រូបសំណាក់«នាងសិលាចាំប្តី»មួយបានលេចឡើង ដើម្បីជាការសបញ្ជាក់អំពីភក្តីភាពរបស់នាងទៅកាន់ប្តី ដែលជាទីកន្លែងដែលនាងបានឈររងចាំ រហូតក្លាយជារមនីយដ្ឋានដ៏ទាក់ទាញការធ្វើដំណើរទេសចរណ៍ ។ រូបសំណាក់«នាងសិលាចាំប្តី» ដែលប្រជាជនខ្មែរមួយចំនួនធំបានយល់ច្រឡំថា កំពុងមានវត្តមាននៅលើឆ្នេរកែប ខណៈការលើកឡើងនេះគឺខុសទាំងស្រុង។

យោងតាមប្រភពច្បាស់ការណ៍បានឲ្យដឹងថា រូបសំណាក់«នាងសិលាចាំប្តី»ពិតប្រាកដគឺស្ថិតនៅភូមិកំពង់វា ឃុំកំពង់សិលា ស្រុកកំពង់សិលា នៅលើទឹកដីនៃខេត្តព្រះសីហនុ។ ចំណែកឯ រូបសំណាក់ដែលអង្គុយនៅឆ្នេរកែប តាមពិតគឺជារូបសំណាក់«នាងស្រីសរ» ទៅតាមដំណាលរឿងព្រេងនិទានខ្មែរបុរាណទាក់ទងនឹងប្រវត្តិខេត្តកែបទៅវិញទេ។ លុះចំណេរ កាលក្រោយមកទៀត ទើបអភិបាលខេត្តកែបមុនបានស្ថាបនារូបសំណាក់«នាងសាច់សរ»នេះឡើងដើម្បីជាអនុស្សាវរីយ៍។

យោងតាមការគូសបញ្ជាក់ នាងសិលាបានទទួលមរណកាលនៅក្នុងខែវិច្ឆិកា ឆ្នាំ ១៩៧៦ ដោយសារតែបង្អត់អាហារ។ រូបសំណាក់នាងកំពុងតែឈរទូលស្លឹកចេក បានឆ្លុះបញ្ចាំងអំពីការរង់ចាំដ៏ស្ងៀមស្ងាត់ និងភក្តីភាពដល់ដង្ហើមចុងក្រោយ នៅតែមិនឃើញស្វាមីនាងវិលវិញឡើយ ដែលប្តីរបស់នាងទំនងជាបានស្លាប់នៅគ្រានោះទៅហើយ ពោលគឺក្នុងរបបខ្មែរក្រហម ឆ្នាំ១៩៧៦។

រឿងរ៉ាវដ៏សែនកម្សត់មួយ ដែលបានរៀបរាប់ពីនារីម្នាក់ មានភក្តីភាពចំពោះគូជីវិត ដែលនាងចាំប្តី រហូតដល់ទៅក្លាយជាសិលា បានដក់ជាប់ក្នុងចិត្តរបស់មហាជន មានចិត្តអាណិតអាសូរ ដល់នារីម្នាក់នោះ ដែលមានចិត្តស្មោះត្រង់ ទៅកាន់ប្តីរបស់ខ្លួន សឹងថាក្នុងលោកនេះគ្មានទេ ស្នេហាបរិសុទ្ធបែបនេះ និងត្រូវបានចងក្រងជាបទចំរៀងផងដែរ គឺបទ៖ «សិលាចាំប្តី»ផងដែរ។ ទោះជាមានការបង្ហោះនូវស្នេហាកម្សត់មួយនេះក៏ដោយ ក៏គេមិនទាន់មានឯកសារ រៀបរាប់ពីដំណើររឿងនេះ អោយពិតប្រាកដនៅឡើយនោះទេ៕

ផ្សារដើមគរថ្មី ឬផ្សារបោះដុំអាស៊ាន-អន្តរជាតិ មានទីតាំងស្ថិតនៅតាមបណ្តោយមហាវិថីឈ្នះឈ្នះ ក្នុងសង្កាត់គោករកា ខណ្ឌព្រែកព្នៅ រាជធានីភ្នំពេញ ត្រូវបានដាក់ឱ្យប្រើប្រាស់ជាផ្លូវការហើយ ដោយមានស្តង់លក់ដូរ ចំនួន ៦០០០ ស្តង់។ផ្សារនេះ ត្រូវបានសាងសង់ឡើងនៅលើផ្ទៃដី៣០ហិកតា ដែលនឹងក្លាយជាកន្លែងបោះដុំផលិតផលកសិកម្មដ៏ធំរវាងកម្ពុជា-ចិន ដើម្បីផ្គត់ផ្គង់តម្រូវការប្រជាពលរដ្ឋក្នុងស្រុក។ពិធីបើកសម្ពោធនេះធ្វើឡើងនាថ្ងៃទី២៧ ខែមេសា ឆ្នាំ២០២៤ ក្រោមអធិបតីភាពលោក ឃួង ស្រេង អភិបាលរាជធានីភ្នំពេញ និងលោក វ៉ាង វិនធាន Wang Wentian ឯកអគ្គរដ្ឋទូតចិនប្រចាំកម្ពុជា និងមានការចូលរួមពីលោក លាំង អ៉ីហ្គ័ន (Liang Yiguang) អគ្គលេខាធិការរងនៃអគ្គលេខាធិការដ្ឋាននៃពិព័រណ៍អាស៊ាន-ចិន លោក ជូ ឡី (Zhu Lei) អធិការនៃអគ្គនាយកដ្ឋានពាណិជ្ជកម្មតំបន់ស្វយ័តក្វាងស៊ី ប្រទេសចិន។

បើតាមថា្នក់ដឹកនាំផ្សារនេះ បានសង្ឃឹមយ៉ាងមុតមាំថា នៅពេលអនាគត នឹងកសាងផ្សារដើមគរថ្មី ឬផ្សារបោះដុំអាស៊ាន-អន្តរជាតិ ឱ្យក្លាយជាផ្សារបោះដុំជំនាញដ៏ធំជាងគេក្នុងរាជធានីភ្នំពេញ និងតំបន់អាស៊ាន ហើយនឹងបង្កើតទៅជាផ្សារចម្រុះដែលបោះដុំកសិផលនិងទំនិញផ្សេងទៀត៕

ប្រទេសឡាវ ៖ ក្រសួងអប់រំឡាវបារម្ភពីសុខភាពរបស់សិស្ស ខណៈបច្ចុប្បន្ន ប្រទេសឡាវបានប្រឈមនឹងអាកាសធាតុក្តៅខ្លាំង និងធូលីច្រើន ។ ក្រសួងអប់រំបានប្រគល់សិទ្ធិឱ្យនាយកសាលាទាំងអស់ផ្អាកការបង្រៀនសិស្សជាបណ្តោះអាសន្ន ករណីអាកាសធាតុក្តៅខ្លាំង ។

កាលពីថ្ងៃទី២៥ ខែមេសា ឆ្នាំ២០២៤ ក្រសួងអប់រំ និងកីឡាឡាវ បានជូនដំណឹងទៅកាន់ស្ថាប័នអប់រំទាំងអស់បង្កើនការប្រុងប្រយ័ត្នអាកាសធាតុក្តៅខ្លាំង, ខ្យល់ព្យុះ និងបរិយាកាសកខ្វក់ ដែលអាចប៉ះពាល់ដល់សិស្ស-និស្សិត, គ្រូបង្រៀន, បុគ្គលិកអប់រំ និងទ្រព្យសម្បត្តិរបស់ស្ថាប័នអប់រំ ។

ខ្លឹមសារក្នុងសេចក្តីជូនដំណឹងបញ្ជាក់ថា បើកន្លែងណាមានសីតុណ្ហភាពជាង៤០អង្សារសេ ដែលអាចប៉ះពាល់ដល់សុខភាពសិស្ស ជាពិសេស សាលាមត្តេយ្យ, សាលាបឋមសិក្សា ជាពិសេស បន្ទប់រៀនគ្មានម៉ាស៊ីនត្រជាក់ ឬកង្ហារ គឺនាយកសាលានោះត្រូវចៀសវាងការរៀបចំកម្មវិធីក្រោមកំដៅថ្ងៃ និងអាចផ្អាកការបង្រៀនសិស្សបណ្តោះអាសន្ន ។

ក្រៅពីនេះ ត្រូវតាមដានលក្ខខណ្ឌអាកាសធាតុដែលអាចកើតព្យុះភ្លៀង, រន្ទះបាញ់ ឬខ្យល់ខ្លាំងនៅតំបន់មួយចំនួន ដែលអាចប៉ះពាល់អគារ និងឧបករណ៍ការបង្រៀន ។ សាលារៀនអាចប្រមូលសម្ភារៈផ្សេងៗទុកនៅកន្លែងមានសុវត្ថិភាព ដើម្បីការពារមិនឱ្យកើតគ្រោះថ្នាក់ដល់សិស្ស ករណីមានខ្យល់ព្យុះ, ផ្គររន្ទះ និងទឹកជំនន់ភ្លាមៗ ។

សេចក្តីជូនដំណឹងនេះបានជំរុញឱ្យនាយកសាលាតាមដានស្ថានភាពបំពុលបរិយាកាស និងធូលីតូចៗនៅទីកន្លែងនីមួយៗជាបន្តបន្ទាប់ និងរៀងរាល់ថ្ងៃ ។ បើមានការបំពុលបរិយាកាសខ្ពស់រហូតប៉ះពាល់សុខភាពសិស្ស, គ្រូបង្រៀន និងបុគ្គលិក នាយកសាលាអាចកំណត់វិធានការការពារផលប៉ះពាល់ ។

វាជាការការពារផលប៉ះពាល់រយៈពេលវែង, លើកកម្ពស់ការយល់ដឹងពីការអភិរក្សបរិស្ថានក្នុងសាលា និងរៀបចំបរិវេណសាលាឱ្យក្លាយជាតំបន់បៃតង ដូចជា ៖ ដាំដើមឈើ, ទុកដាក់សំរាម និងហាមដុតសំរាមបំពុលបរិយាកាស ។ បច្ចុប្បន្ន តំបន់ជាច្រើននៅឡាវបានប្រឈមនឹងធូលីតូចៗ, បរិយាកាសកខ្វក់ និងមានសីតុណ្ហភាពកើនឡើងជាង៤០អង្សារសេ ៕

ទ្វីបអាស៊ីគឺជាទ្វីបធំជាងគេនៅលើពិភពលោក ដែលមានប្រទេសពេញសិទ្ធិចំនួន ៤៨ប្រទេស។ ក្នុងនោះប្រទេសចិនគឺជាប្រទេសធំជាងគេនៅលើទ្វីបនេះ ខណៈប្រទេសដែលតូចជាងគេបំផុតគឺប្រទេសដែនកោះម៉ាល់ឌីវ។ នៅទ្វីបអាស៊ីមានរមណីយដ្ឋានល្បីៗជាច្រើន ក៏ដូចជាមានវប្បធម៌ដ៏សម្បូរបែប អាហារឆ្ងាញ់ៗ ទេសភាពដ៏ស្ងប់ស្ងាត់នៃអាស៊ីកណ្តាល រួមទាំងមានភ្នំព្រៃឈើបែបធម្មជាតិដ៏ស្រស់ស្អាត ផ្តល់ឱ្យភ្ញៀវទេសចរនូវការចងចាំដ៏ល្អ ភាពសប្បាយរីករាយ និងបង្កើតអនុស្សាវរីយ៍ដ៏យូរអង្វែង ជាពិសេសនោះគឺមិនចំណាយប្រាក់ច្រើនពេកនោះទេ។

ដូច្នេះប្រសិនបើភ្ញៀវទេសចរអន្តរជាតិចង់ដើរកម្សាន្តសប្បាយរីករាយ ជាមួយនឹងការចំណាយសមរម្យ ពួកគេអាចជ្រើសរើសប្រទេសកម្ពុជាគឺជាគោលដៅទេសចរណ៍ដែលមានតម្លៃសមរម្យបំផុតជាប់ចំណាត់ថ្នាក់លេខ ៣ នៅអាស៊ីនេះបើយោងតាមការចុះផ្សាយរបស់ Vinpearl។ ខណៈដែលចំណាត់ថ្នាក់លេខ ១ បានទៅលើប្រទេសថៃ និងលេខ ២ បានទៅលើប្រទេសវៀតណាម។ ប្រទេសកម្ពុជាជាគោលដៅទេសចរណ៍ដ៏ល្អបំផុតមួយនៅអាស៊ីអាគ្នេយ៍ ក្នុងនោះភ្ញៀវទេសចរអាចរីករាយជាមួយការទស្សនា និងការស្នាក់នៅសណ្ឋាគារលំដាប់ផ្កាយនៅរាជធានីភ្នំពេញដែលជាមជ្ឈមណ្ឌលសេដ្ឋកិច្ច និងជាគោលដៅទេសចរណ៍វប្បធម៌ប្រវត្តិសាស្ត្រ ឬក៏ទៅទស្សនាសារមន្ទីរជាតិជាដើម។

លើសពីនេះភ្ញៀវទេសចរក៏អាចធ្វើដំណើរចេញពីរាជធានីភ្នំពេញ ហើយអាចបន្តទៅទស្សនានៅតាមតំបន់បេតិភណ្ឌរបស់អង្គការយូណេស្កូ មានដូចជាប្រាសាទអង្គរវត្តនិងរមណីយដ្ឋានអង្គរទាំងមូលដែលស្ថិតនៅខេត្តសៀមរាប តំបន់ប្រាសាទព្រះវិហារនៅខេត្តព្រះវិហារ និងតំបន់ប្រាសាទសំបូរព្រៃគុកនៅខេត្តកំពង់ធំ ឬក៏អាចទៅទស្សនានៅតំបន់ឆ្នេរសមុទ្រកម្ពុជាដែលលាតសន្ធឹងនៅតាមខេត្តព្រះសីហនុ កំពត កែប និងខេត្តកោះកុង។ កម្ពុជាក៏មានភាពសម្បូរបែបផងដែរជាមួយនឹងតំបន់អេកូទេសចរណ៍នៅភាគឦសានប្រទេស នៅខេត្តកោះកុង ខេត្តពោធិ៍សាត់ និងខេត្តមួយចំនួនទៀត ឬក៏ទៅទស្សនាសត្វផ្សោតដែលជាសត្វកម្រជិតផុតពូជនៅតាមដងទន្លេមេគង្គនៃខេត្តក្រចេះ។

ជម្រើសពិសេសផ្សេងទៀត គឺការទៅទស្សនាតំបន់បេតិកភណ្ឌសម័យអាណានិគមនៅខេត្តបាត់ដំបង ខេត្តកំពត និងខេត្តក្រចេះជាដើម។ ទន្ទឹមនឹងនេះភ្ញៀវទេសចរក៏អាចទៅទស្សនាទេសភាពបឹងទន្លេសាបដែលជាបឹងដ៏ធំជាងគេមួយនៅអាស៊ី ក្នុងនោះមានច្រកទៅទស្សនាតាមផ្លូវទឹកជាច្រើនកន្លែងនៅខេត្តសៀមរាប ខេត្តពោធិ៍សាត់ ខេត្តបាត់ដំបង ខេត្តកំពង់ឆ្នាំង និងខេត្តកំពង់ធំជាដើម។ បន្ថែមពីនេះនៅមានម្ហូបអាហារ ទស្សនីយភាពសិល្បៈ ជីវភាពរស់នៅរបស់ប្រជាជន ឈ្វេងយល់អំពីវប្បធម៌-អរិយធម៌ដ៏ចំណាស់មួយនៅអាស៊ី និងមានផលិតផលទេសចរណ៍ជាច្រើនទៀតដែលភ្ញៀវទេសចរអាចរីករាយក្នុងការស្នាក់នៅ និងទស្សនាកម្សាន្តជាមួយនឹងការចំណាយសមរម្យបំផុត៕

ខ្នុរគឺជាផ្លែឈើមួយប្រភេទដែលមនុស្សជាច្រើនចូលចិត្តញ៉ាំនៅក្នុងរដូវក្តៅ ប៉ុន្តែវាក៏គួរឱ្យរំខានផងដែរ ដោយសារតែជ័រខ្នុររបស់វាស្អិតខ្លាំង ហើយពិបាកក្នុងការសម្អាត។ យោងតាមអ្នកជំនាញផ្នែកអាហារូបត្ថម្ភ ខ្នុរមានរសជាតិផ្អែម លក្ខណៈសម្បត្តិក្តៅ និងមានប្រសិទ្ធភាពជួយសួត និងបំបាត់កំដៅអវិជ្ជមាន។ លើសពីនេះផ្លែខ្នុរទុំជួយបន្ថែមវីតាមីន A, C, ស័ង្កសី, កាល់ស្យូម និងជាតិដែក ដើម្បីជួយបង្កើនភាពធន់ និងកាត់បន្ថយភាពជ្រីវជ្រួញ។ ទោះជាយ៉ាងណាក៏ដោយ ការញ៉ាំផ្លែខ្នុរគឺមានការរំខានដោយសារតែសាច់ខ្នុរមានជាតិជ័រច្រើន ដែលធ្វើឱ្យដៃរបស់យើងស្អិតខ្លាំងបង្កឱ្យមានការលំបាកក្នុងការសម្អាត។ ដូច្នេះអត្ថបទនេះនឹងប្រាប់លោកអ្នកពីគន្លឹះងាយៗមួយចំនួនដើម្បីកម្ចាត់ជ័រខ្នុរកុំឱ្យស្អិតជាប់ដៃ៖

១.ការប្រើប្រាស់ប្រេងឆា៖ ការលាបប្រេងឆាបន្តិចលើដៃ ឬកាំបិតមុនពេលកាត់ ឬបំបែកផ្លែខ្នុរទុំ គឺជាវិធីសាស្រ្តមួយដែលមនុស្សជាច្រើនបានអនុវត្តនាពេលនេះ ហើយបន្ទាប់ពីកាត់រួចយើងយកផ្លែឈើទៅលាងទឹកចេញជាការស្រេច។ ប្រេងឆាគឺជាសារធាតុរំលាយដែលមិនមានប៉ូល ដូច្នេះពួកវាអាចរំលាយជ័រខ្នុរបានយ៉ាងងាយស្រួល។

២.ប្រើក្រូចឆ្មា ឬទឹកខ្មេះ៖ គន្លឹះសាមញ្ញមួយទៀត ដើម្បីយកខ្នុរចេញពីដៃ និងកាំបិត គឺប្រើក្រូចឆ្មា ឬទឹកខ្មេះ។ អាស៊ីត ដែលមាននៅក្នុងក្រូចឆ្មា និងទឹកខ្មេះ មិនត្រឹមតែជួយកម្ចាត់ខ្នុរប៉ុណ្ណោះទេ ថែមទាំងមានក្លិនក្រអូប ធ្វើឱ្យស្បែកដៃទន់ និងល្អសម្រាប់អ្នកដែលមានស្បែកងាយប្រតិកម្ម។

៣.កំដៅកាំបិតលើភ្លើង៖ វិធីមួយទៀតដើម្បីដោះស្រាយជ័រខ្នុរក្រាស់នៅលើកាំបិត គឺយកវាទៅកំដៅលើភ្លើងរហូតដល់ជ័ររលាយ បន្ទាប់មកយកក្រដាស់ជូតមាត់ចេញ ហើយលាងវាម្តងទៀតជាការស្រេច។

៤.ជ្រលក់កាំបិតក្នុងទឹកពេលកាប់ខ្នុរ៖ ទុកចានទឹកស្អាតក្បែរពេលកាប់ខ្នុរ រាល់ពេលដែលអ្នកកាប់ ត្រូវបន្ថែមទឹកជាមុនសិន ដើម្បីកុំឱ្យជ័រជាប់ដៃនិងកាំបិត។

៥.ការប្រើប្រាស់អង្ករ៖ តាមបទពិសោធន៍មនុស្សទូទៅ ពេលដែលខ្នុរជាប់នឹងដៃ ឬកាំបិត អ្នកគ្រាន់តែដាក់ដៃនិងកាំបិតក្នុងធុងអង្ករ ហើយជូតនោះកន្ទក់ដែលជាប់នឹងដៃធ្វើឱ្យជ័រខ្នុរបាត់បង់រួចលាងដៃនិងកាំបិតជាមួយទឹកម្តងទៀតជាការស្រេច។
៦.ការប្រើប្រាស់ផេះក្នុងផ្ទះបាយ៖ ការយកដៃរបស់អ្នក ឬកាំបិតដាក់ចូលទៅក្នុងផេះផ្ទះបាយក៏បណ្តាលឱ្យជ័រខ្នុរបាត់បង់ភាពស្អិតរបស់វាផងដែរ។ សព្វថ្ងៃនៅជនបទ ស្ត្រីនៅតែប្រើវិធីនេះ ប្រសិនបើផ្ទះនៅតែចម្អិនដោយចង្ក្រានឈើ ឬចង្ក្រានចំបើង។ ទោះជាយ៉ាងណាក៏ដោយនៅក្នុងតំបន់ទីក្រុងវិធីសាស្ត្រនេះពិបាកក្នុងការអនុវត្តព្រោះផេះផ្ទះបាយមិនសូវមានទេ៕

ការសម្រាកក្នុងបន្ទប់ពេលយប់ ហាមដាច់ខាតបើកទ្វារបន្ទប់ចោល ពីព្រោះវាមិនត្រឹមតែពាក់ព័ន្ធនឹងរឿងហ៊ុយស៊ុយប៉ុណ្ណោះទេ ប៉ុន្តែវាបានជួយសន្សំសំចៃប្រាក់ និងបង្កើនឱកាសរស់រានមានជីវិត ព្រមទាំងចៀសផុតពីគ្រោះថ្នាក់ផ្សេងៗផងដែរ ។ ការបិទទ្វារបន្ទប់សម្រាកពេលយប់នឹងអាចជួយជីវិតយើងបាន ហើយអ្នកជំនាញណែនាំថា កុំបើកទ្វារបន្ទប់ពេលយប់ជាដាច់ខាត បើទោះជាមនុស្សភាគច្រើនជឿថា ការបើកទ្វារបន្ទប់ពេលយប់អាចជួយឱ្យខ្យល់ចេញ-ចូលគ្រប់គ្រាន់ និងអាចគ្រប់គ្រងស្ថានការណ៍ខាងក្រៅ ។

ប៉ុន្តែអ្នកជំនាញបានពិសោធន៍រួចហើយថា ការបើកទ្វារបន្ទប់សម្រាកនៅពេលយប់គ្មានសុវត្ថិភាពទេ និងអាចធ្វើឱ្យយើងមានគ្រោះថ្នាក់ដែលពិបាកការពារខ្លួនទៀតផង ។ អ្នកជំនាញបានលើកឡើងពីហេតុផលជាច្រើនជុំវិញការលើកឡើងថា ហេតុអ្វីគួរតែបិទទ្វារបន្ទប់សម្រាកពេលយប់ ដូចខាងក្រោមនេះ ៖

១-ចៀសផុតពីគ្រោះថ្នាក់ពេលមានចោរចូលក្នុងផ្ទះ ៖ ការចាក់សោរទ្វារបន្ទប់ពីខាងក្នុង វាអាចជួយយើង និងមនុស្សជាទីស្រឡាញ់ចៀសផុតពីគ្រោះថ្នាក់ផ្សេងៗ ករណីមានចោរប្លន់សម្រុកចូលក្នុងផ្ទះរបស់យើង ។ វិធីនេះនឹងធ្វើឱ្យយើងមានពេលវេលាទូរស័ព្ទប្តឹងប៉ូលិសពេលមានហេតុការណ៍អាក្រក់កើតឡើង ឬបានឮសំឡេងប្លែកៗក្នុងផ្ទះ ហើយយើងនឹងអាចសម្ងំនៅក្នុងបន្ទប់នេះយ៉ាងមានសុវត្ថិភាព ។

២-កាត់បន្ថយសំឡេងរំខានផ្សេងៗពីខាងក្រៅ និងធ្វើឱ្យសម្រាកលក់ស្រួល ៖ ការបិទទ្វារបន្ទប់សម្រាក មិនត្រឹមតែធ្វើឱ្យយើងមានកន្លែងផ្ទាល់ខ្លួនប៉ុណ្ណោះទេ ប៉ុន្តែវាបានជួយកាត់បន្ថយសំឡេងរំខានផ្សេងៗពីខាងក្រៅផងដែរ បើយើងរស់នៅតំបន់ទីប្រជុំជន ឬនៅជិតផ្លូវធំ ។ លើសពីនេះ ការបិទទ្វារបន្ទប់នឹងជួយឱ្យយើងស្ងប់ស្ងាត់គេងលក់ស្រួល ឬមិនភ្លាក់ភ្លាមៗដោយសារសំឡេងស៊ីផ្លេរថយន្ត ឬសំឡេងរំខានផ្សេងៗក្នុងផ្ទះ ពេលសមាជិកគ្រួសារណាម្នាក់ភ្ញាក់ ឬធ្វើអ្វីមួយពេលយប់ ។

៣-មានឱកាសនៅរស់រានមានជីវិតពីភ្លើងឆេះ ៖ ករណីមានភ្លើងឆេះផ្ទះករណីយើងកំពុងសម្រាកលក់ ការបិទទ្វារបន្ទប់នឹងធ្វើឱ្យយើងមានពេលវេលារកផ្លូវគេចចេញពីគ្រោះថ្នាក់បាន ។ ក្រៅពីនេះ ការបិទទ្វារបន្ទប់សម្រាកអាចជួយរក្សាសីតុណ្ហភាពក្នុងបន្ទប់ឱ្យទាបជាងបរិវេណខាងក្រៅ ព្រមទាំងការពារផ្សែងភ្លើងបានខ្លះ ។ ដូច្នេះ អ្នកសម្រាកលក់ក្នុងបន្ទប់នឹងពុំស្រូបផ្សែងខ្លាំងរហូតដល់ស្លាប់ទេ បើយើងបានបិទទ្វារបន្ទប់ ។

ករណីការបើកទ្វារបន្ទប់សម្រាកពេលយប់ វាធ្វើឱ្យផ្សែងភ្លើងចូលក្នុងបន្ទប់យ៉ាងឆាប់រហ័ស, សាយភាយពាសពេញបរិវេណផ្ទះ ព្រមទាំងធ្វើឱ្យសីតុណ្ហភាពកើនឡើងខ្ពស់ ។ ហេតុនេះ បើទោះជាយើងសម្រាកលក់ក្តី ប៉ុន្តែយើងបានស្រូបផ្សែងចូលក្នុងខ្លួនបាត់ទៅហើយ ទម្រាំភ្ញាក់ដឹងខ្លួនថា មានភ្លើងឆេះផ្ទះ ។

វាជាមូលហេតុដែលអ្នកជំនាញណែនាំឱ្យបិទទ្វារបន្ទប់សម្រាកពេលយប់ដើម្បីឱ្យយើងមានជីវិតរស់ និងចៀសផុតពីគ្រោះថ្នាក់ផ្សេងៗក្នុងករណីមានភ្លើងឆេះផ្ទះ ។ ក្រៅពីនេះ ទ្វារបន្ទប់អាចជួយការពារផ្សែងភ្លើង និងកំដៅពីបរិវេណខាងក្រៅបានមួយកម្រិត ។

៤-ជួយរក្សាសីតុណ្ហភាពសមស្រប និងសន្សំសំចៃអគ្គិសនី ៖ បើតាមអ្នកជំនាញផ្នែកសរសៃប្រាសាទ និងគ្រូពេទ្យភាគច្រើននិយាយថា សីតុណ្ហភាពក្នុងបន្ទប់សម្រាក គឺស្មើប្រមាណ១៨.៣អង្សារសេ ហើយបើក្នុងបន្ទប់នោះដាក់ម៉ាស៊ីនត្រជាក់ ការបិទទ្វារបន្ទប់ពេលយើងសម្រាកលក់ពេលយប់ គឺជាវិធីជួយសន្សំសំចៃអគ្គិសនីបានមួយកម្រិត ។

៥-ការបិទទ្វារបន្ទប់អាចជួយរក្សាថាមពលវិជ្ជមាននៅខាងក្នុង ៖ បើតាមជំនឿហុងស៊ុយ ការបិទទ្វារបន្ទប់អាចជួយរក្សាថាមពលវិជ្ជមាននៅខាងក្នុង ហើយចំណុចមួយក្នុងក្បួនហុងស៊ុយបញ្ជាក់ថា ការមិនសម្រាកក្នុងបន្ទប់បើកទ្វារ នឹងអាចកម្ចាត់ថាមពលអាក្រក់កុំឱ្យចូលក្នុងបន្ទប់ ។ ក្រៅពីនេះ ការបិទទ្វារបន្ទប់នឹងធ្វើឱ្យយើងមានសុវត្ថិភាព, កាន់តែស្ងប់ស្ងាត់, សម្រាកលក់ស្រួលជាងមុន និងមានសុខភាពរឹងមាំ ៕