បច្ចុប្បន្ននេះ គ្រប់គ្នាប្រាកដជាបានឃើញបានស្គាល់ហើយនូវទំនើបកម្មរបស់ព្រលានយន្តហោះនៃប្រទេសនីមួយៗ ដែលទាំងនេះគឺជាការសបញ្ជាក់ពីវឌ្ឍនភាព ភាពរីកចម្រើនជឿនលឿនរបស់ប្រទេសពួកគេរៀងៗខ្លួន។ ប៉ុន្តែ ទោះយ៉ាងណាក៏ដោយ ក៏នូវមានព្រលានយន្តហោះមួយចំនួនដែលត្រូវបានគេបោះបង់ចោល កុំថាឡើយដើរកាត់ សូម្បីតែរំលឹកឈ្មោះក៏មិនហ៊ានផង ព្រោះតែអតីតកាលរឿងរ៉ាវដ៏ឈឺចាប់និងខ្លោចផ្សារបំផុត។

១. អាកាសយានដ្ឋានអន្តរជាតិ Sergey Prokofiev ប្រទេសអ៊ុយក្រែន ត្រូវបានបោះបង់ចោលកាលពីឆ្នាំ២០១៥
អ្នកទាំងអស់គ្នាប្រហែលជាធ្លាប់បានឮហើយអំពីការឈ្លានពានរបស់រុស្ស៊ីទៅលើអ៊ុយក្រែន មិនមែនទើបតែឥឡូវទេ ប្រទេសទាំង២នេះតែងតែមានការប៉ះទង្គិចគ្នាជាច្រើនដងមកហើយ។ ជាមួយគ្នានេះ សង្គ្រាមរវាងរុស្សីនិងអ៊ុយក្រែនបានផ្ទុះឡើងកាលពីចុងឆ្នាំ ២០១៤ បានធ្វើឲ្យអាកាសយានដ្ឋានមួយនេះត្រូវបានកម្ទេចទៅជាធូលីដីនិងខូចខាតទាំងស្រុង។ អាកាសយានដ្ឋានដែលធ្លាប់តែទំនើប និងមមាញឹកប្រែទៅជាសភាពទ្រុឌទ្រោមយ៉ាងអណោចអធម ដែលបច្ចុប្បន្នគ្មានគម្រោងថានឹងជុសជុលវាឡើងវិញឡើយ។

២. អាកាសយានដ្ឋានអន្តរជាតិ Yasser Arafat, Gaza បោះបង់ចោលក្នុងឆ្នាំ ២០០១
ពីដើមឡើយ អាកាសយានដ្ឋាន Gaza មិនត្រឹមតែជាមជ្ឈមណ្ឌលទេសចរណ៍ប៉ុណ្ណោះទេ វាជានិមិត្តរូបនៃក្តីសង្ឃឹមសម្រាប់ភាពជារដ្ឋរបស់ប្រជាជនប៉ាឡេស្ទីនទាំងមូល។ អាកាសយានដ្ឋាននេះបានបង្កើតឡើងកាលពីខែធ្នូ ឆ្នាំ ១៩៩៨ ប៉ុន្តែដំណើរការបានត្រឹមតែរយៈពេលប្រមាណ២ឆ្នាំ វាក៏ត្រូវបានបិទទ្វាវិញព្រោះការកើតមានសង្គ្រាមរវាងអ៊ីស្រាអែល និងប៉ាឡេស្ទីនក្នុងអំឡុងឆ្នាំ ២០០០ ដោយអ៊ីស្រាអែលបានធ្វើការវាយឆ្មក់តាមលំហរអាកាសនិងទម្លាក់គ្រាប់បែកជាច្រើនគ្រាប់ខូចខាតមិនស្ទើរនោះទេទាំងព្រលានយន្តហោះនិងតំបន់នោះ។

៣. អាកាសយានដ្ឋាន Johnston Atoll សហរដ្ឋអាមេរិក បោះបង់ចោលក្នុងឆ្នាំ ២០០៣
អាកាសយានដ្ឋាន Johnston Atoll គឺជាស្ថិតនៅលើកោះប្រវត្តិសាស្ត្រដ៏គួរឱ្យចាប់អារម្មណ៍មួយរបស់សហរដ្ឋអាមេរិក។ នៅឆ្នាំ ១៩៤១ អាមេរិកក៏បានយកកោះនេះដើម្បីសាកល្បងការត្រៀមខ្លួនរបស់កងទ័ពជើងទឹកប្រឆាំងនឹងអាវុធគីមី និងជីវសាស្រ្ត ក៏ដូចជាពិសោធន៍ប្រព័ន្ធមីស៊ីលប្រឆាំងផ្កាយរណប ដោយប្រើនុយក្លេអ៊ែដើម្បីកំណត់ជីពចរអេឡិចត្រូម៉ាញ៉េទិចនៅក្នុងបរិយាកាសកម្រិតខ្ពស់។ ជាងពាក់កណ្តាលនៃអាវុធគីមីរបស់សហរដ្ឋអាមេរិកត្រូវបានរក្សាទុកនៅលើ Johnston ក្នុងពេលតែមួយ រួមទាំងឧស្ម័នពណ៌ទឹកក្រូចដែលប៉ះពាល់យ៉ាងធ្ងន់ធ្ងរដល់ជីវិតមនុស្ស។ នៅទីបំផុត វានឹងក្លាយជាទីតាំងនៃកន្លែងចោលអាវុធគីមីដំបូងគេរបស់សហរដ្ឋអាមេរិក បន្ទាប់ពីធុងនៃសារធាតុពណ៌ទឹកក្រូចបានលេចធ្លាយ ធ្វើឲ្យបំពុលបរិយាកាសនៅជុំវិញនោះកម្រិតធ្ងន់ផងដែរ៕

សហរដ្ឋអាមេរិក៖ កាលពីថ្ងៃទី២៦ ខែមករា ឆ្នាំ២០២៤ ទស្សនាវដ្តី Forbes បានចុះផ្សាយថា ម្ចាស់ក្រុមហ៊ុនទំនិញប្រណិត LVMH លោក Bernard Arnault បានវ៉ាដាច់ Elon Musk ដើម្បីក្លាយជាអ្នកមានបំផុតនៅលើភពផែនដី។

លោក Bernard Arnault គឺជានាយកប្រតិបត្តិនៃក្រុមហ៊ុនទំនិញប្រណិតពិភពលោក LVMH ដែលជាអង្គភាពនៅពីក្រោយម៉ាកទំនិញប្រណីតរាប់សិបដូចជា Louis Vuitton និង Sephora ដោយឥឡូវនេះលោកបានជាប់ជាមហាសេដ្ឋីលំដាប់ទី១ លើពិភពលោកជាមួយនឹងទ្រពសម្បត្តិ ២០៧.៨ លានដុល្លារអាមេរិក ខណៈដែល Elon Musk ធ្លាក់ទៅលំដាប់ទី២ វិញជាមួយទ្រពសម្បត្តិចំនួន ២០៤.៥ ពាន់លានដុល្លារអាមេរិក។

មូលហេតុដែល អតីតមហាសេដ្ឋីលំដាប់ទី១ Elon Musk ធ្លាក់ទៅលំដាប់ទី២ វិញ គឺដោយសារភាគហ៊ុនរបស់ក្រុមហ៊ុន Tesla បានធ្លាក់ចុះ ១៣% នៅថ្ងៃទី ២៥ ខែមករា ហើយបានកើនឡើងត្រឹមតែ ០.៣% កាលពីម្សិលមិញប៉ុណ្ណោះ។ ហេតុផលគឺដោយសារតែ Musk បានព្រមានថា ប្រាក់ចំណូលរបស់ក្រុមហ៊ុនអាចនឹងកើនឡើងយឺតៗនៅឆ្នាំនេះ ដោយសារតែក្រុមហ៊ុនផ្តោតលើរថយន្តអគ្គិសនីជំនាន់ថ្មី តម្លៃថោកជាង ដែលនឹងផលិតចាប់ពីពាក់កណ្តាលឆ្នាំក្រោយ។ នេះបណ្តាលឱ្យទ្រព្យសម្បត្តិរបស់ Musk ធ្លាក់ចុះរហូតដល់ ១៨ ពាន់លានដុល្លារក្នុងរយៈពេលតែមួយវគ្គប៉ុណ្ណោះ។

ទន្ទឹមនឹងនេះ ភាគហ៊ុនរបស់ LVMH បានកើនឡើង ១២.៨% កាលពីថ្ងៃទី២៦ ខែមករា ឆ្នាំ២០២៤។ ហេតុផលគឺដោយសារតែក្រុមហ៊ុនបានប្រកាសប្រាក់ចំណូលកាពីឆ្នាំមុន ខ្ពស់ជាងការព្យាករណ៍ដែលមាន ៨៦.១៥ ពាន់លានអឺរ៉ូ (ប្រមាណ ៩៣.៣ ពាន់លានដុល្លារអាមេរិក) និងបង្កើនការទូទាត់ភាគលាភប្រចាំឆ្នាំ។

គួរបញ្ជាក់ដែរថា បច្ចុប្បន្នក្រុមហ៊ុន LVMH មានម៉ាកសំលៀកបំពាក់ និងគ្រឿងសំអាងចំនួន ៧០ ដូចជា Sephora, Tiffany & Co, Givenchy, Christian Dior, Dom Perignon និង Moët Hennessy។ នៅឆ្នាំ ២០២១ LVMH បានទិញក្រុមហ៊ុនគ្រឿងអលង្ការ Tiffany & Co ក្នុងតម្លៃជិត ១៦ ពាន់លានដុល្លារ។ នេះត្រូវបានគេចាត់ទុកថាជាកិច្ចព្រមព្រៀងធំបំផុតក្នុងឧស្សាហកម្មប្រណីតរបស់ពិភពលោក។ Agache ដែលជាក្រុមហ៊ុនផ្ទាល់ខ្លួនរបស់ Arnault ក៏នៅពីក្រោយមូលនិធិបណ្តាក់ទុនមួយដែលមានឈ្មោះថា Aglaé Ventures ផងដែរ។ ទស្សនាវដ្តី Forbes បាននិយាយថាក្រុមហ៊ុននេះ ក៏បានវិនិយោគលើអាជីវកម្មជាច្រើនដូចជា Netflix ឬ ByteDance ដែលជាក្រុមហ៊ុនមេរបស់ TikTok ទៀតផង៕

វៀតណាម៖ ទោះបីជាតម្លៃក្រូចថ្លុងក្រហមរបស់ថៃថ្លៃជាងផលិតផលវៀតណាមទ្វេរដងក៏ដោយ ក៏ក្រូចថ្លុងក្រហមដែលនាំចូលពីប្រទេសថៃពិតជាមានភាពទាក់ទាញ ដោយសារតែការរចនាដ៏ស្រស់ស្អាត និងគុណភាពល្អឥតខ្ចោះ។
ជាធម្មតាក្រូចថ្លុងក្រហមដែលនាំចូលពីប្រទេសថៃមានតម្លៃលក់រាយ ៨ ទៅ ១៦ ដុល្លារអាមេរិក ក្នុង ១ គីឡូក្រាម ខណៈដែលក្រូចថ្លុងវៀតណាមមានតម្លៃត្រឹមតែ ៦០.០០០-៧០.០០០ ដុង ក្នុងមួយគីឡូក្រាម (ប្រមាណ ២ ដុល្លារអាមេរិកប៉ុណ្ណោះ)។

អ្នកស្រី Hoang Anh បាននិយាយថា ក្នុងឱកាសបុណ្យចូលឆ្នាំខាងមុខនេះ ជំនួសឱ្យការទិញផលិតផលពីវៀតណាម អ្នកស្រីនឹងជ្រើសរើសក្រូចថ្លុងថៃ ព្រោះវាមានរសជាតិផ្អែមឆ្ងាញ់ ខណៈក្រូចថ្លុងវៀតណាមមានរសជាតិល្វីង។ ស្រដៀងគ្នានេះដែរ អ្នកស្រី ហាញ់ នៅសង្កាត់លេខ៥ បានប្រាប់អ្នកសារព័ត៌មានថា ទោះបីជាតម្លៃក្រូចថ្លុងក្រហមរបស់ថៃថ្លៃជាងផលិតផលវៀតណាមទ្វេរដងក៏ដោយ ក៏អ្នកស្រីជ្រើសរើសផលិតផលរបស់ថៃដែរ ព្រោះការរចនារបស់វាមានភាពលេចធ្លោរ និងសាកសមសម្រាប់ឱកាសបុណ្យចូលឆ្នាំនាពលខាងមុខ។

ដូច្នេះហើយ ការនាំចូលក្រូចថ្លុងក្រហមរបស់ថៃបច្ចុប្បន្នមានការកើនឡើងខ្លាំង ដោយសារតម្រូវការអ្នកទិញខ្ពស់ ក៏ដូចជាមានការរចនាដ៏ស្រស់ស្អាត ជាមួយនឹងតម្លៃ ២០០,០០០ ទៅ ៤០០,០០០ ដុងក្នុងមួយគីឡូក្រាម (ប្រមាណ ៨ ទៅ ១៦ ដុល្លារអាមេរិក)។ ការនាំចូលក្រូចថ្លុងរាប់ពាន់ផ្លែសម្រាប់រដូវបុណ្យចូលឆ្នាំនេះ អ្នកស្រី ហាន មានប្រសាសន៍ថា មានគ្រឹះស្ថានជាច្រើននៅក្នុងប្រទេសដែលដកស្រង់តម្លៃក្រូចថ្លុងក្នុងស្រុក។ ទោះជាយ៉ាងណាក៏ដោយ គុណភាពមិនដូចការរំពឹងទុកទេ ហើយវាពិបាកក្នុងការបង្ហាញ ដោយសារតែស្បែកក្រូចថ្លុងមិនមានពណ៌បៃតង និងភ្លឺរលោងដូចផលិតផលថៃ។ ដូច្នេះហើយ នៅពេលដែលអតិថិជនជាច្រើនបានកុម្ម៉ង់ផលិតផលថៃ នាងបានសម្រេចចិត្តនាំចូលផលិតផលនេះចូលក្នុងស្រុកក្នុងបរិមាណកាន់តែច្រើន។

អ្នកស្រី ហាន បានបន្តទៀតថា “ផ្លែឈើប្រភេទនេះ គឺមានតុល្យភាពល្អ ស្បែកពណ៌បៃតង ខាងក្នុងក្រហម ដូច្នេះអតិថិជនចូលចិត្តខ្លាំងណាស់។ ក្រូចថ្លុងប្រភេទនេះ មិនត្រឹមតែមានរសជាតិផ្អែមប៉ុណ្ណោះទេ ថែមទាំងចាត់ទុកថាសំណាងសម្រាប់អតិថិជនក្នុងអំឡុងបុណ្យឆ្នាំថ្មីផងដែរ”។
បើតាមអាជីវករ មូលហេតុដែលក្រូចថ្លុងថៃនៅតែថ្លៃគឺដោយសារតម្រូវការក្នុងស្រុកកើនឡើង។ ម៉្យាងវិញទៀត ការរចនា និងគុណភាពផលិតផលថៃ នៅតែល្អជាងផលិតផលវៀតណាម ដូច្នេះហើយ បើទោះបីជាតម្លៃលក់ខ្ពស់ជាងពីរដងក៏ដោយ ក៏ពួកវានៅតែទាក់ទាញអតិថិជន។ លើសពីនេះ កសិករដាំក្រូចថ្លុងក្នុងស្រុកមិនចេះថែទាំវាទេ ដូច្នេះគុណភាព និងរសជាតិគឺមិនល្អនោះទេ ដោយសារច្រូតកាត់មិនស្មើគ្នា៕

បរទេស៖ ក្នុងរយៈពេល ៩ ខែចុងក្រោយនេះលោក Russ Cook បានរត់ចម្ងាយជាង ១២,០០០ គីឡូម៉ែត្រឆ្លងកាត់ប្រទេសចំនួន ១៣ នៅទ្វីបអាហ្វ្រិក ដោយបច្ចុប្បន្នគាត់ស្ថិតនៅក្នុងប្រទេសសេណេហ្គាល់ជាមួយនឹងក្រុមគាំទ្ររបស់គាត់។

Russ Cook អាយុ ២៦ ឆ្នាំ សញ្ជាតិអង់គ្លេស បានចេញដំណើរពីប្រទេសអង់គ្លេសទៅទ្វីបអាហ្រ្វិក កាលពីចុងខែមេសា ឆ្នាំ ២០២៣។ គាត់មានបំណងក្លាយជាមនុស្សដំបូងគេដែលរត់ប្រវែងនៃទ្វីបអឺរ៉ុបទៅទ្វីបអាហ្វ្រិក ដោយឆ្លងកាត់ ១៦ ប្រទេស និងបញ្ចប់ការរត់ម៉ារ៉ាតុងជាង ៣៦៩.៤២ គីឡូម៉ែត្រ ដើម្បីរៃអង្គាសប្រាក់សម្រាប់អង្គការសប្បុរសធម៌មួយ។

Russ Cook មានបណ្ដាញសង្គមដ៏ធំមួយដែលតាមដាន ហើយបានរៃអង្គាសប្រាក់បានជាង ១៧០,០០០ ដុល្លារអាមេរិក ក្នុងរយៈពេល ៩ ខែកន្លងទៅ ដោយគាត់បានរត់ជាង ១២,០០០ គីឡូម៉ែត្រ ឆ្លងកាត់ ១៣ ប្រទេស ដែលជាមធ្យមច្រើនជាងមួយម៉ារ៉ាតុងក្នុងមួយថ្ងៃ។ ការរត់ឆ្លងទ្វីបរបស់គាត់មានហានិភ័យខ្ពស់ណាស់ដូចជាគាត់ត្រូវបានគេប្លន់របស់របរមួយចំនួននៅតាមផ្លូវស្ងាត់ ឬក្នុងព្រៃជាដើម ប៉ុន្តែគ្មានបញ្ហាអ្វីអាចរារាំង Cook ពីការបន្តដំណើររបស់គាត់បានទេ។

ទោះជាយ៉ាងណាក៏ដោយ Cook មានគម្រោងបញ្ចប់ដំណើរផ្សងព្រេងរបស់គាត់នៅទុយនីស៊ី ចុងខាងជើងនៃទ្វីបអាហ្រ្វិក ប៉ុន្តែអាចមានឧបសគ្គដោយសារគាត់មិនអាចទទួលបានទិដ្ឋាការទៅប្រទេសអាល់ហ្សេរីបានទេ។ មុននឹងឆ្លងដែនទៅប្រទេសទុយនីស៊ីដែលជាគោលដៅរបស់គាត់ ត្រូវតែទទួលបានទិដ្ឋាការទៅប្រទេសអាល់ហ្សេរី តាមរយៈព្រំដែនប្រទេសម៉ូរីតានីជាមុនសិន។ ប៉ុន្តែព្រំដែនរវាងប្រទេសទាំងពីរនេះជាតំបន់ដែលមានប្រវត្តិស្មុគស្មាញ ដែលក្រុមប្រដាប់អាវុធមូស្លីមតែងតែធ្វើប្រតិបត្តិការ។

Cook បានប្រកាសនៅលើបណ្តាញសង្គម X នៅថ្ងៃទី ២៣ ខែមករាថា “ប្រសិនបើមិនទទួលបានទិដ្ឋាការ គម្រោងអាហ្រ្វិកនឹងត្រូវបង្ខំឱ្យបញ្ចប់”។ ជាមួយគ្នានេះដែរ Cook ក៏បានបង្ហោះវីដេអូអរគុណអ្នកគាំទ្រសម្រាប់ការគាំទ្រ និងអំពាវនាវរកជំនួយ។ វីដេអូរបស់ Cook ត្រូវបានគេចែករំលែកដល់ទៅ ១១ លានដង ដែលទាក់ទាញចំណាប់អារម្មណ៍ពីរដ្ឋាភិបាលអង់គ្លេសយ៉ាងខ្លាំង។

មិនយូរប៉ុន្មាន លោក Alexander Stafford ប្រធានក្រុមសភាអង់គ្លេសទទួលបន្ទុកបញ្ហាអាល់ហ្សេរី បានសរសេរលិខិតចំហមួយទៅកាន់ឯកអគ្គរដ្ឋទូតអាល់ហ្សេរីប្រចាំនៅចក្រភពអង់គ្លេស ដោយស្នើសុំទិដ្ឋាការសម្រាប់លោក Cook។ ការិយាល័យបរទេស Commonwealth and Development Office (FCDO) របស់ចក្រភពអង់គ្លេសបាននិយាយថា ខ្លួនបានទទួលសារជាច្រើនអំពីស្ថានភាពរបស់លោក Cook ប៉ុន្តែការសម្រេចចិត្តក្នុងការចេញទិដ្ឋាការគឺស្ថិតនៅលើប្រទេសម្ចាស់ផ្ទះគេនោះទេ៕

ដំណើររថភ្លើងដ៏វែងបំផុតលើពិភពលោកដែលមានចម្ងាយផ្លូវប្រមាណ ១៣.០០០ គីឡូម៉ែត្រ និងប្រើរយៈពេលរហូតដល់ ២១ ថ្ងៃ នោះគឺជារបស់មហាអំណាចចិននេះឯង។

កាលពីកាលឆ្នាំ ២០១៤ គម្រោងខ្សែក្រវាត់និងផ្លូវរបស់ប្រទេសចិន ក្រោមគំនិតផ្តួចផ្តើមរបស់លោកស៊ី ជីនពីង ប្រធានាធិបតីចិន គឺបានលេចចេញនូវរថភ្លើងឆ្លងទ្វីបចម្ងាយជាង ១៣.០០០គីឡូម៉ែត្រ ក្រោមទុនវិនិយោគប្រមាណ ៩០០ ពាន់លានដុល្លារ ដើម្បីស្តារឡើងវិញនូវផ្លូវពាណិជ្ជកម្មបុរាណនិងសំខាន់បំផុតក្នុងប្រទេសចិន។

ខ្សែរថភ្លើង Yiwu-Madrid ដែលជារថភ្លើងដឹកទំនិញដ៏ធំចេញពីខេត្ត Zhejiang ប្រទេសចិន នឹងធ្វើដំណើរឆ្ពោះទៅកាន់អឺរ៉ុបខាងកើត រួមមានប្រទេសហ្សាក់ស្ថាន រុស្ស៊ី បេឡារុស្ស ប៉ូឡូញ អាល្លឺម៉ង់ និងបារាំង ហើយបញ្ចប់នៅក្នុងរដ្ឋធានីនៃប្រទេសអេស្ប៉ាញ។ រីឯរយៈធ្វើដំណើរនោះទៀតសោតគឺមានរយៈពេលរហូតដល់ទៅ៣សប្តាហ៍។

ក្រុមហ៊ុន InterRail Group ដែលជាក្រុមហ៊ុនដឹកជញ្ជូនអន្តរជាតិចុះបញ្ចីក្នុងប្រទេសស្វីស បានបណ្តាក់ទុនវិនិយោគជាមួយក្រុមហ៊ុន China Railways (ប្រទេសចិន) និងក្រុមហ៊ុន Deutsche Bahn (ប្រទេសអាល្លឺម៉ង់) ព្រមជាមួយនឹងក្រុមហ៊ុន Russian Railways (ប្រទេសរុស្សី) សហការគ្នាបង្កើតបានជាខ្សែរថភ្លើង Yiwu-Madrid ដ៏វែងបំផុតរបស់ពិភពលោក។

ខ្សែរថភ្លើងដ៏អស្ចារ្យនេះបានដាក់ឲ្យដំណើរការកាលពីខែវិច្ឆិកា ឆ្នាំ ២០១៤កន្លងទៅ ក្នុងគោលបំណងបង្កើននូវទំហំពាណិជ្ជកម្មពហុភាគីរវាងប្រទេសទាំងនោះ ជាពិសេសក្នុងការដឹកជញ្ជូនទំនិញផ្សេងៗប្រកបដោយភាពប្រសិទ្ធភាពខ្ពស់ ដូចជាគ្រឿងអេឡិចត្រូនិច និងគ្រឿងបន្លាស់យាន្តយន្តជាដើម៕