របន្ទះឈីបថ្មីចំនួន ១៣ និងកន្លែងស្រាវជ្រាវចំនួន ៣ នេះបើយាងតាមគេហទំព័រអន្តរជាតិ Tech Wire Asia។

ក្រុមហ៊ុន Samsung និង Hynix នឹងសាងសង់រោងចក្រផលិតបន្ទះសៀគ្វីទំនើបរបស់ពួកគេនៅក្នុងប្រទេស ដែលជាផ្នែកនៃយុទ្ធសាស្ត្រពីរទសវត្សរ៍។ ជាពិសេស Samsung គ្រោងនឹងសាងសង់រោងចក្រថ្មីចំនួន ៦ ជាមួយនឹងទុនវិនិយោគចំនួន ៣៦០ ពាន់ពាន់លានវ៉ុន (ជាង ២៥០ ពាន់លានដុល្លារអាមេរិក)។ ទន្ទឹមនឹងនេះ ក្រុមហ៊ុន SK Hynix បានចំណាយប្រាក់ ១២២ ពាន់ពាន់លានវ៉ុន ដើម្បីសាងសង់រោងចក្រចំនួន ៤ នៅក្នុងសួនឧស្សាហកម្មមួយផ្សេងទៀតនៅ Yongin ។

ប្រទេសកូរ៉េបានសង្កត់ធ្ងន់ថា ចង្កោមបន្ទះឈីបទំនើបនឹងពង្រីកដើម្បីរួមបញ្ចូលក្រុមហ៊ុនដែលផ្តល់សម្ភារៈ និងការរចនាបន្ទះឈីបខ្នាតតូច។ មហិច្ឆតាចុងក្រោយគឺធ្វើឱ្យប្រសើរឡើងនូវស្វ័យភាពនៅក្នុងខ្សែសង្វាក់ផ្គត់ផ្គង់ semiconductor ពី ៣០% ទៅ ៥០% នៅឆ្នាំ ២០៣០។ បន្ថែមពីលើហេដ្ឋារចនាសម្ព័ន្ធ កូរ៉េមានគោលបំណងលើកកម្ពស់ទេពកោសល្យក្នុងស្រុក ខណៈពេលដែលបង្កើតលក្ខខណ្ឌសម្រាប់អ្នកជំនាញបរទេសធ្វើការ និងស្រាវជ្រាវ។ ដូច្នេះហើយ រដ្ឋាភិបាលបានប៉ាន់ប្រមាណថា ផែនការ ៤៧០ ពាន់លានដុល្លារ នឹងជួយបង្កើតឱកាសការងារជាង ៣ លានកន្លែងសម្រាប់មនុស្ស ៣.៤៦ លាននាក់នាពេលអនាគត៕

យោងតាមគេហទំព័រអន្តរជាតិ The British Weekly Economist ដែលបានបោះពុម្ពផ្សាយចំណាត់ថ្នាក់ប្រចាំឆ្នាំរបស់ខ្លួនអំពីកន្លែងរស់នៅថ្លៃបំផុតរបស់ពិភពលោកនៅចុងខែវិច្ឆិកា ឆ្នាំ២០២៣ ដោយសិង្ហបុរី និង Zurich ឈរនៅលេខមួយជាប្រទេសដែលមានកន្លែងរស់នៅថ្លៃបំផុតលើលោក។ នេះបើតាម Marielle Desscalsota ដែលបានរស់នៅក្នុងប្រទេសសិង្ហបុរីអស់រយៈពេល ២០ ឆ្នាំបាននិយាយថា សម្រាប់ភ្ញៀវទេសចរណ៍ដែលចង់មកទស្សនាប្រទេសនេះ យើងសូមណែនាំគន្លឹះ ៥ ដើម្បីចំណាយតិចនៅសិង្ហបុរី។

១.ទទួលទានអាហារនៅក្នុងផ្សារបុរាណ៖ ផ្សារបុរាណដែលមានលក់អាហារចម្រុះ ក៏ដូចជាមានលក់ទំនិញផ្សេងៗ គឺជាគោលដៅដែលភ្ញៀវទេសចរ និងអ្នកស្រុកជាច្រើនគួរតែទៅ ព្រោះដោយសារតម្លៃនៅទីនោះថោក បើប្រៀបធៀបទៅនឹងផ្សារទំនើប ចំពោះអាហារវិញគឺឆ្ងាញ់ និងមានអនាម័យទៀតផង។

២.ផឹក kopi ជំនួសឱ្យកាហ្វេទាន់សម័យ៖ ជំនួសឱ្យការទៅទស្សនាហាងកាហ្វេប្រណិតដែលមានកាហ្វេល្បីៗដូចជាឡាតេ ឬ capuccino គឺថ្លៃៗណាស់។ ដូច្នេះអ្នកទស្សនាអាចសាកល្បង kopi ដែលជាកាហ្វេសិង្ហបុរីដុតដោយដៃជាមួយនឹងវិធីកែច្នៃចំនួន ១៥ ផ្សេងៗគ្នា។ អ្នកស្រុកនៅទីនោះជាញឹកញាប់ផឹក kopi ជាមួយនំបុ័ងអាំងពីរបន្ទះ និងស៊ុតឆ្អិនមួយដោយមានការចំណាយទាបបំផុត ដែលងាយស្រួលសម្រាប់ភ្ញៀវទេសចរក្នុងការទទួលទាន។

៣.ទស្សនាកន្លែងណាដែលមិនគិតថ្លៃ៖ នៅប្រទេសសិង្ហបុរីមានកន្លែងកម្សាន្តល្បីៗជាច្រើន ប៉ុន្តែមានតម្លៃថ្លៃណាស់ដូចជា សួនកម្សាន្ត Universal Studios Singapore និងកន្លែងសង្កេតការណ៍នៅ Marina Bay Sands។ ដូច្នេះ ដើម្បីចំណាយតិចភ្ញៀវទេសចរអាចទៅទស្សនាកន្លែងនានាដោយមិនគិតថ្លៃដូចជា Gillman Barracks ដែលជាតំបន់សិល្បៈសហសម័យដែលប្រមូលផ្តុំនូវវិចិត្រសាលអន្តរជាតិជាច្រើនរបស់ប្រទេសសិង្ហបុរី ឬក៏សារមន្ទីរ NUS ដែលមានការប្រគុំតន្ត្រីឥតគិតថ្លៃតែងតែធ្វើឡើងនៅខាងក្រៅនៅឯ Esplanade និងជារោងមហោស្រពដ៏ល្បីល្បាញដែលគេស្គាល់ថាជា “មហោស្រពទុរេន”។

៤.ស្នាក់នៅផ្ទះសំណាកតូចៗ៖ ជំនួសឱ្យការចំណាយប្រាក់ច្រើននៅសណ្ឋាគារប្រណីតៗ យើងនឹងណែនាំឱ្យអ្នកទេសចរកក់បន្ទប់នៅសណ្ឋាគារស្នេហា ឬផ្ទះសំណាកតូចៗដែលជា”តម្លៃដ៏សមរម្យបំផុតនៅសិង្ហបុរី”។ សម្រាប់សណ្ឋាគារស្នេហា ឬផ្ទះសំណាកតូចៗនៅសិង្ហបុរីជាទូទៅ គឺមានកន្លែងស្អាត ទូលាយ ទីតាំងកណ្តាល ហើយមានបន្ទប់ទឹកឯកជនមួយងាយស្រួលសម្រាប់ភ្ញៀវទេសចរ។

៥.រំលងបារ និងហាងលក់ស្រានៅឆ្នេរទេសចរណ៍ដែលមានមនុស្សកកកុញ៖ អ្នកទេសចរជាច្រើនតែងតែសម្រុកទៅ Sentosa ដែលជាកោះនៅឈូងសមុទ្រដ៏ល្បីល្បាញសម្រាប់រមណីយដ្ឋានលំដាប់ខ្ពស់ ក្លឹប និងបារ តម្លៃអាហារ និងភេសជ្ជៈច្រើនតែខ្ពស់ណាស់។ ហេតុនេះដើម្បីចំណាយតិច អ្នកទស្សនាអាចជប់លៀងនៅក្លឹបឆ្នេរ Changi Beach ភាគខាងកើតទីក្រុង Signapore ដែលនៅទីនោះអ្នកទស្សនាអាចស្វែងរកជម្រើសអាហារជាច្រើនដែលមានតម្លៃថោកសមរម្យបំផុតនៅភោជនីយដ្ឋានដ៏ពេញនិយមជាច្រើន៕

បវរកញ្ញា លក្ខណ៍ មុនីអានីតា បាននិយាយប្តេជ្ញាចិត្តរបស់ខ្លួនប្រឹងប្រែងឱ្យអស់ពីសមត្ថភាពដើម្បីមុខមាត់ប្រទេសការប្រកួត Miss Global 2023 ដែលកម្ពុជាធ្វើជាម្ចាស់ផ្ទះក្នុងការប្រកួតឈុតតំណាងជាតិ និងថ្ងៃផ្តាច់ព្រ័ត្រ។ ទោះជាយ៉ាងណា អានីតា ក៏បានបន្ថែមថាទោះបីជាការប្រកួតនេះទទួលបានលទ្ធផលបែបណានាងក៏ទទួលយកដូចគ្នា។

អំឡុងពេលប្រកួតបឋមកម្មវិធី Miss Global 2023 ប្រព្រឹត្តទៅនៅលើទឹកដីវៀតណាម លក្ខណ៍ មុនីអានីតា ធ្វើឱ្យអ្នកគាំទ្រសរសើរពីសមត្ថភាពរបស់នាងដែលធ្វើបានយ៉ាងល្អក្នុងការប្រកួតដែលមានការចូលរួមពីបេក្ខភាពជាច្រើនរូប។ មិនថាសម្រស់ ការដើរ និងការប្រើប្រាស់ភាសា លក្ខណ៍ មុនីអានីតា ធ្វើបានយ៉ាងល្អប្រកបដោយភាពជឿជាក់។ បន្ទាប់ពីឆ្លងកាត់ការប្រកួតបឋមនៅលើទឹកដីវៀតណាម ការប្រកួតឈុតតំណាងជាតិបានធ្វើឡើងនៅប្រទេសកម្ពុជាកាលពីយប់ថ្ងៃទៅ១៦ មករា ២០២៤ ដោយបេក្ខភាព៦៩ប្រទេសបានបញ្ចប់ភារៈកិច្ចរបស់ខ្លួន នឹងត្រៀមខ្លួនប្រកួតផ្តាច់ព្រ័ត្រនាថ្ងៃទី១៨ មករា ខាងមុខនេះ។

ក្នុងវគ្គប្រកួតឈុតតំណាងជាតិ លក្ខណ៍ មុនីអានីតា បានបង្ហាញឈុតប្រទីបព្រះសីនៃក្រុងធិបតី ដែលធ្វើឱ្យមានសំឡេងគាំទ្រយ៉ាងខ្លាំងពីទស្សនិកជនស្របពេលបវរកញ្ញា អ៊ិន លក្ខណា ក៏បានទៅចូលរួមលើកទឹកចិត្តដោយផ្ទាល់ផងដែរ។

នៅថ្ងៃទី១៧ មករា នេះ លក្ខណ៍ មុនីអានីតា Miss Global Cambodia 2023 បាន Live ជជែកកម្សាន្តជាមួយអ្នកគាំទ្រ ព្រមទាំងនិយាយបេ្តជ្ញាចិត្តរបស់ខ្លួនទៅកាន់ប្រជាជនខ្មែរ នាងនឹងប្រឹងប្រែងឱ្យអស់ពីសមត្ថភាពក្នុងការប្រកួតនេះដើម្បីមុខមាត់ប្រទេសកម្ពុជា។ ទន្ទឹមនឹងការប្តេជ្ញាចិត្តរបស់ខ្លួន បវរកញ្ញារូបនេះក៏បានលើកឡើងដែរថា បើការប្រកួតនេះមានលទ្ធផលបែបណានាងក៏ទទួលយកដូចគ្នា។

កម្មវិធី Miss Global បានបង្កើតឡើងក្នុងឆ្នាំ២០១៣ ហើយកម្ពុជាបានបញ្ជូនបេក្ខនារីដំបូងទៅប្រកួតក្នុងឆ្នាំ២០១៥ ដោយបានជាប់លំដាប់រងទី១ ឆ្នាំ២០១៦ ជាប់ TOP20 ឆ្នាំ២០១៧ ជាប់TOP10 ឆ្នាំ២០១៨ TOP10 ឆ្នាំ២០១៩មិនបានចូលTOP ឆ្នាំ២០២១ មិនបានបញ្ជូនបវរកញ្ញាទៅប្រកួត៕

ប្រទេសឥណ្ឌា៖ ឥណ្ឌាត្រូវបានគេរំពឹងថានឹងរក្សាជំហររបស់ខ្លួនជាប្រទេសសេដ្ឋកិច្ចធំបំផុតនៅអាស៊ីបន្ទាប់ពីចិនដែលមានកំណើនលឿនបំផុតរបស់ពិភពលោកនៅឆ្នាំនេះ។
កាលពីថ្ងៃទី១៧ ខែមករា ឆ្នាំ២០២៤ យោងតាមធនាគារពិភពលោក (WB) និងអ្នកសេដ្ឋកិច្ចជាច្រើនបាននិយាយថា ឥណ្ឌានឹងរក្សាជំហររបស់ខ្លួនជាប្រទេសសេដ្ឋកិច្ចធំបន្ទាប់ពីចិន ដែលមានកំណើនលឿនបំផុតរបស់ពិភពលោកនៅឆ្នាំនេះ ដោយសារកាលពីឆ្នាំមុនឥណ្ឌាបានរួមចំណែកច្រើនជាង ៣/៤ នៃកំណើនអាស៊ីខាងត្បូង ដែលលឿនបំផុតក្នុងចំណោមតំបន់សេដ្ឋកិច្ចដែលកំពុងរីកចម្រើន និងកំពុងអភិវឌ្ឍ។ កត្តាជាច្រើននេះបានរួមចំណែកដល់កំណើន រួមទាំងការកើនឡើងនៃការចំណាយរបស់រដ្ឋាភិបាល និងវិស័យសេវាកម្មដ៏រស់រវើក។

ទោះជាយ៉ាងណាក៏ដោយ អតិផរណានៅតែជាក្តីបារម្ភសម្រាប់ម្ចាស់អាជីវកម្មនៅក្នុងប្រទេសដែលមានប្រជាជនច្រើនជាងគេលើពិភពលោកនេះ។ ខណៈពេលដែលម្ចាស់អាជីវកម្មសប្បាយចិត្តដែលសេដ្ឋកិច្ចឥណ្ឌាកំពុងកើនឡើងម្តងទៀត ពួកគេក៏ព្រួយបារម្ភអំពីអតិផរណាផងដែរ ដោយសារសន្ទស្សន៍តម្លៃទំនិញប្រើប្រាស់ (CPI) របស់ឥណ្ឌាឡើងខ្ពស់ជាង ៤.២៥% ក្នុងឆ្នាំ ២០២៣។

ប្រទេសឥណ្ឌាគឺជាសេដ្ឋកិច្ចផ្អែកលើការប្រើប្រាស់ ហើយទោះបីជាវាកំពុងទទួលបានអត្ថប្រយោជន៍ពីការកើនឡើងនៃប្រាក់ចំណូលក៏ដោយ ធនាគារពិភពលោកបានព្រមានថាការចំណាយរបស់អ្នកប្រើប្រាស់អាចធ្លាក់ចុះជាបណ្តើរៗ នៅពេលដែលតម្រូវការកើនឡើង បន្ទាប់ពីជំងឺរាតត្បាតក៏ធ្លាក់ចុះផងដែរ ដោយសារអតិផរណាស្បៀងនៅតែខ្ពស់ ការចំណាយរបស់គ្រួសារ ជាពិសេសគ្រួសារដែលមានចំណូលទាប ទំនងជាត្រូវបានរឹតបន្តឹង។ ដូច្នេះហើយ យោងតាមអ្នកសេដ្ឋកិច្ច អតិផរណាត្រូវបានគេរំពឹងថានឹងនៅតែលើសពី ៤% រហូតដល់ខែមីនាឆ្នាំនេះ ហើយឈានដល់ជាមធ្យម ៤.៨% ចាប់ពីខែមេសាតទៅ៕

Betavolt ដែលជាក្រុមហ៊ុនផលិតថាមពលបច្ចេកវិទ្យាទំនើបនៅប្រទេសចិន បានបង្កើតថ្មថ្មីស្រឡាងមួយ “ថ្មនុយក្លេអ៊ែរ” ដែលមានសមត្ថភាពខ្ពស់ក្នុងការផលិតថាមពលឬចរន្តអគ្គិសនីបានដល់ទៅ៥០ឆ្នាំ ដោយមិនចាំបាច់បញ្ចូលថ្ម ឬថែទាំអ្វីឡើយ។

ថ្មនេះគឺត្រូវបានគេដាក់ឈ្មោះឲ្យថា “ថ្មនុយក្លេអ៊ែរ” ផលិតឡើងដោយការដាក់បញ្ចូល«អ៊ីសូតូបនុយក្លេអ៊ែរ»ចំនួន៦៣គ្រាប់ចូលទៅក្នុងដុំមួយ ដែលស្ទើរតែតូចជាងកាក់មួយផង ។

ក្នុងដំណើរការនៃការផលិតថាមពល ថ្មនុយក្លេអ៊ែរនឹងបំប្លែងថាមពលវិទ្យុសកម្មអ៊ីសូតូបទៅជាថាមពលអគ្គិសនី ដែលវាពិតជាមានគុណសម្បត្តិច្រើនជាងថ្មប្រភេទផ្សេងទៀតរាប់រយដង ព្រោះតែដង់ស៊ីតេថាមពលរបស់ថ្មីអគ្គីសនីនេះមានកម្រិតខ្ពស់ជាង។

ក្រុមហ៊ុន Betavolt របស់ចិននេះបានអះអាងថា វាគឺជាថ្មដំបូងគេរបស់ពិភពលោកដែលសម្រេចបាននូវការផលិតថាមពលអាតូមិច (ជាដំណើរការបំបែកវិទ្យុសកម្ម) ខ្នាតតូច ដោយពិតជាមានសមត្ថភាពក្នុងការប្រកួតប្រជែងនឹងជាមួយបច្ចេកវិទ្យានុយក្លេអ៊ែរដទៃទៀត។

ក្រុមហ៊ុនបាននិយាយទៀតថា ការបង្កើតថ្មជំនាន់ថ្មីគឺកំពុងស្ថិតនៅក្នុងដំណាក់កាលនៃការសាកល្បងហើយ។ ថ្មនុយក្លេអ៊ែរដំបូងរបស់ខ្លួនអាចផ្តល់ថាមពលរហូតដល់ទៅ ១០០ មីក្រូវ៉ាត់ និងវ៉ុល ៣V ខណៈដែលមានទំហំ ១៥x១៥x៥ មីលីម៉ែត្រគូប។ ថ្មនេះទៀតសោត គឺអាចដំណើរការបាននៅក្នុងសីតុណ្ហភាពត្រជាក់ខ្លាំងចាប់ពី -៦០អង្សាសេ ដល់ កម្រិតសីតុណ្ហភាពក្តៅខ្លាំងជាងទឹកពុះ ១២០ អង្សាសេ។
កាន់តែអស្ចារ្យជាងនេះទៅទៀត ថ្មនុយក្លេអ៊ែរនេះគឺមានលក្ខណៈពិសេស ដែលបានផលិតឡើងធន់នឹងភ្លើង ព្រមទំាងការពារការកន្ត្រាក់ ដោយធានាបាននូវសុវត្ថិភាពខ្ពស់នៅពេលដែលកំពុងប្រើប្រាស់ថ្មនេះនឹងផ្ទុះឆេះនោះទេ បើទោះបីជាមានកម្លាំងចលករខាងក្រៅកើតឡើងដោយអចេតនាប៉ះទៅលើឧបករណ៍ដែលកំពុងដំណើរការដោយថ្មនុយក្លេអ៊ែរនេះក៏ដោយ។

គួរបញ្ជាក់ផងដែរថា ការច្នៃប្រឌិតថាមពលថ្មីនេះនឹងជំរុញឱ្យប្រទេសចិនទទួលបានភាពជោគជ័យមួយ និងឈានមុខគេក្នុងបដិវត្តន៍បច្ចេកវិទ្យា AI ។ ថ្មនុយក្លេអ៊ែរថ្មីរបស់ក្រុមហ៊ុនចិននេះ នឹងបំពេញតម្រូវការដល់មនុស្សគ្រប់រូប ព្រោះថាវាអាចផ្គត់ផ្គង់ថាមពលប្រើប្រាស់បានរយៈពេលយូរ ចំណេញពេលវេលា និងប្រើបានគ្រប់កាលៈទេសៈទាំងអស់រាប់ចាប់ពីការបញ្ចូលថ្មទូរស័ព្ទ បរិក្ខារប្រើប្រាស់ប្រចាំថ្ងៃ បរិក្ខារពេទ្យ និងមិនថានៅលើលំហអាកាស ធ្វើជាឧបករណ៍ចាប់សញ្ញាកម្រិតខ្ពស់ និងបញ្ជាលើត្រូនផ្សេងៗផងដែរ៕