កំពង់ឆ្នាំងគឺជាខេត្ដមួយដែលស្ថិតនៅជុំវិញបឹងទនេ្លសាប មានចម្ងាយប្រមាណ ៩១គីឡូម៉ែត្រពីរាជធានីភ្នំពេញ។ ខេត្តនេះគឺល្បីខ្លាំងបំផុតខាងសិប្បកម្មឆ្នាំង ហើយក៏ល្បីថាមានរមណីយដ្ឋានទេសចរណ៍ជាច្រើនកន្លែងផងដែរ។ ក្រៅពីរមណីយដ្ឋានភ្នំនាងកង្រី ល្បីទូទាំងប្រទេស និងជាអត្តសញ្ញាណរបស់ខេត្តមួយនេះ ក៏មានទឹកធ្លាក់ធម្មជាតិដ៏សម្បូរបែប តំបន់ប្រវត្តិសាស្ត្រ និងរមណីយដ្ឋានទេសចរណ៍ជិត ៣០ កន្លែងផ្សេងទៀត ដែលសុទ្ធតែជាទីកម្សាន្តពេញនិយមសម្រាប់ភ្ញៀវទេសចរ។ ទោះជាយ៉ាងណាថ្ងៃនេះ KBN News នឹងនាំប្រិយមិត្តមកស្គាល់តំបន់ប្រវត្តិសាស្ត្រដែលស្ថិតនៅក្នុងខេត្តកំពង់ឆ្នាំង។
១.ភូមិក្រាំងលាវ ឬភូមិតិរិច្ឆាន៖ ភូមិក្រាំងលាវជារមណីយដ្ឋានប្រវត្ដិសាស្ដ្រដ៏ល្បីមួយ ដែលមានប្រវត្ដិពាក់ព័ន្ធទៅនឹងសម័យអាណានិគមបារាំង។ ភូមិក្រាំងលាវ ត្រូវបានបារាំងដាក់ឈ្មោះថាជាភូមិតិរច្ឆាននៅអំឡុងពេលនៃការគ្រប់គ្រងក្រោមអាណានិគមរបស់ខ្លួន បន្ទាប់ពីអ្នកភូមិបានព្រួតគ្នាវាយសម្លាប់ជនជាតិបារាំងម្នាក់ឈ្មោះ បាដេស កាលពីថ្ងៃទី១៨ ខែមេសា ឆ្នាំ១៩២៥។ នេះគឺជាកន្លែងដ៏ទាក់ទាញបំផុត ដែលអ្នកទេសចរគួរទៅទស្សនាកម្សាន្តមិនគួររំលងឡើយ ដើម្បីស្រាវជ្រាវ ក៏ដូចជាយល់ដឹងអំពីប្រវត្តិសាស្ត្រឱ្យកាន់តែស៊ីជម្រៅ។ 
២.ភ្នំនាងកង្រី៖ ជឿថាប្រិយមិត្តភាគច្រើនប្រាកដជាបានដឹងអំពីប្រវត្តិរបស់ភ្នំនាងកង្រីហើយ។ ពិតណាស់កន្លែងនេះគឺជារមណីយ៍ដ្ឋានធម្មជាតិ បែបប្រវត្ដិសាស្ដ្រក៏ផ្សារភ្ជាប់រឿងពេ្រងនិទាន ស្ថិតក្នុងភូមិឃុំចំនួនពីរ គឺភូមិត្របែក ឃុំត្រងិល និងភូមិសំរោង ឃុំពោធិ៍ ដែលមានចម្ងាយប្រហែលជា ១៤ គ.ម ពីទីរួមខេត្ដកំពង់ឆ្នាំង។ ដូច្នេះប្រសិនបើអ្នកទៅដល់ទីរួមខេត្តនេះមិនគួររំលងតំបន់ប្រវត្តិសាស្ត្រនេះឡើយ។ 
៣.វត្តត្រឡែងកែង៖ វត្តនេះស្ថិតនៅភូមិស្រះចក ឃុំលង្វែក ស្រុកកំពង់ត្រឡាច មានចម្ងាយប្រមាណ ៥១ គ.ម ពីក្រុងកំពង់ឆ្នាំង។ វត្តត្រឡែងកែងជាវត្តដែលមានវ័យចំណាស់ជាងគេនាយុគ្គសម័យលង្វែក ១៥២៥-១៥៩៥ មានឈ្មោះថា ព្រះវិហារមណ្ឌល កសាងឡើងក្នុងរជ្ជកាលព្រះបាទអង្គច័ន្ទរាជា ១៥២៥-១៥៦៧ ដើម្បីឧទ្ទិសដល់ជ័យជំនះរបស់ទ្រង់ក្នុងការធ្វើសឹកសង្គ្រាមប្រឆាំងនឹងការគ្រងរាជ្យសម្បត្តិរបស់ស្តេច កន និងជាជ័យជំនះលើពួកបច្ចាមិត្តបរទេសដែលចូលមកលុកលុយប្រទេសខ្មែរនាសម័យនោះ។ 
៤.រមណីយដ្ឋានទឹកធ្លាក់ធម្មជាតិកូទេសចណ៍ស្រែអំពិល៖ រមណីយដ្ឋាន ទឹកធ្លាក់ធម្មជាតិអេកូទេសចរណ៍ ស្រែអំពិល ស្ថិតនៅភូមិដំណាក់អំពិល ឃុំក្រាំងស្គារ ស្រុកទឹកផុស មានចម្ងាយប្រមាណ ៥៨គ.ម ពីក្រុងកំពង់ឆ្នាំង។ ភ្ញៀវទេសចរអាចទៅទស្សនាលំហែកាយនិងងូតទឹកលេងជាមួយទឹកធ្លាក់ធម្មជាតិដ៏សែនត្រជាក់។ ក្រៅពីនោះក៏អាចកម្សាន្តនៅតំបន់ភ្នំដែលមានទេសភាពស្រស់បំព្រង និងមានដើមឈើតូចធ្វើឲ្យភ្ញៀវទេសចរមកកម្សាន្តម្តងហើយម្តងទៀតឥតឈប់ឈរ៕
