ប្រទេសម៉ាឡេស៊ី៖ លោកយាយ Siti Hawa Hussin អាយុ ១១២ ឆ្នាំ ដែលជាជនជាតិម៉ាឡេស៊ី បានត្រៀមខ្លួនរួចជាស្រេចក្នុងនាមជាកូនក្រមុំ ប្រសិនបើមានយុវជនណាម្នាក់សុំគាត់រៀបការ។

កាលពីថ្ងៃទី១៤ ខែកុម្ភៈ ឆ្នាំ២០២៤ យោងតាមរបាយការណ៍ពីប្រព័ន្ធផ្សព្វផ្សាយម៉ាឡេស៊ី បានឱ្យដឹងថា លោកយាយ Siti Hawa Hussin មានបំណងចង់រៀបការម្តងទៀត ទោះបីជាគាត់មានអាយុ ១១២ ឆ្នាំ និងមានកូនចៅច្រើនក៏ដោយ ក៏សុខភាពរបស់គាត់នៅតែរឹងមាំដូចក្មេងទូទៅ។ Siti Hawa Hussin រស់នៅក្នុងតំបន់ភាគពាយ័ព្យនៃរដ្ឋ Kelantan ប្រទេសម៉ាឡេស៊ី ដោយលោកយាយមានប្តី ៧នាក់ និងកូន ៤នាក់ ហើយកូនរបស់គាត់នីមួយៗបច្ចុប្បន្នមានអាយុចន្លោះពី ៥៨ ទៅ ៦៥ ឆ្នាំ ។

យោងតាមបទសម្ភាសន៍កាលពីពេលថ្មីៗនេះ លោកយាយ Siti Hawa Hussin បាននិយាយថា “ប្រសិនបើមានបុរសណាម្នាក់ពិតជាចង់រៀបការជាមួយគាត់ គាត់នឹងត្រៀមខ្លួនជាស្រេចក្នុងការរៀបការម្តងទៀត”។ នៅពេលសួរពីមូលហេតុមួយចំនួនពីលោកយាយ ថាហេតុអ្វីបានជាគាត់កាលពីមុនរៀបការរហូតទៅដល់ ៧ ដង? លោកយាយឆ្លើយថា ប្តីខ្លះស្លាប់ និងខ្លះទៀតត្រូវលែងលះដោយសារតែអាកប្បកិរិយា និងរបៀបរស់នៅមិនត្រូវគ្នា។ទោះជាយ៉ាងណា លោកយាយ Siti Hawa Hussin នៅតែចង់រៀបការម្តងទៀតប្រសិនបើគ្មាននរណាម្នាក់រិះគន់គាត់។ Siti Hawa Hussin បានបន្តទៀតថា សុខភាពខ្ញុំល្អណាស់ លើកលែងតែការមើលឃើញនិងការស្តាប់ វាអាចមានឧបសគ្គមួយចំនួនប៉ុណ្ណោះ។

Alismi ដែលជាកូនស្រីរបស់លោកយាយបានបន្ថែមថា ទោះបីជាម្តាយរបស់គាត់មានអាយុ ១១២ ឆ្នាំក៏ដោយ ប៉ុន្តែសុខភាពរបស់គាត់គឺល្អឥតខ្ចោះ ហើយគាត់គ្រាន់តែត្រូវការលេបថ្នាំដើម្បីគ្រប់គ្រងសម្ពាធឈាមរបស់គាត់តែប៉ុណ្ណោះ។ លើសពីនេះលោកយាយ តែងតែគ្រប់គ្រងទាំងស្រុងលើរបបអាហារ និងអនាម័យខ្ជាប់ខ្ជួនបំផុត។ នៅពេលគេសួរអំពីអាថ៌កំបាំងនៃអាយុវែង លោកយាយបាននិយាយថា គាត់មិនមានអាថ៌កំបាំងអ្វីនោះទេ គ្រាន់តែមានទម្លាប់ញ៉ាំបាយឱ្យបានទៀងទាត់ និងសម្រាកឱ្យបានគ្រប់គ្រាន់។ គួរបញ្ជាក់ដែរថា បងប្អូនបង្កើត និងសាច់ញាតិរបស់ Siti Hawa Hussian គឺបានស្លាប់អស់ហើយ ដោយលោកយាយគឺជាមនុស្សតែម្នាក់គត់ដែលនៅរស់រហូតមកដល់បច្ចុប្បន្ន៕

បរទេស៖ ប្រធានាធិបតី វ្ល៉ាឌីមៀ ពូទីន បាននិយាយថា រុស្ស៊ីចង់ឃើញប្រធានាធិបតីអាមេរិក Joe Biden ឈ្នះអាណត្តិទីពីរ ដោយពណ៌នាថាគាត់មានបទពិសោធន៍ និងសមត្ថភាពខ្ពស់ជាង ដូណាល់ ត្រាំ។
នៅក្នុងបទសម្ភាសន៍មួយកាលពីថ្ងៃទី១៤ ខែកុម្ភៈ ឆ្នាំ២០២៤ អ្នកកាសែតរុស្ស៊ីម្នាក់បានសួរប្រធានាធិបតី វ្ល៉ាឌីមៀ ពូទីន ថាតើគាត់ចង់ឃើញនរណាឈ្នះការបោះឆ្នោតក្នុងអាណត្តិទីពីរនៅឆ្នាំនេះ រវាងប្រធានាធិបតីអាមេរិក Joe Biden និងបេក្ខជននាំមុខគេមកពីគណបក្សសាធារណរដ្ឋលោក Donald Trump?

ភ្លាមនោះលោកប្រធានាធិបតីរ៉ុស្ស៊ី ពូទីន ក៏បានឆ្លើយតបទៅវិញថា “លោកចង់ឃើញ Biden ឈ្នះការបោះឆ្នោតក្នុងអាណត្តិទីពីរនេះ “ដោយសារតែគាត់មានបទពិសោធន៍ច្រើន អាចទស្សន៍ទាយបាន និងជាអ្នកនយោបាយបែបប្រពៃណី”។ ប៉ុន្តែទោះជាយ៉ាងណា យើងនឹងធ្វើការជាមួយប្រធានាធិបតីណាដែលប្រជាជនអាមេរិកមានទំនុកចិត្ត»។ នេះជាលើកទីមួយហើយដែលលោកពូទីនបានបញ្ចេញមតិជាសាធារណៈលើការបោះឆ្នោតជ្រើសរើសប្រធានាធិបតីអាមេរិកនៅឆ្នាំនេះ។

លោកពូទីនបានបន្តទៀតថា “វាជាការពិតដែលមនុស្សភាគច្រើននិយាយថាលោក Biden គ្មានសមត្ថភាព ប៉ុន្តែនៅពេលដែលខ្ញុំបានជួបគាត់កាលពីបីឆ្នាំមុន ខ្ញុំមិនបានឃើញអ្វីដែលពួកគេនិយាយនោះទេ”។ គួររំលឹកដែរថា កាលពីពេលថ្មីៗនេះ មានពាក្យចចាមអារ៉ាមមួយបង្ហាញថា ប្រធានាធីបតីអាមេរិក Joe Biden មានការចងចាំមិនល្អ ក៏ដូចជាមានសុខភាពចុះខ្សោយ និងអាយុច្រើនទៀតផង។ ទោះជាយ៉ាងណា បន្ទាប់ពីសម្ភាសលោកប្រធានាធិបតីរុស្ស៊ីរួចរាល់ ប្រមុខវិមានក្រឹមឡាំងក៏បានច្រានចោលការសង្ស័យអំពីអាយុ និងសុខភាពរបស់លោក បៃដិន ដែលនឹងឈានចូលអាយុ ៨២ ឆ្នាំ។

យោងតាមប្រធានាធិបតីរុស្ស៊ី លោក Trump «ត្រូវបានគេចាត់ទុកថាជាអ្នកនយោបាយមិនប្រពៃណី និងមានទស្សនៈផ្ទាល់ខ្លួនអំពីរបៀបដែលអាមេរិកគួរអភិវឌ្ឍទំនាក់ទំនងជាមួយសម្ព័ន្ធមិត្តរបស់ខ្លួន»។ ទោះជាយ៉ាងណា នៅក្នុងបទសម្ភាសន៍នេះ លោកពូ ទីន ក៏បានប្រឆាំងយ៉ាងខ្លាំងចំពោះគោលនយោបាយការបរទេសរបស់សហរដ្ឋអាមេរិកក្រោមការដឹកនាំរបស់លោកបៃឌិនផងដែរ ដោយប្រធានាធិបតីរុស្ស៊ីបានសង្កត់ធ្ងន់ថា “អ្វីដែលយើងត្រូវពិចារណាគឺទស្សនៈនយោបាយ ហើយទស្សនៈរបស់រដ្ឋបាលបច្ចុប្បន្ននៅអាមេរិកគឺមានគ្រោះថ្នាក់ខ្លាំង”៕

បន្ទាប់ពីមានធ្លាក់ចុះខ្លាំងនៃទីផ្សារអចលនទ្រព្យឆ្នាំ ២០២៣ ដែលមិនត្រូវបានគេរំពឹងថានឹងងើបឡើងវិញយ៉ាងឆាប់រហ័សនោះទេ ប៉ុន្តែវានឹងមានភាពល្អប្រសើរឡើងបន្តិចម្តងៗចាប់ពីឆ្នាំ២០២៤នេះតទៅ។ អ្នកវិភាគវៀតណាមបានកត់សម្គាល់ទៅលើ ២ ចំណុចថានៅវៀតណាមសម្រាប់ឆ្នាំនេះ ការជួលអចលនទ្រព្យ(ដូចជាផ្ទះល្វែងនិងអាផាតមិន) និងទីផ្សារឧស្សាហកម្មអចលនទ្រព្យ នឹងមានតម្រូវការខ្ពស់។

លោក Le Quoc Kien ប្រធានផ្នែកប្រឹក្សាអចលនទ្រព្យវៀតណាមបានមានប្រសាសន៍ថា សម្រាប់ឆ្នាំ២០២៤នេះ អ្នកដែលមានផ្ទះល្វែងដើម្បីជួលគឺជាប្រភពចំណូលដ៏កាក់កប ព្រោះថាអតិថជនភាគច្រើនគឺមិនសម្លឹងមើលទៅលើការទិញអចលនទ្រព្យដោយផ្ទាល់នោះទេ ដោយហេតុថាពួកគេអាចនឹងរងចាំមើលស្ថានការណ៍ទៅមុខទៀតសិនខ្លាចថានឹងមានបញ្ហា ឬដោយសារតែការធ្លាក់សេដ្ឋកិច្ចបច្ចុប្បន្នទើបនាំឲ្យពួកគេខ្វះចំណូល។

ជាមួយគ្នានេះ គេហទំព័រអចលនទ្រព្យ Batdongsan វៀតណាមបានកត់សម្គាល់ថា ប្រាក់ចំណូលជាមធ្យមពីអាផាតមិនឬបន្ទប់ជួលចាប់តាំងពីឆ្នាំ ២០១៥ មកគឺ ១២.៥% ក្នុងមួយឆ្នាំ ដែលនេះខ្ពស់ជាងនិងជាប់លាប់ជាងទីផ្សារភាគហ៊ុន មាស រូបិយប័ណ្ណបរទេស ដីធ្លី ឬប្រាក់បញ្ញើធនាគារផ្សេងៗ។ មូលហេតុគឺដោយសារតែតម្រូវការទិញ និងជួល«អាផាតមិន» នៅតែកើនឡើងខ្ពស់ ដូច្នេះហើយតម្លៃរបស់វាកើនឡើងឥតឈប់ឈរ។

ម៉្យាងវិញទៀត ស្របពេលសេដ្ឋកិច្ចធ្លាក់ចុះប៉ុន្មានឆ្នាំចុងក្រោយនេះក៏ដោយ ក៏ទីផ្សារ«អាផាតមិន»នៅវៀតណាមបានរងនូវផលប៉ះពាល់តិចតួចបំផុត ព្រោះថាមនុស្សជាច្រើនត្រូវការវាដើម្បីរស់នៅជានិច្ច។ ចំណែកឯផលចំណេញពីការវិនិយោគអាផាតមិនវិញគឺនៅតែខ្ពស់ជាងអត្រាការប្រាក់បញ្ញើទៀតផង។

សម្រាប់ឧស្សាហកម្មអចលនទ្រព្យវិញ ចាប់ពីឆ្នាំ២០២៣មក វាក៏បានបន្តក្លាយជាចំណុចរសើបរបស់ទីផ្សារអចលនទ្រព្យវៀតណាម ដោយតម្លៃជួលបានកើនឡើង ២០% នៅកន្លែងខ្លះ ទោះបីជាសេដ្ឋកិច្ចពិភពលោកធ្លាក់ចុះក៏ដោយ។

យោងតាមទិន្នន័យពីសមាគមអចលនទ្រព្យវៀតណាមបានបង្ហាញថាការជួលបានកើនឡើងច្រើនបំផុតនៅវៀតណាមភាគខាងជើង(ទីក្រុងហាណូយ) ខណៈនៅភាគវៀតណាមខាងត្បូង(ហូជីមីញ) តម្លៃជួលគឺបានកើនឡើង ១៥%។ ទោះជាយ៉ាងណាក៏ដោយ កាលពីចុងឆ្នាំ២០២៣ ក៏ត្រូវបានព្យាករណ៍ថា តម្រូវការរោងចក្រនិងឃ្លាំងអាចនឹងកើនឡើងខ្លាំងរហូតដល់ទៅ៤ដងនៅឆ្នាំបន្ទាប់ផងដែរ៕

សហរដ្ឋអាមេរិក៖ អ្នកវិទ្យាសាស្ត្រ NASA បានរកឃើញទឹកនៅលើផ្ទៃនៃអាចម៍ផ្កាយចំនួយពីរដែលមានឈ្មោះថា Iris និង Massalia ដោយប្រើទិន្នន័យពីយានអវកាស SOFIA បង្ហាញថានៅលើអាចម៍ផ្កាយទាំងពីនេះគឺសម្បូរទៅដោយសារធាតុរាវ silicate ណាស់ ដែលជាសារធាតុមានប្រយោជន៍បំផុតមួយសម្រាប់មនុស្សជាតិ នេះបើយោងតាម ការចុះផ្សាយរបស់ Interesting Engineering កាលពីថ្ងៃទី១៣ ខែកុម្ភៈ ឆ្នាំ២០២៤។

ក្រុមអ្នកវិទ្យាសាស្ត្រមកពីវិទ្យាស្ថានស្រាវជ្រាវភាគនិរតី (SwRI) បានរកឃើញម៉ូលេគុលទឹកនៅលើផ្ទៃអាចម៍ផ្កាយជាលើកដំបូង ដោយប្រើទិន្នន័យពីយន្តហោះ Stratospheric Observatory for Infrared Astronomy (SOFIA) ពួកគេបានវិភាគអាចម៍ផ្កាយដែលសំបូរទៅដោយសារធាតុ silicate ចំនួន ៤ ដែលរូបភាពដោយកាមេរ៉ាបង្ហាញថា ក្នុងចំណោមអាចម៍ផ្កាយ៤ មានអាចម៍ផ្កាយពីរប៉ុណ្ណោះគឺ Iris និង Massalia ដែលមានវត្តមានរបស់ម៉ូលេគុលទឹក។

គួររំលឹកដែរថា ពីមុនអ្នកវិទ្យាសាស្ត្របានរកឃើញម៉ូលេគុលទឹកនៅតែក្នុងគំរូអាចម៍ផ្កាយប៉ុណ្ណោះ ប៉ុន្តែនេះជាលើកដំបូងហើយដែលពួកគេបានរកឃើញទឹកនៅលើផ្ទៃអាចម៍ផ្កាយតែម្តងក្នុងប្រភេទនៃការសង្កេតនេះ។ អាចម៍ផ្កាយគឺជាសំណល់ពីការកកើតភព ដូច្នេះសមាសភាពរបស់វាប្រែប្រួលអាស្រ័យលើកន្លែងដែលវាកើតនៅក្នុង nebula ព្រះអាទិត្យ។ ការចែកចាយទឹកនៅលើអាចម៍ផ្កាយមានការចាប់អារម្មណ៍ជាពិសេសព្រោះវាអាចបំភ្លឺពីរបៀបដែលទឹកត្រូវបាននាំយកមកផែនដី។

ការរកឃើញថ្មីនេះ បានផ្តល់ព័ត៌មានអំពីការចែកចាយទឹកក្នុងលំហ ហើយក៏ជួយដល់អ្នកវិទ្យាសាស្ត្រក្នុងការស្វែងរកជីវិតក្រៅភពទាំងក្នុង និងក្រៅប្រព័ន្ធព្រះអាទិត្យផងដែរ។ នៅក្នុងការស្រាវជ្រាវថ្មី ក្រុមអ្នកវិទ្យាសាស្ត្រនៅ SwRI បានរកឃើញថា បរិមាណទឹកនៅលើអាចម៍ផ្កាយគឺស្ទើរតែស្មើនឹងបរិមាណទឹកដែលបានរកឃើញនៅលើព្រះច័ន្ទ។ លោក Arredondo បាននិយាយថា “ដូចគ្នានេះដែរ នៅលើអាចម៍ផ្កាយ ទឹកក៏អាចភ្ជាប់ជាមួយសារធាតុរ៉ែ ក៏ដូចជាត្រូវបានស្រូបយកទៅលើសារធាតុ silicates ជាប់ ឬរលាយនៅក្នុងកញ្ចក់ដែលមានឥទ្ធិពល silicate”។

បន្ទាប់ពីរកឃើញម៉ូលេគុលទឹកនៅលើអាចម៍ផ្កាយទាំងពីរនេះហើយ ក្រុមអ្នកវិទ្យាសាស្ត្រនៅ SwRI ចង់បន្តទៅសិក្សាបន្ថែមទៀត។ ពួកគេបានកំណត់ពេលធ្វើទស្សនកិច្ចជាមួយកែវយឺតអវកាស James Webb របស់ NASA ដើម្បីសិក្សាពីអាចម៍ផ្កាយបន្ថែម ជាមួយនឹងឧបករណ៍ទំនើបៗរបស់ James Webb ដោយពួកគេសង្ឃឹមថានឹងយល់កាន់តែច្បាស់អំពីរបៀបដែលទឹកត្រូវបានចែកចាយនៅក្នុងប្រព័ន្ធព្រះអាទិត្យ៕

ប្រទេសឥណ្ឌា ៖ សារព័ត៌មានបរទេសបានរាយការណ៍កាលពីថ្ងៃទី១៤ ខែកុម្ភៈ ឆ្នាំ២០២៤ ថា ក្រុមកសិករឥណ្ឌាបានព្យាយាមដើរជាក្បួនពីទីក្រុងសាមភូ រដ្ឋប៉ាន់ចាប មកកាន់ទីក្រុងញូវដេលី ដើម្បីជំរុញឱ្យរដ្ឋាភិបាលដោះស្រាយបញ្ហាតម្លៃទិន្នផលកសិកម្មធ្លាក់ចុះជាបន្តបន្ទាប់ ។ ប៉ុន្តែមានកសិករជាង១០០នាក់បានរងរបួសក្នុងអំឡុងពេល ..ត..វ៉ា.. ដោយសារសមត្ថកិច្ចបានប្រើប្រាស់ឧស្ម័នបង្ហូរទឹកភ្នែក ។

កងកម្លាំងសមត្ថកិច្ចបានព្យាយាមស្ទាក់ក្បួនដង្ហែររបស់ក្រុមកសិករ ដែលពួកគេចង់ទៅប្រមូលផ្តុំគ្នាតវ៉ានៅទីក្រុងញូវដេលី ដើម្បីអំពាវនាវឱ្យរដ្ឋាភិបាលរបស់នាយករដ្ឋមន្ត្រីឥណ្ឌា លោក Narendra Modi ធានាតម្លៃទិន្នផលកសិកម្ម និងផ្តល់ប្រាក់ឧបត្ថម្ភផ្នែកផ្សេងទៀត ។ ពួកគេចង់ឱ្យរដ្ឋាភិបាលជួយអន្តរាគមន៍បញ្ហាទាំងនេះដើម្បីឱ្យកសិករមានប្រាក់ចំណូលទ្វេដង តាមការសន្យារបស់រដ្ឋាភិបាលជាមួយពលរដ្ឋ នៅពេលពួកគេតវ៉ាកាលពីឆ្នាំ២០២១ ។

សមត្ថកិច្ចបានគ្រប់គ្រងស្ថានការណ៍ដោយការបាញ់ឧស្ម័នបង្ហូរទឹកភ្នែកដាក់ក្រុមកសិករ និងមានការប៉ះទង្គិចគ្នាខ្លាំងក្លាផងដែរក្នុងអំឡុងពេលតវ៉ានេះ ។ គេរាយការណ៍ថា ក្រុមកសិករបានរងរបួសជាង១៥០នាក់ ខណៈសមត្ថកិច្ចនិយាយថា សមត្ថកិច្ចក៏បានរងរបួសដែរ គឺស្មើជាង១០នាក់ ។

គួរបញ្ជាក់ថា កសិករឥណ្ឌាបានតវ៉ាយ៉ាងខ្លាំងក្លា និងចំណាយពេលអស់ជាង១ឆ្នាំ គឺចាប់ពីឆ្នាំ២០២០ រហូតដល់ឆ្នាំ២០២១ ដើម្បីប្រឆាំងនឹងច្បាប់កំណែទម្រង់វិស័យកសិកម្ម ។ គេរាយការណ៍ថា ការតវ៉ារបស់ក្រុមកសិករក្នុងរយៈពេលជាង១ឆ្នាំនេះ មានកសិកររងរបួសមិនក្រោម៧០០នាក់ទេ ។ នេះចាត់ទុកថា វាជាបញ្ហាដ៏ធំបំផុតរបស់រដ្ឋាភិបាលលោក Narendra Modi តាំងពីលោកគ្រប់គ្រងប្រទេសកាលពីឆ្នាំ២០១៤ ។

បើទោះជានាយករដ្ឋមន្ត្រីឥណ្ឌា លោក Narendra Modi យល់ព្រមលុបចោលខ្លឹមសារខ្លះៗក្នុងច្បាប់កំណែទម្រង់វិស័យកសិកម្មក្តី ប៉ុន្តែក្រុមកសិករយល់ឃើញថា ការចាត់វិធានការរបស់រដ្ឋាភិបាលក្នុងការធានាតម្លៃទិន្នផលកសិកម្ម គឺដំណើរការយ៉ាងយឺតយ៉ាវ ។ ដូច្នេះ ទើបធ្វើឱ្យកសិករនាំគ្នាតវ៉ាឱ្យរដ្ឋាភិបាលដោះស្រាយបញ្ហាតម្លៃទិន្នផលកសិកម្មធ្លាក់ចុះ ៕