ប្រទេសជប៉ុន៖ កាលពីថ្ងៃទី១០ ខែកក្កដា ឆ្នាំ២០២៤ មន្ត្រីខេត្ត Yamagata របស់ប្រទេសជប៉ុនបានអនុម័តបទប្បញ្ញត្តិថ្មីមួយដោយអំពាវនាវឱ្យមនុស្សសើចយ៉ាងហោចណាស់ម្តងក្នុងមួយថ្ងៃដើម្បីលើកកម្ពស់សុខភាពផ្លូវចិត្តឱ្យកាន់តែប្រសើរឡើង។ ទោះជាយ៉ាងណាច្បាប់នេះក៏បានប្រឈមមុខនឹងភាពចម្រូងចម្រាសជាច្រើន ដោយអ្នកស្រុករិះ.គន់ថា ជាការរំលោភសិទ្ធិរបស់ពួកគេ។

យោងតាម South China Morning Post បានឱ្យដឹងថា ក្រុមប្រឹក្សាខេត្ត Yamagata កាលពីចុងសប្តាហ៍មុនបានបោះឆ្នោតអនុម័តបទប្បញ្ញត្តិដែលស្នើឡើងដោយសមាជិកនៃគណបក្សប្រជាធិបតេយ្យសេរី (LDP) ដោយលើកទឹកចិត្តមនុស្សឱ្យ “បណ្តុះសុខភាពផ្លូវកាយ និងផ្លូវចិត្តតាមរយៈការសើច ដូចជាញញឹម សើច យ៉ាងហោចណាស់ម្តងក្នុងមួយថ្ងៃ”។ .

បទប្បញ្ញត្តិនេះក៏តម្រូវឱ្យអ្នកដឹកនាំធុរកិច្ចអភិវឌ្ឍបរិយាកាសការងារ “ពោរពេញដោយសំណើច” ហើយចាត់ទុកថ្ងៃទី ៨ នៃរៀងរាល់ខែជាថ្ងៃសម្រាប់ប្រជាជននៅក្នុងខេត្ត “លើកកម្ពស់សុខភាពតាមរយៈការសើច”។ ការសម្រេចចិត្តនេះត្រូវបានធ្វើឡើងដោយយោងតាមការស្រាវជ្រាវផ្នែកវេជ្ជសាស្រ្ដពីសាកលវិទ្យាល័យ Yamagata ដែលបានបង្ហាញថាអ្នកដែលសើចច្រើនតែងមានហានិភ័យទាបនៃការស្លាប់មុនអាយុ មានន័យថាអ្នកសើចច្រើនគឺមានសុខភាពល្អ និងអាយុវែង។

ទោះជាយ៉ាងណាក៏ដោយ ចំណាត់ការនេះគឺបានបង្កភាពចម្រូងចម្រាសយ៉ាងខ្លាំងនៅពេលសមាជិកក្រុមប្រឹក្សាខេត្តមួយចំនួនមិនយល់ស្របដោយហេតុផលសិទ្ធិមនុស្ស។ ពួកគេបានបោះឆ្នោតប្រឆាំងនឹងវា ដោយសារតែពួកគេជឿថា ការសើច ឬមិនសើច គឺជាសិទ្ធិរបស់មនុស្សម្នាក់ៗ ក្នុងសេរីភាពខាងក្នុង និងមនោគមវិជ្ជា។

លោក Satoru Ishiguro សមាជិកនៃគណបក្សប្រជាធិបតេយ្យធម្មនុញ្ញ (CDP) នៅក្នុងសភា Yamagata បាននិយាយថា “យើងមិនអាចជ្រៀតជ្រែកសិទ្ធិរបស់មនុស្សដែលពិបាកសើចដោយសារជំងឺ ឬហេតុផលផ្សេងទៀតបានទេ” ។ ជាការឆ្លើយតប ស្នងការ LDP លោក Kaori Ito បានសង្កត់ធ្ងន់ថា បទប្បញ្ញត្តិមិនតម្រូវឱ្យមនុស្សញញឹម និងគោរពច្បាប់របស់ខ្លួននោះទេ។

ក្រុមប្រឹក្សាខេត្តក៏មិនដាក់ពិន័យចំពោះអ្នកដែលមិនអាចញញឹមបានយ៉ាងហោចណាស់ក្នុងមួយថ្ងៃដែរ។ ដូច្នេះបទប្បញ្ញត្តិនេះ គ្រាន់តែជាការលើកកម្ពស់ និងការខិតខំធ្វើឱ្យមនុស្សញញឹម ឬសើចប៉ុណ្ណោះ ទោះបីមនុស្សទាំងនោះមិនសើចក៏មិនអីដែរ។ គួរបញ្ជាក់ដែរថាក្រៅពីខេត្ត Yamagata ខេត្តពីរផ្សេងទៀតដូចជាកោះហុកកៃដូ និង Osaka ក៏អនុវត្តកម្មវិធីជាច្រើនដើម្បីលើកកម្ពស់សុខភាពតាមរយៈស្នាមញញឹមផងដែរ ដោយពួកគេក៏កំណត់យកថ្ងៃទី ៨ ជារៀងរាល់ខែជាថ្ងៃសើចសម្រាប់ប្រជាជនក្នុងខេត្ត៕

បន្ទាប់ពីបាត់មុខពីវិស័យបាល់ទាត់ធំៗមួយរយៈដោយសារបញ្ហាសុខភាព Neymar ក៏បានចំណាយពេលវេលាទាំងនេះដើម្បីកសាងគ្រួសារមួយយ៉ាងមានសុភមង្គល។ ខ្សែប្រយុទ្ធប្រេស៊ីល Neymar Júnior គឺកីឡាកររបស់ក្លិប Al Hilal ដែលមានប្រាក់បៀវត្សរ៍ខ្ពស់បំផុតនៅលើពិភពលោក។ ទោះជាយ៉ាងណា បច្ចុប្បន្នខ្សែប្រយុទ្ធរូបនេះនៅតែបង្ហាញខ្លួននៅលើទីលានបាល់ទាត់បែបធម្មតា ដោយមិនប្រកួតប្រជែងលក្ខណៈទ្រង់ទ្រាយធំឡើយ។

បើយោងតាមសារព័ត៌មានបរទេស Pamfleti កីឡាករវ័យ ៣២ ឆ្នាំរូបនេះបច្ចុប្បន្នកំពុងតែសាងគ្រួសារយ៉ាងមានសុភមង្គលជាមួយតារាម៉ូឌែលប្រេស៊ីល Bruna Biancardi បន្ទាប់ពីប្រកាសបែកគ្នាកាលពីឆ្នាំ ២០២៣។ មុនពេលបែកគ្នា Bruna បានសម្រាលកូនស្រីម្នាក់ ដោយសារតែ Neymar ជាបុរសមានសង្សាច្រើន ទើប Bruna សម្រេចចែកផ្លូវគ្នាជាមួយកីឡាកររូបនេះតែម្តង។

ទោះជាយ៉ាងណាក៏ដោយ កាលពីពេលថ្មីៗនេះគេបានប្រទះឃើញ អ្នកទាំងពីរបានចូលរួមនៅក្នុងពិធីបុណ្យមួយ ខណៈដែលពួកគេមើលទៅហាក់បីដូចជាស្រលាញ់គ្នាខ្លាំងណាស់។ Neymar បានក្លាយជាឪពុករបស់គេជាលើកទីបីហើយ ដែលកូនប្រុសទីមួយមានឈ្មោះថា Davi Lucca និងកូនស្រីទីពីរជាមួយតារាម៉ូឌែល Amanda Kimberly រួមទាំងកូនស្រីទីបីជាមួយតារាម៉ូឌែល Bruna Biancardi។

គួរបញ្ជាក់ដែរថា កំពូលតារាបាល់ទាត់ Neymar គ្រោងនឹងចាកចេញពីក្លិប Al-Hilal នៅឆ្នាំ ២០២៥ ហើយត្រឡប់ទៅប្រេស៊ីលវិញ នេះបើយោងតាម UOL Esporte ដែលបានលើកឡើងពីសមាជិកក្រុមប្រឹក្សាភិបាល Santos អនាមិក។ បើតាមសេចក្តីរាយការណ៍ លោកមានគោលដៅបន្ទាប់របស់លោកនៅក្នុងចិត្តរួចហើយ បន្ទាប់ពីបានបញ្ចប់កិច្ចសន្យាទីពីរក្នុងរយៈពេលពីរឆ្នាំលើកិច្ចសន្យារបស់លោកនៅមជ្ឈិមបូព៌ា។ ដូច្នេះខ្សែប្រយុទ្ធរូបនេះត្រូវបានគេរំពឹងថានឹងត្រលប់មកលេងនៅក្លិបអឺរ៉ុបវិញក្នុងឆ្នាំ ២០២៥៕

ប្រទេសប៉េរូ ៖ កាលពីថ្ងៃទី១០ ខែកក្កដា ឆ្នាំ២០២៤ សារព័ត៌មាន AFP រាយការណ៍ថា ក្រោយពេលទឹកកករលាយដោយសារអាកាសធាតុក្តៅ គេបានរកឃើញសាកស.ព អ្នកឡើងភ្នំម្នាក់ជនជាតិអាមេរិក នៅលើកំពូលភ្នំទឹកកករបស់ប្រទេសប៉េរូ ដែលជនជាតិអាមេរិករូបនេះបានបាត់ខ្លួនកាលពី២២ឆ្នាំមុន ។ ក្រោយមក អាជ្ញាធរបានជួយគ្នាលើកសាកស.ព ចុះពីលើភ្នំ និងយកទៅរក្សាទុកនៅបន្ទប់មួយក្នុងទីក្រុងហួរេស ។

តាមការចុះផ្សាយរបស់សារព័ត៌មានបរទេសបញ្ជាក់ថា វាជាសាកសពរបស់លោក William Stampfel អាយុ៥៩ឆ្នាំ ដែលលោកបានបាត់ខ្លួន តាំងពីខែមិថុនា ឆ្នាំ២០០២ ដោយសារទឹកកកធ្លាក់សង្កត់លើអ្នកឡើងភ្នំមួយក្រុម ។ ហេតុការណ៍នេះបានកើតឡើងក្នុងអំឡុងពេលអ្នកឡើងភ្នំទាំងនេះធ្វើដំណើរនៅលើភ្នំវ៉ាស្ការ៉ាន់ ដែលមានកម្ពស់៦.៧០០ម៉ែត្រ ប៉ុន្តែភ្នាក់ងារសង្គ្រោះរកពុំឃើញសាកសពលោក ។

សមត្ថកិច្ចប៉េរូ និយាយថា គេទើបតែរកឃើញសាកសពលោក William Stampfel នៅពេលទឹកកកលើជួរភ្នំរលាយ និងមានសម្ភារៈផ្សេងៗនៅជាមួយសាកសពផងដែរ ដូចជា ៖ សម្លៀកបំពាក់, ខ្សែក្រវ៉ាត់, វ៉ែនតា, កាតសម្គាល់ខ្លួន, លិខិតឆ្លងដែន, ប័ណ្ណបើកបរ និងស្បែកជើងឃ្លុប ។ ហេតុនេះ ទើបសមត្ថកិច្ចអាចបញ្ជាក់អត្តសញ្ញាណសាកសពបាន ។

សមត្ថកិច្ចបន្តថា សាកសពរបស់ជនជាតិអាមេរិកមានសភាពដូចម៉ាំមី គឺរាងកាយពុំរលួយ ដោយសារស្ថិតនៅក្រោមផ្ទាំងទឹកកក និងមានសីតុណ្ហភាពត្រជាក់ខ្លាំងអស់រយៈពេលជាច្រើនឆ្នាំ ។ សាកសពនេះស្លៀកពាក់ខោអាវជាអ្នកឡើងភ្នំ ព្រមទាំងមានសម្ភារៈមួយចំនួន និងឯកសារនៅជាប់ខ្លួន ។ ដូច្នេះ សមត្ថកិច្ចសន្និដ្ឋានថា ជនជាតិអាមេរិករូបនេះអាចស្លាប់ដោយសារទឹកកកធ្លាក់លើ កាលពីជាង២០ឆ្នាំមុន ។

គួរបញ្ជាក់ថា ជួរភ្នំស្ថិតនៅទិសឦសានប្រទេសប៉េរូ គឺគ្របដណ្តប់ទៅដោយផ្ទាំងទឹកកកពាសពេញទាំងអស់ ដូចជា ៖ ភ្នំវ៉ាស្ការ៉ាន់ និងភ្នំខាសាន ហើយវាជាតំបន់ពេញនិយមរបស់អ្នកឡើងភ្នំមកពីជុំវិញពិភពលោក ផងដែរ ។

កាលពីខែឧសភា ឆ្នាំ២០២៤ អាជ្ញាធរប៉េរូបានរកឃើញសាកសពអ្នកឡើងភ្នំ ជនជាតិអ៊ីស្រាអែល ក្រោយពីបាត់ខ្លួនអស់ជិត១ខែ ។ ក្រោយមក នៅខែមិថុនា ឆ្នាំ២០២៤ អាជ្ញាធរបានឃើញសាកសពអ្នកឡើងភ្នំម្នាក់ទៀតជនជាតិអ៊ីតាលី ក្រោយពេលភ្លាត់ស្នៀតធ្លាក់ពីលើភ្នំ ដោយសារព្យាយាមឡើងទៅលើកំពូលភ្នំមួយទៀតស្ថិតនៅជួរភ្នំអែនឌីស ៕

ប្រទេសថៃ ៖ វាបានធ្វើឱ្យអ្នកប្រើប្រាស់បណ្តាញសង្គមជាច្រើននៅប្រទេសថៃចែកចាយវីដេអូ និងមានចម្ងល់ថា តើវាជាម៉ូតូពិតប្រាកដ ឬក្លែងក្លាយ? ក្រោយពេលពួកគេឃើញអ្នកប្រើប្រាស់ TikTok ឈ្មោះ «teemsarunyu» បង្ហោះវីដេអូបុរសម្នាក់លីម៉ូតូលើស្មា រួចហើយដើរឡើងលើស្ពានអាកាសមួយកន្លែងនៅម្តុំផ្សារស៊ីមុំមឿង ខេត្តប៉ាធុមថានី ។

ក្នុងវីដេអូនេះ គេបានឃើញបុរសរូបនេះលីម៉ូតូដាក់លើស្មា និងដើរឡើងលើស្ពានអាកាសសម្រាប់អ្នកថ្មើជើង នៅម្តុំផ្សារស៊ីមុំមឿង ព្រមទាំងមានមនុស្សម្នាដើរឆ្លងកាត់ទៅមក ។ អ្នកប្រើប្រាស់បណ្តាញសង្គមបានសួរថា តើវាជាម៉ូតូពិតប្រាកដ ឬក្លែងក្លាយ? ហើយពួកគេនិយាយថា បើវាជាម៉ូតូពិតប្រាកដមែននោះ តើបុរសនេះអាចលីឡើងលើស្ពានដោយរបៀបណា? ។ វីដេអូនេះបានល្បីក្នុងបណ្តាញសង្គមភ្លាមៗ និងមានអ្នកមើលរាប់លាននាក់ ក្រោយពីបង្ហោះមិនដល់១ថ្ងៃ ។

ក្រោយមក នៅថ្ងៃទី១០ ខែកក្កដា ឆ្នាំ២០២៤ ក្រុមអ្នកសារព័ត៌មានបានធ្វើដំណើរទៅកាន់ចំណុចដែលបានថតក្នុងវីដេអូនេះ ដើម្បីបកស្រាយចម្ងល់ និងសួរពីអារម្មណ៍ពលរដ្ឋរស់នៅក្បែរបរិវេណស្ពានអាកាស ស្ថិតនៅស្រុកឡាំលូកកា ខេត្តប៉ាធុមថានី ។ ក្រោយការសាកសួរឃើញថា ផ្លូវឡើងទៅលើស្ពានអាកាសនេះចង្អៀតខ្លាំងណាស់ គឺស្មើប្រមាណ១ម៉ែត្រប៉ុណ្ណោះ ហើយពេលឡើងដល់ចំណុចខាងលើ ផ្លូវលើស្ពានអាកាសស្មើ២ម៉ែត្រ ។ រីឯការលីម៉ូតូចុះទៅផ្នែកខាងក្រោមវិញ មិនថាម៉ូតូពិតប្រាកដ ឬក្លែងក្លាយ គឺពិតជាលំបាកខ្លាំងណាស់ ។

បើតាមការសាកសួរអ្នកស្រី ថៈណាផន សាខាមុឡាក់ អាយុ៥០ឆ្នាំ ប្រកបមុខរបររត់ម៉ូតូឌុបនៅចំណុចស្ពានអាកាសខាងលើ និយាយថា អ្នកស្រីបានឃើញបុរសនេះលីម៉ូតូឡើងលើស្ពាន ហើយម៉ូតូនេះធំខ្លាំងណាស់ ប៉ុន្តែវាពុំមែនជាម៉ូតូពិតប្រាកដទេ គឺជាម៉ូតូជ័រសម្រាប់ក្មេងជិះលេងប៉ុណ្ណោះ ។ ទោះយ៉ាងណា បុរសនេះជាមនុស្សពូកែ ដែលអាចលីម៉ូតូឡើងលើស្ពានអាកាសបាន ។

អ្នកស្រី ថៈណាផន បន្តថា បុរសនេះបានទិញម៉ូតូឱ្យកូន ហើយគាត់ពិតជាពូកែដែលអាចលីម៉ូតូធំឆ្លងទៅផ្លូវម្ខាងទៀត ។ ហេតុនេះ គាត់ពុំបានចង់ល្បីល្បាញក្នុងបណ្តាញសង្គម ឬសម្តែងអ្វីទេ ហើយក៏គ្មានអ្នកណាមកចាំថតគាត់ដែរ ។ ប៉ុន្តែមានអ្នកឃើញគាត់ រួចថតយកទៅបង្ហោះក្នុង TikTok ដើម្បីឱ្យអ្នកមើលសប្បាយភ្នែកប៉ុណ្ណោះ ។

ចំណែកលោក ស៊ុរ៉ាស័ក្ត អ៊ីនស៊ុតា អាយុ៥១ឆ្នាំ ជាពលរដ្ឋដើរឆ្លងកាត់បរិវេណនេះនិយាយថា វាជារឿងប្លែកណាស់ ហើយវាពុំអាចទៅរួចទេ ដែលបុរសខាងលើអាចលីម៉ូតូធំបែបនេះឡើងលើស្ពានអាកាស ។ បើមើលក្នុងវីដេអូនេះ លោកគិតថា វាជាម៉ូតូក្មេងលេង មិនមែនជាម៉ូតូពិតប្រាកដទេ ប៉ុន្តែពេលមើលវីដេអូនេះរួចហើយធ្វើឱ្យលោកបាត់តានតឹង និងសើច ។

រីឯអ្នកប្រើប្រាស់បណ្តាញសង្គមផ្សេងទៀតនិយាយថា វាជាម៉ូតូជ័រ ហើយបុរសខាងលើអាចយកទៅឱ្យកូនរបស់ខ្លួន ។ មនុស្សខ្លះទៀតថែមទាំងនិយាយចំអន់ថា កូនៗរបស់គាត់នឹងមើលឃើញពីការលះបង់របស់ឪពុក ដែលហ៊ានធ្វើដល់ថ្នាក់នេះ ។ ក្រៅពីនេះ មនុស្សមួយចំនួនទៀតនិយាយថា វាគ្រាន់តែជាការសម្តែងប៉ុណ្ណោះ ខណៈអ្នកខ្លះទៀតថា ធ្វើចឹង មិនបារម្ភរឿងស្ទះចរាចរណ៍ទេ ៕