ប្រទេសចិន៖ កាលពីល្ងាចថ្ងៃទី២៨ ខែមីនា ឆ្នាំ២០២៤ Xiaomi ដែលជាក្រុមហ៊ុនស្មាតហ្វូនយក្សរបស់ពិភពលោក បានដាក់បង្ហាញរថយន្តអគ្គិសនីដំបូងបង្អស់របស់ខ្លួនគឺម៉ូដែល Xiaomi SU7 ជាផ្លូវការនៅក្នុងប្រទេសចិន ជាមួយតម្លៃត្រឹមតែ ២៩,៩០០ ដុល្លារអាមេរិកប៉ុណ្ណោះ ក្នុងគោលបំណងដើម្បីប្រកួតប្រជែងជាមួយ Tesla Model 3 ក្នុងតម្លៃ ៣៤,០០០ ដុល្លារ។ ដូច្នេះសម្រាប់តម្លៃរបស់រថយន្តអគ្គិសនីចិនគឺទាបខ្លាំងណាស់ ដែលធ្វើឱ្យវាទទួលបានការបញ្ជាទិញរហូតដល់ ៥០,០០០ គ្រឿងក្នុងរយៈពេលត្រឹមតែ ២៧ នាទីប៉ុណ្ណោះ។

លោក Lei Jun នាយកប្រតិបត្តិរបស់ក្រុមហ៊ុន Xiaomi បាននិយាយថា គាត់បានត្រៀមខ្លួនជាស្រេចសម្រាប់ការដាក់តាំងបង្ហាញរថយន្តអគ្គិសនី SU7 នៅក្នុងទីក្រុងចំនួន ៣៩ ទូទាំងទីផ្សារប្រទេសចិនជាមួយនឹងការដាក់លក់នៅក្នុងហាងចំនួន ២១១ របស់ក្រុមហ៊ុន។ ទោះជាយ៉ាងណា ក្រុមហ៊ុនមិនបាននិយាយពីគម្រោងលក់រថយន្តអគ្គិសនីនៅបរទេសទេ។ SU7 គឺជារថយន្តអគ្គិសនីដំបូងបង្អស់របស់ក្រុមហ៊ុនស្មាតហ្វូន Xiaomi ដែលវាមាន ៣ ម៉ូដែលគឺ SU7, SU7 Pro និង SU7 Max។

រថយន្តអគ្គិសនី Xiaomi SU7 ត្រូវបានបំពាក់ដោយថ្ម Blade របស់ BYD ដែលមានសមត្ថភាព ៧៣.៦ kWh អាចបង្កើនល្បឿនពី ០-១០០ គីឡូម៉ែត្រក្នុងមួយម៉ោងរយៈពេល ៥.២ វិនាទី និងឈានដល់ល្បឿនអតិបរមា ២១០ គីឡូម៉ែត្រក្នុងមួយម៉ោង ជាមួយតម្លៃត្រឹមតែ ២៩,៩០០ ដុល្លារអាមេរិកប៉ុណ្ណោះ។ រីឯ Xiaomi SU7 Pro វិញប្រើប្រាស់ថាមពលថ្ម ៩៤.៣ kWh ដែលមានចម្ងាយ ៨៣០ គីឡូម៉ែត្រ និងប្រើស្ថាបត្យកម្មសាក ៨០០V ។ កំណែនេះមានតម្លៃប្រហែល ៣៤,០២៦ ដុល្លារអាមេរិក ដែលស្មើនឹង Tesla Model 3 នៅក្នុងប្រទេសចិន។

ចំណែកឯ Xiaomi SU7 Max ដែលជារថយន្តអគ្គិសនីស៊េរីទំនើបបំផុតមានសមត្ថភាពបង្កើនល្បឿនពី ០-១០០ គីឡូម៉ែត្រក្នុងមួយម៉ោងរយៈពេល ២.៨ វិនាទីជាមួយនឹងល្បឿនអតិបរមា ២៦៥ គីឡូម៉ែត្រក្នុងមួយម៉ោង ដែលមានថាមពលថ្ម ១០១ kWh Qilin ផ្តល់ចម្ងាយ ៨០០ គីឡូម៉ែត្រក្នុងពេលសាកម្តង។ ចំណុចគួរឱ្យចាប់អារម្មណ៍គឺវាអាចដំណើរការបានចម្ងាយដល់ទៅ ៥១០ គីឡូម៉ែត្របន្ទាប់ពីសាកថ្មត្រឹមតែ ១៥ នាទីប៉ុណ្ណោះ។ រថយន្តនេះប្រើប្រព័ន្ធបើកបរ ៤ កង់ កម្លាំងម៉ាស៊ីនភ្លោះគឺ ៤៩៥ kW រួមទាំងកម្លាំងបង្វិល ៨៣៨ Nm និងមានតម្លៃរហូតដល់ ៦៩,០០០ ដុល្លារអាមេរិក៕

ទេសថៃ ៖ ក្រុមហ៊ុនផលិតរថយន្តអគ្គិសនីរបស់វៀតណាម VinFast បានប្រកាសថា ក្រុមហ៊ុនមានគម្រោងពង្រីកទីផ្សាររថយន្តអគ្គិសនីនៅប្រទេសថៃ នាពេលឆាប់ៗនេះ ។ ជំហានដំបូង ក្រុមហ៊ុនបានចុះកិច្ចព្រមព្រៀងជាមួយក្រុមហ៊ុនតំណាងចែកចាយរថយន្តចំនួន១៥កន្លែង ដើម្បីបើកមជ្ឈមណ្ឌលលក់រថយន្ត VinFast នៅប្រទេសថៃ ។

ក្រុមហ៊ុន VinFast និង Dealer នឹងសហការគ្នាយ៉ាងពេញទំហឹង ដើម្បីបើកទីតាំង Showroom ឱ្យបានចំនួន២២កន្លែង ដោយផ្តោតទៅលើទីតាំងស្ថិតនៅតាមបណ្តោយផ្លូវធំៗក្នុងទីក្រុងបាងកក និងតំបន់ជុំវិញ ។ បន្ទាប់មក ក្រុមហ៊ុនទាំងពីរនឹងពង្រីកទីតាំង Showroom ទៅកាន់បណ្តាខេត្ត-ក្រុងធំៗផ្សេងទៀត ដូចជា ៖ ខេត្តឈៀងម៉ៃ, ខនកែន, អ៊ូប៊ុនរ៉ាជថានី, អយុធ្យា និងឈុនបុរី ។

Wu Dang Yen Hang គឺជា CEO របស់ក្រុមហ៊ុន VinFast ប្រចាំប្រទេសថៃ លើកឡើងថា ក្រុមហ៊ុនបានកំណត់គោលដៅថា នឹងចាប់ផ្តើមពង្រីកទីផ្សាររថយន្តអគ្គិសនីម៉ាក VF e34, VF 5, VF 6 និង VF 7 ព្រមទាំងកង់អាគុយផងដែរ ក្នុងរយៈពេល២ខែខាងមុខទៀត ឬនៅត្រីមាសទី៣ នៃឆ្នាំ២០២៤ ។ ក្រុមហ៊ុននឹងផ្សព្វផ្សាយឱ្យបានលម្អិតពាក់ព័ន្ធនឹងតម្លៃរថយន្តទាំងនេះ នាពេលក្រោយ ។

ទីផ្សាររថយន្តអគ្គិសនីនៅប្រទេសថៃ បើទោះជាមានទំហំតូចក្តី ប៉ុន្តែវាបានកើនឡើងយ៉ាងឆាប់រហ័ស ដោយសារវិធានការគាំទ្រផ្សេងៗរបស់រដ្ឋាភិបាលថៃ ។ ហេតុនេះ ក្រុមហ៊ុនមានគម្រោងថា នឹងផលិតរថយន្តអគ្គិសនីឱ្យបានរហូតដល់៣០% របស់បរិមាណការផលិតរថយន្តសរុប ចំនួន២លាន៥សែនគ្រឿងក្នុង១ឆ្នាំ ។

នៅឆ្នាំ២០២៤ ក្រុមហ៊ុន VinFast បានកំណត់គោលដៅថា នឹងពង្រីកទីផ្សារយ៉ាងហោចណាស់៥០ប្រទេស ដែលបន្ថែមពីលើទីផ្សារនបង្កើតរួចហើយ ដូចជា ៖ សហរដ្ឋអាមេរិក, កាណាដា និងអឺរ៉ុប ។ បច្ចុប្បន្ននេះ ក្រុមហ៊ុន VinFast បានផ្តោតគោលដៅទៅលើទីផ្សារប្រទេសជិតខាងក្នុងតំបន់អាស៊ី ដូចជា ៖ ប្រទេសឥណ្ឌា, ឥណ្ឌូណេស៊ី, ថៃ និងហ្វីលីពីន ព្រមទាំងក្រុមប្រទេសនៅមជ្ឈិមបូព៌ា និងអាហ្វ្រិកផងដែរ ៕

ប្រទេសវៀតណាម ៖ ប្រទេសវៀតណាមបានប្រឈមនឹងហានិភ័យខ្ពស់ ខណៈការឆ្លងជំងឺពីសត្វទៅមនុស្សកើនឡើងជាបន្តបន្ទាប់ ហើយបើគិតចាប់តាំងពីដើមឆ្នាំ២០២៤នេះ មានពលរដ្ឋវៀតណាមបាន ស្លា.ប់ ដោយសារជំងឺឆ្កែ ឆ្កួ.ត យ៉ាងហោចចំនួន២៧នាក់ និង ស្លា.ប់ ដោយសារជំងឺផ្តាសាយបក្សី ចំនួនម្នាក់ ។ នេះបើយោងតាមការចុះផ្សាយរបស់សារព័ត៌មានបរទេស កាលពីថ្ងៃទី២៨ ខែមីនា ឆ្នាំ២០២៤ ។

សារព័ត៌មានស៊ិនហួរបានរាយការណ៍ពីទីក្រុងហាណូយ ប្រទេសវៀតណាម កាលពីថ្ងៃទី២៨ ខែមីនា ឆ្នាំ២០២៤ ថា លោក Phung Duc Tien ជាអនុរដ្ឋមន្ត្រីក្រសួងកសិកម្ម និងអភិវឌ្ឍន៍ជនបទវៀតណាម បានលើកឡើងក្នុងកិច្ចប្រជុំ ស្តីពី «ការពង្រឹងការការពារ និងទប់ស្កាត់ជំងឺឆ្លងពីសត្វមកមនុស្ស» ថា ស្ថានការណ៍នេះបានបង្ហាញពីការវិវឌ្ឍដ៏ស្មុគស្មាញរបស់ជំងឺ ដែលកំពុងតែកើតឡើងនៅប្រទេសវៀតណាម នាពេលបច្ចុប្បន្ន ។ លោកបន្តថា ការឆ្លងជំងឺនៅតាមព្រំដែន និងអាកាសធាតុក្តៅខ្លាំង គឺជាកត្តាចម្បងដែលបណ្តាលឱ្យមានការឆ្លងជំងឺពីសត្វមកមនុស្ស ។

បើតាមទិន្នន័យរបស់ក្រសួងសុខាភិបាលវៀតណាមបញ្ជាក់ថា ប្រទេសវៀតណាមបានរកឃើញមេរោគផ្តាសាយបក្សីលើមនុស្ស យ៉ាងហោចណាស់២នាក់ បើគិតចាប់ពីឆ្នាំ២០២២ មក និងមានអ្នកស្លាប់យ៉ាងហោចណាស់ម្នាក់ នៅខែមីនា ឆ្នាំ២០២៤ ។

ជាមួយគ្នានេះ អ្នកកើតជំងឺឆ្កែឆ្កួត ភាគច្រើនអាចប្រឈមនឹងការស្លាប់ ហើយកាលពីឆ្នាំ២០២៣ នៅប្រទេសវៀតណាមមានពលរដ្ឋស្លាប់ដោយសារជំងឺឆ្កែឆ្កួត ចំនួន៨២នាក់ ។ រីឯរយៈពេល៣ខែដំបូងនៃឆ្នាំ២០២៤ (គឺចាប់ពីខែមករា រហូតដល់ខែមីនា) មានពលរដ្ឋវៀតណាមស្លាប់ដោយសារជំងឺឆ្កែឆ្កួត ចំនួន២៧នាក់ និងមានអ្នកឆ្លងជំងឺនេះកាន់តែច្រើន ជាពិសេស នៅតំបន់ខ្ពង់រាបកណ្តាល ៕

នៅពេលដែលអាកាសធាតុក្ដៅហួតហែងខ្លាំងពេក មានតែម៉ាស៊ីនត្រជាក់ប៉ុណ្ណោះដែលអាចជួយបាន ប៉ុន្តែការប្រើម៉ាស៊ីនត្រជាក់ច្រើនច្បាស់ជាធ្វើឱ្យថ្លៃភ្លើងប្រចាំខែអស់ច្រើនលើសពីធម្មតាដោយសារវាប្រើប្រាស់ថាមពលភ្លើងច្រើន។ ទោះជាយ៉ាងណា វិធី ៤ យ៉ាងខាងក្រោមនេះនឹងជួយសន្សំសំចៃថវិកាបានមួយកម្រិតពេលប្រើម៉ាស៊ីនត្រជាក់នារដូវក្ដៅបែបនេះ៖

១.កុំកំណត់សីតុណ្ហភាពទាបពេក៖ បើយោងតាមវិទ្យាស្ថានស្រាវជា្រវ The Energy and Resources Institute របស់ឥណ្ឌាបានបង្ហាញថាបើសិនជាប្ដូរពីការកំណត់សីតុណ្ហភាព ១៨-២១ អង្សាសេ មកដល់ ២៤ អង្សាសេ អាចជួយសន្សំសំចៃថវិកាបានជិត ៥៣ដុល្លារក្នុងមួយឆ្នាំ ហើយការប្ដូរពី ១៨-២១ អង្សាសេ មកដល់ ២៧ អង្សាសេ អាចសន្សំសំចៃបាន ៨៦ដុល្លារ។ នេះបង្ហាញថាការកំណត់កម្រិតសីតុណ្ហភាពរបស់ម៉ាស៊ីនត្រជាក់គឺអាចឱ្យអ្នកសន្សំសំចៃថវិកាបាន។

២.កំណត់ឱ្យបិទស្វ័យប្រវត្តិ៖ តាមរយៈតេឡេម៉ាស៊ីនត្រជាក់ អ្នកអាចកំណត់ឱ្យម៉ាស៊ីនត្រជាក់បិទស្វ័យប្រវត្តិនៅពេលទៀបភ្លឺ ដែលជាពេលសីតុណ្ហភាពខាងក្រៅចាប់ផ្ដើមចុះត្រជាក់ ហើយអ្នកអាចពឹងផ្អែកលើកង្ហារតែឯងបាន។

៣.ប្រើកង្ហារបន្ថែម៖ ម៉ាស៊ីនត្រជាក់ និងកង្ហារអាចផ្ដល់នូវប្រសិទ្ធភាពខ្ពស់បំផុតពេលដំណើរការជាមួយគ្នា។ កង្ហារអាចបាញ់ខ្យល់ត្រជាក់ដែលចេញពីម៉ាស៊ីនត្រជាក់ចំទីតាំងដែលអ្នកចង់បាន ហើយវាអាចជួយឱ្យញើសលើខ្លួនឆាប់ស្ងួត បង្កើតជាភាពត្រជាក់លើស្បែកបានយ៉ាងមានប្រសិទ្ធភាព និងលឿនបំផុត។

៤.សម្អាតតម្រងម៉ាស៊ីនត្រជាក់៖ ប្រសិនបើចង់សន្សំសំចៃឱ្យបានច្រើនមែននោះ ការលាងសម្អាតតម្រងម៉ាស៊ីនត្រជាក់ជាប្រចាំនឹងអាចជួយបាន។ តម្រងម៉ាស៊ីនត្រជាក់ដែលមានកកស្ទះដោយកម្ទេចធូលីច្រើន នឹងធ្វើឱ្យម៉ាស៊ីនត្រជាក់ខំធ្វើការរឹតតែខ្លាំងដើម្បីបញ្ចេញខ្យល់ត្រជាក់ ដែលចំណាយថាមពលច្រើន។ ការសម្អាតតម្រងខ្យល់នេះដែរគឺងាយស្រួលបំផុត ដែលអ្នកអាចធ្វើបានដោយខ្លួនឯង និងមិនពឹងពាក់អ្នកសម្អាតនោះទេ៕

បរទេស៖ កាលពីពេលថ្មីៗនេះ បើយោងតាម National Post ដែលបានចុះផ្សាយនៅថ្ងៃទី២៨ ខែមីនា ឆ្នាំ២០២៤ ថាប្រទេសកាណាដាបានបង្កើតច្បាប់ថ្មីដោយយកពន្ធទៅលើទឹកភ្លៀង ដែលធ្វើឱ្យប្រជាពលរដ្ឋផ្ទុះកំហឹ.ងយ៉ាងខ្លាំង។

រដ្ឋាភិបាលទីក្រុងតូរ៉ុនតូរបស់ប្រទេសកាណាដា បានកំពុងពិចារណាលើច្បាប់ថ្មីដែលតម្រូវឱ្យប្រជាជនត្រូវតែបង់លុយដល់រដ្ឋាភិបាលនៅពេលដែលមានភ្លៀងធ្លាក់ម្តងៗ ដោយលើកមូលហេតុថា ពេលភ្លៀងធ្លាក់ដំណក់ទឹកភ្លៀងនឹងហូរចុះពីដំបូងផ្ទះ បណ្តាលឱ្យហូរកាត់ផ្លូវថ្នល់ជាតិ ស៊ីម៉ង់ បេតុងជាដើម បន្ទាប់មកទឹកភ្លៀងក៏បានហូរចូលទន្លេ និងបឹង ធ្វើឱ្យទឹកទាំងអស់មិនស្អាត ក៏ដូចជាកខ្វក់ ដែលអាចបំផ្លាញបរិស្ថាន។

ដូច្នេះហើយប្រជាជនណាដែលមានផ្ទះត្រូវតែទទួលខុសត្រូវលើរឿងទាំងអស់នេះ។ សម្រាប់តម្លៃវិញ រដ្ឋាភិបានបាននិយាយថា នឹងគិតជាការ៉េរបស់តំបូលផ្ទះ ផ្ទៃក្រឡាកន្លែងចតរថយន្ត និងកន្លែងក្រាលបេតុង ដោយមួយម៉ែត្រការ៉េមានតម្លៃ ១.៦៨ សេន រីឯអ្នករស់នៅក្នុងខុនដូរវិញគឺគេយក ១៤-៤៤ សេនក្នុងមួយម៉ែត្រការ៉េ។

ប្រសិនបើរបាយការណ៍ត្រូវបានដំណើរការ ការផ្លាស់ប្តូរនេះនឹងដោះស្រាយបញ្ហាប្រឈមនៃការគ្រប់គ្រងទឹកភ្លៀងនៅក្នុងទីក្រុងតូរ៉ុនតូរបស់ប្រទេសកាណាដា។
បើយោងតាមគេហទំព័រផ្លូវការរបស់រដ្ឋាភិបាលទីក្រុងតូរ៉ុនតូ បច្ចុប្បន្នអាជ្ញាធរក្រុងកំពុងសញ្ជឹងគិតអំពីការដាក់ឱ្យប្រើប្រាស់ ‘ពន្ធទឹកភ្លៀង’ នេះជាមួយនឹងការអនុវត្តផែនការនៅក្នុងខែមេសា។

គេហទំព័រផ្លូវការរបស់ទីក្រុងតូរ៉ុនតូចែងថា រដ្ឋាភិបាលបានសហការជាមួយអ្នកប្រើប្រាស់ទឹក និងអ្នកពាក់ព័ន្ធ កំពុងចូលរួមយ៉ាងសកម្មនៅក្នុងកម្មវិធី ‘ការគិតថ្លៃទឹកភ្លៀង និងការប្រឹក្សាថ្លៃសេវាទឹក’ ។
អាជ្ញាធរគ៏កំពុងប្រមូលមតិកែលម្អយ៉ាងសកម្មពីអ្នកប្រើប្រាស់ទឹក និងអ្នកពាក់ព័ន្ធទាក់ទងនឹងការអនុវត្តសក្តានុពលនៃថ្លៃទឹកភ្លៀង និងថ្លៃសេវាទឹក ដោយអញ្ជើញឱ្យចូលរួមក្នុងការស្ទង់មតិមុនថ្ងៃទី៣០ ខែមេសា៕

ក្រោយពីអ្នកកាសែតប៉ាឡេស្ទីនឈ្មោះ Younis Tirawi បានបង្ហោះរូបភាពទាហានអ៊ីស្រាអែលឈរកាន់ទង់ជាតិថៃ នៅក្រោយរថក្រោះមួយគ្រឿងក្នុងតំបន់កាហ្សា ក្រសួងការបរទេសថៃបញ្ជាក់ថា ប្រទេសថៃមិនពាក់ព័ន្ធនឹង សង្គ្រា.ម ទេ ហើយការលើកទង់ជាតិរបស់ទាហានអ៊ីស្រាអែលនេះ មិនប៉ះពាល់ដល់ ចំណា.ប់ខ្មាំ.ង ដែលក្រុមហាម៉ាស់ចាប់ខ្លួនទេ ។

អ្នកកាសែតប៉ាឡេស្ទីនដ៏ល្បីឈ្មោះបានបង្ហោះរូបភាពទាហានអ៊ីស្រាអែលម្នាក់ឈរកាន់ទង់ជាតិថៃយ៉ាងធំនៅពីក្រោយរថក្រោះនៅតំបន់កាហ្សា ក្នុងអំឡុងពេលទាហានរូបនេះចុះប្រតិបត្តិការ ។ ក្រោយពីការបង្ហោះរូបភាពនេះ វាបានធ្វើឱ្យមហាជនចោទសួរថា តើប្រទេសថៃពាក់ព័ន្ធអ្វីនឹងសង្គ្រាមនេះ?

ក្រសួងការបរទេសថៃបញ្ជាក់ថា ក្រសួងបានបញ្ជាទៅស្ថានទូតថៃប្រចាំនៅប្រទេសអ៊ីស្រាអែល ឱ្យត្រួតពិនិត្យបញ្ហានេះ ហើយក្រសួងការបរទេសថៃនិយាយថា វាមិនប៉ះពាល់ដល់ចំណាប់ខ្មាំងជនជាតិថៃ ដែលក្រុមប្រដាប់អាវុធហាម៉ាស់ចាប់ខ្លួនទេ ។

បើតាមសេចក្តីរាយការណ៍បង្ហាញថា ទាហានអ៊ីស្រាអែលឈរកាន់ទង់ជាតិថៃ រូបនេះឈ្មោះ Segi Netzerr ហើយរូបភាពនេះមានការចូលមើលរហូតដល់១លាន៦សែនលើក គិតចាប់ពីរូបភាពបានបង្ហោះនៅលើបណ្តាញសង្គម X កាលពីថ្ងៃទី២៧ ខែមីនា ឆ្នាំ២០២៤ ។

សារព័ត៌មានថៃរាយការណ៍ថា កាលពីថ្ងៃទី២៨ ខែមីនា ឆ្នាំ២០២៤ ក្រសួងការបរទេសថៃបានបញ្ជាឱ្យស្ថានទូតថៃប្រចាំនៅប្រទេសអ៊ីស្រាអែល ស៊ើបអង្កេតករណីទាហានអ៊ីស្រាអែលកាន់ទង់ជាតិថៃ នៅតំបន់កាហ្សារួចហើយ ។

ចំណែកក្រសួងការបរទេសអ៊ីស្រាអែលលើកឡើងថា មិនអាចពិសោធន៍រកការពិតថា រូបភាពនេះ គឺជារូបភាពដែលគេបង្កើតឡើងដើម្បីការឃោសនា ឬជារូបភាពពិតប្រាកដ ។ បើទាហានអ៊ីស្រាអែលកាន់ទង់ជាតិថៃប្រាកដមែន គឺវាជាទង្វើរបស់ទាហានអ៊ីស្រាអែល ដែលពុំបានគិតឱ្យស៊ីជម្រៅ ។ ហេតុនេះ រដ្ឋាភិបាលអ៊ីស្រាអែលមិនគាំទ្រដាច់ខាត ប៉ុន្តែរដ្ឋាភិបាលទទួលស្គាល់ថា មិនអាចគ្រប់គ្រងទង្វើផ្ទាល់ខ្លួនរបស់ទាហានគ្រប់រូបបានទេ ។

ស្ថានទូតថៃបានស្នើឱ្យប្រទេសអ៊ីស្រាអែលស៊ើបអង្កេតករណីនេះជាបន្ទាន់ ហើយក្រសួងការបរទេសអ៊ីស្រាអែលយល់ព្រមថា នឹងទំនាក់ទំនងជាមួយទាហានអ៊ីស្រាអែល (IDF) ដើម្បីស៊ើបអង្កេតករណីនេះ ។ ប្រសិនបើមានភាពច្បាស់លាស់បន្ថែម ក្រសួងការបរទេសអ៊ីស្រាអែលនឹងផ្តល់ដំណឹងឱ្យជ្រាបបន្តទៀត ។

លោក Panpree Phitthanukorn ឧបនាយករដ្ឋមន្ត្រី និងរដ្ឋមន្ត្រីក្រសួងការបរទេសថៃបញ្ជាក់ថា លោកជឿជាក់ថា រូបភាពនេះមិនប៉ះពាល់ដល់ចំណាប់ខ្មាំងជនជាតិថៃចំនួន៨នាក់ ដែលស្ថិតនៅក្រោមការគ្រប់គ្រងរបស់ក្រុមហាម៉ាស់ទេ ពីព្រោះប្រទេសថៃមិនបានចូលរួមក្នុងជម្លោះ ៕

បរទេស៖ កាលពីពេលថ្មីៗនេះ បើយោងតាមសារព័ត៌មានបរទេសមួយដែលបានចុះផ្សាយនៅថ្ងៃទី២៨ ខែមីនា ឆ្នាំ២០២៤ ថាបច្ចុប្បន្នប្រទេសចិនបានវ៉ាដាច់សហរដ្ឋអាមេរិក ដើម្បីក្លាយជាប្រទេសដែលផលិតបច្ចេកវិទ្យាបញ្ញាសិប្បនិម្មិត (AI) ច្រើនបំផុតនៅលើពិភពលោក។

នេះបើតាមរបាយការណ៍ដែលធ្វើឡើងដោយអង្គការប្រឹក្សា MacroPolo ក៏បានឱ្យដឹងទៀតថា ប្រទេសចិនផលិតបច្ចេកវិទ្យា AI បានរហូតដល់ជិត ៥០% នៅទូទាំងពិភពលោក ខណៈសហរដ្ឋអាមេរិកបង្កើត AI បានត្រឹមតែ ១៨% ប៉ុណ្ណោះ។ នេះតំណាងឱ្យការលោតផ្លោះដ៏ធំមួយសម្រាប់ប្រទេសចិន ខណៈដែលកាលពី ៣ ឆ្នាំមុនប្រទេសនេះបានផលិតប្រហែលមួយភាគបីនៃបច្ចេកវិទ្យា AI កំពូលរបស់ពិភពលោក ខណៈដែលសមាមាត្រសហរដ្ឋអាមេរិកនៅតែដដែល។

ដូច្នេះហើយបើនិយាយពីវិស័យ AI គឺសហរដ្ឋអាមេរិកជាអ្នកនាំមុខ ប៉ុន្តែបើនិយាយពីអ្នកវិទ្យាសាស្ត្រដែលបង្កើត AI វិញគឺចិនជាអ្នកនាំមុខ។ កាលពីឆ្នាំ ២០១០ ចិនបានទទួលផលប្រយោជន៍ពីគំនិតកំពូលៗរបស់សហរដ្ឋអាមេរិកមួយចំនួនធំដែលបណ្តាលឱ្យពួកគេសម្រេចផ្លាស់ទៅសាកលវិទ្យាល័យអាមេរិកដើម្បីទទួលបានសញ្ញាបត្របណ្ឌិតរបស់ពួកគេ។ ពួកគេភាគច្រើនជ្រើសរើសស្នាក់នៅសហរដ្ឋអាមេរិក ប៉ុន្តែការស្រាវជ្រាវបានបង្ហាញថានិន្នាការនេះក៏បានចាប់ផ្តើមផ្លាស់ប្តូរផងដែរ ដោយអ្នកស្រាវជ្រាវជនជាតិចិនស្នាក់នៅក្នុងប្រទេសអាមេរិកកើនឡើងខ្លាំង។

បច្ចុប្បន្នប្រទេសចិនបានបណ្ដុះបណ្ដាលទេពកោសល្យ AI ជាច្រើនដោយសារតែប្រទេសនេះបានវិនិយោគយ៉ាងច្រើនក្នុងការអប់រំ AI ។ លោក Damien Ma នាយកប្រតិបត្តិនៃ MacroPolo បាននិយាយថា ចាប់តាំងពីឆ្នាំ ២០១៨ មក ប្រទេសនេះបានបន្ថែមកម្មវិធី AI របស់សាកលវិទ្យាល័យច្រើនជាង ២,០០០ រួមទាំងច្រើនជាង ៣០០ នៅសាកលវិទ្យាល័យដែលមានឥស្សរជនច្រើនបំផុត។ ខណៈពេលដែលសហរដ្ឋអាមេរិកបានត្រួសត្រាយផ្លូវ AI ដែលជា chatbots ថ្មីៗនេះ ផ្នែកសំខាន់នៃការងារនេះត្រូវបានធ្វើដោយអ្នកស្រាវជ្រាវដែលបានទទួលការបណ្តុះបណ្តាលនៅក្នុងប្រទេសចិន។

យោងតាមការសិក្សា អ្នកស្រាវជ្រាវដែលមានដើមកំណើតជាជនជាតិចិនឥឡូវនេះមានចំនួន ៣៨% នៃអ្នកស្រាវជ្រាវ AI កំពូលដែលកំពុងធ្វើការនៅសហរដ្ឋអាមេរិក ហើយជនជាតិអាមេរិកមានចំនួន ៣៧% ប៉ុណ្ណោះ។ កាលពីបីឆ្នាំមុន ប្រជាជនមកពីប្រទេសចិនមានចំនួន ២៧% នៃអ្នកមានទេពកោសល្យកំពូលធ្វើការនៅអាមេរិក ធៀបនឹង ៣១% មកពីសហរដ្ឋអាមេរិក។ Matt Sheehan អ្នកស្រាវជ្រាវនៅ Carnegie Endowment for International Peace ដែលមានជំនាញក្នុងការស្រាវជ្រាវ AI របស់ចិនបាននិយាយថា “ទិន្នន័យបង្ហាញថាតើអ្នកស្រាវជ្រាវដើមកំណើតចិនមានសារៈសំខាន់យ៉ាងខ្លាំងចំពោះសហរដ្ឋអាមេរិកទាក់ទងនឹងសមត្ថភាពបង្កើត AI៕