កាលពីថ្ងៃទី ១១ ខែមីនា ឆ្នាំ២០២៤នេះ យោងតាមការបង្ហោះរបស់ប្រភពសារព័ត៌មានថៃ Bangkok Post បានគូសបញ្ជាក់ថា ខេត្តស៊ីសាកេតរបស់ថៃ ដែលជាប់នឹងព្រំដែនខេត្តព្រះវិហារ នៃប្រទេសកម្ពុជា បានត្រៀមខ្លួនរួចជាស្រេចក្នុងការដែលឲ្យកម្ពុជាបើកច្រកចូលប្រាសាទព្រះវិហារឡើងវិញជាលើកដំបូង បន្ទាប់ពីបានបិទអស់រយៈពេល ១៦ ឆ្នាំកន្លងមកនេះ។

ចាប់តាំងពីរដ្ឋមន្ត្រីក្រសួងមហាផ្ទៃលោក Anutin Charnvirakul បានធ្វើទស្សនកិច្ចទៅកាន់ខេត្តស៊ីសាកេតកាលពីថ្ងៃទី៨ ខែមីនា គោលនយោបាយរបស់រដ្ឋាភិបាលថៃក្នុងការបើកប៉ុស្តិ៍ត្រួតពិនិត្យបណ្តោះអាសន្នដើម្បីផ្តល់ការចូលទៅកាន់ព្រំប្រទល់ខេត្តព្រះវិហារនៃប្រទេសកម្ពុជាបានទាក់ទាញការចាប់អារម្មណ៍យ៉ាងខ្លាំងពីសាធារណជនថៃ ជាពិសេសក្នុងចំណោមប្រជាជនថៃ ដែលរស់នៅក្នុងខេត្តភាគឦសាន គឺខេត្តស៊ីសាកេត។

លោក Anupong Suksomnit អភិបាលខេត្តស៊ីសាកេត បានមានប្រសាសន៍ថា ប៉ុស្តិ៍ត្រួតពិនិត្យនេះនឹងអនុញ្ញាតឲ្យភ្ញៀវទេសចរនិងអ្នកស្រុកមកពីភាគីទាំងសងខាង ទាំងថៃ និងកម្ពុជា ឆ្លងកាត់ព្រំដែននេះបានងាយស្រួល ក៏ដូចជាបានជំរុញវិស័យទេសចរនិងពាណិជ្ជកម្មនៅក្នុងតំបន់។

លោកស្រី Jit Ardsanjorn ប្រធានឧទ្យានជាតិ Khao Phra Viharn បានក៏បានលើកឡើងដែរថា អាជ្ញាធរខេត្តស៊ីសាកេត បានបង្កើតក្រុមការងារមួយ ដើម្បីរៀបចំត្រៀមសម្រាប់ការបើកព្រំដែនជាមួយកម្ពុជាឡើងវិញ។ លោកស្រីបានបន្តថា គ្រប់វិស័យនៅក្នុងតំបន់នេះបានត្រៀមខ្លួនជាស្រេច ហើយកំពុងរង់ចាំភ្លើងខៀវពីរដ្ឋាភិបាលនិងក្រសួងស្ថាប័នពាក់ព័ន្ធប៉ុណ្ណោះ។

អ្នកស្រីថា ចំណុចសំខាន់ដើម្បីទាក់ទាញភ្ញៀវទេសចររវាងច្រកខ្មែរនិងថៃខាងលើនេះ គឺនឹងមានការបង្កើតសណ្ឋាគារ ហាងទំនិញផ្សេងៗ និងរមណីយដ្ឋានថ្មីៗ ដែលនឹងត្រូវបានសាងសង់ឡើងនៅក្នុងស្រុក Kantharalak នៃខេត្តស៊ីសាកេត។ អ្នកស្រីជឿជាក់យ៉ាងមុតមាំថា បើមានការបើកច្រកព្រំដែនលើកនេះនឹងជម្រុញកំណើនភ្ញៀវទេសចរទាំងជាតិនិងអន្តរជាតិ ឡើងដល់កម្រិតខ្ពស់បំផុត ចំណេញដល់សេដ្ឋកិច្ចប្រទេសទាំងពីរផងដែរ។

គួរបញ្ជាក់ថា ភាពចម្រូងចម្រាស់រវាងកម្ពុជានិងថៃ បានជំរុញឲ្យមានការបិទច្រកព្រំដែនព្រះវិហារកាលពីឆ្នាំ ២០០៨ ដែលមកទល់ពេលនេះគឺមានរយៈពេល ១៦ឆ្នាំហើយ៕

កោះហាន ដែលមានទីតាំងស្ថិតនៅក្នុងឃុំកោះស្នែង ដែលយើងអាចធ្វើដំណើរឆ្លងតាមស្ពានសេកុង តាមផ្លូវជាតិលេខ ៧ ពីទីរួមខេត្តស្ទឹងត្រែង ដែលមានចម្ងាយប្រមាណ ២៤ គីឡូម៉ែត្រ ទៅដល់កំពង់ដរចម្លងសហគមន៍ និងជិះទូកបន្តទៅកាន់កោះស្នែង។

កោះហានហ៊ុមព័ទ្ធដោយព្រៃព្រឹក្សាដ៏ខៀវស្រងាត់ ឆ្នេរខ្សាច់សរក្បុស ទឹកត្រជាក់ថ្លាឆ្វង់ ជាផ្ទៃទឹកនៃតំបន់អភិរក្សជីវចម្រុះ នៃតំបន់រ៉ាមសារ តាមដងទន្លេមេគង្គ។ ទេសភាពនៅលើកោះនេះទៀតសោតគឺពិតជាល្អឯក គួរឲ្យចង់គយគន់ លោកអ្នកនឹងទទួលបាននូវខ្យល់អាកាសបរិសុទ្ធស្រស់ស្រាយ ដែលវាពិតជាសាកសមណាស់សម្រាប់ស្រលាញ់អ្នកធម្មជាតិ។

នៅលើកោះនេះ អ្នកទាំងអស់គ្នាគឺអាចរីករាយជាមួយនឹងសកម្មភាពសប្បាយៗជាច្រើន ដូចជាទស្សនាព្រៃលិចទឹក ទស្សនាសត្វស្លាប ជីវចម្រុះ និងតំបន់ថ្មកំបោរនៃតំបន់រ៉ាមសារតាមដងទន្លេមេគង្គ ឡើងភ្នំ ជិះកៃយ៉ាក់ បោះតង់ មើលថ្ងៃរៀបលិច ពិសារអាហារឆ្ងាញ់ៗប្រចាំតំបន់ដែលរៀបចំដោយបងប្អូនសហគមន៍ផ្ទាល់ ផ្ទះសហគមន៍ និងរៀនសូត្រពីជីវិតរស់នៅប្រចាំថ្ងៃរបស់ស្រុកទីនោះជាដើម។

ដូច្នេះហើយ ភ្ញៀវទេសចរគ្រប់ៗរូបគឺអាចមកលេងកោះហាន នៅលើទឹកដីនៃខេត្តស្ទឹងត្រែងនេះបាន ធានាថានឹងទទួលបាននូវដំណើរកម្សាន្តមួយដ៏រីករាយនិងបទពិសោធន៍ថ្មីមិនអាចបំភ្លេចបាន៕

កម្មវិធីប្រកួត Universal Woman 2024 ដែលកម្ពុជាធ្វើជាម្ចាស់ផ្ទះក្រោមការរៀបចំរបស់អ្នកនាងប្រាសាទ ដាវីន កំពុងធ្វើឱ្យទស្សនិកជនចាប់អារម្មណ៍យ៉ាងខ្លាំងបន្ទាប់ពីបេក្ខភាពដែលចូលរួមបានគ្រងឈុតអប្សរាខ្មែរដ៏ស្រស់ស្អាតបញ្ចេញសម្រស់ដ៏ល្អឯកនៅទីតាំងប្រាសាទអង្គរវត្ត ខេត្តសៀមរាប។ លើសពីនេះបេក្ខភាពដែលចូលរួមប្រកួតជាច្រើនប្រទេស ទោះជាមេឃក្តៅយ៉ាងណាបានព្យាយាមដោះស្បែកជើងដើម្បីថតរូបផ្លូវការតាមក្បួនច្បាប់របស់ខ្មែរ។ មិនត្រឹមតែប៉ុណ្ណោះនេះក៏ជាសកម្មភាពផ្សព្វផ្សាយមួយជំរុញឱ្យវិស័យទេសចរណ៍កើនឡើងផងដែរ។

ស្ថាប័ន Universal Woman Cambodia នៅថ្ងៃទី១៤ ខែមីនា នេះបានបញ្ចេញវីដេអូសកម្មភាពពីក្រោយការថតរូបរបស់បេក្ខភាពចូលរួមប្រកួត Universal Woman 2024 ដែលបានគ្រងឈុតអប្សរា។ ស្ថាប័ននេះបានលើកឡើងថា«បងប្អូននេះជាសកម្មភាពខ្លះៗនៅពីក្រោយការថតរូបនៅប្រាសាទអង្គរវត្តរបស់ Universal Woman 2024 ។លោកគ្រូ អ្នកគ្រូក្រុមការងារទាំងអស់បានព្យាយាមបង្រៀនពីការរាំរបាំអប្សារា ការថតរូបអប្សារា អត្ថន័យនៃក្បាច់របាំអប្សារា ហើយព្យាយាមមើលសម្លៀកបំពាក់ដើម្បីធានាឱ្យបានថាត្រូវតាមក្បួនខ្នាតនិងមានរបៀបរៀបរយយើងព្យាយាមធ្វើឱ្យបានល្អបំផុត និងប្រុងប្រយ័ត្នខ្ពស់»។

ជាមួយគ្នានេះដែរអ្នករៀបចំកម្មវិធីក៏បានបង្ហាញទៀតថា «ឈុត អប្សរា ពី Universal Woman 2024 នៅប្រាសាទអង្គរវត្ត ទោះជាក្តៅយ៉ាងណាក៏យើងព្យាយាមឱ្យបេក្ខភាពដោះស្បែកជើងដើម្បីថតរូបផ្លូវការតាមក្បួនច្បាប់របស់ខ្មែរដែរ យើងក៏អរគុណនិងសរសើរដល់បេក្ខភាពដូចគ្នាដែលគោរពតាមក្បួនខ្នាតរបស់ខ្មែរយើង»។
កម្មវិធីប្រកួតនេះគឺមានការចូលរួមគាំទ្រពីក្រសួងទេសចរណ៍ផងដែរខណៈបេក្ខភាពចូលរួមទាំងអស់មានជាង៥០ប្រទេស។ Universal Woman 2024 ដែលកម្ពុជាធ្វើជាម្ចាស់ផ្ទះនេះគឺក្រោមការគ្រប់គ្រងរបស់អ្នកនាង ប្រាសាទ ដាវីន ហើយរូបអ្នកនាងផ្ទាល់គឺជាលំដាប់រងទី៤ Universal Woman 2023 ដែលបានប្រកួតនៅលើទឹកដីទីក្រុងឌូបៃ។ អ្វីដែលកាន់តែពិសេសថែមទៀត អ្នកនាង ប្រាសាទ ដាវីន ក៏ជាND Mister Friendship Cambodia ផងដែរ ខណៈ លាវ វេងហួរ ទទួលបានជ័យលាភីឯកនៅលើទឹកដីប្រទេសថៃ។

គួរបញ្ជាក់ផងដែរថា សម្រាប់បេក្ខភាពតំណាងឱ្យកម្ពុជាក្នុងការប្រកួត Universal Woman 2024 គឺ Brianna Mai មានវ័យ ២៩ ឆ្នាំរូបនាងជាកូនខ្មែរកាត់អាម៉េរិកហើយក៏ទទួលបានការអប់រំផ្នែករបាំបុរាណខ្មែរបានស្ទាត់ជំនាញផងដែរ ៕

ប្រសិនបើលោកអ្នកមានបំណងចង់ទិញរថយន្តមួយទឹក ឬរថយន្តជជុះ ដែលជួយសន្សំសំចៃខ្ពស់ ដោយមិនចង់ទិញទៅខុស អ្នកចាំបាច់ត្រូវមើលពីសភាពម៉ាស៊ីន ជើងក្រោម ទឹកថ្នាំ និងឆែកមើលថាតើជារថយន្តកាត់ត ពីរបីកំណាត់ឬអត់។ ការទិញរថយន្តដំបូង ក្នុងជីវិតរបស់អ្នកគឺជារឿងធំសម្រាប់មនុស្សជាច្រើន ដូច្នេះប្រសិនបើរថយន្តជជុះមានចំណុច ៥ នេះអ្នកត្រូវតែជៀសវាងនិងមិនគួរទិញឡើយកុំឱ្យខាតលុយ ដែលចំណុចនោះរួមមាន៖

១.រថយន្តដែលលេងពណ៌៖ រថយន្តប្រើហើយដែលត្រូវបានលាបពណ៌ទាំងអស់ ឬផ្លាស់ប្តូរពណ៌ដើមរបសរថយន្ត គឺភាគច្រើនមានស្នាមឆ្កូត និងស្នាមប្រឡាក់តូចៗជាច្រើនកន្លែង ដោយសារតែរថយន្តមួយទឹកនេះបានឆ្លងកាត់ការបុកខ្លាំង ឬក្រឡាប់រហូតដល់ត្រូវលាបពណ៌រថយន្តទាំងមូល ទោះបីជាវាមានតម្លៃថោកប៉ុណ្ណាក៏ដោយ ក៏អ្នកមិនគួរទិញនិងត្រូវជៀសវាងបញ្ហានេះផងដែរ។

២.រថយន្តធ្លាប់ផ្លាស់ប្តូរម៉ាស៊ីន៖ នៅក្នុងករណីនៃការទិញរថយន្តជជុះជាលើកដំបូង ជៀសវាងរថយន្តដែលបានផ្លាស់ប្តូរម៉ាស៊ីន ព្រោះភាគច្រើនម្ចាស់ដើមប្រើរហូតដល់មានស្នាមជាំ និងកង្វះការថែទាំត្រឹមត្រូវ ដូច្នេះឡានបែបនេះមិនគួរប្រើទៀតទេ ដោយសារតែផលវិបាកអាចកើតឡើងនៅពេលក្រោយ។

៣.រថយន្តដែលមានជម្រើសច្រើនពេក៖ ជាការពិតណាស់ រថយន្តមានជម្រើសច្រើន វានឹងផ្តល់ភាពងាយស្រួលកាន់តែប្រសើរ ប៉ុន្តែទោះជាយ៉ាងណា ប្រសិនបើដល់ពេលជួសជុលវា? អ្នកក៏នឹងត្រូវប្រឈមមុខនឹងវិក័យប័ត្រជួសជុលថ្លៃជាងគេផងដែរ ឧទាហរណ៍ ជាមួយនឹងកៅអីអគ្គិសនីដ៏ប្រណិត ដែលអាចបណ្តាលឱ្យខូចខាតដល់ប្រអប់លេខ និងម៉ូទ័រនាពេលអនាគតជាដើម។

៤.រថយន្តមិនពេញនិយម៖ ប្រសិនបើអ្នកទិញរថយន្តជជុះដំបូង យល់ល្អអ្នកគួរទិញរថយន្តទាន់សម័យបន្តិច ព្រោះវាអាចជាការល្អប្រសើរក្នុងការជ្រើសរើសរថយន្តទីផ្សារពេញនិយមដោយសារវាមានគ្រឿងបន្លាស់គ្រប់គ្រាន់ងាយស្រួលជួសជុល និងអាចលក់បន្តទៀតបាន។ ទោះជាយ៉ាងណា ប្រសិនបើអ្នកទិញរថយន្តហួសសម័យ អ្នកត្រូវប្រឈមនឹងបញ្ហាពិបាករកគ្រឿងបន្លាស់ ជួសជុលថ្លៃ និងហាងជួសជុលមិនបានគ្រប់ជ្រុងជ្រោយ ព្រោះអ្នកបច្ចេកទេសមិនសូវជំនាញ ដោយគ្រឿងបន្លាស់ខ្លះអាចត្រូវរង់ចាំបញ្ជាទិញពីបរទេសច្រើនខែ ដែលនេះជាហេតុធ្វើឱ្យខ្ជះខ្ជាយពេលវេលា។

៥.រថយន្តដែលមានម៉ាស៊ីនធំ៖ ថ្វីត្បិតតែតម្លៃរថយន្តប្រើរួច ផ្តល់ភាពងាយស្រួលសម្រាប់អ្នកទិញក្នុងការធ្វើជាម្ចាស់រថយន្តម៉ូដែលធំក៏ដោយ ប៉ុន្តែប្រសិនបើអ្នកទិញវាជាឡានដំបូងរបស់អ្នកសម្រាប់ប្រើប្រាស់ប្រចាំថ្ងៃ អ្នកគួរតែជ្រើសរើសឡានដែលប្រើម៉ាស៊ីនតូចចាប់ពី ១.៥ លីត្រឡើងទៅ ឬអតិបរមាមិនគួរលើសពី ១.៨ លីត្រទេ ព្រោះម៉ាស៊ីនធំប្រេងកាន់តែច្រើនត្រូវបានខ្ជះខ្ជាយ។ ជាពិសេសរថយន្តដែលមានម៉ាស៊ីន ៦ ស៊ីឡាំង គួរចៀសវាងប្រសិនបើអ្នកមិនចង់ចំណាយលុយដោយសារតែថ្លៃសាំង ដូច្នេះមានន័យថា រថយន្តដែលមានម៉ាស៊ីនធំស៊ីសាំងខ្លាំងជាងរថយន្តដែលមានម៉ាស៊ីនតូច៕