បរទេស៖ បើទោះបីជាមានឧបសគ្គជាច្រើនដែលរុស្ស៊ីកំពុងប្រឈមមុខទាំងផ្នែកនយោបាយ និងសេដ្ឋកិច្ចក៏ដោយ ក៏ប្រជាជនរុស្ស៊ីជិត ៩០% នៅតែជឿជាក់ និងគាំទ្រលោកពូទីនធ្វើជាប្រធានាធិបតីបន្តនាពេលខាងមុខ។

នៅថ្ងៃទី១៣ ខែមីនា ឆ្នាំ២០២៤ យោងតាម CNN បានឱ្យដឹងថា លោក វ្ល៉ាឌីមៀ ពូទីន ទំនងនឹងឈ្នះការបោះឆ្នោតសម្រាប់អាណត្តិទីប្រាំរបស់គាត់នៅក្នុងវិមានក្រឹមឡាំង និងគ្រប់គ្រងប្រទេសរុស្ស៊ីច្រើនជាងពេលណាទាំងអស់ក្នុងរយៈពេល ២៤ ឆ្នាំកន្លងមក។ នេះបើតាមការស្ទង់មតិចុងក្រោយបង្អស់ដែលធ្វើឡើងដោយមជ្ឈមណ្ឌល Levada នៅទីក្រុងមូស្គូ បង្ហាញថា ៨៦% នៃប្រជាជនរុស្ស៊ីគាំទ្រប្រធានាធិបតីពូទីន នៅមុនការបោះឆ្នោតនៅសប្តាហ៍នេះ។

យោងតាមរបាយការណ៍ ៧៥% នៃអ្នកឆ្លើយសំណួរគិតថាប្រទេសនេះកំពុងដើរក្នុងទិសដៅត្រឹមត្រូវ ក៏ដូចជាគាំទ្រសកម្មភាពរបស់រដ្ឋាភិបាលរុស្ស៊ី និង ២១% ទៀតមិនយល់ស្រប។ លោក Dmitry ភ្នាក់ងារអចលនទ្រព្យអាយុ ៤១ ឆ្នាំមកពីសាធារណរដ្ឋកូមីនៅភាគខាងជើងឆ្ងាយរបស់រុស្ស៊ីបាននិយាយថា “យើងនឹងបោះឆ្នោតឱ្យប្រធានាធិបតីវ្ល៉ាឌីមៀពូទីនបន្តទៀត ដោយសារគាត់បានធ្វើឱ្យប្រទេសរុស្ស៊ីក្លាយជាប្រទេសកាន់តែប្រសើរឡើង” ។

គួរបញ្ជាក់ដែរថា លោកពូទីនត្រូវបានជាប់ឆ្នោតជាប្រធានាធិបតីរុស្ស៊ីលើកដំបូងក្នុងឆ្នាំ ២០០០ ហើយបន្ទាប់មកបានជាប់ឆ្នោតបីដងទៀតគឺនៅឆ្នាំ ២០០៤, ២០១២ និង ២០១៨។ ប្រសិនបើគាត់ឈ្នះការបោះឆ្នោតនាពេលខាងមុខតាមការព្យាករណ៍ចុងក្រោយ លោកពូទីនអាយុ ៧១ ឆ្នាំនឹងបន្តដឹកនាំប្រទេសរុស្ស៊ីសម្រាប់អាណត្តិទី ៥ ដែលលើកនេះមានរយៈពេល ៦ ឆ្នាំគឺឆ្នាំ ២០២៤ ដល់ ២០៣០។

នេះបើយោងតាមវិសោធនកម្មរដ្ឋធម្មនុញ្ញដែលបានអនុម័តដោយប្រទេសក្នុងឆ្នាំ ២០២០។ ការកំណត់អាណត្តិមានន័យថា លោកពូទីនក៏អាចឈរឈ្មោះជាអ្នកដឹកនាំវិមានក្រឹមឡាំងម្តងទៀតនៅឆ្នាំ ២០៣០ ផងដែរហើយប្រសិនបើជាប់ឆ្នោតម្តងទៀត លោកនឹងគ្រប់គ្រងរហូតដល់ឆ្នាំ ២០៣៦ ក្នុងអាយុ ៨៣ ឆ្នាំ៕

ប្រទេសចិន ៖ សមាគមក្រុមហ៊ុនផលិតរថយន្តចិនបញ្ជាក់ថា ក្នុងរយៈពេល២ខែដំបូងនៃឆ្នាំ២០២៤ នេះ ចំនួនការនាំចេញរថយន្តរបស់ប្រទេសចិន ស្មើនឹង៨២ម៉ឺន២ពាន់គ្រឿង កើនឡើង៣០,៥% បើធៀបនឹងឆ្នាំ២០២៣ ។ នេះបើតាមការចេញផ្សាយរបស់សារព័ត៌មានបរទេស កាលពីថ្ងៃទី១៣ ខែមីនា ឆ្នាំ២០២៤ ។

ការនាំចេញរថយន្តថាមពលថ្មីបានកើនឡើង៧,៥% បើធៀបនឹងឆ្នាំ២០២៣ ដែលស្មើត្រឹមតែ១៨ម៉ឺន២ពាន់គ្រឿងប៉ុណ្ណោះ ។ រីឯការនាំចេញរថយន្តប្រើប្រាស់ប្រេងឥន្ធនៈ កើនឡើង៣៩% ស្មើនឹង៦៤ម៉ឺនគ្រឿង ។

អ្នកជំនាញមកពីសមាគមក្រុមហ៊ុនផលិតរថយន្តចិនលើកឡើងថា ឧស្សាហកម្មយានយន្តរបស់ចិនមានសមត្ថភាពប្រកួតប្រជែងខ្លាំងនៅក្នុងទីផ្សារពិភពលោក តាមរយៈការច្នៃប្រឌិត, បច្ចេកវិទ្យា, ការគ្រប់គ្រងដើមទុន និងខ្សែសង្វាក់ឧស្សាហកម្មកើនឡើង ។

Xu Haidong ជានាយករងក្រុមវិស្វកររបស់សមាគមក្រុមហ៊ុនផលិតរថយន្តចិននិយាយថា សមត្ថភាពនៃការប្រកួតប្រជែងរបស់រថយន្តចិនបានល្អប្រសើរឡើងជាបន្តបន្ទាប់ ខណៈតម្រូវការនៅទីផ្សារក្រៅប្រទេសកើនឡើងមិនឈប់ឈរ ។ ហេតុនេះ សមាគមសង្ឃឹមថា នៅឆ្នាំ២០២៤ ការនាំចេញរថយន្តរបស់ចិនទៅក្រៅប្រទេស នឹងកើនឡើងប្រមាណ២០% ។

ក្រៅពីនេះ សមាគមក្រុមហ៊ុនផលិតរថយន្តចិនបានបញ្ជាក់ផងដែរថា ក្នុងរយៈពេល២ខែដំបូងនៃឆ្នាំ២០២៤ ចំនួនការលក់រថយន្តរបស់ចិនបានកើនឡើង១១,១% បើធៀបនឹងឆ្នាំ២០២៣ ស្មើជាង៤លានគ្រឿង ។

គួរបញ្ជាក់ថា កាលពីឆ្នាំ២០២៣ ចំនួនការនាំចេញរថយន្តរបស់ចិនបានកើនឡើង៥៧,៩% បើធៀបនឹងឆ្នាំ២០២២ ។ វាជាចំនួនខ្ពស់បំផុតនៅក្នុងប្រវត្តិសាស្ត្រ ដែលចំនួនការនាំចេញរថយន្តស្មើជិត៥លានគ្រឿង ៕

បរទេស៖ កាលពីពេលថ្មីៗនេះ អ្នកវិទ្យាសាស្ត្រអាមេរិកបានលើកទឹកចិត្តឱ្យមនុស្សបរិភោគសាច់ពស់ថ្លាន់ ដោយសារពស់ថ្លាន់ជាប្រភពប្រូតេអ៊ីនដែលមានគុណភាពខ្ពស់ និងមាននិរន្តរភាព ខណៈដែលឧស្សាហកម្មកសិកម្មពិភពលោកផ្សេងទៀតកំពុងប្រឈមមុខនឹងបញ្ហាជាច្រើន។
យោងតាមការស្រាវជ្រាវថ្មីដែលបានចេញផ្សាយនៅក្នុងទស្សនាវដ្តី Scientific Reports នៅថ្ងៃទី១៤ ខែមីនា ឆ្នាំ២០២៤ បានបង្ហាញថាសាច់ពស់ថ្លាន់ដែលចិញ្ចឹមអាចជាជម្រើសដ៏ល្អមួយសម្រាប់ជំនួសសាច់ដែលពេញនិយមនាពេលបច្ចុប្បន្ននេះ នៅពេលដែលការផ្គត់ផ្គង់អាហារត្រូវបានគំរាមកំហែងកាន់តែខ្លាំងឡើងដោយការផ្លាស់ប្តូរបរិស្ថាន។

ក្រុមស្រាវជ្រាវបានវិភាគអត្រាកំណើននៃពស់ថ្លាន់ និងពស់ថ្លាន់ភូមានៅក្នុងកសិដ្ឋានក្នុងប្រទេសថៃ និងវៀតណាម ហើយបានរកឃើញថាពួកវាលូតលាស់យ៉ាងឆាប់រហ័សក្នុងរយៈពេលមួយឆ្នាំ ទោះបីជាពួកវាមិនស៊ីច្រើនដូចសត្វដទៃទៀតក៏ដោយ។ ការប្រែប្រួលនៃធនធាន ក៏ដូចជាការប្រែប្រួលអាកាសធាតុ កង្វះនិរន្តរភាព កំពុងនាំទៅរកការបរាជ័យនៃប្រព័ន្ធកសិកម្មនាពេលបច្ចុប្បន្ន។ ដូច្នេះការយកពស់ថ្លាន់ទៅបរិភោគគឺមានលក្ខណៈសម្បត្តិជាច្រើនដែលអាចជួយយើងបាន។

លោក Daniel Natusch សហអ្នកនិពន្ធសិក្សា និងជាអ្នកជំនាញនៅសាកលវិទ្យាល័យ Macquarie ប្រទេសអូស្ត្រាលីបាននិយាយថា សាច់ពស់ថ្លាន់ត្រូវបានគេប្រើប្រាស់នៅក្នុងផ្នែកខ្លះនៃពិភពលោក ជាពិសេសនៅក្នុងប្រទេសអាស៊ីមួយចំនួនដែលជាផ្នែកមួយនៃការធ្វើម្ហូប ប៉ុន្តែទំហំនៃការធ្វើកសិកម្មនៅមានតិចតួចនៅឡើយ។ Natusch បានបន្តទៀតថា “មនុស្សរាប់ពាន់លាននាក់នៅជុំវិញពិភពលោកបានចាត់ទុកពស់ថ្លាន់ជាប្រភពសាច់ដែលអាចទទួលយកបានតាមវប្បធម៌ មានតែប្រទេសលោកខាងលិចប៉ុណ្ណោះដែលមិនទាន់ធ្វើបាន”។

ដើម្បីស្វែងយល់អំពីការចិញ្ចឹមពស់ថ្លាន់ Natusch និងសហការីរបស់គាត់បានសិក្សាអំពីពស់ថ្លាន់ចំនួន ៤,៦០១ ក្បាល ដោយពួកគេផ្តល់អាហារដូចជាត្រី និងសត្វកកេរទៅឱ្យពស់ថ្លាន់ជារៀងរាល់សប្តាហ៍។ ពួកគេក៏ត្រូវបានវាស់ជាទៀងទាត់ពេញមួយឆ្នាំ ក្រោយមក អ្នកជំនាញបានធ្វើកោសល្យវិច័យ ជាលទ្ធផលពស់ថ្លាន់ទទួលបានជាមធ្យម ៤៦ ក្រាមក្នុងមួយថ្ងៃ ដោយញីលូតលាស់លឿនជាងឈ្មោល។ ដូច្នេះការរកឃើញទាំងអស់នេះបង្ហាញថាសាច់ពស់ថ្លាន់គឺជាជម្រើសអាហារប្រកបដោយនិរន្តរភាពបំផុត៕

បរទេស៖ កសិដ្ឋានអូស្ត្រាលីមួយកន្លែងបានបំបែកឯតទគ្គកម្មសម្រាប់ផ្លែប៊្លូបឺរីធំជាងគេរបស់ពិភពលោកដែលមានទទឹងជិត ៤ សង់ទីម៉ែត្រ និងមានទម្ងន់ ២០,៤ ក្រាម ពោលគឺមានទំហំធំជាង ១០ ដងនៃផ្លែប៊្លូបឺរីធម្មតា នេះបើយោងតាមការចុះផ្សាយរបស់ BBC នៅថ្ងៃទី១៥ ខែមីនា ឆ្នាំ២០២៤។

យោងតាមប្រភពដដែលបានឱ្យដឹងទៀតថា កាលពីមុនផ្លែប្លូបឺរីទម្ងន់ ១៦.២ ក្រាមដែលដាំដុះនៅភាគខាងលិចនៃប្រទេសអូស្ត្រាលី ក៏ធ្លាប់បានទទួលស្គាល់ដោយ Guinness World Records ថាជាផ្លែឈើធំជាងគេរបស់ពិភពលោកផងដែរ។ ទោះជាយ៉ាងណា គំរូថ្មីនេះគឺជាពូជដែលបង្កើតឡើងដោយ Costa Group ដើម្បីបំពេញតម្រូវការអតិថិជនសម្រាប់ផ្លែប្លូប៊ឺរីធំជាងគេរបស់ពិភពលោក។

លោក Brad Hocking អ្នកជំនាញផ្នែកសាកវប្បកម្មនាំមុខ បាននិយាយថា ពូជ Eterna តែងតែផ្តល់ផលផ្លែដ៏ធំ និងលក្ខខណ្ឌលូតលាស់ថ្មីៗ ដែលធ្វើឱ្យដំណាំនៅកសិដ្ឋានរបស់ពួកគេក្នុងរដ្ឋ New South Wales រីកចម្រើនខ្លាំង។ ក្រុមរបស់គាត់ក៏បានកត់សម្គាល់ឃើញថា ផ្លែប្លូប៊ឺរីគឺជោគជ័យខ្លាំងដោយសារវាមានទំហំធំ និងមានទម្ងន់ធ្ងន់ ដែលស័ក្តិសមបំផុតក្នុងការបំបែកឯតទគ្គកម្មពិភពលោក បើប្រៀបធៀបជាមួយផ្លែឈើចំនួន ២០ ផ្សេងទៀត។ ដូច្នេះ តើ blueberry បំបែកកំណត់ត្រាពិភពលោកមានរសជាតិយ៉ាងណា?

សម្រាប់រសជាតិនៃផ្លែប្លូបឺរីដ៏ធំនេះ លោក Hocking បាននិយាយថា វាមានរសជាតិដូចទៅនឹងប្លូបឺរីធម្មតាដែរ គ្រាន់តែវាមានទំហំធំនិងធ្ងន់ ហើយបទពិសោធន៍នៃការញ៉ាំគឺខុសគ្នា ដោយសារប្លូបឺរីធម្មតាមានទំហំតូចៗ ដូច្នេះយើងអាចញ៉ាំវាបានជាច្រើនគ្រាប់ ប៉ុន្តែសម្រាប់ប្លូបឺរីយក្សនេះគឺយើងញ៉ាំវាតែមួយគ្រាប់គឺនឹងពោះតែម្តង លើសពីនេះផ្លែប្លូបឺរីដ៏ធំនេះក៏អាចញ៉ាំជាមួយគ្នា ២,៣ នាក់បានផងដែរ។

ផ្លែប៊្លូបឺរី គឺជាផ្លែឈើដែលមានរសជាតិឈ្ងុយឆ្ងាញ់និងពេញនិយមខ្លាំងទូទាំងពិភពលោក វាមានអត្ថប្រយោជន៍ជាច្រើនសម្រាប់សុខភាព ដោយសារវាមានសារធាតុសំខាន់ៗដូចជា កាបូអ៊ីដ្រាត ជាតិសរសៃ វីតាមីន C និងសារធាតុរ៉ែ ក៏ដូចជាសារធាតុម៉ង់ហ្គាណែសជាដើម ដែលជួយប្រឆាំងអុកស៊ីតកម្ម ជួយដល់សុខភាពបេះដូង ខួរក្បាល និងគ្រប់គ្រងកម្រិតជាតិស្ករក្នុងឈាម៕