ប្រទេសវៀតណាម ៖ នៅខែមីនា ឆ្នាំ២០២៤ តម្លៃទុរេនមូសាំងឃីង (Musang King) បានកើនឡើងខ្ពស់នៅប្រទេសវៀតណាម គឺតម្លៃស្មើប្រមាណ១៥ដុល្លារអាមេរិកក្នុង១គីឡូក្រាម ក្នុងអំឡុងពេលចាប់ផ្តើមការប្រមូលផលនៅតំបន់ដីសណ្តទន្លេមេគង្គ ។ ជាទូទៅ ទុរេនមានគុណភាពល្អ គឺមានតម្លៃចាប់ពី១៥ដុល្លារ ដល់១៧ដុល្លារអាមេរិក ។

តម្លៃទុរេនវៀតណាមបានកើនឡើងខ្ពស់នៅខែមីនានេះ ក្រោយពីតម្លៃទុរេនបានធ្លាក់ចុះយ៉ាងខ្លាំង កាលពីខែតុលា ឆ្នាំ២០២៣ ។ បើតាមអាជីវករលក់ទុរេនវៀតណាមម្នាក់និយាយថា ការប្រមូលផលទុរេននៅវៀតណាមនាពេលបច្ចុប្បន្នមានកំណត់ ខណៈតម្រូវការនាំចេញទុរេនទៅក្រៅប្រទេសច្រើន ។ ផ្លែទុរេនមានគុណភាពខ្ពស់នឹងចាប់ផ្តើមទុំនៅចុងខែមីនា ហើយមានអតិថិជនជាច្រើននាក់រង់ចាំទិញ ។

ចំណែកអាជីវករលក់ទុរេនម្នាក់ទៀតនិយាយថា ខ្លួនបានផ្តោតទៅលើការចាប់អារម្មណ៍ទិញទុរេនពីក្រៅប្រទេសសម្រាប់ទុរេនមូសាំងឃីងរបស់វៀតណាម ។ រីឯតម្រូវការទិញទុរេនពីទីផ្សារក្រៅប្រទេស មានដូចជា ៖ ប្រទេសរុស្ស៊ី, សហរដ្ឋអាមេរិក, អាល្លឺម៉ង់ និងឌូបៃ ។ រីឯទិន្នផលទុរេនធ្លាក់ចុះនៅវៀតណាម គឺបណ្តាលមកពីកសិករមួយចំនួនឈប់ដាំដុះ ពីព្រោះទុរេនជាដំណាំពិបាកថែទាំ និងមិនងាយទទួលបានផលនោះទេ ព្រមទាំងអាកាសធាតុមិនអំណោយផលផងដែរ ។

អាកាសធាតុក្តៅអូសបន្លាយជាច្រើនខែបានធ្វើឱ្យតំបន់ឧស្សាហកម្ម និងដើមឈើហូបផ្លែដែលដាំដុះនៅលើផ្ទៃដីជាច្រើនកន្លែង ជាពិសេស ទុរេន គឺជាផ្លែឈើមានតម្លៃខ្ពស់ផ្នែកសេដ្ឋកិច្ច ដែលកសិករវៀតណាមដាំដុះនៅតំបន់អាគ្នេយ៍ និងតំបន់កណ្តាល ខ្វះខាតទឹកយ៉ាងខ្លាំង ។ ហេតុនេះ វាបណ្តាលឱ្យដំណាំទុរេនប្រឈមនឹងទិន្នផលធ្លាក់ចុះ ដោយសារគ្រោះរាំងស្ងួត ។

បើតាមអ្នកជំនាញវៀតណាមនិយាយថា ការស្រោចទឹកដើមទុរេនឱ្យបានគ្រប់គ្រាន់ ជាពិសេស ការស្រោចទឹកនៅរដូវក្តៅ គឺមានសារៈសំខាន់ខ្លាំងណាស់ ។ អ្នកជំនាញបញ្ជាក់ថា កសិករគួរតែស្រោចទឹកដើមទុរេន នៅពេលព្រឹកព្រលឹម ឬពេលល្ងាច គឺជាពេលល្អបំផុត ៕

ប្រទេសចិន ៖ កាលពីថ្ងៃទី២៦ ខែមីនា ឆ្នាំ២០២៤ សារព័ត៌មានបរទេសរាយការណ៍ថា តុលាការនៅប្រទេសចិនបានកាត់ក្តីឱ្យអតីតប្រធានសមាគមបាល់ទាត់ចិនជាប់ ពន្ធ.នា.គារ អស់មួយជីវិត ក្រោយពីតុលាការរកឃើញថា អតីតប្រធានសមាគមបាល់ទាត់រូបនេះបានទទួលប្រាក់ សំ.ណូក ស្មើជាង៨១លានយាន់ ក្នុងអំឡុងពេលកាន់តំណែង ។

សារព័ត៌មានស៊ិនហួរបានរាយការណ៍ពីទីក្រុង Wuhan ប្រទេសចិន កាលពីថ្ងៃទី២៦ ខែមីនា ថា តុលាការប្រជាជននៅខេត្ត Hubei ស្ថិតនៅតំបន់កណ្តាលប្រទេសចិន បានកាត់ក្តីឱ្យលោក Chen Xuyuan គឺជាអតីតប្រធានសមាគមបាល់ទាត់ចិន ជាប់ពន្ធនាគារអស់មួយជីវិត ដោយសារលោកទទួលសំណូក ។

តុលាការបញ្ជាក់ថា លោក Chen Xuyuan បានទទួលផលប្រយោជន៍ក្នុងអំឡុងពេលលោកកាន់តំណែង គឺចាប់ពីឆ្នាំ២០១០ រហូតដល់ឆ្នាំ២០២៣ រួមទាំងទទួលសំណូកពាក់ព័ន្ធនឹងសមាគមបាល់ទាត់ផងដែរ ដើម្បីចុះកិច្ចសន្យាគម្រោង និងដំណើរការវិនិយោគជាមួយបុគ្គលផ្សេង ។ លោក Chen Xuyuan បានទទួលប្រាក់ស្មើជាង៨១លានយាន់ ពីបុគ្គលផ្សេងដើម្បីជាការដឹងគុណ ។

សាលក្រមរបស់តុលាការបញ្ជាក់ដែរថា លោក Chen Xuyuan បានបំពានច្បាប់នៃការប្រកួតប្រជែងដោយយុត្តិធម៌ក្នុងវិស័យបាល់ទាត់យ៉ាងធ្ងន់ធ្ងរ ហើយលោកបានធ្វើឱ្យប៉ះពាល់ដល់មុខមាត់វិស័យកីឡាបាល់ទាត់របស់ប្រទេសចិនទៀតផង ៕

ប្រទេសជប៉ុន៖ រដ្ឋាភិបាលទីក្រុងតូក្យូ ប្រទេសជប៉ុន បានចេញសេចក្តីប្រកាសអំពីសុខភាព ខណៈដែលករណីនៃការឆ្លងមេរោគបាក់តេរីប្រភេទថ្មីដ៏កម្រមួយបានឆ្លងរាលដាលក្នុងល្បឿនលឿនបំផុត ចាប់តាំងពីដើមឆ្នាំនេះមកដែលមានលើសពី ៥០% នៃចំនួនករណីសរុបក្នុងឆ្នាំ ២០២៣ នេះបើយោងតាម Japan Times ដែលបានចុះផ្សាយនៅថ្ងៃទី២៦ ខែមីនា ឆ្នាំ២០២៤។

បច្ចុប្បន្នរដ្ឋាភិបាលកំពុងព្រួយបារម្ភអំពីការរីករាលដាលនៃជម្ងឺ streptococcal toxic shock syndrome (STSS) ដែលកំពុងកើនឡើងខ្លាំងនៅក្នុងប្រទេសជប៉ុន។ ជំងឺនេះបង្កឡើងដោយបាក់តេរី streptococcus ក្រុម A ដែលបណ្តាលឱ្យមានរោគសញ្ញាពិបាកដកដង្ហើមស្រួចស្រាវ និងការខូចខាតថ្លើម ហើយទំនងជាបណ្តាលឱ្យក្តៅខ្លួនខ្លាំងទៀតផង ដោយជាលទ្ធផលជំងឺនេះគឺមានអាត្រាស្លាប់ខ្ពស់រហូតដល់ ៣០% ។

ដូច្នេះបើគិតចាប់ពីដើមខែមករា ដល់ពាក់កណ្តាលខែមីនា ឆ្នាំ២០២៤ ចំនួនករណីនេះបានកើនឡើងដល់ ៨៨ ករណីនៅក្នុងទីក្រុងតូក្យូ ខណៈដែលប្រទេសទាំងមូលមាន ៥១៧ ករណី ដែលចំនួនករណីរយៈពេល ៣ ខែនេះបានលើសពី ៥០% នៃចំនួនករណីសរុបក្នុងឆ្នាំ ២០២៣។ ការកើនឡើងនៃករណី STSS ត្រូវបានគេជឿថាបានផ្សារភ្ជាប់ទៅនឹងវ៉ារ្យ៉ង់ M1UK ។

បើយោងតាមវិទ្យាស្ថានជាតិរបស់ប្រទេសជប៉ុន ក៏បានឱ្យដឹងដែរថា ជាធម្មតាប្រហែល ៩០% នៃជំងឺឆ្លង STSS ត្រូវបានកើតឡើងចំពោះមនុស្សដែលមានអាយុចាប់ពី ៤០ ឆ្នាំឡើងទៅ ដោយបច្ចុប្បន្នចំនួនករណីក្នុងវ័យ ៤០ ឆ្នាំបានកើនឡើងយ៉ាងខ្លាំងក្នុងរយៈពេលប៉ុន្មានខែមកនេះ។ ទោះជាយ៉ាងណា មន្ត្រីជប៉ុនបានស្នើឱ្យប្រជាជនស្វែងរកការណែនាំពីគ្រូពេទ្យជាបន្ទាន់ ប្រសិនបើពួកគេមានរោគសញ្ញាដូចជា ឈឺចាប់ ហើមអវយវៈ ឬក្តៅខ្លួន ដែលជាសញ្ញានៃការឆ្លងមេរោគនេះ។

គួរបញ្ជាក់ដែរថា ជំងឺ streptococcus ក្រុម A អាចឆ្លងតាមរយៈដំណក់ទឹកផ្លូវដង្ហើម និងការប៉ះពាល់ផ្ទាល់ ប៉ុន្តែការឆ្លងក៏អាចកើតមានតាមរយៈមុខរបួសនៅលើដៃ ឬជើងផងដែរ។ ហេតុនេះហើយ បច្ចុប្បន្នអាជ្ញាធរសុខាភិបាលបានកំពុងណែនាំប្រជាជនឱ្យអនុវត្តការប្រុងប្រយ័ត្នជាមូលដ្ឋាន ដូចជាការលាងដៃញឹកញាប់ និងការថែទាំរបួសឱ្យបានត្រឹមត្រូវ៕

ប្រទេសថៃ ៖ កាលពីថ្ងៃទី២៦ ខែមីនា ឆ្នាំ២០២៤ សារព័ត៌មានថៃរាយការណ៍ថា ក្នុងកិច្ចប្រជុំគណៈរដ្ឋមន្ត្រីបានអនុម័តលើសំណើរបស់ក្រសួងវប្បធម៌ ដោយស្នើសុំចុះបញ្ជីសម្លៀកបំពាក់ប្រពៃណីថៃ និង Muay Thai ជាបេតិកភណ្ឌវប្បធម៌ជាមួយអង្គការយូណេស្កូ នាពេលឆាប់ៗនេះ ។

លោក Sermsak Phongpanich រដ្ឋមន្ត្រីក្រសួងវប្បធម៌បានលើកឡើងក្រោយពីកិច្ចប្រជុំគណៈរដ្ឋមន្ត្រីថា គណៈរដ្ឋមន្ត្រីបានអនុម័តលើសំណើរបស់ក្រសួងវប្បធម៌ ក្នុងការស្នើសុំចុះបញ្ជីបេតិកភណ្ឌវប្បធម៌របស់ប្រទេសថៃ ចំនួន២ គឺសម្លៀកបំពាក់ប្រពៃណី និង Muay Thai ដោយឱ្យនាយកដ្ឋានផ្សព្វផ្សាយវប្បធម៌រៀបចំឯកសារបញ្ជូនទៅកាន់លេខាធិការដ្ឋាននៃគណៈកម្មការជាតិ ។

ចំណែកក្រសួងអប់រំនឹងបញ្ជូនឯកសារទៅឱ្យអង្គការយូណេស្កូ ឱ្យបានមុនថ្ងៃទី៣១ ខែមីនា ឆ្នាំ២០២៤ នេះ ដើម្បីឱ្យអង្គការយូណេស្កូពិចារណាចុះក្នុងបញ្ជី បន្ទាប់ពីការចុះបញ្ជីសម្លតុំយ៉ាំបង្គា និង Kebaya (គឺជាបេតិកភណ្ឌវប្បធម៌រួមគ្នារបស់ប្រទេស៥ រួមមាន ៖ ថៃ, ម៉ាឡេស៊ី, ព្រុយណេ, សិង្ហបុរី និងឥណ្ឌូណេស៊ី) ។ រីឯក្រមាវិញ ក្រសួងវប្បធម៌ថៃបានបញ្ជូនឯកសារសុំចុះឈ្មោះជាមួយអង្គការយូណេស្កូរួចហើយ កាលពីខែមីនា ឆ្នាំ២០២៣ ។

លោក Sermsak Phongpanich រដ្ឋមន្ត្រីក្រសួងវប្បធម៌បន្តថា សារៈសំខាន់របស់បេតិកភណ្ឌវប្បធម៌ថៃ គឺសម្លៀកបំពាក់ប្រពៃណីបានតំណាងឱ្យអត្តសញ្ញាណជាតិ ដែលថៃបានកែលម្អអស់រយៈពេលយូរមកហើយ ។ ប្រទេសថៃមានភស្តុតាងបញ្ជាក់ច្បាស់លាស់ ដោយសារជនជាតិថៃបានស្លៀកពាក់សម្លៀកបំពាក់ប្រពៃណី អស់ជាង១.៤០០ឆ្នាំ គឺចាប់តាំងពីសម័យថាវ៉ារ៉ាវៈឌី, អយុធ្យា រហូតដល់ដើមសម័យរតនៈកូស៊ីន ។ ហេតុនេះ ការស្លៀកពាក់ គឺជាភស្តុតាងដ៏សំខាន់សម្រាប់បញ្ជាក់ទៅកាន់ក្មេងជំនាន់ក្រោយឱ្យបានដឹង និងទទួលយកមរតកនេះ ។

លោករដ្ឋមន្ត្រីក្រសួងវប្បធម៌បន្ថែមថា ពលរដ្ឋថៃរស់នៅគ្រប់តំបន់បានស្លៀកពាក់ឈុតប្រពៃណីក្នុងពិធីសំខាន់ផ្សេងៗ ដូចជាពិធីផ្នែកសាសនា និងចូលរួមក្នុងពិធីសង្គមផងដែរ ។ សម្លៀកបំពាក់ប្រពៃណីទាំងនេះសុទ្ធតែកើតចេញពីស្នាដៃជនជាតិថៃទាំងអស់ ដូចជា ៖ ការតម្បាញ, ដេរប៉ាក់ និងការតុបតែងលម្អសម្លៀកបំពាក់ ។

លោករដ្ឋមន្ត្រីក្រសួងវប្បធម៌បន្ថែមថា ចំណែក Muay Thai គឺជាក្បាច់គុនរបស់ប្រទេសថៃ និងជាបេតិកភណ្ឌវប្បធម៌ ដែលបានបន្សល់ទុកពីបុព្វបុរសអស់រយៈពេលជាង៣០០ឆ្នាំ ។ រីឯភស្តុតាងវិញ បើតាមការកត់ត្រារបស់ Simon de la Loubère បញ្ជាក់ថា Muay Thai គឺជាក្បាច់គុនការពារខ្លួនដោយប្រើប្រាស់ដៃទទេ ហើយក្បាច់គុននេះមានដើមកំណើតមកពីចំណេះដឹងរបស់ជនជាតិថៃ ដែលបានតស៊ូជាមួយគ្រោះធម្មជាតិ, សត្វព្រៃ, មនុស្ស និងគ្រោះថ្នាក់ដោយសារសង្គ្រាម ។

ការហ្វឹកហាត់ក្បាច់គុន Muay Thai គឺបានហ្វឹកហាត់ចាប់ពីគ្រួសារ, សហគមន៍ រហូតដល់ស្ថាប័នព្រះមហាក្សត្រ ដើម្បីប្រើប្រាស់អវៈយវៈផ្សេងៗរបស់រាងកាយសម្រាប់ការពារខ្លួន ហើយគ្រូបង្ហាត់បានបង្ហាត់ដោយយកគំរូតាមសត្វ, ការសង្កេតធម្មជាតិ និងរឿងក្នុងអក្សរសិល្ប៍ថៃ ។ ក្រៅពីនេះ ក៏មានការបង្ហាញពីការដឹងគុណគ្រូបង្ហាត់ និងអ្នកមានគុណផងដែរ ដែលគេបានឃើញការរាំថ្វាយបង្គំគ្រូ មុនពេលឡើងប្រដាល់នៅលើសង្វៀន ។

បច្ចុប្បន្ន Muay Thai គឺជាកីឡាតំណាងឱ្យប្រទេសថៃ និងជាកីឡាអាជីព ហើយមានការបង្ហាត់បង្រៀន Muay Thai ដល់សិស្សនៅតាមស្ថាប័នអប់រំជាច្រើនកន្លែង ។ គេចាត់ទុកថា Muay Thai គឺជាសម្បត្តិវប្បធម៌របស់ជាតិ ដែលបានបន្តពីជំនាន់មួយទៅជំនាន់មួយទៀត រហូតដល់ពេលបច្ចុប្បន្ន ។ នេះបើតាមការលើកឡើងរបស់លោក Sermsak Phongpanich រដ្ឋមន្ត្រីក្រសួងវប្បធម៌ថៃ ៕

នៅអាស៊ីប្រទេសចិនគឺជាគោលដៅទេសចរណ៍ដែលមនុស្សជុំវិញពិភពលោកស្វែងរកច្រើនបំផុត ដោយសារភាពសម្បូរបែបនៃវប្បធម៌ សម្រស់ធម្មជាតិនៃព្រៃភ្នំខ្ពស់ៗ ទឹកជ្រោះដ៏អស្ចារ្យ និងប្រវត្តិសាស្ត្របុរាណដែលមានអាយុកាលចំណាស់ជាងគេ ក៏ដូចជាតម្លៃសម្រាប់ការធ្វើដំណើរសមរម្យផងដែរ។ ក្នុងចំណោមនោះតំបន់ទេសចរណ៍ដ៏ពេញនិយមរបស់ចិនទាំងអស់សុទ្ធតែជាកន្លែងដែលមានប្រជាប្រិយភាព ដោយមួយផ្នែកមកពីនិន្នាការនៃភាពយន្តចិន និងស៊េរីដែលកំពុងពេញនិយមយ៉ាងខ្លាំងនៅជុំវិញពិភពលោក។ ដូច្នេះថ្ងៃនេះ KBN News នឹងណែនាំប្រិយមិត្តមកស្គាល់តំបន់ទេសចរណ៍ល្បីៗចំនួន ៩ នៅក្នុងប្រទេសចិនដែលមនុស្សជុំវិញពិភពលោកស្វែងរកច្រើនបំផុត៖

១.មហាកំផែងចិន (Great Wall of China)៖ មហាកំផែងចិនគឺជាជញ្ជាំងដែលសាងសង់ឡើងពីកម្លាំងពលកម្មរបស់មនុស្សរាប់លាននាក់ ដែលមានប្រវែងសរុបគឺជាងពីរម៉ឺនគីឡូម៉ែត្រ លាតសន្ធឹងតាមជួរភ្នំហិមាល័យ កាត់តាមខេត្តចំនួនប្រាំបួនក្នុងប្រទេសចិន។ កន្លែងនេះគឺមានភាពអស្ចារ្យកម្រិតបេតិកភណ្ឌពិភពលោក ដែលនរណាៗបានទៅដល់ហើយមិនចង់ត្រឡប់មកវិញទេ។

២. Forbidden City៖ Forbidden City គឺជាព្រះបរមរាជវាំងនៃទីក្រុងប៉េកាំង ដែលមានភាពអស្ចារ្យ និងប្រណិតបំផុត ដែលឆ្លុះបញ្ចាំងពីអំណាច និងកិត្យានុភាពនៃរាជវង្សឈីង។ ដូច្នេះប្រសិនបើអ្នកបានមកដល់ប្រទេសចិនហើយ កុំភ្លេចទៅកន្លែងទេសចរល្បីល្បាញមួយនេះ។

៣.ភ្នំ Tianmen៖ ភ្នំ Tianmen ជាច្រាំងថ្មចោតដែលមានរូងភ្នំ Heaven’s Gate ដ៏ធំមានកំពស់ជាងមួយរយម៉ែត្រនៅលើកំពូលភ្នំ ដោយភ្ញៀវទេសចរអាចទទួលបានទិដ្ឋភាពនៃភ្នំ Tianmen ពី skywalk ដែលរត់តាមមុខច្រាំងថ្មចោទ។

៤. Yungang Grottoes៖ គឺជាទីក្រុងបុរាណមួយស្ថិតក្នុងខេត្ត Shanxi ដែលមានរូងភ្នំព្រះពុទ្ធសាសនាជាងពីរពាន់បានលេចចេញមក។ នៅក្នុងល្អាងមានរូបព្រះពុទ្ធបដិមា និងរូបបដិមាដទៃទៀត បានឆ្លាក់ពីថ្មម៉ាប ដោយព្រះពុទ្ធបដិមា និងរូបចម្លាក់ទាំងនេះមានអាយុកាលជាង ១.៥០០ ឆ្នាំមកហើយ។

៥.បឹង Sun Moon៖ Sun Moon គឺជាបឹងទឹកសាបដ៏ធំមួយដែលបែងចែកជាពីរផ្នែកដូចជាព្រះអាទិត្យ និងព្រះច័ន្ទ ព័ទ្ធជុំវិញដោយភ្នំ និងទេសភាពដ៏ស្រស់ស្អាតបំផុត។

៦.ទីក្រុងបុរាណ Xi’an៖ (Xian) ដែលជាអតីតរាជធានីនៃប្រទេសចិនក្នុងសម័យរាជវង្សថាង គឺមានភាពល្បីល្បាញដោយសារទីតាំងបុរាណដ៏អស្ចារ្យ និងអាថ៌កំបាំង ដូចជាផ្នូរទាហាន Terracotta ឬ “ផ្នូរទាហាន Qinshi” ដែលអញ្ជើញមនុស្សជុំវិញពិភពលោកឱ្យមកទទួលយកបទពិសោធន៍ និងវប្បធម៌ដ៏សម្បូរបែបរបស់ប្រទេសចិន។

៧. Jiuzhaigou៖ ជ្រលង Jiuzhaigou ដែលជាតំបន់ទេសចរណ៍ធម្មជាតិដ៏ល្បីល្បាញនៅលើពិភពលោក មានបឹងដ៏ស្រស់ស្អាត ទឹកជ្រោះ និងភ្នំថ្មកំបោរ ជាមួយនឹងបឹងពណ៌ខៀវច្បាស់លាស់ ធ្វើឱ្យអ្នកទស្សនាមានអារម្មណ៍ល្អ និងស្រស់ស្រាយខ្លាំងពេលមកដល់កន្លែងនេះ។

៨.ឧទ្យានព្រៃឈើជាតិ Zhangjiajie៖ ឧទ្យានដ៏អស្ចារ្យមួយនេះវិញមានភ្នំដូចសសរថ្មកំបោរ ដែលគេស្គាល់ថាជា “សសរទៀន” ដែលជាការបំផុសគំនិតសម្រាប់ទេសភាពភ្នំហោះក្នុងរឿង “Avatar” ឧទ្យាននេះក៏ល្បីល្បាញដោយសារបឹងថ្លាឈ្វេង និងទឹកធ្លាក់ដ៏ស្រស់ស្អាតបំផុតផងដែរ។

៩.ឧទ្យានជាតិ Dagu Glacier៖ Dagu Glacier គឺជាឧទ្យានជាតិដែលជាមានភ្នំដ៏ខ្ពស់រួមជាមួយផ្ទាំងទឹកកកដ៏ធំមួយគ្របដណ្តប់លើផ្ទៃដីជាង ២៥ គីឡូម៉ែត្រការ៉េ ដោយផ្ទាំងទឹកកកនេះត្រូវបានចាត់ទុកថាជាផ្ទាំងទឹកកកដ៏ធំបំផុតនៅអាស៊ី៕

ប្រទេសវៀតណាម ៖ កាលពីសប្តាហ៍ទី៣ ក្នុងខែមីនា ឆ្នាំ២០២៤ ក្រុមហ៊ុន Vinh Hiep ស្ថិតនៅខេត្តសាឡាយ ប្រទេសវៀតណាម បាននាំចេញគ្រាប់កាហ្វេធម្មជាតិ Organic ជាផ្លូវការលើកដំបូងទៅកាន់ប្រទេសជប៉ុន ស្មើប្រមាណ៤០តោន ខណៈជប៉ុនគឺជាទីផ្សារមានតម្រូវការកាហ្វេខ្ពស់ ។

កាហ្វេធម្មជាតិ Organic គឺសំដៅលើកាហ្វេដែលបានដាំដុះ និងផលិតតាមវិធីសាស្ត្រប្រកបដោយសុវត្ថិភាព គ្មានសារធាតុគីមី ។ វាជាកាហ្វេដែលគេដាំឱ្យធំលូតលាស់តាមបែបធម្មជាតិ និងដាំនៅតំបន់ធម្មជាតិ ដែលមានគ្មានសារធាតុគីមីនៅក្នុងដី, បរិយាកាស និងទឹក ដើម្បីទទួលបានទិន្នផលកាហ្វេមានគុណភាពល្អ និងសុវត្ថិភាព ។ ក្រៅពីនេះ កសិករត្រូវតែថែទាំវាយ៉ាងចិត្តទុកដាក់ផងដែរ ។

លោក Thai Nhu Hiep អនុប្រធានសមាគមកាហ្វេ និងកាកាវនៅវៀតណាម និងជានាយកក្រុមហ៊ុន Vinh Hiep លើកឡើងថា បើទោះជាគ្រាប់កាហ្វេធម្មជាតិ Organic របស់វៀតណាមនឹងមានសក្តានុពលខ្ពស់ក្តី ប៉ុន្តែវាមានបរិមាណត្រឹមតែ២% ប៉ុណ្ណោះ នៃទិន្នផលផលិតនៅលើទីផ្សារពិភពលោក ។ លោកបន្តថា កសិករវៀតណាមភាគច្រើននិយមដាំដុះដំណាំតាមទម្លាប់របស់ពួកគេ និងប្រើប្រាស់ជីគីមី ។

ទោះយ៉ាងណា ក្រុមហ៊ុន Vinh Hiep បានសហការជាមួយបណ្តាកសិករមួយចំនួន ដើម្បីបង្កើនតម្លៃនៃការដាំដុះកាហ្វេ ។ កាលពីឆ្នាំ២០១៦ ក្រុមហ៊ុនបានវិនិយោគប្រាក់ ដើម្បីផ្លាស់ប្តូរចម្ការកាហ្វេដាំដុះតាមបែបប្រពៃណី ទំហំ៤២ហិកតា ឱ្យក្លាយជាចម្ការកាហ្វេធម្មជាតិ Organic និងស្របតាមស្តង់ដាររបស់ក្រសួងកសិកម្មអាមេរិក ហើយក្រុមហ៊ុនបានចំណាយរយៈពេល២ឆ្នាំ ក្នុងការចរចាជាមួយក្រុមហ៊ុនផ្សេងៗរបស់ជប៉ុន ។

ការនាំចេញគ្រាប់កាហ្វេធម្មជាតិ Organic របស់វៀតណាមជាលើកដំបូង គឺបាននាំចេញទៅប្រទេសជប៉ុនក្នុងតម្លៃខ្ពស់ជាងគ្រាប់កាហ្វេផ្សេងទៀត រហូតដល់៣៥% ។ ភាពជោគជ័យនេះនឹងជួយបង្កើតឱកាសផ្សេងៗក្នុងការលក់ផលិតផលកាហ្វេធម្មជាតិ Organic របស់ក្រុមហ៊ុននៅជប៉ុន នាថ្ងៃអនាគតផងដែរ ។

ក្រៅពីនេះ ក្រុមហ៊ុន Vinh Hiep ក៏មានគម្រោងនាំចេញកាហ្វេធម្មជាតិ Organic ទៅកាន់ទីផ្សារផ្សេងទៀតនៅតំបន់អាស៊ី និងសហរដ្ឋអាមេរិក ក្រោយពីក្រុមហ៊ុនទទួលបានជោគជ័យលើការនាំចេញកាហ្វេទៅប្រទេសជប៉ុន ៕

ទន្លេមេគង្គដែលមានប្រវែងសរុប ៤២០០គីឡូម៉ែត្រ ដែលហូរឆ្លងកាត់ពីប្រទេសចិន មីយ៉ាន់ម៉ា ថៃ កម្ពុជា និង វៀតណាម បន្ទាប់មកក៏ហូរចាក់ទៅក្នុងសមុទ្រចិនខាងត្បូង ដែលកាលពីពេលថ្មីៗ បានបណ្តាលឲ្យមានការព្រួយ.បារម្ភក្នុងបណ្តាប្រទេសទាំងនេះ ព្រោះលេចព័ត៌មានថា ចិនបាននឹងកំពុងពន្លឿនការសាងសង់គម្រោងទំនប់វារីអគ្គីសនីលើដងទន្លេមេគង្គ បើទោះជាបីជាដឹងថាប៉ះ.ពាល់យ៉ាងធ្ងន់.ធ្ងរដល់ជលផលទន្លេក៏ដោយ។

កាលពីថ្ងៃទី ២៥ ខែមីនា យោងតាមប្រភពសារព័ត៌មាន The Straits Times គឺបានរាយការណ៍ថា តាមរយៈរូបភាពពីផ្កាយរណបបង្ហាញឲ្យឃើញថា ប្រទេសចិនបាននឹងកំពុងពន្លឿនការសាងសង់ទំនប់វារីអគ្គិសនីទី១២ ដោយស្ងាត់ៗនៅលើទន្លេមេគង្គ ដែលគម្រោងនេះបានចាប់ផ្តើមធ្វើតាំងពីឆ្នាំ២០១៩មកម្លេះ ក្នុងទំហំទឹកប្រាក់ ២០ ពាន់លានយន់ ឬជាង២,៧ពាន់លានដុល្លារអាមេរិក។

ទោះជាយ៉ាងណា បើយោងតាមការសិក្សាស្រាវជ្រាវបង្ហាញថា ការសាងសង់ទំនប់វារីអគ្គីសនីនៅទន្លេមេគង្គនេះ នឹងផ្តល់នូវផលអវិជ្ជមានដល់ជលផល ក៏ដូចជាប៉ះពាល់ដល់ជីវចម្រុះក្រោមទឹក ដែលជាប្រភពចំណូលដល់កាក់កបរបស់ប្រជានេសាទក្នុងបណ្តាប្រទេសអាស៊ីអាគ្នេយ៍។ យ៉ាងណាមិញ ប្រទេសចិនហាក់មិនខ្វល់និងបន្ថែមល្បឿនធ្វើឲ្យកាន់តែលឿនបន្ថែមទៀត៕

ប្រទេសឥណ្ឌា៖ ប្រាសាទទឹកកក Taj Mahal របស់ប្រទេសឥណ្ឌាបានទាក់ទាញការចាប់អារម្មណ៍យ៉ាងខ្លាំងពីភ្ញៀវទេសចរបរទេសរាប់ពាន់នាក់ឱ្យទៅកាន់តំបន់ Sonamarg ដើម្បីថតរូប ក៏ដូចជាជិះស្គីទឹកកក និងរត់លេងកម្សាន្តនៅទីនោះ។
នៅពាក់កណ្តាលខែមីនា ប្រាសាទទឹកកកចម្លងនៃអច្ឆរិយៈមួយក្នុងចំណោមអច្ឆរិយៈទាំងប្រាំពីររបស់ពិភពលោកគឺ Taj Mahal បានបង្ហាញខ្លួននៅក្នុងរមណីយដ្ឋានទេសចរណ៍ Gulmarg ដែលស្ថិតនៅចន្លោះ Jammu និង Kashmir ប្រទេសឥណ្ឌា។

ប្រាសាទទឹកកក Taj Mahal ផលិតដោយព្រិល មានកម្ពស់ ៦ ម៉ែត្រ និងទទឹង ១០ ម៉ែត្រ ហើយអាចផ្ទុកមនុស្សយ៉ាងហោចណាស់ ១០-១៥ នាក់ក្នុងពេលតែមួយនៅខាងក្នុង។ លោក Zubair Ahmed ដែលជាជាងចម្លាក់ម្នាក់ក្នុងចំនោមជាងចម្លាក់ទាំងបីនាក់បាននិយាយថា ពួកគេបានខិតខំប្រឹងប្រែងយ៉ាងខ្លាំងដើម្បីបញ្ចប់ការងារនេះ។ លោក Zubair បានបន្តថា “សម្រាប់រយៈពេល ៥-៦ ថ្ងៃដំបូង យើងត្រូវជួលកម្មករ ១៥-១៦ ។ បន្ទាប់មកវាជាវេននៃពួកយើងបីនាក់ដើម្បីទទួលបន្ទុក និងបញ្ចប់ការងារក្នុងរយៈពេល ១៦ ថ្ងៃបន្ថែមទៀត” ។ នៅពេលដែលគម្រោងនេះត្រូវបានសាងសង់ ព្រិលបានធ្លាក់រហូតដល់កម្រាស់ ០.៩ ម៉ែត្រ។

លោក Zubair ក៏បានបន្តទៀតថា “យើងត្រូវឆ្លងកាត់ព្រិលដើម្បីទៅដល់កន្លែងនេះ ហើយធ្វើការក្នុងសីតុណ្ហភាពត្រជាក់” លោក Zubair បាននិយាយថា ក្រៅពីព្រិល មិនមានសម្ភារៈផ្សេងទៀតត្រូវបានប្រើដើម្បីបង្កើតប្រាសាទនេះទេ។ ដូច្នេះហើយ អាយុកាលនៃការចម្លងប្រាសាទ Taj Mahal ធ្វើពីទឹកកក និងព្រិលគឺ ២០ ថ្ងៃ។ បច្ចុប្បន្នប្រាសាទនេះបានក្លាយជា “ចំណុចពិសេស” ថ្មីមួយដែលទាក់ទាញភ្ញៀវទេសចរ និងអ្នកស្រុកឱ្យចូលកម្សាន្តនិងមកថតរូប។ អ្នកទេសចរម្នាក់មកពីរដ្ឋ Jharkhand បានអធិប្បាយថា “ប្រាសាទទឹកកកនេះគឺអស្ចារ្យ និងគួរឱ្យទាក់ទាញ” ហើយបញ្ជាក់ថាភាពស្រស់ស្អាតនៃ Kashmir ត្រូវបានពង្រឹងបន្ថែមទៀតដោយរូបចម្លាក់ព្រិលទាំងនេះ។

អ្នកទេសចររូបនេះបាននិយាយថា “នេះជាលើកទីមួយហើយដែលខ្ញុំបានឃើញប្រាសាទ Taj Mahal ធ្វើពីព្រិល វាមើលទៅពិតជាស្រស់ស្អាត និងទាក់ទាញណាស់”។ អ្នកទេសចរបានបន្ថែមទៀតថា “ខ្ញុំចង់ឱ្យអ្នកគ្រប់គ្នាមកទទួលយកភាពអស្ចារ្យ និងភាពស្រស់ស្អាតនៃកន្លែងនេះ។ គួរបញ្ជាក់ដែរថា តំបន់ Sonamarg គឺស្ថិតនៅក្នុងបញ្ជីនៃគោលដៅទេសចរណ៍កំពូលសម្រាប់អ្នកទេសចរ និងអ្នកស្រឡាញ់ព្រិលនៅតំបន់កាស្មៀរ ដែលបានឃើញភ្ញៀវទេសចរយ៉ាងច្រើនកុះករដើម្បីទស្សនាភ្នំ និងផ្ទាំងទឹកកកដែលគ្របដណ្តប់ដោយព្រិលក្នុងរដូវរងារកន្លងមក៕