ប្រទេសជប៉ុន ៖ បើនិយាយពីដំណើរកម្សាន្តក្នុងប្រទេសជប៉ុន មនុស្សភាគច្រើននឹងនឹកឃើញដល់អណ្តូងទឹកក្តៅ ឬអណ្តូងនរក ដែលជនជាតិជប៉ុន និងភ្ញៀវទេសចរនៅលើពិភពលោក និយាយដូចៗគ្នាថា ចង់មកលេងទីនេះបានម្តងក្នុងមួយជីវិត ។ តើអណ្តូងទឹកនេះមានលក្ខណៈពិសេសបែបណាខ្លះ ទើបម្នាក់ៗប្រាថ្នាចង់មកទីនេះ?

ពេលយើងធ្វើដំណើរទៅដល់ទីក្រុងបេបពុ ខេត្តអូអ៊ីតាក់ ស្ថិតនៅលើកោះឃីវឈូ ប្រទេសជប៉ុន យើងនឹងបានឃើញអណ្តូងទឹកក្តៅពណ៌ឈា.ម ផុសចេញពីដី ឬគេហៅថា អណ្តូងទឹកនរ.ក (ជនជាតិជប៉ុនហៅថា Chinoike Jigoku) ។ ទិដ្ឋភាពដ៏ស្រស់ស្អាត និងប្លែកភ្នែករបស់អណ្តូងទឹកនេះ គឺមិនមែនមនុស្សជាអ្នកបង្កើតទេ ប៉ុន្តែវាកើតឡើងតាមធម្មជាតិ ។

វាជាអណ្តូងទឹកក្តៅ១ ក្នុងចំណោមអណ្តូងទឹកក្តៅចំនួន៨ ហើយជប៉ុនហៅថា «អណ្តូងទឹកក្តៅទាំង៨» ឬ «Jigoku Meguri Beppu» ដែលជាតំបន់ទេសចរណ៍ដ៏សំខាន់របស់ទីក្រុងបេបពុ ខេត្តអូអ៊ីតាក់ ។ ភ្ញៀវទេសចរអាចធ្វើដំណើរដោយថ្មើជើងពីអណ្តូងមួយទៅកាន់អណ្តូងមួយទៀតក្នុងចំណោមអណ្តូងទាំង៧ ដោយសារវាស្ថិតនៅក្បែរៗគ្នា ប៉ុន្តែមានអណ្តូង១ ស្ថិតនៅឆ្ងាយពីគេ ។ បើទោះជាអណ្តូងទឹកនេះមានឈ្មោះគួរឱ្យខ្លាចបន្តិចក្តី ប៉ុន្តែធានាថា វាមានលក្ខណៈខុសប្លែកពីអណ្តូងទូទៅ ។

ចំណែកមូលហេតុធ្វើឱ្យទឹកអណ្តូងមានពណ៌ប្លែកបែបនេះ គឺវាកើតឡើងដោយសារបរិមាណសារធាតុរ៉ែមួយចំនួន ដូចជា ៖ អុកស៊ីដជាតិដែក និងម៉ាញេស្យូមប្រមូលផ្តុំគ្នា ដោយមានប្រតិកម្មជាមួយសីតុណ្ហភាព និងសម្ពាធនៅក្រោមដី ។ ហេតុនេះ វាធ្វើឱ្យទឹកក្នុងអណ្តូងក្លាយជាពណ៌ក្រហម ឬស្រដៀងនឹងពណ៌ច្រែះ ប៉ុន្តែមនុស្សភាគច្រើននិយាយថា វាស្រដៀងនឹងពណ៌ឈាម ។

បើតាមជនជាតិជប៉ុនឱ្យដឹងថា អណ្តូងទឹកនរកនេះធ្លាប់ត្រូវបានគេប្រើប្រាស់ធ្វើជាកន្លែងដាក់ទោសពួកឧក្រិដ្ឋជន ដែលបានប្រព្រឹត្តខុសធ្ងន់ធ្ងរកាលពីប្រមាណឆ្នាំ៧០០ ។ ឧក្រិដ្ឋជនដែលមកទទួលទោសនៅទីនេះ ពួកគេត្រូវទ្រាំនឹងការឈឺចាប់ផ្លូវកាយ រងទុក្ខវេទនាអស់ជាច្រើនម៉ោងមុនពេលស្លាប់ ។

កាលពីមុន ដោយសារការផ្ទុះភ្នំភ្លើងបានធ្វើឱ្យទឹកក្នុងអណ្តូងនេះមានសីតុណ្ហភាពខ្ពស់រហូតដល់៧៨អង្សារសេ និងក្តៅខ្លាំងគ្រប់ពេលវេលា ។ បើអ្នកណាធ្លាក់ចូលក្នុងអណ្តូងនេះយូរបន្តិច គឺដូចគ្នានឹងធ្លាក់ក្នុងឋាននរកមានភ្លើងឆេះ ។ ហេតុនេះ ទើបគេដាក់ឈ្មោះថា អណ្តូងទឹកនរក ។

អណ្តូងទឹកនរក មានសីតុណ្ហភាពខ្ពស់ខ្លាំងធ្វើឱ្យសត្វផ្សេងៗពុំអាចចូលក្នុងអណ្តូងនេះបានទេ ប៉ុន្តែជប៉ុនបានយកសារធាតុរ៉ែមានសភាពខាប់ខ្លាំងនៅទីនេះ ទៅប្រើប្រាស់ជាធាតុផ្សំក្នុងផលិតផលថែរក្សាស្បែក ហើយផលិតផលទាំងនេះបានដាក់លក់នៅតាមហាងផ្សេងៗនៅបរិវេណខាងមុខអណ្តូងនរក ៕

ប្រទេសប៊ុលហ្គារី ៖ បើអ្នកណាបានឃើញរូបភាពរូងភ្នំមួយនេះនឹងនិយាយថា ចុម! ដូចខ្លាំងម្ល៉េះ! ខណៈអ្នកខ្លះទៀតលួចញញឹម ដោយសារពួកគេគិតវែងឆ្ងាយលើសពីនេះ ។ អ្នកឃើញរូបភាពរូងភ្នំនិយាយដូចៗគ្នាថា គ្រាន់តែក្រឡេកមួយភ្លែត ធ្វើឱ្យពួកគេមានបាបកម្មទៅហើយ ។ ហេតុអ្វីបានជាវាមានរូបរាងបែបនេះ តើវាកើតឡើងដោយសារធម្មជាតិ ឬមនុស្សជាអ្នកបង្កើត?

រូងភ្នំដែលយើងបានឃើញនេះឈ្មោះថា «Utroba Cave» ឬឈ្មោះ «Womb Cave» ឬឈ្មោះ «រូងភ្នំមាត់ស្បូន» ដែលគេប្រទះឃើញដំបូងនៅឆ្នាំ២០០១ ក្នុងទីក្រុង Kardzhali ប្រទេសប៊ុលហ្គារី ។ នៅពេលយើងបានឃើញរូបភាពរបស់រូងភ្នំនេះ យើងនឹងបាត់ឆ្ងល់ថា ហេតុអ្វីទើបគេដាក់ឈ្មោះវាបែបនេះ ហើយវាមិនត្រឹមតែជាកន្លែងទាក់ទាញភ្ញៀវទេសចរប៉ុណ្ណោះទេ ប៉ុន្តែជាកន្លែងស័ក្តិសិទ្ធិផងដែរ ។

វាជារូងភ្នំបុរាណមួយកើតឡើងតាមធម្មជាតិតាំងពីសម័យបុរេប្រវត្តិមកម៉្លេះ ប៉ុន្តែត្រូវបានមនុស្សសម័យមុនចោះថ្មបន្ថែមចូលទៅផ្នែកខាងក្នុង ដើម្បីឱ្យវាមានរូបរាងដូចយើងគ្រប់គ្នាបានឃើញ ។ កាលពីជាង៣.០០០ឆ្នាំមុន មនុស្សបានចោះថ្មចូលទៅខាងក្នុងជម្រៅប្រមាណ២២ម៉ែត្រ ដោយសារពួកគេតាំងចិត្តបង្កើតរូងភ្នំឱ្យក្លាយជារូបរាងបែបនេះ ។

អ្នកជំនាញនិយាយថា កាលពីដើមឡើយ ច្រូកចូលរូងភ្នំ Utroba មានស្នាមប្រេះខ្លះៗ ហើយក្រោយមក ច្រកចូលរូងភ្នំត្រូវបានមនុស្សចោះថ្មបន្ថែមឱ្យកាន់តែធំទូលាយជាងមុន ។ រីឯច្រករូងភ្នំមានកម្ពស់៣ម៉ែត្រ, ទទឹងស្មើ២ម៉ែត្រកន្លះ ហើយនៅផ្នែកខាងក្នុងនៃរូងថ្មមានអាសនៈកម្ពស់១.៣ម៉ែត្រ ។ គេជឿថា នៅទីនេះ គឺជាទីសក្ការៈបូជារបស់ជនជាតិថូរ៉ាស៊ីស ។

ជារៀងរាល់ថ្ងៃ ពន្លឺថ្ងៃនឹងចាំងចូលផ្នែកខាងលើនៃរូងភ្នំ ចាប់ពី២នាទី ទៅ៣នាទី ហើយវាក៏បង្កើតជារូបរាងលិង្គ ។ ប៉ុន្តែពន្លឺថ្ងៃនេះនឹងចាំងចូលដល់ទីអាសនៈតែ១ថ្ងៃប៉ុណ្ណោះក្នុង១ឆ្នាំ គឺក្នុងអំឡុងពេលចាប់ពីចុងខែកុម្ភៈ ដល់ដើមខែមីនា ។ គេចាត់ទុកថា ពន្លឺថ្ងៃដែលចាំងមកលើអាសនៈនេះ គឺជានិមិត្តរូបតំណាងឱ្យការមានផ្ទៃពោះរបស់ស្ត្រី និងជារដូវសាបព្រួសដំណាំប្រចាំឆ្នាំ ។

បច្ចុប្បន្ន រូងភ្នំនេះបានក្លាយជាទីកន្លែងពេញនិយមសម្រាប់ភ្ញៀវទេសចរ ជាពិសេស គូស្វាមី-ភរិយាជាច្រើនគូបានធ្វើដំណើរមកសុំកូននៅទីនេះ ។ ទោះយ៉ាងណា មិនថាវាត្រូវបានបង្កើតឡើងដោយធម្មជាតិ ឬមនុស្ស ប៉ុន្តែគេពុំអាចបដិសេធបានថា រូបភាពរបស់រូងភ្នំអាចទាក់ទាញចំណាប់អារម្មណ៍របស់មនុស្សទាំងអស់ និងចង់ដឹងពីប្រវត្តិរបស់វា ៕

ប្រទេសអ៊ូហ្គង់ដា ៖ រយៈពេល២០ឆ្នាំមកនេះ ប្រទេសអ៊ូហ្គង់ដា (ស្ថិតនៅអាហ្វ្រិកខាងកើត) បានបាត់បង់ធនធានធម្មជាតិព្រៃឈើរហូតដល់ជាង១លានហិកតា ។ ហេតុនេះ ដើម្បីបញ្ឈប់សកម្មភាពកាប់បំផ្លា.ញ ព្រៃឈើយ៉ាងខ្លាំងក្លា ស្ត្រីរស់នៅក្នុងតំបន់នាំគ្នាកែច្នៃកាកសំណល់អាហារធ្វើជាធ្យូងអនាម័យដើម្បីចម្អិនម្ហូបអាហារ និងលក់យកប្រាក់ចំណូល ។

ព្រៃឈើនៅប្រទេសអ៊ូហ្គង់ដាសម្បូរទៅដោយជីវចម្រុះ ហើយវាផ្តល់ផលប្រយោជន៍ដល់អ្នកស្រុករស់នៅក្នុងតំបន់ និងបរិស្ថាន ។ ប៉ុន្តែក្នុងរយៈពេលជាច្រើនឆ្នាំកន្លងមក អ៊ូហ្គង់ដាបានបាត់បង់ធនធានធម្មជាតិព្រៃឈើអស់យ៉ាងច្រើន ហើយមូលហេតុមួយនៃការបាត់បង់ព្រៃឈើ គឺការកាប់ដើមឈើយកមកធ្វើអុសដុតរបស់ពលរដ្ឋ ។

ការធ្វើធ្យូងអនាម័យពីកាកសំណល់អាហារទាំងនេះ បានផ្តល់ប្រយោជន៍យ៉ាងច្រើនដល់ស្ត្រីរស់នៅក្នុងតំបន់ ដូចជា ៖ ជាវត្ថុគ្មានជាតិពុល និងពុំប៉ះពាល់បរិស្ថាន ហើយការប្រើប្រាស់ធ្យូងអនាម័យ គឺមានគុណភាពល្អជាងធ្យូងធ្វើពីអុសធម្មតា និងមានតម្លៃថោកជាង ។ ក្រៅពីនេះ វាបានជួយកាត់បន្ថយពេលវេលាផងដែរ ពីព្រោះស្ត្រីក្នុងភូមិពុំចាំបាច់ទៅកាប់ឈើក្នុងព្រៃធ្វើអុសដុតទៀតទេ ប៉ុន្តែពួកគេបានទទួលប្រាក់ចំណូលពីការលក់ធ្យូងអនាម័យ ។

Godliver Businge ជាប្រធានគម្រោង Women’s Earth Alliance (WEA) នៅប្រទេសអ៊ូហ្គង់ដា និងជាអ្នកចូលរួមបង្កើតគម្រោង Uganda Women’s Water Initiative (UWWI) ដែលបើកឱកាសឱ្យស្ត្រីបានរៀនសូត្រពីរបៀបធ្វើធ្យូងអនាម័យពីកាកសំណល់អាហារ ដើម្បីប្រើប្រាស់ជំនួសអុសក្នុងព្រៃ និយាយថា ៖ «ប្រទេសអ៊ូងហ្គង់ដាគ្មានច្បាប់ការពារព្រៃឈើតឹងរ៉ឹងដូចប្រទេសជិតខាងទេ ដូចជា ៖ កេនយ៉ា និងតង់ហ្សានី ប៉ុន្តែអ៊ូហ្គង់ដាប្រៀបដូចជាទីផ្សារបើកចំហរមួយ ដែលយើងអាចធ្វើអ្វី ឬលក់អ្វីក៏បាន» ។

គម្រោង Uganda Women’s Water Initiative បានផ្តល់ចំណេះដឹងពីវិធីធ្វើធ្យូងអនាម័យពីកាកសំណល់សរីរាង្គ ដោយយកផ្ទះរបស់អ្នកភូមិធ្វើជាកន្លែងអប់រំ ។ Hajra Mukasa ជានាយករបស់ Women’s Earth Alliance ប្រចាំអាហ្វ្រិកខាងកើតនិយាយថា ៖ «យើងដឹងថា ស្ត្រីមានតួនាទីជាម្តាយផង និងជាភរិយាផង ហើយយើងតែងតែផ្តោតជានិច្ចថា នឹងជួយឱ្យស្ត្រីមានកម្លាំងអាចជួយខ្លួនឯង និងគ្រួសារ ហើយយើងពុំចង់ឱ្យគម្រោងនេះប៉ះពាល់វប្បធម៌នៅទីនេះទេ» ។

ចំណែកវិធីធ្វើធ្យូងអនាម័យមានភាពងាយស្រួលសម្រាប់ពួកគេ គឺពួកគេចាប់ផ្តើមលាយធ្យូងពីកាកសំណល់សរីរាង្គ ដែលមានជាតិកាបូនផ្សំជាមួយសារធាតុស្អិតផលិតពីម្សៅ ឬដីឥដ្ឋ ។ បន្ទាប់មក ពួកគេក៏ផ្សំសារធាតុទាំងនេះដោយដៃរបស់ខ្លួន ឬអាចប្រើប្រាស់ម៉ាស៊ីនផលិតធ្យូងជារាងមូលក៏បាន រួចហើយ យកធ្យូងទាំងអស់ទៅសម្ងួតឱ្យស្ងួតសម្រាប់ទុកចម្អិនអាហារ ៕

វិស័យរថយន្តអគ្គិសនីនាពេលបច្ចុប្បន្ននេះគឺមានការពេញនិយមខ្លាំងណាស់នៅទូទាំងពិភពលោក ដោយសារគុណភាពល្អជាងរថយន្តសាំង ងាយស្រួលបញ្ឆេះ សំឡេងស្ងាត់ ក៏ដូចជាមានរូបរាងទាក់ទាញផងដែរ។ តាមពិតទៅរថយន្តអគ្គិសនីមិនមែនទើបតែមានវត្តមានថ្មីៗនោះទេ វាមានប្រវត្តិយូរណាស់មកហើយ ប៉ុន្តែដោយសារការអភិវឌ្ឍន៍ម៉ាស៊ីនចំហេះខាងក្នុងនៅដើមសតវត្សទី ២០ ក៏បាននាំឱ្យមានការធ្លាក់ចុះនៃរថយន្តអគ្គិសនី។ នៅអំឡុងឆ្នាំ ១៨៣០ រថយន្តប្រើសាំងមានកម្លាំងខ្លាំងជាង ហើយមានរយៈចម្ងាយឆ្ងាយជាង និងលឿនជាងរថយន្តអគ្គិសនី ទើបរថយន្តអគ្គិសនីមានប្រជាប្រិយភាពតិច ហើយនៅទីបំផុតត្រូវបានជំនួសដោយរថយន្តប្រើសាំងតែម្តង។

ទោះជាយ៉ាងណាសព្វថ្ងៃនេះក្រុមហ៊ុនធំៗជាច្រើនបានកំពុងចាប់ផ្តើមអភិវឌ្ឍរថយន្តអគ្គិសនីឡើងវិញ ហើយក៏ផ្ទុះការចាប់អារម្មណ៍ម្តងទៀតនៅជុំវិញពិភពលោក។ ដូច្នេះហើយតើអ្នកដឹងទេថា បច្ចុប្បន្ននេះរថយន្តអគ្គិសនីមួយណាដែលមានល្បឿនលឿនជាងគេបំផុតក្នុងលោក?
ចម្លើយនោះគឺ Aspark Owl SP600 ដែលបច្ចុប្បន្នទទួលបានតំណែងជារថយន្តអគ្គិសនីលឿនបំផុតក្នុងពិភពលោក បន្ទាប់ពីបានឈានដល់ល្បឿនអតិបរមា ៤៣៨.៧ គីឡូម៉ែត្រក្នុងមួយម៉ោងនៅឯផ្លូវសាកល្បង Papenburg ក្នុងប្រទេសអាល្លឺម៉ង់កាលពីដើមខែមិថុនា ឆ្នាំ២០២៤។

Aspark Owl SP600 គឺជារថយន្តជប៉ុនដែលផលិតពីក្រុមហ៊ុន Aspark ក្រោមការដឹកនាំរបស់នាយកប្រតិបត្តិ Masanori Yoshida។ រយន្តនេះត្រូវបានផលិតឡើងដំបូងក្នុងឆ្នាំ ២០១៧ ដោយមានសមត្ថភាពមិនធម្មតា ដូចជាការបង្កើនល្បឿនពី ០ ទៅ ១០០ គីឡូម៉ែត្រក្នុងមួយម៉ោង ត្រឹមតែ ១.៨៩ វិនាទីប៉ុណ្ណោះ។ ល្បឿនដ៏លឿននេះក៏បានបំបែកកំណត់ត្រារបស់រថយន្តអគ្គិសនីផ្សេងៗ ដោយឈានដល់ល្បឿនកំពូលមិនគួរឱ្យជឿ ៤៣៨.៧ គីឡូម៉ែត្រក្នុងមួយម៉ោង លើសពីកំណត់ត្រាមុនរបស់រថយន្ត Rimac Nevera គឺ ២៦.៧ គីឡូម៉ែត្រក្នុងមួយម៉ោង។

ភាពជោគជ័យនេះគឺជាលទ្ធផលនៃចក្ខុវិស័យរបស់នាយកប្រតិបត្តិ Aspark លោក Masanori Yoshida រួមជាមួយនឹងការសហការបច្ចេកទេសជាមួយ Manifattura Automobili Torino និង Bridgestone។ Masanori Yoshida ចែករំលែកថា “ដំណើរដើម្បីអភិវឌ្ឍម៉ូដែល Owl hypercar គឺមានរយៈពេលប្រហែល ១០ ឆ្នាំ ហើយគោលដៅរបស់យើងគឺបង្កើតរថយន្តដែលមានល្បឿនលឿនបំផុតនៅលើពិភពលោក ហើយបច្ចុប្បន្នយើងសម្រេចបានកំណត់ត្រាពិភពលោកនៃល្បឿនអតិបរមា”។

Aspark Owl SP600 គឺជាម៉ូដែលរថយន្តអគ្គិសនីដ៏គួរឱ្យចាប់អារម្មណ៍ជាមួយនឹងការរចនាតែមួយគត់ ដំណើរការដ៏មានឥទ្ធិពល និងបច្ចេកវិទ្យាទំនើបជាច្រើន។ ការដណ្តើមបានកំណត់ត្រារថយន្តអគ្គិសនីលឿនបំផុតរបស់ពិភពលោក បានបញ្ជាក់ពីជំហររបស់ Aspark Owl SP600 នៅក្នុងឧស្សាហកម្មរថយន្តអគ្គិសនី និងបើកសករាជថ្មីសម្រាប់រថយន្តអគ្គិសនីដែលមានសមត្ថភាពខ្ពស់៕