ប្រទេសចិន៖ ក្រុមអ្នកវិទ្យាសាស្ត្រចិនបានបង្កើតកោសិកាពន្លឺព្រះអាទិត្យស៊ីលីកុនដែលស្តើងបំផុតមិនធ្លាប់មាន អាចបត់បែនបាន និងអាចបំប្លែងពន្លឺទៅជាថាមពលអគ្គីសនីដោយមិនកាត់បន្ថយដំណើរការ។ កោសិកាពន្លឺព្រះអាទិត្យស៊ីលីកុនគឺជាឆ្អឹងខ្នងនៃប្រភពថាមពលពន្លឺព្រះអាទិត្យនៅជុំវិញពិភពលោកដែលមានប្រហែល ៩៥% នៃចំណែកទីផ្សារកោសិកាពន្លឺព្រះអាទិត្យ។ ដោយសារតម្លៃផលិតកម្ម និងទិន្នផលថាមពលធម្មតាថយចុះ ទើបកោសិកាពន្លឺព្រះអាទិត្យកាន់តែមានប្រជាប្រិយភាពខ្លាំងនាពេលបច្ចុប្បន្ននេះ។

ទោះជាយ៉ាងណាក៏ដោយ បច្ចេកវិទ្យានេះជាធម្មតាត្រូវបានប្រើប្រាស់តែនៅកន្លែងដូចជាកសិដ្ឋានថាមពលពន្លឺព្រះអាទិត្យក្រោមដីដែលមានបន្ទះរឹង និងកន្លែងផ្សេងទៀត ដូចជាលំហខាងក្រៅ ទាមទារផ្ទៃកោងជាដើម។ បើយោងតាម China Science and Technology Daily បានឱ្យដឹងថា ក្រុមស្រាវជ្រាវដែលដឹកនាំដោយអ្នកជំនាញនៅសាកលវិទ្យាល័យវិទ្យាសាស្រ្ត និងបច្ចេកវិទ្យា Jiangsu (JUST) បានបង្កើតកោសិកាពន្លឺព្រះអាទិត្យស៊ីលីកុនស្តើងជាងសន្លឹកក្រដាស A4 ទៅទៀត ដែលមានកម្រាស់ត្រឹមតែ ៥០ មីក្រូម៉ែត្រប៉ុណ្ណោះ។

កោសិកាសូឡានេះធ្វើឡើងពីស៊ីលីកុនគ្រីស្តាល់បំពាក់ដោយបន្ទះឈីប semiconductor ដែលវាមានសមត្ថភាពអាចបត់បានដូចក្រដាស ក៏ដូចជាមានប្រយោជន៍សម្រាប់ការដំឡើងនៅលើផ្កាយរណប ឬសម្រាប់កម្មវិធីអវកាសផ្សេងទៀត។ ការធ្វើឱ្យថ្មស៊ីលីកុនស្តើង ក៏ជួយឱ្យផលិតកម្មប្រើប្រាស់សម្ភារៈតិច ដោយហេតុនេះកាត់បន្ថយទម្ងន់ និងការចំណាយលើការពង្រាយ។ ដោយសារតែកោសិកាពន្លឺព្រះអាទិត្យស៊ីលីកុនអាចពត់បានតាមចិត្ត ក្រុមវិទ្យាសាស្ត្រជឿថាពួកវាអាចប្រើសម្រាប់ឧបករណ៍ជាច្រើនប្រភេទទៀតដូចជា យន្តហោះគ្មានមនុស្សបើក ប៉េងប៉ោងខ្យល់ រួមទាំងការប្រើប្រាស់នៅក្នុងលំហអាកាស និងឧបករណ៍ឆ្លាតវៃ។

ទោះជាយ៉ាងណាក៏ដោយ កោសិកាពន្លឺព្រះអាទិត្យស្តើងក៏មានគុណវិបត្តិនៃការកាត់បន្ថយប្រសិទ្ធភាពនៃការបំប្លែងថាមពល (PCE) ផងដែរ។ នេះក៏ជាមូលហេតុចម្បងដែលធ្វើឱ្យថ្មស៊ីលីកុនស្តើងមិនទាន់មានការពេញនិយមខ្លាំង។ ដូច្នេះហើយ បច្ចុប្បន្នអ្នកវិទ្យាសាស្ត្រកំពុងផ្តោតលើការបង្កើតបន្ទះស្រូបពន្លឺព្រះអាទិត្យថ្មីមួយទៀតដែលអាចបត់បែនបាន និងមានប្រសិទ្ធភាពខ្ពស់ជាងមុនផងដែរ៕

ប្រទេសចិន ៖ សារព័ត៌មានបរទេសបានចុះផ្សាយពីរឿងរ៉ាវដែលកំពុងល្បីល្បាញក្នុងបណ្តាញសង្គមនៅប្រទេសចិន ពេលអតិថិជនម្នាក់បង្ហោះពីបទពិសោធន៍ការទិញទំនិញតាមអនឡាញរបស់ខ្លួន ។ អតិថិជនម្នាក់នេះបានកុម្ម៉ង់ទិញទុរេនតាមអនឡាញ ប៉ុន្តែនាងខកបំណងយ៉ាងខ្លាំងនៅពេលបើកប្រអប់ទុរេនមើលដឹងថា ហាងលក់ទុរេនបោកប្រាស់នាង ។ រីឯអ្នកលេងបណ្តាញសង្គមឃើញវិញអស់សំណើចយ៉ាងខ្លាំងចំពោះការព្យាយាមរបស់អ្នកលក់ ។

នារីទិញទុរេនបានបង្ហោះនៅក្នុង Weibo ជាបណ្តាញសង្គមពេញនិយមបំផុតនៅប្រទេសចិនថា នៅពេលនាងទទួលបានប្រអប់ទុរេនដែលគេដឹកយកមកឱ្យដល់ផ្ទះ នាងក៏ប្រញាប់បើកប្រអប់មើលភ្លាមៗ ។ នាងរំភើបយ៉ាងខ្លាំង ពីព្រោះគិតថា នឹងបានបរិភោគទុរេនដែលជាផ្លែឈើនាងចូលចិត្តបំផុត ។

ប៉ុន្តែនៅពេលបើកប្រអប់ទុរេនរួច អ្វីដែលនាងឃើញធ្វើឱ្យនាងភ្ញាក់ផ្អើលយ៉ាងខ្លាំង ព្រោះផ្លែឈើនោះមានរាងមូលធំ និងមានបន្លាស្រដៀងទុរេនដែរ ។ ប៉ុន្តែពេលពិនិត្យមើលកាន់តែជិតទើបដឹងថា ផ្លែឈើនៅក្នុងប្រអប់នេះមិនមែនជាទុរេនទេ ការពិត វាជាក្រូចថ្លុង ដែលអ្នកលក់បោកប្រាស់ម្នាក់នេះយកគ្រាប់ផ្កាឈូករ័ត្នមកដោតនៅខាងក្រៅឱ្យដូចបន្លាទុរេន ។

ទោះយ៉ាងណា បើទោះជានាងត្រូវបានអ្នកលក់អនឡាញបោកប្រាស់ក្តី ប៉ុន្តែនាងអស់សំណើចពីការព្យាយាមរបស់អ្នកលក់អនឡាញ ។ ក្រោយមក នាងក៏បានថតរូប និងផ្ញើឱ្យមិត្តភក្តិមើល ព្រមទាំងសរសេររឿងរ៉ាវរបស់នាងនៅតាមបណ្តាញសង្គម ដើម្បីឱ្យដឹងថា ទំនិញបញ្ជូនមកឱ្យអតិថិជនខុសពីការកុម្ម៉ង់ ។

រឿងរ៉ាវរបស់នាងត្រូវបានគេចែកចាយក្នុងបណ្តាញសង្គមយ៉ាងច្រើន និងធ្វើឱ្យអ្នកលេងបណ្តាញសង្គមរិះគន់យ៉ាងខ្លាំង ក្នុងនោះអ្នកលេងបណ្តាញសង្គមម្នាក់និយាយថា ៖ «តើហាងចង់លក់ទុរេនតែ១ផ្លែនេះ ហើយបិទហាងតែម្តងឬយ៉ាងណា?» ។ អ្នកលេងបណ្តាញសង្គមម្នាក់ទៀតថា ៖ «តើវាជាទុរេន ឬជាមេរោគកូវីដ-១៩ ពូជថ្មី?» ។

ក្រៅពីនេះ អ្នកខ្លះទៀតនិយាយថា ៖ «សូមសរសើរពីភាពល្អិតល្អន់របស់ម្ចាស់ហាងទុរេន ដោយសារចំណាយពេលមកអង្គុយដោតគ្រាប់ផ្កាឈូករ័ត្នលើផ្លែក្រូចថ្លុង» ។ អ្នកខ្លះទៀតថា ៖ «ទិញទុរេនបានក្រូចថ្លុង ព្រមទាំងគ្រាប់ផ្កាឈូករ័ត្នជាច្រើនគ្រាប់ តើចំណេញអត់?» ៕

ប្រទេសវៀតណាម ៖ សារព័ត៌មាន Vietnam News បានរាយការណ៍កាលពីខែកុម្ភៈ ឆ្នាំ២០២៤ ថា រដ្ឋាភិបាលវៀតណាមនឹងផ្តល់នូវសិទ្ធិ និងផលប្រយោជន៍ផ្សេងៗផ្នែកពន្ធដល់បណ្តាវិនិយោគិនបរទេស ។ ការផ្តល់សិទ្ធិ និងផលប្រយោជន៍ពន្ធនេះ ដើម្បីទាក់ទាញការវិនិយោគពីក្រៅប្រទេសសម្រាប់អភិវឌ្ឍន៍តំបន់ឧស្សាហកម្មបច្ចេកវិទ្យាខ្ពស់នៅវៀតណាម ។

ការវិនិយោគផ្នែកអភិវឌ្ឍន៍តំបន់ឧស្សាហកម្មបច្ចេកវិទ្យាខ្ពស់នេះ ក្រុមហ៊ុននានានឹងត្រូវបង់ពន្ធលើប្រាក់ចំណូលអាជីវកម្មត្រឹមតែ១០% ប៉ុណ្ណោះក្នុង១ឆ្នាំ សម្រាប់រយៈពេល១៥ឆ្នាំ ។ ហេតុនេះ វិនិយោគិនបរទេសនឹងទទួលបានការលើកលែងពន្ធក្នុងរយៈពេល៤ឆ្នាំដំបូង ព្រមទាំងទទួលបានការកាត់បន្ថយពន្ធរហូតដល់៥០% ក្នុងរយៈពេល៩ឆ្នាំជាប់ៗគ្នា ។

បច្ចុប្បន្ននេះ ប្រទេសវៀតណាមមានតំបន់ឧស្សាហកម្មបច្ចេកវិទ្យាខ្ពស់សរុបចំនួន៣កន្លែង រួមមាន ៖ នៅទីក្រុងហូជីមិញ, តំបន់ Hoa Lac ស្ថិតនៅភាគនិរតីនៃក្រុងហាណូយ និងនៅទីក្រុងដាណាង ។

គណៈកម្មការគ្រប់គ្រងតំបន់ឧស្សាហកម្មបច្ចេកវិទ្យាខ្ពស់នៅតំបន់ Hoa Lac លើកឡើងថា ការកំណត់គោលនយោបាយផ្សេងៗដែលជាប្រយោជន៍ពាក់ព័ន្ធនឹងពន្ធលើប្រាក់ចំណូលផ្ទាល់ខ្លួន និងទិដ្ឋាការរយៈពេលវែងសម្រាប់បណ្តាអ្នកជំនាញ ដែលធ្វើការនៅតំបន់ឧស្សាហកម្មបច្ចេកវិទ្យាខ្ពស់ ក៏ជាបញ្ហាចាំបាច់ផងដែរដែលរដ្ឋាភិបាលវៀតណាមត្រូវតែគិតគូរ ។

ចំណែកគណៈកម្មការគ្រប់គ្រងតំបន់ឧស្សាហកម្មបច្ចេកវិទ្យាខ្ពស់នៅទីក្រុងដាណាង លើកឡើងថា ក្នុងរយៈពេលវែង ច្បាប់ពាក់ព័ន្ធនឹងឧស្សាហកម្មបច្ចេកវិទ្យាខ្ពស់នេះ គួរតែបំបែកចេញពីគ្នាដើម្បីផ្តល់ភាពងាយស្រួលដល់ការអភិវឌ្ឍ ៕

បើតាមរបាយការណ៍របស់ Global Energy Monitor បញ្ជាក់ថា ការផលិតថាមពលខ្យល់ និងពន្លឺព្រះអាទិត្យក្នុងតំបន់អាស៊ានបានកើនឡើងរហូតដល់២០% កាលពីឆ្នាំ២០២៣ ។ វាស្មើនឹងជាង២៨ជីហ្គាវ៉ាត់ (Gigawatts) ឬស្មើប្រមាណ៩% នៃកម្លាំងផលិតអគ្គិសនីសរុប ។

ទោះយ៉ាងណា ការបង្កើតគម្រោងថ្មីៗយឺតយ៉ាវ ព្រមទាំងបទប្បញ្ញត្តិថាមពលកកើតឡើងវិញមានការពិបាក និងការពឹងផ្អែកលើប្រេងឥន្ធនៈហ្វូស៊ីលអស់រយៈពេលយ៉ាងយូរ បានធ្វើឱ្យវាក្លាយជាបញ្ហាប្រឈមដ៏សំខាន់ចំពោះការផ្លាស់ប្តូរទៅរកការប្រើប្រាស់ថាមពលស្អាត ។

ប្រទេសនានានៅតំបន់អាស៊ានដែលមានសេដ្ឋកិច្ចរីកចម្រើនយ៉ាងឆាប់រហ័ស ក៏បានប្រឈមនឹងតម្រូវការថាមពលកើនឡើងដូចគ្នាដែរ គឺតម្រូវការប្រើប្រាស់បានកើនឡើង១ក្នុងចំណោម៤ ចាប់តាំងពីឆ្នាំ២០១៥ ដល់ឆ្នាំ២០២១ ។ ហេតុនេះ វាខ្ពស់ជាងមធ្យមភាគលើសកលលោកយ៉ាងខ្លាំង ។

ចំណែកកំណើនថាមពលកកើតឡើងវិញនៅឆ្នាំ២០២២ ត្រូវបានរារាំងដោយសមត្ថភាពផលិតប្រេងឥន្ធនៈហ្វូស៊ីល ហើយមួយផ្នែកទៀតបណ្តាលមកពីភាពយឺតយ៉ាវរបស់គម្រោង ដោយសារមានដែនកំណត់ពាក់ព័ន្ធនឹងការឆ្លងរាតត្បាតនៃជំងឺកូវីដ-១៩ ។ ជាលទ្ធផល វាធ្វើឱ្យការកំណត់គោលដៅសមត្ថភាពផលិតពីថាមពលកកើតឡើងវិញមានសមាមាត្រស្មើនឹង៣៥% នៅឆ្នាំ២០២៥ របស់តំបន់អាស៊ាន ធ្លាក់ចុះបន្តិចបន្តួច ។

ក្រៅពីនេះ របាយការណ៍បង្ហាញថា វៀតណាមជាប្រទេសនាំមុខគេក្នុងតំបន់នេះលើការគ្រប់គ្រងរោងចក្រថាមពលខ្យល់ និងពន្លឺព្រះអាទិត្យទំហំធំ ដែលមានកម្លាំងផលិតស្មើនឹង១៩ជីហ្គាវ៉ាត់ ។ បន្ទាប់មក គឺប្រទេសថៃ និងហ្វីលីពីន ដែលប្រទេសនីមួយៗមានកម្លាំងផលិតស្មើ៣ជីហ្គាវ៉ាត់ ខណៈប្រទេសឡាវក៏បានអភិវឌ្ឍន៍កម្លាំងផលិតក្នុងរោងចក្រថាមពលទាំង២ប្រភេទផងដែរ ហើយឡាវបានកំណត់គោលដៅការផលិតឱ្យស្មើនឹង៣ជីហ្គាវ៉ាត់ ៕