ប្រទេសថៃ ជាដែនដីនៃបេតិកភណ្ឌ និងវប្បធម៌ដ៏សម្បូរបែប ព្រមទាំងសម្រស់ធម្មជាតិជាច្រើន រួមមានឆ្នេរសមុទ្រ ទឹកធ្លាក់ ព្រៃភ្នំជាដើម។ យ៉ាងណាមិញ ប្រទេសនេះតែងតែដាក់ចេញនូវវិធានការនិងយុទ្ធសាស្រ្តជាហូរហែរ ដើម្បីកំណើនវិស័យទេសចរណ៍។ ខណៈនៅក្នុងឆ្នាំ២០២៤នេះ ថៃគ្រោងនឹងទទួលភ្ញៀវទេសចរបរទេសសរុបចំនួន ៣៩ លាននាក់ផងដែរ។

ប្រភពទីផ្សារភ្ញៀវទេសចរកំពូលទាំង ៥ មកកាន់ប្រទេសថៃ គឺចិន ម៉ាឡេស៊ី រុស្ស៊ី កូរ៉េខាងត្បូង និងឥណ្ឌា។ បើយោងតាមកាសែត Bankok Post កាលឆ្នាំ ២០២៣ ប្រទេសថៃបានស្វាគមន៍ភ្ញៀវទេសចរអន្តរជាតិចំនួន ២៨ លាននាក់ ក្នុងនោះម៉ាឡេស៊ី ៤.៥៦លាននាក់ ចិន ៣.៥១លាននាក់, កូរ៉េខាងត្បូង ១.៦៥ លាននាក់, ឥណ្ឌា ១.៦២ លាននាក់ និងរុស្ស៊ី ១.៤៨ លាននាក់។

យ៉ាងណាមិញ ត្រឹមតែរយៈពេលប្រាំខែដំបូងនៃដើមឆ្នាំ ២០២៤នេះ ប្រទេសថៃគឺបានទទួលភ្ញៀវទេសចរជិត ១៥ លាននាក់រួចទៅហើយ។ ទោះជាយ៉ាងណា អាជ្ញាធរទេសចរណ៍ថៃ (TAT) និងអង្គការពាក់ព័ន្ធផ្សេងទៀត ថ្មីៗនេះបានដាក់ចេញវិធានការជាហូហែរដើម្បីជំរុញកំណើនទេសចរណ៍ក្នុងរដូវកាល Low Season នេះបន្ថែមទៀត។

គំនិតផ្តួចផ្តើមថ្មី ដែលត្រូវបានគេស្គាល់ថាជាគោលនយោបាយ«បញ្ឆេះកំណើនទេសចរណ៍របស់ថៃ» ដែលបង្កើតក្នុងគោលបំណងជំរុញវិស័យទេសចរណ៍របស់ថៃក្នុងអំឡុងរដូវកាល Low Season ដើម្បីផ្សព្វផ្សាយថាប្រទេសថៃ ជាមជ្ឈមណ្ឌលនៃព្រឹត្តិការណ៍ធំៗជាច្រើន។ ព្រឹត្តិការណ៍ដែលបានគ្រោងទុកក្នុងប្រទេសថៃចម្បងៗមានដូចជា តន្ត្រី កីឡា និងពិធីបុណ្យសិល្បៈឆ្នេរខ្សាច់ ដើម្បីផ្តល់ឲ្យភ្ញៀវទេសចរបានទទួលយកបទពិសោធន៍ថ្មីៗ និងបញ្ជាក់ថា “ថៃជាប្រទេសល្អបំផុតមួយ និងអាចឲ្យមនុស្សម្នាធ្វើដំណើរមកកម្សាន្តបានពេញមួយឆ្នាំ គ្រប់រដូវកាលតែម្តង”។

បន្ថែមពីនេះ នៅដើមខែកក្កដា អាជ្ញាធរទេសចរថៃ ក៏បានដាក់ចេញនូវគម្រោងផ្សព្វផ្សាយសកម្មភាពមួយចំនួនដើម្បីប្រម៉ូតពីគោលដៅទេសចរណ៍ ដែលសកម្មភាពទាំងនោះគឺរួមមាន Muay Thai អាហារ វប្បធម៌ សំលៀកបំពាក់ និងការសម្ដែងផងដែរ៕

ការធ្វើដំណើរទៅក្រៅប្រទេសគឺជាបទពិសោធន៍ថ្មី អាចឱ្យយើងដឹងពីសណ្ឋានភាពសង្គម សិល្បៈវប្បធម៌ និងប្រវត្តិសាស្ត្ររបស់ប្រទេសនីមួយៗ។ ទោះជាយ៉ាងណាប្រសិនបើអ្នកទៅចំប្រទេសដែលគ្មានសុវត្ថិភាព ឬប្រជាជននៅទីនោះមិនរួសរាយអាចធ្វើឱ្យអ្នកមិនស្រួលចិត្ត ឬមានអារម្មណ៍ភ័យខ្លាចជាដើម។ ប៉ុន្តែប្រសិនបើអ្នកទៅចំប្រទេសដែលមានសុវត្ថិភាព ឬមានប្រជាជនរួសរាយ នោះអ្នកនឹងទទួលបានសុភមង្គល ក៏ដូចជាបានសាងនូវអនុស្សារីយ៍ដ៏អស្ចារ្យមួយដែលមិនអាចបំភ្លេចបាន។ ដូច្នេះនៅក្នុងអត្ថបទនេះ យើងនឹងនាំប្រិយមិត្តមកស្គាល់ប្រទេសចំនួន ១០ នៅលើពិភពលោកដែលមានប្រជាជនរួសរាយជាងគេបំផុតក្នុងឆ្នាំ ២០២៤។ នេះបើយោងតាមការចុះផ្សាយរបស់ USA Today កាលពីដើមខែកក្កដា។

១.អាហ្រ្វិកខាងត្បូង៖ ជាការពិតណាស់ប្រជាជននៅទីនេះគឺមានភាពរួសរាយរាក់ទាក់ខ្លាំង ដោយពួកគេតែងតែស្វាគមន៍ និងផ្តល់ភាពកក់ក្តៅដល់ភ្ញៀវទេសចរជានិច្ច ដែលធ្វើឱ្យអ្នកទស្សនាមានផាសុកភាពពេលមកដល់ប្រទេសនេះ។ ចំណុចពិសេសមួយទៀតគឺពួកគេមានភាពរីករាយ ចូលចិត្តនិយាយរឿងកំប្លែង និងមានភាសាផ្លូវការចំនួន ១១ ដែលនិយាយរួមទាំងភាសាអង់គ្លេស អាហ្រ្វិក និង ៩ ភាសាជនជាតិភាគតិច ដែលធ្វើឱ្យវាកាន់តែងាយស្រួលសម្រាប់អ្នកទេសចរក្នុងការបង្កើតមិត្តថ្មី។

២.ប្រទេសក្រិក៖ ក្រិកជាប់ចំណាត់ថ្នាក់លេខ ២ ដោយទទួលបានពិន្ទុ ៣៣.៧១។ យោងតាមការស្ទង់មតិប្រជាជននៅក្នុងប្រទេសនេះគឺចូលចិត្តនិយាយជាមួយមនុស្សប្លែកៗណាស់ ដោយសង្ឃឹមថានឹងបង្កើតមិត្តភាពថ្មី ។ នៅក្នុងភាសាក្រិកមានពាក្យ “philoxenia” ដែលមានន័យថា “មិត្តភាពជាមួយមនុស្សចម្លែក” ឬ “បដិសណ្ឋារកិច្ច” ។ នេះជារបៀបរស់នៅដែលប្រជាជនក្រិកអនុវត្តតាំងពីបុរាណកាលមក ធ្វើឱ្យអ្នកទេសចរតែងតែចង់មកទស្សនានៅប្រទេសនេះជានិច្ច។ ហេតុនេះនៅក្នុងជីវិតពិត ជនជាតិក្រិចគឺតែងតែមានទម្លាប់អញ្ជើញអ្នកស្គាល់គ្នាថ្មីៗមកផ្ទះរបស់ពួកគេណាស់។

៣.ប្រទេសក្រូអាត៖ ក្រូអាតជាប់ចំណាត់ថ្នាក់លេខ ៣ ជាប្រទេសដែលមានប្រជាជនរួសរាយបំផុតក្នុងលោក ជាមួយពិន្ទុ ៣៣,៥០ ។ យោងតាមក្រុមហ៊ុន Remitly ទេសចរណ៍គឺជាវិស័យដ៏សំខាន់នៃសេដ្ឋកិច្ចក្រូអាត ដូច្នេះមនុស្សតែងតែគួរសម និងរាក់ទាក់ជាមួយភ្ញៀវជានិច្ច។ ប្រទេសក្រូអាតមានវប្បធម៌កាហ្វេដ៏រស់រវើក ជួយអ្នកចំណូលថ្មីរំសាយអារម្មណ៍នៃភាពឯកា និងបង្កើតមិត្តយ៉ាងឆាប់រហ័ស។

៤.ប្រទេសម៉ិកស៊ិក៖ ជាមួយពិន្ទុ ៣៣.៤៧ ប្រទេសនេះជាប់ចំណាត់ថ្នាក់ទី ៤ នៅក្នុងបញ្ជី ដោយត្រូវបានគេស្គាល់ថាជាប្រទេសដែលមានសុភមង្គល និងមានប្រជាជនរួសរាយបំផុត។ ប្រជាជននៅទីនេះតែងតែញ៉ាំអាហារជាមួយមនុស្សប្លែកៗជានិច្ច ហើយតែងតែស្វាគមន៍ និងរីករាយក្នុងការចែករំលែក ក៏ដូចជាណែនាំវប្បធម៌របស់ពួកគេទៅប្រាប់ភ្ញៀវទេសចរជាដើម។

៥.ប្រទេសស៊ុយអែត៖ ជាការពិតណាស់ ប្រជាជននៅក្នុងប្រទេសស៊ុយអែតគឺពិតជាមានភាពរួសរាយរាក់ទាក់ និងរីករាយខ្លាំងបំផុត សក្តិសមជាជម្រើសកំពូលសម្រាប់មិត្តភាពដ៏រឹងមាំ ដែលនេះបង្ហាញថាជនជាតិស៊ុយអែតតែងតែបើកចំហក្នុងការបង្កើតមិត្តថ្មីៗជានិច្ច។

៦.ប្រទេសអូស្ត្រាលី៖ ប្រទេសនេះជាប់ចំណាត់ថ្នាក់លេខ ៦ នៅក្នុងបញ្ជីជាមួយ ៣៣.១៣ ពិន្ទុ។ យោងតាមសាស្ត្រាចារ្យជាន់ខ្ពស់ផ្នែកនរវិទ្យានៅសាកលវិទ្យាល័យ Deakin ក្នុងរដ្ឋ Victoria វេជ្ជបណ្ឌិត Tanya King ធ្លាប់បានចែករំលែកថា ភ្ញៀវទេសចរដែលមកអូស្ត្រាលីភាគច្រើនគឺដើម្បីចាប់ផ្តើមស្វែងរក ឬរាប់អានមនុស្សថ្មី ដោយសារប្រជាជននៅទីនេះគឺរួសរាយ ងាយនឹងបង្កើតមិត្តភាពណាស់។

៧.ប្រទេសកាណាដា៖ ត្រូវបានគេស្គាល់ថាជាប្រទេសដែលមានសប្បុរសធម៌ ប្រជាជននៅទីនេះភាគច្រើនគឺចិត្តល្អណាស់ តែងផ្តល់ក្តីស្រឡាញ់ចំពោះមនុស្សគ្រប់គ្នា។ ដូច្នេះប្រទេសកាណាដា គឺបានក្លាយជាគោលដៅទេសចរដ៏គួរឱ្យចាប់អារម្មណ៍បំផុតសម្រាប់ភ្ញៀវទេសចរ។

៨.ប្រទេសអាល្លឺម៉ង់៖ យោងទៅតាម Remitly មនុស្សនៅប្រទេសអាល្លឺម៉ង់គឺតែងតែស្វាគមន៍យ៉ាងក្លៀវក្លាចំពោះភ្ញៀវ ឬអ្នកស្រុកថ្មីជានិច្ច។ ប្រទេសនេះជាប់ចំណាត់ថ្នាក់លេខ ៨ ជាមួយពិន្ទុ ៣២.៦៦ ត្រូវបានគេស្គាល់ថាជាប្រទេសដែលមានប្រជាជនរួសរាយបំផុត។

៩.អេស្តូនី៖ ឈរនៅលេខរៀងទី៩ ជាមួយ ៣២.៥៨ ពិន្ទុ ប្រទេសអេស្តូនីគឺមានប្រជាជនរួសរាយរាក់ទាក់បំផុត ប៉ុន្តែក៏ផ្តល់តម្លៃដល់កន្លែងផ្ទាល់ខ្លួន និងភាពឯកជនផងដែរ។

១០.ប្រទេសបែលហ្សិក៖ ចំណាត់ថ្នាក់ទី ១០ គឺបានទៅលើប្រទេសបែលហ្សិក ជាមួយពិន្ទុ ៣២.៥។ បែលហ្ស៊ិកមានភាពល្បីល្បាញសម្រាប់សូកូឡាដ៏ល្អបំផុតនៅក្នុងពិភពលោក ស្ថាបត្យកម្មដ៏គួរឱ្យចាប់អារម្មណ៍ និងជាកន្លែងសមរម្យសម្រាប់អ្នកដែលចង់ផ្លាស់ទៅអឺរ៉ុប។ ដូច្នេះប្រជាជននៅទីនេះតែងតែផ្តល់ភាពកក់ក្តៅដល់ភ្ញៀវទេសចរជានិច្ច៕

ប្រទេសវៀតណាម ៖ កាលពីថ្ងៃទី៩ ខែកក្កដា ឆ្នាំ២០២៤ សារព័ត៌មាន CNBC រាយការណ៍ថា តាមការស្រាវជ្រាវរបស់ស្ថាប័ន InterNations អំពីអ្នកទៅធ្វើការនៅក្រៅប្រទេស ឆ្នាំ២០២៤ បង្ហាញថា វៀតណាមជាប់ចំណាត់ថ្នាក់ទី១ ផ្នែក​ចំណាយអស់តិចសម្រាប់ជនបរទេសរស់នៅវៀតណាម និងជាប់ចំណាត់ថ្នាក់ទី១ សម្រាប់រយៈពេល៤ឆ្នាំជាប់ៗគ្នា ក្នុងចំណោម៥៣ប្រទេស ខណៈកូឡុំប៊ី ជាប់ចំណាត់ថ្នាក់ទី២ ។

ចំណែកផ្នែកគុណភាពជីវិត គឺវៀតណាមជាប់ចំណាត់ថ្នាក់ទី៤០ ក្នុងចំណោម៥៣ប្រទេស ខណៈផ្នែកតម្រូវការចាំបាច់សម្រាប់ជនបរទេស ដូចជា ៖ អ៊ីនធើរណេត, កន្លែងស្នាក់នៅ និងភាសា គឺវៀតណាមជាប់ចំណាត់ថ្នាក់ទី២៩ ។ រីឯផ្នែកការងារនៅក្រៅប្រទេស រួមទាំងឱកាសមុខរបរ, ប្រាក់ខែ និងស្ថិរភាពការងារ វៀតណាមជាប់ចំណាត់ថ្នាក់ទី១៤ ។

ការស្ទង់មតិនេះបង្ហាញថា ជនបរទេសស្នាក់នៅវៀតណាម ប្រមាណ៨៦% និយាយថា ការចំណាយនៅវៀតណាមសមរម្យ ខណៈអ្នកឆ្លើយតបការស្ទង់មតិ៦៥% ទៀតនិយាយថា ពួកគេពេញចិត្តនឹងស្ថានភាពហិរញ្ញវត្ថុផ្ទាល់ខ្លួន បើធៀបនឹងការចំណាយជាមធ្យមលើពិភពលោក ដែលស្មើនឹង៥៤% ។ រីឯការពេញចិត្តនឹងការងារ ក៏ទទួលបានភាគរយខ្ពស់ដែរ ក្នុងចំណោមជនបរទេសស្នាក់នៅវៀតណាម ។ ការពេញចិត្តនឹងការងារនៅវៀតណាមបានឡើងពីចំណាត់ថ្នាក់ទី២៤ កាលពីឆ្នាំ២០២៣ មកចំណាត់ថ្នាក់ទី៣ នៅឆ្នាំ២០២៤ ។

ទោះយ៉ាងណា នៅវៀតណាម មានជនបរទេសត្រឹមតែ៤៦% ប៉ុណ្ណោះ ដែលធ្វើការពេញម៉ោង ហើយជនបរទេសម្នាក់ក្នុងចំណោម៥នាក់ ឬស្មើ២១% គឺធ្វើការក្រៅម៉ោង និងជនបរទេសប្រមាណ១៨% បានចូលនិវត្តន៍ពីការងារ ។ ជនជាតិអង់គ្លេសម្នាក់រស់នៅវៀតណាម និយាយថា ៖ «ការរស់នៅទីនេះ គ្មានភាពតានតឹងសម្រាប់ខ្ញុំទេ ។ វាជាការផ្លាស់ប្តូរដ៏ល្អប្រសើរពីជីវិតធ្វើការនឿយហត់ និងរញ៉េរញ៉ៃខ្លាំង» ។

រីឯសន្ទស្សន៍ហិរញ្ញវត្ថុផ្ទាល់ខ្លួន (Personal Finance Index) ស្ថាប័ន InterNations បានសាកសួរអ្នកចូលរួមការស្ទង់មតិអំពីការពេញចិត្តផ្ទាល់ខ្លួន ចំនួន៣ផ្នែក រួមមាន ៖ ការចំណាយទូទៅ, ការពេញចិត្តនឹងស្ថានភាពហិរញ្ញវត្ថុ និងប្រាក់ចំណូលគ្រួសារ ដើម្បីចង់ដឹងថា តើពួកគេពេញចិត្តក្នុងការរស់នៅយ៉ាងមានក្តីសុខដែរឬទេ?

ប្រទេសចំនួន១០ ដែលជនបរទេសនិយាយថា ល្អបំផុតសម្រាប់ការចំណាយប្រាក់ផ្ទាល់ខ្លួន រួមមាន ៖ ១-វៀតណាម ២-កូឡុំប៊ី ៣-ឥណ្ឌូណេស៊ី ៤-ប៉ាណាម៉ា ៥-ហ្វីលីពីន ៦-ឥណ្ឌា ៧-ម៉ិកស៊ិក ៨-ថៃ ៩-ប្រេស៊ីល និង១០-ចិន ។

Katrin Chudoba ជានាយកផ្នែកទីផ្សាររបស់ InterNations និយាយថា ៖ «កន្លែងស្នាក់នៅ គឺជាកត្តាសំខាន់យ៉ាងខ្លាំងសម្រាប់ការចំណាយក្នុងការរស់នៅ ក្នុងនោះថៃស្ថិតក្នុងលំដាប់ទី១ ដែលជនបរទេសងាយស្រួលស្វែងរកកន្លែងស្នាក់នៅបំផុត ។ រីឯវៀតណាម ស្ថិតក្នុងលំដាប់ទី២, ហ្វីលីពីន លំដាប់ទី៥ និងឥណ្ឌូណេស៊ី លំដាប់ទី៨ ។ ជនបរទេសជាច្រើននិយាយថា ពួកគេងាយស្រួលស្វែងរកកន្លែងស្នាក់នៅក្នុងប្រទេសទាំង៤ ហើយពួកគេពេញចិត្តនឹងលទ្ធភាពចំណាយផងដែរ» ៕