មនុស្សភាគច្រើនពុំដឹងថា ទីក្រុងណាមានហាងកាហ្វេច្រើនបំផុតនៅលើពិភពលោក ។ ទីក្រុងមានហាងកាហ្វេច្រើនជាងគេនោះ មិនមែនស្ថិតនៅប្រទេសអ៊ីតាលី ឬតំបន់ Seattle ក្នុងទីក្រុងវ៉ាស៊ីនតោន សហរដ្ឋអាមេរិកទេ ប៉ុន្តែទីក្រុងនេះស្ថិតនៅតំបន់អាស៊ី និងបានជាប់ចំណាត់ថ្នាក់មានហាងកាហ្វេច្រើនបំផុតលើពិភពលោក អស់រយៈពេល៣ឆ្នាំជាប់ៗគ្នា ។

នៅថ្ងៃទី៣ ខែឧសភា ឆ្នាំ២០២៤ សារព័ត៌មានបរទេសរាយការណ៍ថា ទីក្រុងសៀងហៃ ប្រទេសចិន បានជាប់ចំណាត់ថ្នាក់ជាទីក្រុងមានហាងកាហ្វេច្រើនបំផុតនៅលើពិភពលោក អស់រយៈពេល៣ឆ្នាំជាប់ៗគ្នា ។ ហេតុនេះ គេពុំចាំបាច់ធ្វើដំណើរទៅប្រទេសអ៊ីតាលី ឬតំបន់ Seattle ក្នុងទីក្រុងវ៉ាស៊ីនតោនទេ គឺគេអាចធ្វើដំណើរមកទីក្រុងសៀងហៃ នឹងឃើញថា ទីក្រុងនេះសម្បូរទៅដោយហាងកាហ្វេពាសពេញទាំងអស់ឱ្យជ្រើសរើស ។

សារព័ត៌មានចិនឈ្មោះ China News Service រាយការណ៍ថា ក្នុងពិធីបុណ្យ Shanghai International Coffee Culture Festival ប្រចាំឆ្នាំ២០២៤ មានការប្រកាសរបាយការណ៍ «2024 China Urban Coffee Development Report» បញ្ជាក់ថា នៅឆ្នាំ២០២៣ នៅទីក្រុងសៀងហៃ មានហាងកាហ្វេច្រើនរហូតដល់៩.៥៥៣កន្លែង ។ ហេតុនេះ ធ្វើឱ្យសៀងហៃ ជាប់ចំណាត់ថ្នាក់ជាទីក្រុងមានហាងកាហ្វេច្រើនបំផុតលើពិភពលោក ។

ចំណែកភ្នាក់ងារព័ត៌មានកណ្តាល (Central News Agency) រាយការណ៍ដែរថា ទីក្រុងសៀងហៃ ប្រទេសចិន មានហាងកាហ្វេបរទេសច្រើនបំផុត និងមានកាហ្វេម៉ាកល្បីៗពីបរទេស រហូតដល់២.០៥៦ម៉ាក ។

Xu Jian ព្រឹទ្ធបុរសរង School of Media and Communication ប្រចាំសាកលវិទ្យាល័យ Shanghai Jiao Tong បានផ្តល់បទសម្ភាសន៍ជាមួយ China News Service ថា សៀងហៃបានក្លាយជាទីក្រុងមួយ ដែលក្រុមហ៊ុនបរទេសត្រូវតែមកប្រកបអាជីវកម្មនៅទីនេះ ។

ទីក្រុងសៀងហៃ មិនត្រឹមតែទាក់ទាញកាហ្វេម៉ាកល្បីៗមកពីជុំវិញពិភពលោកប៉ុណ្ណោះទេ ប៉ុន្តែហាងកាហ្វេក្នុងស្រុកក៏បានកើនឡើងច្រើនផងដែរ ។ របាយការណ៍ខាងលើបញ្ជាក់ថា ចំនួនក្រុមហ៊ុនចិនដែលប្រកបអាជីវកម្មពាក់ព័ន្ធនឹងកាហ្វេ ស្មើរហូតដល់៣៨៤.៨៥៩ក្រុមហ៊ុន នៅឆ្នាំ២០២៣ និងកើនឡើង១៥,៦៥% បើធៀបនឹងឆ្នាំ២០២២ ។

លើសពីនេះ ឧបករណ៍ឆុងកាហ្វេដែលផលិតនៅប្រទេសចិន ទទួលបានការពេញនិយមយ៉ាងខ្លាំងនៅទីផ្សារបរទេស ។ កាលពីឆ្នាំ២០២៣ ចិនបាននាំចេញឧបករណ៍ឆុងកាហ្វេទៅប្រទេសនានាលើពិភពលោក ស្មើទឹកប្រាក់៧.៥៥០លានយាន់ ។ ក្រៅពីអាជីវកម្មកាហ្វេទទួលបានការពេញនិយមហើយ ហាងកាហ្វេនានាបានបង្កើតកាហ្វេផ្សំជាមួយភេសជ្ជៈថ្មីៗជាច្រើនតាមស្តាយចិន ក្នុងនោះមានភេសជ្ជៈខ្លះមានរសជាតិប្លែក និងថ្មី ដែលអ្នកចូលចិត្តផឹកកាហ្វេលើពិភពលោក ពុំបានស្គាល់រសជាតិ ៕

កីឡាករបាល់ទាត់ដ៏ល្បីល្បាញរបស់ពិភពលោក Cristiano Ronaldo បានបង្ហើបគន្លឹះធ្វើឱ្យរាងកាយមាំមួន សុខភាពល្អ និងសម្រស់ក្មេងជាងវ័យ ដោយសារទម្លាប់ពិសេសទាំងនេះ។ នៅពេលដែលកីឡាករជាច្រើនបានចាប់ផ្តើមចូលនិវត្តន៍នៅអាយុ ៣៩ ឆ្នាំ ខ្សែប្រយុទ្ធព័រទុយហ្គាល់រូបនេះនៅតែបង្ហាញខ្លួននៅលើទីលានដោយអង់អាច គាត់បានផ្តល់បទសម្ភាសក្នុងកម្មវិធីមួយថា នៅពីក្រោយភាពជោគជ័យរបស់គាត់គឺអាកប្បកិរិយាដ៏ម៉ឺងម៉ាត់របស់គាត់នៅពេលប្រកួតប្រជែង បូករួមទាំងទម្លាប់ចម្លែក និងរបៀបញ៉ាំបែបវិទ្យាសាស្ត្ររបស់គាត់ ជាហេតុធ្វើឱ្យគាត់មានរាងកាយមាំមួន សុខភាពល្អ និងសម្រស់ក្មេងជាងវ័យ។ ដូច្នេះខាងក្រោមនេះគឺជាទម្លាប់ប្លែកៗ ៣ យ៉ាងដែលគាត់តែងតែអនុវត្ត៖

១.គេង ៥ ដងក្នុងមួយថ្ងៃ៖ យោងតាម ESPN ម្ចាស់ពានរង្វាន់ Ballon d’Or 5 ជាធម្មតាចំណាយពេលគេង ៥ ដងក្នុងមួយថ្ងៃ ដោយរាល់ការគេងមួយដងមានរយៈពេល ៩០ នាទី។ យោងតាមអ្នកជំនាញខាងដំណេក លោក Nick Littlehales ដែលធ្លាប់ធ្វើការជាមួយ Ronaldo បានឱ្យដឹងថា នេះមិនមែនជាប្រភេទការងងុយគេង ឬគេងដូចមនុស្សធម្មតានោះទេ។ ការគេងរយៈពេល ៩០ នាទីក្នុងមួយដងគឺជាវិធីសាស្រ្តមួយដើម្បីធ្វើឱ្យប្រសើរឡើងនូវសមត្ថភាពរាងកាយរបស់អ្នកក្នុងការងើបឡើងវិញបន្ទាប់ពីគេង។ ជាមួយនឹងការគេងនេះក្នុងមួយថ្ងៃ Ronaldo គេងបាន ៧.៥ ម៉ោង ដែលនេះជាចំនួននៃការគេងដ៏ល្អបំផុតដែលត្រូវបានណែនាំដោយសមាគមការគេងពិភពលោក។

២.ញ៉ាំអាហារ ៦ ពេលក្នុងមួយថ្ងៃ៖ ជាការពិតណាស់មនុស្សយើងជាទូទៅទទួលទានអាហារត្រឹមតែ ៣ ពេលក្នុងមួយថ្ងៃប៉ុណ្ណោះ ដោយឡែកកីឡាករវ័យ ៣៩ ឆ្នាំរូបនេះវិញស្រាប់តែមានទម្លាប់ញ៉ាំអាហារ ៦ ពេលក្នុងមួយថ្ងៃទៅវិញ។ Ronaldo បានចាប់ផ្តើមអាហារពេលព្រឹកជាមួយ Ham ឈីស និងទឹកដោះគោជូរ។ រីឯនៅពេលថ្ងៃវិញ គាត់តែងតែញ៉ាំផ្លែបឺរ ហើយជាធម្មតាគាត់ញ៉ាំអាហារថ្ងៃត្រង់ ២ ពេលគឺចន្លោះម៉ោង ១១ និងម៉ោង ១ ថ្ងៃត្រង់ ចំណែកអាហារពេលល្ងាចវិញក៏គាត់ញ៉ាំពីរពេលដែរ ដើម្បីទទួលបានថាមពលពេញមួយថ្ងៃ។

អាហារថ្ងៃត្រង់ទីមួយមានសាច់មាន់ និងសាឡាត់ សម្រាប់អាហារថ្ងៃត្រង់ទីពីរគាត់ញ៉ាំត្រី ស៊ុត និងអូលីវ។ នៅពេលល្ងាច គាត់តែងតែញ៉ាំត្រីធូណា ឬសាច់ក្រក និងសាច់មួយចំនួនផ្សេងទៀត។ សម្រាប់មនុស្សធម្មតា បរិមាណអាហារទាំងនោះគឺហួសកម្រិត ទោះជាយ៉ាងណាក៏ដោយ ក្នុងនាមជាកីឡាករដែលមានកម្លាំងហាត់ប្រាណខ្ពស់ Ronaldo ត្រូវការប្រូតេអ៊ីនច្រើនដើម្បីបន្ថែមថាមពល។ ក្រៅពីហាត់នៅលើទីលាន គាត់ក៏ចូលចិត្តហាត់ Pilates និងហែលទឹកជាពិសេស។

៣.ទម្លាប់ឆ្ពុង់ក្នុងទឹកត្រជាក់ ឬ Cryotherapy៖ Cryotherapy គឺជាបន្ទប់ត្រជាក់សម្រាប់វិធីព្យាបាលរាងកាយក្រោមឥទ្ធិពលនៃសីតុណ្ហភាពទាប រួមទាំងការលាបទឹកកក ការងូតទឹកត្រជាក់ ឬសូណាត្រជាក់។ យោងតាមលោកវេជ្ជបណ្ឌិត Adnan Haq សាស្ត្រាចារ្យផ្នែកលំហាត់ និងវិទ្យាសាស្ត្រកីឡានៅសាកលវិទ្យាល័យ South Wales ពាក្យនេះសំដៅទៅលើភាពត្រជាក់ពេញរាងកាយ ដោយបង្ហាញឱ្យអ្នកប្រើប្រាស់នូវខ្យល់ត្រជាក់ខ្លាំង ក្រោម ១០០ អង្សាសេរយៈពេលប្រហែល ៣ នាទី។

ដូច្នេះបើតាមប្រភពមួយចំនួនបានបង្ហើបថា កីឡាករបាល់ទាត់រូបនេះបានចំណាយប្រាក់ ៥០,០០០ ផោនដើម្បីទិញបន្ទប់ព្យាបាលគ្រីស្តាល់ឯកជនមួយពីប្រទេសអ៊ីតាលី ហើយដំឡើងវានៅផ្ទះ ដើម្បីព្យាបាលរាងកាយឱ្យជាសះស្បើយឡើងវិញបន្ទាប់ពីមមាញឹកក្នុងការងារ។ បន្ទប់ត្រជាក់អាចកាត់បន្ថយសីតុណ្ហភាពចុះក្រោម ២,០០០ អង្សាសេ ហើយវាមិនត្រឹមតែជាជម្រើសរបស់ Ronaldo ប៉ុណ្ណោះទេថែមទាំងមានកីឡាករជាច្រើនទៀតជុំវិញពិភពលោកជ្រើសរើសជម្រើសនេះ៕

បរទេស៖ យោងតាម Time Higher Education (THE) ដែលជាស្ថាប័នចាត់ថ្នាក់សាកលវិទ្យាល័យធំជាងគេមួយក្នុងចំនោមអង្គការលំដាប់ពិភពលោកទាំងបី ក្រៅពី QS និងសាកលវិទ្យាល័យ Shanghai Jiaotong គេហទំព័រនេះហើយគឺជាអ្នករាយការណ៍ជាពិសេសលើព័ត៌មាន និងបញ្ហាទាក់ទងនឹងការអប់រំឧត្តមសិក្សា។ ដោយកាលពីថ្ងៃទី ១ ខែឧសភា (THE) បានប្រកាសពីចំណាត់ថ្នាក់សាកលវិទ្យាល័យល្អបំផុតនៅអាស៊ីប្រចាំឆ្នាំ ២០២៤។ ក្នុងចំណោមសកលវិទ្យាល័យអាស៊ីចំនួន ៧៣៩ មកពី ៣១ ប្រទេស មានត្រឹមតែ ១០ ប៉ុណ្ណោះដែលជាប់ឈ្មោះជាសាកលវិទ្យាល័យល្អបំផុតរបស់អាស៊ី។ ដូច្នេះខាងក្រោមនេះគឺជាបញ្ជីសាកលវិទ្យាល័យល្អបំផុតទាំង ១០ នៅអាស៊ីក្នុងឆ្នាំ ២០២៤៖

១. Tsinghua University ប្រទេសចិន តម្លៃសិក្សាពីជាង ៣.៥០០-៩.៦០០ ដុល្លារអាមេរិកក្នុងមួយឆ្នាំ
២. Peking University ប្រទេសចិន តម្លៃសិក្សាពីជាង ៣.៥០០-៤.០០០ ដុល្លារអាមេរិកក្នុងមួយឆ្នាំ
៣. National University of Singapore ប្រទេសសិង្ហបុរី តម្លៃសិក្សាពីជាង ១៣.០០០-៥២.០០០ ដុល្លារអាមេរិកក្នុងមួយឆ្នាំ
៤. Nanjing Tech University ប្រទេសសិង្ហបុរី តម្លៃសិក្សាពីជាង ១៣.០០០-៥៧.០០០ ដុល្លារអាមេរិកក្នុងមួយឆ្នាំ
៥. The University of Tokyo ប្រទេសជប៉ុន តម្លៃសិក្សាពីជាង ៤.៧០០ ដុល្លារអាមេរិកក្នុងមួយឆ្នាំ
៦. The University of Hong Kong ហុងកុង តម្លៃសិក្សាពីជាង ២៣.០០០ ដុល្លារអាមេរិកក្នុងមួយឆ្នាំ
៧. Shanghai Jiao Tong University ប្រទេសចិន តម្លៃសិក្សាពីជាង ៣.៤០០-១១.០០០ ដុល្លារអាមេរិកក្នុងមួយឆ្នាំ
៨. Fudan University ប្រទេសចិន តម្លៃសិក្សាពីជាង ៣.១០០-១១.០០០ ដុល្លារអាមេរិកក្នុងមួយឆ្នាំ
៩.Zhejiang University ប្រទេសចិន តម្លៃសិក្សាពីជាង ២.០០០-២៧.០០០ ដុល្លារអាមេរិកក្នុងមួយឆ្នាំ
១០. Chinese University of Hong Kong ហុងកុង តម្លៃសិក្សាពីជាង ១៨.០០០ ដុល្លារអាមេរិកក្នុងមួយឆ្នាំ។

គួរបញ្ជាក់ដែរថា សកលវិទ្យាល័យ Tsinghua និង Peking របស់ប្រទេសចិនទាំងពីរនៅតែស្ថិតក្នុងលំដាប់កំពូលអស់រយៈពេល ៣ ឆ្នាំហើយ។ យោងតាមគេហទំព័រ THE បាននិយាយថា ពួកគេបានវាយតម្លៃសាកលវិទ្យាល័យតាមលក្ខណៈវិនិច្ឆ័យចំនួន ១៨ ដោយបែងចែកជា ៥ ក្រុមគឺ៖ គុណភាពស្រាវជ្រាវ (៣០%) បរិយាកាសស្រាវជ្រាវ (២៨%) ការបង្រៀន (២៤.៥%) ប្រាក់ចំណូលពីការផ្ទេរចំណេះដឹង និងសមត្ថភាពក្នុងការទាក់ទាញមូលនិធិ (១០ %) និងទស្សនវិស័យអន្តរជាតិ (៧.៥%)។ បើប្រៀបធៀបទៅនឹងចំណាត់ថ្នាក់មុន ចំនួននៃលក្ខណៈវិនិច្ឆ័យបានកើនឡើងចំនួន ៥ ហើយទម្ងន់នៃលក្ខណៈវិនិច្ឆ័យនីមួយៗក៏បានផ្លាស់ប្តូរផងដែរ៕

ប្រទេសអាមេរិក៖ កាលពីពេលថ្មីៗនេះយោងតាម CNN បានឱ្យដឹង ប្រទេសសហរដ្ឋអាមេរិកបាននឹងកំពុងសាងសង់ស្ពានអាកាសដ៏ធំបំផុតរបស់ពិភពលោកសម្រាប់សត្វព្រៃឆ្លងកាត់ ក្នុងគោលបំណងដោះស្រាយជម្លោះរវាងសត្វ និងមនុស្ស ខណៈសត្វរាប់ស៊ិបក្បាលបានចេញពីព្រៃរត់បុករថយន្តបណ្តាលឱ្យមនុស្ស ២០០ នាក់ស្លា.ប់ និង ២៦.០០០ នាក់ទៀតរងរបួសជារៀងរាល់ឆ្នាំ។ ដូច្នេះអាជ្ញាធរកំពុងសាងសង់ស្ពានអាកាសប្រវែង ៦៤ ម៉ែត្រលាតសន្ធឹងលើផ្លូវហាយវេចំនួន ៨ ដែលត្រូវបានគេចាត់ទុកថាជាស្ពានអាកាសដ៏ធំបំផុតរបស់ពិភពលោកមានតែមួយគត់នៅអាមេរិកក្នុងទីក្រុង Los Angeles ដោយគេជឿថាគម្រោងនេះនឹងបញ្ចប់ជាផ្លូវការនៅឆ្នាំ ២០២៥។

នៅពេលដែលគម្រោងនេះត្រូវបានបញ្ចប់នៅឆ្នាំ ២០២៥ ស្ពានដែលបង្កើតដោយមនុស្សនឹងផ្តល់ការឆ្លងកាត់ប្រកបដោយសុវត្ថិភាពសម្រាប់សត្វព្រៃរាប់ស៊ិបក្បាលដូចជាតោ ខ្លា ចចក និងក្តាន់ជាដើម ដើម្បីផ្លាស់ទីរវាងភ្នំ Santa Monica និង Simi Hills ក្នុងជួរ Santa Susana ។ គម្រោងនេះមានឈ្មោះថា Wallis Annenberg Wildlife Crossing មានតម្លៃ ៩២ លានដុល្លារដែលបានមកពីភាពជាដៃគូរវាងអង្គភាពជាច្រើនរួមមាន Caltrans សេវាឧទ្យានជាតិ និងសហព័ន្ធសត្វព្រៃជាតិ។ បច្ចុប្បន្នគម្រោងនេះបានឈានដល់ចំណុចសំខាន់មួយនៅពេលដែលផ្នែកស្ពានទីមួយត្រូវបានគេដាក់នៅលើផ្លូវហាយវ៉េ។

ក្នុងរយៈពេលប៉ុន្មានខែខាងមុខនេះ ក្រុមសំណង់នឹងដំឡើងធ្នឹមបេតុងបន្ថែមទៀត ដែលនីមួយៗមានទម្ងន់ពី ១២៦ ទៅ ១៤០ តោន។ ស្ពានអាកាសប្រវែង ៦៤ ម៉ែត្រនឹងលាតសន្ធឹងលើ ៨ គន្លងចរាចរណ៍ ហើយក្រុមការងារសាងសង់ក៏នឹងដាំដើមឈើលើផ្ទៃដីជិត ៥ ហិកតានៅសងខាងស្ពានអាកាស ដែលធ្វើឱ្យរចនាសម្ព័ននេះពោរពេញទៅដោយបន្លែ រួមទាំងរុក្ខជាតិជាងមួយលានដើម ដើម្បីទាក់ទាញសត្វព្រៃ។ ខណៈពេលដែលស្ពាននេះនឹងនាំមកនូវអត្ថប្រយោជន៍ជាច្រើនដល់សត្វ អ្នកជំនាញក៏សង្ឃឹមដែរថា គម្រោងនេះនឹងធ្វើឱ្យជីវិតសត្វតោភ្នំកាន់តែប្រសើរឡើង។ នៅក្នុងព្រៃ ពួកគេតែងតែដើរលេងក្នុងទឹកដីដែលមានទំហំជិត ២៦០ គីឡូម៉ែត្រការ៉េ។ ប៉ុន្តែដោយសារតែផ្លូវល្បឿនលឿនជាច្រើននៅក្នុងទីក្រុង Los Angeles ពួកគេមានការលំបាកក្នុងការផ្លាស់ទីដោយសេរី។

ជាលទ្ធផល សត្វតោភ្នំនៅតំបន់ខ្លះកំពុងបង្កាត់ពូជ ដែលធ្វើឱ្យវាងាយនឹងមានបញ្ហាសុខភាព។ អ្នកជំនាញជឿថា តោធំនេះអាចនឹងបាត់ពីតំបន់ ប្រសិនបើភាពចម្រុះនៃហ្សែនមិនប្រសើរឡើង។ គួរបញ្ជាក់ដែរថា ក្នុងរយៈពេលប៉ុន្មានឆ្នាំចុងក្រោយនេះ រឿងរបស់សត្វតោភ្នំដ៏ល្បីឈ្មោះ P-22 ក៏បានទាក់ទាញចំណាប់អារម្មណ៍ជាពិសេសផងដែរ។ ក្នុងឆ្នាំ ២០១០ តោ P-22 ត្រូវធ្វើដំណើរឆ្លងកាត់ផ្លូវដ៏មមាញឹកយ៉ាងតិចពីរ ដើម្បីទៅដល់លំនៅដ្ឋានរបស់ខ្លួននៅសួន Griffith ក្នុងទីក្រុង Los Angeles ។ វាបានចំណាយពេលជាងមួយទស្សវត្សរ៍ដើរលេងជុំវិញទឹកដីដ៏តូច និងដាច់ស្រយាលដោយគ្មានសង្ឃឹមក្នុងការស្វែងរកគូ។

នៅខែធ្នូ ឆ្នាំ ២០២២ អាជ្ញាធរបានសម្លាប់តោ P-22 នេះបន្ទាប់ពីវាបានវាយប្រហារសត្វឆ្កែក្នុងស្រុកពីរក្បាល។ លទ្ធផលធ្វើកោសល្យវិច័យក្រោយមកបានបង្ហាញថា តោមានរបួសច្រើនដោយសារត្រូវរថយន្តបុក បាក់ឆ្អឹងក្បាល ជំងឺតម្រងនោម រលាកសន្លាក់ និងជំងឺរ៉ាំរ៉ៃជាច្រើនមុខទៀត។ រឿងរបស់វាបានបំផុសគំនិតបុគ្គល និងអង្គការជាច្រើនឱ្យចូលរួមចំណែកក្នុងគម្រោងសាងសង់ស្ពាន Wallis Annenberg Wildlife Crossing សម្រាប់សត្វព្រៃដើម្បីឆ្លងកាត់ដោយសេរីនិងដាច់ដោយឡែកពីមនុស្ស៕

សហរដ្ឋអាមេរិក ៖ យោងតាមលទ្ធផលស្ទង់មតិមួយបង្ហាញថា ពលរដ្ឋអាមេរិកភាគច្រើនជឿថា ប្រទេសចិនប្រើប្រាស់ TikTok ធ្វើជាឧបករណ៍តាមដាន និងមានឥទ្ធិពលលើគំនិតរបស់ពលរដ្ឋអាមេរិក ស្របពេលរដ្ឋាភិបាលអាមេរិកបានព្យាយាមហាមឃាត់ការប្រើប្រាស់កម្មវិធីដ៏ពេញនិយមនេះ ។

លទ្ធផលការស្ទង់មតិធ្វើឡើងដោយ Reuters/Ipsos បង្ហាញថា ពលរដ្ឋអាមេរិកឆ្លើយតបការស្ទង់មតិប្រមាណ៥៨% និយាយថា រដ្ឋាភិបាលចិនបានប្រើប្រាស់ TikTok ដើម្បីបង្កើតឥទ្ធិពលដល់គំនិតពលរដ្ឋអាមេរិក ។ រីឯអ្នកឆ្លើយតប១៣% មិនយល់ស្របនឹងការលើកឡើងនេះ ខណៈអ្នកផ្សេងទៀតមិនប្រាកដចិត្ត ឬពុំបានឆ្លើយតបសំណួរ ។

លទ្ធផលស្ទង់មតិបង្ហាញទៀតថា ពលរដ្ឋអាមេរិក៤៦% និយាយថា ចិនប្រើប្រាស់ TikTok ដើម្បីតាមដានពីជីវិតពលរដ្ឋអាមេរិក ។ វាជាការចោទប្រកាន់មួយ ដែលរដ្ឋាភិបាលចិនបានបដិសេធរហូតមក ។

ក្រុមហ៊ុន TikTok និយាយថា បានវិនិយោគប្រាក់ជាង១.៥០០លានដុល្លារអាមេរិក ដើម្បីធ្វើឱ្យប្រសើរឡើងនូវប្រព័ន្ធសុវត្ថិភាពព័ត៌មាន និងគ្មានការចែកចាយព័ត៌មានរបស់អ្នកប្រើប្រាស់ TikTok នៅអាមេរិក ចំនួន១៧០លាននាក់ទៅឱ្យរដ្ឋាភិបាលចិន ដូចការបារម្ភរបស់អ្នកនយោបាយអាមេរិកទេ ។ នៅឆ្នាំ២០២៣ CEO របស់ក្រុមហ៊ុន TikTok បានបញ្ជាក់ជាមួយរដ្ឋសភាអាមេរិកថា TikTok ពុំធ្លាប់ជំរុញ ឬលុបខ្លឹមសារតាមការបញ្ជារបស់រដ្ឋាភិបាលចិនឡើយ ។

កាលពីចុងខែមេសា ឆ្នាំ២០២៤ ប្រធានាធិបតីអាមេរិក លោក ចូ បៃដិន បានចុះហត្ថលេខាលើច្បាប់បង្ខំឱ្យ ByteDance ជាក្រុមហ៊ុនមេរបស់ TikTok លក់ភាគហ៊ុនទាំងអស់ក្នុងរយៈពេល២៧០ថ្ងៃ បើមិនដូច្នោះទេ TikTok អាចត្រូវហាមប្រើប្រាស់នៅអាមេរិក ។

ចំណែកក្រុមហ៊ុន TikTok ប្រកាសថា នឹងជំទាស់ជាមួយច្បាប់នេះ ព្រោះវាផ្ទុយនឹងរដ្ឋធម្មនុញ្ញអាមេរិក ស្តីពីការការពារសេរីភាព និងការបញ្ចេញមតិ ។ រីឯអ្នកប្រើប្រាស់ TikTok ជាច្រើននាក់គ្រោងអនុវត្តវិធានការតាមច្បាប់ រួមទាំងលើកឡើងពីបញ្ហានេះដើម្បីឱ្យតុលាការកំពូលអាមេរិកកាត់ក្តី ។

លទ្ធផលស្ទង់មតិរបស់ Reuters/Ipsos បង្ហាញថា ពលរដ្ឋអាមេរិក៥០% គាំទ្រការហាមឃាត់ប្រើប្រាស់ TikTok ខណៈ៣២% មិនយល់ស្រប ។ ទោះយ៉ាងណា លទ្ធផលស្ទង់មតិនេះបានសាកសួរពលរដ្ឋអាមេរិកស្មើជាង១.០០០នាក់ប៉ុណ្ណោះ (មិនមែនយុវជន) ហើយវាមិនអាចឆ្លុះបញ្ចាំងពីគំនិតរបស់យុវជនអាមេរិកមានអាយុក្រោម១៨ឆ្នាំទេ ដែលជាក្រុមប្រើប្រាស់ TikTok ច្រើនជាងគេ ។

ច្បាប់ដែលលោក ចូ បៃដិន ចុះហត្ថលេខានេះ បានផ្តល់ពេលវេលាឱ្យក្រុមហ៊ុន ByteDance ត្រឹមថ្ងៃទី១៩ ខែមករា ឆ្នាំ២០២៥ ក្នុងការលក់ភាគហ៊ុនរបស់ TikTok ។ ប៉ុន្តែការកំណត់រយៈពេលនេះ អាចពន្យារពេល៣ខែទៀត បើរដ្ឋាភិបាលអាមេរិកយល់ឃើញថា TikTok ចង់លក់កម្មវិធីដ៏ពេញនិយមឱ្យអាមេរិក ៕