ប្រទេសន័រវេស ៖ ប្រទេសន័រវេសបានរកឃើញកន្លែងឧស្ម័នធម្មជាតិ និងប្រេងឥន្ធនៈនៅកណ្តាលសមុទ្រខាងជើង (North Sea) ដែលគេចាត់ទុកថា គឺជាគុណសម្បត្តិដ៏សំខាន់ផ្នែកសេដ្ឋកិច្ច ។ ហេតុនេះ អាជ្ញាធរន័រវេស ក៏បានបង្កើតគម្រោងសាងសង់កន្លែងខួងឧស្ម័នធម្មជាតិនៅកណ្តាលសមុទ្រខាងជើង ប៉ុន្តែវាជាបញ្ហាលំបាកយ៉ាងខ្លាំងសម្រាប់វិស្វករសាងសង់ ដោយសារទឹកសមុទ្រនេះមានជម្រៅជ្រៅខ្លាំង និងគ្រោះថ្នា.ក់ បំផុតលើពិភពលោក ។

ន័រវេស គឺជាប្រទេសស្ថិតនៅតំបន់អឺរ៉ុបខាងជើង និងហ៊ុព័ទ្ធទៅដោយទឹកសមុទ្រ ដែលជាហេតុធ្វើឱ្យប្រទេសនេះសម្បូរទៅដោយឧស្ម័នធម្មជាតិ និងប្រេងឥន្ធនៈ ។ កន្លងមក ន័រវេសបានបញ្ជូនឧស្ម័នធម្មជាតិ និងប្រេងឥន្ធនៈទាំងនេះទៅលក់ឱ្យប្រទេសនៅតំបន់អឺរ៉ុប ។

ក្រោយពីរកឃើញឧស្ម័នធម្មជាតិ និងប្រេងឥន្ធនៈ អាជ្ញាធរន័រវេសក៏បានបង្កើតគម្រោងដ៏ធំមួយ គឺការសាងសង់កន្លែងខួងឧស្ម័នធម្មជាតិនៅកណ្តាលសមុទ្រខាងជើង ។ រីឯក្រុមហ៊ុនឈ្មោះ Shell គឺជាក្រុមហ៊ុនសិក្សាពីគម្រោងសាងសង់កន្លែងខួងឧស្ម័នធម្មជាតិ ឈ្មោះថា «Troll» ។

ការសាងសង់កន្លែងខួងឧស្ម័នធម្មជាតិនេះ គេចាត់ទុកថា គឺជាការបោះជំហានទៅមុខមួយកម្រិត និងជាគម្រោងដ៏មួយធំក្នុងឧស្សាហកម្មសំខាន់ និងឧស្សាហកម្មប្រេង ដែលត្រូវប្រឈមមុខជាមួយឧបសគ្គយ៉ាងច្រើន ពីព្រោះគេបានស្គាល់ថា សមុទ្រខាងជើង (North Sea) មានជម្រៅទឹកជ្រៅបំផុត និងជាសមុទ្រមានគ្រោះថ្នាក់បំផុត ។

សមុទ្រខាងជើងបានជាប់ចំណាត់ថ្នាក់ជាសមុទ្រមានជម្រៅជ្រៅជាងគេ និងមានគ្រោះថ្នាក់ខ្លាំងបំផុត ក្នុងចំណោមសមុទ្រមានគ្រោះថ្នាក់ផ្សេងទៀតនៅលើពិភពលោក ។ នៅសមុទ្រនេះមានទឹករលកធំៗវាយប្រហារកប៉ាល់ដឹកទំនិញផ្សេងៗ ព្រមទាំងទូកនេសាទអស់ជាច្រើន ។ ពេលខ្លះ ទឹករលកនៅសមុទ្រខាងជើង មានកម្ពស់ដល់ទៅ២១ម៉ែត្រឯណោះ ។

ហេតុនេះ ដោយសារទឹកសមុទ្រខាងជើងមានជម្រៅជ្រៅ និងមានគ្រោះថ្នាក់ខ្លាំង ទើបធ្វើឱ្យវាក្លាយជាឧបសគ្គយ៉ាងខ្លាំងក្នុងការសាងសង់កន្លែងខួងឧស្ម័នធម្មជាតិ ។ ទឹកសមុទ្រនេះមានជម្រៅជ្រៅខ្លាំង ទើបវិស្វករសម្រេចចិត្តរចនាម៉ូដការសាងសង់កន្លែងខួងឧស្ម័នធម្មជាតិឈ្មោះថា «Troll» ឱ្យមានកម្ពស់ស្មើនឹងអគារ Petronas Twin Towers របស់ប្រទេសម៉ាឡេស៊ី ។

គួរបញ្ជាក់ថា សមុទ្រខាងជើង (North Sea) ស្ថិតនៅទ្វីបអឺរ៉ុប និងនៅភាគខាងលិចប្រទេសន័រវេស និងដាណឺម៉ាក ។ សមុទ្រនេះស្ថិតនៅភាគខាងកើតកោះ British និងនៅខាងជើងប្រទេសអាល្លឺម៉ង់, ហូឡង់, បែលហ្ស៊ិក និងបារាំង ។ វាជាតំបន់មួយផ្នែករបស់មហាសមុទ្រអាត្លង់ទិក និងជាប់ជាមួយសមុទ្របាល់ទិកនៅផ្នែកខាងកើត ៕

ជាការពិតណាស់ ទម្រាំបានងារជាតន្ត្រីករដែលមានជាងគេបំផុតលើលោក គឺមិនមែនជារឿងងាយស្រួលនោះទេ ដោយសារនៅក្នុងវិស័យសិល្បៈគឺពោរពេញទៅដោយការប្រកួតប្រជែងគ្នាយ៉ាងខ្លាំងទាំងនៅអាស៊ី និងអឺរ៉ុប ដោយតារានីមួយៗបានខិតខំប្រឹងប្រែងរៀងៗខ្លួន ក៏ដូចជាតស៊ូកសាងកេរ្តិ៍ឈ្មោះ កិត្តិយស និងរក្សាភាពល្បីល្បាញរបស់ខ្លួនអស់រយៈពេលជាច្រើនឆ្នាំ ក៏ដូចជាបានបង្កើនប្រាក់ចំណូលរបស់ខ្លួនចាប់តាំងពីចូលប្រឡូកក្នុងពិភពតន្ត្រីរហូតមកដល់បច្ចុប្បន្ន។ ដូច្នេះហើយអត្ថបទនេះនឹងនាំប្រិយមិត្តមកស្គាល់កំពូលតារាចម្រៀងរបស់ពិភពលោក ដែលមានទ្រពសម្បត្តិច្រើនជាងគេបំផុតក្នុងឆ្នាំ ២០២៤។

១.Jay-Z៖ លោក Shawn Corey Carter ដែលត្រូវបានគេស្គាល់ថាជា Jay-Z គឺជាតារារ៉េបជនជាតិអាមេរិកដ៏ល្បីល្បាញម្នាក់របស់ពិភពលោក។ គាត់បានចាប់ផ្តើមប្រឡូកចូលវិស័យសិល្បៈក្នុងឆ្នាំ ១៩៨០ ហើយក៏បានបណ្តាក់ទុនទៅលើអាជីវកម្មផ្សេងៗជាច្រើន ដោយបច្ចុប្បន្នសិល្បករហ៊ីបហបដ៏មានឥទ្ធិពលរូបនេះមានទ្រព្យសម្បត្តិសុទ្ធ ២.៥ ពាន់លានដុល្លារអាមេរិក។

២.Bono៖ តារាចម្រៀងជួរមុខរបស់អាមេរិក និងជាអ្នកនិពន្ធចម្រៀងជនជាតិអៀរឡង់ លោក Bono មានទ្រព្យសម្បត្តិសុទ្ធ ១,៨ ពាន់លានដុល្លារអាមេរិក គឺជាតន្ត្រីករដែលមានជាងទី ២ នៅលើពិភពលោក។ គាត់បានចាប់ផ្តើមប្រឡូកចូលវិស័យសិល្បៈក្នុងឆ្នាំ ១៩៧៦ ហើយក៏បានបណ្តាក់ទុនទៅលើអាជីវកម្មជាច្រើនដូចជា Elevation Partners ធ្វើឱ្យផលប័ត្រហិរញ្ញវត្ថុរបស់គាត់កើនឡើងខ្លាំង។

៣.Rihanna៖ អ្នកណាមិនស្គាល់ Rihanna កំពូលតារាចម្រៀងរបស់ពិភពលោកដែលមានទ្រព្យសម្បត្តិសុទ្ធ ១,៤ ពាន់លានដុល្លារ ជាប់ចំណាត់ថ្នាក់លេខ ៣ ជាសិល្បករដែលមានជាងគេលើលោក។ Rihanna បានឈានជើងចូលឆាកតន្ត្រីក្នុងឆ្នាំ ២០០៥ ដោយឥទ្ធិពលជាសកលរបស់នាងគឺមិនអាចប្រកែកបាន ជាមួយនឹងការលក់អាល់ប៊ុមជាង ៦០ លាន និងបទចម្រៀងឌីជីថល ២១៥ លានត្រូវបានលក់ទូទាំងពិភពលោក។

៤. Paul McCartney៖ លោក Paul McCartney គឺជាអ្នកចម្រៀង អ្នកនិពន្ធបទចម្រៀង និងតន្ត្រីករជនជាតិអង់គ្លេស ដែលបានទទួលកិត្តិនាមទូទាំងពិភពលោកជាមួយក្រុម Beatles។ គាត់មានភាពល្បីល្បាញខ្លាំងក្នុងការលេងហ្គីតាបាសគឺមិនអាចប្រៀបផ្ទឹមបាន ដូច្នេះ Paul McCartney មានទ្រព្យសម្បត្តិសុទ្ធ ១,២ ពាន់លានដុល្លារអាមេរិក។

៥. Taylor Swift៖ ជាមួយនឹងភាពលេចធ្លោររបស់កំពូលតារាចម្រៀងប៉ុប Taylor Swift មានទ្រព្យសម្បត្តិសុទ្ធ ១,១ ពាន់លានដុល្លារអាមេរិក ក្លាយជាសិល្បៈករតន្ត្រីដែលមានជាងគេទី ៥ នៅលើពិភពលោក និងជាតារាចម្រៀងស្រីដែលមានឥទ្ធិពលបំផុតនាពេលបច្ចុប្បន្ននេះ។

៦. Celine Dion៖ Celine Dion គឺជាអ្នកចម្រៀងជនជាតិកាណាដាដែលទទួលបានងារជា “Queen of Power Ballads” ដោយសារសំលេងដ៏មានឥទ្ធិពល និងជំនាញបច្ចេកទេសរបស់នាង បានជំរុញឱ្យនាងទទួលបានការកោតសរសើរជាអន្តរជាតិ។ ដូច្នេះ Celine Dion មានទ្រព្យសម្បត្តិសុទ្ធ ៨០០ លានដុល្លារអាមេរិក៕

ប្រទេសថៃ ៖ យោងតាមរបាយការណ៍ប្រចាំឆ្នាំ២០២៣ របស់ Whoscall គឺជាកម្មវិធីបង្ហាញពីអ្នកហៅទូរស័ព្ទចូលមិនស្គាល់អត្តសញ្ញាណ ឬលេខទូរស័ព្ទអនាមិក និងការពារការផ្ញើសារ (Spam) បង្ហាញថា ជនជាតិថៃបានចាញ់បោ.កជន ខិ.លខូ.ច តាមទូរស័ព្ទច្រើនបំផុតនៅតំបន់អាស៊ី និងមានការផ្ញើសារបោ.កបញ្ឆោ.ត រហូតដល់៧៩លានដង ។ ចំនួននេះបានកើនឡើង បើធៀបនឹងឆ្នាំ២០២២ ដែលស្មើត្រឹមតែជាង៦៦លានដងប៉ុណ្ណោះ ឬស្មើនឹង១៨% ។

ហេតុនេះ ប្រទេសថៃមានចំនួនការកុហកបោកប្រាស់តាមទូរស័ព្ទច្រើនបំផុត ស្ថិតក្នុងចំណាត់ថ្នាក់ទី១ នៅតំបន់អាស៊ី ។ រីឯចំណាត់ថ្នាក់ទី២ បានទៅប្រទេសហ្វីលីពីន និងចំណាត់ថ្នាក់ទី៣ គឺទីក្រុងហុងកុង ។

ព័ត៌មានអំពីជនបោកប្រាស់តាមទូរស័ព្ទនេះ គឺការិយាល័យមូលនិធិលើកកម្ពស់សុខភាព បានយកព័ត៌មាននេះមកបង្ហាញក្នុងសិក្ខាសាលាមួយ ស្តីពី «ការត្រួតពិនិត្យព័ត៌មានក្លែងក្លាយនៅលើពិភពលោក ប្រចាំឆ្នាំ២០២៤» ដើម្បីផ្តល់ចំណេះដឹងដល់ពលរដ្ឋ ដែលអាចងាយធ្លាក់ក្នុងអន្ទាក់របស់ជនខិលខូច ។ លើសពីនេះ ក៏មានការចូលរួមសហការជាមួយដៃគូ Cofact និងទីក្រុងបាងកក ដើម្បីបើកវគ្គបណ្តុះបណ្តាលផ្តល់ចំណេះដឹង និងជួយសង្គ្រោះពលរដ្ឋដែលក្លាយជាជនរងគ្រោះ ។

លោក Chadchart Sittipunt អភិបាលក្រុងបាងកកលើកឡើងថា លោកផ្តល់ភាពសំខាន់ទៅលើការគំរាមកំហែងតាមអនឡាញគ្រប់ប្រភេទ ហើយការចូលរួមក្នុងគម្រោងនេះ គឺដើម្បីជំរុញការផ្តល់ចំណេះដឹង និងវិធីការពារពលដ្ឋកុំឱ្យចាញ់បោកគេ ។ បណ្តាញ Cofact បានដំណើរការត្រួតពិនិត្យការពិតតាមរយៈប្រព័ន្ធផ្សព្វផ្សាយអនឡាញ តាំងពីឆ្នាំ២០២០ មកម៉្លេះ ហើយបណ្តាញនេះបានជួយពលរដ្ឋចំនួនជាង៥.០០០នាក់ មិនឱ្យចាញ់បោកជនខិលខូច ។ បណ្តាញ Cofact បានផ្តល់ការណែនាំតាមរយៈគេហទំព័រឈ្មោះ Cofact.org ។

ភ្នាក់ងារបណ្តាញ Cofact ឱ្យដឹងថា ការបោកប្រាស់តាមអនឡាញបានផ្លាស់ប្តូរយ៉ាងឆាប់រហ័ស ខណៈកាលពីមុន មានការបោកប្រាស់តាមរយៈព័ត៌មានក្លែងក្លាយ ប៉ុន្តែវាបានផ្លាស់ប្តូរទៅជាការបោកប្រាស់តាមទូរស័ព្ទ និងផ្ញើសារឱ្យផ្ទេរប្រាក់បានកើនឡើងច្រើន ។ បើតាមទិន្នន័យរបស់ Royal Thai Police បង្ហាញថា ពលរដ្ឋថៃតែងត្រូវគេបោកប្រាស់ឱ្យទិញផលិតផល ឬសេវាកម្ម, កុហកឱ្យផ្ទេរប្រាក់ដើម្បីទទួលបានការងារធ្វើ និងបោកបញ្ឆោតឱ្យខ្ចីប្រាក់ ជាដើម ។

នៅឆ្នាំ២០២៤ បណ្តាញ Cofact បានត្រៀមសហការជាមួយរដ្ឋាភិបាល និងផ្នែកឯកជន ដើម្បីបើកវគ្គបណ្តុះបណ្តាលអំពីជំនាញត្រួតពិនិត្យទិន្នន័យនៅសម័យបច្ចេកវិទ្យា AI នៅទូទាំងប្រទេសថៃ ។ ក្រៅពីនេះ បណ្តាញ Cofact ក៏មានគម្រោងបង្កើតមជ្ឈមណ្ឌលត្រួតពិនិត្យព័ត៌មានក្លែងក្លាយក្នុងតំបន់ ចំនួន៧កន្លែង និងទទួលយកដៃគូថ្មីមកធ្វើការត្រួតពិនិត្យព័ត៌មាន ដើម្បីធ្វើឱ្យពលរដ្ឋគ្រប់រូបក្លាយជាអ្នកត្រួតពិនិត្យព័ត៌មានពិត ឬក្លែងក្លាយ ៕