សហរដ្ឋអាមេរិក ៖ បុរសចំណាស់ម្នាក់ អាយុ៧០ឆ្នាំ រស់នៅសហរដ្ឋអាមេរិក សុខចិត្តចំណាយប្រាក់ប្រមាណជាង៤០០ដុល្លារអាមេរិកក្នុង១សប្តាហ៍ ដើម្បីជួលផ្ទាំងប៉ាណូនៅតាមផ្លូវប្រកាសស្វែងរកគូស្រករ ។ លោកបញ្ជាក់ថា លោករស់នៅម្នាក់ឯងយូរឆ្នាំហើយ លោកចង់ស្វែងរកនារីល្អម្នាក់ចេះយល់ចិត្ត យល់ថ្លើម និងពុំសម្លឹងមើលទ្រព្យសម្បត្តិ ។

សារព័ត៌មានបរទេស nypost រាយការណ៍ថា បុរសចំណាស់ខាងលើឈ្មោះ Al Gilberti អាយុ៧០ឆ្នាំ ជាបុរសពោះម៉ាយកូន១ រស់នៅរដ្ឋតិចសាស់ សហរដ្ឋអាមេរិក បានចំណាយប្រាក់ជាង៤០០ដុល្លារអាមេរិកក្នុង១សប្តាហ៍ ដើម្បីជួលផ្ទាំងប៉ាណូនៅតាមផ្លូវឱ្យផ្សព្វផ្សាយពីខ្លួនលោក ។

ការចំណាយប្រាក់ជួលផ្ទាំងប៉ាណូនេះ ទទួលបានការចាប់អារម្មណ៍យ៉ាងខ្លាំងពីសំណាក់មហាជន ហើយតាំងពីលោកផ្សព្វផ្សាយពីខ្លួនលោកនៅលើផ្ទាំងប៉ាណូមក លោកបានទទួលទូរស័ព្ទរហូតដល់ជាង៤០០លើក និងអ៊ីម៉ែល៥០លើក ក្នុងរយៈពេលត្រឹមតែ២សប្តាហ៍ប៉ុណ្ណោះ ។ មនុស្សភាគច្រើនដែលទូរស័ព្ទមករកលោក គឺពួកគេប្រាថ្នាចង់បានទ្រព្យសម្បត្តិ និងផលប្រយោជន៍ផ្សេងៗ ប៉ុន្តែលោកនៅតែសង្ឃឹមថា នឹងបានជួបនារីល្អណាម្នាក់នាពេលឆាប់ៗនេះ ។

លោក Al Gilberti និយាយថា លោកចង់បាននារីម្នាក់មានភាពស្មោះត្រង់ និងច្បាស់លាស់ចង់រស់នៅជាមួយលោក ហើយលោកនឹងផ្លាស់ទីលំនៅទៅកន្លែងណាក៏បាននៅអាមេរិក ដើម្បីស្វែងរកនារីក្នុងក្តីសុបិន ។ លើសពីនេះ លោកអាចធ្វើដំណើរទៅប្រទេសអង់គ្លេសផងដែរ បើលោករកឃើញស្នេហ៍ពិត ។

កាលពីមុន លោក Al Gilberti ធ្លាប់ធ្វើការជាអ្នកផ្សព្វផ្សាយឱ្យក្រុមតន្ត្រីមកពី Burlington នៅរដ្ឋ Vermont ហើយបច្ចុប្បន្ន ការចាយវាយប្រចាំថ្ងៃរបស់លោក គឺបានពីប្រាក់ចូលនិវត្តន៍ ។ រីឯគុណសម្បត្តិវិញ គឺលោកជាមនុស្សមានចិត្តទូលាយ និងជាអ្នកស្តាប់ដ៏ល្អ ។

លោកនិយាយថា ៖ «ខ្ញុំបានទទួលប្រាក់ចូលនិវត្តន៍, មានរូបរាងសង្ហា ហើយខ្ញុំមិនគិតពីអាយុទេ ។ ខ្ញុំជាមនុស្សចិត្តទូលាយ ខណៈមនុស្សចាស់ភាគច្រើនមានចិត្តចង្អៀតចង្អល់ តែខ្ញុំមិនមែនជាមនុស្សបែបនោះទេ ។ ខ្ញុំរស់នៅម្នាក់ឯងតាំងពីឆ្នាំ២០១៥ មកម៉្លេះ ខ្ញុំរីករាយនឹងទទួលយកនារីមានអាយុតិចជាងមកធ្វើជាភរិយា» ៕

ប្រទេសចិន៖ ជាមួយនឹងការងារត្រឹមតែ ២ ម៉ោងនៃគម្រោងធ្វើឱ្យប្រសើរឡើងនូវស្ពាន និងការសម្របសម្រួលពីអ្នកបច្ចេកទេស ៤០ នាក់និងគ្រឿងចក្រទំនើបៗជាច្រើន ប្រអប់ដែកនៅផ្នែកខាងឆ្វេងនៃស្ពានមានប្រវែង ៣២.៩៤ ម៉ែត្រ និងទម្ងន់ ២១៨.៤ តោន ត្រូវបានដាក់ក្នុងទីតាំងរចនាដើមយ៉ាងត្រឹមត្រូវបំផុត។
ស្ពាន Harbin West ត្រូវបានសាងសង់រួចរាល់ហើយកាលពីឆ្នាំ ១៩៨៩ ដែលបម្រើជាស្ពានឆ្លងកាត់ក្រុងដ៏សំខាន់មួយសម្រាប់ផ្លូវដែក Harbin-Suifenhe ដែលមានរចនាសម្ព័ន្ធបីជាន់៖ ខាងលើ ផ្លូវថ្នល់គឺជាផ្លូវចាស់បំផុតនៅភាគខាងលិចនៃទីក្រុង Harbin ដែលត្រូវបានគេស្គាល់ថា “Xidazhi Avenue” ; ខាងក្រោម ខ្សែបូព៌ាជាប្រវត្តិសាស្ត្រនៃផ្លូវដែក Harbin-Suifenhe បានដំណើរការអស់រយៈពេលជាង ១២០ ឆ្នាំមកហើយ។

ក្រោយមកផ្នែកទីមួយនៃខ្សែរថភ្លើង Harbin Metro Line 1 ឆ្លងកាត់ក្រោមស្ពានត្រូវបានខូចខាតដោយសារវាចាស់ពេក ហើយត្រូវបានគេជួសជុលប៉ុន្តែការជួសជុលស្ពានចាស់ឱ្យក្លាយជាស្ពានថ្មីនេះចំណាយពេលត្រឹមតែ ២ ម៉ោងប៉ុណ្ណោះ។ លោក He Ruiping ដែលជាប្រធានអ្នករចនាគម្រោងធ្វើឱ្យប្រសើរឡើងនូវស្ពាន Harbin West Bridge បាននិយាយថា នៅម៉ោង ២ រសៀលនាថ្ងៃទី ២៩ ខែមេសា ឆ្នាំ២០២៤ នេះគម្រោងធ្វើឱ្យប្រសើរឡើងនូវស្ពាន Harbin West ក្នុងប្រទេសចិនបានឈានដល់ដំណាក់កាលជួសជុលដ៏សំខាន់មួយ។ នេះជាផ្នែកមួយនៃផែនការកែលម្អហេដ្ឋារចនាម្ព័ន្ធក្នុងការត្រៀមខ្លួនសម្រាប់ព្រឹត្តិការណ៍ Asian Winter Games ឆ្នាំ ២០២៤ នៅទីក្រុងនេះ។

ជាមួយនឹងការងារត្រឹមតែ ២ ម៉ោង និងការសម្របសម្រួលពីអ្នកបច្ចេកទេស ៤០ នាក់ និងគ្រឿងចក្រទំនើបៗ ប្រអប់ដែកនៅផ្នែកខាងឆ្វេងនៃស្ពានមានប្រវែង ៣២.៩៤ ម៉ែត្រ និងទម្ងន់ ២១៨.៤ តោន ត្រូវបានដាក់ក្នុងទីតាំងត្រឹមត្រូវតាមការរចនាដើមជាមួយនឹងភាពជាក់លាក់ដ៏អស្ចារ្យ។ លោក He Ruiping បានបន្តទៀតថា ទោះជាយ៉ាងណាការរចនាដើមនៃស្ពាននេះលែងបំពេញតាមស្តង់ដារ និងលក្ខណៈបច្ចេកទេសបុរាណទៀតហើយ។ ដោយយោងទៅលើស្តង់ដារ និងទិន្នន័យនៃការរចនាស្ពានចាប់ពីឆ្នាំ ១៩៨៥ មក ក្រុមអ្នករចនាបានប្រើប្រាស់ស្តង់ដារ និងបច្ចេកទេសថ្មី ដើម្បីជំនួសស្ពានចាស់យ៉ាងឆាប់រហ័ស ដោយកាត់បន្ថយផលប៉ះពាល់សំណង់លើផ្លូវដែក និងចរាចរណ៍។

នេះជាគំរូជាក់ស្តែងសម្រាប់ការប្រែក្លាយស្ពានផ្លូវរថភ្លើងចាស់ប្រសព្វផ្លូវក្នុងទីក្រុងធំៗរបស់ប្រទេសចិនដែលមានប្រជាជនរាប់លាននាក់។ គួរបញ្ជាក់ដែរថា ស្ពាននេះត្រូវបានគេរំពឹងថានឹងរួចរាល់សម្រាប់ចរាចរណ៍នៅពាក់កណ្តាលខែឧសភា ដែលបង្កើនសមត្ថភាពចរាចរណ៍នៃសរសៃឈាមកណ្តាលទីក្រុងយ៉ាងសំខាន់។ ការអភិវឌ្ឍន៍នេះនឹងផ្តល់នូវលក្ខខណ្ឌធ្វើដំណើរប្រសើរឡើងសម្រាប់ពិព័រណ៍សេដ្ឋកិច្ច និងពាណិជ្ជកម្មអន្តរជាតិ Harbin នាពេលខាងមុខ និងព្រឹត្តិការណ៍ Asian Winter Games ឆ្នាំ ២០២៥៕

ប្រទេសមីយ៉ាន់ម៉ា ៖ កាលពីថ្ងៃទី២ ខែឧសភា ឆ្នាំ២០២៤ សារព័ត៌មានបរទេសរាយការណ៍ថា អាកាសធាតុក្តៅខ្លាំងអស់រយៈពេលជាច្រើនថ្ងៃបានធ្វើឱ្យពលរដ្ឋមីយ៉ាន់ម៉ាស្លា.ប់ រហូតដល់៤០នាក់ក្នុង១ថ្ងៃ ហើយក្នុងខែមេសាមួយប៉ុណ្ណោះ មានពលរដ្ឋស្លា.ប់ សរុបដោយសារអាកាសធាតុក្តៅស្មើនឹង១.៤៧៣នាក់ ។

សីតុណ្ហភាពកើនឡើងខ្ពស់នៅតំបន់អាស៊ីអាគ្នេយ៍ ជាពិសេស ប្រទេសមីយ៉ាន់ម៉ា បានធ្វើឱ្យពលរដ្ឋមីយ៉ាន់ម៉ាស្លាប់ជាមធ្យមចំនួន៤០នាក់ក្នុង១ថ្ងៃ ចាប់ពីពាក់កណ្តាលខែមីនា ឆ្នាំ២០២៤ ។ បើតាមតួលេខរបស់មន្ត្រីសុខាភិបាល និងស្ថាប័នរៀបចំបុណ្យសពបង្ហាញថា នៅខែមេសាមួយប៉ុណ្ណោះ មានមនុស្សស្លាប់ដោយសារអាកាសធាតុក្តៅខ្លាំង យ៉ាងហោចណាស់ ១.៤៧៣នាក់ ។

ក្រុមសេវារថយន្តសង្គ្រោះ និងស្ម័គ្រចិត្ត (M-Rescue Corps) និយាយថា ទីក្រុង Mandalay ស្ថិតនៅភាគកណ្តាលប្រទេសមីយ៉ាន់ម៉ា មានមនុស្សស្លាប់ដោយសារអាកាសធាតុក្តៅខ្លាំងស្មើប្រមាណ៩០០នាក់នៅខែមេសា ឆ្នាំ២០២៤ ក្នុងអំឡុងពេលរលកកំដៅខ្ពស់រយៈពេល២ ទៅ៣ថ្ងៃកន្លងមក ។ ពលរដ្ឋនៅទីក្រុង Mandalay បានស្លាប់ក្នុងអំឡុងពេលដើរ និងបើកបរយានជំនិះនៅតាមផ្លូវ ។

ចំណែកនៅទីក្រុងយ៉ាំងហ្គោន ជាមជ្ឈមណ្ឌលពាណិជ្ជកម្មដ៏ធំរបស់មីយ៉ាន់ម៉ា ភ្នាក់ងាររៀបចំពិធីបុណ្យសពដោយមិនគិតថ្លៃរាយការណ៍ថា មានមនុស្សស្លាប់ដោយសារអាកាសធាតុក្តៅខ្លាំង ចំនួន៤៤១នាក់ នៅខែមេសា ឆ្នាំ២០២៤ គឺខ្ពស់ជាងខែមីនា ដែលស្មើត្រឹមតែ៣៤០នាក់ ។ រីឯនៅតំបន់ Magway អ្នកស្លាប់ភាគច្រើនជាមនុស្សចាស់ ឬមានជំងឺរ៉ាំរ៉ៃ ដូចជា ៖ ជំងឺលើសឈាម និងទឹកនោមផ្អែម ខណៈតំបន់ Sagaing មានយុវជនកើតជំងឺដាច់សរសៃឈាមខួរក្បាល ។

រីឯពលរដ្ឋទូទៅដែលត្រូវចេញទៅបំពេញការងារនៅខាងក្រៅក្នុងពេលអាកាសធាតុក្តៅខ្លាំង ក៏បានប្រឈមនឹងបញ្ហាផ្សេងៗផងដែរ ដូចជា ៖ កំដៅថ្ងៃ, ខ្វះខាតទឹក និង ឈឺពោះ ។ បើទោះជាពលរដ្ឋមីយ៉ាន់ម៉ាស្លាប់ដោយសារអាកាសធាតុក្តៅកើនឡើងក្តី ប៉ុន្តែក្រសួងសុខាភិបាលរបស់រដ្ឋាភិបាលយោធាពុំបានប្រកាសពីចំនួនមនុស្សស្លាប់ពាក់ព័ន្ធនឹងអាកាសធាតុក្តៅខ្លាំង និងពុំឆ្លើយតបសំណួររបស់ក្រុមសារព័ត៌មានទេ ៕

សារព័ត៌មានបរទេសបានរាយការណ៍នៅថ្ងៃទី២ ខែឧសភា ឆ្នាំ២០២៤ ថា ក្រុមហ៊ុន AstraZeneca ដែលផលិតវ៉ាក់សាំងការពារជំងឺកូវីដលំដាប់ពិភពលោកនៅប្រទេសអង់គ្លេស បានចេញសេចក្តីប្រកាសមួយនៅដើមខែឧសភាថា វ៉ាក់សាំងការពារជំងឺកូវីដ-១៩ ឈ្មោះ «Covishield» ដែលបានផលិតរួមជាមួយសាកលវិទ្យាល័យ Oxford មានផលប៉ះពាល់ធ្ងន់ធ្ង.រ គឺនឹងធ្វើឱ្យឈាមកក ។

វ៉ាក់សាំងការពារជំងឺកូវីដ-១៩ ឈ្មោះ «Covishield» មានការទទួលស្គាល់ពីអង្គការសុខភាពពិភពលោក (WHO) កាលពីខែកុម្ភៈ ឆ្នាំ២០២២ និងត្រូវបានប្រើប្រាស់យ៉ាងទូលំទូលាយនៅប្រទេសជាង១៥០ រួមទាំងអង់គ្លេស និងឥណ្ឌាផងដែរ ។

AstraZeneca ទទួលស្គាល់ថា វ៉ាក់សាំងការពារជំងឺកូវីដប្រភេទនេះនឹងមានផលប៉ះពាល់ធ្ងន់ធ្ងរ ក្រោយពីមានការប្តឹងទាមទារប្រាក់ជំងឺចិត្តចំនួន១០០លានផោនសម្រាប់អ្នកស្លាប់យ៉ាងតិចចំនួន៥១នាក់ ដែលមានបញ្ហាឈាមកក ក្រោយពីពួកគេចាក់វ៉ាក់សាំង «Covishield» ។

ទោះយ៉ាងណា AstraZeneca បានបញ្ជាក់ពីសុវត្ថិភាពរបស់វ៉ាក់សាំង «Covishield» ថា បញ្ហាឈាមកកក្រោយពេលចាក់វ៉ាក់សាំងនេះ គឺជាអាការៈកម្រនឹងកើតឡើងណាស់ ហើយវាអាចកើតឡើង បើទោះជាធ្លាប់ចាក់វ៉ាក់សាំងពីមុនក្តី ។

កាលពីឆ្នាំ២០០៣ AstraZeneca បញ្ជាក់ថា បញ្ហាឈាមកកនេះអាចកើតឡើង ក្រោយពេលការចាក់វ៉ាក់សាំងទូទៅ ។ រីឯអង្គការសុខភាពពិភពលោក (WHO) ឱ្យដឹងថា ផលប៉ះពាល់នេះអាចកើតឡើងបាន ប៉ុន្តែវាកម្រកើតឡើងណាស់ ហើយរោគសញ្ញានៅពុំទាន់ច្បាស់លាស់ ៕