បរទេស៖ Aeon ដែលជាបណ្តាញផ្សារទំនើបដ៏ធំបំផុតរបស់ប្រទេសជប៉ុន បានដាក់ពង្រាយប្រព័ន្ធ AI ថ្មីមួយដើម្បីវាយតម្លៃ និងតាមដានអាកប្បកិរិយាបុគ្គលិក។
យោងតាមការចុះផ្សាយរបស់ Reuters កាលពីពេលថ្មីៗនេះបានឱ្យដឹងថា ក្រុមហ៊ុនបានប្រកាសទទួលយកប្រព័ន្ធ AI “Mr Smile” នៅក្នុងហាងចំនួន ២៤០ នៅទូទាំងប្រទេសជប៉ុន ដោយសម្គាល់ថា Aeon ជាក្រុមហ៊ុនដំបូងគេដែលប្រើប្រាស់បច្ចេកវិទ្យាដ៏ទំនើបនេះ។

ប្រព័ន្ធ AI “Mr Smile” ត្រូវបានបង្កើតឡើងដោយក្រុមហ៊ុនជប៉ុន InstaVR គឺជាឧបករណ៍ដែលវាយតម្លៃអាកប្បកិរិយារបស់បុគ្គលិកដោយផ្អែកលើកត្តាជាង ៤៥០ រួមទាំងការស្វាគមន៍ ទឹកមុខ និងកម្រិតសំឡេង ដែលគោលដៅរបស់អ៊ីអនគឺ “ធ្វើឱ្យបុគ្គលិកញញឹមមានស្តង់ដារ និងបង្កើនការពេញចិត្តរបស់អតិថិជន”។ បច្ចេកវិទ្យា Mr Smile មិនត្រឹមតែវាយតម្លៃអាកប្បកិរិយាប៉ុណ្ណោះទេ ថែមទាំងរួមបញ្ចូលធាតុស្រដៀងនឹងហ្គេមផងដែរ ដើម្បីលើកទឹកចិត្តបុគ្គលិកឱ្យកែលម្អពិន្ទុសេវាកម្ម និងអាកប្បកិរិយារបស់ពួកគេ។

អ៊ីអនបានសាកល្បងកម្មវិធីនេះនៅហាងចំនួន ៨ ដោយមានការចូលរួមពីបុគ្គលិកប្រហែល ៣,៤០០ នាក់។ លទ្ធផលបានបង្ហាញថា “អាកប្បកិរិយានៃសេវាកម្ម” មានភាពប្រសើរឡើង ១.៦ ដងក្នុងអំឡុងពេលបីខែនៃការធ្វើតេស្តមុនពេលដាក់ពង្រាយយ៉ាងទូលំទូលាយ។ ការត្រួតពិនិត្យជាបន្តបន្ទាប់នូវសកម្មភាពរបស់និយោជិត សូម្បីតែស្នាមញញឹមពេញមួយថ្ងៃ អាចនាំឱ្យមានការកែតម្រូវអាកប្បកិរិយាល្អជាងមុន ជាពិសេសនៅក្នុងបរិបទវប្បធម៌ជប៉ុន ដែលការមានទឹកមុខញញឹមរួសរាយគឺជារឿងដ៏សំខាន់បំផុត។

ទោះជាយ៉ាងណាក៏ដោយ បច្ចេកវិទ្យានេះក៏អាចធ្វើឱ្យមនុស្សជាច្រើនមានគ្រោះថ្នាក់ផងដែរ ដោយសារវាអាចគ្រប់គ្រងមនុស្សបាន។ ទោះបីជាយ៉ាងណានេះក្តី អ៊ីអនសង្ឃឹមថា ជាមួយនឹងប្រព័ន្ធ AI “Mr Smile” ពួកគេអាចនាំអតិថិជនទទួលបានបទពិសោធន៍ទិញទំនិញកាន់តែប្រសើរតាមរយៈការកែលម្អអាកប្បកិរិយាសេវាកម្មរបស់បុគ្គលិករបស់ពួកគេ។ នេះក៏ឆ្លុះបញ្ចាំងពីការត្រួសត្រាយរបស់ Aeon ក្នុងការអនុវត្តបច្ចេកវិទ្យាដើម្បីកែលម្អសេវាកម្មអតិថិជន និងចោទជាសំណួរអំពីតុល្យភាពរវាងបច្ចេកវិទ្យា និងមនុស្សជាតិនៅក្នុងបរិយាកាសការងារ៕

ប្រទេសថៃ ៖ កាលពីថ្ងៃទី២២ ខែកក្កដា ឆ្នាំ២០២៤ សារព័ត៌មានថៃរាយការណ៍ថា វាបានក្លាយជាប្រធានបទមួយដែលមានការរិះគ.ន់ យ៉ាងខ្លាំងក្នុងបណ្តាញសង្គមប្រទេសថៃ ក្រោយពីអ្នកប្រើប្រាស់ហ្វេសប៊ុកម្នាក់បានបង្ហោះរូបភាពផ្ទាំងប៉ាណូមួយសរសេរជាអក្សរចិនធំៗ ដោយអ្នកប្រើប្រាស់ហ្វេសប៊ុករូបនេះរៀបរាប់ថា ៖ «នៅត្រង់ផ្លូវបំបែកហួយក្វាង មានផ្ទាំងឃោសនាសរសេរពាក់ព័ន្ធនឹងលិខិតឆ្លងដែន ប៉ុន្តែការសរសេរនេះច្បាស់ៗពេក ។ បើបងប្អូនពុំដឹងពីអត្ថន័យ គឺអាចប្រើប្រាស់ Google Translate បកប្រែបាន» ។

វាជាផ្ទាំងប៉ាណូអក្សរចិន ដែលអញ្ជើញអតិថិជនឱ្យទិញលិខិតឆ្លងដែន និងផ្លាស់ប្តូរទៅរស់នៅប្រទេសមួយចំនួន ដូចជា ៖ កម្ពុជា, ឥណ្ឌូណេស៊ី, វ៉ានូអាទូ និងតួកគី ព្រមជាមួយការធានារយៈពេល៣០ថ្ងៃ គឺអតិថិជននឹងទទួលបានសញ្ជាតិប្រទេសទាំងនេះភ្លាមៗ, មានសុវត្ថិភាព និងសម្ងាត់ ។ លើសពីនេះ ក៏បានប្រកាសជ្រើសរើសភ្នាក់ងារបណ្តាញទូទាំងពិភពលោក ផងដែរ ។ ផ្ទាំងប៉ាណូនេះស្ថិតនៅត្រង់បរិវេណផ្លូវបំបែកជា៤ ហួយក្វាង តាមផ្លូវរ៉ាជឆាដា ភិសេក ។

ក្រោយមក ក្រុមការងារសារព័ត៌មានថៃបានចុះទៅចំណុចដំឡើងផ្ទាំងប៉ាណូនេះ ស្រាប់តែឃើញបុគ្គលិកនៅទីនេះ ប្រញាប់ប្រញាល់ដោះផ្ទាំងប៉ាណូអក្សរចិនខាងលើចេញពីភោជនីយដ្ឋានចិន ។ ពេលនោះ សារព័ត៌មានក៏បានសាកសួរបុគ្គលិកដែលដោះផ្ទាំងប៉ាណូចិន ប៉ុន្តែពួកគេពុំបានផ្តល់ព័ត៌មានអ្វីច្រើនទេ គ្រាន់តែនិយាយថា នាយករបស់ពួកគេបានទូរស័ព្ទមកប្រាប់ ឱ្យប្រញាប់មកដោះផ្ទាំងប៉ាណូចេញវិញ ខណៈផ្ទាំងប៉ាណូនេះទើបតែដំឡើង នៅថ្ងៃទី២០ ខែកក្កដា កន្លងមក ។

ជំហានដំបូង សមត្ថកិច្ចប្រចាំតំបន់ហួងក្វាង បានមកជជែកជាមួយបុគ្គលិកចំនួន៥នាក់ ដែលធ្វើការជាមួយជនជាតិចិន ។ បន្ទាប់មក ក៏ហៅពួកគេទៅផ្តល់ព័ត៌មានបន្ថែមទៀតនៅស្ថានីយប៉ូលិសហួយក្វាង ។

បុរសជាម្ចាស់ភោជនីយដ្ឋានចិន ដែលមានផ្ទាំងប៉ាណូនៅខាងខាងលើនិយាយថា លោកឃើញសមត្ថកិច្ចមកសួរនាំ និងថតរូបនៅមុខភោជនីយដ្ឋាន ហើយលោកពុំបានធ្វើអ្វីខុសទេ ។ លោកពុំដឹងថា អ្នកណាជាអ្នកដំឡើងផ្ទាំងប៉ាណូនេះទេ ពីព្រោះវាជាការសម្រេចចិត្តរបស់ម្ចាស់អគារ ដែលអនុញ្ញាតឱ្យជួលដាក់ផ្ទាំងប៉ាណូខាងលើ ។

ចំណែកក្រុមអ្នករត់ម៉ូតូឌុបនៅម្តុំនោះនិយាយថា មុននេះ ពួកគេបានឃើញបុរស២នាក់ និងស្ត្រីម្នាក់បានមកដំឡើងផ្ទាំងប៉ាណូអក្សរចិននៅភោជនីយដ្ឋានចិននេះ ប៉ុន្តែគ្មានអ្នកណាចាប់អារម្មណ៍ថា ផ្ទាំងប៉ាណូសរសេរពីអ្វីទេ ពីព្រោះនៅត្រង់នេះ តែងតែមានមនុស្សយកផ្ទាំងប៉ាណូជាច្រើនមកផ្សព្វផ្សាយដោះដូរចុះឡើងជារៀងរាល់ខែ ។ ប៉ុន្តែពេលដឹងថា វាជាផ្ទាំងប៉ាណូខុសច្បាប់ ក៏មានអារម្មណ៍ភ្ញាក់ផ្អើលយ៉ាងខ្លាំង ។ ម្យ៉ាងទៀត នៅបរិវេណនេះសម្បូរភ្ញៀវទេសចរចិនច្រើន ។

លោក ផាន់ថាណាក់ នុតណារុត អគ្គមេបញ្ជាការរងនៃការិយាល័យប៉ូលិសអន្តោប្រវេសន៍ បញ្ជាក់ថា ចំពោះសំណួរសួរថា តើអាចដំឡើងផ្ទាំងប៉ាណូនេះបានដែរឬអត់? គឺអាចដំឡើងផ្ទាំងប៉ាណូបាន ពុំខុសច្បាប់ទេ ពីព្រោះវាពុំពាក់ព័ន្ធនឹងប្រទេសថៃ ។ វាពុំមែនជាការផ្សាយពាណិជ្ជកម្មថា នឹងផ្លាស់ប្តូរសញ្ជាតិថៃទេ ហើយក្នុងប៉ាណូនេះ យើងនឹងឃើញថា គ្រប់ប្រទេសមានការទិញ-លក់តាមធម្មតា ។

គួរបញ្ជាក់ថា ការដោះផ្ទាំងប៉ាណូអក្សរចិនចេញពីអគារនេះ ក្រោយពីលោក ស្រេតថា ថាវីស៊ីន នាយករដ្ឋមន្ត្រីថៃបានបញ្ជាឱ្យស្ថាប័នពាក់ព័ន្ធចុះស៊ើបអង្កេតរកការពិតទាំងអស់ និងទម្លាក់ផ្ទាំងប៉ាណូជាបន្ទាន់ ៕

្រទេសហ្វីលីពីន ៖ ជ្រលងភ្នំសូកូឡា (Chocolate Hills) មានទីតាំងស្ថិតនៅលើកោះ Bohol ភាគខាងត្បូងទីក្រុងម៉ានីល ប្រទេសហ្វីលីពីន ។ កោះ Bohol គឺជាកោះដែលមានទំហំធំបំផុតរបស់ហ្វីលីពីន និងមានទេសភាពស្រស់ស្អាតតាមបែបធម្មជាតិ ។ ហេតុនេះ ទើបធ្វើឱ្យជ្រលងភ្នំនេះក្លាយជាតំបន់ទេសចរណ៍ធម្មជាតិដ៏ទាក់ទាញមួយនៅលើពិភពលោក ។

នៅទីនេះ សម្បូរទៅដោយភ្នំតូច-ធំ រហូតដល់ជាង១.៧០០ភ្នំ ដែលសុទ្ធតែកើតឡើងតាមធម្មជាតិទាំងអស់ ប៉ុន្តែភ្នំទាំងនេះបែរជាមានរូបរាងមូល និងមានទំហំស្រដៀងនឹងការបង្កើតរបស់មនុស្ស ។ ហេតុនេះ ទើបមនុស្សភាគច្រើនសួរថា តើភ្នំតូច-ធំទាំងនេះកើតឡើងដោយស្នាដៃរបស់មនុស្ស ឬដោយសារធម្មជាតិ? បើតាមផ្នែកវិទ្យាសាស្ត្រឆ្លើយថា ភ្នំទាំងនេះអាចកើតឡើងតាមធម្មជាតិ ។

ការសន្និដ្ឋានបញ្ជាក់ថា កាលពីរាប់លានឆ្នាំមុន តំបន់នេះជាបាតសមុទ្រ ដែលមានផ្កាថ្មជាច្រើនដុះពាសពេញ ។ ក្រោយមក ពេលវេលាក៏បានផ្លាស់ប្តូរធ្វើឱ្យទឹកសមុទ្ររីងស្ងួតអស់ ហើយក៏មានការប្រមូលផ្តុំថ្មកំបោរអស់រយៈពេលជាច្រើនឆ្នាំ រួចហើយបង្កើតបានជាភ្នំទាំងនេះ ។ ប៉ុន្តែមនុស្សភាគច្រើននៅតែឆ្ងល់ថា តើថ្មកំបោរទាំងអស់ប្រមូលផ្តុំគ្នាដោយរបៀបណា ទើបបង្កើតជាភ្នំបែបនេះ?

ពលរដ្ឋហ្វីលីពីនរស់នៅក្នុងតំបន់មានជំនឿខុសៗគ្នាពាក់ព័ន្ធនឹងជ្រលងភ្នំសូកូឡា ក្នុងនោះពលរដ្ឋខ្លះមានជំនឿថា ភ្នំទាំងនេះកើតឡើងដោយសារកូនយក្ស២នាក់ នាំគ្នាមកលុញដីឥដ្ឋលេង រួចហើយ កូនយក្សទាំង២នាក់ ក៏ឈ្លោះប្រកែកគ្នា និងគប់ដីឥដ្ឋដាក់គ្នាទៅវិញទៅមក ។ ប៉ុន្តែក្រោយពីកូនយក្សឈប់ឈ្លោះគ្នា និងឈប់លេងដីឥដ្ឋ ពួកគេភ្លេចធ្វើឱ្យដីឥដ្ឋទាំងនេះមានសភាពរាបស្មើវិញ ទើបបង្កើតបានជាភ្នំ រហូតដល់ជាង១.៧០០ភ្នំ នៅពាសពេញទីនេះ ។

ជាទូទៅ បណ្តាភ្នំតូច-ធំនៅជ្រលងភ្នំសូកូឡា គឺមានស្មៅដុះពីលើភ្នំ ហើយនៅរដូវប្រាំងគ្មានទឹក ស្មៅទាំងនេះនឹងស្ងួតប្រែទៅជាពណ៌ត្នោត ។ ដូច្នេះហើយ ទើបគេដាក់ឈ្មោះវាថា ភ្នំសូកូឡា (Chocolate Hills) ហើយក្រៅពីទីនេះជាតំបន់ទេសចរណ៍ដ៏ទាក់ទាញនៅលើកោះ Bohol របស់ប្រទេសហ្វីលីពីនហើយ វាក៏ជាតំបន់បេតិកភណ្ឌពិភពលោក ផ្នែកភូមិសាស្ត្រផងដែរ ៕

បរទេស៖ នាយកប្រតិបត្តិក្រុមហ៊ុន Tesla លោក Elon Musk បានខាតបង់ប្រាក់រហូតដល់ ២១.៧ ពាន់លានដុល្លារអាមេរិក ដោយសារភាគហ៊ុនរបស់ក្រុមហ៊ុនរថយន្តអគ្គិសនីបានធ្លាក់ចុះខ្លាំងបន្ទាប់ពីការប្រកាសលទ្ធផលអាជីវកម្មនៅត្រីមាសទីពីរ ដែលនេះធ្វើឱ្យទ្រព្យសម្បត្តិរបស់ CEO Elon Musk ធ្លាក់ដល់ ២៤១% ក្នុងរយៈពេលត្រឹមតែមួយថ្ងៃប៉ុណ្ណោះ។

យោងតាម Bloomberg ការធ្លាក់ចុះទ្រព្យសកម្មរបស់មហាសេដ្ឋីរូបនេះគឺជាការធ្លាក់ចុះច្រើនបំផុតក្នុងពិភពលោក ហើយអ្នកដែលមានទ្រព្យសកម្មធ្លាក់ចុះខ្លាំងជាងគេទីពីរនោះគឺលោក Mark Zuckerberg ដែលជានាយកប្រតិបត្តិរបស់ Meta Platforms ដែលលោកបានខាតបង់ប្រាក់រហូតដល់ ៩.៥ ពាន់លានដុល្លារអាមេរិក។

ទោះបីជាទ្រព្យសម្បត្តិរបស់អ្នកទាំងពីរបានធ្លាក់ចុះខ្លាំងយ៉ាងណាក៏ដោយ ក៏ពួកគេនៅតែជាបុគ្គលដែលមានបំផុតនៅលើពិភពលោក។ បើយោងតាមគេហទំព័រ Forbes បច្ចុប្បន្ន Elon Musk បានកាន់កាប់ភាគហ៊ុន ១២% នៅក្នុងក្រុមហ៊ុន Tesla និង ៤២% នៃភាគហ៊ុននៅក្នុងក្រុមហ៊ុនអវកាស SpaceX ។

មហាសេដ្ឋីរូបនេះក៏មានច្រើនជាង ៧០% នៃបណ្តាញសង្គម X និងប្រហែល ៦០% នៃ xAI ដែលជាក្រុមហ៊ុនបញ្ញាសិប្បនិមិត្តដែលលោកទើបតែបង្កើតថ្មីៗនេះផងដែរ។ មូលហេតុដែលភាគហ៊ុនរបស់ក្រុមហ៊ុនរថយន្តអគ្គិសនី Tesla ធ្លាក់ចុះខ្លាំងគឺដោយសារតែក្រុមហ៊ុនកាត់បន្ថយតម្លៃរថយន្តដើម្បីជំរុញតម្រូវការ ខណៈពេលដែលបង្កើនការចំណាយលើគម្រោង AI ។

ហេតុនេះបើតាមរបាយការណ៍ បានបង្ហាញឱ្យដឹងថាប្រាក់ចំណេញរបស់ក្រុមហ៊ុន Tesla ក្នុងមួយរថយន្តដែលលក់បាននាពេលបច្ចុប្បន្នគឺប្រហែល ៨,២០០ ដុល្លារប៉ុណ្ណោះ ធ្លាក់ចុះពាក់កណ្តាលបើធៀបនឹងដើមឆ្នាំ ២០២២។ យោងតាមអ្នកវិភាគ លទ្ធផលនេះបង្ហាញថា Tesla ដែលជាអ្នកត្រួសត្រាយផ្លូវក្នុងវិស័យរថយន្តអគ្គិសនីនៅសហរដ្ឋអាមេរិក បច្ចុប្បន្នកំពុងប្រឈមមុខនឹងការប្រកួតប្រជែងដ៏ខ្លាំងក្លាពីដៃគូប្រកួតប្រជែងក្នុងស្រុក និងបរទេស៕

សហរដ្ឋអាមេរិក ៖ កាលពីថ្ងៃទី២៤ ខែកក្កដា ឆ្នាំ២០២៤ សារព័ត៌មានបរទេសរាយការណ៍ថា ត្រីបាឡែនដ៏កា.ចសាហា.វ ១ក្បាល បានលោតទៅបុកទូករបស់អ្នកនេសាទ២នាក់ នៅកណ្តាលសមុទ្រក្នុងរដ្ឋ New Hampshire សហរដ្ឋអាមេរិក ។ ហេតុការណ៍នេះបណ្តាលឱ្យទូកនេសាទក្រឡាប់ ហើយអ្នកនេសាទទាំង២នាក់បានធ្លាក់ចូលក្នុងសមុទ្រភ្លាមៗ ។

យុវជន២នាក់ទៀតជាបងប្អូននឹងគ្នា ដែលបងមានអាយុ១៩ឆ្នាំ និងប្អូនអាយុ១៦ឆ្នាំ បានថតវីដេអូហេតុការណ៍ត្រីបាឡែនវាយប្រហារទូកនេសាទនេះ និងបង្ហោះក្នុងបណ្តាញសង្គម ក្នុងអំឡុងពេលពួកគេជិះទូក១គ្រឿងទៀតនៅក្បែរនោះ ។ យុវជន២នាក់បងប្អូនប្រាប់ថា ហេតុការណ៍នេះបានកើតឡើងកាលពីថ្ងៃទី២៣ ខែកក្កដា កន្លងមក ។

ក្រោយការបង្ហោះវីដេអូនេះក្នុងបណ្តាញសង្គមឃើញថា អ្នកប្រើប្រាស់បណ្តាញសង្គមយ៉ាងច្រើនចាប់អារម្មណ៍នឹងវីដេអូ ហើយពួកគេបានចែកចាយផងដែរ ។ អ្នកប្រើប្រាស់បណ្តាញសង្គមម្នាក់និយាយថា អាចបណ្តាលមកពីត្រីបាឡែនខឹង ទើបវាវាយប្រហារទូកនេសាទបែបនេះ ។

អ្នកនាំពាក្យឆ្មាំសមុទ្រអាមេរិកនិយាយថា ហេតុការណ៍នេះបានកើតឡើងនៅកណ្តាលសមុទ្រក្នុងទីក្រុង Rye រដ្ឋ New Hampshire ។ រីឯយុវជនទាំង២នាក់បងប្អូន មិនគ្រាន់តែបានថតវីដេអូហេតុការណ៍គួរឱ្យរន្ធត់នេះទេ ប៉ុន្តែពួកគេក៏បានជួយសង្គ្រោះជីវិតអ្នកនេសាទទាំង២នាក់ផងដែរ នាពេលបន្ទាប់ ។ សំណាងល្អ អ្នកនេសាទទាំង២រូបគ្មានរបួសស្នាមអ្វីទេ ប៉ុន្តែទូករបស់ពួកគេខូចខាត ។

យុវជនទាំង២នាក់បងប្អូននិយាយថា ពីដំបូង ពួកគេពុំបារម្ភពីការវាយប្រហាររបស់ត្រីបាឡែនទេ ពីព្រោះមានទូកនេសាទជាច្រើនគ្រឿងទៀតនៅក្បែរនោះ ។ ប៉ុន្តែទីនេះ ជាប្រភពចំណីរបស់ត្រីបាឡែន ហើយមានត្រីបាឡែន១ក្បាលបានលោតទៅបុកទូកនេសាទមួយទំហឹងបណ្តាលឱ្យទូកក្រឡាប់ភ្លាមៗ ខណៈអ្នកនេសាផ្សេងទៀតភ្ញាក់ផ្អើលយ៉ាងខ្លាំង ។

ចំណែកអ្នកប្រើប្រាស់បណ្តាញសង្គមនិយាយថា វាអាចជាហេតុការណ៍ចៃដន្យអាក្រក់របស់អ្នកនេសាទទាំង២រូប ពីព្រោះបើមើលក្នុងវីដេអូឃើញថា ត្រីបាឡែននេះចាប់អារម្មណ៍នឹងហ្វូងត្រីនៅក្បែរទូកនេសាទច្រើនជាង ។ ប៉ុន្តែពេលវាកំពុងតែព្យាយាមស៊ីចំណីនោះ ស្រាប់តែវាលោតទៅបុកទូកនេសាទដោយចៃដន្យ ទើបបណ្តាលឱ្យទូកក្រឡាប់បែបនេះ ។ ដូច្នេះ ត្រីបាឡែនពុំបានវាយប្រហារទូកនេសាទដោយផ្ទាល់ឡើយ ៕