ប្រទេសចិន ៖ កាលពីថ្ងៃទី៥ ខែមិថុនា ឆ្នាំ២០២៤ សារព័ត៌មានបរទេសរាយការណ៍ថា ភ្ញៀវទេសចរដែលស្រឡាញ់ធម្មជាតិ និងព្យាយាមឡើងទៅលើកំពូលភ្នំ ដើម្បីគយគន់ទេសភាពទឹកជ្រោះមានកម្ពស់ខ្ពស់បំផុតនៅប្រទេសចិន និងតំបន់អាស៊ី បានស្រឡាំងកាំងនិយាយលែងចេញ ដោយសារតែឃើញថា វាជាទឹកជ្រោះក្លែងក្លាយ ។

មនុស្សនៅទូទាំងពិភពលោកបានជ្រាបថា ជនជាតិចិនតែងតែចម្លងម៉ូដផលិតផលផ្សេងៗ និងចម្លងដូចផលិតផលដើមបេះបិទ ។ ប៉ុន្តែករណីមួយនេះបានធ្វើឱ្យមហាជនភ្ញាក់ផ្អើលគ្រប់គ្នា ជាពិសេស ភ្ញៀវទេសចរស្រឡាញ់ធម្មជាតិ ឬចូលចិត្តឡើងភ្នំ ពីព្រោះអ្វីដែលពួកគេមើលឃើញនោះ គឺមិនដូចនឹងការគិតទុកឡើយ ។

កាលពីថ្ងៃទី៥ ខែមិថុនា ឆ្នាំ២០២៤ ប្រព័ន្ធផ្សព្វផ្សាយបរទេសបានបង្ហាញពីទឹកជ្រោះមួយកន្លែងនៅភ្នំ Yuntai ខេត្ត Henan ប្រទេសចិន និងធ្វើឱ្យមហាជនរិះគន់យ៉ាងខ្លាំងថា វាជាទឹកជ្រោះក្លែងក្លាយ ប៉ុន្តែបែរជាជាប់ចំណាត់ថ្នាក់ជាទឹកជ្រោះមានកម្ពស់ខ្ពស់បំផុតនៅចិន និងតំបន់អាស៊ី ។

អាថ៌កំបាំងត្រូវបានបែកធ្លាយ ក្រោយពីបុរសជាភ្ញៀវទេសចរម្នាក់ព្យាយាមឡើងទៅលើកំពូលភ្នំ Yuntai អស់ជាច្រើនម៉ោង ដើម្បីគយគន់ទេសភាពដ៏ស្រស់ស្អាតរបស់ប្រភពទឹកជ្រោះ ។ ប៉ុន្តែអ្វីដែលធ្វើឱ្យបុរសរូបនេះភ្ញាក់ផ្អើលខ្លាំងនោះ គឺវាមិនមែនជាទឹកជ្រោះកើតឡើងតាមធម្មជាតិទេ ការពិត ទឹកជ្រោះនេះហូរចេញពីបំពង់បង្ហូរទឹកម៉ាស៊ីន ។ ដូច្នេះ បុរសខាងលើក៏បានថតរូបភាពទឹកជ្រោះយកមកបង្ហោះក្នុងបណ្តាញសង្គម ។

ក្រោយពីរូបភាពទឹកជ្រោះនេះបានផ្សព្វផ្សាយក្នុងបណ្តាញសង្គម ធ្វើឱ្យគេចែកចាយយ៉ាងច្រើនរហូតដល់ល្បីល្បាញភ្លាមៗ និងពុំនឹកស្មានថា ទឹកជ្រោះមានកម្ពស់ខ្ពស់បំផុតនៅតំបន់អាស៊ី បែរជាហូរចេញពីទឹកម៉ាស៊ីនបែបនេះសោះ ។ កន្លងមក ទឹកជ្រោះនេះបានទាក់ទាញភ្ញៀវទេសចរមកកម្សាន្តរាប់មិនអស់ទេ ប៉ុន្តែការពិត វាជាទឹកជ្រោះក្លែងក្លាយតែប៉ុណ្ណោះ ។

ភ្ញៀវទេសចរខ្លះនិយាយថា កាលពីឆ្នាំ២០២៣ ខ្លួនបានមកកម្សាន្តនៅទឹកជ្រោះនេះ និងផឹកទឹកជ្រោះទៀតផង ហើយវាមានក្លិនស្រដៀងនឹងទឹកម៉ាស៊ីន ។ រីឯភ្ញៀវទេសចរខ្លះទៀតប្រាប់ថា គួរឱ្យសោកស្តាយណាស់ដែលខំចំណាយប្រាក់អស់យ៉ាងច្រើន ពីព្រោះចង់ឃើញទិដ្ឋភាពបែបធម្មជាតិ ប៉ុន្តែដូចនាំគ្នាមកងូតទឹកម៉ាស៊ីន ៕

កាលពីថ្ងៃទី៤ ខែមិថុនា ឆ្នាំ២០២៤នេះ ក្រុមហ៊ុនយក្ស Toyota ប្រកាសថានឹងប្រមូលរថយន្តទៅលើ២ម៉ូដែល ប្រមាណនឹង១០០,០០០ គ្រឿងមកវិញ ដោយបារម្ភថាមានកម្ទេចកម្ទីនៅខាងក្នុងម៉ាស៊ីនរថយន្តទាំងនោះ ដែលអាចនឹងបណ្តាលឱ្យវារលត់ ឬក៏មានបញ្ហាភ្លាមៗ អំឡុងពេលបើកបរ។

យោងតាមរបាយការណ៍ពីរដ្ឋបាលសុវត្ថិភាពចរាចរណ៍ផ្លូវហាយវេជាតិ (NHTSA) បានឲ្យដឹងថា ការប្រមូលមកវិញនេះគឺទៅលើតែប្រភេទរថយន្តចំនួន ២ម៉ូដែល ដែលផលិតក្នុងឆ្នាំ២០២២និង២០២៣ រួមមាន Lexus LX SUVs ប្រមាណនឹង ៣៥០០ គ្រឿង និងរថយន្តភីកអាប់ Toyota Tundra ប្រមាណជិត ១០០,០០០គ្រឿង ដែលនឹងនាំត្រូវចូលមកកាន់រោងចក្រវិញ។

បើយោងតាមភ្នាក់ងារជំនាញបានឲ្យដឹងថា ការដែលត្រូវប្រមូលរថយន្តមវិញនេះ គឺដើម្បីតាមដាននិងពិនិត្យឡើងវិញ ព្រោះថាម៉ូដែលទាំង២ខាងលើនេះត្រូវបានបំពាក់ជាមួយនឹងម៉ាស៊ីន V35A។ ខណៈពេលថ្មីៗនេះក្រុមហ៊ុនបានរកឃើញថា នៅក្នុងម៉ាស៊ីនដែលបានបំពាក់ក្នុងរថយន្តទាំងនោះ គឺមិនបានធ្វើបានសម្អាតកំទេចកំទីត្រឹមត្រូវក្នុងអំឡុងពេលដំឡើង ដែលនេះគឺអាចនឹងបណ្តាលឲ្យផ្នែកខ្លះរលុង ឬខូចម៉ាស៊ីនតែម្តង។

ដូច្នេះហើយ ការប្រមូលរថយន្តមកវិញលើកនេះ គឺជាមធ្យោបាយតែមួយគត់ដើម្បីដោះស្រាយបញ្ហា ខុសបច្ចេកទេសលើផលិតកម្មរថយន្តដែលបានចេញលក់ជាផ្លូវរួចទៅហើយនោះ។ ជាមួយគ្នានោះ ទីភ្នាក់ងារក៏បានបញ្ជាក់ទៀតថា ក្រុមហ៊ុននឹងចេញការជួសជុលដោយមិនគិតថ្លៃនោះទេ ហើយរបាយការណ៍លម្អិតនៃការប្រមូលរថយន្តមកវិញ ក្រុមហ៊ុននឹងផ្តល់ដំណឹងជូនម្ចាស់រថយន្តនាខែកក្កដានេះ។

គួរបញ្ជាក់ថា យាន្តយន្តដែលខុសបច្ចេកទេសនៃគ្រឿងម៉ាស៊ីនទៅលើម៉ូដែលសេរ៊ីក្រោយនេះ គឺអាចនឹងបង្កគ្រោះថា្នក់ជាយថាហេតុដល់អ្នកបើកបរ។ យ៉ាងណាមិញ ក្រុមហ៊ុនក៏នូវតែមិនទាន់ចេញនូវសេចក្តីប្រកាសទាក់ទងទៅនឹងការស្លាប់ឬក៏របួសជុំវិញករណីនេះនៅឡើយនោះទេ៕

មនុស្សមួយចំនួនមានការងឿយឆ្ងល់ថាតើការជិះរថយន្តអគ្គិសនីអាចប្រឈមនឹងគ្រោះថ្នាក់ដល់អាយុជីវិតដែរឬទេ នៅពេលដែលយើងបើកក្នុងអាកាសធាតុភ្លៀងផ្គររន្ទះបែបនេះ? ខណៈអ្នកខ្លះជឿថាការជិះរថយន្តអគ្គិសនីគឺអាចបណ្តាលឱ្យឆក់។ ទោះជាយ៉ាងណាបើយោងតាម Get Green Now ការជិះរថយន្តអគ្គិសនីពេលមេឃភ្លៀងមិនបណ្តាលឱ្យឆក់នោះទេ ហើយក៏មិនបណ្តាលឱ្យមានគ្រោះថ្នាក់ដល់ជីវិតដែរ។ រថយន្តអគ្គិសនីគឺដូចគ្នាទៅនឹងរថយន្តសាំង នៅពេលជួបនឹងភ្លៀងផ្គររន្ទះ ពួកគេគឺមានសុវត្ថិភាពខ្លាំងណាស់ក្នុងការធ្វើដំណើរនៅអាកាសធាតុមានព្យុះ។

យានជំនិះគ្រប់ប្រភេទ រួមទាំងរថយន្តអគ្គិសនី ត្រូវបានរចនាឡើងតាមគោលការណ៍ទ្រុង Faraday ដែលជាវាលអេឡិចត្រូម៉ាញេទិកសរុបនៅខាងក្នុងរថយន្តគឺសូន្យ។ រចនាសម្ព័ន្ធបិទជិតរបស់រថយន្ត វ៉ុលត្រូវបានបង្កើតតែលើផ្ទៃ ហើយបន្ទាប់មកបែកខ្ញែកស្មើៗគ្នាទៅនឹងដី។ លើសពីនេះ រថយន្តអគ្គិសនីក៏ត្រូវបានបំពាក់ដោយមុខងារត្រួតពិនិត្យវ៉ុលផងដែរ នេះនឹងជួយរកឃើញវ៉ុលលើស ប្រសិនបើរថយន្តត្រូវរន្ទះបាញ់ វ៉ុលនឹងការពារថ្មដោយស្វ័យប្រវត្តិ ការពារហានិភ័យនៃការដាច់សៀគ្វី និងភ្លើង ដូច្នេះហើយរថយន្តទាំងអស់មិនងាយនឹងរន្ទះបាញ់ទេ។

ទោះបីជារថយន្តអគ្គិសនីមិនមានគ្រោះថ្នាក់អំឡុងពេលបើកក្នុងអាកាសធាតុព្យុះភ្លៀងក៏ដោយ ក៏មនុស្សមួយចំនួននៅតែឆ្ងល់ថាតើវាមានសុវត្ថិភាពក្នុងការសាកថ្មពេលមានព្យុះឬទេ? សម្រាប់ចម្លើយនោះគឺ ស្រដៀងគ្នាទៅនឹងការបើកបរដែរ។ ការសាកថ្មរថយន្តអគ្គិសនីនៅផ្ទះ ឬនៅស្ថានីយ៍សាកថ្មសុទ្ធតែត្រូវបានធានាផងដែរនូវសុវត្ថិភាពខ្ពស់ ទោះបីជាស្ថិតក្នុងស្ថានភាពភ្លៀងធ្លាក់ខ្លាំង ឬរន្ទះក៏ដោយ។ ស្ថានីយ៍សាកថ្ម និងប្រព័ន្ធសាកថ្មត្រូវបានរចនាឡើងជាមួយនឹងមុខងារការពាររន្ទះ។

លើសពីនេះ វាក៏ការពារការខូចខាតធ្ងន់ធ្ងរនៅក្នុងព្រឹត្តិការណ៍នៃបាតុភូតដូចជា សៀគ្វីខ្លី ឬការផ្ទុះភ្លាមៗអំឡុងពេលសាកថ្មផងដែរ។ ហើយកញ្ចប់ថ្មរបស់យានជំនិះអគ្គិសនីតែងតែមានទីតាំងនៅក្រោមរថយន្ត ដែលជួយកាត់បន្ថយចំណុចកណ្តាលនៃទំនាញ និងធ្វើអោយស្ថេរភាពប្រសើរឡើង។ ទន្ទឹមនឹងនេះរូបរាងរបស់រថយន្តអគ្គិសនីក៏ការពារមិនឱ្យទឹកចូលក្នុងបន្ទប់ថ្ម សំបកខាងក្រៅការពារគ្រឿងអេឡិចត្រូនិច និងចំណុចទំនាក់ទំនងសំខាន់ៗ។ ហេតុនេះអ្នកមិនចាំបាច់បារម្ភអំពីសុវត្ថិភាពរបស់រថយន្តអគ្គិសនីទៀតទេ ព្រោះវាត្រូវបានការពារយ៉ាងល្អឥតខ្ចោះ៕

ត្រីមួយប្រភេទអាចលោតផុតពីផ្ទៃទឹករហូតដល់៣០ម៉ែត្រ ប្រសិនបើមាន សត្រូ.វ ដេញធ្វើបា.ប ឬមានហេតុការណ៍អាស.ន្ន កើតឡើង ។ វានឹងប្រញាប់ហែលទឹកយ៉ាងលឿនបំផុត បន្ទាប់មក វាក៏លោតឱ្យផុតពីផ្ទៃទឹក ដោយត្រដាងព្រុយនៅសងខាងខ្លួនរបស់វាឱ្យធំ ដែលមើលទៅស្រដៀងគ្នានឹងសត្វចាប ឬយន្តហោះកំពុងចេញដំណើរ ។ ហេតុនេះ ទើបគេដាក់ឈ្មោះវាថា ត្រីហើរ (Flying Fish) ។

លើសពីនេះ ក្នុងអំឡុងពេលលោតចេញពីទឹក វានឹងលាតសន្ធឹងកន្ទុយរបស់វាព្រមគ្នា ដើម្បីគ្រប់គ្រងកម្រិតការហោះហើរ ។ រីឯរូបរាងរបស់ត្រីហើរ គឺវាមានដងខ្លួនមូលវែង, មាត់តូច, គ្មានធ្មេញ និងមានព្រុយរឹង ។ ព្រុយត្រចៀកបានលាតសន្ធឹងរហូតដល់ព្រុយខ្នង ខណៈព្រុយកន្ទុយរបស់វាមានរាងដូចសម ដោយព្រុយទាំងសងខាងមិនស្មើគ្មាទេ គឺព្រុយផ្នែកខាងក្រោមវែងជាងខាងលើ ។

ត្រីហើរ ត្រូវបានគេចាត់ទុកថា គឺជាត្រីមានទំហំតូច និងមានប្រវែងមិនលើសពី៣០សង់ទីម៉ែត្រ ។ ត្រីប្រភេទនេះភាគច្រើនរស់នៅក្នុងសមុទ្រត្រូពិច និងសមុទ្រក្នុងតំបន់ក្តៅទូទាំងពិភពលោក ហើយវាតែងរស់នៅក្នុងផ្ទៃទឹកស្ថិតនៅមិនឆ្ងាយប៉ុន្មានពីឆ្នេរសមុទ្រ ។ ត្រីហើរភាគច្រើនមានដងខ្លួនពណ៌បៃតង ឬពណ៌ខៀវស្រអាប់ ខណៈពោះវាពណ៌ប្រាក់ ។

វាជាត្រីមានលក្ខណៈពិសេសខុសប្លែកពីត្រីផ្សេងៗ ហើយវាតែងតែប្រមូលផ្តុំគ្នាជាហ្វូង ព្រមទាំងស្វែងរកចំណីនៅជិតផ្ទៃទឹក ។ ត្រីហើរមានភាពរហ័សរហួន ប៉ុន្តែពេលវាផ្អើល ឬចង់គេចពីហេតុការណ៍អាក្រក់ វានឹងលោតចេញពីទឹកឡើងទៅលើក្នុងកម្ពស់រហូតដល់៣០ម៉ែត្រ គឺស្រដៀងនឹងយន្តហោះកំពុងហោះឡើង ឬដូចសត្វស្លាប ។

ទោះយ៉ាងណា វាអាចលោតផុតពីទឹកបានខ្ពស់ ឬទាប គឺអាស្រ័យលើទំហំដងខ្លួន និងពេលវេលា ។ វាប្រើប្រាស់ព្រុយត្រចៀកដែលមានទំហំធំខ្លាំង ដើម្បីជួយឱ្យវាអាចលោតឡើងលើបានខ្ពស់ ខណៈត្រីខ្លះទៀតក៏មានព្រុយធំនៅរន្ធគូទផងដែរ ។ គេបានប្រទះឃើញត្រីហើរប្រមាណ៥០ប្រភេទក្នុងទឹកសមុទ្រទូទាំងពិភពលោក ។

ត្រីហើរអាចលោតបានជាមធ្យម គឺចាប់ពីកម្ពស់៧ម៉ែត្រ ទៅ១០ម៉ែត្រ និងមានល្បឿនប្រមាណ៦៥គីឡូម៉ែត្រក្នុង១ម៉ោង ។ វាអាចនៅស្ងៀមលើអាកាសបានយូរបំផុតចំនួន១០វិនាទី ។ ក្រោយពីបន្តពូជរួច វាបានបញ្ចេញពងនៅក្រោមស្មៅ ឬកាកសំណល់អណ្តែតតាមទឹក ដើម្បីឱ្យកូនៗរបស់វាញាស់នៅទីនេះ ៕

សហរដ្ឋអាមេរិក ៖ នៅថ្ងៃទី៦ ខែមិថុនា ឆ្នាំ២០២៤ សារព័ត៌មានបរទេសរាយការណ៍ថា ពលរដ្ឋរស់នៅរដ្ឋចំនួន២៥ របស់សហរដ្ឋអាមេរិកបានឆ្លងមេរោគ «Salmonella» ពីផ្លែតាសក់ និងបណ្តាលឱ្យមានរោគសញ្ញាពុលចំណីអាហារ ។ អាជ្ញាធររាយការណ៍ថា មានអ្នកឆ្លងជំងឺនេះយ៉ាងហោចណាស់ ចំនួន១៦២នាក់ ក្នុងនោះមនុស្ស៥៤នាក់មានអាការៈធ្ងន់ធ្ងរត្រូវបញ្ជូនទៅព្យាបាលនៅមន្ទីរពេទ្យ ។

មន្ត្រីមកពីមជ្ឈមណ្ឌលគ្រប់គ្រង និងបង្ការជំងឺរបស់អាមេរិក ព្រមទាំងមន្ត្រីសុខាភិបាលរបស់រដ្ឋចំនួន២៥ ក៏ដូចជាមន្ត្រីនៅក្រុងវ៉ាស៊ីនតោន បានបង្កើនការស្វែងរកប្រភពផ្ទុះឡើងនៃមេរោគ Salmonella ពាក់ព័ន្ធនឹងផ្លែតាសក់ ក្រោយពីអ្នកឆ្លងមេរោគនេះមានរោគសញ្ញាពុលអាហារចំនួន១៦២នាក់ ក្នុងនោះមនុស្ស៥៤នាក់ត្រូវបញ្ជូនទៅមន្ទីរពេទ្យ ។

ចំណែកលទ្ធផលការស្រាវជ្រាវជំហានដំបូងបង្ហាញថា មេរោគនេះទំនងជានៅលាយឡំជាមួយផ្លែតាសក់របស់ក្រុមហ៊ុន Fresh Star Produce ។ ហេតុនេះ អាជ្ញាធរបានប្រកាសប្រមូលផ្លែតាសក់មកវិញ ដែលគេបានដាក់លក់នៅរដ្ឋចំនួន១៤ កាលពីដើមខែមិថុនា ឆ្នាំ២០២៤ ។

ទោះយ៉ាងណា អាជ្ញាធរអាមេរិកនឹងត្រួតពិនិត្យយ៉ាងលម្អិត ដើម្បីស្វែងរកមូលហេតុពិតប្រាកដនៃការឆ្លងមេរោគ Salmonella ។ មេរោគនេះអាចបង្កគ្រោះថ្នាក់ធ្ងន់ធ្ងរដល់អាយុជីវិត ជាពិសេស កុមារ, អ្នកមានសុខភាពខ្សោយ និងមនុស្សចាស់ ខណៈអ្នកមានរាងកាយរឹងមាំ ពេលឆ្លងមេរោគនេះនឹងកើតគ្រុនក្តៅ, រាគរូស, ក្អួតចង្អោរ, វិលមុខ និងឈឺពោះ ។ រីឯអ្នកខ្លះទៀត មេរោគនេះបានចូលក្នុងសរសៃឈាម និងកើតអាការៈធ្ងន់ធ្ងរ ។

គេបានប្រទះឃើញពលរដ្ឋអាមេរិកឆ្លងមេរោគនេះលើកដំបូង កាលពីថ្ងៃទី១១ ខែមីនា ឆ្នាំ២០២៤ ។ ក្រោយមក វាបានឆ្លងរាតត្បាតជាបន្តបន្ទាប់ រហូតដល់ពាក់កណ្តាលខែឧសភា ឆ្នាំ២០២៤ ក្នុងទីក្រុងវ៉ាស៊ីនតោន, រដ្ឋអាឡាំបាម៉ា, អាខាន់ស៊ុស, ផ្លររីដា, ម៉ាសាជូសេត, មីឈីហ្គេន, ញូវយ៉ក, មីនីសូតា, អូហៃអូ, ផេនស៊ីឡាវ៉ានៀ, ថឺននេសស៊ី, តិចសាស់, វីជីនៀ និងរដ្ឋជាច្រើនទៀត ។

ជាមួយគ្នានេះ ភ្នាក់ងារ Centers for Disease Control and Prevention (CDC) និង Food and Drug Administration (FDA) ក៏បានស្រាវជ្រាវពីការឆ្លងរាតត្បាតរបស់មេរោគ Salmonella មួយករណីទៀតដែរ ដែលមានមនុស្សឆ្លងចំនួន១៥៨នាក់ នៅរដ្ឋ២៣ ដើម្បីពិចារណាថា តើការឆ្លងមេរោគទាំងពីរករណីនេះពាក់ព័ន្ធនឹងអាហារដូចគ្នាដែរឬទេ ៕