ប្រទេសជប៉ុន៖ ផ្ទះទំនេរនៅក្នុងប្រទេសជប៉ុនបានកើនឡើងដល់ជិត ៩ លានយូនីត ដោយសារចំនួនប្រជាជននៅក្នុងប្រទេសនេះមានការថយចុះ ដែលការថយចុះនេះបានជះឥទ្ធិពលយ៉ាងខ្លាំងដល់សង្គម និងសេដ្ឋកិច្ចរបស់ប្រទេសជប៉ុន។
យោងតាមចុះផ្សាយរបស់ The Guardian កាលពីថ្ងៃទី១ ខែឧសភា ឆ្នាំ២០២៤ ថារដ្ឋាភិបាលជប៉ុនទើបតែបានប្រកាសពីការស្ទង់មតិដែលបង្ហាញថាចំនួនផ្ទះទំនេរនៅក្នុងប្រទេសបានកើនឡើងដល់កំណត់ត្រាថ្មី ៩ លានយូនីតត្រឹមខែតុលា ឆ្នាំ ២០២៣ ដែលជាការកើនឡើងចំនួន ៥១០,០០០ យូនីត បើធៀបនឹងការស្ទង់មតិចុងក្រោយបំផុតក្នុងឆ្នាំ ២០១៨ ត្រូវបានធ្វើឡើងដោយក្រសួងកិច្ចការផ្ទៃក្នុង និងទំនាក់ទំនងរបស់ជប៉ុនរៀងរាល់ប្រាំឆ្នាំម្តង។

ដូច្នេះគិតត្រឹមខែតុលាឆ្នាំមុន ចំនួនផ្ទះទំនេរមាន ១៣.៨% នៃផ្ទះទាំងអស់នៅក្នុងប្រទេសជប៉ុន។ នេះជាអត្រាខ្ពស់ដែលបង្ហាញថាផ្ទះប្រហែលមួយ ឬពីរក្នុងចំណោមផ្ទះប្រាំពីរគឺគ្មានមនុស្សរស់នៅទេ។ មូលហេតុដែលបណ្តាលឱ្យមានផ្ទះទំនេរច្រើនរហូតដល់ជិត ៩ លានគឺដោយសារចំនួនប្រជាជននៅជនបទធ្លាក់ចុះ ហើយភាគច្រើនផ្ទះនៅតំបន់ទាំងនោះគឺនៅឆ្ងាយពីមជ្ឈមណ្ឌលសំខាន់ៗដូចជាមន្ទីពេទ្យ សាលារៀន និងក្រុមហ៊ុននានា ធ្វើឱ្យប្រជាជនមិនមានចំណាប់អារម្មណ៍មករស់នៅទីនេះ ហើយផ្ទះក៏ត្រូវបានគេទុកចោលរហូតមកដល់ពេលនេះ។

គួរបញ្ជាក់ដែរថា នៅឆ្នាំ ១៩៧៣ ចំនួនផ្ទះទំនេរនៅក្នុងប្រទេសជប៉ុនមានត្រឹមតែ ១.៧២ លានផ្ទះប៉ុណ្ណោះ ដែលស្មើនឹង ៥.៥% នៃចំនួនផ្ទះសរុបនៅក្នុងប្រទេស។ រីឯនៅឆ្នាំ ១៩៩៣ វិញចំនួនផ្ទះដែលគ្មានមនុស្សរស់នៅបានកើនឡើងដល់ ៤.៤៨ លាន ហើយចំនួននេះបានកើនឡើងទ្វេដងក្នុងរយៈពេល ៣០ ឆ្នាំកន្លងមកនេះ។ ទោះជាយ៉ាងណាទិន្នន័យបង្ហាញថា ក្នុងចំណោម ៩ លានយូនីតទំនេរ មាន ៤.៤៣ លានយូនីតសម្រាប់ជួល និង ៣៣០.០០០ យូនីតសម្រាប់លក់ និង ៣៨០.០០០ យូនីតទៀតគឺមានម្ចាស់ប៉ុន្តែពួកគេចាត់ទុកជាផ្ទះទីពីរ ប្រើសម្រាប់តែវិស្សមកាលប៉ុណ្ណោះ។

ផ្ទះទំនេរគឺជារឿងធម្មតាជាពិសេសនៅជនបទរបស់ប្រទេសជប៉ុន។ ផ្ទះនៅតាមជនបទជាច្រើនត្រូវបានកាន់កាប់ដោយប្រជាជនរស់នៅក្នុងទីក្រុងធំៗ។ ពួកគេបានទទួលមរតកពីសាច់ញាតិ ប៉ុន្តែមិនមានឆន្ទៈ ឬមិនអាចជួសជុលពួកវាឡើងវិញបានទេ។ មន្ត្រីជប៉ុនជំរុញឱ្យម្ចាស់ផ្ទះជួសជុល រុះរើ លក់ ឬរកវិធីប្រើប្រាស់ឡើងវិញ។ ពួកគេក៏បានបង្កើតច្បាប់ដើម្បីចេញការព្រមានដល់ម្ចាស់ផ្ទះទាំងនេះផងដែរ។ ទិន្នន័យរបស់រដ្ឋាភិបាល ជប៉ុន ក្នុងខែកុម្ភៈ បានបង្ហាញថា អត្រាកំណើតរបស់ប្រទេសនេះបានធ្លាក់ចុះដល់កម្រិតទាបថ្មីមួយនៅឆ្នាំ ២០២៣ នៅពេលដែលការស្លាប់មានការកើនឡើងទ្វេដងនៃអត្រាកំណើត៕

ប្រទេសចិន ៖ ប្រទេសចិនបានធ្វើវិសោធនកម្មច្បាប់អប់រំការពារជាតិ (National Defense Education Law) ដើម្បីឱ្យសិស្សរៀននៅកម្រិតមធ្យមសិក្សា និងឧត្តមសិក្សាទាំងអស់ត្រូវតែឆ្លងកាត់ការបណ្តុះបណ្តាល និងហ្វឹកហាត់ទាហានជាមូលដ្ឋាន ហើយស្ថិតក្រោមការទទួលខុសត្រូវរបស់ក្រសួងអប់រំ និងគណៈកម្មាធិការមជ្ឈិមបក្សកុម្មុយនិស្ត ។

ការធ្វើវិសោធនកម្មច្បាប់មានគោលបំណងជំរុញឱ្យពលរដ្ឋចិនគ្រប់រូបយល់ដឹងពីតួនាទីការពារប្រទេស ក៏ដូចជាជួយឱ្យប្រទេសចិនអាចសម្របខ្លួនជាមួយការផ្លាស់ប្តូរថ្មីៗនៅលើពិភពលោកផងដែរ ។ នេះបើតាមការរាយការណ៍របស់សារព័ត៌មានចិន ។

ចំណែកអ្នកវិភាគយល់ឃើញថា ការធ្វើវិសោធនកម្មច្បាប់ គឺបង្ហាញពីការបារម្ភរបស់រដ្ឋាភិបាលចិនពាក់ព័ន្ធនឹងស្ថានការណ៍សន្តិសុខជាតិ ខណៈបច្ចុប្បន្ន មានបញ្ហាជម្លោះកើតឡើងជាបន្តបន្ទាប់រវាងចិន និងអាមេរិក រួមទាំងតៃវ៉ាន់ ខណៈចិនអះអាងថា តៃវ៉ាន់ គឺជាទឹកដីមួយផ្នែករបស់ខ្លួន ។ ហេតុនេះ ចិនត្រូវការបង្រួបបង្រួមប្រទេសជាមួយតៃវ៉ាន់ក្រោមគោលនយោបាយចិនតែមួយ បើទោះជាត្រូវប្រើកងកម្លាំងគ្រប់គ្រងតៃវ៉ាន់ក្តី ។

ក្រៅពីនេះ វាជាការបង្ហាញពីគោលដៅរបស់ប្រធានាធិបតីចិន លោក ស៊ី ជិនពីង ដែលចង់ពង្រឹងអំណាច, បណ្តុះគំនិតជាតិនិយម, ឱ្យពលរដ្ឋត្រៀមខ្លួនតស៊ូផ្នែកទាហាន និងជំរុញយុវជនសម័យថ្មីចូលរួមឱ្យបានច្រើនជាមួយទាហាន ។

ក្រៅពីនេះ ការធ្វើវិសោធនកម្មច្បាប់កើតឡើងក្រោយពីកងទ័ពរំដោះប្រជាជនចិនបរាជ័យជាបន្តបន្ទាប់ក្នុងការទាក់ទាញយុវជនចេះដឹងឱ្យដាក់ពាក្យធ្វើទាហានគ្រប់ចំនួន ខណៈអត្រាគ្មានការងារធ្វើរបស់យុវជនកើនឡើង ៕

TikTok គឺជាកម្មវិធីដ៏ពេញនិយម និងមានប្រជាប្រិយភាពខ្លាំងនាពេលបច្ចុប្បន្ននេះ ដោយសព្វថ្ងៃមនុស្សជាច្រើននៅជុំវិញពិភពលោក សុទ្ធតែស្គាល់កម្មវិធី TikTok ដោយសារកម្មវិធីមានភាពចម្រុះនៃវីដេអូ និងអាចរកលុយបានទៀតផង។ យោងតាមគេហទំព័របច្ចេកវិទ្យា Electronics Hub បានធ្វើការស្រាវជ្រាវលើកម្រិតនៃការប្រើប្រាស់ទូរស័ព្ទ កុំព្យូទ័រ និងបណ្តាញសង្គមក្នុងបណ្តាប្រទេសទាំងអស់ជុំវិញពិភពលោក ដោយផ្អែកលើទិន្នន័យពីរបាយការណ៍ទិដ្ឋភាពទូទៅនៃគេហទំព័រឯកទេសទិន្នន័យ Datareportal ក្នុងប្រទេសសិង្ហបុរី បានឱ្យដឹងថាមានប្រទេសចំនួន ១០ ប៉ុណ្ណោះដែលមានអ្នកមើល TikTok ប្រចាំថ្ងៃច្រើនជាងគេបំផុតនៅលើពិភពលោក។

ដូច្នោះហើយ ចំណាត់ថ្នាក់កំពូលនៅអាស៊ីគឺបានទៅលើប្រទេសវៀតណាម ដែលបានមើលវីដេអូ TikTok ជាមធ្យមចំនួន ១២៨ ជារៀងរាល់ថ្ងៃ។ នៅពីក្រោយប្រទេសវៀតណាមគឺប្រទេសហ្វីលីពីន ដែលមានវីដេអូ TikTok ចំនួន ១២៧ បានមើលជារៀងរាល់ថ្ងៃ។ បន្ទាប់មកគឺអ៊ីស្រាអែល (១២៣) ម៉ាឡេស៊ី (១២១) ឥណ្ឌូនេស៊ី (១២០)។ នេះបើយោងតាម Statista ដែលជាវេទិកាអាល្លឺម៉ង់ដែលមានឯកទេសខាងស្ថិតិ និងការរាយការណ៍ទិន្នន័យសកល បានឱ្យដឹងថា ជាមធ្យមវីដេអូ TikTok នីមួយៗមានរយៈពេល ៣៤ វិនាទី។ ដូច្នេះការមើលវីដេអូ TikTok ជាមធ្យមចំនួន ១២៨ មានន័យថាមនុស្សម្នាក់បានចំណាយពេល ១ ម៉ោង ១២ នាទី ឬ ២ ម៉ោង ២៤ នាទី ក្នុងមួយថ្ងៃជាមួយ TikTok។

ខាងក្រោមនេះគឺជាបញ្ជីប្រទេសទាំង ១០ ដែលមានអ្នកមើល TikTok ប្រចាំថ្ងៃច្រើនជាងគេបំផុតលើលោក៖
១.ប្រទេសអង់គ្លេស (England) មានចំនួនអ្នកមើល ១៥៤
២.ប្រទេសអាមេរិក (United States) មានចំនួនអ្នកមើល ១៤២
៣.ប្រទេសម៉ិកស៊ិក (Mexico) មានចំនួនអ្នកមើល ១៤០
៤.ប្រទេសឈីលី (Chile) មានចំនួនអ្នកមើល ១៣៤
៥.ប្រទេសបែលហ្សិក (Belgium) មានចំនួនអ្នកមើល ១៣២
៦.ប្រទេសអូស្ត្រាលី (Australia) មានចំនួនអ្នកមើល ១៣២
៧.ប្រទេសវៀតណាម (Vietnam) មានចំនួនអ្នកមើល ១២៨
៨.ប្រទេសហ្វីលីពីន (Philippines) មានចំនួនអ្នកមើល ១២៧
៩.ប្រទេសអ៊ីស្រាអែល (Israel) មានចំនួនអ្នកមើល ១២៣
១០.ប្រទេសម៉ាឡេស៊ី (Malaysia) មានចំនួនអ្នកមើល ១២១ ៕

វៀតណាម៖ ភ្ញៀវទេសចរបរទេសដែលបានមកទស្សនាទីក្រុងហូជីមិញបាននិយាយថា ទីក្រុងនេះក្តៅពេកធ្វើឱ្យប៉ះពាល់ដល់បទពិសោធន៍ធ្វើដំណើររបស់ពួកគេ និងធ្វើឱ្យរាងកាយរបស់ពួកគេមិនស្រួល។
យោងតាមព័ត៌មានពីស្ថានីយ៍ជលសាស្ត្រភូមិភាគខាងត្បូង អាកាសធាតុក្តៅនៅទីក្រុងហូជីមិញក្នុងរយៈពេលប៉ុន្មានថ្ងៃនេះគឺកើនឡើងខ្លាំងខុសធម្មតា ដោយសីតុណ្ហភាពប្រែប្រួលនៅពេលថ្ងៃប្រហែល ៤០-៤៤ អង្សាសេ ដែលកំដៅខ្លាំងនេះនឹងប៉ះពាល់ដល់បទពិសោធន៍ធ្វើដំណើររបស់ភ្ញៀវទេសចរបរទេសនៅទីក្រុងហូជីមិញ។ Yania ជាជនជាតិអេស្ប៉ាញ រស់នៅក្នុងប្រទេសអូស្ត្រាលី បាននិយាយថា នាងបានមកដល់ទីក្រុងហូជីមិញ កាលពីថ្ងៃទី ២៨ ខែមេសា ហើយមានអារម្មណ៍ថានៅទីនេះគឺក្តៅខ្លាំងខុសពីតំបន់ដទៃទៀត។ នៅពេលនោះសីតុណ្ហភាពដែលបានរាយការណ៍តាមទូរស័ព្ទរបស់នាងគឺប្រហែល ៣៧-៣៨ អង្សាសេប៉ុណ្ណោះ ប៉ុន្តែនាងមានអារម្មណ៍ថាសីតុណ្ហភាពនោះគឺលើសពី ៤០ អង្សាសេទៅទៀត។

Yania បានបន្តថា នាងភាគច្រើនចូលចិត្តធ្វើដំណើរដោយការថ្មើរជើង ប៉ុន្តែព្រះអាទិត្យក្តៅធ្វើឱ្យនាងបាត់បង់កម្លាំងយ៉ាងឆាប់រហ័ស ហើយជើងរបស់នាងក៏អស់កម្លាំង។ នាងផឹកទឹកឥតឈប់ឈរ ពេលខ្លះទឹកចម្រោះ ជួនកាលទឹកក្រូចឆ្មាដើម្បីបង្កើនថាមពល និងបំបាត់ការស្រេកទឹក។ ទោះជាយ៉ាងណាឥឡូវនេះ Yania មិនបន្តចេញដំណើរអំឡុងពេលថ្ងៃនិងរសៀលទៀតទេ ដោយសារអាកាសធាតុក្តៅពេក ធ្វើឱ្យនាងសម្រេចចិត្តចេញក្រៅតែពេលយប់ប៉ុណ្ណោះ។ លោក Grant Wilson អាយុ ៦១ ឆ្នាំ ជាភ្ញៀវទេសចរជនជាតិអូស្ត្រាលី បាននិយាយថា គាត់ធ្លាប់មកលេងទីក្រុងហូជីមិញកាលពីឆ្នាំ ២០២២ ហើយនៅពេលដែលគាត់ត្រឡប់មកលេងទីក្រុងនេះម្តងទៀតក្នុងឆ្នាំនេះ គាត់បាននិយាយថា “អាកាសធាតុក្នុងទីក្រុងគឺក្តៅខ្លាំងមិនធ្លាប់មានពីមុនមក”។

លោក Grant បានបន្ថែមថា ទោះបីជាសីតុណ្ហភាព ៤០ អង្សារសេនៅសាយហ្គនធ្វើឱ្យរាងកាយមិនស្រួលប៉ុន្តែមិនប៉ះពាល់ដល់បទពិសោធន៍ធ្វើដំណើរច្រើនពេកទេ។ លោកបានបន្តទៀតថា ទោះជាយ៉ាងណាគាត់មានអារម្មណ៍ហត់នឿយពេលកំពុងរង់ចាំដូរលុយនៅហាងមួយទល់មុខផ្សារបិនថាញ់។ នៅថ្ងៃត្រង់ ព្រះអាទិត្យកំពុងឆាបឆេះ ជុំវិញមានហ្វូងមនុស្សយ៉ាងច្រើន និងមានសំលេងរំខានខ្លាំង បូកនឹងការឈររង់ចាំយ៉ាងយូរធ្វើឱ្យលោកមានអារម្មណ៍ថាអស់កម្លាំងខ្លាំង។ ភ្ញៀវទេសចរណ៍បុរសជនជាតិអូស្ត្រាលីរូបនេះបាននិយាយថា ទោះបីជាអាកាសធាតុអាក្រក់យ៉ាងណាក៏ដោយ ទីក្រុងហូជីមិញនៅតែជាកន្លែងដែលគួរទៅទស្សនានៅពេលមកវៀតណាម ព្រោះល្បឿននៃជីវិតនៅទីនេះបង្កើតអារម្មណ៍រីករាយ។

លោកសង្ឃឹមថា ទីក្រុងនេះនឹងមានអាងហែលទឹកសាធារណៈបន្ថែមទៀត ដើម្បីបន្ធូរអារម្មណ៍ក្នុងរដូវក្តៅខ្លាំង។ លោក Grant ផ្តល់យោបល់ថា វិធីធ្វើឱ្យរាងកាយរបស់អ្នកមានផាសុកភាពនៅពេលធ្វើដំណើរទៅកាន់ទីក្រុងហូជីមិញក្នុងរដូវក្តៅ គឺត្រូវផឹកទឹកឱ្យបានច្រើន។ ទឹកស្អាតនៅប្រទេសវៀតណាមត្រូវបានលក់នៅគ្រប់ទីកន្លែង ហើយមានតម្លៃថោកជាងតំបន់អាស៊ីមួយចំនួនទៀតដូចជាសិង្ហបុរី ឬហុងកុងជាដើម។ ក្រុមហ៊ុនទេសចរណ៍ក៏រកវិធីជួយភ្ញៀវទេសចរឱ្យមានផាសុកភាពក្នុងរដូវក្ដៅផងដែរ។ ក្រុមហ៊ុនទេសចរណ៍វៀតណាម បាននិយាយថា ក្នុងអំឡុងពេលវិស្សមកាល ដំណើរទេសចរណ៍នាំភ្ញៀវទេសចរទៅកាន់លោកខាងលិចកំណត់សកម្មភាពក្រៅផ្ទះ។ ក្រុមហ៊ុនបានបង្កើនបរិមាណទឹកដបសម្រាប់ក្រុមទេសចរណ៍ពី ២ ដបក្នុងមនុស្សម្នាក់ និង ៤ ដបក្នុងមួយថ្ងៃសម្រាប់មនុស្សម្នាក់៕