ប្រទេសឥណ្ឌា ៖ ពេលធ្វើដំណើរទៅដល់ប្រទេសឥណ្ឌា ភ្ញៀវទេសចរភាគច្រើននឹងនឹកឃើញដល់ព្រះរាជវាំងដ៏ល្បីមួយឈ្មោះ Taj Mahal ដែលជាតំបន់ទេសចរណ៍ពេញនិយមនៅឥណ្ឌា ។ ប៉ុន្តែភ្ញៀវទេសចរពុំសូវស្គាល់ព្រះរាជវាំងដ៏ស្រស់ស្អាតមួយកន្លែងទៀតទេ គឺព្រះរាជវាំងមួយនេះបានបង្ហាញពីអត្តសញ្ញាណជាច្រើនរបស់ជនជាតិឥណ្ឌា ។

Hawa Mahal មានន័យថា «ព្រះរាជវាំងខ្យល់» ស្ថិតនៅទីក្រុង Jaipur រដ្ឋ Rajasthan ប្រទេសឥណ្ឌា បានកសាងឡើងនៅឆ្នាំ១៧៩៩ ក្នុងសម័យព្រះមហាក្សត្រឥណ្ឌា ព្រះនាម Maharaja Sawai Pratap Singh ។ ប្រាសាទទាំងមូលបានកសាងឡើងដោយថ្មភក់ពណ៌ផ្កាឈូក និងពណ៌ក្រហម ។

ព្រះរាជវាំង Hawa Mahal បានរចនាម៉ូដដោយ Lal Chand Ustad គឺរូបរាងប្រាសាទធ្វើឡើងតាមគំរូមកុដរបស់ព្រះនរាយណ៍ ។ អ្វីដែលធ្វើឱ្យព្រះរាជវាំងនេះល្បីល្បាញ គឺព្រះរាជវាំងមានកម្ពស់៥ជាន់, មានរូបរាងដូចសម្បុកឃ្មុំ, មានបង្អួចតូចៗយ៉ាងច្រើន ព្រមទាំងមានប្រហោងខ្យល់ ចំនួន៩៥៣ប្រហោង ។

មនុស្សភាគច្រើនឆ្ងល់ថា ហេតុអ្វីបានជាព្រះរាជវាំង Hawa Mahal ចាំបាច់សាងសង់បង្អួចច្រើនដល់ថ្នាក់នេះ? មូលហេតុចម្បងៗ គឺការសាងសង់បង្អួចច្រើនបែបនេះ គឺសម្រាប់ឱ្យខ្យល់ចេញ-ចូលបានល្អ ជាពិសេស នៅរដូវក្តៅ ។

រីឯមូលហេតុមួយទៀត គឺដើម្បីឱ្យស្ត្រីនៅក្នុងវាំងមានឱកាសមើលឃើញការធ្វើដំណើររបស់មនុស្សម្នានៅតាមផ្លូវ ហើយមនុស្សនៅខាងក្រៅពុំអាចមើលឃើញពួកនាងៗទេ ព្រោះស្ត្រីក្នុងវាំងបានបិទបាំងមុខរបស់ខ្លួនដោយស្បៃ ។ ម្យ៉ាងទៀត កាលពីសម័យមុន ពួកស្ត្រីក្នុងវាំងកម្រមានឱកាសចេញមកខាងក្រៅណាស់ ។

ភ្ញៀវទេសចរដែលមកកម្សាន្តនៅព្រះរាជវាំងនេះ អាចថតរូបស្អាតៗនៅបរិវេណខាងក្រៅបាន ដោយសារព្រះរាជវាំងមានទីតាំងស្ថិតនៅជាប់ផ្លូវធំ ។ ប៉ុន្តែពេលភ្ញៀវទេសចរបានមកដល់ទីនេះហើយ ពួកគេចង់ទៅទស្សនាផ្នែកខាងក្នុងព្រះរាជវាំង ដោយសារមានភាពស្រស់ស្អាត និងអស្ចារ្យខ្លាំង ៕

បរទេស៖ បណ្ណាល័យគឺជាកន្លែងដែលមានសៀវភៅច្រើនរាប់មិនអស់ ដោយអ្នកអាចជ្រើសរើសសៀវភៅណាមួយដែលអ្នកចូលចិត្ត ចង់ដឹង និងស្វែងយល់បន្ថែមអំពីរឿងដែលអ្នកចាប់អារម្មណ៍។ ទោះជាយ៉ាងណានៅក្នុងប្រទេសដាណឺម៉ាកគឺមានសេវាកម្មថ្មីដោយអាចខ្ចីមនុស្សមកសង្ខេបរឿងឱ្យអ្នកស្តាប់រយៈពេល ៣០ នាទីបាន ប្រសិនបើអ្នកខ្ចិលអាន ឬក៏អាចស្តាប់រឿងក្នុងចិត្តរបស់បុគ្គលនោះក៏បាន ឬក៏អាចចែករំលែកអំពីបទពិសោធន៍របស់អ្នកជាមួយពួកគេក៏បាន។

ជាឧទាហរណ៍ ប្រសិនបើអ្នកទៅនិយាយជាមួយនរណាម្នាក់នៅក្នុងបណ្ណាល័យនោះ អ្នកអាចឱ្យពួកគេនិយាយសង្ខេបរឿងសៀវភៅណាមួយដែលអ្នកចង់ដឹង ឬអាចចោតសួរពីបញ្ហាផ្ទាល់ខ្លួនផ្សេងៗក៏បាន ដែលនេះត្រូវបានគេហៅថា ‘បណ្ណាល័យមនុស្ស’ ដែលបង្កើតឡើងក្នុងគោលបំណងចែករំលែកចំណេះដឹង។ ដូច្នេះមានន័យថានៅ “បណ្ណាល័យមនុស្ស” មនុស្សអាចខ្ចីមនុស្ស ជំនួសឱ្យសៀវភៅ ដែលអាចសួរសំណួរអ្វីក៏បានតាមដែលពួកគេចង់បាន ដើម្បីយល់ដឹងកាន់តែច្បាស់អំពីអ្នកដ៏ទៃ និងដើម្បីប្រឆាំងនឹងការរើសអើងរបស់ខ្លួន។

គំនិតដ៏ប្លែកនេះត្រូវបានបង្កើតឡើងដោយអង្គការមិនស្វែងរកប្រាក់ចំណេញអន្តរជាតិតាំងពីឆ្នាំ ២០០០ មកម្លេះដែលមានមូលដ្ឋាននៅក្នុងរដ្ឋធានីនៃប្រទេសដាណឺម៉ាក ដោយបច្ចុប្បន្នបណ្ណាល័យមនុស្សបានប្រារព្ធព្រឹត្តិការណ៍នៅក្នុងប្រទេសជាង ៨០ នៅក្នុងបណ្ណាល័យ សារមន្ទីរ ពិធីបុណ្យ សន្និសីទ សាលារៀន និងសាកលវិទ្យាល័យ ដើម្បីផ្តល់ឱ្យមនុស្សនូវឱកាសក្នុងការវិនិច្ឆ័យអ្នកដទៃ។ គួរបញ្ជាក់ដែរថា បណ្ណាល័យមនុស្ស តម្រូវឱ្យអ្នកជ្រើសរើសសៀវភៅដែលអ្នកចូលចិត្ត ឬនិយាយអ្វីក៏បានជាមួយមនុស្សដែលជាបុគ្គលិកក្នុងបណ្ណាល័យនោះរយៈពេល ៣០ នាទី នៅពេលអ្នកស្តាប់រឿងរបស់បុគ្គលនោះហើយ អ្នកអាចសួរពួកគេនូវសំណួរគ្រប់ប្រភេទ។

បន្ថែមពីនេះបណ្ណាល័យមនុស្សក៏ជាកន្លែងសុវត្ថិភាពសម្រាប់ការសន្ទនា ដែលមនុស្សត្រូវបានលើកទឹកចិត្តឱ្យសួរអ្វីគ្រប់យ៉ាងដែលពួកគេចង់ដឹង។ ហេតុនេះហើយអ្នកមិនចាំបាច់ព្រួយបារម្ភថានៅពេលដែលអ្នកនិយាយរឿងអ្វីមួយប្រាប់អ្នកដទៃ រឿងនោះគឺគេរក្សាជាសម្ងាត់នឹងអាចដោះស្រាយបញ្ហាផ្លូវចិត្តអ្នកបានទៀតផង។ លើសពីនេះសៀវភៅរបស់បណ្ណាល័យមនុស្សភាគច្រើនគឺនិយាយអំពីក្រុមនៅក្នុងសង្គមដែលតស៊ូជាមួយនឹងការមាក់ងាយ និងការរើសអើង។ បណ្ណាល័យនេះក៏អនុញ្ញាតឱ្យមនុស្សស្វែងយល់បន្ថែមអំពីពួកគេ ហើយផ្តល់ឱ្យបុគ្គលម្នាក់ៗនូវឱកាសក្នុងការវិនិច្ឆ័យគ្នាទៅវិញទៅមក៕

តៃវ៉ាន់ ៖ អ្នកលេងបណ្តាញសង្គមតៃវ៉ាន់បានចែកចាយវីដេអូមួយគួរឱ្យភ័យខ្លា.ច គឺសត្វម្រើមព្រះរាប់សែនក្បាលបង្ហាញខ្លួនក្នុងពេលជាមួយគ្នា ពេលមើលទៅ ដូចជាទឹកទន្លេកំពុងតែហូរនៅតំបន់ព្រៃភ្នំ ។ អ្នកលេងបណ្តាញសង្គមសួរថា នៅសុខៗ សត្វជាច្រើនក្បាលបង្ហាញខ្លួនបែបនេះ តើប្រទេសជាតិនឹងកើតគ្រោះធម្មជាតិធ្ងន់ធ្ងរដែរឬទេ?

កាលពីថ្ងៃទី២៧ ខែមេសា ឆ្នាំ២០២៤ ភ្ញៀវទេសចរមួយក្រុមបាននាំគ្នាទៅកម្សាន្តនៅឧទ្យានជាតិ «សេវប៉ា» ស្ថិតនៅតំបន់កណ្តាលរបស់តៃវ៉ាន់ ប៉ុន្តែពួកគេបានប្រទះឃើញហ្វូងសត្វម្រើមព្រះរាប់សែនក្បាលធ្វើដំណើរពពាក់ពពូនគ្នានៅតំបន់ភ្នំ ។ រីឯមគ្គុទ្ទេសក៍ទេសចរដែលធ្វើការក្នុងឧទ្យានជាតិនិយាយថា ពុំធ្លាប់ឃើញហេតុការណ៍នេះពីមុនមកទេ ។

មគ្គុទ្ទេសក៍ទេសចរ លោក Yang Xiaozhong ដែលមានបទពិសោធន៍ធ្វើការក្នុងឧទ្យានជាតិ «សេវប៉ា» អស់រយៈពេល១១ឆ្នាំ រៀបរាប់ថា លោកបាននាំភ្ញៀវទេសចរ៧នាក់ ធ្វើដំណើរទៅភាគខាងលិចផ្លូវ Dalu Forest ។ ប៉ុន្តែក្នុងអំឡុងពេលធ្វើដំណើរ យើងបានឃើញសត្វម្រើមព្រះរាប់សែនក្បាលគរលើគ្នាដូចស្លឹកឈើងាប់ ។

ពីដំបូង លោកយល់ថា ជាស្លឹកឈើដែលត្រូវបានខ្យល់បោកបក់ធ្លាក់ចុះមក ប៉ុន្តែពេលពិនិត្យឱ្យច្បាស់ឃើញថា វាអាចកម្រើកបាន ហើយមិនមែនជាស្លឹកឈើងាប់ទេ ។ ប៉ុន្តែជាសត្វម្រើមព្រះរាប់សែនក្បាលកំពុងវារទៅរកទិសដៅតែមួយ គឺដូចគ្នានឹងទឹកទន្លេកំពុងហូរ ។

ពេលឃើញបែបនេះ លោកក៏ប្រញាប់យកទូរស័ព្ទមកថតវីដេអូភ្លាមៗ ព្រោះលោកផ្ទាល់ក៏ពុំធ្លាប់ឃើញហេតុការណ៍ចម្លែកបែបនេះពីមុនមកទេ តាំងពីលោកមកធ្វើការនៅឧទ្យានជាតិ ។ លោកបានផ្តល់សម្ភាសន៍ជាមួយសារព័ត៌មានថា កងទ័ពម្រើមព្រះបានវារជាក្បួនយ៉ាងវែងរហូតដល់៥០ម៉ែត្រ និងមានទទឹង៤ម៉ែត្រ ។

មគ្គុទ្ទេសក៍ទេសចររូបនេះរៀបរាប់បន្តថា ភ្ញៀវទេសចរទាំងអស់ឃើញហើយព្រឺសម្បុរយ៉ាងខ្លាំង ហើយភ្ញៀវទេសចរខ្លះទៀតស្រែកភ្ញាក់ផ្អើល បើទោះជាពួកគេឈរនៅឆ្ងាយពីហ្វូងម្រើមព្រះក្តី ។ ចុងក្រោយ ភ្ញៀវទេសចរទាំងអស់សុំដើរនៅលើផ្លូវក្រាលថ្មតែប៉ុណ្ណោះ ព្រោះខ្លាចជាន់ម្រើមព្រះ ។

មគ្គុទ្ទេសក៍ទេសចរទទួលស្គាល់ថា ពេលឃើញរូបភាពនេះហើយធ្វើឱ្យលោកគិតថា វាជាសញ្ញាប្រកាសអាសន្នពីគ្រោះថ្នាក់ធម្មជាតិធ្ងន់ធ្ងរកើតឡើង ខណៈមនុស្សផ្សេងទៀត ក៏គិតបែបនេះដែរ ។

ក្រោយពីវីដេអូហ្វូងម្រើមព្រះ ត្រូវបានចែកចាយច្រើនក្នុងបណ្តាញសង្គម អ្នកខ្លះបានទូរស័ព្ទសាកសួរទៅខាងឧទ្យានជាតិ «សេវប៉ា» ថា តើហេតុការណ៍នេះកើតឡើងញឹកញាប់ដែរឬទេ? ឬជាសញ្ញាប្រាប់ថា តៃវ៉ាន់នឹងកើតគ្រោះរញ្ជួយដីធ្ងន់ធ្ងរ ។ មនុស្សជាច្រើនជឿថា សត្វល្អិតបានដឹងមុនថា នឹងមានហេតុការណ៍អ្វីកើតឡើង ទើបវានាំគ្នាបម្លាស់ទី ។

ចំណែកបុគ្គលិកឧទ្យានជាតិ «សេវប៉ា» បញ្ជាក់ថា ការបម្លាស់ទីរបស់ហ្វូងម្រើមព្រះកើតឡើងតាមធម្មជាតិ គឺអាចបណ្តាលមកពីកត្តាបរិស្ថាន ឬការផ្លាស់ប្តូរអាកាសធាតុ ។ ឧទ្យានជាតិក៏សូមអភ័យទោសផងដែរ ដែលបុគ្គលិកឧទ្យានជាតិយកវីដេអូនេះទៅបង្ហោះក្នុងបណ្តាញសង្គមបណ្តាលឱ្យមហាជនភ្ញាក់ផ្អើល ហើយឧទ្យានជាតិនឹងមិនឱ្យមានហេតុការណ៍នេះកើតឡើងទៀតទេ នាថ្ងៃអនាគត ៕

បរទេស៖ ទូរស័ព្ទ iPhone 15 Pro Max របស់ Apple គឺជាស្មាតហ្វូនដែលលក់ដាច់ជាងគេបំផុតនៅទូទាំងពិភពលោកក្នុងត្រីមាសទីមួយនៃឆ្នាំ ២០២៤ នេះបើយោងតាមស្ថិតិដែលចេញផ្សាយដោយក្រុមហ៊ុនស្រាវជ្រាវទីផ្សារ Counterpoint Research កាលពីថ្ងៃទី៦ ខែឧសភា។ យោងតាមស្ថិតិនេះអ្នកវិភាគបានប៉ាន់ប្រមាណថាម៉ូដែល iPhone ស៊េរីខ្ពស់បំផុតរបស់ក្រុមហ៊ុន Apple គឺ iPhone 15 Pro Max មានចំនួន ៤.៤% នៃចំណែកទីផ្សារស្មាតហ្វូនពិភពលោកក្នុងរយៈពេលបីខែដំបូងនៃឆ្នាំនេះ។ ដូច្នេះយោងតាម Counterpoint នេះជាលើកដំបូងហើយដែលម៉ូដែល Apple Pro Max ទទួលបានតំណែងដ៏កំពូលនេះនៅក្នុងត្រីមាសទីមួយនៃឆ្នាំ ២០២៤។

ចំណែកឯមុខតំណែងបីបន្ទាប់ទៀតក៏ជារបស់ Apple ដែរដូចជា iPhone 15 មានចំណែកទីផ្សារ ៤.៣%, iPhone 15 Pro (៣.៧%),និង iPhone 14 (១.៩%)។ នេះត្រូវបានគេចាត់ទុកថាជារដូវកាលបិទវគ្គរបស់ Apple នៅពេលដែលអ្នកប្រើមានទំនោរចង់ទិញ iPhone ដែលមានតម្លៃថោក។ ជាឧទាហរណ៍ កាលពីឆ្នាំមុន iPhone 14 ក៏ជាផលិតផលឈានមុខគេដែលមានចំណែកទីផ្សារ ៤.៧%។ អ្នកជំនាញ Counterpoint បានសន្និដ្ឋានថា “នេះឆ្លុះបញ្ចាំងពីនិន្នាការកើនឡើងនៃអ្នកប្រើប្រាស់ដែលចូលចិត្តទូរស័ព្ទទំនើប” និន្នាការនេះក៏ជាការពិតសម្រាប់ Samsung ផងដែរ ។

កាលពីឆ្នាំមុន ទូរស័ព្ទដែលលក់ដាច់បំផុតរបស់ក្រុមហ៊ុនក្នុងអំឡុងពេលនោះគឺម៉ូដែល Galaxy A13 នៅក្នុងផ្នែកដ៏ពេញនិយម ជាមួយនឹងការលក់ខ្ពស់ជាង S23 Ultra មួយដងកន្លះ ខណៈដែលឆ្នាំនេះ តំណែងនេះជារបស់ S24 Ultra។ យោងតាមអ្នកជំនាញ អ្នកប្រើប្រាស់សុខចិត្តចំណាយច្រើនសម្រាប់មុខងារពិសេស នៅលើ iPhone ស៊េរី Pro ដោយសារវាមានការកែលម្អទៅលើអេក្រង់ Dynamic Island, បន្ទះឈីបកម្រិតខ្ពស់, ស៊ុមទីតាញ៉ូម និងកាមេរ៉ា telephoto ខណៈដែលស៊េរី S24 Ultra ក៏មានការរចនាថ្មី សម្ភារៈ និងការរួមបញ្ចូល AI សិប្បនិម្មិត។

លើសពីនេះ ស្មាតហ្វូនលែងបង្កើតភាពខុសប្លែកគ្នាខ្លាំងពេកនៅក្នុងលក្ខណៈពិសេសបន្ទាប់ពីជំនាន់នីមួយៗ។ អ្នកប្រើប្រាស់កាត់បន្ថយតម្រូវការក្នុងការអាប់ដេតទៅឧបករណ៍ថ្មី ដូច្នេះពួកគេតែងតែជ្រើសរើសទូរសព្ទទំនើបដែលអាចប្រើបានយូរ។ យោងតាមស្ថិតិ Counterpoint ក៏បានបង្ហាញផងដែរថា ទីផ្សារស្មាតហ្វូនកំពុងរីកចម្រើន ដោយការលក់បានកើនឡើង ៦% ធៀបនឹងរយៈពេលដូចគ្នាកាលពីឆ្នាំមុន ដែលឈានដល់ ២៩៦.៩ លានគ្រឿង។ ដោយក្រុមហ៊ុន Apple លក់ផលិតផលលំដាប់ខ្ពស់បានល្អ ប៉ុន្តែនៅតែប្រឈមនឹងការលំបាកនៅពេលចំណូលសរុបធ្លាក់ចុះ ១១%។ នៅក្នុងរបាយការណ៍ហិរញ្ញវត្ថុរបស់ខ្លួនកាលពីថ្ងៃទី ២ ខែឧសភា ក្រុមហ៊ុនក៏បានទទួលស្គាល់ផងដែរថា ប្រាក់ចំណូលរបស់ iPhone បានកើនឡើងដល់ ៤៦ ពាន់លានដុល្លារ ដោយធ្លាក់ចុះត្រឹមតែ ១០% ប៉ុណ្ណោះ៕

ប្រទេសចិន ៖ ជាទូទៅ តូបលក់ទំនិញនានាបានសាងសង់ឡើងនៅកន្លែងមានសុវត្ថិភាព និងទីប្រជុំជន ដើម្បីឱ្យអតិថិជនងាយស្រួលចូលទិញ ។ ប៉ុន្តែតូបលក់ទំនិញមួយកន្លែងស្ថិតនៅតំបន់ឧទ្យានជាតិ Shiniuzhai ខេត្តហ៊ូណាន ប្រទេសចិន បែរជាសាងសង់ឡើងនៅលើច្រាំងថ្មចោទខ្លាំង និងមានគ្រោះថ្នា.ក់ ទៅវិញ ។ បុគ្គលិកលក់ទំនិញនិយាយថា ការដឹកជញ្ជូនទំនិញមកកាន់ទីនេះមិនងាយស្រួលឡើយ ហើយត្រូវការភាពអត់ធ្មត់ខ្លាំង សូម្បីតែចូលបន្ទប់ទឹក ។

អ្នកដែលបានឃើញរូបភាពតូបលក់ទំនិញភ្ញាក់ផ្អើលគ្រប់ៗគ្នា ព្រោះតូបនេះត្រូវបានសាងសង់ឡើងនៅលើច្រាំងថ្មចោទខ្លាំង និងមានកម្ពស់ខ្ពស់ពីដីរហូតដល់១២០ម៉ែត្រ ។ បើអ្នកណាម្នាក់ចង់ទិញទំនិញ ដូចជា ៖ ទឹកបរិសុទ្ធ ពួកគេត្រូវតែចេះសម្រាលខ្លួន និងប្រើប្រាស់ខ្សែពួរយ៉ាងស្ទាត់ជំនាញ បើពុំដូច្នោះទេ មុខជាធ្លាក់ដីស្លាប់ពុំខាន ។ មនុស្សភាគច្រើននិយាយថា វាពិតជាគ្រោះថ្នាក់ខ្លាំងណាស់ទម្រាំទិញបានទំនិញណាមួយ ខណៈអ្នកខ្លះទៀតថា សុខចិត្តទៅទិញកន្លែងផ្សេងវិញ ។

តូបលក់ទំនិញស្ថិតនៅកន្លែងគ្រោះថ្នាក់នេះ បានបើកដំណើរតាំងពីឆ្នាំ២០១៨ មកម៉្លេះ ដើម្បីសម្រួលដល់ភ្ញៀវទេសចរឡើងភ្នំ ។ តូបនេះសាងសង់ឡើងពីក្តារឈើបន្ទះ និងមានសសរដែកទ្រពីក្រោម ទើបធ្វើឱ្យវាមានទម្ងន់ស្រាល មិនបំផ្លាញច្រាំងភ្នំ និងធម្មជាតិ ។ រីឯអ្នកមើលការខុសត្រូវក្នុងតូបមានតែម្នាក់ប៉ុណ្ណោះ ព្រោះវាមិនអាចទ្រាំទ្រនឹងទម្ងន់ធ្ងន់បានទេ ។

នៅផ្នែកខាងក្នុងរបស់តូបមានបំពាក់ឧបករណ៍ការពារទំនិញធ្លាក់ ដើម្បីធានាថា តូបនេះនៅជាប់នឹងច្រាំងថ្មមិនងាយធ្លាក់ទៅក្រោម ។ បុគ្គលិកលក់ទំនិញនិយាយថា ដើម្បីសុវត្ថិភាព តូបនេះនឹងបិទនៅថ្ងៃមានភ្លៀងធ្លាក់ ដើម្បីចៀសវាងការរអិលធ្លាក់បណ្តាលឱ្យមានគ្រោះថ្នាក់ ហើយអតិថិជនមកទិញ មិនមែនជាអ្នកមកពីចម្ងាយទេ គឺជាភ្ញៀវទេសចរឡើងភ្នំ ។

តូបនេះមានលក់ទឹកបរិសុទ្ធ និងនំចំណីផ្សេងៗ ដែលអតិថិជនអាចទូទាត់ជាប្រាក់សុទ្ធ ឬស្កេន QR Code ។ បុគ្គលិកមានតួនាទីដឹកជញ្ជូនទំនិញទាំងអស់មកកាន់ទីនេះ ហើយត្រូវផឹកទឹកតិចៗ ដើម្បីកុំឱ្យពិបាកចុះច្រាំងថ្មមកចូលបន្ទប់ទឹកនៅផ្នែកខាងក្រោម ។ លើសពីនេះ ត្រូវរង់ចាំរហូតដល់ភ្ញៀវទេសចរត្រឡប់ទៅវិញអស់ ទើបអាចបិទតូបបាន ។

បុគ្គលិកលក់ទំនិញត្រូវត្រួតពិនិត្យការឡើង-ចុះភ្នំ និងឧបសគ្គផ្សេងៗរបស់ភ្ញៀវទេសចរផងដែរ ។ រីតម្លៃទំនិញក្នុងតូប គឺមានតម្លៃដូចគ្នានឹងហាងផ្សេងទៀត ដូចជា ៖ ទឹកបរិសុទ្ធមានជាតិរ៉ែ ១ដបមានតម្លៃ២យាន់ (ឬស្មើប្រមាណ១.០០០រៀល) ។

ក្រៅពីនេះ បើមានភ្ញៀវទេសចរណាត្រូវការជំនួយ គឺបុគ្គលិកលក់ទំនិញមានតួនាទីជួយសង្គ្រោះភ្ញៀវទេសចរ ហើយការលក់ទំនិញផ្សេងៗ គឺពុំចង់បានប្រាក់ចំណេញពីភ្ញៀវទេសចរទេ ។ ប៉ុន្តែវាដូចជាស្ថានីយចាក់ប្រេងមួយដែលមានហាងលក់នំចំណី ដើម្បីបំពេញថាមពលឱ្យភ្ញៀវទេសចរបាត់នឿយហត់ក្នុងអំឡុងពេលឡើងភ្នំ ។

ភ្ញៀវទេសចរមកកម្សាន្តនៅឧទ្យានជាតិ Shiniuzhai បានអរគុណដល់តូបលក់ទំនិញខាងលើ ដោយសារពួកគេអាចសម្រាកពីការហត់នឿយ ។ វាធ្វើឱ្យបុគ្គលិកលក់ទំនិញមានកម្លាំងចិត្ត និងមានអារម្មណ៍ថា នេះជាការងារដ៏មានអត្ថន័យ ហើយនឹងប្រឹងប្រែងបំពេញការងារឱ្យល្អបំផុត ៕

ប្រទេសចិន ៖ តួនាទីអ្នកត្រួតពិនិត្យគុណភាពទ្វារកំពុងទទួលបានការចាប់អារម្មណ៍ខ្លាំងក្នុងបណ្តាញសង្គមប្រទេសចិន ក្រោយពីយុវជនម្នាក់បង្ហាញការងាររបស់ខ្លួនដែលត្រូវធ្វើជារៀងរាល់ថ្ងៃ គឺការងារធាក់ទ្វារក្នុងរោងចក្រ និងទទួលបានប្រាក់ខែរហូតដល់៧០០ដុល្លារអាមេរិកក្នុង១ខែ ។ មហាជនសួរថា តើមានការងារបែបនេះដែរ មែនទេ គ្រាន់តែលោតធាក់ទ្វារសោះ ប៉ុន្តែទទួលបានប្រាក់ខែខ្ពស់ ។

យុវជននេះឈ្មោះ ចូវ អាយុ២៤ឆ្នាំ មានតួនាទីជាបុគ្គលិកត្រួតពិនិត្យគុណភាពទ្វារក្នុងរោងចក្រផលិតទ្វារមួយកន្លែងនៅខេត្ត Zhejiang ។ ជារៀងរាល់ថ្ងៃ លោក ចូវ បានដើរត្រួតពិនិត្យគុណភាពទ្វារក្នុងរោងចក្រ ដោយការលោតធាក់ទ្វារទាំងអស់ ព្រមទាំងរាយការណ៍ពីហេតុការណ៍ប្រចាំថ្ងៃដែលបណ្តាលឱ្យខូចខាតទ្វារផងដែរ ដូចជា ៖ ក្មេងធាក់ទ្វារ, ជម្លោះក្នុងគ្រួសារ និងបញ្ហាផ្សេងៗបណ្តាលឱ្យខូចខាតទ្វារ ដើម្បីសាកល្បងពីភាពធន់ និងសុវត្ថិភាពទ្វារ ។

ក្រោយពីធ្វើការងារធាក់ទ្វាររួចហើយ លោក ចូវ មានតួនាទីត្រួតពិនិត្យការខូចខាតទ្វារ ដូចជា ៖ របកថ្នាំពណ៌ និងផ្នែកផ្សេងៗរបស់ទ្វារថា វានៅមានសភាពល្អដូចដើមដែរឬទេ? បន្ទាប់មក លោកនឹងកត់ត្រាទិន្នន័យទាំងអស់បញ្ចូលក្នុងប្រព័ន្ធអនឡាញ ។

លោក ចូវ និយាយថា កាលពីមុន លោកធ្វើការជាអ្នករចនាម៉ូដនៅក្រុមហ៊ុនមួយ ប៉ុន្តែកន្លែងធ្វើការនៅឆ្ងាយពីផ្ទះពេក ទើបលោកសម្រេចចិត្តមកធ្វើការជាភ្នាក់ងារត្រួតពិនិត្យគុណភាពទ្វារក្នុងរោងចក្រនេះ ។ រីឯប្រាក់ខែរបស់លោក គឺស្មើប្រមាណ៧០០ដុល្លារអាមេរិកក្នុង១ខែ បូករួមទាំងប្រាក់សន្តិសុខសង្គម និងបាយថ្ងៃត្រង់ ហើយលោកឈប់សម្រាក២ថ្ងៃក្នុង១សប្តាហ៍ ។

ក្រោយពីការងាររបស់លោក ចូវ ល្បីល្បាញក្នុងបណ្តាញសង្គម វាធ្វើឱ្យមហាជនចាប់អារម្មណ៍យ៉ាងខ្លាំង ។ មនុស្សមួយចំនួននិយាយថា វាជាការងារល្អណាស់ ព្រោះបានហាត់ប្រាណ និងកាត់បន្ថយភាពតានតឹង ថែមទាំងទទួលបានប្រាក់ខែខ្ពស់ និងបាយថ្ងៃត្រង់មិនគិតថ្លៃ ។ ប៉ុន្តែមនុស្សខ្លះទៀតគិតថា ការលោតធាក់ទ្វារពេញមួយថ្ងៃបែបនេះអាចធ្វើឱ្យខូចកជើង និងមិនរួចថ្លៃព្យាបាលជំងឺនាថ្ងៃអនាគតទេ ៕

ប្រទេសថៃ ៖ កាលពីថ្ងៃទី៦ ខែឧសភា ឆ្នាំ២០២៤ សារព័ត៌មានថៃរាយការណ៍ថា នៅក្នុងយន្តហោះហើយ អ្នកដំណើរក៏នៅតែបែកញើសជោគខ្លួនដែរ ។ តាមការរៀបរាប់លម្អិតនៅលើបណ្តាញសង្គមបានបញ្ជាក់ឱ្យដឹងថា យន្តហោះរបស់ក្រុមហ៊ុនអាកាសចរណ៍ដ៏ល្បីមួយគ្រោងធ្វើដំណើរចេញពីអាកាសយានដ្ឋានដនមឿង ទីក្រុងបាងកក ទៅកាន់ទីក្រុងហាតយ៉ៃ ក៏មានបញ្ហាម៉ាស៊ីនយន្តហោះមិនដំណើរការនៅមុនពេលហោះហើរ ។ ក្រុមហ៊ុននេះបានបណ្តោយឱ្យអ្នកដំណើរអង្គុយរង់ចាំនៅក្នុងយន្តហោះរហូតដល់បែកញើសជោគខ្លួន ខណៈយន្តហោះនេះចតនៅក្រោមកំដៅថ្ងៃក្តៅ ។

ក្រោយពីយន្តហោះមានបញ្ហា អ្នកដំណើរទាំងអស់នាំគ្នាបក់ផ្លិត និងរអ៊ូរទាំថា ពួកគេមិនអាចស៊ូទ្រាំបន្តទៀតទេ ខណៈពួកគេបានអង្គុយរង់ចាំយន្តហោះចេញដំណើររហូតដល់បើកញើសជោគខ្លួនក្នុងអំឡុងពេលអាកាសធាតុក្តៅខ្លាំង ។ យន្តហោះពុំអាចហោះឡើងលើរហូតដល់ទៅ២ដង ហើយឱ្យអ្នកដំណើរដែលអង្គុយនៅក្នុងយន្តហោះនេះគ្មានម៉ាស៊ីនត្រជាក់ និងគ្មានខ្យល់ដកដង្ហើមអស់ជាច្រើនម៉ោង ។

បើទោះជាបុគ្គលិកបម្រើការក្នុងយន្តហោះប្រកាសថា ការធ្វើដំណើរមានសុវត្ថិភាព និងសូមឱ្យអ្នកដំណើរកុំបារម្ភ ប៉ុន្តែអ្នកដំណើរទាំងអស់ចាប់ផ្តើមរអ៊ូរទាំរឿងគ្មានខ្យល់ដកដង្ហើម និងចង់ចុះពីយន្តហោះ ។ នៅទីបំផុត យន្តហោះបានពន្យារពេលហោះហើររហូតដល់ជាង៥ម៉ោង ទម្រាំបានចេញដំណើរ ។

នារីអ្នកដំណើរម្នាក់និយាយថា យន្តហោះមានបញ្ហាដាច់ចរន្តអគ្គិសនី ហើយខាងក្រុមហ៊ុនបានជូនដំណឹងម្តងហើយម្តងទៀតឱ្យអ្នកដំណើររង់ចាំ និងរក្សាភាពស្ងៀមស្ងាត់ ប៉ុន្តែក្នុងយន្តហោះក្តៅខ្លាំងណាស់ ព្រោះចតនៅកណ្តាលថ្ងៃរាប់ម៉ោង ។ នាងយល់ពីស្ថានការណ៍នេះ ប៉ុន្តែចង់ឱ្យខាងក្រុមហ៊ុនប្រាប់ការពិតឱ្យអ្នកដំណើរជ្រាប ល្អជាងពន្យារពេលហោះហើរជាបន្តបន្ទាប់ ។ ក្រុមហ៊ុនគួរតែផ្តល់សំណងដល់អ្នកដំណើរឱ្យសមរម្យ ល្អជាងការចែកនំដូណាត់១ដុំ និងទឹកបរិសុទ្ធ១ដបឱ្យអ្នកដំណើរ ។

ដោយឡែក ក្រុមសារព័ត៌មាន Thai PBS បានទទួលសេចក្តីរាយការណ៍ពីសាច់ញាតិអ្នកដំណើរម្នាក់ទៀតថា នៅថ្ងៃដដែល (ថ្ងៃទី៤ ខែឧសភា ឆ្នាំ២០២៤) ថា យន្តហោះធ្វើដំណើរពីទីក្រុងបាងកក ទៅខេត្តភូកេត ក៏បានពន្យារពេលហោះហើរដូចគ្នាដែរ ហើយជាក្រុមហ៊ុនអាកាសចរណ៍តែមួយ ។

អ្នកដំណើរម្នាក់ឱ្យដឹងថា មុនពេលហោះហើរ ស្រាប់តែម៉ាស៊ីនយន្តហោះរលត់បណ្តាលឱ្យម៉ាស៊ីនត្រជាក់ពុំដំណើរការ ហើយរហូតដល់ម៉ោង១២យប់ ទើបយន្តហោះចេញដំណើរ ។ អ្នកដំណើររូបនេះបន្តថា ខ្លួនខឹងខ្លាំង ព្រោះតាមគម្រោង គឺយន្តហោះនឹងទៅដល់ខេត្តភូកេតនៅម៉ោង៧យប់ ប៉ុន្តែដោយសារមានបញ្ហា យន្តហោះមកដល់ខេត្តភូកេតម៉ោង១យប់ ។

ក្រុមហ៊ុនអាកាសចរណ៍ Nok Air បានបញ្ជាក់ពីករណីជើងហោះហើរ DD506 ពីអាកាសយានដ្ឋានដងមឿង (ក្រុងបាងកក) ទៅទីក្រុងហាតយ៉ៃ និងជើងហោះហើរ DD5340 ពីអាកាសយានដ្ឋានដងមឿង (ក្រុងបាងកក) ទៅខេត្តភូកេត នៅថ្ងៃទី៤ ខែឧសភា ឆ្នាំ២០២៤ ថា ពេលយន្តហោះត្រៀមហោះហើរ អ្នកបើកយន្តហោះបានជូនដំណឹងមកក្រុមហ៊ុនអាកាសចរណ៍ថា មានបញ្ហាបច្ចេកទេសមួយចំនួន ទើបយន្តហោះត្រូវត្រួតពិនិត្យ និងឱ្យភ្នាក់ងារនាំអ្នកដំណើរចុះពីយន្តហោះ ។ ក្រោយពីក្រុមបច្ចេកទេសបានត្រួតពិនិត្យ និងដោះស្រាយបញ្ហារួចរាល់ហើយ យន្តហោះក៏បានធ្វើដំណើរទៅដល់គោលដៅដោយសុវត្ថិភាព ៕