ប្រទេសចិន៖ ប្រទេសចិនគឺជាប្រទេសមួយក្នុងចំណោមប្រទេសដែលមានប្រព័ន្ធផ្លូវ និងស្ពានទំនើបឈានមុខគេលើពិភពលោក។ កាលពីពេលថ្មីៗនេះ ប្រទេសចិនបានធ្វើឱ្យពិភពលោកភ្ញាក់ផ្អើលនៅពេលដែលពួកគេបានសាងសង់ស្ពានព្យួរ Chajiaotan នៅក្នុងខេត្ត Guizhou ដែលជាស្ពានខ្ពស់បំផុតមួយនៅក្នុងពិភពលោក។ ស្ពាននេះដើរតួនាទីយ៉ាងសំខាន់ដែលតភ្ជាប់ខេត្ត Sichuan និងខេត្ត Guizhou ក៏ដូចជាលាតសន្ធឹងតាមជ្រលងទន្លេ Chishui ។

ស្ពានព្យួរ Chajiaotan មានកម្ពស់ប្រមាណ ៣១៥ ម៉ែត្រ និងមានប៉មធំមួយកម្ពស់ ២៤៣,៥ ម៉ែត្រ ជាមួយនឹងប្រវែងសរុប ២.០០៩ ម៉ែត្រ ក៏ដូចជាទទឹង ២៧ ម៉ែត្រ។ ដើម្បីសាងសង់គម្រោងដ៏ធំនេះ ក្រុមសំណង់ចិនបានចំណាយពេលត្រឹមតែ ២ ឆ្នាំប៉ុណ្ណោះ ហើយបានបើកឱ្យដំណើរការជាផ្លូវការនៅចុងខែកញ្ញា ឆ្នាំ២០១៩ ។ លោក Li Runzhe សមាជិកនៃក្រុមគ្រប់គ្រងគម្រោង បាននិយាយថា ការសាងសង់ស្ពាននៅកម្ពស់ពី ២០០ ទៅ ៣០០ ម៉ែត្រមិនមែនជាការងារងាយស្រួលនោះទេ។

ដើម្បីសម្រេចបាននូវគោលដៅនេះ នាយកដ្ឋានគម្រោងបានបង្កើតប្រព័ន្ធគ្រប់គ្រងវីដេអូ ដោយមានកាមេរ៉ាដែលមានគុណភាពបង្ហាញខ្ពស់សរុបជាង ៣០ ដែលអាចបង្វិលបាន ៣៦០ ដឺក្រេពីស្ថានភាពសំណង់អាចត្រួតពិនិត្យយ៉ាងប្រុងប្រយ័ត្ន។

ស្ពានព្យួរ Chajiaotan គឺជាស្ពានកម្រនៅលើភ្នំ ដូច្នេះដើម្បីជួយសម្រួលដល់ការសាងសង់ ផ្លូវរូងក្រោមដីដែលមានប្រវែងជិត ៥០០ ម៉ែត្រត្រូវបានជីកនៅតាមបណ្តោយឆ្នេរ Sichuan ជាផ្លូវចូលសម្រាប់ការសាងសង់។ លើសពីនេះទៀត ក្នុងអំឡុងពេលសាងសង់ ក្រុមការងារបានប្រើប្រាស់ Drones ដើម្បីទាញខ្សែត្រួតពិនិត្យប្រវែង ២,០០០ ម៉ែត្រពីលើជ្រលងភ្នំ ដើម្បីភ្ជាប់ទៅកាន់កំពូលប៉ម។

លោក Li Runzhe បានបន្តទៀតថា នៅពេលចាប់ផ្តើមសាងសង់ស្ពាន ពួកគេបានទៅពិនិត្យមើលទីតាំង ហើយបានបើកឡានតាមផ្លូវភ្នំដែលមានខ្យល់បក់ខ្លាំង គ្រប់គ្នាគិតថាការសាងសង់ស្ពាននេះប្រហែលជាចំណាយពេលយូរ ប៉ុន្តែការខិតខំប្រឹងប្រែងឥតឈប់ឈររបស់យើងបានប្រែក្លាយគម្រោងដែលហាក់ដូចជាមិនអាចទៅរួច ទៅជាស្ពានដ៏មហិមាបានដោយជោគជ័យ៕

តៃវ៉ាន់ ៖ កាលពីថ្ងៃទី១៥ ខែមីនា ឆ្នាំ២០២៤ សារព័ត៌មានបរទេសរាយការណ៍ថា នារីអូតែសបម្រើការនៅលើយន្តហោះឈឺក្បាលយ៉ាងខ្លាំង នៅពេលជួបករណីមួយ គឺឪពុក-ម្តាយជិះយន្តហោះកៅអី Business Class ហើយឱ្យកូនអាយុត្រឹមតែ៥ឆ្នាំ ជិះកៅអី Economy Class តែម្នាក់ឯង ហើយផ្តាំផ្ញើឱ្យអូតែសជួយមើលការខុសត្រូវផង ។ នារីអូតែសសួរថា តើការមើលថែក្មេង គឺជាតួនាទីរបស់នាង មែនទេ?

គេហទំព័រ HK01 រាយការណ៍ថា អ្នកស្រី Liu Fanxuan ជាភរិយារបស់សិល្បករម្នាក់នៅតៃវ៉ាន់ ហើយអ្នកស្រីធ្វើការជាអូតែសលើយន្តហោះ បានសរសេររៀបរាប់នៅក្នុង Instagram អំពីហេតុការណ៍កើតឡើង កាលពីថ្ងៃទី១០ ខែមីនា ឆ្នាំ២០២៤ ថា អ្នកស្រីបានឃើញប្តី-ប្រពន្ធ១គូ មានអាយុប្រមាណ៣៥ឆ្នាំ ឡើងជិះយន្តហោះជាមួយកូនប្រុសអាយុ៥ឆ្នាំ ។ ប៉ុន្តែអ្វីដែលចម្លែកនោះ គឺអ្នកទាំងពីរនេះជិះយន្តហោះកៅអី Business Class ប៉ុន្តែឱ្យកូនប្រុសជិះកៅអី Economy Class តែម្នាក់ឯង ។

ម្តាយរបស់ក្មេងប្រុស បាននិយាយយ៉ាងសុភាពមកកាន់អូតែសថា ៖ «កូនប្រុសរបស់យើងអង្គុយត្រង់នេះម្នាក់ឯង សូមរំខានអ្នកជួយមើលថែគេផង ។ បើគេចង់ហូបអាហារ ឬចង់ផឹកអ្វី សូមអ្នកជួយរកអីឱ្យគេញ៉ាំផង ។ ក្រៅពីនេះ អ្នកជួយនាំគេចូលបន្ទប់ទឹក ហើយបន្ទាប់ពីយន្តហោះចេញដំណើរ សូមអ្នកជួយយករបស់លេងឱ្យគេលេងផង» ។

ក្រោយពីនារីអូតែសបានឮបែបនេះ ក៏មានអារម្មណ៍ស្រឡាំងកាំងរហូតនិយាយអ្វីលែងចេញ ពីព្រោះយន្តហោះនេះត្រូវធ្វើដំណើរផ្លូវឆ្ងាយ គឺត្រូវចំណាយពេលវេលាធ្វើដំណើររហូតដល់១៤ម៉ោងឯណោះ ។

អ្នកស្រី Liu Fanxuan បន្តថា នៅពេលយន្តហោះចេញដំណើរ ក្មេងប្រុសរូបនេះគិតតែពីអង្គុយយំរកម្តាយឥតឈប់ រហូតដល់គាត់ត្រូវនាំគេចេញពីកៅអីអង្គុយ Economy Class ទៅតាមរកឪពុក-ម្តាយ ដែលអង្គុយនៅកៅអី Business Class ។ អ្នកស្រីបន្តថា គាត់ភ្ញាក់ផ្អើលពេលនាំក្មេងទៅកាន់ទីនោះ ស្រាប់តែឃើញឪពុក-ម្តាយក្មេងរវល់តែអង្គុយហូបអាហារ និងផឹកស្រាសំប៉ាញយ៉ាងសប្បាយរីករាយ ហើយមិនព្រមក្រោកពីកៅអីមកមើលកូនរបស់ខ្លួនឡើយ ។

នារីអូតែសបន្ថែមថា កៅអីប្រភេទ Economy Class នៅលើយន្តហោះនេះ មានអ្នកបម្រើការលើយន្តហោះត្រឹមតែ៦នាក់ប៉ុណ្ណោះ ដែលត្រូវទទួលខុសត្រូវ និងមើលថែអ្នកដំណើររហូតដល់២១១នាក់ ហើយការថែទាំក្មេងតូចលើយន្តហោះ វាមិនមែនជាតួនាទីការងាររបស់ពួកគេទេ ។ អ្នកស្រីថា ៖ «យើងនឹងអាចមើលថែអ្នកដំណើរគ្រប់រូបបាន តែយើងមិនអាចធ្វើតួនាទីជាអ្នកមើលក្មេងទេ» ។

ក្រោយពីនារីអូតែសបង្ហោះបែបនេះក្នុងបណ្តាញសង្គម ធ្វើឱ្យមហាជននាំគ្នារិះគន់ឪពុក-ម្តាយក្មេងយ៉ាងខ្លាំង ពីព្រោះគ្រប់គ្នាបានដឹងហើយថា ក្មេងៗតែងតែយំ និងចូលចិត្តធ្វើសំឡេងខ្លាំងៗពេលគ្មានឪពុក-ម្តាយនៅជាមួយ ។ រីឯអ្នកខ្លះបានណែនាំឱ្យក្រុមហ៊ុនអាកាសចរណ៍នេះដាក់ឈ្មោះឪពុក-ម្តាយរបស់ក្មេងចូលក្នុងបញ្ជីខ្មៅ ៕

ប្រទេសចិន ៖ លោកគ្រូពេទ្យចិនម្នាក់ឈ្មោះ Lu Zhizheng អាយុ១០៤ឆ្នាំ (កើតនៅឆ្នាំ១៩២០) ត្រូវបានមហាជនស្គាល់ថា លោកជាគ្រូពេទ្យបុរាណចិន ។ លោកបានរៀបរាប់ពីអាហារចំនួន២មុខ ដែលជួយឱ្យលោកមានសុខភាពរឹងមាំល្អ និងអាយុវែង ហើយលោកអាចធ្វើការងារយ៉ាងមានប្រសិទ្ធភាពថែមទៀត ដូចជា ៖ ការធ្វើរោគវិនិច្ឆ័យ និងព្យាបាលអ្នកជំងឺមួយចំនួនធំ រហូតដល់លោកមានអាយុជាង៨០ឆ្នាំ ។

តើលោក Lu Zhizheng បានបរិភោគអាហារអ្វីខ្លះ ទើបលោកមានអាយុវែងបែបនេះ?

១-បរិភោគខ្ញី ៖ លោក Lu Zhizheng ប្រាប់ថា លោកតែងតែហាន់ខ្ញី និងយកវាទៅត្រាំក្នុងទឹកខ្មេះ ។ បន្ទាប់មក លោកបរិភោគវាចាប់ពី២ដុំ ទៅ៣ដុំ ជារៀងរាល់ព្រឹក ហើយលោកមានទម្លាប់បរិភោគបែបនេះ អស់រយៈពេលជាង៤០ឆ្នាំ ។

បើតាមការស្រាវជ្រាវ និងតាមអ្នកជំនាញផ្នែកវេជ្ជសាស្ត្រលើពិភពលោក បញ្ជាក់ថា ខ្ញី គឺជាអាហារសុខភាពដែលមានសារធាតុ Gingerol អាចប្រឆាំងនឹងការរលាកយ៉ាងមានប្រសិទ្ធភាព ព្រមទាំងប្រឆាំងជាមួយអុកស៊ីតកម្មយ៉ាងខ្លាំង ។ ហេតុនេះ ការបរិភោគខ្ញី អាចជួយការពារការឆ្លងជំងឺបានយ៉ាងមានប្រសិទ្ធភាព ។

ការស្រាវជ្រាវអំពីខ្ញីបង្ហាញទៀតថា ការបរិភោគខ្ញី ចាប់ពី១ក្រាម ទៅ៣ក្រាម ជារៀងរាល់ថ្ងៃ ក្នុងរយៈពេល១២សប្តាហ៍ វានឹងជួយកាត់បន្ថយកម្រិត C-reactive (CRP) ក្នុងរាងកាយ ដែលជាសញ្ញានៃជំងឺបេះដូង និងសរសៃឈាម ។ លើសពីនេះ វាអាចជួយពង្រឹងប្រព័ន្ធភាពស៊ាំ ដោយកាត់បន្ថយការរលាករ៉ាំរ៉ៃ, បន្ថយសម្ពាធឈាម, បន្ថយកូលេស្តេរ៉ុល, ការពារការកកឈាម និងធ្វើឱ្យចរន្តឈាមរត់បានល្អ ។

ក្រៅពីនេះ ការបន្ថែមខ្ញីទៅក្នុងម្ហូបអាហារ វានឹងជួយគ្រប់គ្រងជាតិស្ករក្នុងឈាមសម្រាប់អ្នកកើតជំងឺទឹកនោមផ្អែម ប្រភេទទី២ និងអ្នកជំងឺធាត់ផងដែរ ។ បើតាមការស្រាវជ្រាវមួយទៀតបង្ហាញថា ខ្ញីអាចជួយគ្រប់គ្រងការឡើងទម្ងន់បាន ដោយសារខ្ញីបានបង្កើននូវកំដៅក្នុងរាងកាយ, ជួយកម្ចាត់ខ្លាញ់ និងជួយកាត់បន្ថយការស្រេកឃ្លាន ។

២-ចូលចិត្តផឹកទឹកតែ ៖ លោក Lu Zhizheng ធ្លាប់ប្រាប់ថា លោកមានទម្លាប់ផឹកទឹកតែ ចំនួន៣កែវក្នុង១ថ្ងៃ គឺលោកផឹកតែបៃតង ពេលព្រឹក, ផឹកតែអ៊ូឡុង ពេលរសៀល និងផឹកតែភូអ័រ ពេលល្ងាច ។ ទោះយ៉ាងណា លោកប្រាប់ថា ពុំគួរឆុងតែឱ្យខាប់ពេកទេ ដោយសារទឹកតែខាប់មានផ្ទុកអាស៊ីតតានីកច្រើន ហើយមនុស្សចាស់ពុំគួរផឹកតែខាប់ទេ ។

ទឹកតែ ផ្ទុកទៅដោយសារធាតុប៉ូលីហ្វេណុល, កាហ្វេអ៊ីន, ធានីន និងសារធាតុផ្សេងទៀត ដែលផ្តល់ប្រយោជន៍ដល់សុខភាពរាងកាយ ដូចជា ៖ កាត់បន្ថយការរលាក និងជួយប្រឆាំងជំងឺមហារីក ជាពិសេស តែបៃតង មានសារធាតុកាតេឈីន ដែលប្រឆាំងនឹងអុកស៊ីតកម្មតាមធម្មជាតិ និងការពារការខូចខាតកោសិកា ។ ហេតុនេះ វាអាចការពារជំងឺរ៉ាំរ៉ៃ និងធ្វើឱ្យយើងកាន់តែមានអាយុវែង ៕

សហរដ្ឋអាមេរិក ៖ កាលពីថ្ងៃទី១៤ ខែមីនា ឆ្នាំ២០២៤ សារព័ត៌មានបរទេសរាយការណ៍ថា សមត្ថកិច្ចបានចាប់ខ្លួនបុរស២នាក់ នៅរដ្ឋ Georgia សហរដ្ឋអាមេរិក ក្នុងនោះម្នាក់ឈ្មោះ Stephen Glosser អាយុ៣៧ឆ្នាំ និងម្នាក់ទៀតឈ្មោះ Caleb Kinsey អាយុ៣៤ឆ្នាំ ពីករណីដាក់ គ្រា.ប់.បែ.ក ផ្ទុះ និងព្រលែងសត្វពស់ក្នុងផ្ទះមិត្តស្រី ដើម្បីសងសឹកក្រោយពីនាងសុំបែកគ្នា ។

សមត្ថកិច្ចនិយាយថា លោក Stephen Glosser បានជួបមិត្តស្រីរបស់ខ្លួនជាលើកដំបូងតាមរយៈវែបសាយស្វែងរកគូស្រករ ប៉ុន្តែក្រោយមក ទំនាក់ទំនងស្នេហារបស់អ្នកទាំងពីរបានផ្លាស់ប្តូរ និងចែកផ្លូវគ្នាដើរ ហើយខាងស្រីក៏បានផ្តាច់រាល់ការទំនាក់ទំនងទាំងអស់ ។ ហេតុនេះ ធ្វើឱ្យលោក Stephen Glosser មានគំនុំចង់សងសឹក ហើយលោកក៏រៀបគម្រោងដាក់គ្រាប់បែកនៅផ្ទះមិត្តស្រីតែម្តង ។

លោក Stephen Glosser និងលោក Caleb Kinsey ត្រូវប្រឈមមុខនឹងការចោទប្រកាន់ផ្សេងៗ ដូចជា ៖ ការដើរតាមឃ្លាំមើលមិត្តស្រី, ការឃុបឃិតគ្នាដាក់គ្រាប់បែកដើម្បីប្រព្រឹត្តបទល្មើស, ការប្រើប្រាស់គ្រឿងផ្ទុះដើម្បីប្រព្រឹត្តបទល្មើសព្រហ្មទណ្ឌ និងការកាន់កាប់ឧបករណ៍មិនបានចុះបញ្ជីត្រឹមត្រូវតាមច្បាប់ ។

សមត្ថកិច្ចលើកឡើងថា បុរសទាំង២នាក់នេះត្រូវប្រឈមនឹងការចោទប្រកាន់បន្ថែមទៀត ដោយសារពួកគេបានយកខ្មោចកណ្តុរ និងលាមកឆ្កែទៅដាក់នៅផ្ទះមិត្តស្រី ។ ចំណែកបទល្មើសធ្ងន់ធ្ងរជាងនេះ គឺពួកគេមានគម្រោងព្រលែងពស់ថ្លាន់ដ៏ធំក្នុងផ្ទះមិត្តស្រី ដើម្បីឱ្យពស់លេបកូនស្រីរបស់នាងទាំងរស់ ។ សមត្ថកិច្ចបន្តថា សំណាងល្អ គ្មានអ្នកណាម្នាក់រងរបួសដោយសារគ្រាប់បែកផ្ទុះទេ ។

តុលាការបញ្ជាក់ថា បុរសទាំង២នាក់បានតាមឃ្លាំមើលនារីរងគ្រោះ ចាប់ពីខែធ្នូ ឆ្នាំ២០២២ រហូតដល់ខែមករា ឆ្នាំ២០២៣ ក្នុងគោលបំណងសម្លាប់, ធ្វើបាប និងគំរាមកំហែង ។ ហេតុនេះ ការឃុបឃិតគ្នាប្រព្រឹត្តបទល្មើសរបស់ពួកគេ នឹងជាប់ពន្ធនាគារមិនលើសពី២០ឆ្នាំ និងបន្ថែមរយៈពេលជាប់ពន្ធនាគារ១០ឆ្នាំទៀត សម្រាប់ការប្រព្រឹត្តបទល្មើសប្រើគ្រាប់បែកផ្ទុះ ។

ចំណែកនារីជនរងគ្រោះឈ្មោះ Larissa Apperson និយាយថា នាង និងកូនស្រី បានមករស់នៅផ្ទះថ្មីមិនបាន១២ម៉ោងផង ស្រាប់តែកើតហេតុការណ៍ផ្ទុះគ្រាប់បែក ។ នាងថា ៖ «ផ្ទះនៅមាត់បឹង Demeries នេះ គឺជាផ្ទះក្នុងក្តីសុបិនរបស់ខ្ញុំ ។ ខ្ញុំសោកស្តាយយ៉ាងខ្លាំងជាមួយរឿងរ៉ាវដែលកើតឡើងនេះ ហើយខ្ញុំមិនចង់ជឿទេ» ។ ចុងក្រោយ នាងប្រាប់ថា នាងគ្រោងសាងសង់ឡើងវិញសម្រាប់ផ្នែកខ្លះនៃផ្ទះដែលបានបំផ្លាញ ៕