បរទេស៖ អាកាសធាតុក្តៅខ្លាំងបានធ្វើឱ្យទុរេននៅក្នុងកសិដ្ឋានថៃទុំមុនអាយុមិនត្រូវស្តង់ដារនិងខូចគុណភាពដែលប៉ះពាល់ដល់ប្រាក់ចំណូលរបស់កសិករ ខណៈការនាំចេញទុរេនវៀតណាមក៏មានការធ្លាក់ចុះខ្លាំងផងដែរដោយសារការប៉ះទង្គិចជាមួយដៃគូប្រកួតប្រជែងម៉ាឡេស៊ី។
ទុរេនជាផលិតផលនាំចេញដ៏សំខាន់មួយដែលនាំមកនូវប្រាក់ចំណេញខ្ពស់នៅក្នុងប្រទេសថៃ និងវៀតណាម។ ទោះជាយ៉ាងណាក៏ដោយ រលកកំដៅដ៏ខ្លាំងនៅអាស៊ីអាគ្នេយ៍ និងការប្រកួតប្រជែងកាន់តែខ្លាំងឡើង បានធ្វើឱ្យទិន្នផលទុរេនធ្លាក់ចុះ ហើយការចំណាយកើនឡើងដល់កម្រិតខ្ពស់។ ដូច្នេះហើយបច្ចុប្បន្នអ្នកដាំទុរេន និងពាណិជ្ជករនៅក្នុងប្រទេសថៃកំពុងមានការព្រួយបារម្ភយ៉ាងខ្លាំង នៅពេលដែលកំដៅផែនដីបានបំផ្លិចបំផ្លាញធ្វើឱ្យខូចឧស្សាហកម្មរបស់ពួកគេ។

កសិករទុរេនឈ្មោះ Busaba Nakpipat អាយុ ៥៤ ឆ្នាំបាននិយាយប្រាប់សារព័ត៌មានថា៖ «ឆ្នាំនេះមានវិបត្តិដោយសារការនាំចេញធ្លាក់ចុះខ្លាំង។ អ្នកស្រី Busaba ដែលបានកាន់កាប់ចម្ការទុរេនរបស់ឪពុកម្តាយនាងនៅខេត្ត Chanthaburi ភាគខាងកើត ដែលជាចម្ការទុរេនដ៏សំខាន់របស់ប្រទេសថៃកាលពីបីទសវត្សរ៍មុន។ អ្នកស្រីបាននិយាយថា៖ «ប្រសិនបើកំដៅនៅតែបន្តកើនឡើងនៅពេលខាងមុខ អ្វីៗនឹងចប់ ហើយកសិករនឹងមិនអាចផលិតទុរេនបានទៀតទេ»។ រដូវទុរេនជាធម្មតាចាប់ផ្តើមពីខែមីនា ដល់ខែមិថុនា ប៉ុន្តែសីតុណ្ហភាពកើនឡើងខ្ពស់ ហក់ឡើងប្រហែល ៤០ អង្សាសេអស់រយៈពេលជាច្រើនសប្តាហ៍នៅក្នុងខេត្តចាន់ថាបុរី ហើយគ្រោះរាំងស្ងួតបានធ្វើឱ្យការប្រមូលផលខ្លី។ យោងតាមអ្នកស្រី Busaba អាកាសធាតុក្តៅ ធ្វើឱ្យផ្លែទុរេនទុំមុនអាយុ និងខូចគុណភាព ក៏ដូចជាគ្មានស្តង់ដារត្រឹមត្រូវ ដែលធ្វើឱ្យតម្លៃទុរេនធ្លាក់ចុះមិនអាចលូតលាស់ដល់ទំហំដែលនាំមកនូវតម្លៃខ្ពស់បំផុតនោះទេ។

បើយោងតាមសារព័ត៌មានវៀតណាមវិញ បច្ចុប្បន្នចម្ការទុរេនក្នុងខេត្ត Tien Giang កំពុងឈានចូលដល់រដូវច្រូតកាត់ ប៉ុន្តែរដូវច្រូតកាត់ដ៏សំខាន់នេះបានធ្វើឱ្យកសិករមិនសប្បាយចិត្តឡើយ ដោយសារផលិតភាពបានធ្លាក់ចុះ ហើយតម្លៃក៏បានធ្លាក់ចុះយ៉ាងខ្លាំងផងដែរ។ យោងតាមអាជីវករដែលមានឯកទេសក្នុងការទិញផ្លែទុរេនដើម្បីនាំចេញ បានឱ្យដឹងថា មូលហេតុដែលនាំឱ្យតម្លៃផ្លែឈើនេះធ្លាក់ចុះយ៉ាងខ្លាំងគឺដោយសារតែ “ការប៉ះទង្គិច” ជាមួយផ្លែទុរេនថៃ និងម៉ាឡេស៊ី។ យោងតាមមន្ទីរកសិកម្ម និងអភិវឌ្ឍន៍ជនបទខេត្ត Tien Giang បច្ចុប្បន្នផ្ទៃដីដាំដុះទុរេនសរុបក្នុងខេត្តមានប្រមាណ ២១.៧៩០ ហិកតា ក្នុងនោះជិត ១៥.០០០ ហិកតាកំពុងដាំផ្លែ។

លោក ទ្រីញ វ៉ាន់ស៊ី ម្ចាស់ចម្ការទុរេន ១ ហិកតា និងជាម្ចាស់ឃ្លាំងទិញផ្លែឈើសម្រាប់នាំចេញបាននិយាយថា កាលពី ២ ខែមុន តម្លៃធូរេន Monthong ជាង ២០ ម៉ឺនដុង/គីឡូក្រាម (ប្រមាណ ២៨,០០០ រៀល) ឥឡូវនេះវាបានធ្លាក់ចុះមកត្រឹម ១០ ម៉ឺនដុង/គីឡូក្រាមប៉ុណ្ណោះ (ប្រមាណ ១២,០០០ រៀល)។ រីឯទុរេន Ri6 តម្លៃ ១៥ ម៉ឺនដុងក្នុងមួយគីឡូក្រាម (ប្រហែល ២០,០០០ រៀល) ឥឡូវធ្លាក់មកត្រឹម ៥៥ ០០០ ដុងក្នុងមួយគីឡូក្រាម (ប្រហែល ៨,០០០ រៀល) វិញ ទោះជាយ៉ាងណាតម្លៃនេះនៅតែចំណេញសម្រាប់កសិករ ប៉ុន្តែមិនដំណើរការល្អដូចមុនទេ៕

ប្រទេសសិង្ហបុរី ៖ យោងតាមការស្រាវជ្រាវថ្មីមួយរបស់សិង្ហបុរីបង្ហាញថា ការលាបជញ្ជាំងផ្ទះអាចជួយកាត់បន្ថយកំដៅផែនដី និងធ្វើឱ្យសីតុណ្ហភាពក្នុងទីក្រុងធ្លាក់ចុះ១.៥អង្សាសេ ។ អាកាសធាតុក្តៅខ្លាំងបណ្តាលឱ្យប៉ះពាល់ដល់ជីវិតមនុស្ស សត្វ និងរុក្ខជាតិ ជាពិសេស ប៉ះពាល់ដល់អ្នករស់នៅក្នុងទីក្រុងធំៗ ហើយពួកគេពុំអាចរត់គេចពីបញ្ហានេះទេ ។

ការស្រាវជ្រាវមួយរបស់សាកលវិទ្យាល័យ Nanyang Technological នៅប្រទេសសិង្ហបុរីបង្ហាញថា ការជ្រើសរើសថ្នាំពណ៌សម្រាប់លាបដំបូលផ្ទះ, ជញ្ជាំង និងចិញ្ចើមផ្លូវក្នុងតំបន់ឧស្សាហកម្មនានាអាចជួយឱ្យសីតុណ្ហភាពក្នុងទីក្រុងធ្លាក់ចុះ១.៥អង្សាសេ ។ បើទោះជាការប្រើប្រាស់ថ្នាំពណ៌កាត់បន្ថយផលប៉ះពាល់ដោយសារអាកាសធាតុក្តៅនៅទីក្រុងធំៗមិនមែនជារឿងថ្មីក្តី ប៉ុន្តែការសាកល្បងអនុវត្តក្នុងតំបន់ជាក់ស្តែងរបស់ការស្រាវជ្រាវនេះបង្ហាញថា វាអាចជួយកាត់បន្ថយសីតុណ្ហភាពក្នុងទីក្រុងធំៗពិតមែន ។

កន្លងមក ការស្រាវជ្រាវភាគច្រើនពាក់ព័ន្ធនឹងការលាបថ្នាំផ្ទះច្រើនតែសាកល្បងធ្វើលើគំរូ ប៉ុន្តែអ្នកស្រាវជ្រាវរបស់សាកលវិទ្យាល័យ Nanyang Technological បានអនុវត្តការសាកល្បងក្នុងតំបន់ជាក់ស្តែង ។ ពួកគេអាចប្រៀបធៀបសីតុណ្ហភាពរវាងតំបន់លាបថ្នាំពណ៌ជាមួយតំបន់ផ្សេងទៀត តាមរយៈការត្រួតពិនិត្យការបម្លាស់ទីរបស់អាកាសធាតុ, សំណើម និងវិទ្យុសកម្មកំដៅរយៈពេល២ខែ ហើយពួកគេរកឃើញថា តំបន់លាបថ្នាំពណ៌ Cool Paint អាចកាត់បន្ថយកំដៅរហូតដល់៣០% ។

អ្នកស្រាវជ្រាវម្នាក់ឈ្មោះ Kiran Kumar Donthu និយាយថា ៖ «ការស្រាវជ្រាវរបស់យើងបង្ហាញថា ការលាបថ្នាំ Cool Paint អាចជួយកាត់បន្ថយកំដៅផែនដី និងធ្វើឱ្យសីតុណ្ហភាពក្នុងទីក្រុងធំៗធ្លាក់ចុះ» ។

ការរកឃើញនេះនឹងក្លាយជាប្រយោជន៍សម្រាប់ទីក្រុងផ្សេងៗ ដែលកំពុងស្វែងរកវិធីកាត់បន្ថយកំដៅផែនដីយ៉ាងឆាប់រហ័ស និងសន្សំសំចៃប្រាក់សម្រាប់ដោះស្រាយបញ្ហាកំដៅ ដែលបណ្តាលឱ្យប៉ះពាល់ដល់ជីវិតមនុស្ស ។ វាមិនត្រឹមតែជាប្រយោជន៍សម្រាប់សិង្ហបុរី ដែលមានអាកាសធាតុក្តៅពេញមួយឆ្នាំប៉ុណ្ណោះទេ ប៉ុន្តែវានឹងផ្តល់ប្រយោជន៍សម្រាប់ទីក្រុងផ្សេងទៀតដែលកំពុងប្រឈមនឹងកំដៅខ្លាំង ហើយប្រទេសនានាលើពិភពលោកត្រូវសហការគ្នាដោះស្រាយបញ្ហានេះ ។

សាស្ត្រាចារ្យប្រធានក្រុមស្រាវជ្រាវ ឈ្មោះ Wan Man Pun និយាយថា ៖ «កំដៅផែនដីបានធ្វើឱ្យមនុស្សចាប់ផ្តើមរកវិធីរក្សាភាពត្រជាក់កាន់តែខ្លាំង ហើយការស្រាវជ្រាវរបស់យើងបញ្ជាក់ថា ការលាបថ្នាំពណ៌ Cool Paint គឺជាវិធីកាត់បន្ថយផលប៉ះពាល់ពីរលកកំដៅក្នុងទីក្រុងនាថ្ងៃអនាគត» ៕

ប្រទេសថៃ ៖ មន្ត្រីគណៈកម្មការអប់រំមូលដ្ឋានប្រទេសថៃបានកំណត់ឱ្យសាលារៀនទាំងអស់ផ្អាកសកម្មភាពនៅក្រោមកំដៅថ្ងៃ ក្នុងអំឡុងពេលបើកបវសនកាលថ្មី ឆ្នាំ២០២៤ ហើយបើអាកាសធាតុកាន់តែក្តៅខ្លាំងធ្វើឱ្យប៉ះពាល់ដល់សិស្សសាលា សាលាអាចបង្រៀនសិស្សតាមអនឡាញ ។ មន្ត្រីអប់រំថៃប្រកាសបែបនេះ ក្រោយពីនៅប្រទេសថៃមានសីតុណ្ហភាពក្តៅខ្លាំងកើនឡើងដល់ជាង៤០អង្សាសេ និងបារម្ភពីផលប៉ះពាល់សុខភាពសិស្ស ។

លោក Thanu Wongchinda អគ្គលេខាធិការនៃគណៈកម្មការអប់រំមូលដ្ឋាននិយាយថា បើតាមនាយកដ្ឋានឧតុនិយមបានព្យាករណ៍អាកាសធាតុក្នុងអំឡុងខែឧសភា ឆ្នាំ២០២៤ ថា នៅពាក់កណ្តាលខែឧសភានេះ តំបន់ភាគខាងជើង, តំបន់ឦសាន និងតំបន់កណ្តាល នឹងមានអាកាសធាតុក្តៅខ្លាំង ព្រមទាំងមានភ្លៀង ផ្គររន្ទះផងដែរ ខណៈខ្យល់មូសុងឆ្លងកាត់តំបន់ខាងជើងប្រទេសថៃ នាពេលថ្ងៃ ។ ហេតុនេះ វាអាចបណ្តាលឱ្យមានគ្រោះថ្នាក់ដល់សិស្ស គ្រូបង្រៀន និងបុគ្គលិកអប់រំ ។

គណៈកម្មការអប់រំមូលដ្ឋានបានណែនាំឱ្យមន្ទីរអប់រំគ្រប់ខេត្ត-ក្រុងជូនដំណឹងទៅកាន់ស្ថាប័នអប់រំនានាអនុវត្តតាមវិធានការ និងការពារគ្រោះថ្នាក់កើតឡើងពីអាកាសធាតុក្តៅខ្លាំងចំពោះសិស្ស គ្រូបង្រៀន និងបុគ្គលិកអប់រំ ក្នុងអំឡុងពេលបើកបវសនកាលថ្មី ឆ្នាំ២០២៤ ដូចខាងក្រោម ៖

១-ផ្អាកការធ្វើសកម្មភាពក្រោមកំដៅថ្ងៃ និងចៀសវាងនៅកណ្តាលវាល
២-រៀបចំកន្លែងផ្តល់ទឹកបរិសុទ្ធឱ្យបានគ្រប់គ្រាន់ក្នុងសាលា
៣-ត្រួតពិនិត្យខ្សែភ្លើង, ឧបករណ៍អគ្គិសនី, ម៉ាស៊ីនត្រជាក់ និងកង្ហា ដើម្បីប្រើប្រាស់ក្នុងសាលា
៤-ករណីអាកាសធាតុក្តៅខ្លាំងប៉ះពាល់ដល់សិស្ស សាលាអាចផ្អាកការបង្រៀនសិស្ស និងបង្រៀនតាមអនឡាញ
៥-ត្រួតពិនិត្យការភ្លេចសិស្សក្នុងរថយន្ត ឬការបណ្តោយឱ្យសិស្សនៅក្នុងរថយន្តចតកណ្តាលថ្ងៃ និង
៦-ផ្តល់ចំណេះដឹង និងវិធីជួយសង្គ្រោះដល់សិស្សពេលជួបអ្នកមានជំងឺដាច់សរសៃឈាមខួរក្បាល (Heat Stroke)

ក្រៅពីនេះ លោក Thanu Wongchinda អគ្គលេខាធិការនៃគណៈកម្មការអប់រំមូលដ្ឋានបានស្នើឱ្យសិស្ស គ្រូបង្រៀន និងបុគ្គលិកអប់រំ ពិនិត្យរោគសញ្ញារបស់ខ្លួន និងមនុស្សនៅជុំវិញ បើមានរោគសញ្ញាជំងឺដាច់សរសៃឈាមខួរក្បាល ត្រូវប្រញាប់រាយការណ៍បន្ទាន់ដើម្បីឱ្យអាជ្ញាធរជួយសង្គ្រោះភ្លាមៗ ។

គួរបញ្ជាក់ថា អាកាសធាតុក្តៅខ្លាំងបានធ្វើឱ្យប្រទេសផ្សេងទៀតនៅតំបន់អាស៊ីអាគ្នេយ៍ប្រកាសបិទសាលារៀនផងដែរ ក្នុងនោះមានហ្វីលីពីន និងបង់ក្លាដែស ។ នៅខែមេសា ឆ្នាំ២០២៤ សីតុណ្ហភាពនៅទីក្រុងម៉ានីល បានកើនឡើងដល់៣៨,៨អង្សាសេ ធ្វើឱ្យក្រសួងអប់រំហ្វីលីពីនប្រកាសបិទសាលារៀននៅទូទាំងប្រទេស ស្មើជាង៤៧.០០០កន្លែង ហើយក្រសួងអប់រំហ្វីលីពីនកំណត់ឱ្យសិស្សរៀនអនឡាញនៅផ្ទះ ព្រោះបារម្ភថា សិស្សនឹងមានផលប៉ះពាល់ផ្នែកសុខភាព ។

ចំណែកក្រសួងអប់រំប្រទេសបង់ក្លាដែស ក៏បានប្រកាសឱ្យបិទសាលារៀនដូចគ្នាដែរ ដោយសារសីតុណ្ហភាពកើនឡើងរហូតដល់៤៣អង្សា ។ សារព័ត៌មានជាច្រើនរាយការណ៍ថា រដ្ឋាភិបាលបង់ក្លាដែស មិនប្រាកដចិត្តថា នឹងអនុញ្ញាតឱ្យបើកសាលានៅពេលណាទេ ព្រោះសិស្សរាប់លាននាក់ពិបាករៀនសូត្រ ហើយការរៀនសូត្រមិនងាយស្រួលដូចនៅសាលា ៕

ប្រទេសជប៉ុន៖ ក្រុមហ៊ុនទូរគមនាគមន៍ជប៉ុនមួយក្រុមបានបង្កើតឧបករណ៍ឥតខ្សែល្បឿនលឿន 6G ដំបូងបង្អស់របស់ពិភពលោក ដែលអាចផ្ទុកទិន្នន័យបានដល់ទៅ ២០ ដងនៃល្បឿន 5G ដោយឧបករណ៍នេះអាចបញ្ជូនទិន្នន័យក្នុងល្បឿន ១០០ ជីហ្គាបៃក្នុងមួយវិនាទី (Gbps) នៅចម្ងាយរហូតដល់ ១០០ ម៉ែត្រ នេះបើយោងតាមការចុះផ្សាយរបស់ Interesting Engineering កាលពីថ្ងៃទី៤ ខែឧសភា ឆ្នាំ២០២៤។
ក្រុមហ៊ុនចំនួនបួនគឺ DOCOMO, NTT Corporation, NEC Corporation និង Fujitsu បានបង្កើតសម្ព័ន្ធភាពសម្រាប់គម្រោងនេះ។ ចាប់តាំងពីឆ្នាំ ២០២១ ក្រុមហ៊ុនទាំងនេះបានសហការលើការស្រាវជ្រាវ និងការអភិវឌ្ឍន៍ទាក់ទងនឹងឧបករណ៍ terahertz ដោយត្រួសត្រាយផ្លូវសម្រាប់យុគសម័យ 6G។

យោងតាមក្រុមហ៊ុន ការធ្វើតេស្តនាពេលថ្មីៗនេះសម្រេចបាននូវការបញ្ជូនល្បឿនលឿនបំផុត ១០០ ជីហ្គាបៃក្នុងមួយវិនាទី (Gbps) នៅលើប្រេកង់ 100 GHz និង 300 GHz នៅចម្ងាយរហូតដល់ ១០០ ម៉ែត្រ។ ដើម្បីបង្កើតឧបករណ៍ 6G ដែលមានល្បឿនលឿនបែបនេះ ក្រុមហ៊ុនសមាជិកនីមួយៗបានរួមចំណែកយ៉ាងធំធេងក្នុងការធ្វើឱ្យប្រសើរឡើងនូវបច្ចេកវិទ្យា sub-terahertz ។ ដោយក្រុមហ៊ុន DOCOMO បានធ្វើការវិភាគការកំណត់រចនាសម្ព័ន្ធប្រព័ន្ធឥតខ្សែសម្រាប់កម្មវិធីទូរគមនាគមន៍ 100 GHz ។ បន្ទាប់មកពួកគេបានកែសម្រួលឧបករណ៍បញ្ជូនឥតខ្សែដើម្បីឱ្យអាចបញ្ជូនទិន្នន័យក្នុងល្បឿនរហូតដល់ 100 Gbps លើសពី 100 ម៉ែត្រ។

រីឯក្រុមហ៊ុន NTT ក៏បានបន្តការអភិវឌ្ឍន៍ឧបករណ៍ឥតខ្សែកម្រិតខ្ពស់ដោយផ្តោតលើឧបករណ៍ 300 GHz ។ សមិទ្ធិផលរបស់ពួកគេបាននាំឱ្យមានការអភិវឌ្ឍន៍ឧបករណ៍ឥតខ្សែ 300 GHz ដែលអាចបញ្ជូនបានក្នុងល្បឿន 100 Gbps លើសពី 100 ម៉ែត្រ។ ចំណែក NEC វិញក៏បានប្រើប្រាស់ធនធានដើម្បីស្រាវជ្រាវដំណោះស្រាយសម្រាប់ប្រព័ន្ធឥតខ្សែ 100 GHz ។ លទ្ធផលគឺអង់តែនអារេសកម្មដំណាក់កាលស្មុគស្មាញ (APAA) ដែលមានច្រើនជាង 100 ផ្នែក។

Fujitsu ដែលជាក្រុមហ៊ុនចុងក្រោយក៏បានបង្កើតបច្ចេកវិទ្យា semiconductor ថ្មីដែលបង្កើនសញ្ញានៅប្រេកង់ 100 GHz និង 300 GHz ជាមួយនឹងដំណើរការខ្ពស់។ អ្នកជំនាញសង្កត់ធ្ងន់ថាសក្ដានុពលនៃបច្ចេកវិទ្យា 6G កម្រិតខ្ពស់គឺគ្មានដែនកំណត់នោះទេ ព្រោះវាផ្តល់នូវការតភ្ជាប់គ្មានថ្នេរនាពេលអនាគត ដែលអនុញ្ញាតឱ្យមានកម្មវិធីជាច្រើនចាប់ពីការបញ្ជូនវីដេអូដែលមាននិយមន័យខ្ពស់រហូតដល់ការគ្រប់គ្រងយានយន្តដោយស្វ័យភាពក្នុងពេលជាក់ស្តែង ខណៈពេលដែលបង្កើនតម្រូវការទំនាក់ទំនង៕

ប្រទេសមីយ៉ាន់ម៉ា ៖ នៅថ្ងៃទី៣ ខែឧសភា ឆ្នាំ២០២៤ សារព័ត៌មានបរទេសរាយការណ៍ថា រដ្ឋាភិបាលយោធាមីយ៉ាន់ម៉ាបានសម្រេចផ្អាកការអនុញ្ញាតឱ្យបុរសទៅធ្វើការនៅក្រៅប្រទេសជាបណ្តោះអាសន្ន ដោយបានអនុវត្តចាប់ពីថ្ងៃទី១ ខែឧសភា ឆ្នាំ២០២៤ ។ ការមិនអនុញ្ញាតឱ្យបុរសទៅធ្វើការនៅក្រៅប្រទេស ក្រោយពីរដ្ឋាភិបាលបានបង្ខំអនុវត្តច្បាប់ប្រមូលកម្លាំងយោធា និងធ្វើឱ្យពលរដ្ឋជាច្រើននាក់ព្យាយាមធ្វើដំណើរចាកចេញពីប្រទេសរបស់ខ្លួន ។

ក្រសួងការងារមីយ៉ាន់ម៉ាបានបញ្ជាក់ក្នុងសេចក្តីថ្លែងការណ៍ ដែលផ្សព្វផ្សាយដោយនាយកដ្ឋានទំនាក់ទំនងសាធារណៈរបស់រដ្ឋាភិបាលថា ក្រសួងនឹងមិនអនុញ្ញាតឱ្យបុរសចេញទៅធ្វើការនៅក្រៅប្រទេសជាបណ្តោះអាសន្ន ដើម្បីត្រួតពិនិត្យចំនួនពលករទៅធ្វើការនៅក្រៅប្រទេស ។

លោក Nyun Wi មន្ត្រីក្រសួងការងារបាននិយាយទៅកាន់ប្រព័ន្ធផ្សព្វផ្សាយ Radio Free Asia Myanmar ថា ការហាមបុរសទៅធ្វើការនៅក្រៅប្រទេស បានអនុវត្ត
ចាប់ពីថ្ងៃទី១ ខែឧសភា ឆ្នាំ២០២៤ ហើយនេះជាវិធានការបណ្តោះអាសន្ន ។ លោកបន្តថា យើងនឹងអនុញ្ញាតឱ្យតែស្ត្រីប៉ុណ្ណោះ ដែលបានចុះឈ្មោះជាពលការិនីបរទេស អាចធ្វើដំណើរចេញក្រៅប្រទេស ។ រីឯបុរសមិនអាចចុះឈ្មោះសុំទៅធ្វើការនៅក្រៅប្រទេសបានទេ ។

លោករដ្ឋមន្ត្រីក្រសួងការងារបន្ថែមថា ចំណែកពលករដែលបានចុះឈ្មោះទៅធ្វើការនៅក្រៅប្រទេស នៅចុងខែមេសា ឆ្នាំ២០២៤ នឹងត្រូវលើកលែង រួមទាំងពលករមួយចំនួនទៀតដែលបានដាក់ពាក្យទៅធ្វើការនៅក្រៅប្រទេស តាមរយៈភ្នាក់ងារស្វែងរកការងារធ្វើ ។

កាលពីខែកុម្ភៈ ឆ្នាំ២០២៤ រដ្ឋាភិបាលយោធាមីយ៉ាន់ម៉ានិយាយថា នឹងបង្ខំអនុវត្តច្បាប់ដែលកំណត់ឱ្យបុរសគ្រប់រូបត្រូវតែចូលបម្រើយោធា យ៉ាងហោចណាស់២ឆ្នាំ ។ ហេតុនេះ ធ្វើឱ្យពលរដ្ឋរាប់ពាន់នាក់តម្រង់ជួរស្នើសុំទិដ្ឋាការនៅស្ថានទូតក្នុងទីក្រុងយ៉ាំងហ្គោន ខណៈពលរដ្ឋជាច្រើននាក់ទៀតធ្វើដំណើរទៅប្រទេសថៃ ដើម្បីគេចខ្លួនពីកាតព្វកិច្ចយោធា ។

តាមការវាយតម្លៃរបស់អង្គការពលកម្មអន្តរជាតិ នៅឆ្នាំ២០២៣ បង្ហាញថា ពលរដ្ឋមីយ៉ាន់ម៉ាជាង៤លាននាក់បានទៅធ្វើការនៅក្រៅប្រទេស ។ ប៉ុន្តែអ្នកវិភាគនិយាយថា មានពលរដ្ឋមីយ៉ាន់ម៉ាទៅធ្វើការនៅក្រៅប្រទេស ច្រើនជាងតួលេខផ្លូវការ ។

អ្នកនាំពាក្យរដ្ឋាភិបាលយោធានិយាយថា ច្បាប់នេះមានភាពចាំបាច់ ដោយសារស្ថានការណ៍បានកើតឡើងនៅមីយ៉ាន់ម៉ា ហើយយោធាមីយ៉ាន់ម៉ាត្រូវតស៊ូជាមួយកងកម្លាំងការពារប្រជាជន និងក្រុមប្រដាប់អាវុធជនជាតិភាគតិច ។

រីឯក្រុមអ្នកសង្កេតការណ៍នៅមីយ៉ាន់ម៉ានិយាយថា តាំងពីការធ្វើរដ្ឋប្រហារនៅខែកុម្ភៈ ឆ្នាំ២០២១ មានមនុស្សស្លាប់ជាង៤.៩០០នាក់ក្នុងអំឡុងពេលបង្ក្រាបក្រុមប្រឆាំង ខណៈមនុស្សជាង២៦.០០០នាក់ទៀតត្រូវបានចាប់ខ្លួន ៕