បុណ្យទន្លេលើកទី៨ ឆ្នាំនេះនឹងប្រារព្ធឡើងរយៈពេល២ថ្ងៃជាប់ៗគ្នាគឺនៅថ្ងៃសៅរ៍និងអាទិត្យ ទី១៦-១៧ ខែមីនា ឆ្នាំ២០២៤ ដែលជាព្រឹត្តិការណ៍ដ៏ធំអស្ចារ្យនៅលើទឹកដីនៃខេត្តសៀមរាប។

យោងតាមការបង្ហោះកាលពីពេលថ្មីៗនេះដោយរដ្ឋបាលខេត្តសៀមរាបបានឲ្យដឹងថា ក្រសួងទេសចរណ៍នឹងរួមសហការជាមួយនឹងរដ្ឋបាលខេត្តសៀមរាប សហភាពសហព័ន្ធយុវជនកម្ពុជា និង ក្រសួង-ស្ថាប័នពាក់ព័ន្ធ ព្រមទាំងវិស័យឯកជន នឹងរៀបចំពិធីបុណ្យទន្លេលើកទី៨ ក្រោមប្រធានបទ “ទន្លេដើម្បីសន្តិភាព និងការអភិវឌ្ឍ“។

នៅក្នុងព្រឹត្តិការណ៍ដ៏អស្ចារ្យនេះ នឹងមានសកម្មភាពសំខាន់ៗជាច្រើនដែលភ្ញៀវទេសចរទាំងជាតិនិងអន្តរជាតិអាចរីករាយ កម្សាន្តបានដូចជា៖ ការសម្តែងសិល្បៈ ការប្រគុំតន្ត្រី ចូលរួមពីក្រុមសិល្បករ សិល្បការិនី តារាចំរៀងជាតិ និងអន្តរជាតិល្បីៗ ព្រមទាំងមានការអុចកាំជ្រួចអបអរសាទរពិធីបុណ្យទន្លេលើកទី៨ ឆ្នាំ២០២៤ ព្រមទាំងយុទ្ធនាការឆ្នាំទស្សនា សៀមរាប ២០២៤។ ជាមួយគ្នានេះ ក៏មានការតាំងពិព័រណ៍ផលិតផលទេសចរណ៍ និងផលិតផលទូទៅ មហោស្រពម្ហូបអាហារមេគង្គ ព្រមទាំង សកម្មភាពកម្សាន្តនានានៅតាមបណ្តោយដងស្ទឹងសៀមរាប និងតំបន់ Pub Street។

រីឯគោលបំណងនៅក្នុងការរៀបចំនៃ«ពិធីបុណ្យទន្លេ»វិញនេះគឺដើម្បីរួមចំណែកជម្រុញកំណើនភ្ញៀវទេសចរទាំងជាតិនិងអន្តរជាតិ បង្កើនការផ្សព្វផ្សាយសក្តានុពលទេសចរណ៍ខេត្តសៀមរាបនិងបណ្តាខេត្តនានាតាមដងទន្លេនៃប្រទេសកម្ពុជា លើកកម្ពស់ជីវភាពប្រជាពលរដ្ឋ ព្រមទាំងជួយជំរុញផ្សព្វផ្សាយនូវភាពសម្បូរបែបនៃអនុតំបន់មេគង្គ។

សូមបញ្ជាក់ថា ពិធីបុណ្យទន្លេ គឺត្រូវបានរៀបចំឡើងជារៀងរាល់ឆ្នាំតាមបណ្តាខេត្តនានាចាប់តាំងពីឆ្នាំ ២០១៥ មកម្លេះ តែបានផ្អាករយៈពេល២ឆ្នាំគឺឆ្នាំ២០២១និង២០២២ដោយសារតែជំងឺឆ្លងរាតត្បាតកូវីត១៩។ ដោយឡែកសម្រាប់ឆ្នាំ២០២៤នេះ គឺជាឆ្នាំទី៨ហើយនៃពិធីបុណ្យទន្លេ ដែលនឹងប្រារព្ធឡើងក្នុងខេត្តសៀមរាប។ ខណៈកាលពីឆ្នាំ ២០២៣ បុណ្យនេះគឺបានរៀបចំនៅខេត្តកំពង់ធំ, ២០២០ នៅខេត្តបាត់ដំបង, ២០១៩ នៅខេត្តកំពង់ឆ្នាំង, ២០១៨ នៅខេត្តកណ្តាល, ២០១៧ នៅកំពង់ចាមនិងត្បូងឃ្មុំ, ឆ្នាំ២០១៦ នៅស្ទឹងត្រែង ,និងកាលពីឆ្នាំ២០១៥ នៅខេត្តក្រចេះផងដែរ៕

នៅពេលដែលអាកាសធាតុក្តៅខ្លាំង ការផឹកទឹកត្រជាក់មួយកែវ នឹងជួយឱ្យអ្នកមានអារម្មណ៍ស្រស់ស្រាយ បំបាត់ការស្រេកទឹកបានយ៉ាងល្អ។ ប៉ុន្តែបញ្ហាទូទៅអ្នកតែងតែទិញទឹកកកដាក់ក្នុងធុងទឹកកកទុកនៅផ្ទះ បន្ទាប់ពីទុកបានមួយសន្ទុះមកទឹកកកក៏ចាប់ផ្តើមរលាយ ហើយបើសិនជាអ្នកបើកគម្របធុងទឹកកករបស់អ្នកច្រើនដងពេក ដុំទឹកកកនឹងរលាយក្លាយជាទឹកមិនខាន។ ហេតុនេះហើយ តើមានវិធីណាដែលអាចរក្សាទឹកកកឱ្យនៅបានយូរនិងមិនងាយរលាយ? ដូច្នេះខាងក្រោមនេះ គឺជាវិធីសាស្ត្រដើម្បីរក្សាស្ថានភាពទឹកកកកុំឱ្យរលាយលឿនពេក៖

១.ជៀសវាងការត្រាំរបស់ដែលមិនត្រជាក់៖ តើអ្នកដឹងទេថាប្រសិនបើអ្នកយកអ្វីដែលមិនត្រជាក់មកត្រាំជាមួយរបស់ត្រជាក់នោះ សីតុណ្ហភាពធម្មតានៃផ្ទៃធុងទឹកកក នឹងធ្វើឱ្យភេសជ្ជៈត្រជាក់កាន់តែយឺត ហើយវាក៏ធ្វើឱ្យទឹកកករលាយលឿនជាងមុនផងដែរ។

២.ទុកទឹកកកនៅបាតធុង៖ ជាធម្មតានៅពេលដែលយើងដាក់ទឹកកកនៅក្នុងធុងបន្ទាប់មកទឹកកកចាប់ផ្តើមរលាយហើយប្រែទៅជាទឹក យើងនឹងចាក់ទឹកក្នុងធុងចេញឱ្យអស់ ហើយដាក់ទឹកកកថ្មីចូល ដែលជាការពិតទៅវាត្រូវបានណែនាំឱ្យទុកទឹកកកខ្លះនៅបាតធុង ដើម្បីរក្សាធុងឱ្យត្រជាក់ និងធ្វើឱ្យទឹកកករលាយកាន់តែយឺត។

៣.រក្សាជាមួយសន្លឹកអាលុយមីញ៉ូម៖ ក្រដាសអាលុយមីញ៉ូមគឺជាវត្ថុមានប្រយោជន៍បំផុត បញ្ហានៃការរលាយទឹកកកលឿនអាចត្រូវបានដោះស្រាយ ដោយការដាក់សន្លឹកអាលុយមីញ៉ូមនៅក្នុងធុង ឬក៏យកវាទៅរុំជាមួយទឹកកកតែម្តង។

៤.អំបិល៖ ដើម្បីកាត់បន្ថយការរលាយទឹកកក អ្នកគ្រាន់តែប្រោះអំបិលលើទឹកកកដែលអ្នកចង់ត្រាំ ជាមួយនឹងលក្ខណៈសម្បត្តិនៃអំបិល វានឹងជួយរក្សាសីតុណ្ហភាពនៃទឹកកកឱ្យបានយូរ។

៥.រក្សាក្នុងប្រអប់ Styrofoam៖ ប្រអប់ Styrofoam គឺជាឧបករណ៍ដែលប្រើសម្រាប់ដាក់អាហារ ភេសជ្ជៈ ព្រោះវាជួយរក្សាភាពត្រជាក់បានល្អ ប៉ុន្តែមានតែក្នុងកម្រិតជាក់លាក់មួយប្រសិនបើអ្នកចង់ឱ្យទឹកកករលាយយឺតជាងនេះអ្នកអាចសាកល្បងដាក់ស្នោខាងក្រោម៕

ចូរចាំទុកថា ជីវិតនឹងល្អប្រសើរឡើងលើសមុន៣០០ដង ពេលគ្មានអ្នកណាម្នាក់បានដឹងពីរឿងរ៉ាវរបស់យើង ហើយជីវិតនឹងល្អប្រសើរឡើងរហូតដល់៧០០ដង ពេលយើងមិនចង់ដឹងពីរឿងរ៉ាវរបស់អ្នកណាម្នាក់ ឬមិនចាំបាច់រវល់ជាមួយជីវិតអ្នកណាម្នាក់ នាំតែនឿយហត់ចិត្ត ។

យើងអាចចំណាយពេលទាំងអស់ទៅធ្វើការស្វែងរកប្រាក់ចិញ្ចឹមគ្រួសារល្អជាង ហើយយើងសម្រាកនៅពេលហត់នឿយ ។ បើមានពេលទំនេរ យើងអាចទៅរកសេចក្តីសុខឱ្យខ្លួនឯង ព្រោះបើយើងអាយុកាន់តែច្រើន ពេលវេលាក៏ចេះតែកន្លងផុតទៅជានិច្ច ហើយទម្រាំយល់ពីជីវិត យើងក៏បានចំណាយពេលវេលាអស់ពាក់កណ្តាលជីវិតទៅហើយ ។

ចូរដាស់តឿនខ្លួនឯងបែបនេះល្អជាង ទើបជីវិតរបស់យើងជួបតែសេចក្តីសុខពិតប្រាកដ ដូចជា ៖

១-ចូរស្ងៀមស្ងាត់ច្រើនជាងការនិយាយស្តី ៖ យើងកាន់តែមានអាយុច្រើន ហើយបានឆ្លងកាត់អ្វីៗច្រើន ចូរមានទម្លាប់នៅស្ងៀមស្ងាត់ច្រើនជាងការនិយាយស្តី ទើបជីវិតរបស់យើងកាន់តែមានសេចក្តីសុខ ។ យើងអាចជ្រើសរើសថា តើគួរស្ងៀមស្ងាត់នៅពេលណា ហើយគួរនិយាយស្តីនៅពេលណា ព្រោះពេលខ្លះ ភាពស្ងប់ស្ងាត់សំខាន់ជាងជ័យជម្នះ ។

ចូរគិតឱ្យបានច្រើនជាងនិយាយស្តី ហើយពេលមុននឹងនិយាយអ្វីមួយ ត្រូវគិតមុនជានិច្ច ព្រោះការនិយាយស្តីអាចបង្ហាញពីទម្លាប់របស់យើង ។ យើងបានរស់នៅលើពិភពលោកនេះអស់ពាក់កណ្តាលជីវិតហើយ ដូច្នេះ ត្រូវតែរៀនស្ងប់ស្ងាត់ ទើបជីវិតមានក្តីសុខ ។

២-ធ្វើចិត្តឱ្យត្រជាក់ ៖ បើយើងកាន់តែមានអាយុច្រើន យើងនឹងកាន់តែក្លាយជាមនុស្សចាស់ខ្លាំងឡើង ។ ហេតុនេះ ត្រូវធ្វើចិត្តឱ្យត្រជាក់, រក្សាភាពស្ងប់ស្ងាត់ បើទោះជាមានហេតុការណ៍អ្វីកើតឡើងក្នុងជីវិតយើងក៏ដោយ ។ ចូរកុំឡូឡា និងខឹងសម្បារអ្នកដទៃ ហើយយើងត្រូវចេះអភ័យទោសឱ្យគ្នា បើទោះជាគេមិនដឹងកំហុសក្តី ។

ការអភ័យទោសនេះ មិនមែនសម្រាប់អ្នកប្រព្រឹត្តខុសនោះទេ ប៉ុន្តែវាសម្រាប់ខ្លួនយើង ព្រោះបើកាន់តែខឹង និងស្អប់ប៉ុនណា វានឹងធ្វើឱ្យយើងក្លាយជាមនុស្សកើតទុក្ខច្រើនដែរ ។ ដូច្នេះ បើចង់មានសេចក្តីសុខ ត្រូវរៀនធ្វើចិត្តឱ្យត្រជាក់ជាមុនសិន ។

៣-អ្វីមួយធ្វើឱ្យនឿយហត់ ត្រូវលុបវាចេញពីជីវិត ៖ កុំទទួលបន្ទុកអ្វីក្នុងជីវិតច្រើនពេក ព្រោះយើងមានអាយុច្រើនហើយ ប្រយ័ត្នពិបាកចិត្តខ្លាំង រហូតដល់គ្មានក្តីសុខ ។ កុំចង់ដឹងរឿងរ៉ាវរបស់អ្នកដទៃច្រើនពេក ជាពិសេស រឿងរបស់កូនៗ ។ បើរឿងនេះធ្វើឱ្យយើងបារម្ភ យើងអាចទុកវាបាន ព្រោះជីវិតកូន គឺជាជីវិតរបស់កូន ហើយយើងកុំធ្វើអ្វីច្រើនពេក ។ កូនៗធំអស់ហើយ ហើយពួកគេនឹងអាចដោះស្រាយបញ្ហាដោយខ្លួនឯងបាន ។

ប៉ុន្តែបើយើងកាន់តែគិតពីបញ្ហាផ្សេងៗច្រើន វានឹងធ្វើឱ្យជីវិតយើងកាន់តែរញ៉េរញ៉ៃខ្លាំងឡើង រហូតដល់យើងមិនអាចស្វែងរកក្តីសុខបាន ។ ចូរឱ្យកូនរបស់យើងដោះស្រាយបញ្ហាដោយខ្លួនឯង ទើបជីវិតរបស់យើងស្ងប់ និងមានក្តីសុខច្រើន ។

៤-រស់នៅជាមួយខ្លួនឯងឱ្យមានក្តីសុខជាងរស់នៅជាមួយអ្នកដទៃ ៖ កុំសង្ឃឹមថា អ្នកដទៃនឹងអាចផ្តល់ក្តីសុខឱ្យយើងនោះ ដូចជា ស្វាមី ឬកូនៗ ឬសូម្បីតែមិត្តភក្តិ ។ ចូរពឹងពាក់លើខ្លួនឯងឱ្យបានសិន ឬរស់នៅឱ្យមានក្តីសុខសិន ព្រោះបើយើងអាចរស់នៅដោយខ្លួនឯងបាន យើងនឹងអាចរកឃើញក្តីសុខក្នុងចិត្តបាន និងមានពេលវេលាគិតអ្វីជាច្រើនដោយខ្លួនឯងថា ការពិត តើជីវិតយើងត្រូវការអ្វីឱ្យពិតប្រាកដ ។

៥-បណ្តោយគ្រប់យ៉ាងឱ្យដំណើរការទៅដោយខ្លួនឯង ៖ ធ្វើចិត្តឱ្យត្រជាក់ និងរស់នៅធម្មតា ហើយកុំប្រញាប់ប្រញាល់ចង់ឱ្យគ្រប់យ៉ាងដំណើរការទៅឆាប់រហ័សតាមចិត្តខ្លួនឯង ព្រោះជីវិតរបស់មនុស្សម្នាក់ៗមិនដូចគ្នាទេ ។ កុំយកខ្លួនឯងទៅប្រៀបធៀបជាមួយអ្នកដទៃ ហើយកុំប្រៀបធៀបកូនៗយើងជាមួយកូនអ្នកដទៃ ព្រោះជីវិតមនុស្សម្នាក់ៗកើតមកមិនដូចគ្នាទេ ហើយជោគវាសនាជីវិត ក៏មិនដូចគ្នាដែរ ។ ការប្រៀបធៀបជីវិតយើងជាមួយអ្នកដទៃ ធ្វើឱ្យយើងនឿយហត់ និងដាក់សម្ពាធខ្លួនឯង ប៉ុន្តែយើងអាចរស់នៅតាមទម្លាប់របស់ខ្លួនយ៉ាងមានក្តីសុខ ។

៦-មិនឃាត់អ្នកណាម្នាក់ឱ្យបន្តទំនាក់ទំនង ៖ ចូរបណ្តោយឱ្យការទំនាក់ទំនងដំណើរការទៅតាមធម្មជាតិរបស់វា ។ យើងរីករាយ បើអ្នកណាម្នាក់ចង់រស់នៅជាមួយយើង ហើយបើគេចង់ចាកចេញពីជីវិតយើង ចូរកុំរារាំងគេឱ្យសោះ បើទោះជាអ្នកដទៃនិយាយអ្វីក៏ដោយ ព្រោះបើយើងចាប់អារម្មណ៍ វាក៏គ្មានប្រយោជន៍ជាមួយជីវិតយើងដែរ ។

សរុបមក យើងមានអាយុច្រើនហើយ ចូរស្វែងរកសេចក្តីសុខឱ្យខ្លួនឯងជាចម្បង ។ លើសពីនេះ យើងត្រូវរស់នៅក្នុងជីវិតបែបសាមញ្ញតាមទម្លាប់របស់ខ្លួន ហើយបើធ្វើបានតាមចំណុចនេះ ជីវិតយើងនឹងមានសេចក្តីសុខច្រើន ៕

ដឹងតែចំណេញកប់ពពកម្តងទៀតហើយ នៅពេលបើបានដឹងទីតាំងពិតប្រាកដ ផ្លូវក្រវ៉ាត់ក្រុងទី៤ តភ្ជាប់កម្ពុជាជាមួយអាស៊ាននឹងលេចរូបរាងឆាប់ៗ ដែលផ្តល់ប្រយោជន៍ជាច្រើនមកដល់កម្ពុជា សាងសង់ឆាប់ៗ កាត់ភូមិសាស្ត្រនានា នៅជុំវិញរាជធានីភ្នំពេញ។

គម្រោងផ្លូវក្រវ៉ាត់ក្រុងទី៤ ដែលមានប្រវែងជាង១៩៥ គីឡូម៉ែត្រ ជាផ្លូវតភ្ជាប់ដ៏សំខាន់ជាមួយប្រទេសនៅក្នុងតំបន់អាស៊ាន រួមមានថៃ វៀតណាម និងកម្ពុជា។

យោងតាមក្រសួងសាធារណការនិងដឹកជញ្ជូនកម្ពុជា ផែនការកសាងផ្លូវក្រវ៉ាត់ក្រុងទី៤ បានសិក្សាតាំងពីឆ្នាំ ២០១៨ និងបញ្ចប់ការសិក្សារួចរាល់ដោយក្រុមហ៊ុនចិន CRBC កាលពីឆ្នាំ ២០២៣ ដែលគម្រោងផ្លូវនេះនឹងលេចចេញជារូបរាងឆាប់ៗខាងមុខ។

វាជាផ្លូវយុទ្ឋសាស្រ្តដ៏សំខាន់១ផ្សេងទៀត ដែលតភ្ជាប់ពីភាគខាងលិចគឺ ផ្លូវជាតិលេខ២ លេខ៣ លេខ៤ តភ្ជាប់មកកាន់ផ្លូវជាតិលេខ១ ហើយមានចម្ងាយត្រឹមតែប្រមាណ៣០គីឡូម៉ែត្រពីរាជធានីភ្នំពេញ។ ផ្លូវមួយខ្សែរនេះនឹងឆ្លងកាត់ខេត្តចំនួន៤នៅភាគខាងលិច ខាងត្បូង និងខាងកើតរាជធានីភ្នំពេញ នៃប្រទេសកម្ពុជា គឺ ខេត្តកំពង់ស្ពឺ ចំនួន៣ស្រុក ខេត្តតាកែវចំនួន១ស្រុក ខេត្តកណ្តាលចំនួន៨ស្រុក និងខេត្តព្រៃវែងចំនួន២ស្រុកផងដែរ។

សូមបញ្ជាក់ផងដែរថាការសាងសង់ផ្លូវមួយខ្សែរនេះគឺជាការផ្តល់ហិរញ្ញប្បទាន សម្បទានពីរដ្ឋាភិបាលចិនក្នុងទំហំទឹកប្រាក់ ៣៣៤០ លានដុល្លារអាមេរិក ដែលមានគោលបំណងជាចម្បងដើម្បីជួយលើកកម្ពស់ផ្នែកសេដ្ឋកិច្ច និងជីវភាពប្រជាពលរដ្ឋនៅក្នុងតំបន់ជាច្រើន រួមមាន ៖
១ ជួយសម្រួលលំហូរនាំចេញនាំចូលទំនិញ និងកាត់បន្ថយការកកស្ទះចរាចរណ៍
២ ជួយលើកកម្ពស់សេដ្ឋកិច្ចមូលដ្ឋាន តាមរយៈការឡើងថ្លៃដីធ្លី និងអចលនទ្រព្យក្នុងតំបន់
៣ ទាក់ទាញការវិនិយោគពីវិនិយោគិនទាំងជាតិ អន្តរជាតិ ខណៈបច្ចុប្បន្នមានអ្នកអភិវឌ្ឍន៍មួយចំនួន បានសាងសង់ផ្ទះលំហែរ និងរីហ្សតនៅតំបន់នេះបណ្តើរៗរួចហើយ
៤ ជាការចំណេញដល់គោលនយោបាយ របស់រាជរដ្ឋាភិបាល ក្នុងការកាត់បន្ថយគម្លាតអភិវឌ្ឍន៍រវាងទីក្រុង និងតំបន់ជនបទ
៥ ជាការចូលរួមកាត់បន្ថយភាពក្រីក្រ របស់ប្រជាពលរដ្ឋ។ អ្នកជំនាញអចលនទ្រព្យមើលឃើញថា វាកំពុងផ្តល់នូវការលើកកម្ពស់ ការរីកចម្រើននៅតំបន់ជុំវិញនោះ ហើយការវិនិយោគហេដ្ឋារចនាសម្ព័ន្ឋរបស់រដ្ឋាភិបាល ជាការចូលរួមចំណែកមួយផ្នែក ក្នុងការអភិវឌ្ឍវិស័យសំណង់ និងអចលនទ្រព្យផងដែរ។

បន្ទាប់ពីបងប្អូនបានលឺបានដឹងដំណឹងនេះរួចហើយ កុំភ្លេចជួយចែករំលែកព័ត៌មានដល់សាច់ញាតិលោកអ្នក តាមដានព័ត៌មានលម្អិតពីការអភិវឌ្ឍន៍ផ្សេងៗបន្តទៀតជាច្រើន មានដូចជា៖ តំបន់សេដ្ឋកិច្ចពិសេសនៅក្បែរផ្លូវក្រវ៉ាត់ក្រុងទី៤ តំបន់កសិទេសចរណ៍ តំបន់ទេសចរណ៍បែបធម្មជាតិនានា តំបន់កំសាន្ត ជួយបង្កើនកំណើនសេដ្ឋកិច្ចជាតិជាច្រើនទៀត។ល។ តំបន់ទាំងនោះនឹងលេចរូបរាងជាបន្តបន្ទាប់ នៅក្រោមគោលនយោបាយ អភិវឌ្ឍន៍សេដ្ឋកិច្ចជាតិ ដែលដឹកនាំដោយរាជរដ្ឋាភិបាលកម្ពុជា នៅក្រោមម្លប់សន្តិភាព៕

អ្នកនាង នាង សុវ៉ាតនា ដែលសាធារណជនហៅថា ឌីជេ ណាណា បានបង្ហោះសំណេរមួយនៅលើបណ្តាញសង្គមដែលធ្វើឱ្យមានមតិវែកញែកយ៉ាងច្រើនដោយទាំងហ្វេនរបស់អ្នកនាងផងចូលបញ្ចេញមតិបង្ហាញការមិនពេញចិត្ត។ សំណេរនោះ ឌីជេ ណាណា បានរងនូវផ្ទាំងស៊ិបយ៉ាងខ្លាំង ព្រមទាំងមានមតិលើកឡើងថាសរសើរខ្លួនឯងតែប្រៀបដូចជាទម្លាក់តម្លៃស្វាមីរបស់អ្នកនាង។

នៅវេលាម៉ោងជាង១០យប់ថ្ងៃទី២៨ ខែកុម្ភៈ ឆ្នាំ២០២៤ ឌីជេ ណាណា ជាពិធីការិនី និងជាអ្នកបង្កើតមាតិកាអប់រំ លើកទឹកចិត្តមួយរូបបានបង្ហោះសំណេរថា « បំបៅកូនបណ្តើរ ទាញទូរសព្ទមកបង្ហោះសារបណ្តើរ នឹកសរសើរបុណ្យក្មេងៗយុវវ័យមួយចំនួនក្នុងសម័យបច្ចុប្បន្ន។ ខ្ញុំម៉ោងជាង១០យប់ហើយ បន្ទាប់ពីកូនបៅដេកលក់ស្កប់បន្តិចទៀតនេះ ត្រូវបន្តបង្ហើយការងារ ដល់ស្អែកឡើងត្រូវងើបម៉ោង ៥:០០ ទៅធ្វើការរកលុយ។ ក្មេងៗមួយចំនួន ចុចទូរសព្ទរំលងអធ្រាត្រ ព្រឹកឡើងម៉ោង ៨:០០ នៅរកកាហ្វេផឹកមិនទាន់បាននៅឡើយ ចេះតែរស់បានដែរ ហេតុតែបុណ្យគេដល់។ បើខ្ញុំចឹងវិញ បែបដាច់បាយម៉ាផ្ទះហើយ»។

សំណេរនេះហើយបានធ្វើឱ្យអ្នកបង្កើតមាតិកាដ៏ល្បីមួយនេះត្រូវរងនូវមតិវែកញែកពីអ្នកលេងបណ្តាញសង្គម ខណៈអ្នកមួយចំនួនបានបង្ហាញថាខ្លួនគេក៏ជាហ្វេនរបស់ ឌីជេ ណាណា ដូចគ្នាប៉ុន្តែមិនពេញចិត្តនូវការបង្ហោះរបស់អ្នកនាងខាងលើឡើយ។ អ្នកប្រើប្រាស់បណ្តាញសង្គមបានបញ្ចេញមតិថា «ជីវិតចែមានកម្មតែជាមួយរឿងអ្នកដទៃ ពួកម៉ាកខ្ញុំបែកគ្នាដោយសារសង្សារវាស្តាប់ទ្រឹស្តីចែពេក។ ស្តាប់ចុះឡើងបែកគំនិតថាពួកម៉ាកខ្ញុំក្បត់ ទាំងគ្នាការងារផ្នែក IT រកពេលជុះសឹងមិនបានផង។ ចុងក្រោយពួកម៉ាកខ្ញុំរកអ្នកផ្សេងការបានត្រឹមត្រូវ ដល់ខាងស្រីអ្នកស្តាប់ទ្រឹស្តីចែនៅឡេឡឺដល់លូវ»។ អ្នកផ្សេងទៀតបានលើកឡើងថា «បង ក្នុងនាមខ្ញុំជាហ្វេនបងរាល់ការផុសបងពិតជាមានអប់រំល្អ ប៉ុន្តែការផុសមួយនេះវាហាក់បីជាការលើកតម្កើងខ្លួនឯងថាជាមនុស្សខំធ្វើការខ្លាំងគ្មានពេលសម្រាកហើយដាក់បន្ទុកទៅអ្នកដទៃទៅវិញ អ្នកណាក៏ចង់មានពេលសម្រាកដែរបង ទោះបងនិយាយសំដៅទៅលើមួយចំនួនតែវាអាចរាលដាលទៅមនុស្សជាច្រើនដែលមិនខុសពីការប្រៀបធៀបឡើយ មនុស្សយើងទាល់តែឆ្លៀតទើបបានសម្រាក ចូរកុំលើកខ្លួនឯងហើយ ទម្លាក់អ្នកដទៃ។, ពីមុនខ្ញុំធ្លាប់ជាអ្នកគាំទ្របង សំណេរបងមួយរយៈចុងក្រោយនេះ ខ្ញុំរកមិនឃើញចំណុចសំខាន់សោះ។ អ្វីដែលបងរៀបរាប់ខាងលើគឺជាលទ្ធផលនៃការសម្រេចចិត្តរបស់បង យកកូនប៉ុន្មាន ហត់ នឿយយ៉ាងណាជាជម្រើសបង។ មិនចាំបាច់សសេរដៀមដាលគេ ដើម្បីលើកខ្លួនឯងនោះទេ បងដូចជាមានមោទនភាពលើខ្លួនឯងជ្រុលពេក»។

គណនីផ្សេងទៀតបានលើកឡើងថា «ចេះតែរស់បានដែរ ហេតុតែបុណ្យគេដល់។ បើខ្ញុំចឹងវិញ បែបដាច់បាយម៉ាផ្ទះហើយ។ ខ្ញុំ Fan បងតែខ្ញុំអត់ពេញចិត្តសំណេរនេះទេ(ចេះតែរស់បានដែរ) ប្តីបងអន់ណាស់ បើបងមិនរកគឺដាច់បាយម៉ាផ្ទះ។, មនុស្សសម័យនេះ និយាយចុះឡើង អួតតែខ្លួនឯងល្អ ខ្លួនឯងប្រឹងណាស់។ ចូលនិយាយអំពីតែខ្លួនឯងចុះ កុំទាញគេមកប្រៀបនិងខ្លួនឯង ទាំងដែលគេហូបបាយផ្ទះគេនិង។ ប្តីបងជាបុរសមេផ្ទះ ហេតុអ្វីមិនពឹងប្តីបងខ្លះ សុខចិត្តរកសម្ពាធរកលុយតែម្នាក់ឯង វ័យណាក៏ដូចវ័យណាដែរ ត្រូវការពេលវេលារកលុយ សំរាក កំសាន្តអារម្មណ៍ your life ur choice ធ្វើជាស្តេចស្រីក្នុងផ្ទះគឺហត់បែបនេះហើយបងកុំបៀបធៀបជីវិតយើងនឹងជីវិតគេអាចថាគេសំណាងជាងបងក៏ថាបាន បែបផែនជីវិតខុសគ្នាខ្ញុំកូន៣ក៏មានពេលវេលាសំរាប់ខ្លួនឯងដែរ មានពេលផឹកកាហ្វេ រកលុយ ចុចទូរសព្ទ ព្រោះមានប្តីជួយមើលកូនបន្ទាបពីការងារគាត់ហើយកូនក៏មិនមែនបន្ទុករឺជាសម្ពាធរហូតដល់ដាច់បាយ»៕

ក្រសួងធនធានទឹក បានឱ្យដឹងថា ជ្រលងសម្ពាធទាបនៅតែបន្តមានឥទ្ធិពលលើឈូងសមុទ្រថៃ និងភាគកណ្តាល នៃអាងទន្លេមេគង្គ និងគ្របដណ្ដប់មកលើប្រទេសកម្ពុជា និងសម្ពាធខ្ពស់នៅសមុទ្រចិនខាងត្បូងបានថមថយឥទ្ធិពល ខណៈដែលខ្យល់បក់មកពីទិសនិរតី និងអាគ្នេយ៍។

ស្ថានភាពបែបនេះនឹងធ្វើឱ្យចាប់ពីថ្ងៃទី២ ដល់ថ្ងៃទី៤ ខែមីនា ឆ្នាំ២០២៤៖

១. តំបន់វាលទំនាប៖
⁃ សីតុណ្ហភាពមធ្យមអប្បបរមា២៤°C និងសីតុណ្ហភាពមធ្យមអតិបរមា៣៧°C ផ្ទៃមេឃមាន ពពកពីតិចទៅមធ្យម និងមានភ្លៀងធ្លាក់ក្នុងកម្រិតខ្សោយ គ្របដណ្តប់លើផ្ទៃដី១០% និងមានខ្យល់បក់មកពីទិសអាគ្នេយ៍ មានល្បឿនមធ្យម៣ម៉ែត្រ/វិនាទី។

២.តំបន់ខ្ពង់រាប៖
⁃ សីតុណ្ហភាពមធ្យមអប្បបរមា២៤°C និងសីតុណ្ហភាពមធ្យមអតិបរមា៣៦°C ផ្ទៃមេឃមានពពកពីតិចទៅមធ្យម ខ្យល់បក់មកពីទិសបូព៌មានល្បឿនមធ្យម៣ម៉ែត្រ/វិនាទី។

៣.តំបន់មាត់សមុទ្រ៖
⁃ សីតុណ្ហភាពមធ្យមអប្បបរមា២៤°C និងសីតុណ្ហភាពមធ្យមអតិបរមា៣៦°C ផ្ទៃមេឃមានពពកពីតិចទៅមធ្យម និងមានភ្លៀងធ្លាក់ក្នុងកម្រិតខ្សោយ គ្របដណ្តប់លើផ្ទៃដី១៥% ខ្យល់បក់មកពីទិសនិរតី មានល្បឿន២ម៉ែត្រ/វិនាទី
⁃ រលកសមុទ្រមានកម្ពស់មធ្យមអប្បបរមា០,៥០ម៉ែត្រ និងកម្ពស់មធ្យមអតិបរមា១,៥០ម៉ែត្រ៕