ប្រទេសបារាំង ៖ អភិបាលក្រុង១រូបនៅប្រទេសបារាំងបានចេញបញ្ជាឱ្យស្ថាប័នពាក់ព័ន្ធទាំងអស់ផ្តល់ភាពសំខាន់ និងតាមដានអាកាសធាតុឱ្យបានខ្លាំងក្លា ដើម្បីជួយគ្នាបញ្ឈប់អាកាសធាតុប្រែប្រួលខុសធម្មតា ដែលធ្វើឱ្យប៉ះពាល់ដល់ការរស់នៅរបស់ពលរដ្ឋ ។ ការចេញបញ្ជាឱ្យតាមដានអាកាសធាតុនេះ ក្រោយពីអភិបាលក្រុងរូបនេះធុញទ្រាន់នឹងមេឃភ្លៀងឥតឈប់ឈរនៅរដូវក្តៅ ។

សារព័ត៌មាន AFP រាយការណ៍ថា ការិយាល័យឧតុនិយមបារាំងបានប្រកាសនៅដើមខែកក្កដា ឆ្នាំ២០២៤ ថា កាលពីខែមិថុនា កន្លងមក មេឃបានធ្លាក់ភ្លៀងច្រើនជាងពេលធម្មតា និងបរិមាណទឹកភ្លៀងខុសគ្នាយ៉ាងខ្លាំង បើធៀបចាប់ពីឆ្នាំ១៩៩១ ដល់ឆ្នាំ២០២០ ជាមួយពេលបច្ចុប្បន្ន ។ លើសពីនេះ តំបន់មួយចំនួនមានភ្លៀងធ្លាក់ច្រើនជាងមុនទ្វេដង ។

លោក Daniel Marrier អភិបាលក្រុង Coulonces ស្ថិតក្នុងតំបន់ Normandy ប្រទេសបារាំង និយាយថា ៖ «ខ្ញុំពុំធ្លាប់ឃើញអាកាសធាតុបែបនេះពីមុនមកទេ ។ នៅពេលព្រឹក ផ្ទៃមេឃប្រែជាពណ៌ប្រផេះ និងធ្លាក់ភ្លៀងឥតឈប់ឈរ ។ ខ្ញុំមើលអ្វីពុំឃើញសោះ ហើយក្នុងផ្ទះរបស់ខ្ញុំត្រូវតែបើកភ្លើងជានិច្ច» ។

ហេតុនេះ លោក Daniel Marrier ដែលមានតួនាទីជាអភិបាលក្រុង ក្រោយពីពលរដ្ឋចំនួន២២៧នាក់ បោះឆ្នោតគាំទ្រលោកឱ្យកាន់តំណែងជាអភិបាលក្រុង បានចាត់វិធានការបញ្ហាអាកាសធាតុដោយខ្លួនឯង គឺការបង្កើតច្បាប់គ្រប់គ្រងក្នុងតំបន់ ដែលស្ថិតនៅក្រោមកការគ្រប់គ្រងរបស់លោក ។

លោកបន្តថា ៖ «ខ្ញុំសូមចេញបទបញ្ជាមួយ គឺចាប់ពីខែសីហា, ខែកញ្ញា និងខែតុលា ឆ្នាំ២០២៤ តទៅ មេឃត្រូវតែឈប់ភ្លៀង ហើយមេឃត្រូវមានពន្លឺថ្ងៃមិនក្តៅខ្លាំងពេក និងមានខ្យល់បក់តិចៗជំនួសវិញ ។ រីឯស្ថាប័នពាក់ព័ន្ធត្រូវតែរួមគ្នាគាំទ្រ ដោយការផ្តល់ភាពសំខាន់ខ្លាំងបំផុតលើការតាមដានអាកាសធាតុ និងទទួលខុសត្រូវក្នុងការអនុវត្តបទបញ្ជានេះ» ។ ក្រោយពីលោកអភិបាលក្រុងចេញបទបញ្ជាហាមមេឃភ្លៀងរួចមក លោកប្រាប់ថា មានពលរដ្ឋជាច្រើននាក់នាំគ្នាអរគុណលោក ។

គួរបញ្ជាក់ថា Normandy ត្រូវបានគេចាត់ទុកថា គឺជាតំបន់ទេសចរណ៍ដ៏ពេញនិយមមួយស្ថិតនៅទិសពាយ័ព្យប្រទេសបារាំង ដោយសារមានធម្មជាតិស្រស់ស្អាត និងភាពរ៉ូមេនទិកផងដែរ ។ រីឯភ្ញៀវទេសចរដែលបានមកកម្សាន្តនៅទីនេះពេញចិត្តយ៉ាងខ្លាំងនឹងអ្វីៗគ្រប់យ៉ាង ដូចជា ៖ ការធ្វើដំណើរ, ភោជនីយដ្ឋាន និងកន្លែងស្នាក់នៅ ៕

ថ្មីៗ បន្ទាប់ពីមានការបង្ហោះចែកចាយនៅលើបណ្តាញសង្គមដោយម្ចាស់ហាងប៊ីយូធីស្ទរ ជាគូស្នេហ៍មួយគូរ បានស្លៀកឈុតប្រពៃណីខ្មែរយ៉ាងស្រស់ស្អាត នៅក្នុងដំណើរកម្សាន្តនៅឯទីក្រុងបាំងកកប្រទេសថៃ ខណៈក៏ទទួលបាននូវការចាប់អារម្មណ៍និងកោតសរសើរព្រោងព្រាតក្នុងចំណោមសាធារណៈជនទាំងខ្មែរនិងជនបរទេស។

នៅថ្ងៃទី១០ ខែកក្កដានេះ យោងតាមការបង្ហោះនៅលើគេហទំព័រហាងប៊ីយូធីស្ទរ បានបង្ហាញឃ្លីបវីដេអូប្រមាណនឹង៣នាទី ដោយភ្ជាប់មកជាមួយនឹងខ្លឹមសារថា« Content ថ្មី ស្លៀកសម្លៀកបំពាក់បុរាណខ្មែរ ដើរជុំវិញទីក្រុងបាំងកក តោះមើលវីដេអូទាំងអស់គ្នា»។

គូរស្នេហ៍ភេទទី៣មួយគូរនេះ ដែលត្រូវបានគេស្គាល់ថាជាម្ចាស់ហាងប៊ីយូធីស្ទរ ខណៈពួកគាត់ទាំង២ ថែមទាំងជាអ្នកមានឥទ្ធិពលលើបណ្តាញសង្គមផងដែរ ដែលកាលពីពេលកន្លងទៅ ពួកគាត់តែងតែបង្កើតនូវមាតិកាល្អៗប្លែកៗ ក៏ទទួលបាននូវការគាំទ្រពីមហាជនជាហូរហែរ។

យ៉ាងណាមិញ តាមរយៈមាតិកាថ្មីៗក្តៅៗរបស់អ្នកទាំង២ ដែលបានលើកយកឈុតសម្លៀកបំពាក់ប្រពៃណីខ្មែរមកស្លៀក នៅក្នុងការដើរកម្សាន្តនៅឯប្រទេសថៃបែបនេះ ក៏ទទួលបាននូវការចាប់អារម្មណ៍ខ្លាំងម្តងទៀត។ នៅក្នុងវីដេអូនោះ គូរស្នេហ៍មួយគូរនេះ បានធ្វើដំណើរទៅកាន់គោលដៅទេសចរណ៍សំខាន់ៗក្នុងទីក្រុងបាំងកក ប្រទេសថៃ ដូចជាម្តុំ China Town, វត្តអារុន និងផ្សាទំនើបជាដើម។

តាមរយៈវីដេអូដែលបានដាក់បង្ហោះខាងលើនេះ គឺបានឆ្លុះបញ្ចាំងពីទឹកចិត្តស្រលាញ់សម្បត្តិវប្បធម៌ជាតិរបស់គូរស្នេហ៍មួយគូរនេះ ដែលចង់បង្ហាញ ផ្សព្វផ្សាយអ្វីដែលជាខ្មែរ និងជាការចែករំលែកនូវមាតិកាល្អៗទៅកាន់ពិភពលោកក៏ដូចជាមនុស្សជំនាន់ក្រោយ បានលះបង់ទាំងកម្លាំងកាយចិត្ត ពេលវេលានិងថវិកាផ្ទាល់ខ្លួន, ដើម្បីបង្កើតបានជា Content មួយនេះឡើង។

ជាមួយគ្នានោះ មហាជនជាច្រើនក៏បានចូលទៅបញ្ចេញមតិកោតសរសើរព្រោងព្រាតដោយអ្នកខ្លះក៏បានលើកឡើងថា«អរគុណច្រើនអូនដែលបានចូលរួមចំណែកក្នុងការផ្សព្វផ្សាយសំលៀកបំពាក់វប្បធម៌របស់ដូនតាខ្មែរយើង, សុំសរសើរប្អូនខ្លាំងមែនទែន ក្លាហានហ៊ានស្លៀកពាក់ឈុតបុរាណខ្មែរចូលទឹកដីប្រទេសថៃ»។

អ្នកខ្លះថា«ពាក់ឈុតខ្មែរនៅលើទឹកដីថៃហើយថែមទាំងមានទង់ជាតិខ្មែរយើងទៀតធ្វើបែបនេះហើយទើបបរទេសមិនអាចច្រឡំថាជាឈុតថៃ ស្រស់ស្អាតណាស់បងយើងគឺជាកូនខ្មែរធ្វើបែបនេះគឺពិតជាបានបង្ហាញពីអ្វីដែលជាខ្មែរពិតប្រាកដ យើងជាខ្មែរយើងជាម្ចាស់គឺយើងមិនត្រូវខ្លាចរអាក្នុងការបង្ហាញនោះទេ ពិតជាសរសើរដល់បងទាំងពីរណាស់»៕

ប្រទេសវៀតណាម ៖ នៅដើមខែកក្កដា ឆ្នាំ២០២៤ មហាជនបានរិះគ.ន់ សាកលវិទ្យាល័យមួយនៅទីក្រុងហាណូយ ប្រទេសវៀតណាមយ៉ាងខ្លាំងក្លា ក្រោយពីសាកលវិទ្យាល័យនេះប្រកាសអនុវត្តគោលការណ៍ថ្មីវាស់កម្ពស់និស្សិតចូលរៀន ។ រីឯនិស្សិតមានកម្ពស់ទាប ឬមានកម្ពស់ពុំដូចគោលការណ៍កំណត់ទេនោះ នឹងគ្មានសិទ្ធិចូលរៀនទេ ។

គណៈគ្រប់គ្រងសាកលវិទ្យាល័យ Vietnam National University បានកំណត់គោលការណ៍ថ្មី ដោយនិស្សិតទាំងអស់ត្រូវតែមានកម្ពស់តាមលក្ខខណ្ឌកំណត់ប៉ុណ្ណោះ ទើបមានសិទ្ធិចូលរៀនឆ្នាំសិក្សា២០២៤ គឺនិស្សិតស្រីត្រូវមានកម្ពស់យ៉ាងហោចណាស់ ១,៥៨ម៉ែត្រ និងនិស្សិតប្រុសត្រូវមានកម្ពស់យ៉ាងហោចណាស់១,៦៥ម៉ែត្រ ។

ក្រោយសាកលវិទ្យាល័យប្រកាសគោលការណ៍ថ្មីក្នុងប្រព័ន្ធផ្សព្វផ្សាយ Tuoi Tre របស់វៀតណាម ត្រូវបានមហាជនរិះគន់ភ្លាមៗ ហើយអ្នកប្រើប្រាស់បណ្តាញសង្គមភាគច្រើនសួរថា តើគោលការណ៍នេះមានភាពយុត្តិធម៌សម្រាប់និស្សិតដែរឬទេ? ការរិះគន់របស់មហាជនធ្វើឱ្យក្រសួងអប់រំវៀតណាមចេញបទបញ្ជាមួយ កាលពីថ្ងៃទី៦ ខែមិថុនា ឆ្នាំ២០២៤ ឱ្យសាកលវិទ្យាល័យ Vietnam National ពិនិត្យមើលគោលការណ៍នេះឡើងវិញ ។

ក្រោយមក គណៈគ្រប់គ្រងសាកលវិទ្យាល័យ ក៏យល់ព្រមលុបចោលគោលការណ៍វាស់កម្ពស់និស្សិត ដើម្បីចូលរៀនថ្នាក់បរិញ្ញាបត្រចំនួន៣មុខវិជ្ជា ក្នុងចំណោម៤ រួមមាន ៖ ១-Business administration and technology ២-Marketing and communications និង ៣-
Human resource and talent management ។ ប៉ុន្តែសាកលវិទ្យាល័យនៅតែបន្តវាស់កម្ពស់និស្សិត ដែលចង់ចូលរៀនផ្នែក Management and Security ។

គណៈគ្រប់គ្រងសាកលវិទ្យាល័យលើកឡើងថា មូលហេតុដែលសាកលវិទ្យាល័យវាស់កម្ពស់និស្សិតចូលរៀនមុខវិជ្ជាទាំងនេះ គឺជាការហ្វឹកហាត់ដើម្បីឱ្យពួកគេក្លាយជាអ្នកដឹកនាំក្រោយបញ្ចប់ការសិក្សា ព្រមទាំងមានសក្តានុពលលេចធ្លោក្នុងអាជីព ។ រីឯកម្ពស់ជាផ្នែកមួយនៃកត្តាសំខាន់ ដែលជួយកសាងភាពជាអ្នកដឹកនាំ និងទំនុកចិត្តលើខ្លួនឯង ។

ប៉ុន្តែអ្នកជំនាញបរទេសមួយចំនួនបានជំទាស់នឹងគំនិតនេះ ក្នុងនោះលោកស្រី Andrea Abel-Brehm អ្នកចិត្តសាស្ត្រសង្គមមកពីសាកលវិទ្យាល័យ University of Erlangen-Nuremberg ប្រទេសអាល្លឺម៉ង់ បានផ្តល់សម្ភាសន៍ជាមួយប្រព័ន្ធផ្សព្វផ្សាយ DW ថា ការកំណត់គោលការណ៍បែបនេះគួរឱ្យបារម្ភ ។

ពេលសួរថា តើកម្ពស់និស្សិតជាកត្តាសំខាន់ដើម្បីក្លាយជាអ្នកដឹកនាំដែរឬទេ? លោកស្រីឆ្លើយថា ៖ «វាអាចពាក់ព័ន្ធគ្នាខ្លះ តែតិចតួចប៉ុណ្ណោះ និងពុំច្បាស់លាស់ ។ អ្នកគួរតែកែទម្រង់គោលការណ៍នេះ បើមិនដូច្នោះទេ វានឹងក្លាយជាសាកលវិទ្យាល័យគាំទ្រគំនិតនេះ» ។

តាមទិន្នន័យរបស់វិទ្យាស្ថានជាតិអាហារូបត្ថម្ភវៀតណាមបង្ហាញថា ចាប់ពីឆ្នាំ២០១៩ ដល់ឆ្នាំ២០២០ ពលរដ្ឋវៀតណាមមានកម្ពស់ជាមធ្យម ស្មើនឹង១,៥៦ម៉ែត្រសម្រាប់ស្ត្រី និងបុរសស្មើនឹង១,៦៨ម៉ែត្រ ។ បើទោះជាលទ្ធផលការស្រាវជ្រាវបញ្ជាក់ថា មនុស្សខ្ពស់មានប្រៀបផ្នែកសេដ្ឋកិច្ចជាងមនុស្សទាបក្តី ប៉ុន្តែគ្មានភស្តុតាងច្បាស់លាស់បញ្ជាក់ថា មនុស្សខ្ពស់មានជំនាញច្រើនជាងមនុស្សទាបទេ ៕