ឆ្នេរខ្សាច់កម្សាន្តប្របមាត់ព្រែកកំពង់បាយចាប់ពីស្ពានឥន្ទធនូ (ស្ពានចាស់) រហូតដល់ស្ពានកំពង់បាយ(ស្ពានថ្មី) និងរូបសំណាកសេះសមុទ្រមុខសាលាខេត្តចាស់ នឹងត្រូវបើកឱ្យភ្ញៀវទេសចរចូលលេងកម្សាន្ត ក្នុងឱកាសចូលឆ្នាំថ្មីខាងមុខនេះ។
ឆ្នេរកម្សាន្តមួយនេះគឺជាបេះដូងនៃខេត្តកំពត ដែលត្រូវបានគេរំពឹងថា ក្រោយស្ថាបនារួចរាល់នឹងមានសោភ័ណភាពស្អាត អាចទាក់ទាញភ្ញៀវទេសចរជាតិ និងអន្តរជាតិមកលេងច្រើន ដោយសារតែទីតាំងនេះអាចបង្កលក្ខណៈឱ្យភ្ញៀវទេសចរអាចងូតទឹកលេងបាន។
ម្យ៉ាងទៀត ក៏នឹងមានរូបសំណាកសេះសមុទ្របាញ់ទឹកដែលមានកម្ពស់ ៨ម៉ែត្រ ក៏ត្រូវរៀបចំឱ្យបានរួចរាល់នៅមុនពេលចូលឆ្នាំថ្មីប្រពៃណីជាតិខ្មែរដូចគ្នា ដោយមានការតុបតែងភ្លើងពណ៌ និងការបាញ់ទឹកឱ្យបានស្អាត។
ក្រៅពីនេះភ្ញៀវទេសចរ ក៏អាចទៅកម្សាន្តនៅកន្លែងទេសចរណ៍ជាច្រើនទៀត ដែលមាននៅក្នុងខេត្តកំពត ដូចជា៖ ដូងទេរ,ទឹកជ្រោះវាលពួច ឬកន្លែងកម្សាន្តធម្មជាតិ និងកែច្នៃជាច្រើនទៀតផងដែរ៕