ចាប់ពីពាក់កណ្ដាលខែឧសភា ឆ្នាំ២០២៤នេះ កងទ័ពកម្ពុជា និងចិន នឹងចាប់ផ្តើមធ្វើសមយុទ្ធយោធា “នាគមាស” ដែលជាសមយុទ្ធប្រចាំឆ្នាំរវាងប្រទេសទាំងពីរ។
អ្នកនាំពាក្យក្រសួងការពារជាតិ លោក ឈុំ សុជាត ប្រាប់សារព័ត៌មានក្នុងស្រុកកាលពីថ្ងៃទី២ ខែឧសភាថា៖” កងទ័ពកម្ពុជា និងចិន កំពុងរៀបចំត្រៀមធ្វើសមយុទ្ធយោធា “នាគមាស” រួមគ្នា ប្រចាំឆ្នាំ តែលោកមិនទាន់អាចបញ្ជាក់ពីកាលបរិច្ឆេទជាក់លាក់ និងខ្លឹមសារនៃគម្រោងសមយុទ្ធនោះនៅឡើយទេ”។
គួរបញ្ជាក់ថា កម្ពុជាបានធ្វើសមយុទ្ធយោធាជាមួយកងទ័ពចិនចំនួន ៦ដងរួចមកហើយចាប់តាំងពីឆ្នាំ២០១៦ ដោយលើកចុងក្រោយកាលពីឆ្នាំ២០២៣ សមយុទ្ធយោធា “នាគមាស” ធ្វើឡើងស្ថិតនៅបរិវេណភ្នំជុំរីករាយ ខេត្តកំពង់ឆ្នាំង ចិនបានបញ្ជូនអាវុធយុទ្ធភណ្ឌធុនធ្ងន់ និងកងទ័ពជាង ២០០នាក់មកកម្ពុជា ដោយផ្ដោតសំខាន់ ពង្រឹងសមត្ថភាពកងទ័ពកម្ពុជា រក្សាសន្តិសុខ និងជួយសង្គ្រោះពលរដ្ឋពីគ្រោះធម្មជាតិផ្សេងៗ៕
