អ្នកគាំទ្រកម្ពុជាបានពោលស្ងើចសរសើរបវរកញ្ញាចក្រវាលកម្ពុជាដ៏ល្បីល្បាញពីររូបរួមមាន រឿន ណាត និង សំណាង អេលីណា ដែលមានឱកាសបានធ្វើជាគណៈកម្មការក្នុងការប្រកួតសម្រស់អន្តរជាតិ។ រឿន ណាត បានចូលរួមធ្វើជាគណៈកម្មការក្នុងវគ្គប្រកួតបឋមកម្មវិធី Universal Women 2024 ដែលកម្ពុជាធ្វើជាម្ចាស់ផ្ទះ។ ចំណែកឯ សំណាង អេលីណា បានចូលរួមធ្វើជាគណៈកម្មការក្នុងវគ្គផ្តាច់ព្រ័ត្រ Miss CosmoWorld 2023 នៅប្រទេសម៉ាឡេស៊ី។
នៅរាត្រីថ្ងៃទី២១ ខែមីនា នេះការប្រកួត Universal Women 2024 ដែលកម្ពុជាធ្វើជាម្ចាស់ផ្ទះបានឈានចូលដល់ការប្រកួតបឋមហើយ (PRELIMINARY) បន្ទាប់ពីបេក្ខភាពចូលរួមទាំងអស់បានបង្ហាញសកម្មភាពផ្សេងៗនៅលើទឹកដីសៀមរាប និង ខេត្តព្រះសីហនុ។ វគ្គនេះបេក្ខភាព Universal Women 2024 បានដើរបង្ហាញឈុតតំណាងជាតិរបស់ខ្លួនផ្សេងៗគ្នា ក៏ដូចជាឈុតរាត្រីស្រមោលសជាដើម។ បេក្ខភាពតំណាងកម្ពុជាអ្នកនាង Brianna Mai បានលើកយកឈុតព្រះនាងឥន្រ្ទេទេវី មកបង្ហាញក្នុងការប្រកួតលើកនេះ។
ការប្រកួតកម្មវិធីនេះទៀតសោត ក៏មានពិធីការិនី គណៈកម្មការបរទេសផងដែរ ចំណែកឯបវញ្ញាចក្រវាលកម្ពុជាឆ្នាំ២០១៨ កញ្ញា រឿន ណាត ក៏មានឱកាសធ្វើជាគណៈកម្មការមួយរូបដូចគ្នា។ រឿន ណាត បានបញ្ចេញសម្រស់ក្នុងសំលៀកបំពាក់ពណ៌សយ៉ាងស្រស់ស្អាត ធ្វើឱ្យហ្វេនៗសរសើរថា Queen នៅតែជា Queen ដដែល។
ទន្ទឹមនឹង រឿន ណាត មានឱកាសធ្វើជាគណៈកម្មការប្រកួតសម្រស់អន្តរជាតិ គេក៏នឹកឃើញដល់បវរកញ្ញាចក្រវាលកម្ពុជាឆ្នាំ២០១៩ មួយរូបទៀតគឺ សំណាង អេលីណា ក៏នាងមានឱកាសបានធ្វើជាគណៈកម្មការប្រកួតសម្រស់អន្តរជាតិដូចគ្នា។
បន្ទាប់ពីតំណាងប្រទេសកម្ពុជាចូលប្រកួតវិធី Miss International 2023 នៅប្រទេសជប៉ុនជាប់TOP16 កាលពីថ្ងៃទី២៩ ខែវិច្ឆិកា ឆ្នាំ២០២៣ សំណាង អេលីណា ត្រូវបានអញ្ជើញធ្វើជាគណៈកម្មការក្នុងថ្ងៃផ្តាច់ព្រ័ត្រកម្មវិធី Miss CosmoWorld 2023 នៅឯប្រទេសម៉ាឡេស៊ីផងដែ។ សំណាង អេលីណា បានរំលេចខ្លួនយ៉ាងស្រស់ស្អាតប្រៀបដូចជាទេពអប្សរក្នុងឈុតពណ៌ស។
ឱកាសធ្វើជាគណៈកម្មការប្រកួតសម្រស់អន្តរជាតិរបស់ រឿន ណាត និង សំណាង អេលីណា នេះហើយបានធ្វើឱ្យអ្នកគាំទ្រកោតសរសើរស្ងើចអ្នកទាំងពីរជាខ្លាំងដែលមានឱកាសដូចនេះស័ក្តិសមជាបវរកញ្ញាល្បីឈ្មោះប្រចាំប្រទេសកម្ពុជាពិតមែន៕