កំណើនភ្ញៀវទេសចរគួរឲ្យកត់សម្គាល់នៅឯប្រទេសកូរ៉េខាងត្បូង និងជប៉ុន ដែលបង្ហាញពីគោលនយោបាយដ៏រឹងមាំរបស់ប្រទេសនៅក្នុងវិស័យទេសចរណ៍។ តួយ៉ាងនៅកូរ៉េ ភ្ញៀវទេសចរភាគច្រើនទៅកម្សាន្តក្រោមឥទ្ធពលនៃ K-Pop, K-Drama ម្ហូបអាហារ និងសម្រស់ ចំណែកនៅជប៉ុនវិញ គឺទាញយកភាពទាក់ទាញពីតុក្កតានិងភាពយន្តគំនូរជីវចល។

យោងតាមការចេញផ្សាយរបស់ Korea Net បានឲ្យដឹងថា K-pop គឺជាហេតុផលចម្បងបំផុតសម្រាប់ភ្ញៀវទេសចរនៅក្នុងការមកកម្សាន្តនៅឯប្រទេសកូរ៉េខាងត្បូង ដែលមានដៃគូសហការជាមួយនឹង២០ប្រទេសសំខាន់ៗ ក្នុងការប្រម៉ូត K-pop តាមរយៈប្រព័ន្ធផ្សព្វផ្សាយសង្គម។ដោយយោងតាលទ្ធផលនៃការស្ទង់មតិកាលពីឆ្នាំ២០២៣ ចំនួនភ្ញៀវទេសចរចម្រុះជាតិសាសន៍ ដែលមកទស្សនាក្នុងប្រទេសកូរ៉េ ក្រៅពី តន្រ្តីK-pop ហើយ ក៏នូវមានកត្តាសក្តានុពលមួយចំនួនដូចជា គ្រឿងសម្អាងនិងការកែសម្ភស្ស ,K-Drama មាតិកាវប្បធម៌ ,និងប្រភេទអាហារកូរ៉េ។

យោងតាមរបាយការណ៍ចន្លោះឆ្នាំ២០២២ ដល់ឆ្នាំ២០២៣ បានឲ្យដឹងថា ចំនួននៃការលើកឡើងអំពីវប្បធម៌កូរ៉េនៅលើប្រព័ន្ធផ្សព្វផ្សាយសង្គម និងអនឡាញនៅក្នុងចំណោមប្រទេស២០នោះ ត្រូវបាននាំមុខដោយ K-pop មានចំនួននៃការលើកឡើងជិត៣៧លានដង ,បន្ទាប់មកដោយអាហារកូរ៉េ ជាង១៤លានដង, គ្រឿងសម្អាង និងសម្រស់ ជិត១០លានដង និងខ្លឹមសារវប្បធម៌ផ្សេងៗជាង ៩លានដង។

បើក្រឡេកមកមើលនៅឯប្រទេសជប៉ុនវិញ យុទ្ធសាស្រ្តមួយក្នុងចំណោមយុទ្ធសាស្រ្តសំខាន់ៗជាច្រើនក្នុងជំរុញវិស័យទេសចរណ៍ គឺការផ្តោតយ៉ាងសំខាន់ទៅលើតន្ត្រី តុក្កតា និងភាពយន្តគំនូរជីវចល។ អ្នកណាមិនល្បីតុក្កតា Anime របស់ប្រទេសជប៉ុន បានបង្កើតឡើងដំបូងអំឡុងសតវត្សទី២០ ដែលមិនត្រឹមតែបានបំផុសគំនិតអ្នកទស្សនាទូទាំងពិភពលោកឱ្យមកកម្សាន្តប្រទេសប៉ុណ្ណោះទេ ប៉ុន្តែពួកគេមកដើម្បីសាកភ្លក្សរសជាតិម្ហូបអាហារជប៉ុនពិតៗ ដែលគេតែងនិយមឃើញនៅក្នុងវគ្គផ្សេងៗក្នុងគំនូរជីវចរ Anime ផងដែរ។

បន្ថែមពីនេះ ទីតាំងសំខាន់ៗដែលមាននៅក្នុងភាពយន្តគំនូរជីវចល anime សុទ្ធតែបានឆ្លុះបញ្ចាំងពីទិដ្ឋភាពនិងទេសភាពពិតជាក់ស្តែងនៅក្នុងប្រទេសជប៉ុន បាននឹងកំពុងអង្រួនបេះដូងអ្នកគាំទ្រតុក្កតា anime គ្រប់ៗរូបចង់ទៅចង់ឃើញដើម្បីផ្តត់យកទិដ្ឋភាពទាំងនោះជាក់ស្តែងតែម្តង។ ខណៈ ជប៉ុនបានព្យាយាមកំណត់យកទីតាំងទាំងនោះ ធ្វើយ៉ាងណាឲ្យមានទំនាក់ទំនងយ៉ាងជិតស្និតជាមួយនឹងតុក្កតាគំនូរជីវចល ដើម្បីបង្កើននូវភាពទាក់ទាញដល់ភ្ញៀវទេសចរបន្ថែមទៀត។

ឧទាហរណ៍មួយគឺរូបសំណាក Mobile Suit Gundam” ពីរឿង Manga និង anime មានទីតាំងស្ថិតនៅទីក្រុងតូក្យូ ខណៈរូបសំណាកនេះបានក្លាយជាទីកន្លែងដ៏ពេញនិយមសម្រាប់ភ្ញៀវទេសចរមកទស្សនា។

យ៉ាងណាមិញ ក្នុងរយៈពេលប៉ុន្មានឆ្នាំចុងក្រោយនេះ តុក្កតា និងគំនូរជីវចល Anime បានក្លាយជាការពេញនិយមយ៉ាងខ្លាំងក្នុងចំណោមមនុស្សជំនាន់ក្រោយនៃបណ្តាប្រទេសទាំងធំនិងតូចជុំវិញពិភពលោក សូម្បីតែប្រទេសលោកខាងលិច ដែលបានធ្វើឲ្យប្រទេសជប៉ុនបានក្លាយគោលដៅទេសចរណ៍ដ៏មានសក្តានុពលបំផុតក្នុងភូមិភាគអាស៊ីបូព៌ា។ ដូច្នេះ វាមិនអាចប្រកែកបានទេថា ប្រជាប្រិយភាពជាសកលរបស់ឧស្សាហកម្មគំនូរជីវចលជប៉ុន បានជះឥទ្ធិពលយ៉ាងខ្លាំងដល់ឧស្សាហកម្មទេសចរណ៍របស់ប្រទេសនេះ៕

ប្រទេសជប៉ុន ៖ រូបភាពមួយបង្ហាញពីដើមឈើជាច្រើនដើមត្រូវគេព្យួរថង់ពាសពេញ ឬស្រដៀងគ្នានឹងការព្យួរសេរ៉ូម បានល្បីល្បាញយ៉ាងខ្លាំងនៅក្នុងបណ្តាញសង្គមនៅប្រទេសជប៉ុន និងចិន នាពេលកន្លងមក និងធ្វើឱ្យអ្នកប្រើប្រាស់បណ្តាញសង្គមជាច្រើននាក់ឆ្ងល់ថា តើវាជាអ្វីឱ្យប្រាកដ?

ការព្យួរថង់ដាក់សារធាតុរាវនៅតាមដើមឈើទាំងនេះ ពុំមែនជាការថែទាំដើមឈើទេ ប៉ុន្តែវាជាការចាក់បញ្ចូលសារធាតុពុលទៅក្នុងសាច់ឈើ ដើម្បីឱ្យវាហូរប្រេងចេញមក និងក្លាយជាដើមឈើមានតម្លៃថ្លៃបំផុតលើពិភពលោក ។ ដើមឈើទាំងនេះឈ្មោះ Kinam ឬ Kynam ឬភាសាជប៉ុនហៅថា Kyara មានន័យថា គឺជាឈើក្រអូប និងពិបាកស្វែងរកបំផុត ។

ដើមឈើប្រភេទនេះត្រូវបានគេប្រើប្រាស់ក្នុងឧស្សាហកម្មផលិតទឹកអប់ ឬធូបក្រអូប ដោយសារវាមានក្លិនក្រអូបយ៉ាងពិសេស ទើបក្លាយជាឈើមានតម្លៃខ្ពស់បំផុត បើធៀបនឹងឈើមានតម្លៃផ្សេងទៀត ។ ដើមឈើទាំងនេះមានចំណុចពិសេសមួយ គឺវាអាចផលិតប្រេងចេញពីដើមរបស់វា ប៉ុន្តែការផលិតប្រេងតិចឬច្រើន ក៏អាស្រ័យលើបរិយាកាសនៅជុំវិញផងដែរ ។

ជាក់ស្តែង បើដើមឈើរងនូវការគំរាមកំហែង ឬស្ថិតក្នុងគ្រោះថ្នាក់ ឬវាមានភាពតានតឹង ដូចជា ៖ មានមនុស្សកាប់វា, មានសត្វល្អិតឆាឆៅ, ខូចខាតដោយសារសត្វធំៗបំផ្លាញ ឬឆ្លងមេរោគផ្សិតមួយចំនួន ដើមឈើទាំងនេះនឹងហូរប្រេងចេញមកក្រៅ ។ ហេតុនេះ គេក៏ចាក់បញ្ចូលសារធាតុពុលក្នុងសាច់ឈើ ដើម្បីឱ្យវាហូរប្រេង និងក្លាយជាឈើមានតម្លៃថ្លៃបំផុត ។

ទោះយ៉ាងណា ដើមឈើ Kyara ដែលទើបតែដាំថ្មីៗ គឺពុំមានតម្លៃថ្លៃដូចដើមឈើដុះនៅក្នុងព្រៃនោះទេ ដោយសារដើមឈើដុះក្នុងព្រៃមានអាយុរាប់រយឆ្នាំ ។ លោក Alan Mahaffey ជាអ្នកជួញដូរដើមឈើ Kyara និយាយថា ៖ «ដើមឈើប្រភេទនេះពិបាកស្វែងរកណាស់លើពិភពលោក ហើយវាអាចមានតម្លៃរហូតដល់១ម៉ឺនដុល្លារអាមេរិកឯណោះ សម្រាប់ឈើមានទម្ងន់ត្រឹមតែ១ក្រាម» ។

លោកបន្តថា លោកបានចំណាយពេល៥ឆ្នាំ ក្នុងការស្វែងរកដើមឈើប្រភេទនេះ និងលក់វាក្នុងតម្លៃ២០លានដុល្លារអាមេរិក នៅឆ្នាំ២០១៦ ។ ក្រោយមក តម្រូវការ និងតម្លៃរបស់វាបានកើនឡើងយ៉ាងឆាប់រហ័ស ។ រីឯការចាក់បញ្ចូលសារធាតុពុលទៅក្នុងសាច់ឈើវិញ គឺពុំទាន់មានការបញ្ជាក់ច្បាស់លាស់ថា វានឹងផ្តល់លទ្ធផលដូចការរំពឹងទុកដែរឬទេ ៕

សហរដ្ឋអាមេរិក ៖ តំបន់ទេសចរណ៍មួយក្នុងចំណោមតំបន់ទេសចរណ៍ដ៏ពេញនិយមរបស់អាមេរិក គឺជណ្តើរហៃគុ (Haiku Stairs) ដែលមានភ្ញៀវទេសចរជាច្រើននាក់ចង់មកថតរូប និងទទួលបានបទពិសោធន៍ឡើងកាំជណ្តើរដ៏ខ្ពស់នេះ ។ កាលពីឆ្នាំ២០២១ អាជ្ញាធរបានសម្រេចថា នឹងរុះរើកាំជណ្តើរចេញ ដោយចំណាយថវិកាប្រមាណ១លានដុល្លារអាមេរិក ដោយសារកាំជណ្តើរមានគ្រោះថ្នា.ក់ ខ្លាំងសម្រាប់ភ្ញៀវទេសចរ ។

ជណ្តើរហៃគុ ឬភ្ញៀវទេសចរភាគច្រើនស្គាល់ឈ្មោះថា «ជណ្តើរឡើងឋានសួគ៌» មានកាំជណ្តើរឈើសរុបចំនួន៤.០០០កាំ ធ្វើឡើងដោយទាហានអាមេរិក កាលពីឆ្នាំ១៩៤០ ដើម្បីទទួលបានសេវាវិទ្យុសម្ងាត់របស់ទាហាន ដែលប្រើប្រាស់ក្នុងសង្គ្រាមលោកលើកទី២ ។ ក្រោយមក នៅឆ្នាំ១៩៧០ ឆ្មាំសមុទ្រអាមេរិកបានអនុញ្ញាតឱ្យភ្ញៀវទេសចរឡើងលើជណ្តើរនេះដើម្បីមើលទេសភាពដ៏ស្រស់ស្អាត ត្រឹមតែ៧៥នាក់ប៉ុណ្ណោះក្នុង១ថ្ងៃ ហើយការឡើងជណ្តើរនេះធ្វើឱ្យភ្ញៀវទេសចរមានអារម្មណ៍ថា ពួកគេកំពុងឡើងឋានសួគ៌ ។

ប៉ុន្តែជណ្តើរនេះត្រូវបានបិទវិញនៅឆ្នាំ១៩៨៧ ដើម្បីថែទាំបន្ថែមទៀត ដោយសារមានការរំខានពីភ្ញៀវទេសចរ គឺក្នុង១ថ្ងៃមានភ្ញៀវទេសចររហូតដល់២០០នាក់ បានមកទីនេះ ។ ជណ្តើរហៃគុ ស្ថិតនៅលើកោះ Oahu ដែលជាកោះមានទំហំធំលំដាប់ទី៣ ក្នុងចំណោមប្រជុំកោះទាំងអស់របស់រដ្ឋ Hawaii ។ ភ្ញៀវទេសចរជាច្រើនដែលបានឡើងលើជណ្តើរដ៏ខ្ពស់នេះ ពួកគេនឹងពុំភ្លេចរូបភាពគួរឱ្យចាប់អារម្មណ៍នៅចំពោះមុខទេ ។

កាលពីឆ្នាំ១៩៤២ ទាហានអាមេរិកបានប្រើប្រាស់ជណ្តើរនេះសម្រាប់តភ្ជាប់សេវាវិទ្យុ ហើយក្រោយមក ជណ្តើរនេះត្រូវបានកែលម្អជាជណ្តើរស៊ីម៉ងត៍ គឺក្រោយពេលរំសាយទាហានជើងទឹកអាមេរិក និងមានឆ្មាំសមុទ្រចូលមកដំឡើងស្ថានីយផ្តល់សេវាអូមេហ្គាជំនួសវិញ ។

បើទោះជារដ្ឋាភិបាលអាមេរិកបានប្រកាសបិទស្ថានីយផ្តល់សេវា និងបិទជណ្តើរហៃគុ ព្រមទាំងបានហាមឃាត់មិនឱ្យជនណាម្នាក់ធ្វើដំណើរមកទីនេះ ប៉ុន្តែបច្ចុប្បន្ន មានភ្ញៀវទេសចរមកទីនេះជាបន្តបន្ទាប់ ។ អ្វីដែលពួកគេបានទទួលក្រៅពីការសាកល្បងភាពរឹងមាំរបស់រាងកាយហើយ គឺពួកគេនឹងមើលឃើញធម្មជាតិដ៏ស្រស់ស្អាតបំផុត ។

លើសពីនេះ ពេលភ្ញៀវទេសចរឡើងទៅដល់ចំណុចខ្ពស់បំផុត ពួកគេនឹងបានឃើញអង់តែនវិទ្យុដែលអាចបញ្ជូនសេវាបានឆ្ងាយរហូតដល់១០.៦០០គីឡូម៉ែត្រផងដែរ ។ ពលរដ្ឋរស់នៅក្នុងតំបន់ធ្លាប់បានសំណូមពរឱ្យរដ្ឋាភិបាលបើកតំបន់នេះធ្វើជាទីសាធារណៈ ប៉ុន្តែរដ្ឋាភិបាលបដិសេធ និងលើកហេតុផលថា រដ្ឋនឹងចំណាយប្រាក់ខ្ពស់ដើម្បីជួសជុលជណ្តើរ ព្រមទាំងមានបញ្ហាសិទ្ធិប្រើប្រាស់ដីធ្លីផងដែរ ៕

ដល់រដូវវស្សាសត្វមូសគឺមានឱកាសយ៉ាងច្រើនក្នុងការជ្រកកោនក្នុងផ្ទះរបស់យើង ទោះបីជាយើងបិទទ្វារជិតយ៉ាងណាក៏ដោយ ក៏ពួកវានៅតែអាចជ្រៀតចូលបាន ដែលធ្វើឱ្យរំខាន និងបង្កជារោគផ្សេងៗលើកុមារនិងមនុស្សចាស់។ ជាការពិតណាស់ នៅពេលមានមូសខាំមនុស្សភាគច្រើនតែងតែប្រើថ្នាំបាញ់មូស ឬអុជធូបមូសជាដើម ដូច្នេះដើម្បីជំនួសការប្រើវិធីសាស្ត្រនេះ យើងសូមណែនាំគន្លឹះងាយដូចខាងក្រោម ធានាថានឹងកម្ចាត់មូសយ៉ាងមានប្រសិទ្ធភាពបំផុត។

១.ប្រើអាល់កុល ឬស្រាបៀរ៖ មានដែរលួចឆ្ងល់អត់ថានៅក្នុងបារ ឬក្លឹបកម្រមានបញ្ហាមូសខាំណាស់ នេះក៏ព្រោះតែពពួកសត្វល្អិតនោះស្អប់ក្លិនស្រាបៀ និងស្រាជាខ្លាំង។ អ្វីដែលត្រូវធ្វើគឺដាក់ស្រាបៀ ឬអាល់កុលមួយកែវនៅក្នុងបន្ទប់ ឬក្នុងផ្ទះធានាថាមូសនិងលែងហ៊ានបង្កើតជម្រកក្នុងបរិវេណផ្ទះយើងទៀតហើយ។

២.ទៀនក្រអូប៖ ទៀនក្រអូបគឺមានប្រជាប្រិយភាពជាខ្លាំងបំផុតសម្រាប់ការប្រើប្រាស់ជាទូទៅ ពេលយើងមានដំណើរកម្សាន្តទៅក្រៅ ឬបោះតង់តាមព្រៃភ្នំជាដើម។ គ្រាន់តែដាក់ទៀនក្រអូបនៅជុំផ្ទះរបស់យើង នោះផ្ទះរបស់យើងនឹងលែងមានមូសទៀតហើយ ព្រោះក្លិនក្រអូបនឹងដេញមូសមិនឱ្យហើរមកជិតយើងបានឡើយ។

៣.ជីរអង្កាម៖ ជីរអង្កាមមានក្លិនមុតស្រួច និងស្ងួត ហើយអាចប្រើបានទាំងប្រេង និងរុក្ខជាតិថែមទៀតផង។ ប្រសិនបើយើងមានរុក្ខជាតិនេះដាំនៅក្នុងផ្ទះ សូមបេះស្លឹកពីរបី ហើយញីឱ្យម៉ត់នៅចន្លោះដៃដើម្បីបញ្ចេញប្រេងឡើងមក រួចយកមកលាបលើខ្លួនជាការស្រេចនោះមូសនឹងលែងហ៊ានចូលមកជិត។ ជម្រើសមួយទៀតគឺបង្កើតថ្នាំបាញ់ជីរអង្កាម ដើម្បីធ្វើឱ្យផ្ទះរបស់យើងប្រែជាស្រស់ថ្លានិងបាត់មូសទាំងអស់។

៤.ញ៉ាំខ្ទឹមស៖ ខ្ទឹមសត្រូវបានគេប្រើនៅក្នុងថ្នាំដេញមូសជាច្រើនប្រភេទ ដូច្នេះហេតុអ្វីបានជាវាការពារអ្នកមិនឱ្យមូសខាំបានពេលបរិភោគរួច? បន្ទាប់ពីបរិភោគអាហារមានជាតិខ្ទឹមរួច មូសមិនអាចរំខានអ្នកបានឡើយ នេះក៏ព្រោះតែមូសស្អប់ក្លិនខ្ទឹមបំផុត។

៥.ពាក់អាវស៖ ដើម្បីចៀសវាងបញ្ហាមូសខាំអ្នកត្រូវពាក់អាវសជានិច្ច ដោយសារការស្លៀកសម្លៀកបំពាក់ពណ៌ផ្សេងៗគឺគួរឱ្យចាប់អារម្មណ៍បំផុតសម្រាប់សត្វមូស ព្រោះមានពន្លឺខ្លាំង តែពណ៌ស មូសមិនចាប់អារម្មណ៍ទេ។ ទោះជាយ៉ាងណាក៏ដោយ មូសនៅតែអាចខាំបានដែរ តែខាំតិចជាងអ្នកពាក់អាវពណ៌ផ្សេងជាពិសេសអាវពណ៌ខ្មៅតែម្ដង។

៦.សាប៊ូលាងចាន៖ លាយសាប៊ូលាងចានបន្តិចដាក់ជាមួយទឹកធម្មតាក្នុងធុងតូចល្មម រួចយកទៅដាក់នៅកន្លៀតផ្ទះមួយយប់ជាការស្រេច។ ការធ្វើបែបនេះមូសនឹងទៅរោមធុងទឹក ហើយវានឹងងាប់ក្នុងនោះជាមិនខាន៕

ប្រទេសអង់គ្លេស ៖ កាលពីថ្ងៃទី៦ ខែកក្កដា ឆ្នាំ២០២៤ ប្រទេសអង់គ្លេសបានរៀបចំការប្រកួតសត្វខ្យងវារដើម្បីដណ្តើមជើងឯកពិភពលោក ដែលមានបេក្ខជនយកខ្យងជាច្រើនក្បាលមកចូលរួមប្រកួត និងមានភ្ញៀវទេសចរមកទស្សនាជាច្រើននាក់ ។ ការប្រកួតនេះរៀបចំឡើងនៅភូមិខុមហែម តំបន់ន័រហ្វស ហើយបើទោះជាក្នុងអំឡុងពេលប្រកួតមានភ្លៀងធ្លាក់ក្តី ប៉ុន្តែវាពុំមែនជាឧបសគ្គដល់ការប្រកួតទេ ។

នៅឆ្នាំ២០២៤នេះ ខ្យងដែលទទួលបានជ័យជម្នះក្នុងការប្រកួតមានឈ្មោះថា «ជេស» ដែលបានវារទៅដល់ចំណុចគោលដៅនៅរង្វង់មូលពណ៌ខ្មៅ លឿនជាងខ្យងផ្សេងៗទៀត គឺចំណាយពេល៤នាទី និង៣វិនាទី ។

ទោះយ៉ាងណា បើទោះជាខ្យង «ជេស» អាចវារទៅដល់គោលដៅបានរហ័សជាងខ្យងផ្សេងៗក្តី ប៉ុន្តែវាពុំអាចយកឈ្នះការប្រកួតនាពេលកន្លងមកទេ ។ កាលពីឆ្នាំ១៩៩៥ ខ្យងឈ្មោះ «អាឈី» បានវារទៅដល់គោលដៅ ដោយចំណាយពេលត្រឹមតែ២នាទី និង២០វិនាទីប៉ុណ្ណោះ ។

ការប្រកួតលើកនេះ បេក្ខជនបានយកខ្យងមកចូលរួមប្រកួត ចំនួន១៥០ក្បាល ដើម្បីដណ្តើមជើងឯកពិភពលោក ដែលប្រទេសអង់គ្លេសបានរៀបចំការប្រកួតខ្យងវារបែបនេះ តាំងពីឆ្នាំ១៩៦០ មកម៉្លេះ ។ គេបានឃើញគណៈកម្មការម្នាក់ៗឈរពាក់អាវភ្លៀង ខណៈការប្រកួតរៀបចំនៅលើតុមួយ ដែលមានគំនូសរង្វង់មូលពណ៌ខ្មៅព័ទ្ធជុំវិញ និងមានរង្វង់មូលពណ៌ក្រហមនៅចំណុចកណ្តាល ហើយបើខ្យងណាអាចវារទៅដល់រង្វង់មូលពណ៌ខ្មៅមុនគេ នឹងទទួលបានជ័យជម្នះ ។

គួរបញ្ជាក់ថា កាលពីថ្ងៃទី២៩ ខែមិថុនា ឆ្នាំ២០២៤ កន្លងមក ប្រទេសអង់គ្លេសធ្លាប់បានរៀបចំការប្រកួតជីកសត្វជន្លេន (World Worm Charming Championship) ដើម្បីដណ្តើមជើងឯកពិភពលោក ផងដែរ គឺនៅទីក្រុងឈេសឃៀ ។ ពេលនោះ មានបេក្ខជនចូលរួមប្រកួតជាច្រើននាក់ ដែលបានយកឧបករណ៍ជាច្រើនប្រភេទមកជីកជន្លេន ៕