បន្ទាប់ពីអ្នកបង្កើតមាតិកា A Dose of Cath បានកាត់វីដេអូស្រង់សម្តីមួយផ្នែករបស់ម្តាយខ្លួនតារាចម្រៀង ម៉ានិត បងប្រុស ម៉ានុត ចេញមកឆ្លើយតបទៅកាន់ A Dose of Cath យ៉ាងវែងអន្លាយប្រកបដោយសម្តីចិត្តត្រជាក់តែមុតស្រួចទៅកាន់អ្នកបង្កើតមាតិការូបនេះ។ ម៉ានិត និយាយដោយក្តីសង្ឃឹមទៅកាន់ A Dose of Cath សម្លឹងមើលឱ្យបានគ្រប់ជ្រុងជ្រោយមុននឹងបញ្ចេញមតិ និងជូនពរឱ្យនាងមានអ្នកគាំទ្រកាន់តែច្រើន និងអាចស្វែងរកអ្នកដែលស្រលាញ់នាងស្មោះស្ម័គ្រមួយនឹងមួយដូចឪពុកម្ដាយរបស់លោក។

កាលពីយប់ថ្ងៃទី២៤ ឧសភា អ្នកបង្កើតមាតិកា A Dose of Cath បានបង្ហោះវីដេអូជាង៥នាទីដោយដាក់ចំណងជើងថា «គ្រាន់តែស្តាប់ទៅហត់ណាស់ ធ្វើរឿងទាំងអស់នេះដើម្បីចងចិត្តគេ ដើម្បីផ្គាប់ចិត្តគេ»។ វីដេអូដែលរូបនាងយកមកភ្ជាប់យកមកបង្កើតចេញជាមាតិកាមួយនេះត្រូវបានគេដឹងថាជាក្រុមគ្រួសាររបស់តារាចម្រៀង ម៉ុង ម៉ានុត។ វីដេអូមួយនេះបានបង្កឱ្យមានការចាប់អារម្មណ៍យ៉ាងខ្លាំង ខណៈ ជា ស្រីនា និងលោក ជា វណ្ណារិទ្ធ ក៏បានចូលទៅបញ្ចញមតិឱ្យគោរពតាមការសម្រេចចិត្តរបស់មនុស្សម្នាក់ៗព្រោះគ្រួសារនីមួយៗរស់នៅមិនដូចគ្នាឡើយ។

ទន្ទឹមនឹងនេះតារាចម្រៀង ម៉ានិត ដែលទើបបង្ហាញខ្លួននៅកម្រាលព្រំក្រហមមហោស្រពភាពយន្តកានបានចូលទៅឆ្លើយតបនៅក្នុងវីដេអូនោះដោយសម្តីយ៉ាងត្រជាក់ទៅកាន់ A Dose of Cath ប៉ុន្តែដោយភាពមុតស្រួច ខណៈបានទម្លាយពីជីវិតម្តាយរបស់ខ្លួនមានជំងឺប៊ិះស្លាប់ថែមទៀត។

ម៉ានិត បានចូលទៅខម្មិនលើវីដេអូរបស់ A Dose of Cath ថា «សួស្ដី Cath ខ្ញុំឈ្មោះម៉ានិត ហើយស្ត្រីនៅក្នុងវីដេអូដែលcathស្ដាប់គាត់ទៅមានអារម្មណ៍ហត់នេះជាម្ដាយរបស់ខ្ញុំ។ មាតិកាដែលអ្នកបង្កើតពិតជាល្អណាស់ ដែលភាគច្រើននិយាយពីសមភាពយេនឌ័រ និងឯករាជ្យភាពក្នុងភាពជាស្ត្រី ឬមាតិកាអំពីសុខភាពផ្លូវភេទដែលប្រជាជនខ្មែរគួរដឹង។ ខ្ញុំដឹងច្បាស់ថាខេតមិនបានមើលវីដេអូសម្ភាសម្ដាយឪពុកខ្ញុំដល់ចប់ឡើយ បើតាមស្ដាប់ការរៀបរាប់របស់អ្នក»។

តារាចម្រៀងនិងជាអ្នកនិពន្ធរូបនេះ បានបន្ថែមថា «ម្ដាយរបស់ខ្ញុំបាននិយាយអំពីវិធីចងចិត្តប្ដី ដោយមើលថែផ្ទះសម្បែង ឬម្ហូបអាហារជាដើម។ បើស្ដាប់តែមួយកំណាត់ ពិតជាមើលទៅដូចជាស្ត្រីមួយរូបនេះមិនធ្វើអ្វីសម្រាប់ខ្លួនឯងសោះ ខ្លាចប្ដីក្បត់មានស្រី ទើបប្រឹងធ្វើគ្រប់យ៉ាងដើម្បីបុរស ដូចដែលអ្នកបានរៀបរាប់ក្នុងវីដេអូខាងលើ។ ម្ដាយរបស់ខ្ញុំជាស្ត្រីដែលឆ្លងកាត់ជំងឺគ្រុនឈាមប៊ិះស្លាប់ម្ដង ការវះកាត់ពីរដងដោយសារជំងឺមហារីកស្បូន និងមហារីកសុដន់។ គាត់បានកាត់ស្បូន និងដោះមួយចំហៀងចោល។ ភាពជាស្ត្រីភាពរបស់គាត់គឺនៅសល់តែដោះមួយចំហៀង និងក្ដីស្រលាញ់ដ៏ធំធេងចំពោះស្វាមី និងកូនៗ៣នាក់។ ក្ដីស្នេហារបស់ពួកគាត់គឺសាមសិបឆ្នាំហើយ ដែលនេះជាហេតុផលដែលគេអញ្ជើញពួកគាត់ទៅស្វែងយល់ពីជីវិតអាពាហ៍ពិពាហ៍ជីវិតគូជោគជ័យរបសពួកគាត់ ទាំងដែលម្ដាយខ្ញុំនៅសល់តែសុដន់មួយចំហៀងជិត១០ឆ្នាំក្រោយនេះ។ នេះជាអ្វីដែលម្ដាយខ្ញុំសំដៅលើ ទោះបីជាគាត់ឈឺធ្ងន់ឈឺច្រើន គ្មានភាពជាស្ត្រីពេញលក្ខណៈដើម្បីបំពេញចិត្តប្ដី តែឪពុកខ្ញុំមិនដែលក្បត់ម្ដាយខ្ញុំសូម្បីម្ដង។ ព្រោះក្ដីស្រលាញ់ពិតមិនឋិតនៅលើក្ដីសុខផ្លូវភេទតែមួយមុខនោះទេ។ លើសពីនេះ ក្ដីស្រលាញ់ជាការផ្ដល់ឱ្យដោយមិនចង់បានអ្វីត្រលប់ទៅវិញ it must be earn ឯជីវិតគូគឺជាជីវិតដែលមិនអាត្មានិយម។ ភាពអាត្មានិយមក្នុងជីវិតគូ គឺឆ្ពោះទៅការចែកផ្លូវ លែងលះ និងនាំបញ្ហាដល់កូនៗ។ ការលះបង់គ្រប់យ៉ាងរបស់ម្ដាយខ្ញុំចំពោះឪពុកខ្ញុំ គឺការលះបង់ដោយភាពពេញចិត្ត ឯឪពុកខ្ញុំក៏បានលះបង់ជាច្រើនសម្រាប់គ្រួសារ និងជួយភរិយាពេញដៃពេញជើងរៀងរាល់ចុងសប្ដាហ៍នៅហាង និងមើលថែថ្នាំសង្កូវ ឈឺថ្កាត់រត់ឆ្លងប្រទេសសឹងមួយជីវិតទៅហើយ។ លទ្ធផលដែលទទួលបាន គឺជីវិតគូចិត្តស្មោះមួយនិងមួយ កូនៗធំឡើងប្រកបដោយសុខភាពកាយ និងចិត្តពេញលេញបរិបូរណ៍ នាំកិត្តិយសដល់គ្រួសារ ខ្លួនឯង និងប្រទេសជាតិ។ គ្មានអ្វីដែលបានល្អ ដោយគ្មានការលះបង់ឡើយ»។

ម្ចាស់បទ«មិត្តចេះប្រច័ណ្ឌ»រូបនេះលើកឡើងទៀតថា «ការគិតពីខ្លួនឯងតែម្យ៉ាង គឺមានផលល្អសម្រាប់តែខ្លួនឯង តែជីវិតយើងមិនអាចរស់នៅម្នាក់ឯងឡើយ។ នេះហើយទើបគេបង្រៀនឱ្យយើងចេះស្រលាញ់ គោរព ស្មោះត្រង់ចំពោះមនុស្សនៅជុំវិញខ្លួន មិនតែគូស្វាមីភរិយាប៉ុណ្ណោះទេ។ ការប្រឹងប្រែងរបស់ឪពុកម្ដាយខ្ញុំកន្លងមក ដើម្បីគ្រួសារបានផលហើយរាល់ថ្ងៃនេះ ម្ដាយខ្ញុំមានពេលសម្រាកគ្រប់គ្រាន់ សប្បាយចិត្ត កូនៗរឹងមាំ មានរបរនឹងនរស្របច្បាប់ និងអាចដើរលេងជុំវិញពិភពលោកដោយងាយ។ នេះគឺដោយសារតែការដាក់ទុនលះបង់កន្លងមក មើលថែផ្ទះ មើលថែកូន ធ្វើការរកលុយ អាហារល្អៗ បរិស្ថានរស់នៅល្អសម្រាប់សុខភាពគ្រួសារ ដោយរួមចំណែកពីឪពុករបស់ខ្ញុំគ្រប់ភារកិច្ច។ Everything must be earn»។

ម៉ានិត បានបន្ថែមចុងក្រោយដោយសំណេរមុតស្រួចថា «ខ្ញុំសង្ឃឹមថាអ្នកបង្កើតមាតិកាមានឥទ្ធិពលដូចខេត នឹងសម្លឹងមើលឲ្យបានគ្រប់ជ្រុងជ្រោយមុននឹងបញ្ចេញមតិ ព្រោះខ្ញុំជឿថាមនុស្សឆ្លាតដូចជាខេត ពិតជាចង់បញ្ជៀតគំនិតវិជ្ជមានដល់អ្នកមើលមាតិការបស់អ្នក។ ខ្ញុំជូនពរខេតឱ្យមានអ្នកគាំទ្រកាន់តែច្រើន និងអាចស្វែងរកអ្នកដែលស្រលាញ់ខេតស្មោះស្ម័គ្រមួយនិងមួយដូចឪពុកម្ដាយខ្ញុំ»៕

នៅពេលដែលសម្លៀកបំពាក់របស់អ្នកមានស្នាមជ្រីវជ្រួញបន្ទាប់ពីយកចេញពីទូ គឺដោយសារតែសម្លៀកបំពាក់នោះមិនត្រូវបានបត់ដោយត្រឹមត្រូវ។ ហេតុនេះដើម្បីរក្សាសម្លៀកបំពាក់ឱ្យរលោង និងត្រង់ស្អាត មានភ្លីខោអាវត្រង់តាមស្តង់ដារ មនុស្សភាគច្រើនតែងតែប្រើប្រាស់ឆ្នាំងអ៊ុតដើម្បីអ៊ុតខោអាវ ទោះជាយ៉ាងណាប្រសិនបើអ្នកគ្មានឆ្នាំងអ៊ុតទេ ឬឆ្នាំងអ៊ុតរបស់អ្នកខូច អ្នកគួរអនុវត្តវិធីទាំងនេះដើម្បីបំបាត់ស្នាមជ្រួញពីសម្លៀកបំពាក់៖

១.ព្យួរខោអាវក្នុងបន្ទប់ទឹក៖ នៅពេលអ្នកចូលបន្ទទឹក សូមព្យួរសម្លៀកបំពាក់ដែលជ្រីវជ្រួញនៅជិតកន្លែងងូតទឹក ដើម្បីស្រូបចំហាយទឹក ហើយផ្នត់ទាំងនោះនឹងធូរស្រាល។ ចំហាយទឹកក្នុងផ្កាឈូកអាចលុបស្នាមជ្រួញចេញពីសម្លៀកបំពាក់ក្នុងរយៈពេល ១៥ នាទី។ សូមចំណាំថា អ្នកគួរតែបង្វែរក្បាលផ្កាឈូកចេញ ដើម្បីកុំឱ្យសម្លៀកបំពាក់របស់អ្នកសើមជោគខ្លាំង អ្នកអាចប្រើវិធីនេះពេលងូតទឹក ដើម្បីចៀសវាងការខ្ជះខ្ជាយទឹក។

២.ប្រើកន្សែងសើម៖ ប្រើកន្សែងស្អាត ខណៈពេលដែលកន្សែងនៅតែសើម ដាក់វាលើសម្លៀកបំពាក់ ហើយបន្ទាប់មកប្រើដៃរបស់អ្នក ជូតវាត្រង់លើផ្ទៃកន្សែង។ ធ្វើបែបនេះប្រហែល ១០ នាទី សម្លៀកបំពាក់នឹងលែងមានស្នាមជ្រួញទៀតហើយ។

៣.ប្រើម៉ាស៊ីនកៀបសក់៖ វិធីសាស្ត្រនេះពិតជាងាយស្រួល និងសន្សំសំចៃពេលវេលា ហើយមានប្រសិទ្ធភាពសូម្បីតែលើការលុបស្នាមជ្រួញនៅលើក ឬដៃអាវក៏ដោយ។ អាស្រ័យហេតុនេះ ការប្រើម៉ាស៊ីនកៀបសក់ស្អាត ហើយបើកសីតុណ្ហភាពល្មម ដើម្បីអ៊ុតអាវឱ្យត្រង់ ប្រយ័ត្នកុំឱ្យសីតុណ្ហភាពឡើងខ្ពស់ពេក ដើម្បីជៀសវាងការឆេះសម្លៀកបំពាក់របស់អ្នក។

៤.ប្រើទឹកខ្មេះពណ៌ស៖ លាយទឹកខ្មេះជាមួយទឹកក្នុងសមាមាត្រ ១:៣ បន្ទាប់មកចាក់ចូលទៅក្នុងដបបាញ់លើខោអាវ។ ប្រើដំណោះស្រាយនេះបាញ់កន្លែងដែលមានស្នាមជ្រីវជ្រួញលើសម្លៀកបំពាក់ ហើយស្នាមជ្រីវជ្រួញនឹងបាត់ទៅវិញ។ ក្រៅពីជួយសម្លៀកបំពាក់កម្ចាត់ស្នាមជ្រីវជ្រួញ ល្បាយនេះក៏ធ្វើឱ្យសាច់ក្រណាត់ស និងទន់ជាងមុនផងដែរ។

៥.ប្រើម៉ាស៊ីនផ្លុំសក់៖ ប្រោះទឹកបន្តិចលើសម្លៀកបំពាក់ រួចលាតវាឱ្យត្រង់ ហើយប្រើម៉ាស៊ីនផ្លុំសក់ឱ្យស្ងួតពីលើចុះក្រោម ដែលវិធីនេះនឹងធ្វើឱ្យស្នាមជ្រួញលើសម្លៀកបំពាក់បាត់យ៉ាងងាយ។ ទោះជាយ៉ាងណាវិធីសាស្ត្របំបាត់ស្នាមជ្រីវជ្រួញពីសម្លៀកបំពាក់ដោយមិនប្រើឆ្នាំងអ៊ុតគឺជាវិធានការបណ្តោះអាសន្នប៉ុណ្ណោះ។ មធ្យោបាយដ៏ល្អបំផុតដើម្បីឱ្យសំលៀកបំពាក់ត្រង់តាមធម្មជាតិ គឺនៅពេលដែលអ្នកបោកគក់ចប់ សូមពូតសម្ងួតភ្លាមៗ ហើយរលាស់ខោអាវទាំងអស់ឱ្យរាបស្មើ រួចព្យួរវាឱ្យស្ងួត។ ការធ្វើបែបនេះ អ្នកនឹងទទួលបានសម្លៀកបំពាក់រលោងស្អាតរាល់ពេលចេញក្រៅ ដោយមិនចាំបាច់ប្រើឆ្នាំងអ៊ុតជាប្រចាំឡើយ៕

សារមន្ទីរសេដ្ឋកិច្ច និងរូបិយវត្ថុ ព្រះស្រីឦសានវរ្ម័ន ហៅកាត់ ស.ស.រ ជាសារមន្ទីរបែបទំនើបមួយនៅកម្ពុជា ដែលនិយាយអំពីប្រវត្តិសាស្រ្ត នយោបាយ និងសេដ្ឋកិច្ចនៃរូបិយវត្ថុជាច្រើនសម័យកាលរហូតមកដល់បច្ចុប្បន្ន។

សារមន្ទីរនេះ(ស.ស.រ) មិនផ្តោតលើការប្រមូលផ្តុំរូបិយវត្ថុបុរាណពេកនោះទេ ប៉ុន្តែផ្ទុយទៅវិញវាផ្តោតទៅលើបទបង្ហាញ និងការអត្ថាធិប្បាយអំពីទំនាក់ទំនង រវាងរូបិយវត្ថុជាមួយស្ថាប័ន និងសង្គម ប្រវត្តិសេដ្ឋកិច្ចនិងនយោបាយ នៅកម្ពុជាជាងពីរពាន់ឆ្នាំ។
ស.ស.រ បានបើកដំណើរការជាផ្លូវការនៅថ្ងៃទី៨ ខែមេសា ឆ្នាំ២០១៩។ ក្រោយបានកែសម្រួលពីអគារចាស់ទ្រុឌទ្រោមមួយ សារមន្ទីរត្រូវបានរៀបចំឡើងលម្អដោយផ្ទាំងកញ្ចក់យ៉ាងទំនើប។

សម្រាប់ការចូលទស្សនាវិញ សារមន្ទីរនេះ(ស.ស.រ) បើឱ្យភ្ញៀវចូលទស្សនាចាប់ពីថ្ងៃអង្គារ ដល់ ថ្ងៃអាទិត្យ ពីម៉ោង៩ព្រឹក ដល់៦ល្ងាច ដោយអ្នកចូលទស្សនាតម្រូវឱ្យទិញសំបុត្រជាមុនសិន។ នៅក្នុងនោះសំបុត្រសម្រាប់ភ្ញៀវជាតិ គឺ ៤ពាន់រៀល ចំណែក ភ្ញៀវបរទេសមានតម្លៃ ២ម៉ឺនរៀល។ សំបុត្រសម្រាប់កុមារ និងនិស្សិត មានតម្លៃ ២ពាន់រៀល។ ដោយឡែក ចំពោះព្រះសង្ឃ សារមន្ទីរមិនគិតថ្លៃសំបុត្រឡើយ។
សូមបញ្ជាក់ផងដែរថា សារមន្ទីរ ស.ស.រ ស្ថិតនៅអាគារលេខ១៩ រុក្ខវិថីព្រះមហាក្សត្រីយានីកុសមៈ ផ្លូវលេខ១០៦ សង្កាត់វត្តភ្នំ ខណ្ឌដូនពេញ រាជធានីភ្នំពេញ ពោលនៅលើបរិវេណអតីតសាលាក្រុងភ្នំពេញ៕

នៅថ្ងៃទី៣ ខែមិថុនា ឆ្នាំ២០២៤ ចាប់ពីម៉ោង ៦:០០នាទីព្រឹក គណៈកម្មាធិការជាតិរៀបចំបុណ្យជាតិ-អន្តរជាតិ នឹងរៀបចំព្រះរាជពិធីដង្ហែ និងថ្វាយព្រះភ្លើងព្រះបរមសព សម្តេចព្រះអគ្គមហាសង្ឃរាជាធិបតី កិត្តិឧទ្ទេសបណ្ឌិត ទេព វង្ស សម្តេចព្រះមហាសង្ឃរាជ នៃព្រះរាជាណាចក្រកម្ពុជា។

ជុះវិញព្រះរាជពិធីដង្ហែនេះ រដ្ឋបាលរាជធានីភ្នំពេញ នឹងបញ្ចៀសចរាចរជាបណ្តោះអាសន្ននូវយានយន្តគ្រប់ប្រភេទដែលធ្វើដំណើរតាមតម្រាយផ្លូវដង្ហែ និងជុំវិញទីតាំងប្រារព្ធព្រះរាជពិធីថ្វាយព្រះភ្លើងនៅថ្ងៃទី៣ ខែមិថុនា ឆ្នាំ២០២៤ ចាប់ពីម៉ោង ០៤:០០នាទីព្រឹក រហូតដល់បញ្ចប់ព្រះរាជពិធីតាមតម្រាយផ្លូវដង្ហែព្រះបរមសព ដែលចាប់ផ្តើមដង្ហែចេញពីវត្តឧណ្ណាលោម តាមតីរវិថីព្រះស៊ីសុវត្ថិ រហូតដល់រង្វង់មូលដើមពោធិ៍ទន្លេសាប បត់ឆ្វេងមកវិថីបក្សីចាំក្រុង (ផ្លូវលេខ៩៤) រង្វង់មូលវត្តភ្នំ ឆ្ពោះទៅតាមមហាវិថីព្រះនរោត្តម រហូតដល់រង្វង់មូលវិមានឯករាជ្យ បត់ឆ្វេងតាមមហាវិថីព្រះសីហនុ ឆ្ពោះទៅវិថីឧកញ៉ាសួរស៊្រុន រហូតដល់ទីតាំងព្រះមេរុ និងការថ្វាយព្រះភ្លើង (នៅខាងមុខវត្តបទុមវតី)៕