Jennie សមាជិកក្រុម BLACKPINK បានធ្វើឱ្យអ្នកគាំទ្រទូទាំងពិភពលោកសាទរយ៉ាងខ្លាំងក្នុងពេលដែលនាងបានដើរម៉ូតលើកដំបូងនៅប្រទេសអ៊ីតាលី បើទោះបីជាមានអ្នកមួយចំនួនបានបញ្ចេញមតិរិះគន់តិចតួចក្តី។ ការដើរម៉ូតលើកនេះរបស់ Jennie ក៏ជំរុញចិត្តឱ្យស្រីស្អាត ឡូរីន សង្សាររបស់ វណ្ណដា ទប់ចិត្តមិនជាប់បង្ហាញអារម្មណ៍របស់ខ្លួនថានាងចូលចិត្ត Jennie ខ្លាំងណាស់។
កាលពីថ្ងៃទី ១០ ខែមិថុនា Jennie បានបង្ហាញខ្លួនជាតារាម៉ូដែលដើរម៉ូតលើកដំបូងជាមួយ សម្លៀកបំពាក់វាលខ្នងពណ៌ខ្មៅ កាន់កាបូបពណ៌ខៀវ ដែលធ្វើឡើងលើដំបូលអាគារត្រូវបានសាងសង់នៅលើកំពូលនៃច្រាំងថ្មចោទដ៏អស្ចារ្យជាមួយនឹងទិដ្ឋភាពសមុទ្រនៅលើកោះ Capri របស់ប្រទេសអ៊ីតាលី។ ទោះបីវាជាការដើរលើកដំបូងរបស់នាងក៏ដោយក៏ Jennie អាចគ្រប់គ្រងការដើររបស់ខ្លួននិងបានទាក់ទាញចំណាប់អារម្មណ៍ទស្សនិកជនជុំវិញពិភពលោក។ ទោះយ៉ាងណាមតិខ្លះបានរិះគន់ថាសំលៀកបំពាក់របស់ Jennie មិនសូវលេចធ្លោឯការដើររបស់នាងយឺតៗពេក ប៉ុន្តែមតិនោះមានតិចជាងការសរសើរ។
ស្របពេលដែលតារាចម្រៀងរូបនេះបានដើរម៉ូតលើកដំបូងរបស់ខ្លួន ស្រីស្អាត ឡូរីន សង្សារកំពូលតារារ៉េប វណ្ណដា ចេញមកសារភាពពីអារម្មណ៍របស់ខ្លួនថានាងចូលចិត្ត Jennie ខ្លាំង។ ឡូរីន បាន add Story នៅលើគណនី Instagram ពីវីដេអូដើរម៉ូតរបស់ Jennie អមដោយពាក្យពេចន៍ចេញពីក្រអៅបេះដូងថា «I love This Women a lot »។
ឡូរីន ត្រូវបានទស្សនិកជនកត់សម្គាល់ថាចាប់តាំងពីប្រកាសទំនាក់ទំនងស្នេហាជាមួយតារាចម្រៀងរ៉េប វណ្ណដា រូបនាងមានឈ្មោះបោះសំឡេងមិនចាញ់តារាល្បីៗមួយចំនួនឡើយ ខណៈនាងក៏ត្រូវបានផលិតផលទាក់ទងផ្សព្វផ្សាយផលិតផល។ ចំណែកឯអ្នកតាមដាននៅលើបណ្តាញសង្គមមានរាប់ម៉ឺននាក់។ ក្រៅពីមានសម្រស់ស្រស់ស្អាត ឡូរីន ក៏ចំណាប់ធ្វើម្ហូបផ្គាប់ចិត្តសង្សារមិនឱ្យទាស់ចិត្ត។
កន្លងមកនេះក៏មានពាក្យចចាមអារ៉ាមថានាងបែកគ្នាពី វណ្ណដា ប៉ុន្តែ ឡូរីន បានចេញមកបញ្ជាក់ច្បាស់ៗថាមិនមែនជាការពិតនាងគ្រាន់តែសម្ងំធ្វើអ្វីដែលថ្មីសម្រាប់អ្នកគាំទ្រ ចំណែកឯ វណ្ណដា មមាញឹកការងារសិល្បៈរបស់ខ្លួន ខណៈ វណ្ណដា ចេញទៅសម្តែងនៅអាម៉េរិកនាងក៏បានមកជូនដំណើរគូស្នេហ៍ផងដែរអមដោយការនឹករម្លឹកពីភាពកក់ក្តៅដែល វណ្ណដា ផ្តល់ឱ្យនាង៕
