កាលពីថ្ងៃទី២៥ ខែកក្កដា ឆ្នាំ២០២៤នេះ ប្រព័ន្ធផ្សព្វផ្សាយចិនបានរាយការណ៍ថា ព្យុះទីហ្វុង Gaemi បានបោកបក់នៅខេត្ត Fujian ភាគអាគ្នេយ៍នៃប្រទេសចិន តាំងពីថ្ងៃទី២៤ ខែកក្កដា បន្ទាប់មកព្យុះនេះក៏បន្តវាយប្រហារទៅកាន់កោះតៃវ៉ាន់ និងប្រទេសហ្វីលីពីន នាំឲ្យមានភ្លៀងធ្លាក់យ៉ាងជោគជាំ ដែលបណ្តាលឱ្យមនុស្សជាង ២០ នាក់បានបាត់បង់ជីវិតនិងលិចកប៉ាល់ចំនួនមួយគ្រឿង។

ប្រភពសារព័ត៌មានចិនបានរាយការណ៍ថា អាជ្ញាធរចិនបានជម្លៀសប្រជាជនរបស់ពួកគេដែលរស់នៅក្នុងខេត្តហ្វូជៀន ប្រមាណ ១៥០០០នាក់ ឲ្យទៅកាន់តំបន់ផ្សេងរួចរាល់ហើយ មុនពេលដែលព្យុះដ៏ខ្លាំងក្លានេះបានមកដល់។

ចំណែកនៅតៃវ៉ាន់វិញ អាជីវកម្ម និងសាលារៀនជាច្រើនត្រូវបានបិទនៅទូទាំងភាគខាងជើងនៃកោះតៃវ៉ាន់ តាំងពីថ្ងៃទី ២៤ ខែកក្កដាមក ខណៈព្យុះដ៏កាចសាហាវនេះ បានបោកបក់ជន់លិចផ្លូវ រអិលបាក់ផ្លូវ ផ្តាច់ចរន្តអគ្គិសនី និងបណ្តាលឱ្យមនុស្ស ៣ នាក់ស្លាប់ និងរាប់រយនាក់ទៀតរងរបួស។ រីឯនៅមហាសមុទ្រតៃវ៉ាន់ ដែលអំឡុងពេលនោះគឺមាននាវាដឹកទំនិញចំនួន ៥ គ្រឿងឆ្លងកាត់ នៅក្នុងចំណោមនោះ មាន១ គ្រឿង បានលិចផងដែរ។

ព្យុះនេះក៏បន្តបោកបក់ទៅកាន់ប្រទេសហ្វីលីពីន ដែលបណ្តាលឲ្យភ្លៀងមូសុងរដូវកាន់តែធ្ងន់ធ្ងរឡើង ដោយទឹកជំនន់ជន់លិយ៉ាងចខ្លាំង ក៏ដូចជាការមានរអិលបាក់ដី ខណៈគិតត្រឹមពេលនេះ របាយការណ៍បឋមនៅថ្ងៃនេះបានឲ្យដឹងថា មនុស្សយ៉ាងហោចណាស់ ២២ នាក់បានបាត់បង់ជីវិតទៅហើយ។ មូលហេតុនៃការស្លាប់ភាគច្រើន គឺដោយសារលង់ទឹក បាក់ដី រលំដើមឈើ និងឆ្លងចរន្តអគ្គិសនី។

ជាមួយគ្នានោះ វីដេអូដែលបានដាក់បង្ហោះនៅលើបណ្តាញសង្គម បានបង្ហាញឲ្យឃើញពីផ្លូវនានាក្នុងរដ្ឋធានីបានប្រែក្លាយទៅជាទន្លេ ដោយមានហាងលក់ទំនិញ ផ្ទះសម្បែងជាច្រើនត្រូវបានជន់លិច ព្រមទាំងលិចរថយន្តជាច្រើនដែលកំពុងចត។ ស្របពេលដែលអ្នកស្រុកហ្វីលីពីនភាគច្រើនបានជម្លៀសទៅកាន់ទីតាំងផ្សេងៗ ដើម្បីរង់ចាំឱ្យទឹកជន់លិចក្នុងតំបន់របស់ពួកគេស្រកចុះសិនផងដែរ៕

សហរដ្ឋអាមេរិក ៖ កាលពីថ្ងៃទី២៥ ខែកក្កដា ឆ្នាំ២០២៤ សារព័ត៌មាន New York Post រាយការណ៍ថា មានស្វាមី-ភរិយាជនជាតិអាមេរិក១គូស្រឡាំងកាំងយ៉ាងខ្លាំង ពេលឃើញកញ្ចក់មុខរថយន្ត Tesla របស់ពួកគេបែកខ្ចេចខ្ទី ដោយសារតែត្រីតូច១ក្បាលធ្លាក់ពីលើមេឃ ។ មុនដំបូង ពួកគេគិតថា មានអ្នកធ្វើបា.ប ហើយគ្រវែងត្រីមកលើរថយន្ត ប៉ុន្តែក្រោយមកទើបដឹងថា ត្រីនេះធ្លាក់មកពីណា ។

គូស្វាមី-ភរិយានេះរស់នៅរដ្ឋ New Jersey សហរដ្ឋអាមេរិក ទើបតែប្រទះឃើញកញ្ចក់មុខរថយន្ត Tesla របស់ពួកគេបែកក្នុងអំឡុងពេលរថយន្តចតនៅតាមផ្លូវក្បែរផ្ទះ ។ ពេលឃើញបែបនេះ ពួកគេឆ្ងល់យ៉ាងខ្លាំងថា តើមានរឿងអ្វីកើតឡើង? ក្រោយមក ទើបដឹងថា កញ្ចក់មុខរថយន្តបែកដោយសារតែត្រី១ក្បាលសោះ ។

ស្ត្រីជាម្ចាស់រថយន្ត Tesla បាននិយាយមកកាន់ប្រព័ន្ធផ្សព្វផ្សាយថា ៖ «រថយន្តរបស់យើងចាប់ផ្តើមមានបញ្ហាស៊ីប្លេខ្លាំងៗ ហើយយើងពុំធ្លាប់ឮបែបនេះពីមុនមកទេ ។ ពេលខ្ញុំចេញពីទីនេះ ស្វាមីខ្ញុំឈរនៅលើវាលស្មៅ ហើយស្វាមីខ្ញុំបានឮសំឡេងរថយន្តបុកគ្នា ប៉ុន្តែពុំចាប់អារម្មណ៍» ។

នៅពេលពួកគេពិនិត្យមើលរថយន្តស្រាប់តែឃើញថា កញ្ចក់មុខរបស់រថយន្តបែកខ្ទេចខ្ទីអស់ ហើយនៅលើកញ្ចក់មានត្រី១ក្បាល និងមានស្នាមឈាមផងដែរ ។ ពីដំបូង ពួកគេគិតថា ពិតជាមានអ្នកណាម្នាក់ធ្វើបាបមិនខាន ដោយគ្រវែងត្រីមកលើរថយន្តបែបនេះ ។

តាមការពិនិត្យមើលក្នុងកាមេរ៉ាសុវត្ថិភាពឃើញថា មានត្រីតូច១ក្បាលធ្លាក់ពីលើមេឃ និងទម្លុះកញ្ចក់រថយន្ត Tesla របស់ពួកគេ ។ រីឯអ្នកជិតខាងប្រាប់ថា បានឃើញសត្វឥន្ទ្រីពាំត្រីស៊ីជាញឹកញាប់នៅបរិវេណនេះ ទើបពួកគេសន្និដ្ឋានថា ហេតុការណ៍នេះកើតឡើងដោយសារសត្វឥន្ទ្រី ពីព្រោះមានសំបុកសត្វឥន្ទ្រីនៅសួនក្រោយផ្ទះ ។ ដូច្នេះ ត្រីខាងលើអាចរបូតចេញពីមាត់សត្វឥន្ទ្រី រួចហើយ ធ្លាក់ចុះមកក្រោមបុកកញ្ចក់រថយន្ត ។

ចុងក្រោយ ម្ចាស់រថយន្តក៏បានយករថយន្តរបស់ពួកគេទៅជួសជុលតាមរយៈក្រុមហ៊ុនធានារ៉ាប់រង ហើយសង្ឃឹមថា រថយន្តនឹងជួសជុលរួចរាល់នាពេលឆាប់ៗនេះ ៕

បរទេស៖ Aeon ដែលជាបណ្តាញផ្សារទំនើបដ៏ធំបំផុតរបស់ប្រទេសជប៉ុន បានដាក់ពង្រាយប្រព័ន្ធ AI ថ្មីមួយដើម្បីវាយតម្លៃ និងតាមដានអាកប្បកិរិយាបុគ្គលិក។
យោងតាមការចុះផ្សាយរបស់ Reuters កាលពីពេលថ្មីៗនេះបានឱ្យដឹងថា ក្រុមហ៊ុនបានប្រកាសទទួលយកប្រព័ន្ធ AI “Mr Smile” នៅក្នុងហាងចំនួន ២៤០ នៅទូទាំងប្រទេសជប៉ុន ដោយសម្គាល់ថា Aeon ជាក្រុមហ៊ុនដំបូងគេដែលប្រើប្រាស់បច្ចេកវិទ្យាដ៏ទំនើបនេះ។

ប្រព័ន្ធ AI “Mr Smile” ត្រូវបានបង្កើតឡើងដោយក្រុមហ៊ុនជប៉ុន InstaVR គឺជាឧបករណ៍ដែលវាយតម្លៃអាកប្បកិរិយារបស់បុគ្គលិកដោយផ្អែកលើកត្តាជាង ៤៥០ រួមទាំងការស្វាគមន៍ ទឹកមុខ និងកម្រិតសំឡេង ដែលគោលដៅរបស់អ៊ីអនគឺ “ធ្វើឱ្យបុគ្គលិកញញឹមមានស្តង់ដារ និងបង្កើនការពេញចិត្តរបស់អតិថិជន”។ បច្ចេកវិទ្យា Mr Smile មិនត្រឹមតែវាយតម្លៃអាកប្បកិរិយាប៉ុណ្ណោះទេ ថែមទាំងរួមបញ្ចូលធាតុស្រដៀងនឹងហ្គេមផងដែរ ដើម្បីលើកទឹកចិត្តបុគ្គលិកឱ្យកែលម្អពិន្ទុសេវាកម្ម និងអាកប្បកិរិយារបស់ពួកគេ។

អ៊ីអនបានសាកល្បងកម្មវិធីនេះនៅហាងចំនួន ៨ ដោយមានការចូលរួមពីបុគ្គលិកប្រហែល ៣,៤០០ នាក់។ លទ្ធផលបានបង្ហាញថា “អាកប្បកិរិយានៃសេវាកម្ម” មានភាពប្រសើរឡើង ១.៦ ដងក្នុងអំឡុងពេលបីខែនៃការធ្វើតេស្តមុនពេលដាក់ពង្រាយយ៉ាងទូលំទូលាយ។ ការត្រួតពិនិត្យជាបន្តបន្ទាប់នូវសកម្មភាពរបស់និយោជិត សូម្បីតែស្នាមញញឹមពេញមួយថ្ងៃ អាចនាំឱ្យមានការកែតម្រូវអាកប្បកិរិយាល្អជាងមុន ជាពិសេសនៅក្នុងបរិបទវប្បធម៌ជប៉ុន ដែលការមានទឹកមុខញញឹមរួសរាយគឺជារឿងដ៏សំខាន់បំផុត។

ទោះជាយ៉ាងណាក៏ដោយ បច្ចេកវិទ្យានេះក៏អាចធ្វើឱ្យមនុស្សជាច្រើនមានគ្រោះថ្នាក់ផងដែរ ដោយសារវាអាចគ្រប់គ្រងមនុស្សបាន។ ទោះបីជាយ៉ាងណានេះក្តី អ៊ីអនសង្ឃឹមថា ជាមួយនឹងប្រព័ន្ធ AI “Mr Smile” ពួកគេអាចនាំអតិថិជនទទួលបានបទពិសោធន៍ទិញទំនិញកាន់តែប្រសើរតាមរយៈការកែលម្អអាកប្បកិរិយាសេវាកម្មរបស់បុគ្គលិករបស់ពួកគេ។ នេះក៏ឆ្លុះបញ្ចាំងពីការត្រួសត្រាយរបស់ Aeon ក្នុងការអនុវត្តបច្ចេកវិទ្យាដើម្បីកែលម្អសេវាកម្មអតិថិជន និងចោទជាសំណួរអំពីតុល្យភាពរវាងបច្ចេកវិទ្យា និងមនុស្សជាតិនៅក្នុងបរិយាកាសការងារ៕

ប្រទេសថៃ ៖ កាលពីថ្ងៃទី២២ ខែកក្កដា ឆ្នាំ២០២៤ សារព័ត៌មានថៃរាយការណ៍ថា វាបានក្លាយជាប្រធានបទមួយដែលមានការរិះគ.ន់ យ៉ាងខ្លាំងក្នុងបណ្តាញសង្គមប្រទេសថៃ ក្រោយពីអ្នកប្រើប្រាស់ហ្វេសប៊ុកម្នាក់បានបង្ហោះរូបភាពផ្ទាំងប៉ាណូមួយសរសេរជាអក្សរចិនធំៗ ដោយអ្នកប្រើប្រាស់ហ្វេសប៊ុករូបនេះរៀបរាប់ថា ៖ «នៅត្រង់ផ្លូវបំបែកហួយក្វាង មានផ្ទាំងឃោសនាសរសេរពាក់ព័ន្ធនឹងលិខិតឆ្លងដែន ប៉ុន្តែការសរសេរនេះច្បាស់ៗពេក ។ បើបងប្អូនពុំដឹងពីអត្ថន័យ គឺអាចប្រើប្រាស់ Google Translate បកប្រែបាន» ។

វាជាផ្ទាំងប៉ាណូអក្សរចិន ដែលអញ្ជើញអតិថិជនឱ្យទិញលិខិតឆ្លងដែន និងផ្លាស់ប្តូរទៅរស់នៅប្រទេសមួយចំនួន ដូចជា ៖ កម្ពុជា, ឥណ្ឌូណេស៊ី, វ៉ានូអាទូ និងតួកគី ព្រមជាមួយការធានារយៈពេល៣០ថ្ងៃ គឺអតិថិជននឹងទទួលបានសញ្ជាតិប្រទេសទាំងនេះភ្លាមៗ, មានសុវត្ថិភាព និងសម្ងាត់ ។ លើសពីនេះ ក៏បានប្រកាសជ្រើសរើសភ្នាក់ងារបណ្តាញទូទាំងពិភពលោក ផងដែរ ។ ផ្ទាំងប៉ាណូនេះស្ថិតនៅត្រង់បរិវេណផ្លូវបំបែកជា៤ ហួយក្វាង តាមផ្លូវរ៉ាជឆាដា ភិសេក ។

ក្រោយមក ក្រុមការងារសារព័ត៌មានថៃបានចុះទៅចំណុចដំឡើងផ្ទាំងប៉ាណូនេះ ស្រាប់តែឃើញបុគ្គលិកនៅទីនេះ ប្រញាប់ប្រញាល់ដោះផ្ទាំងប៉ាណូអក្សរចិនខាងលើចេញពីភោជនីយដ្ឋានចិន ។ ពេលនោះ សារព័ត៌មានក៏បានសាកសួរបុគ្គលិកដែលដោះផ្ទាំងប៉ាណូចិន ប៉ុន្តែពួកគេពុំបានផ្តល់ព័ត៌មានអ្វីច្រើនទេ គ្រាន់តែនិយាយថា នាយករបស់ពួកគេបានទូរស័ព្ទមកប្រាប់ ឱ្យប្រញាប់មកដោះផ្ទាំងប៉ាណូចេញវិញ ខណៈផ្ទាំងប៉ាណូនេះទើបតែដំឡើង នៅថ្ងៃទី២០ ខែកក្កដា កន្លងមក ។

ជំហានដំបូង សមត្ថកិច្ចប្រចាំតំបន់ហួងក្វាង បានមកជជែកជាមួយបុគ្គលិកចំនួន៥នាក់ ដែលធ្វើការជាមួយជនជាតិចិន ។ បន្ទាប់មក ក៏ហៅពួកគេទៅផ្តល់ព័ត៌មានបន្ថែមទៀតនៅស្ថានីយប៉ូលិសហួយក្វាង ។

បុរសជាម្ចាស់ភោជនីយដ្ឋានចិន ដែលមានផ្ទាំងប៉ាណូនៅខាងខាងលើនិយាយថា លោកឃើញសមត្ថកិច្ចមកសួរនាំ និងថតរូបនៅមុខភោជនីយដ្ឋាន ហើយលោកពុំបានធ្វើអ្វីខុសទេ ។ លោកពុំដឹងថា អ្នកណាជាអ្នកដំឡើងផ្ទាំងប៉ាណូនេះទេ ពីព្រោះវាជាការសម្រេចចិត្តរបស់ម្ចាស់អគារ ដែលអនុញ្ញាតឱ្យជួលដាក់ផ្ទាំងប៉ាណូខាងលើ ។

ចំណែកក្រុមអ្នករត់ម៉ូតូឌុបនៅម្តុំនោះនិយាយថា មុននេះ ពួកគេបានឃើញបុរស២នាក់ និងស្ត្រីម្នាក់បានមកដំឡើងផ្ទាំងប៉ាណូអក្សរចិននៅភោជនីយដ្ឋានចិននេះ ប៉ុន្តែគ្មានអ្នកណាចាប់អារម្មណ៍ថា ផ្ទាំងប៉ាណូសរសេរពីអ្វីទេ ពីព្រោះនៅត្រង់នេះ តែងតែមានមនុស្សយកផ្ទាំងប៉ាណូជាច្រើនមកផ្សព្វផ្សាយដោះដូរចុះឡើងជារៀងរាល់ខែ ។ ប៉ុន្តែពេលដឹងថា វាជាផ្ទាំងប៉ាណូខុសច្បាប់ ក៏មានអារម្មណ៍ភ្ញាក់ផ្អើលយ៉ាងខ្លាំង ។ ម្យ៉ាងទៀត នៅបរិវេណនេះសម្បូរភ្ញៀវទេសចរចិនច្រើន ។

លោក ផាន់ថាណាក់ នុតណារុត អគ្គមេបញ្ជាការរងនៃការិយាល័យប៉ូលិសអន្តោប្រវេសន៍ បញ្ជាក់ថា ចំពោះសំណួរសួរថា តើអាចដំឡើងផ្ទាំងប៉ាណូនេះបានដែរឬអត់? គឺអាចដំឡើងផ្ទាំងប៉ាណូបាន ពុំខុសច្បាប់ទេ ពីព្រោះវាពុំពាក់ព័ន្ធនឹងប្រទេសថៃ ។ វាពុំមែនជាការផ្សាយពាណិជ្ជកម្មថា នឹងផ្លាស់ប្តូរសញ្ជាតិថៃទេ ហើយក្នុងប៉ាណូនេះ យើងនឹងឃើញថា គ្រប់ប្រទេសមានការទិញ-លក់តាមធម្មតា ។

គួរបញ្ជាក់ថា ការដោះផ្ទាំងប៉ាណូអក្សរចិនចេញពីអគារនេះ ក្រោយពីលោក ស្រេតថា ថាវីស៊ីន នាយករដ្ឋមន្ត្រីថៃបានបញ្ជាឱ្យស្ថាប័នពាក់ព័ន្ធចុះស៊ើបអង្កេតរកការពិតទាំងអស់ និងទម្លាក់ផ្ទាំងប៉ាណូជាបន្ទាន់ ៕

្រទេសហ្វីលីពីន ៖ ជ្រលងភ្នំសូកូឡា (Chocolate Hills) មានទីតាំងស្ថិតនៅលើកោះ Bohol ភាគខាងត្បូងទីក្រុងម៉ានីល ប្រទេសហ្វីលីពីន ។ កោះ Bohol គឺជាកោះដែលមានទំហំធំបំផុតរបស់ហ្វីលីពីន និងមានទេសភាពស្រស់ស្អាតតាមបែបធម្មជាតិ ។ ហេតុនេះ ទើបធ្វើឱ្យជ្រលងភ្នំនេះក្លាយជាតំបន់ទេសចរណ៍ធម្មជាតិដ៏ទាក់ទាញមួយនៅលើពិភពលោក ។

នៅទីនេះ សម្បូរទៅដោយភ្នំតូច-ធំ រហូតដល់ជាង១.៧០០ភ្នំ ដែលសុទ្ធតែកើតឡើងតាមធម្មជាតិទាំងអស់ ប៉ុន្តែភ្នំទាំងនេះបែរជាមានរូបរាងមូល និងមានទំហំស្រដៀងនឹងការបង្កើតរបស់មនុស្ស ។ ហេតុនេះ ទើបមនុស្សភាគច្រើនសួរថា តើភ្នំតូច-ធំទាំងនេះកើតឡើងដោយស្នាដៃរបស់មនុស្ស ឬដោយសារធម្មជាតិ? បើតាមផ្នែកវិទ្យាសាស្ត្រឆ្លើយថា ភ្នំទាំងនេះអាចកើតឡើងតាមធម្មជាតិ ។

ការសន្និដ្ឋានបញ្ជាក់ថា កាលពីរាប់លានឆ្នាំមុន តំបន់នេះជាបាតសមុទ្រ ដែលមានផ្កាថ្មជាច្រើនដុះពាសពេញ ។ ក្រោយមក ពេលវេលាក៏បានផ្លាស់ប្តូរធ្វើឱ្យទឹកសមុទ្ររីងស្ងួតអស់ ហើយក៏មានការប្រមូលផ្តុំថ្មកំបោរអស់រយៈពេលជាច្រើនឆ្នាំ រួចហើយបង្កើតបានជាភ្នំទាំងនេះ ។ ប៉ុន្តែមនុស្សភាគច្រើននៅតែឆ្ងល់ថា តើថ្មកំបោរទាំងអស់ប្រមូលផ្តុំគ្នាដោយរបៀបណា ទើបបង្កើតជាភ្នំបែបនេះ?

ពលរដ្ឋហ្វីលីពីនរស់នៅក្នុងតំបន់មានជំនឿខុសៗគ្នាពាក់ព័ន្ធនឹងជ្រលងភ្នំសូកូឡា ក្នុងនោះពលរដ្ឋខ្លះមានជំនឿថា ភ្នំទាំងនេះកើតឡើងដោយសារកូនយក្ស២នាក់ នាំគ្នាមកលុញដីឥដ្ឋលេង រួចហើយ កូនយក្សទាំង២នាក់ ក៏ឈ្លោះប្រកែកគ្នា និងគប់ដីឥដ្ឋដាក់គ្នាទៅវិញទៅមក ។ ប៉ុន្តែក្រោយពីកូនយក្សឈប់ឈ្លោះគ្នា និងឈប់លេងដីឥដ្ឋ ពួកគេភ្លេចធ្វើឱ្យដីឥដ្ឋទាំងនេះមានសភាពរាបស្មើវិញ ទើបបង្កើតបានជាភ្នំ រហូតដល់ជាង១.៧០០ភ្នំ នៅពាសពេញទីនេះ ។

ជាទូទៅ បណ្តាភ្នំតូច-ធំនៅជ្រលងភ្នំសូកូឡា គឺមានស្មៅដុះពីលើភ្នំ ហើយនៅរដូវប្រាំងគ្មានទឹក ស្មៅទាំងនេះនឹងស្ងួតប្រែទៅជាពណ៌ត្នោត ។ ដូច្នេះហើយ ទើបគេដាក់ឈ្មោះវាថា ភ្នំសូកូឡា (Chocolate Hills) ហើយក្រៅពីទីនេះជាតំបន់ទេសចរណ៍ដ៏ទាក់ទាញនៅលើកោះ Bohol របស់ប្រទេសហ្វីលីពីនហើយ វាក៏ជាតំបន់បេតិកភណ្ឌពិភពលោក ផ្នែកភូមិសាស្ត្រផងដែរ ៕