សក់គឺជាមន្តស្នេហ៍ម្យ៉ាងរបស់មនុស្សគ្រប់ភេទ មិនថាសក់ត្រង់ឬក៏រួញ វែងឬក៏ខ្លីមិនមែនជារឿងសំខាន់នោះទេតែចំណុចសំខាន់គឺស្ថិតនៅត្រង់ក្លិន។ តើអ្នកធ្លាប់ឬទេនៅពេលមាននរណាម្នាក់ដើរកាត់យើងហើយអ្នកទទួលបានក្លិនក្រអូបពីសក់របស់គេយើងក៏ចង់ងាកតាមហិតដែរមែនអត់? ជឿថាអ្នកណាក៏ចង់បានសក់ដែលមានក្លិនក្រអូបបែបនេះដែរ រហូតមានអ្នកខ្លះយកទឹកអប់មកបាញ់សក់ទៀតផង តែវិធីនេះមិនបានជួយឱ្យសក់របស់អ្នកក្រអូបជាប់បានយូរនោះទេ។ ដូច្នេះដើម្បីធ្វើឱ្យសក់របស់អ្នកមានក្លិនក្រអូបបានយូរ ចូរអ្នកអនុវត្តគន្លឹះសាមញ្ញដូចខាងក្រោម៖
១.ការពារសក់នៅពេលចូលផ្ទះបាយ៖ ជាការពិតណាស់ស្ត្រីគ្រប់រូបជៀសមិនផុតទេពីការចូលផ្ទះបាយដើម្បីចម្អិនអាហារ ឬអ្នកខ្លះទៀតធ្វើការនៅក្នុងបរិយាកាសអាហារ គឺជាសកម្មភាពដែលធ្វើឱ្យសក់របស់អ្នកមានក្លិនមិនល្អ ដែលជាប់ក្នុងរយៈពេលយូរ។ ដូច្នេះនៅពេលនេះ អ្នកគួរតែចងសក់របស់អ្នកឡើង ឬពាក់មួក ដើម្បីឱ្យសក់របស់អ្នកមានក្លិនក្រអូបបានយូរ។
២.សម្អាតវត្ថុដែលប៉ះនឹងសក់ជាប្រចាំ៖ វត្ថុដែលអាចប៉ះសក់រួមមាន មួក ស្រោមខ្នើយ ក្រាស់សិតសក់ និងបូរចង់សក់ជាដើម… បន្ទាប់ពីប្រើបានមួយរយៈ វានឹងចាប់ផ្តើមកកកុញញើស និងប្រេងលើស។ ផលិតផលទាំងនេះត្រូវលាងសម្អាតជាប្រចាំ ដើម្បីកម្ចាត់ក្លិនមិនល្អ និងមេរោគចេញពីស្បែកក្បាល។ ជាងនេះទៅទៀត នៅពេលដែលសក់របស់អ្នកប៉ះនឹងវត្ថុដែលស្អាត និងមានក្លិនក្រអូប វាក៏ជួយរក្សាក្លិនសក់របស់អ្នកបានមួយផ្នែកផងដែរ។
៣.ប្រើសាប៊ូកក់សក់ និងក្រែមបន្ទន់ឱ្យបានត្រឹមត្រូវ៖ ដើម្បីបានសក់ស្អាត និងក្រអូបបានយូរ ដំបូងយើងត្រូវយកម៉ាស់អប់សក់ ឬប្រេងដូងមកលាបឱ្យសព្វសរសៃសក់ រួចទុកចោល១០ ទៅ ១៥នាទី។ បន្ទាប់មកត្រូវប្រើទឹកស្អាតលាងសក់ចេញឱ្យអស់ជាតិម៉ាស់ ក្រោយមកកក់សក់ជាមួយសាប៊ូចំនួនពីរដង ដោយកក់លើកទីមួយជាការលាងសំអាតជាតិកង្វក់ចេញពីសរសៃសក់ និងស្បែកក្បាល។ ហើយលើកទីពីរ ធ្វើឱ្យសក់របស់អ្នកទទួលបានការថែបំប៉ន និងក្លិនក្រអូបពីសាប៊ូ រួចប្រើក្រែមបន្ទន់សក់ប្រសិនបើចង់បានសក់ដែលមានសុខភាពល្អរឹងមាំ និងមានក្លិនក្រអូបបានយូរ ដោយអប់ទុកត្រឹម២ ទៅ ៣ នាទី ហើយលាងទឹកចេញឱ្យអស់ជាតិក្រែមបន្ទន់សក់ជាការស្រេច។
៤.ប្រើសេរ៉ូម៖ បន្ទាប់ពីកក់សក់រួចគួរប្រើសេរ៉ូមដើម្បីការពារសក់ពីកម្ដៅ ដូចជាកម្ដៅថ្ងៃ និងកម្ដៅពីការផ្លុំសក់ជាដើម។ សេរ៉ូមនិងជួយឱ្យសក់របស់អ្នកមានសុខភាពល្អមិនផុយស្រួយ នៅពេលសក់របស់អ្នកមានសុខភាពល្អការចាប់ក្លិនក្រអូបក៏ជាប់បានយូរដូចគ្នាផងដែរ៕