ប្រទេសវៀតណាម ៖ រដ្ឋាភិបាលវៀតណាមបានលើកឡើងកាលពីថ្ងៃទី២២ ខែមីនា ឆ្នាំ២០២៤ ថា Pepsi គឺជាក្រុមហ៊ុនផលិតអាហារ និងភេសជ្ជៈដ៏ធំរបស់សហរដ្ឋអាមេរិក មានគម្រោងវិនិយោគបន្ថែមទៀតស្មើទឹកប្រាក់ចំនួន៤០០លានដុល្លារអាមេរិក ដើម្បីសាងសង់រោងចក្រថ្មី២កន្លែងនៅប្រទេសវៀតណាម ។ រីឯដំណើរការផលិតក្នុងរោងចក្រទាំងពីរនេះ ក្រុមហ៊ុននឹងប្រើប្រាស់ថាមពលកកើតឡើងវិញនៅក្នុងស្រុក ។ នេះបើយោងតាមការចេញផ្សាយរបស់សារព័ត៌មានរ៉យទ័រ ។
រោងចក្ររបស់ក្រុមហ៊ុន Pepsi សម្រាប់ផលិតភេសជ្ជៈ នឹងសាងសង់នៅខេត្ត Long An ដែលស្ថិតនៅភាគខាងត្បូងប្រទេសវៀតណាម ហើយការដើមទុនសម្រាប់សាងសង់រោងចក្រនេះ គឺស្មើនឹង៣០០លានដុល្លារអាមេរិក ។ រីឯរោងចក្រមួយកន្លែងទៀតនឹងប្រើប្រាស់សម្រាប់ការកែច្នៃអាហារ គេនឹងសាងសង់នៅខេត្ត Ha Nam ស្ថិតនៅភាគខាងជើងប្រទេសវៀតណាម ដោយគ្រោងចំណាយប្រាក់ក្នុងការសាងសង់ ចំនួន៩០លានដុល្លារអាមេរិក ។
កាលពីឆ្នាំ២០២៣ ក្រុមហ៊ុន Pepsi លើកឡើងថា ក្រុមហ៊ុនបានទទួលលិខិតអនុញ្ញាតដើម្បីសាងសង់រោងចក្រនៅខេត្ត Ha Nam ហើយក្រុមហ៊ុនមានគម្រោងចាប់ផ្តើមការផលិតក្នុងរោងចក្រនេះ នៅត្រីមាសទី៣ ឆ្នាំ២០២៥ ខាងមុខ ។ ក្រុមហ៊ុន Pepsi បានចាប់ផ្តើមប្រកបអាជីវកម្មនៅប្រទេសវៀតណាម តាំងពីឆ្នាំ១៩៩៤ មកម៉្លេះ ហើយបច្ចុប្បន្ន ក្រុមហ៊ុនមានរោងចក្រសរុបចំនួន៥កន្លែង នៅវៀតណាម ។
សារព័ត៌មានរ៉យទ័ររាយការណ៍ទៀតថា ការប្រកាសសាងសង់រោងចក្រចំនួន២កន្លែងទៀតនេះ គឺក្រោយពីភ្នាក់ងារតំណាងឱ្យក្រុមហ៊ុនអាមេរិកស្មើជាង៦០កន្លែង បានធ្វើដំណើរមកប្រទេសវៀតណាម រយៈពេល៣ថ្ងៃ នៅខែមីនា ឆ្នាំ២០២៤ ដើម្បីពិនិត្យមើលការផលិតទំនិញនៅតាមក្រុមហ៊ុនមួយចំនួន ។ ទោះយ៉ាងណា នៅពុំទាន់មានការបញ្ជាក់ព័ត៌មានលម្អិតពាក់ព័ន្ធការចំណាយពេលវេលាក្នុងការសាងសង់រោងចក្រទាំង២កន្លែងនេះទេ ៕
