កាលពីពេលថ្មីៗនេះ យោងតាមការបង្ហោះដោយគណនីមួយដែលមានឈ្មោះ Vida Pura-ប្រាសាទ គឺបានបង្ហាញឲ្យឃើញពីទិដ្ឋភាពនៅខាងក្នុងសារមន្ទីរមួយកន្លែងនៅឯប្រទេសបារាំង បានដាក់តាំងពិព័ណ៌មរកវប្បធម៌ខ្មែរយ៉ាងច្រើនពោរពាស។ អ្វីដែលគួរឲ្យចាប់អារម្មណ៍ខ្លាំង ក្នុងនោះក៏បានដាក់តាំងបង្ហាញមួកមួយប្រភេទ ដែលគេឲ្យឈ្មោះថា មួក«ដួន» ព្រមជាមួយនឹងការបញ្ជាក់ថា មួកនេះគឺជាកេរ្តិ៍ដំណែលរបស់ប្រទេសកម្ពុជា។
យោងតាមការបង្ហោះដោយគណនីខាងលើគឺបានបង្ហាញរូបថតមួកប៉ុន្មានសន្លឹកភ្ជាប់ជាមួយនឹងខ្លឹមសារថា «នៅសារមន្ទីរ Alençon ប្រទេសបារាំង ក៏មានដាក់តាំងបង្ហាញពីមួកដួនបុរាណរបស់ខ្មែរដែរ តើយើងគួរបណ្ដុះស្មារតីឲ្យខ្មែរប្រើមួកដួនឡើងវិញ ឬក៏យើងគួរបណ្ដុះស្មារតីឲ្យប្រើតែមួកស្លឹកត្នោតខ្មែរបានហើយ ព្រោះឥឡូវមួកដួនត្រូវបានគេស្គាល់យ៉ាងទូលំទូលាយថាជាអត្តសញ្ញាណរបស់ប្រទេសជិតខាងយើងទៅហើយ»។
ជាមួយគ្នា មហាជនក៏បាននាំគ្នាទៅបញ្ចេញមតិព្រាត ដោយអ្នកខ្លះក៏បានលើកឡើងថា«តាមមើលរូបរាងមួកមានលក្ខណៈរចនាខុសគ្នាពីមួកអ្នកជិតខាង យើងមិនអាចច្រឡំគ្នាទេ»។ អ្នកខ្លះថា«មិនបាច់ទេ ទោះបីមួកនេះ ចាស់ៗខ្មែរពីដើមធ្លាប់ទទួលឥទ្ធិពលពីចិនក៏ដោយ ក៏ No»។ អ្នកខ្លះថា«យើងត្រូវស្រាវជ្រាវឡើងវិញសិន»។ អ្នកខ្លះថា«ខ្មែរគ្មានមួកដួនទេ វាមានឥទ្ធិពលមកពីផ្នែកមួយនៃប្រទេសចិន ឲ្យដឹងខ្លះផង»។ អ្នកខ្លះទៀតថា «ខ្មែរយើងត្រូវប្រើមួកដួនឡើងវិញ»។
ចំណែកម្នាក់ទៀតថា«គំនិតបងគួរតែប្រើមួកត្នោតវិញល្អជាង ព្រោះមួកស្លឹកប្រភេទនេះ ផ្ទះខាងកើតគេប្រើទូលំទូលាយណាស់ហើយ»។ និងម្នាក់ទៀតក៏បានឆ្លើយតបថា «ទូលំទូលាយឯណាទេ ចាស់ៗស្រុកខ្ញុំពីមុនពាក់ដួនធ្វើស្រែគ្រប់គ្នាទាំងប្រុសស្រី ចាស់ក្មេង មួកស្លឹកត្នោតអត់សូវនិយមទេ ព្រោះពាក់ការពារទឹកភ្លៀងអត់សូវធន់»។
បើយោងតាមការសិក្សាស្រាវជ្រាវបានឲ្យដឹងថា ជាធម្មតាពាក្យថា “ដួន” តែងសំដៅទៅលើវត្ថុគ្របក្បាលមួយប្រភេទដែលធ្វើពីស្លឹករុក្ខជាតិ ហើយដែលគែមខាងក្រោមច្រើនតែកន្ធែកឆ្ងាយមកក្រោមបាំងមុខ ចៀសវាងកុំឲ្យត្រូវថ្ងៃបាន។ មួកដួនគឺមានប្រភពមកពីប្រទេសនៅតំបន់អាស៊ី ដោយសារតែវប្បធម៌ប្រពៃណីនៃប្រទេសជិតខាងស្រដៀងៗគ្នា ទើបមានឥទ្ធិពលទៅលើគ្នាទៅវិញទៅមក។ ប្រទេសបានដែលបានយកមួក«ដួន»នេះមកប្រើប្រាស់រួមមានទាំងកម្ពុជា វៀតណាម ថៃ លាវ ភូមា ឥណ្ឌូនេស៊ី និងចិនខាងខាងត្បូងជាដើម ដែលមួកនេះទៀតសោតរមែងមានសណ្ឋានដូចៗគ្នា ហើយខុសគ្នាត្រង់ថាវត្ថុធាតុដើមដែលគេយកមកកែច្នៃចេញជាមួកប៉ុណ្ណោះ។ 
គួរបញ្ជាក់ថា មួក«ដួន» គឺមិនមែនជាកម្មសិទ្ធរបស់ប្រទេសណាមួយផ្តាច់មុខនោះទេ។ ទោះជាយ៉ាងណា ប្រហែលជាប្រទេសវៀតណាមហើយ ដែលដួនសម្បូណ៌ជាងគេ ព្រោះមិនត្រឹមតែអ្នកស្រែទេដែលពាក់ដួន តែអ្នកក្រុងក៏ពាក់ដែរ។ ជាពិសេសស្រីៗវៀតណាម ដែលនិយមតែងខ្លួនដោយប្រើសម្លៀកបំពាក់ប្រពៃណីជាតិនិងពាក់មួកដួននេះ។ បើនៅប្រទេសកម្ពុជា, ថៃ, ឡាវជាដើមវិញ គឺទាល់តែអ្នកស្រែ ឬអ្នកជនបទធ្វើការកណ្តាលធម្មជាតិទើបឃើញមានពាក់ដួន៕
