ជាការពិតណាស់ មនុស្សចាស់តែងតែឆ្លងកាត់ការផ្លាស់ប្តូររាងកាយ និងផ្លូវចិត្តជាច្រើន ដែលបណ្តាលឱ្យចង្វាក់ circadian របស់ពួកគេផ្លាស់ប្តូរ ធ្វើឱ្យពួកគេគេងមិនលក់ ឬគិតច្រើន។ ការគេងនិងអាយុក៏ទាក់ទងគ្នាផងដែរ មនុស្សចាស់អាចមានបញ្ហាដំណេកច្រើនជាងមនុស្សវ័យក្មេងដូចជា ពិបាកក្នុងការងងុយគេង គេងមិនលក់ ឬភ្ញាក់ពីដំណេកញឹកញាប់ជាដើម។ ដូច្នេះ អ្នកកាន់តែចាស់ ការផ្លាស់ប្តូររាងកាយរបស់អ្នកកាន់តែច្រើន ហើយមនុស្សវ័យចំណាស់ជារឿយៗច្រើនតែទទួលរងពីជំងឺមួយចំនួនដូចជាជំងឺឆ្អឹង សន្លាក់ និងការគេងមិនដកដង្ហើមជាដើម។
ជំងឺទាំងនេះអាចបណ្តាលឱ្យគេងមិនបានពេញលេញ ធ្វើឱ្យពិបាកក្នុងការគេងឱ្យលក់នៅពេលភ្ញាក់ពីគេង។ ហេតុនេះដើម្បីទទួលបានការគេងឱ្យបានគ្រប់គ្រាន់ និងមានថាមពលច្រើនជារៀងរាល់ព្រឹកពេលភ្ញាក់ពីគេង មនុស្សចាស់អាចសាកល្បងវិធីមួយចំនួនខាងក្រោម៖
១.ងូតទឹកក្តៅឧណ្ហៗ ៖ នៅពេលដែលចេញពីងូតទឹក សីតុណ្ហភាពរាងកាយរបស់មនុស្សចាស់នឹងធ្លាក់ចុះ ដែលអាចជួយឱ្យរាងកាយរបស់ពួកគាត់សម្រាក មានអារម្មណ៍ស្រួលជាងមុន និងធ្វើឱ្យគេងលក់ស្រួល។
២.បិទឧបករណ៍អេឡិចត្រូនិក៖ ការបិទឧបករណ៍អេឡិចត្រូនិកដូចជាទូរទស្សន៍ និងទូរសព្ទមួយទៅពីរម៉ោងមុនពេលចូលគេង ជំនួសមកវិញដោយការអានសៀវភៅ ឬស្តាប់តន្ត្រីស្រាលៗដើម្បីសម្រាក។ កែសម្រួលពន្លឺបន្ទប់គេង ឱ្យមានសភាពទន់ ឬស្រអាប់ ដើម្បីឱ្យវាកាន់តែងាយស្រួលក្នុងការគេងឱ្យបានស្កប់ស្កល់។
៣.ធ្វើលំហាត់ប្រាណ៖ មនុស្សចាស់អាចជ្រើសរើសកីឡាកម្រិតមធ្យម ហើយហាត់យ៉ាងហោចណាស់ ៣០ នាទីក្នុងមួយថ្ងៃ ទោះជាយ៉ាងណាត្រូវចងចាំថាមិនត្រូវធ្វើលំហាត់ប្រាណក្នុងរយៈពេលបីម៉ោងមុនពេលចូលគេងនោះទេ។
៤.កុំគេងថ្ងៃច្រើនពេក៖ មនុស្សចាស់គួរតែសម្រាកនៅពេលថ្ងៃប្រហែល ១០ ទៅ ១៥ នាទីបានហើយ ដើម្បីកុំឱ្យប៉ះពាល់ដល់ដំណេកពេលយប់។ ការចេញទៅខាងក្រៅ និងរីករាយជាមួយពន្លឺព្រះអាទិត្យជារៀងរាល់ថ្ងៃ ជួយឱ្យរាងកាយរបស់អ្នករឹងមាំ ក៏ដូចជាមានសុខភាព អាយុវែង៕
