ជាការពិតណាស់មនុស្សស្រីមួយចំនួនតែងគិតថា បុរសដែលព្យួរសោរថយន្តនៅចង្កេះខោគឺចង់បានការចាប់អារម្មណ៍ពីនារី និងដើម្បីឱ្យដឹងថាគេមានឡានជិះ។ ទោះជាយ៉ាងណាការគិតបែបនេះគឺមិនត្រឹមត្រូវនោះទេ តាមពិតការព្យួរសោរថយន្តនៅចង្កេះខោគឺមានអត្ថយោជន៍ជាច្រើន ដែលមនុស្សស្រីមិនដឹង។ ដូច្នេះនៅក្នុងអត្ថបទនេះនឹងប្រាប់អ្នកពីមូលហេតុដែលមនុស្សប្រុសចូលចិត្តព្យួរសោរថយន្តនៅចង្កេះខោ៖

១.ជួយការពារការភ្លេចភ្លាំង៖ មនុស្សប្រុសជាច្រើនតែងមានទម្លាប់យកសោរថយន្តរបស់ពួកគេដាក់នៅជុំវិញចង្កេះខោ។ នេះគឺជាទីតាំងដែលអាចមើលឃើញយ៉ាងងាយស្រួល និងងាយស្រួលក្នុងការដោះស្រាយ ដោយរបៀបទុកដាក់បែបនេះនឹងជួយការពារការភ្លេចភ្លាំង ប្រសិនបើអ្នកទុកសោនៅកន្លែងផ្សេងទៀតនោះអ្នកនឹងភ្លេច។ ជាលទ្ធផលបុរសជាច្រើនតែងចូលចិត្តយកសោរថយន្តរបស់ខ្លួនដាក់ជាប់នឹងចង្កេះ។

២.ងាយស្រួលក្នុងការរើស និងប្រើប្រាស់៖ មិនមែនគ្រប់សោរថយន្តទាំងអស់សុទ្ធតែដូចគ្នានោះទេ ដោយសោខ្លះចាក់រថយន្តដោយផ្ទាល់ ហើយខ្លះទៀតបញ្ជា។ ការដាក់សោរថយន្តនៅចង្កេះធ្វើឱ្យអ្នកប្រើងាយស្រួលក្នុងការយក ដោយមិនចាំបាច់ចូលទៅក្នុងហោប៉ៅខោរបស់អ្នកទេ ឬការស្វែងរកវានៅក្នុងកាបូបរបស់អ្នកធ្វើឱ្យអ្នកឈឺក្បាល គ្រាន់តែដោះវាចេញពីចង្កេះខោ នោះអ្នកនឹងអាចប្រើវាបានភ្លាម។

៣.កាត់បន្ថយការខូចខាតដល់ហោប៉ៅខោ៖ សោរថយន្តមួយចំនួននៅតែជាសោដែលមានរាងស្រួច អាចធ្វើឱ្យហោប៉ៅខោខូច ឬធ្លុះ។ ដូច្នេះការព្យួរសោរថយន្តនៅចង្កេះខោ គឺអាចជួយកាត់បន្ថយការខូចខាតដល់ខោ។ លើសពីនេះទៀតវានឹងធ្វើឱ្យអ្នកមានអារម្មណ៍ស្រួល ហើយការអង្គុយក៏ងាយស្រួលដែរ។ បន្ថែមពីនេះវាក៏ជួយកាត់បន្ថយការកោស ឬការខូចខាតដែលអាចកើតមានលើសោផងដែរ។

៤.ការពារការចុចប៊ូតុងដោយចៃដន្យ៖ សោបច្ចុប្បន្នគឺជាសោបញ្ជាពីចម្ងាយ ប្រសិនបើទុកក្នុងហោប៉ៅខោ ឬកាបូបស្ពាយ អាចត្រូវបានប៉ះពាល់ដោយឧបករណ៍ផ្សេងទៀត ធ្វើឱ្យឧបករណ៍នោះប៉ះនឹងសោចុចប៊ូតុងដោយចៃដន្យ បណ្តាលឱ្យឡានបើកដោយខ្លួនឯង។ ដូច្នេះការទុកដាក់សោនៅចង្កេះរបស់អ្នកអាចការពារការចុចប៊ូតុងដោយចៃដន្យ៕

ប្រទេសហ្វីលីពីន ៖ អាជ្ញាធរហ្វីលីពីនបានជម្លៀសពលរដ្ឋរស់នៅក្បែរភ្នំភ្លើង និងលុបចោលជើងហោះហើរផងដែរ ក្រោយពីភ្នំភ្លើង Kanlaon ដែលស្ថិតនៅចំណុចកណ្តាលប្រទេសហ្វីលីពីន បានផ្ទុះជាថ្មីរយៈពេល៦នាទី កាលពីថ្ងៃទី៣ ខែមិថុនា ឆ្នាំ២០២៤ ។

សារព័ត៌មាន Bloomberg រាយការណ៍ថា ភ្នាក់ងារតាមដានគ្រោះមហន្តរាយជាតិរបស់ហ្វីលីពីន បានប្រកាសដាស់តឿនពលរដ្ឋអំពីគ្រោះថ្នាក់បណ្តាលមកពីការផ្ទុះភ្នំភ្លើង Kanlaon កម្រិត២ ក្នុងចំណោម៥កម្រិត ព្រមទាំងបញ្ជាក់ថា ភ្នំភ្លើងនេះបានផ្ទុះនៅត្រង់ចំណុចកំពូលស្ថិតនៅប្រជុំកោះ Negros ។

វិទ្យាស្ថានផ្នែកភ្នំភ្លើង និងរញ្ជួយដីហ្វីលីពីនបានបញ្ជាក់ក្នុងរបាយការណ៍ចុងក្រោយ ដែលចេញផ្សាយកាលពីថ្ងៃទី៣ ខែមិថុនា ថា ការផ្ទុះភ្នំភ្លើងនេះបានបង្កើតផ្សែងភ្លើងសាយភាយឡើងទៅលើបរិយាកាស រហូតដល់ជាង៥គីឡូម៉ែត្រ ហើយវាបង្កើតកំដៅចាប់ពី២គីឡូម៉ែត្រ ទៅ៣គីឡូម៉ែត្រ ចុះពីលើភ្នំទៅទិសខាងត្បូង និងទិសអាគ្នេយ៍ ។ កំដៅនេះលាយឡំជាមួយឧស្ម័នក្តៅខ្លាំង, ផេះ និងកំទេចថ្មភ្នំភ្លើងដែលផ្ទុះចេញមក និងហូរទៅបរិវេណជុំវិញភ្នំយ៉ាងឆាប់រហ័ស ។

កន្លងមក អាជ្ញាធរហ្វីលីពីនពុំបានប្រកាសឱ្យពលរដ្ឋជម្លៀសចេញពីតំបន់ភ្នំភ្លើងទេ ប៉ុន្តែលើកនេះ ភ្នំភ្លើង Kanlaon បានផ្ទុះអស់រយៈពេល៦នាទី និងបណ្តាលឱ្យកំទេចភ្លើងធ្លាក់រាយប៉ាយនៅបរិវេណជុំវិញ ទើបអាជ្ញាធរបង្កើនការជម្លៀសពលរដ្ឋ យ៉ាងហោចណាស់ចំនួន២.៨០០នាក់ ទៅកាន់ជម្រកបណ្តោះអាសន្ន ។

សារព័ត៌មាន GMA News របស់ហ្វីលីពីនរាយការណ៍ថា លោក Jose Subasco អភិបាលក្រុងខាឡេអន បានបញ្ជាឱ្យជម្លៀសពលរដ្ឋរស់នៅក្បែរតំបន់ភ្នំភ្លើង ប្រមាណ៣គីឡូម៉ែត្រ ទៅ៤គីឡូម៉ែត្រ ។ រីឯក្រុមហ៊ុនអាកាសចរណ៍ Philippine Airlines និងក្រុមហ៊ុន Cebu Pacific បានប្រកាសលុបចោលជើងហោះហើរជាច្រើនក្នុងប្រទេស ។

គួរបញ្ជាក់ថា Kanlaon គឺជាភ្នំភ្លើងមានកម្ពស់ខ្ពស់បំផុតនៅប្រជុំកោះ Negros និងជាភ្នំខ្ពស់បំផុតនៅប្រជុំកោះ Visayas ។ វាមានកម្ពស់២.៤៦៥ម៉ែត្រ លើសកម្រិតទឹកសមុទ្រ និងជាភ្នំខ្ពស់ក្នុងលំដាប់ទី៤២ លើពិភពលោក ។ កាលពីខែធ្នូ ឆ្នាំ២០១៧ ភ្នំនេះធ្លាប់បានផ្ទុះម្តងហើយ ៕

ប្រទេសអ៊ីស្រាអែល ៖ កាលពីថ្ងៃទី១ ខែមិថុនា ឆ្នាំ២០២៤ សារព័ត៌មានបរទេសរាយការណ៍ថា អ្នកស្រាវជ្រាវនៅសាកលវិទ្យាល័យមួយបានប្រកាសផ្តល់ប្រាក់ចំនួន១០លានដុល្លារអាមេរិកដល់អ្នកអាចទំនាក់ទំនងជាមួយសត្វ ឬអាចនិយាយជាមួយសត្វយល់គ្នាទៅវិញទៅមក ។

ក្រុមអ្នកស្រាវជ្រាវមកពីសាកលវិទ្យា Tel Aviv University នៅប្រទេសអ៊ីស្រាអែលប្រកាសថា ពួកគេនឹងផ្តល់ប្រាក់រង្វាន់ដល់ការស្រាវជ្រាវអំពីសត្វ ឬបុគ្គលណាម្នាក់ដែលអាចរកវិធីទំនាក់ទំនងជាមួយសត្វណាមួយ មិនថា ឆ្មា, ឆ្កែ ឬសត្វផ្សេងទៀត ។

ពួកគេកំណត់ថា វិធីទំនាក់ទំនងជាមួយសត្វនេះ គឺត្រូវពិសោធន៍ឱ្យឃើញថា បុគ្គលនោះអាចទំនាក់ទំនងតាមបែប Two-way Inter-species Communication ។ បើនិយាយងាយៗ គឺត្រូវបង្ហាញឱ្យឃើញថា បុគ្គលនោះ និងសត្វអាចយល់ពីគ្នាទៅវិញទៅមក ឬដូចគ្នានឹងមនុស្សជជែកជាមួយមនុស្ស ។

ចំណែកការផ្តល់ប្រាក់រង្វាន់រហូតដល់១០លានដុល្លារអាមេរិកសម្រាប់អ្នកឈ្នះ គឺដើម្បីឱ្យយកប្រាក់នេះទៅបន្តការស្រាវជ្រាវអំពីសត្វ ឬប្រកបអាជីវកម្ម ។ ហេតុនេះ បើបុគ្គលណាម្នាក់ទទួលបានជោគជ័យក្នុងការប្រកួត គេនឹងចាត់ទុកថា គឺជាការរីកចម្រើនផ្នែកបច្ចេកវិទ្យាមួយលើពិភពលោក ។

ទោះយ៉ាងណា ពួកគេពុំបានកំណត់អ្វីច្រើនទេក្នុងការទំនាក់ទំនងជាមួយសត្វ គឺអ្នកចូលរួមប្រកួតអាចប្រើប្រាស់វិធីអ្វីក៏បាន ដើម្បីពិសោធន៍ពីការទំនាក់ទំនងជាមួយសត្វបានពិតប្រាកដ ។ លើសពីនេះ អ្នកចូលរួមប្រកួតអាចប្រើប្រាស់បច្ចេកវិទ្យា AI មកជួយបាន ហើយការផ្តល់រង្វាន់ជាប្រាក់ដ៏ច្រើនសន្ធឹកសន្ធាប់នេះ ក្នុងគោលបំណងទាក់ទងបេក្ខជនមកចូលរួមប្រកួតឱ្យបានច្រើន ។

ហេតុនេះ បើបេក្ខជនណាអាចទំនាក់ទំនងជាមួយសត្វបានមុនគេ គឺនឹងទទួលជ័យជម្នះក្នុងការប្រកួតខាងលើ ព្រមទាំងទទួលយករង្វាន់ធំផងដែរ ។ ក្រោយពីការប្រកាសស្វែងរកអ្នកមានសមត្ថភាពពិសេស វាធ្វើឱ្យមហាជនចាប់អារម្មណ៍យ៉ាងខ្លាំងពីរង្វាន់ធំ ប៉ុន្តែមតិខ្លះនិយាយថា ពួកគេជជែកជាមួយឆ្មានៅផ្ទះពុំដឹងរឿងផងថា វាត្រូវការអ្វី ៕

មនុស្សភាគច្រើនមិនធ្លាប់បានឮ និងឆ្ងល់ថា តើដើមឈើចេះអៀនខ្មាស់ដូចមនុស្សដែរ មែនទេ? ពិតហើយ ដើមឈើនៅក្នុងព្រៃធំៗនឹងរក្សាគម្លាតស្លឹកនៅចុងឈើ ហើយការរក្សាគម្លាតនេះហៅថា «បាតុភូតដើមឈើអៀន» ដែលវាពុំបានកើតឡើងញឹកញាប់ទេ ។ ហេតុនេះ ពេលមានបាតុភូតនេះម្តងៗ គេតែងតែកត់ត្រាក្នុងឯកសារ និងបញ្ជាក់ឆ្នាំច្បាស់លាស់ ។

ក្នុងអំឡុងពេលជំងឺកូវីដ-១៩ ឆ្លងរាតត្បាតនៅលើពិភពលោក ប្រទេសនានាបានតម្រូវឱ្យពលរដ្ឋរក្សាគម្លាតគ្នាពី១ម៉ែត្រ ទៅ២ម៉ែត្រ (Social distancing) ដើម្បីចៀសវាងការឆ្លងរាតត្បាតជំងឺកូវីដនៅទីប្រជុំជន ។ រីឯរុក្ខជាតិក៏មានដូចគ្នាដែរ ការរក្សាគម្លាតស្លឹកនៅលើចុងឈើនីមួយៗ ហៅថា បាតុភូតដើមឈើអៀន (Crown Shyness) ។

បាតុភូតដើមឈើអៀន គឺជាការរក្សាគម្លាតនៅលើចុងឈើ រហូតដល់បង្កើតភាពស្រស់ស្អាតខ្លាំង ប្លែកភ្នែក ហើយបាតុភូតនេះបានកើតឡើងនៅតំបន់ព្រៃទូទាំងពិភពលោក ។ កាលពីឆ្នាំ១៩៨២ ជីវវិទូម្នាក់ឈ្មោះ Francis Jack Putz បានប្រទះឃើញព្រៃកោងកាងនៅប្រទេសកូស្តារីកា រក្សាគម្លាតស្លឹកនៅលើចុងឈើ ហើយក្រោយមក គេក៏បានប្រទះឃើញដើមឈើនៅប្រទេសម៉ាឡេស៊ីរក្សាគម្លាតស្លឹកដូចគ្នាដែរ ។

បើតាមការស្រាវជ្រាវដែលបានកត់ត្រាទុកបង្ហាញថា បាតុភូតនេះភាគតែងតែកើតឡើងជាមួយដើមកោងកាង, ដើមស្រល់ និងដើមឈើប្រភេទ Eucalyptus ។ ចំណុចសំខាន់ គឺដើមឈើនីមួយៗត្រូវតែមានកម្ពស់ប្រហាក់ប្រហែលគ្នា ទើបអាចកើតបាតុភូតខាងលើបាន ។

ទោះយ៉ាងណា ដើមឈើប្រភេទផ្សេងទៀតនៅតំបន់មួយចំនួន ក៏បានកើតបាតុភូតនេះដែរ ។ នៅពេលដើមឈើកើតបាតុភូតនេះម្តងៗ វាជួយឱ្យពន្លឺព្រះអាទិត្យភ្លឺពេញព្រៃ ព្រមទាំងផ្តល់អត្ថប្រយោជន៍ដល់រុក្ខជាតិផ្សេងៗនៅលើដី និងសត្វព្រៃ ។ ម្យ៉ាងទៀត ដោយសារមែកឈើនីមួយៗរក្សាគម្លាតពីគ្នា វាធ្វើឱ្យការរីករាលដាលនៃសត្វល្អិតដែលជាសត្រូវបំផ្លាញរុក្ខជាតិ និងដង្កូវស៊ីស្លឹកឈើធ្លាក់ចុះជាបន្តបន្ទាប់ ។

ចំណែកមូលហេតុបណ្តាលឱ្យកើតបាតុភូតដើមឈើអៀន គ្មានអ្នកណាម្នាក់អាចបកស្រាយបានទេ ហើយសូម្បីតែអ្នកវិទ្យាសាស្ត្រ ក៏ពុំអាចផ្តល់ចម្លើយជាក់លាក់បានដែរ ប៉ុន្តែពួកគេសន្និដ្ឋានថា វាអាចកើតឡើងដោយសារកត្តា៣យ៉ាង គឺ ៖

១-កម្លាំងខ្យល់, ខ្យល់ព្យុះ និងទឹកភ្លៀង ទើបធ្វើឱ្យមែកឈើញែកដាច់ពីគ្នា រហូតបង្កើតគម្លាតគ្នានៅចុងឈើ
២-មែកឈើមានគម្លាតគ្នាបែបនេះ ដើម្បីកាត់បន្ថយការរីករាលដាលសត្វល្អិត និងពុំបង្កគ្រោះថ្នាក់ដល់ដើមឈើផ្សេងទៀត
៣-ដើម្បីឱ្យដើមឈើនៅខាងក្រោម ជាពិសេស កូនឈើទើបដុះថ្មីបានទទួលពន្លឺថ្ងៃគ្រប់គ្រាន់ និងមានរស្មីសំយោគប្រកបដោយប្រសិទ្ធភាព ។

ហេតុនេះ មិនថាបាតុភូតដើមឈើអៀនកើតឡើងដោយសារមូលហេតុអ្វីទេ ប៉ុន្តែវាធ្វើឱ្យយើងស្គាល់ពីធម្មជាតិនៅជុំវិញខ្លួន និងមានអ្វីម្យ៉ាងស្រដៀងនឹងខ្លួនយើង ។ បើមានឱកាសបានដើរក្នុងព្រៃ កុំភ្លេចសម្លឹងមើលចុងឈើផងថា តើមានបាតុភូតនេះដែរឬទេ ៕

នៅក្នុងព្រៃអាម៉ាហ្សូនដ៏ធំដែលគ្របដណ្តប់ដោយផ្ទៃដី ៧ លានម៉ែត្រការ៉េ សុទ្ធតែមានក្រុមកុលសម្ព័ន្ធជាច្រើនរស់នៅក្នុងនោះ។ ប្រិយមិត្តប្រាកដជាដឹងហើយថា កុលសម្ព័ន្ធច្រើនតែរស់នៅក្នុងជីវិតបែបប្រពៃណី និងតែងតែរក្សានូវទំនៀមទម្លាប់របស់ពួកគេជានិច្ច។ បើនិយាយពីជីវិតរស់នៅប្រចាំថ្ងៃរបស់ពួកគេវិញ គឺជាធម្មតាពួកគេចិញ្ចឹមជីវិតដោយការបរ.បាញ់សត្វនៅក្នុងព្រៃ និងការធ្វើស្រែចំការដាំដុះរុក្ខជាតិជាដើម។ ទោះជាយ៉ាងណានៅពេលដែលអ៊ីនធឺណិតផ្កាយរណបរបស់ Elon Musk បានចូលមកដល់ព្រៃ ជីវិតរស់នៅប្រចាំថ្ងៃរបស់ក្រុមកុលសម្ព័ន្ធ Marubo ក៏បានផ្លាស់ប្តូរទាំងស្រុងផងដែរ។

យោងតាម New York Times ក្រុមកុលសម្ព័ន្ធ Marubo គឺជនជាតិដើមភាគតិចរស់នៅក្នុងភូមិដាច់ស្រយាលមួយតាមដងទន្លេ Ituí ក្នុងព្រៃអាម៉ាហ្សូន។ ពួកគេមានទូរស័ព្ទ ប៉ុន្តែគ្មានអ៊ីនធឺណិតប្រើប្រាស់នោះទេ ហើយក៏មិនសូវចាប់អារម្មណ៍លើបច្ចេកវិទ្យាដែរ ដោយជាធម្មតាពួកគេគ្រាន់តែប្រើវាដើម្បីទំនាក់ទំនងគ្នា និងថតរូបប៉ុណ្ណោះ។ ទោះជាយ៉ាងណានៅអំឡុងខែកញ្ញានៃឆ្នាំ ២០២៣ នៅពេលដែលអ៊ីនធឺណិតផ្កាយរណបរបស់ Elon Musk បានមកដល់ក្នុងព្រៃ ភូមិដាច់ស្រយាលនេះក៏ទទួលបានអង់តែន Starlink ដែលជាអ៊ីនធឺណិតល្បឿនលឿន អាចប្រើបានស្ទើរតែគ្រប់ទីកន្លែងនៅលើភពផែនដីសូម្បីតែក្នុងព្រៃជ្រៅ។ ដូច្នេះតំបន់ដាច់ស្រយាលបំផុតមួយនៃព្រៃអាម៉ាហ្សូនក៏អាចប្រើប្រាស់អ៊ីនធឺណិតបានដែរ។

នៅពេលដែលអ៊ីនធឺណិតបានមកដល់ក្នុងព្រៃ សមាជិកជាច្រើននៃកុលសម្ព័ន្ធស្រាប់តែញៀននឹងទូរស័ព្ទដៃរបស់ពួកគេ ដោយម្នាក់ៗតែងតែផ្ញើសារឱ្យគ្នាទៅវិញទៅមក លេងហ្គេម មើលវីដេអូឃ្លីប ដែលអាកប្បកិរិយាទាំងនេះបានធ្វើឱ្យប៉ះពាល់ដល់របៀបរស់នៅបែបបរបាញ់ និងធ្វើស្រែចម្ការ ដែលមានសារៈសំខាន់ចំពោះរបៀបរស់នៅរបស់កុលសម្ព័ន្ធ។ Zainama Marubo ជាកុលសម្ព័ន្ធម្នាក់បាននិយាយថា នៅពេលអ៊ីនធឺណិតមកដល់ដំបូង “អ្នករាល់គ្នាសប្បាយចិត្តណាស់” ប៉ុន្តែយូរៗទៅអ្វីៗកាន់តែអាក្រក់ទៅៗ “មនុស្សវ័យក្មេងខ្ជិលដោយសារអ៊ីនធឺណិត” ហើយពួកគេកំពុងរៀនពីវិធីរស់នៅរបស់មនុស្សស្បែកស»។

ទោះបីជាអ៊ីនធឺណិតនាំមកនូវអត្ថប្រយោជន៍ជាច្រើន ដូចជាការទទួលបានជំនួយក្នុងគ្រាមានអាសន្នផ្នែកវេជ្ជសាស្ត្រក៏ដោយ។ ទំនាក់ទំនងជាមួយភូមិផ្សេងៗ និងរៀនពីពិភពខាងក្រៅ ក៏ភ្ជាប់មកជាមួយគុណវិបត្តិជាច្រើនផងដែរ។ មេដឹកនាំកុលសម្ព័ន្ធបាននិយាយថា យុវជនក្នុងក្រុមកើនឡើងនៃការប្រើប្រាស់អ៊ីនធឺណិតបានធ្វើឱ្យពួកគេកាន់តែចាប់អារម្មណ៍ក្នុងការរស់នៅពិភពខាងក្រៅ ជាជាងរស់នៅក្នុងព្រៃ។ នេះជាការព្រួយបារម្ភយ៉ាងខ្លាំង ព្រោះវាអាចនាំឱ្យបាត់បង់វប្បធម៌ និងប្រពៃណីរបស់ Marubo។ ទោះជាយ៉ាងណា ក្រុមកុលសម្ព័ន្ធនេះនៅតែបន្តប្រើប្រាស់អ៊ីនធឺណិត ព្រោះពួកគេយល់ថាអ៊ីនធឺណិតជួយសង្គ្រោះមនុស្សច្រើនជាងការបំផ្លាញ៕

ប្រទេសជប៉ុន ៖ ពលរដ្ឋរស់នៅទីក្រុងតូក្យូ ប្រទេសជប៉ុន នឹងអាចប្រើប្រាស់គេហទំព័រស្វែងរកគូស្រករ ដែលរដ្ឋាភិបាលបានបង្កើតឡើងដើម្បីជំរុញឱ្យពលរដ្ឋរៀបការកាន់តែច្រើន ។ ការបង្កើតគេហទំព័រនេះ ក្រោយពីជប៉ុនប្រឈមនឹងបញ្ហាអត្រាកំណើតធ្លាក់ចុះជាបន្តបន្ទាប់ក្នុងប្រវត្តិសាស្ត្រ និងអត្រាស្លា.ប់ កើនឡើងខ្ពស់ជាងអត្រាកំណើតទ្វេដង ។

សារព័ត៌មាន AFP បានរាយការណ៍ពីទីក្រុងតូក្យូ នៅថ្ងៃទី៥ ខែមិថុនា ឆ្នាំ២០២៤ ថា ឆាប់ៗនេះ ទីក្រុងតូក្យូរបស់ជប៉ុននឹងដំណើរការគេហទំព័រស្វែងរកគូ ហើយវាជាការព្យាយាមរបស់រដ្ឋាភិបាលដើម្បីបង្កើនអត្រាកំណើត ។ រីឯអ្នកប្រើប្រាស់គេហទំព័រនេះនឹងផ្ញើឯកសារបញ្ជាក់ពីភាពនៅលីវតាមច្បាប់, ចុះហត្ថលេខាក្នុងលិខិតបញ្ជាក់ថា រីករាយនឹងរៀបការ ព្រមទាំងបង្ហាញលិខិតបង់ពន្ធសម្រាប់បញ្ជាក់ប្រាក់ខែប្រចាំឆ្នាំ ។

អាជ្ញាធរក្រុងតូក្យូនិយាយថា ៖ «ពលរដ្ឋជប៉ុនចង់រៀបការប្រមាណ៧០% ពួកគេពុំបានចូលរួមកម្មវិធី ឬចុះឈ្មោះក្នុងគេហទំព័រស្វែងរកគូស្រករទេ ។ ហេតុនេះ យើងនឹងជំរុញពួកគេឱ្យឆាប់រកឃើញគូអនាគត» ។

វាមិនមែនជារឿងប្លែកទេ ដែលអាជ្ញាធរក្រុងតូក្យូរៀបចំកម្មវិធីឱ្យពលរដ្ឋស្វែងរកគូ ប៉ុន្តែវាអាចពិបាកសម្រាប់អាជ្ញាធរក្នុងតំបន់ដែលត្រូវបង្កើតគេហទំព័រនេះ ។ ការប្រើប្រាស់គេហទំព័រនឹងមានការសម្ភាសន៍ ដើម្បីបញ្ជាក់អត្តសញ្ញាណរបស់អ្នកប្រើប្រាស់ ដែលវាជាផ្នែកមួយនៃដំណាក់កាលចុះឈ្មោះក្នុងគេហទំព័រស្វែងរកគូ ។ អាជ្ញាធរបានចាប់ផ្តើមសាកល្បងគេហទំព័រនេះ តាំងពីចុងឆ្នាំ២០២៣ មកម៉្លេះ ។

ទោះយ៉ាងណា អ្នកលេងបណ្តាញសង្គមជាច្រើននាក់ពុំឯកភាពនឹងគម្រោងនេះទេ ហើយអ្នកខ្លះបានរិះគន់រដ្ឋាភិបាលទៀតផង ។ រីឯអ្នកខ្លះទៀតចាប់អារម្មណ៍នឹងគម្រោងនេះ ពីព្រោះគេហទំព័រស្វែងរកគូររបស់រដ្ឋាភិបាលធ្វើឱ្យពួកគេមានអារម្មណ៍ថា មានសុវត្ថិភាព ។

កាលពីឆ្នាំ២០២៣ អត្រាការស្លាប់នៅប្រទេសជប៉ុនបានកើនឡើងលើសអត្រាកំណើតទ្វេដង ។ បើតាមទិន្នន័យរបស់រដ្ឋាភិបាលបង្ហាញថា ពលរដ្ឋជប៉ុនបានផ្តល់កំណើតទារកធ្លាក់ចុះអស់រយៈពេល៨ឆ្នាំជាប់ៗគ្នា គឺមានអត្រាកំណើតត្រឹមតែ៧៥៨.៦៣១នាក់ ឬធ្លាក់ចុះ៥,១% ខណៈចំនួនអ្នកស្លាប់កើនឡើងរហូតដល់១.៥៩០.៥០៣នាក់ ។ ដូច្នេះ វាធ្វើឱ្យជប៉ុនប្រឈមនឹងការខ្វះខាតកម្លាំងពលកម្មកាន់តែខ្លាំង ។

នាយករដ្ឋមន្ត្រីជប៉ុន លោក Fumio Kishida សន្យាថា នឹងបង្កើតគោលនយោបាយលើកទឹកចិត្តឱ្យពលរដ្ឋរៀបការ និងមានកូន ដូចជា ៖ ការឧបត្ថម្ភប្រាក់សម្រាប់ក្រុមគ្រួសារមានកូន, បង្កើនសេវាកម្មថែទាំកុមារ និងបន្ថែមថ្ងៃឈប់សម្រាកថែទាំកូន ជាដើម ៕