ប្រទេសចិន ៖ បុរសម្នាក់ អាយុ៣៥ឆ្នាំ រស់នៅខេត្តហឺណាន ប្រទេសចិន រៀបរាប់ថា គាត់មានប្រាក់ចំនួន១លានយាន់ផ្ញើនៅធនាគារ ហើយគាត់អាចរស់នៅបាន ដោយសារយកការប្រាក់មកចាយវាយក្នុងជីវភាពប្រចាំថ្ងៃ ។ គាត់បញ្ជាក់ថា ដើម្បីកុំឱ្យជីវិតរបស់គាត់ជួបបញ្ហា គឺគាត់មិនព្រមរៀបការជាមួយនារីណាទេ ពីព្រោះមិនចង់មានកូននាំឱ្យមានបន្ទុកច្រើន ។

គាត់បន្តថា ការចំណាយលើកន្លែងស្នាក់នៅនាពេលបច្ចុប្បន្ន បានកើនឡើងជាបន្តបន្ទាប់ ហើយថ្លៃបណ្ណាការខ្ពស់ណាស់ ខណៈប្រាក់សម្រាប់ភ្ជាប់ពាក្យវិញក៏ខ្ពស់ដែរ ។ លើសពីនេះ ផ្ទះ, រថយន្ត និងសម្ភារៈប្រើប្រាស់ផ្សេងៗមានតម្លៃខ្ពស់ខ្លាំង ។ ហេតុនេះ ទើបគាត់សម្រេចចិត្តរស់នៅម្នាក់ឯងល្អជាង បើទោះជាគាត់រស់នៅក្នុងផ្ទះមើលទៅដូចគំនរសំរាម ក៏គាត់មិនរៀបការដែរ ។

វីដេអូរបស់បុរសរូបនេះដែលកំពុងសម្រាក, បរិភោគអាហារ និងលេងទូរស័ព្ទនៅលើគ្រែ ត្រូវបានគេចែកចាយយ៉ាងច្រើនក្នុងបណ្តាញសង្គមប្រទេសចិន ។ បុរសនេះសន្សំប្រាក់បានចំនួន១លានយាន់ពីការបំពេញការងារជាច្រើនឆ្នាំ ហើយគាត់មានមោទនភាពដែលមានប្រាក់សន្សំនេះ ។

គាត់និយាយថា គាត់បានរស់នៅយ៉ាងសុខស្រួលដោយសារយកការប្រាក់ពីចាយវាយ ហើយគាត់ពុំចាំបាច់ស្វែងរកប្រាក់បន្ថែមទៀត និងពុំបាច់មានមនុស្សជាទីស្រឡាញ់ទេ ពីព្រោះជីវិតប្តី-ប្រពន្ធ គឺអាចត្រូវគេមើលងាយគ្រប់បែបយ៉ាង ទើបគាត់សម្រេចចិត្តមិនរៀបការតែម្តង ។ គាត់បានរស់នៅតែម្នាក់ឯងមួយរយៈហើយ ហើយគាត់ក៏ចាប់ផ្តើមធ្លាប់នឹងការរស់នៅបែបនេះ ។

បុរសរូបនេះបន្តថា ៖ «ខ្ញុំជក់បារី ហើយផឹកស្រា ហើយខ្ញុំជាអ្នកចូលចិត្តចម្អិនអាហារ តែពេលរស់នៅម្នាក់ឯងបែបនេះ ចាំបាច់ធ្វើអាហារធ្វើអី ។ ខ្ញុំខ្ចិលធ្វើអាហារ ទើបខ្ញុំក៏កុម្ម៉ង់អាហារឱ្យគេយកមកឱ្យដល់ផ្ទះ ហើយពេលហូបឆ្អែត ខ្ញុំក៏បោះសំរាមចោលក្បែរគ្រែគេង» ។

បុរសខាងលើជឿថា សេចក្តីស្នេហា គឺដូចគ្នានឹងគ្រឿងទេសសម្រាប់ជីវិតដែរ ហើយគាត់មិនចាំបាច់មានសេចក្តីស្នេហាទេ ។ មនុស្សម្នាក់អាចមានសេរីភាពគ្មានដែនកំណត់បាន ហើយប្រាក់ទាំងនេះបានមកពីញឺសឈាម និងប្រាជ្ញារបស់ខ្លួនឯង បើទោះជាគាត់ពុំបានស្រឡាញ់នារីណាម្នាក់ ឬរៀបការក្តី ប៉ុន្តែគាត់ក៏អាចហូបអាហារ និងផឹកស្រាម្នាក់ឯងបាន ។ ដូច្នេះ គាត់រីករាយនឹងអ្វីដែលគាត់មានក្នុងជីវិត ហើយរស់នៅដោយគ្មានការដាក់សម្ពាធ និងគ្មានកង្វល់ជាមួយអ្នកជិតខាង ។

រីឯអ្នកលេងបណ្តាញសង្គមយល់ឃើញថា ប្រាក់ចំនួន១លានយាន់នេះមិនគ្រប់គ្រាន់សម្រាប់ការរស់នៅថ្ងៃអនាគតទេ ខណៈអ្នកខ្លះទៀតប្រាប់ថា គាត់គួរតែធ្វើការចាប់ពី៥ឆ្នាំ ទៅ១០ឆ្នាំទៀត ចាំឈប់ធ្វើការ ។ រីឯអ្នកខ្លះទៀតប្រាប់ថា បើទោះជាគាត់បដិសេចសេចក្តីស្រឡាញ់ ប៉ុន្តែគួរតែគាត់សម្អាតផ្ទះខ្លះផង ។ ចំណែកក្រុមហ៊ុនសម្អាតផ្ទះបានចំណាយពេលជាច្រើនម៉ោងដើម្បីសម្អាតផ្ទះឱ្យគាត់ ៕

បាងកក៖ ថ្មីៗនេះ គឺបានកើតមានករណីក្មេងប្រុសជាសិស្សសាលាថៃថ្នាក់ទី៨ម្នាក់ ដែលត្រូវបានគេស្គាល់ថាគាត់ជាមនុស្សមិនប្រក្រតី បានដកកាំបិតចាក់សម្លាប់មិត្តរួមថ្នាក់ខ្លួនភ្លាមៗ ព្រោះបានត្រូវគេមើលងាយ និងចំអកលើរូបគាត់។

ហេតុការណ៍នេះ គឺបានកើតឡើងនៅវេលាម៉ោង ៨ និង៣០នាទីព្រឹក កាលពីថ្ងៃទី២៩ ខែមករា នៅសាលា Nak Nava Upatham ទីក្រុងបាំងកក ប្រទេសថៃ ហើយថ្នាក់រៀនទាំងអស់ត្រូវបានលុបចោលភ្លាមៗ។

មិត្តភក្តិជនរងគ្រោះបានប្រាប់អ្នកយកព័ត៌មានថា ពួកគេបានឃើញជនរងគ្រោះ សើចចំអកឡកឡើយដាក់ក្មេងប្រុសមិនប្រក្រតីម្នាក់នេះ។ ដោយទ្រាំពុំបាន ក្មេងប្រុសមិនប្រក្រតីម្នាក់នេះបានទាញកាំបិតដេញចាក់ក្មេងប្រុសជនរងគ្រោះតែម្តង។

ដំបូងឡើយ ក្មេងប្រុសរងគ្រោះបានព្យាយាមរត់គេចខ្លួន ប៉ុន្តែជនដៃដល់បានរត់តាមពីក្រោយ ហើយបានចាក់គាត់ ចំផ្នែកខាងស្តាំ ចំកញ្ចឹងក ដែលបណ្តាលឲ្យជនរងគ្រោះ ដួលទៅនឹងដី ក្នុងទីលានបាល់បោះ។ ភ្លាមៗនោះ បុគ្គលិកសាលាបានប្រញាប់ប្រញាល់ទៅជួយជនរងគ្រោះនៅកន្លែងកើតហេតុ។

បុគ្គលិកនិយាយថា ក្មេងប្រុសមិនប្រក្រតីម្នាក់នេះ ជារឿយៗគឺគាត់មិនមាត់មិនករអ្វីទេ ហើយគាត់គឺតែងតែត្រូវបានមិត្តរួមថ្នាក់របស់គាត់និយាយលេងសើចចំអកដាក់គាត់ជាញឹកញាប់។

ទោះបីជាបើមានការជួយសង្គ្រោះក្មេងប្រុសនោះនិងបានបញ្ជូនទៅកាន់មន្ទីរពេទ្យភ្លាមៗហើយក៏ដោយ ប៉ុន្តែគឺមិនអាចសង្គ្រោះជីវិតរូបគេបានទេ។ នៅទីបំផុត ក្មេងប្រុសដែលជាជនរងគ្រោះក៏ត្រូវបានប្រកាសថា«ស្លាប់»បាត់ទៅហើយ។

រីឯក្មេងប្រុសបង្កហេតុក៏ត្រូវបានបញ្ជូនទៅនគរបាលប៉ូលីសដើម្បីធ្វើការស៊ើបអង្កេតនិងចាត់វិធានការបន្ត ខណៈដែលមានការព្រមានចំពោះក្មេងៗដទៃទៀតថាមិនឱ្យនិយាយលេងសើច ចំអកឡកឡើយ ឬសម្លុត ( Bully ) ទៅលើក្មេងប្រុសម្នាក់នេះទៀតនោះទេ៕

ប្រទេសថៃ ៖ គ្រូពេទ្យសុខភាពផ្លូវចិត្តនៅប្រទេសថៃបានសំណូមពរឱ្យបញ្ឈប់អាកប្បកិរិយាការនិយាយស្តី និងបង្ហាញកាយវិការ Bully នៅតាមសាលារៀនជាបន្ទាន់ ដោយគ្រូពេទ្យបញ្ជាក់ថា អ្នក Bully, អ្នកត្រូវគេ Bully និងអ្នកឈរមើល គួរតែរក្សាភាពស្ងប់ស្ងាត់, ឈប់ឆេវឆាវ និងបង្កើតកន្លែងមានសុវត្ថិភាព ។ រីឯគ្រូបង្រៀនគួរតែគ្រប់គ្រងស្ថានការណ៍ឱ្យបានល្អ ដើម្បីចៀសវាងមានអំពើហិង្សាកើតឡើង ។

កាលពីថ្ងៃទី៣០ ខែមករា ឆ្នាំ២០២៤ លោក Chonnan Srikaew រដ្ឋមន្ត្រីក្រសួងសុខាភិបាលប្រទេសថៃលើកឡើងថា ក្រោយហេតុការណ៍កូនសិស្សប្រើអំពើហិង្សាដាក់គ្នារហូតដល់ស្លាប់ នាយកដ្ឋានសុខភាពផ្លូវចិត្ត និងស្ថាប័នពាក់ព័ន្ធបានចុះតាមតំបន់ដើម្បីរៀបចំផែនការ និងវាយតម្លៃសុខភាពផ្លូវចិត្តរបស់សិស្សចំនួន៥៥នាក់ និងគ្រូបង្រៀន១២នាក់ ហើយការវាយតម្លៃឃើញថា កូនសិស្សចំនួន៣៦នាក់ និងគ្រូ១២នាក់ មានភាពតានតឹងផ្លូវចិត្ត ។ ហេតុនេះ ក្រសួងសុខាភិបាលបានកំណត់ផែនការព្យាបាលផ្លូវចិត្តរយៈពេលវែង ។

លោកវេជ្ជបណ្ឌិត Phongkasem Kaimook មកពីនាយកដ្ឋានសុខភាពផ្លូវចិត្តថ្លែងថា មូលហេតុឈានដល់ការប្រើប្រាស់អំពើហិង្សា គឺមិនមែនបណ្តាលមកពីកត្តាតែមួយទេ ហើយត្រូវដោះស្រាយគ្រប់កត្តាទាំងអស់ជាមួយគ្នា ដូចជា ៖ កត្តាផ្ទាល់ខ្លួន គឺមានបញ្ហាការគ្រប់គ្រងអារម្មណ៍, ការគ្រប់គ្រងកំហឹង, ខ្វះការអត់ធ្មត់ ឬជំងឺពិបាកគ្រប់គ្រងខ្លួនឯង ។

កត្តាក្រុមគ្រួសារ គឺការប្រើប្រាស់អំពើហិង្សាលើរាងកាយ, ការនិយាយស្តី និងអារម្មណ៍ ទើបធ្វើឱ្យកុមារយកគំរូតាម ។ រីឯកត្តាសាលារៀន, បរិស្ថានជុំវិញ, ការគំរាមកំហែង, ស្ថិតក្នុងចំណោមមិត្តភក្តិចូលចិត្តប្រើប្រាស់ហិង្សា និងថ្នាំញៀន គឺជាការបង្ហាញពីការប្រើអំពើហិង្សាក្នុងជីវិតប្រចាំថ្ងៃ ។ លើសពីនេះ កត្តាផ្នែកអារម្មណ៍នឹងជំរុញឱ្យមានការប្រើអារម្មណ៍ហិង្សាផងដែរ ។

លោកវេជ្ជបណ្ឌិត Phongkasem Kaimook បន្តថា ការដោះស្រាយអាកប្បកិរិយាហិង្សាចំពោះកុមារ គឺយើងគួរតែគ្រប់គ្រងកុមារដោយឱ្យពួកគេបញ្ឈប់ការឆេវឆាវ ដូចជា ៖ យើងអាចឱប ឬចាប់ក្មេងដើម្បីឱ្យពួកគេឈប់ប្រើហិង្សា ហើយពេលក្មេងស្ងប់ស្ងាត់ហើយ យើងគួរតែជជែកជាមួយគេឱ្យនិយាយចេញមក ។ គួរតែចាប់ផ្តើមអប់រំកុមារចាប់ពីអាយុ៣ឆ្នាំឡើងទៅ ដើម្បីឱ្យកុមារចេះគ្រប់គ្រងអារម្មណ៍ខ្លួនឯង ដូចជា ៖ អប់រំឱ្យកុមារចេះបំបែកខ្លួនចេញពេលពួកគេខឹង រួមទាំងបង្ហាត់កុមារឱ្យមានចិត្តមេត្តា និងសប្បុរសចំពោះមនុស្ស និងសត្វ ។

លោកវេជ្ជបណ្ឌិតនិយាយថា ៖ «ការប្រើអំពើហិង្សាដាក់ទោសលើកុមារឆេវឆាវ គឺមិនអាចជួយឱ្យចរិតពួកគេល្អប្រសើរបានទេ ។ យើងមិនគួរចរចាជាមួយកុមារឆេវឆាវ, រិះគន់ និងប្រៀបធៀបទេ ពីព្រោះវានឹងធ្វើឱ្យកុមារមានភាពអន់ថយ» ។

រីឯអ្នកគ្រូពេទ្យ Wimonrat Wanphen នាយកវិទ្យាស្ថានសុខភាពផ្លូវចិត្តកុមារ និងយុវវ័យ និយាយថា បើសង្ស័យថា កូនចៅរបស់យើងទទួលផលប៉ះពាល់ពីអំពើហិង្សា យើងអាចពិនិត្យមើលស្លាកស្នាមលើរាងកាយកើតឡើងពីការប្រើហិង្សា និងអាកប្បកិរិយាកុមារ ។ យើងអាចពិនិត្យការផ្លាស់ប្តូរអារម្មណ៍របស់ពួកគេ ដូចជា ៖ ភ័យខ្លាច, សោកសៅ និងឆេវឆាវ ហើយយើងគួរចំណាយពេលវេលាស្តាប់ និងជជែកជាមួយពួកគេឱ្យបានច្រើន ។

ក្រៅពីនេះ យើងគួរសួរសំណួរងាយៗទៅកាន់ពួកគេ ដូចជា ៖ តើថ្ងៃនេះ យ៉ាងម៉េចដែរ? ថ្ងៃនេះ មានសេចក្តីសុខជាមួយអ្វីខ្លះ? ថ្ងៃនេះ មិត្តភក្តិ និងគ្រូ យ៉ាងម៉េចដែរ? ថ្ងៃនេះ មិនចូលចិត្តអ្វីខ្លាំងបំផុត? បើសង្ស័យថា កូនត្រូវគេធ្វើបាប យើងអាចសន្ទនាជាប្រយោគងាយៗ ដូចជា ៖ បើមានអ្នកណាម្នាក់ធ្វើឱ្យកូនឈឺចាប់ ឬខូចចិត្ត កូនអាចរៀបរាប់ឱ្យប៉ាម៉ាក់ស្តាប់បាន ។ ហេតុនេះ ចូរឱ្យកូនរៀបរាប់រឿងរ៉ាវឱ្យយើងស្តាប់ដោយគ្មានការរអ៊ូរទាំ និងរិះគន់ ។

ចំណែកលោកគ្រូពេទ្យ Yongyut Wongpiromsant ទីប្រឹក្សានាយកដ្ឋានសុខភាពផ្លូវចិត្តនិយាយថា អាកប្បកិរិយាការ Bully នៅសាលារៀន គឺជាអាកប្បកិរិយាគំរាមកំហែងដោយប្រើពាក្យសម្តីធ្ងន់ធ្ងរ ហើយវានឹងប៉ះពាល់ដល់អ្នកត្រូវគេ Bully គឺធ្វើឱ្យពួកគេខ្វះទំនុកចិត្ត និងខ្វះមោទនភាពលើខ្លួនឯង ។ ទីបំផុត ពួកគេមានភាពសោកសៅ ប៉ុន្តែផលប៉ះពាល់ទាំងនេះ មិនបានកើតឡើងលើអ្នកត្រូវគេ Bully ទេ ប៉ុន្តែវាក៏កើតឡើងចំពោះអ្នក Bully គេផងដែរ ។

លោកគ្រូពេទ្យបន្តថា អ្នកត្រូវគេ Bully រឿយៗ គឺចុងក្រោយ អ្នកនោះនឹងក្លាយជាមនុស្សសោកសៅ ហើយអាចធ្វើបាបខ្លួនឯង ឬធ្វើបាបអ្នក Bully ។ នៅបរិវេណសាលារៀននីមួយៗ គួរជាទីកន្លែងមានសុវត្ថិភាពសម្រាប់កូនសិស្ស, គ្មានការប្រើអំពើហិង្សាលើផ្លូវកាយ និងពាក្យសម្តី ។ អ្វីដែលកើតឡើងចំពោះសិស្ស គ្រូបង្រៀនអាចមើលឃើញ និងដោះស្រាយបញ្ហា ព្រមទាំងលើកផលហេតុទៅសិស្សថា Bully គឺជាការគំរាមដោយពាក្យសម្តីដែលខ្លាំងជាងការប្រព្រឹត្តដោយផ្ទាល់ ។ វានឹងធ្វើឱ្យមានរបួសផ្លូវចិត្ត ដូចជា ៖ ការជំរិតទារប្រាក់ ឬវាយដំ ហើយនេះជាការប្រើហិង្សាមួយដែរ ។

លោកគ្រូពេទ្យថា ៖ «គ្រូត្រូវតែយកចិត្តទុកដាក់លើអាកប្បកិរិយារបស់សិស្សក្នុងថ្នាក់រៀន និងដោះស្រាយបញ្ហាភ្លាមៗ មិនមែនបណ្តោយឱ្យវារាលដាលខ្លាំងទេ ។ រីឯអ្នកឈរមើលមិត្តភក្តិត្រូវគេ Bully ចាត់ទុកថា ជាការធ្វេសប្រហែស ។ ហេតុនេះ គ្រូត្រូវប្រើជំនាញជីវិតអប់រំពួកគេ ដើម្បីឱ្យអ្នកឈរមើលគេ Bully នាំគ្នាចូលជួយមិត្ត, ជម្រាបឱ្យគ្រូជ្រាប ឬហាមមិត្តកុំឱ្យ Bully មិត្ត» ។

ចុងក្រោយ លោកគ្រូពេទ្យបញ្ជាក់ថា អ្នកដែលត្រូវគេ Bully ភាគច្រើនជាមនុស្សទន់ខ្សោយ និងមិនហ៊ានប្រឈមមុខជាមួយអ្នកដទៃ ។ ដូច្នេះ បើបានឃើញការ Bully នៅតាមសាលារៀន សូមឱ្យគ្រប់គ្នាជួយបញ្ឈប់ភ្លាមៗ ហើយពុំបាច់គិតពីទំនាក់ទំនងរវាងអ្នកត្រូវគេ Bully និងអ្នក Bully គេនោះទេ ៕

បរទេស៖ ប្រធានាធិបតីរុស្ស៊ីលោក វ្ល៉ាឌីមៀ ពូទីន បានបញ្ជាឱ្យសាងសង់នាវាបំបែកទឹកកកដើរដោយថាមពលនុយក្លេអ៊ែរដែលមានឈ្មោះថា Leningrad នៅឯកន្លែងផលិតកប៉ាល់បាល់ទិកក្នុងទីក្រុង Saint Petersburg ។

កាលពីថ្ងៃទី ២៨ ខែមករា ឆ្នាំ២០២៤ យោងតាម Maritime Executive បានឱ្យដឹងថា ប្រធានាធិបតីរុស្ស៊ី លោក វ្ល៉ាឌីមៀ ពូទីន បានចូលរួមក្នុងពិធីបើកការដ្ឋានសាងសង់នាវាបំបែកទឹកកកនុយក្លេអ៊ែរជំនាន់ទី ៥ ក្រោមគម្រោង 22220 នៅទីលានបាល់ទិក។ តាមការណែនាំពីប្រធានាធិបតី នាយកសាជីវកម្មថាមពលនុយក្លេអ៊ែរ Rosatom លោក Alexey Likhachev និងនាយក VTB លោក Andrey Kostin រួមជាមួយអ្នកនាំពាក្យក្រុមប្រឹក្សាសហព័ន្ធ លោកស្រី Valentina Matvienko និង St. Petersburg លោក Alexander Beglov បានទទួលយក និងរឹតបន្តឹងប៊ូឡុងនៅក្នុងតួដំបូងនៃនាវាបំបែកទឹកកកនាពេលអនាគត។

លោកពូទីនបានសង្កត់ធ្ងន់ថា កប៉ាល់ថ្មីនេះនឹងអនុញ្ញាតឱ្យមានពាណិជ្ជកម្មកាន់តែច្រើននៅតាមបណ្តោយផ្លូវសមុទ្រខាងជើង។ កប៉ាល់នេះមានឈ្មោះថា Leningrad ដោយផ្លាស់ប្តូរពីឈ្មោះដំបូង Sakhalin គឺជានាវាបំបែកទឹកកកទី ២ ដែលឈ្មោះរបស់វាបានផ្លាស់ប្តូរពីតំបន់ភូមិសាស្ត្រនៃតំបន់អាក់ទិកទៅជាឈ្មោះនៃទីក្រុងរុស្ស៊ីសម័យសូវៀត។

នាវាបំបែកទឹកកកនុយក្លេអ៊ែរ Leningrad នឹងមានប្រវែង ១៧៣.៣ ម៉ែត្រ ទទឹង ៣៤ ម៉ែត្រ កម្ពស់ ៥២ ម៉ែត្រ ជាមួយនឹងសេចក្តីព្រាងការរចនា ១០.៥ ម៉ែត្រ និងសេចក្តីព្រាងប្រតិបត្តិការអប្បបរមា ៩.២ ម៉ែត្រ រួមទាំងទម្ងន់នៃកប៉ាល់គឺ ៣៣,៥៤០ តោន។ នាវាបំបែកទឹកកកនេះត្រូវបានរចនាឡើងសម្រាប់ប្រតិបត្តិការរយៈពេល ៤០ ឆ្នាំ ដោយកប៉ាល់នេះអាចផ្ទុកនាវិកបាន ៥២ នាក់។ កប៉ាល់ដំណើរការដោយប្រភពថាមពលសំខាន់ពីរ ដែលបានមកពីរ៉េអាក់ទ័រ RITM-200 និងមានសមត្ថភាព 60 MW ។

គួរបញ្ជាក់ដែរថា នាវាបំបែកទឹកកក Project 22220 គឺជានាវាបំបែកទឹកកកដ៏ធំ និងមានឥទ្ធិពលបំផុតនៅលើពិភពលោក។ ប្រទេសរុស្ស៊ីអនុវត្តគម្រោង 22220 ដើម្បីផ្តល់សមត្ថភាពបំបែកទឹកកកបន្ថែមដល់ផ្លូវសមុទ្រខាងជើង។ ដូច្នេះនាវានេះនឹងបំបែកទឹកកកចំនួន ៣ ពេលកំពុងដំណើរការ ហើយ ៣ គ្រឿងទៀតនឹងចូលរួមជាមួយកងនាវានៅឆ្នាំ ២០៣០៕

ប្រទេសចិន៖ កាលពីថ្ងៃទី២៨ ខែមករា ឆ្នាំ២០២៤ យោងគេហទំព័រអន្តរជាតិមួយ បានឱ្យដឹងថា ប្រទេសចិនបានរកឃើញអណ្តូងប្រេងឆៅបម្រុងរហូតដល់ ១០៧ លានតោននៅក្នុងអាង Sanmen Hiep នៃខេត្ត Henan ភាគកណ្តាលប្រទេសចិន ក្នុងបរិបទដែលអាជ្ញាធរបង្កើនកិច្ចខិតខំប្រឹងប្រែងដើម្បីបង្កើនសន្តិសុខថាមពល និងកាត់បន្ថយការពឹងផ្អែកកាន់តែខ្លាំងលើការនាំចូលប្រេង។

យោងតាមរបាយការណ៍បានឱ្យដឹងទៀតថា ទំហំប៉ាន់ស្មាននៃអណ្តូងប្រេងនេះត្រូវបានរាយការណ៍ដោយការស្ទង់មតិភូមិសាស្ត្ររបស់ប្រទេសចិនដែលស្ថិតនៅក្រោមក្រសួងធនធានធម្មជាតិ ដោយទុនបម្រុងរបស់វាស្មើនឹងជាងពាក់កណ្តាលនៃទិន្នផលរបស់ប្រទេសចិនក្នុងឆ្នាំ ២០២៣។ នេះបើយោងតាម CCTV បានរាយការណ៍ថា “អណ្តូងប្រេងមានមូលដ្ឋានគ្រឹះក្នុងការកសាងមូលដ្ឋានធនធានប្រេង និងឧស្ម័ន ” ដោយពិពណ៌នាការរកឃើញថាជាព្រឹត្តិការណ៍ដ៏សំខាន់មួយនៅក្នុងការស្ទង់មតិប្រេង និងឧស្ម័នរយៈពេល ៥០ ឆ្នាំ ដែលត្រូវបានធ្វើឡើងនៅក្នុងខេត្ត Ha Nam ។

ដូច្នេះហើយ ប្រេងដែលរកឃើញនៅ Ha Nam គឺជាប្រេងឆៅស្រាល មិនមានជាតិទឹក និងការចម្រាញ់គឺមានភាពងាយស្រួល។ លោក Peng Peng ប្រធានប្រតិបត្តិនៃសមាគមកំណែទម្រង់ក្វាងទុង បាននិយាយថា “អណ្តូងប្រេងនេះមានចំនួនជិតមួយភាគបីនៃផលិតកម្មប្រេង និងឧស្ម័នបច្ចុប្បន្នសរុបរបស់ប្រទេស ដែលជាទុនបំរុងដ៏សំខាន់ និងធ្វើឱ្យវាក្លាយជារបកគំហើញដ៏សំខាន់សម្រាប់ប្រទេសចិន ដោយសារប្រទេសនេះពឹងផ្អែកខ្លាំងលើប្រេងឆៅ។

ប្រេងឆៅ គឺជាប្រេងដែលចម្រាញ់ចេញពីដីផ្ទាល់ ហើយត្រូវបានប្រើប្រាស់យ៉ាងទូលំទូលាយនៅក្នុងឧស្សាហកម្មទាក់ទងនឹងសម្លៀកបំពាក់ សារធាតុគីមី ឱសថ យានអវកាសជាដើម…ទោះបីជាទិន្នផលប្រេងឆៅរបស់ប្រទេសចិនមានចំនួនច្រើនគួរសមនៅលើមាត្រដ្ឋានពិភពលោកក៏ដោយ ក៏តម្រូវការសម្រាប់ធនធានធម្មជាតិនេះនៅតែមានកម្រិតខ្ពស់នៅឡើយ ព្រោះប្រទេសនេះគឺជាអ្នកផលិតឧស្សាហកម្មធំបំផុតរបស់ពិភពលោក។

គួរបញ្ជាក់ដែរថា កាលពីឆ្នាំមុន ប្រទេសចិនបានពឹងផ្អែកលើការនាំចូលពីបរទេសដើម្បីបំពេញតម្រូវការប្រេងឆៅច្រើនជាង ៧០% ដែលរុស្ស៊ី និងអារ៉ាប៊ីសាអូឌីតគឺជាប្រទេសលក់ប្រេងកំពូលទៅឱ្យចិន។ ទោះជាយ៉ាងណាក៏ដោយ បើយោងតាមទិន្នន័យដែលចេញផ្សាយដោយរដ្ឋបាលថាមពលជាតិ បានឱ្យដឹងថា ប្រទេសចិនបានផលិតប្រេង និងឧស្ម័នច្រើនជាង ៣៩០ លានតោន រួមទាំងប្រេងឆៅ ២០៨ លានតោននៅឆ្នាំ២០២៣ ដែលស្មើនឹងប្រហែល ១.៥៨% នៃទុនបម្រុងពិភពលោក និងជាប់ចំណាត់ថ្នាក់ទី ១៣ នៅលើពិភពលោក៕