ប្រទេសចិន៖ កាលពីពេលថ្មីៗនេះប្រទេសចិនបានកត់ត្រាភ្ញៀវទេសចរអន្តរជាតិចំនួន ២.៩៥ លាននាក់ដែលបានចូលមកទស្សនាប្រទេសនេះក្នុងខែមករា និងកុម្ភៈ ដែលចំនួននេះគឺច្រើនជាងទ្វេដងនៃចំនួនកាលពី ២ ខែមុន និង ៤១.៥% ច្រើនជាងរយៈពេលដូចគ្នាបើប្រៀបធៀបកាលពីឆ្នាំមុន។

លោក Shi Zeyi អនុប្រធានការិយាល័យសហប្រតិបត្តិការអន្តរជាតិ និងការផ្លាស់ប្តូរ បាននិយាយថា គិតត្រឹមថ្ងៃ ៣០ ខែមីនា ការកើនឡើងនៃអ្នកទេសចរភាគច្រើនមកពីប្រទេសបារាំង អាល្លឺម៉ង់ អេស្ប៉ាញ ម៉ាឡេស៊ី និងសិង្ហបុរី ដែលជាប្រទេសដែលរីករាយនឹងគោលនយោបាយបន្ធូរបន្ថយ និងគ្មានទិដ្ឋាការរបស់ប្រទេសចិន។

បើយោងតាមក្រសួងវប្បធម៌ និងទេសចរណ៍ ចាប់ពីខែកុម្ភៈដល់ខែមេសា ខ្សែនាវាទេសចរណ៍អាល្លឺម៉ង់នឹងនាំភ្ញៀវទេសចរជាង ១០,០០០ នាក់ទៅកាន់កំពង់ផែចិន។ កាលពីថ្ងៃទី ១០ ខែមីនា នាវាទេសចរណ៍អន្តរជាតិ Zuiderdam បាននាំភ្ញៀវជាង ២,០០០ នាក់មកពី ៤៧ ប្រទេសទៅកាន់កំពង់ផែ Dalian នៅភាគឦសាននៃប្រទេស។ លោក Shi បាននិយាយថា នេះជាលើកទីមួយហើយដែលកប៉ាល់ទេសចរណ៍ដ៏ធំបានមកទស្សនាភាគខាងជើងប្រទេសចិនចាប់តាំងពីឆ្នាំ ២០១៩ មក។

ដើម្បីលើកកម្ពស់វិស័យទេសចរណ៍ និងការស្តារសេដ្ឋកិច្ចឡើងវិញ ក្នុងរយៈពេលប៉ុន្មានខែថ្មីៗនេះ ប្រទេសចិនបានបន្ធូរបន្ថយគោលនយោបាយទិដ្ឋាការជាបន្តបន្ទាប់ ដើម្បីលើកទឹកចិត្តភ្ញៀវទេសចរឱ្យមកទស្សនាកាន់តែច្រើន។ នៅខែវិច្ឆិកា ឆ្នាំ ២០២៣ រដ្ឋាភិបាលបានពង្រីកគោលនយោបាយឆ្លងកាត់ដោយគ្មានទិដ្ឋាការជាមួយប្រទេសន័រវេស ដូច្នេះប្រជាពលរដ្ឋមកពីប្រទេសទាំងនេះមិនត្រូវការទិដ្ឋាការដើម្បីចូលប្រទេសចិនទេ។ បន្ទាប់មក នៅខែធ្នូ ឆ្នាំ ២០២៣ ចិនក៏ចាប់ផ្តើមអនុញ្ញាតឱ្យអ្នកទេសចរមកពីប្រទេសបារាំង អាល្លឺម៉ង់ អ៊ីតាលី ហូឡង់ អេស្ប៉ាញ សិង្ហបុរី និងម៉ាឡេស៊ី ចូលប្រទេសដោយគ្មានទិដ្ឋាការរយៈពេល ១៥ ថ្ងៃសម្រាប់អាជីវកម្ម ទេសចរណ៍ និងការសួរសុខទុក្ខសាច់ញាតិជាដើម។

យោងតាមលោក Shi ប្រទេសចិននឹងធ្វើការផ្លាស់ប្តូរបន្ថែមទៀតដើម្បីជួយភ្ញៀវទេសចរបរទេសធ្វើដំណើរបានយ៉ាងងាយស្រួល រួមទាំងការអនុវត្តដំណើរការទូទាត់ប្រាក់នៅកន្លែងទេសចរណ៍ កន្លែងសម្តែង និងសណ្ឋាគារ។ ប្រទេសចិនក៏នឹងផ្តល់សេវាកម្មទេសចរណ៍ជាច្រើន និងពង្រឹងការផ្សព្វផ្សាយនៅក្នុងទីផ្សារអន្តរជាតិផងដែរ។ ដូច្នេះហើយបច្ចុប្បន្ននេះ ប្រទេសចិនមានកិច្ចព្រមព្រៀងលើកលែងទិដ្ឋាការរួមគ្នាជាមួយប្រទេសចំនួន ២២ ទៀត។ ក្នុងនោះប្រទេស និងតំបន់ជាង ៦០ បានលើកលែងទិដ្ឋាការសម្រាប់ពលរដ្ឋចិន ឬចេញទិដ្ឋាការនៅពេលមកដល់៕

សារព័ត៌មាន Reuters បានរាយការណ៍កាលពីព្រឹកថ្ងៃទី៤ ខែមេសានេះថា ចំនួនអ្នករងរបួសនៅក្នុងការរញ្ជួយដីកម្រិត ៧.២ រ៉ិចទ័រនៅភាគខាងកើតកោះតៃវ៉ាន់ ដែលបានបណ្តាលអ្នករងរបួសកើនឡើងដល់ជាង ១០០០នាក់គិតត្រឹមព្រឹកថ្ងៃនេះ។ ខណៈអ្នកស្លាប់មានចំនួន ៩ នាក់ ស្របពេលដែលមនុស្ស ៥២ នាក់ទៀតនៅតែបន្តបាត់ខ្លួន ដែលនេះគឺយោងតាមព័ត៌មានបឋម។

គ្រោះរញ្ជួយដីដ៏ខ្លាំងក្លាបានវាយប្រហារនៅលើកោះតៃវ៉ាន់កាលពី៣ ខែមេសា ឆ្នាំ២០២៤ បន្ទាប់ពីប្រទេសនេះស្ងប់សុខបានរយៈពេល ២៥ ឆ្នាំកន្លងមក។ ស្របពេលដែលមនុស្សម្នាកំពុងត្រៀមខ្លួនដើម្បីទៅបំពេញការងារ និងសាលារៀន ការរញ្ជួយដីគឺបានមានឥទ្ធពលខ្លាំងបំផុតនៅតំបន់ជនបទភាគខាងកើត និងតំបន់ Hualien ។ ខណៈដែលអគារនានាក៏ញ័រយ៉ាងខ្លាំងក្នុងទីក្រុងតៃប៉ិដែរ ប៉ុន្តែយ៉ាងណាមិញក៏មានការខូចខាតនិងការរំខានតិចតួចបំផុត។

នាយកដ្ឋានពន្លត់អគ្គីភ័យរបស់កោះតៃវ៉ាន់បាននិយាយថា ចំនួនអ្នករងរបួសបានកើនឡើងដល់ ១,០៣៨នាក់ និង៥២នាក់ទៀតកំពុងបន្តបាត់ខ្លួន។ យោងតាមការបញ្ជាក់ ប្រតិបត្តិការជួយសង្គ្រោះលើកនេះគឺផ្តោតសំខាន់លើក្រុមមនុស្សដែលជាប់នៅលើផ្លូវហាយវេឆ្លងកោះ ដែលឆ្លងកាត់ជ្រលងភ្នំដែលតភ្ជាប់ Hualien ជាមួយឆ្នេរសមុទ្រភាគខាងលិចរបស់តៃវ៉ាន់ ដែលវាជាគោលដៅទេសចរណ៍ដ៏ពេញនិយមមួយ។

គួរបញ្ជាក់ថា ទីក្រុង Hualien ជាកន្លែងដែលមនុស្សជាច្រើនបានជាប់ក្នុងអគារទាំងអស់នៅទីនោះ ប៉ុន្តែពួកគេភាគច្រើនក៏ត្រូវបានជួយសង្គ្រោះចេញទាន់ពេលវេលា។ មនុស្សមួយចំនួនបានដេកនៅខាងក្រៅពេញមួយយប់។ ខណៈដែលការរញ្ជួយដីរាប់សិបលើកបានកក្រើកតំបន់នេះ ហើយក៏បានធ្វើឲ្យមនុស្សម្នាក្នុងប្រទេសតៃវ៉ាន់ទាំងមូល ព្រមទាំងប្រទេសជិតខាងខ្លាចរអាយ៉ាងខ្លាំងផងដែរ៕

ប្រទេសថៃ ៖ កាលពីថ្ងៃទី៣ ខែមេសា ឆ្នាំ២០២៤ នៅទីបញ្ចុះ ស.ព ចិនមួយកន្លែងស្ថិតក្នុងឃុំណៃមឿង ស្រុកមឿង ខេត្តពិស្នុលោក ប្រទេសថៃ មានគ្រួសារជនជាតិថៃកាត់ចិន បាននាំគ្នាមកបោសសម្អាតនៅទីបញ្ចុះ ស.ព ដើម្បីត្រៀមបញ្ចាំងកុនខ្នាតធំ និងរៀបចំពិធីសែនបុព្វបុរសដែលបានចែកឋានទៅកាន់លោកខាងមុខ ក្នុងថ្ងៃឆេងម៉េង ។

ក្នុងអំឡុងពេលនោះ ក្រុមការងារបញ្ចាំងកុនខ្នាតធំ ក៏បានរៀបចំដំឡើងផ្ទាំងក្រណាត់កុនដែលមានប្រវែងរហូតដល់១០ម៉ែត្រ ដើម្បីបញ្ចាំងភាពយន្តចិនឱ្យព្រលឹងវិញ្ញាណបុព្វបុរសនៅទីនេះបានទស្សនានៅយប់ថ្ងៃដដែល ។

បរិយាកាសនៅយប់នោះឃើញថា មានសភាពស្ងប់ស្ងាត់ និងមានតែសំឡេងចេញពីភាពយន្តប៉ុណ្ណោះ ។ អ្នកស្រុកដែលរស់នៅម្តុំនោះបានដឹងយ៉ាងច្បាស់ថា ការបញ្ចាំងកុននៅមុនថ្ងៃសែនឆេងម៉េង គឺសម្រាប់ឱ្យព្រលឹងវិញ្ញាណបុព្វបុរសបានទស្សនា មិនមែនសម្រាប់ឱ្យមនុស្សទូទៅទស្សនាកម្សាន្តនោះទេ ទើបពួកគេមិនបានមកចូលរួម ។

មន្ត្រីសមាគមចិនប្រចាំខេត្តពិស្នុលោក លើកឡើងថា ការបញ្ចាំងកុនលើកនេះ គឺសម្រាប់ឱ្យបុព្វបុរសនៅទីបញ្ចុះសពចិនបានទស្សនា ដូចជា ៖ កុងម៉ា ដែលត្រូវបានកូនចៅយកមកបញ្ចុះនៅកន្លែងនេះ ។ រីឯនៅថ្ងៃឆេងម៉េងវិញ ក្រៅពីកូនចៅរៀបចំម្ហូបអាហារ និងនំចំណីផ្សេងៗសែនបុព្វបុរសហើយ ពួកគេនឹងរៀបចំសែនម្ហូបអាហារឱ្យព្រលឹងគ្មានសាច់ញាតិផងដែរ ។

មន្ត្រីសមាគមចិនរូបនេះនិយាយថា ៖ «ចំណែកភាពយន្តដែលយកមកបញ្ចាំងនៅទីបញ្ចុះសព គេនឹងជ្រើសរើសភាពយន្តក្បាច់គុន ឬភាពយន្តប្រភេទ Action ។ ការបញ្ចាំងកុនខ្នាតធំត្រូវបានរៀបចំឡើងជារៀងរាល់ឆ្នាំ តាំងពីមានកន្លែងបញ្ចុះសពនេះ ។ ចំណែកនៅព្រឹកថ្ងៃទី៥ ខែមេសា កូនចៅនឹងយកម្ហូបអាហារមកសែនបុព្វបុរស ។ ការរៀបចំសែនឆេងម៉េង គឺជាប្រពៃណីដ៏សំខាន់បំផុតសម្រាប់ជនជាតិចិន ហើយគេចាត់ទុកថា គឺជាការដឹងគុណដល់បុព្វបុរសផងដែរ» ។

គួរបញ្ជាក់ថា កាលពីឆ្នាំ២០២៣ ជនជាតិថៃកាត់ចិននៅខេត្តពិស្នុលោក ក៏បានរៀបចំបញ្ចាំងកុនចិននៅទីបញ្ចុះសពដូចគ្នាដែរ ។ ពេលនោះ ពួកគេបានបញ្ចាំងកុនចំនួន៣យប់ គឺចាប់ពីថ្ងៃទី៣ ដល់ថ្ងៃទី៥ ខែមេសា ឆ្នាំ២០២៣ ដោយសារពួកគេជឿថា ឪពុក-ម្តាយ និងសាច់ញាតិដែលបានចែកឋានទៅនឹងមកអង្គុយមើលកុននៅទីនេះ ៕

ប្រទេសម៉ារ៉ុក អេស៉្បាញ និងព័រទុយហ្គាល់ គ្រោងនឹងធ្វើសហម្ចាស់ផ្ទះសម្រាប់ការប្រកួតបាល់ទាត់ពិភពលោក ឆ្នាំ២០៣០ ខណៈម៉ារ៉ុកត្រៀមនឹងសាងសង់កីឡដ្ឋានដ៏ធំជាងគេលើលោក ដើម្បីធ្វើការប្រកួតវគ្គផ្តាច់ព្រ័ត្រ។

កីឡដ្ឋានដែលម៉ារ៉ុក គ្រោងនឹងសាងសង់ អាចផ្ទុកទស្សនិកជន១១៥,០០០នាក់ ដោយគ្រោងចំណាយថវិការប្រមាណ៤៥៩លានអឺរ៉ូ និងរយៈពេល៥ឆ្នាំសម្រាប់ការសាងសង់។

កីឡដ្ឋាននេះ នឹងក្លាយជាកីឡដ្ឋានធំជាងគេបំផុតនៅលើពិភពលោក ដោយរុញច្រានកីឡដ្ឋាន Rungrado 1st of May របស់ប្រទេសកូរ៉េខាងជើង ទៅឈរនៅលើ២វិញ (ផ្ទុកទស្សនិកចំនួន ១១៤,០០០)។                                      កីឡដ្ឋាន Rungrado 1st of May

បន្ថែមពីលើសមត្ថភាពដ៏ធំ ពហុកីឡដ្ឋានក៏នឹងមានទីលានកីឡា អាងហែលទឹក មជ្ឈមណ្ឌលលក់ទំនិញ និងសណ្ឋាគារផងដែរ ដោយបំពេញតាមតម្រូវការទាំងអស់របស់ FIFA៕

នៅលើភពផែនដីបច្ចុប្បន្នមានមហាសេដ្ឋីសរុបទាំងអស់ ២,៧៨១ នាក់គិតត្រឹមឆ្នាំ ២០២៤ ដែលមកពីបណ្តាប្រទេសផ្សេងៗគ្នា ខណៈមហាសេដ្ឋីខ្លះ កំពុងសាងកេរ្តិ៍ឈ្មោះតាមរយៈស្នាដៃ ដែលបង្កើតថ្មីៗបង្ហាញពិភពលោក។ ទោះជាយ៉ាងណា បញ្ជីអ្នកមានបំផុតលើលោកអាចប្រែប្រួលពីមួយឆ្នាំទៅមួយឆ្នាំ ដោយអាស្រ័យលើទ្រពសម្បត្តិសុទ្ធចុងក្រោយ និងលទ្ធផលហិរញ្ញវត្ថុរបស់ពួកគេ។ ដូច្នេះហើយបើយោងតាមទស្សនាវដ្តី Forbes ដែលបានប្រកាសកាលពីពេលថ្មីៗនេះថា នៅលើភពផែនដីរបស់យើងមានមហាសេដ្ឋី ១០ រូបប៉ុណ្ណោះដែលមានទ្រពសម្បត្តិច្រើនជាងគេបំផុតលើលោកក្នុងឆ្នាំ ២០២៤ នេះ។

១. Bernard Arnault៖ មហាសេដ្ឋី Bernard Arnault បានជាប់ចំណាត់ថ្នាក់កំពូលនៃបញ្ជីអ្នកមានបំផុតរបស់ពិភពលោកជាលើកទីពីរជាប់ៗគ្នា។ បច្ចុប្បន្នលោកជានាយកប្រតិបត្តិ និងជាប្រធានក្រុមហ៊ុនប្រណិតដ៏ធំបំផុតរបស់ពិភពលោក LVMH ដែលក្រុមហ៊ុននេះជាម្ចាស់នៃម៉ាកសម្លៀកបំពាក់ល្បីៗ និងគ្រឿងសំអាងចំនួន ៧៥ ដូចជា Sephora, Tiffany & Co, Givenchy, Christian Dior, Dom Perignon និង Moët Hennessy ជាដើម។ ដូច្នេះបើនិយាយពីទ្រពសម្បត្តិសុទ្ធរបស់គាត់គឺមានចំនួន ២៣៣ ពាន់លានដុល្លារអាមេរិកគិតក្នុងឆ្នាំ ២០២៤។

២. Elon Musk៖ អ្នកណាមិនស្គាល់មហាសេដ្ឋីនៃបច្ចេកវិទ្យា Elon Musk មានទ្រពសម្បត្តិសុទ្ធ ១៩៥ ពាន់លានដុល្លារអាមេរិកជាប់ចំណាត់ថ្នាក់លេខ ២ ជាអ្នកមានជាងគេលើលោក។

៣.Jeff Bezos៖ ស្ថាបនិក Amazon លោក Jeff Bezos គឺជាមហាសេដ្ឋីលំដាប់លេខ ៣ នៅលើពិភពលោកជាមួយទ្រពសម្បត្តិសុទ្ធ ១៩៤ ពាន់លានដុល្លារអាមេរិក។

៤.Mark Zuckerberg៖ នាយកប្រត្តិបត្តិរបស់ក្រុមហ៊ុន Meta លោក Mark Zuckerberg មានទ្រពសម្បត្តិសុទ្ធ ១៧៧ ពាន់លានដុល្លារអាមេរិកគិតត្រឹមឆ្នាំ ២០២៤ នេះ ដែលលោកបានជាប់ជាមហាសេដ្ឋីលំដាប់ទី ៤ នៅលើភពផែនដី។

៥.Larry Ellison៖ ជាមួយនឹងទ្រពសម្បត្តិសុទ្ធប្រមាណ ១៤១ ពាន់លានដុល្លារអាមេរិក លោក Larry Ellison ដែលជាប្រធានផ្នែកបច្ចេកវិទ្យា និងជាសហស្ថាបនិក Oracle បានកាន់កាប់ភាគហ៊ុនប្រហែល ៣៥.៤% នៅក្នុងកម្មវិធីយក្សនេះ។ បើធៀបនឹងឆ្នាំមុន ទ្រព្យសម្បត្តិរបស់មហាសេដ្ឋីអាមេរិករូបនេះបានកើនឡើងរហូតដល់ ៣៤ ពាន់លានដុល្លារ។

៦.Warren Buffett៖ នាយកប្រតិបត្តិនៃក្រុមហ៊ុន Berkshire Hathaway លោក Warren Buffett មានទ្រពសម្បត្តិសុទ្ធចំនួន ១៣៣ ពាន់លានដុល្លារអាមេរិក គឺជាមហាសេដ្ឋីលំដាប់ទី ៦ លើភពផែនដីក្នុងឆ្នាំ ២០២៤ នេះ។

៧. Bill Gates៖ ទ្រព្យសម្បត្តិរបស់លោក Bill Gates ភាគច្រើនបានមកពីភាគហ៊ុនរបស់ Microsoft។ ដោយឆ្នាំនេះគាត់មានទ្រព្យសម្បត្តិសុទ្ធចំនួន ១២៨ ពាន់លានដុល្លារ កើនឡើង ២៤ ពាន់លានដុល្លារបើធៀបទៅនឹងឆ្នាំមុន។

៨. Steve Ballmer៖ លោក Steve Ballmer គឺជាអតីតនាយកប្រតិបត្តិរបស់ Microsoft ដែលដឹកនាំក្រុមហ៊ុននេះពីឆ្នាំ ២០០០-២០០៤ ដោយគាត់បានចូលបម្រើការងារជាមួយក្រុមហ៊ុន Microsoft ក្នុងឆ្នាំ ១៩៨០ ហើយជាបុគ្គលិកទី ៣០ របស់ក្រុមហ៊ុន។ ដូច្នេះទ្រព្យសម្បត្តិសុទ្ធរបស់គាត់នៅឆ្នាំនេះមានចំនួន ១២១ ពាន់លានដុល្លារអាមេរិក។

៩.Mukesh Ambani៖ មហាសេដ្ឋីជនជាតិឥណ្ឌា Ambani គឺជាប្រធានក្រុមហ៊ុនពហុឧស្សាហកម្ម Reliance Industries ដែលធ្វើអាជីវកម្មពីប្រេង និងឧស្ម័ន ទូរគមនាគមន៍ រហូតដល់ការលក់រាយនៅក្នុងប្រទេសឥណ្ឌា។ ក្នុងរយៈពេលប៉ុន្មានឆ្នាំចុងក្រោយនេះលោក Mukesh Ambani បានឡើងឋានៈក្លាយជាមហាសេដ្ឋីលំដាប់ទី ៩ របស់ពិភពលោកជាមួយទ្រពសម្បត្តិសុទ្ធ ១១៦ ពាន់លានដុល្លារអាមេរិក។

១០.Larry Page៖ លោក Larry Page គឺជាសហស្ថាបនិករបស់ក្រុមហ៊ុន Google រួម ប៉ុន្តែនៅឆ្នាំ ២០១៩ គាត់បានចាកចេញពីតំណែងជានាយកប្រតិបត្តិនៃក្រុមហ៊ុន Alphabet ដែលជាក្រុមហ៊ុនមេរបស់ Google ទោះជាយ៉ាងណាគាត់នៅតែជាម្ចាស់ភាគហ៊ុនគ្រប់គ្រង និងជាសមាជិកក្រុមប្រឹក្សាភិបាលរបស់ក្រុមហ៊ុននេះ។ ដូច្នេះលោក Larry Page មានទ្រពសម្បត្តិសុទ្ធចំនួន ១១៤ ពាន់លានដុល្លារអាមេរិក៕

ប្រទេសថៃ ៖ កាលពីថ្ងៃទី៣ ខែមេសា ឆ្នាំ២០២៤ សារព័ត៌មានថៃរាយការណ៍ថា សម្លដែលពលរដ្ឋថៃចាត់ទុកថា គឺជាមុខម្ហូបដ៏ឆ្ងាញ់ប្រចាំខេត្តភាគខាងត្បូងឈ្មោះ «កែងតៃប្លា» បានជាប់ចំណាត់ថ្នាក់ទី១ ក្នុងចំណោមមុខម្ហូបចំនួន១០មុខ ដែលអន់បំផុតនៅលើពិភពលោក ។ រីឯអាហាររបស់ប្រទេសកម្ពុជា ឈ្មោះ «អាពីង» បានជាប់ចំណាត់ថ្នាក់ទី១៥ ។

វាបានក្លាយជាប្រធានបទមួយ ដែលអ្នកលេងបណ្តាញសង្គមនៅប្រទេសថៃលើកឡើងយ៉ាងច្រើន នាដើមខែមេសានេះ នៅពេលគេហទំព័រឈ្មោះ TasteAtlas បានផ្តល់ទិន្នន័យអំពីម្ហូបអាហារគ្រប់មុខនៅទូទាំងពិភពលោក, គ្រឿងផ្សំ និងភោជនីយដ្ឋាន រួមទាំងភេសជ្ជៈជាច្រើនប្រភេទ បានចាត់ចំណាត់ថ្នាក់អាហារចំនួន១០០មុខ គឺជាអាហារអន់បំផុតនៅលើពិភពលោក ។ គេហទំព័រនេះបង្ហាញថា សម្លថៃឈ្មោះ «កែងតៃប្លា» បានជាប់ចំណាត់ថ្នាក់ទី១ ជាសម្លអន់បំផុតនៅលើពិភពលោក ។

គេហទំព័រ TasteAtlas បានរៀបរាប់អំពីរសជាតិរបស់សម្លថៃឈ្មោះ «កែងតៃប្លា» ថា គឺជាសម្លដាក់សាច់ត្រី, ក្លិនឈ្ងុយ និងមានដើមកំណើតមកពីខេត្តភាគខាងត្បូងប្រទេសថៃ ។ សម្លនេះមានគ្រឿងផ្សំរសជាតិហឹរ ដូចជា ៖ ម្ទេស, រំដេង, ល្មៀត, កាពិ, ខ្ទឹមក្រហម និងស្លឹកគ្រៃ ។

ចំណែកគ្រឿងផ្សំផ្សេងទៀត រួមមាន ៖ ត្រីក្រៀម, ត្រប់វែង, ទំពាំង, សណ្តែកកួ និងបន្លែផ្សេងទៀត ។ ក្រៅពីសម្ល «កែងតៃប្លា» មានរសជាតិឈ្ងុយ និងខាប់ហើយនោះ គេអាចបរិភោគសម្លនេះជាមួយបាយស ។ កាលពីមុន សម្លមួយមុខនេះដាក់តែសាច់ត្រីប៉ុណ្ណោះ ហើយសម្លភាគច្រើនមិនដាក់ខ្ទះដូងទេ ។

ខាងក្រោមនេះ គឺជាម្ហូបអាហារចំនួន២០មុខ មានរសជាតិអន់បំផុតនៅលើពិភពលោក ៖
១-កែងតៃប្លា ប្រទេសថៃ
២-Hákarl ប្រទេសអ៊ីស្លង់
៣-Fesikh ប្រទេសអេហ្ស៊ីប
៤-Yerushalmi Kugel ប្រទេសអ៊ីស្រាអែល
៥-Luther Burger សហរដ្ឋអាមេរិក
៦-Pani ca meusa ប្រទេសអ៊ីតាលី
៧-Jellied Eels ប្រទេសអង់គ្លេស
៨-Calskrove ប្រទេសស៊ុយអែត
៩-Peladillas ប្រទេសអេស្ប៉ាញ
១០-Smalahove ប្រទេសន័រវេស
១១-Beyin salatasi ប្រទេសតួកគី
១២-Chapalele មកពីកោះ Chiloe ប្រទេសឈីលី
១៣-Sneem Black Pudding ប្រទេសអៀរឡង់
១៤-Marmite and Chip Sandwich ប្រទេសនូវែលសេឡង់
១៥-Fried spider (អាពីង) ប្រទេសកម្ពុជា
១៦-Gazpacho de mango ប្រទេសអេស្ប៉ាញ
១៧-Bocadillo de carne de caballo ប្រទេសអេស្ប៉ាញ
១៨-Tinutuan ប្រទេសឥណ្ឌូណេស៊ី
១៩-Oil Down ប្រទេសហ្គ្រេនដា និង
២០-Lutefisk ប្រទេសន័រវេស

ការចាត់ចំណាត់ថ្នាក់ម្ហូបអាហារអន់បំផុតនៅលើពិភពលោក បានប្រើប្រាស់ទិន្នន័យការផ្តល់ពិន្ទុពីអ្នកចូលមើលគេហទំព័រ TasteAtlas ដោយមានប្រព័ន្ធត្រួតពិនិត្យ និងកំណត់លើការផ្តល់ពិន្ទុ ។ ក្រៅពីនេះ ក្រុមអ្នកដាក់ពិន្ទុបានផ្អែកតាមគំនិតជាតិនិយមផងដែឬ ដើម្បីឱ្យការចាត់ចំណាត់ថ្នាក់បានត្រឹមត្រូវ និងមានសារៈប្រយោជន៍ ។ ការចាត់ចំណាត់ថ្នាក់ម្ហូបអាហារអន់បំផុតចំនួន១០០មុខ នៅលើពិភពលោកលើកនេះ គឺជាការប្រមូលផ្តុំទិន្នន័យ រហូតដល់ថ្ងៃទី១៦ ខែមីនា ឆ្នាំ២០២៤ ។

ក្រោយគេហទំព័រ TasteAtlas ចាត់ចំណាត់ថ្នាក់អាហារអន់បំផុតលើពិភពលោក ក៏មានមតិរិះគន់មួយចំនួនលើកឡើងថា មិនគួរសម្រេចចិត្តវិនិច្ឆ័យអាហារណាមួយតាមទស្សនៈសកលទេ ដោយសារវប្បធម៌ប្រទេសនីមួយៗខុសៗគ្នា ។ រីឯពលរដ្ឋថៃរស់នៅខេត្តភាគខាងត្បូងបញ្ជាក់ថា កែងតៃប្លា គឺជាមុខម្ហូបដ៏ឆ្ងាញ់ក្នុងចំណោមមុខម្ហូបផ្សេងទៀត ដែលបង្ហាញពីអត្តសញ្ញាណក្នុងតំបន់ ៕

ប្រទេសជប៉ុន ៖ បើយើងទៅកម្សាន្តនៅប្រទេសជប៉ុន ហាមយករបស់ញ៉ាំទាំងពីរយ៉ាងនេះឡើងលើរថយន្តក្រុងនៅជប៉ុនជាដាច់ខាត ។ មគ្គុទ្ទេសក៍ទេសចរណ៍ជប៉ុនបានបញ្ជាក់ហើយបញ្ជាក់ទៀតពីបម្រាមនេះ ដើម្បីឱ្យភ្ញៀវទេសចរទាំងអស់ជួយសហការជាមុន ។

ក្នុង១ឆ្នាំៗ ប្រទេសជប៉ុនទទួលបានភ្ញៀវទេសចរច្រើនបំផុត ជាពិសេស ភ្ញៀវទេសចរមកពីប្រទេសនៅតំបន់អាស៊ីអាគ្នេយ៍ ។ ភ្ញៀវទេសចរជាច្រើននាក់មានគម្រោងធ្វើដំណើរទៅប្រទេសជប៉ុន ប៉ុន្តែពួកគេពុំទាន់ជ្រាបថា រថយន្តក្រុងដែលផ្តល់សេវាកម្មដឹកភ្ញៀវនៅប្រទេសជប៉ុន បានចេញបម្រាមអ្វីខ្លះសម្រាប់អ្នកធ្វើដំណើរតាមរថយន្ត ។

ក្រៅពីការណាត់ជួបគ្នាគោរពតាមពេលវេលា ជនជាតិជប៉ុន ឬភ្ញៀវទេសចរដែលធ្វើដំណើរទៅកម្សាន្តនៅតំបន់ទេសចរណ៍ផ្សេងៗ នៅពេលឡើងជិះរថយន្តក្រុង ពួកគេមិនអាចយកការ៉េម (ប្រភេទ Soft Serve Ice Cream) និងកែវកាហ្វេដែលគ្មានគំរបបិទ ឡើងលើរថយន្តក្រុងបានទេ ។

នៅតំបន់ទេសចរណ៍របស់ជប៉ុន មានហាងលក់ការ៉េម និងនំចំណីផ្សេងៗ ដែលភ្ញៀវទេសចរភាគច្រើនចូលចិត្តបរិភោគ ។ បើភ្ញៀវទេសចរចង់ទិញការ៉េមនៅតាមតំបន់ទេសចរណ៍ទាំងនេះ គឺពួកគេត្រូវតែបរិភោគការ៉េមនោះឱ្យអស់ជាមុនសិន មុនពេលឡើងជិះរថយន្តក្រុង ។ រីឯកាហ្វេវិញ មិនថាទិញពីហាងណា ឬកាហ្វេម៉ាកអ្វីទេ បើភ្ញៀវទេសចរចង់យកកាហ្វេឡើងលើរថយន្តក្រុង គឺត្រូវតែមានគំរបបិទឱ្យជិត ។

ការហាមឃាត់បែបនេះ ដោយសារជនជាតិជប៉ុនផ្តោតខ្លាំង និងយកចិត្តទុកដាក់ទៅលើបញ្ហាអនាម័យជាចម្បង ។ បើកន្លែងណាមានភាពកខ្វក់ បុគ្គលិករបស់រថយន្តក្រុងអាចចំណាយពេលវេលាជូតសម្អាតរថយន្តក្រុងគ្រប់កន្លែងទាំងអស់ ។ ហេតុនេះហើយ ទើបពួកគេសុំការសហការពីអ្នកដំណើរជាមុន ៕