ថ្មីនេះៗ មហាជនខ្មែរជាច្រើនបានសម្តែងនូវការពេញចិត្តជាខ្លាំងចំពោះការដាក់តាំងបង្ហាញ អំពីសម្បត្តិវប្បធម៌ អរិយធម៌ដ៏ចំណាស់របស់ខ្មែរ ក៏ដូចជាបង្អួតសម្រស់របស់រមណីយដ្ឋានទេសចរណ៍នានា នៅលើផ្លាកប៉ាណូយ៉ាងធំៗច្បាស់ៗនៅតាមដងផ្លូវក្នុងខេត្តសៀមរាប។

កាលពីព្រឹកថ្ងៃទី២ ខែកក្កដានេះ យោងតាមវីដេអូដែលបានដាក់បង្ហោះដោយគេហទំព័រមួយដែលមានឈ្មោះថា SIEM REAP VIBES គឺបានបង្ហាញឲ្យឃើញពីទិដ្ឋភាពត្រង់ចំណុចបណ្តោយផ្លូវលោកតាណឺយ នៅក្នុងខេត្តសៀមរាប ដែលនៅតាមដងផ្លូវបានដាក់តាំងផ្លាកប៉ាណូធំៗបង្ហាញយ៉ាងច្បាស់ៗអំពីសម្បត្តិវប្បធម៌អរិយធម៌ និងតំបន់ទេសចរណ៍នានាលើទឹកដីនៃខេត្តសៀមរាប ក្នុងនោះគឺរួមមានរូបភាពព្រហ្មមុខ៤ ចម្លាក់បុរាណ ទឹកធ្លាក់ ប្រាសាទអង្គរវត្ត និងប្រាសាទខ្មែរមួយចំនួនទៀតជាដើម។

សូមជម្រាបថា កាលពីពេលកន្លងទៅ អាជ្ញាធរខេត្តសៀមរាបបានអនុវត្តវិធានការដោយចាប់ផ្ដើមធ្វើការរុះរើស្លាកពាណិជ្ជកម្មស្រាបៀរ ក្នុងខេត្តសៀមរាប ដោយជំនួសមកវិញដោយផ្លាកផ្សព្វផ្សាយពីតំបន់ទេសចរណ៍នានា ខណៈដែលផ្លាកប៉ាណូទាំងនេះបាននឹងកំពុងលេចឡើងជាបណ្តើរៗហើយ។

យ៉ាងណាមិញ បន្ទាប់ពីរូបភាពទាំងនេះបានចែកចាយទៅសាធារណៈជនជាច្រើនបានសម្តែងនូវការពេញចិត្តកោតសរសើរ និងសំណូមពរបន្ថែមព្រោងព្រាត ដោយមតិមួយបានលើកឡើងថា«គាំទ្រស្អាតណាស់ បើអាចគួរបន្ថែមអក្សរអង់គ្លេសផង ដើម្បីជនបរទេសគាត់អាចដឹងឈ្មោះប្រាសាទងាយស្រួលគាត់ស្វែងរក»។ អ្នកខ្លះថា«នេះជាផ្នែកមួយដ៏សំខាន់ក្នុងការទាក់ទាញភ្ញៀវទេសចរណ៍»។

ម្នាក់ទៀតថា«បើថែម QR code ទីតាំង របស់ប្រាសាទនីមួយៗ នៅផ្នែកតូចមួយនៃរូបភាព កាន់តែប្រសើរ»។ រីឯម្នាក់ទៀតថា«នេះជាអ្វីដែលសមនឹងឈ្មោះទីក្រុងវប្បធម៌ ស្របតាមគំនិតប្រជាពលរដ្ឋ»។

ចំណែកឯម្នាក់ទៀតក៏បានលើកឡើងផងដែរថា«បើខេត្តទាំងអស់អនុវត្តន៍បែបនេះល្អណាស់ទម្លាក់ស្លាកស្រាបៀរចុះ ហើយបង្ហាញតំបន់រមណីយដ្ឋានក្នុងខេត្តនីមួយៗ តាមទីតាំង ដើម្បីឲ្យភ្ញៀវជាតិនឹងអន្តរជាតិបានឃើញទៅលេង តាមគំនិតខ្ញុំទេអរគុណ»៕

មនុស្សភាគច្រើនយល់ខុសរហូតមកថា អាចប្រើប្រាស់អេប៉ុងលាងចានបានទាំងសងខាង ប៉ុន្តែក្រុមហ៊ុនផលិតអេប៉ុងលាងចានលំដាប់ពិភពលោក បញ្ជាក់ថា ផ្នែកពណ៌លឿងរបស់វា មិនមែនសម្រាប់លាងចានទេ ប៉ុន្តែសម្រាប់ប្រើជាប្រយោជន៍ផ្សេងទៀត ។ ចុះផ្នែកពណ៌លឿងរបស់អេប៉ុងលាងចានសម្រាប់ធ្វើអ្វី?

អេប៉ុងលាងចាន គឺជាឧបករណ៍ប្រើប្រាស់ចាំបាច់សម្រាប់គ្រួសារនីមួយៗ ហើយអេប៉ុងលាងចានដែលមនុស្សភាគច្រើននិយមប្រើប្រាស់បំផុត គឺអេប៉ុងលាងចានមានផ្នែកម្ខាងទន់ពណ៌លឿង និងផ្នែកម្ខាងទៀតរឹងពណ៌បៃតង ។ មនុស្សភាគច្រើនពុំដឹងថា ការផលិតអេប៉ុងលាងចានចែកចេញជា២ផ្នែកនេះ មានគោលបំណងខុសគ្នា ។

ពួកគេយល់ថា អាចប្រើប្រាស់អេប៉ុងលាងចានបានទាំងសងខាង ប៉ុន្តែក្រុមហ៊ុនផលិតអេប៉ុងលាងចានលំដាប់ពិភពលោក បញ្ជាក់ថា អ្វីដែលមនុស្សគ្រប់គ្នាយល់នោះខុសរហូតមក ។ ក្រុមហ៊ុននេះបាននិយាយពីអេប៉ុងលាងចាន ក្នុងកម្មវិធីមួយរបស់ទូរទស្សន៍ជប៉ុនថា ផ្នែកពណ៌លឿងរបស់វា ពុំមែនសម្រាប់លាងចានទេ ។ ប៉ុន្តែវាមានតួនាទីធ្វើឱ្យសាប៊ូលាងចានបែកពពុះ ហើយវាពុំអាចលាងជម្រះភាពកខ្វក់បានស្អាតដូចផ្នែករឹងពណ៌បៃតងទេ ។

ហេតុនេះ ការប្រើប្រាស់ត្រឹមត្រូវ គឺផ្នែកពណ៌លឿងមានតួនាទីធ្វើឱ្យសាប៊ូលាងចានបែកពពុះ ដោយធ្វើឱ្យវាសើម និងដាក់សាប៊ូលាងចានពីលើ ។ បន្ទាប់មក យកផ្នែកពណ៌បៃតងមកលាងចានតាមក្រោយ ។ លើសពីនេះ យើងក៏អាចប្រើប្រាស់ផ្នែកពណ៌លឿងប្រើប្រាស់ជាប្រយោជន៍ផ្សេងទៀតផងដែរ គឺយកវាទៅលាងឧបករណ៍ស្តើងៗ ដើម្បីកុំឱ្យមានស្លាកស្នាមលើផ្ទៃឧបករណ៍ ។

តើគួរតែប្រើប្រាស់ប៉ុន្មានថ្ងៃ ទើបអាចផ្លាស់ប្តូរអេប៉ុងលាងចានថ្មី? ក្រុមហ៊ុនផលិតអេប៉ុងលាងចាននិយាយថា ក្រោយពីយើងបានប្រើប្រាស់វារយៈពេល២៨ថ្ងៃ វានឹងប្រមូលផ្តុំនូវមេរោគយ៉ាងច្រើនក្នុងនោះ ។ ហេតុនេះ គួរតែផ្លាស់ប្តូរអេប៉ុងលាងចានថ្មីជារៀងរាល់ខែ បើយកល្អ គួរជ្រើសរើសប្រើប្រាស់អេប៉ុងលាងចានណាដែលប្រឆាំងនឹងមេរោគ ដើម្បីកាត់បន្ថយមេរោគ និងក្លិនមិនល្អ ។

សរុបមក ការប្រើប្រាស់អេប៉ុងលាងចានបានត្រឹមត្រូវ គឺមិនត្រឹមតែអាចលាងចានស្អាតកាន់តែមានប្រសិទ្ធភាពប៉ុណ្ណោះទេ ប៉ុន្តែយើងក៏អាចថែរក្សាអនាម័យក្នុងក្រុមគ្រួសាររបស់យើងផងដែរ ៕

អគាររដ្ឋបាលថ្មីរបស់រដ្ឋសភា ដែលជាជំនួយរបស់វៀតណាម ត្រូវបានរៀបចំពិធីចុះបឋមសិលាសាងសង់ តាំងពីថ្ងៃទី២១ ខែធ្នូ ឆ្នាំ២០២១ ក្រោមអធិបតីភាពដ៏ខ្ពង់ខ្ពស់ សម្តេចអគ្គមហាពញាចក្រី ហេង សំរិន អតីតប្រធានរដ្ឋសភា និង លោក ង្វៀង ស៊ួនហ្វុក អតីតប្រធានាធិបតីវៀតណាម។

មកដល់ពេលនេះ គម្រោងសាងសង់អគាររដ្ឋបាលថ្មីរបស់រដ្ឋសភាកម្ពុជា សម្រេចការសាងសង់បាន ៥៧% ហើយ មានតម្លៃ ២៥លានដុល្លារ ដែលជាជំនួយឥតសំណងរបស់ប្រទេសវៀតណាម។

បើតាមគ្រោងទុក សំណង់អគារនេះ អាចនឹងបញ្ចប់នៅក្នុងខែសីហាខាងមុខនេះ ក៏ប៉ុន្តែដោយសារបញ្ហាកូវីដ-១៩ ការសាងសង់នេះត្រូវបានអូសបន្លាយ។

អគាររដ្ឋបាលថ្មីមានកម្ពស់ ១២ជាន់ ជានិមិត្តរូបនៃចំណងមិត្តភាពកម្ពុជា-វៀតណាម៕

ស្ទឹងដំណាក់ក្បូននារដូវវស្សា គឺពិតជាមានសម្រស់ស្រស់ស្អាតជាខ្លាំង ដោយសារតំបន់នេះគឺពោរពេញទៅដោយធនធានធម្មជាតិដ៏មហាសាល មានជ្រោះជ្រង ជ្រលងបុព្វតា ប្រកបដោយទេសភាពដ៏ស្រស់ត្រកាល និងអស្ចារ្យបំផុត។ ស្ទឹងដំណាក់ក្បូនស្ថិតក្នុងភូមិសាស្រ្តឧទ្យានជាតិជួរភ្នំក្រវាញខាងត្បូងខេត្តកោះកុង មានចម្ងាយប្រមាណ ៤០ គីឡូមែត្រពីក្រុងខេមរភូមិន្ទ ដោយលោកអ្នកអាចធ្វើដំណើរតាមផ្លូវបេតុងកាត់តាមទំបន់វារីអគ្គិសនី ឬស្សីជ្រុំ ក៏ដូចជាមានចម្ងាយប្រមាណ ៣១៩ គីឡូមែត្រពីរាជធានីភ្នំពេញ។

នៅពេលទៅដល់ភ្ញៀវទេសចរនឹងបានឃើញសម្រស់ដ៏ល្អឯកនៃទឹកធ្លាក់អមជាមួយដើមឈើសងខាង ដែលមានទស្សនីយ៍ភាពប្រៀបបានដូចជាផ្ទាំងគំនូរ កំពុងបង្ហាញសម្រស់នៅកណ្តាលព្រៃឈើដ៏ធំស្កឹមស្កៃ និងទទួលបានអារម្មណ៍ស្រស់ស្រាយ ខ្យល់អាកាសបរិសុទ្ធពីធម្មជាតិ។ ស្ទឹងដំណាក់ក្បូនគឺមានភាពលេចធ្លោនៃធម្មជាតិ ជាហេតុធ្វើឱ្យភ្ញៀវទេសចរតស៊ូធ្វើដំណើរតាមផ្លូវតូច និងបត់បែនដើម្បីទៅសម្រាកកម្សាន្តនៅទីតាំងមួយនេះ។

ដូច្នេះអ្នកអាចហែលទឹក និងស្ទូចត្រីលេងកម្សាន្ត ក៏ដូចជាបោះតង់ ញ៉ាំអាហារឆ្ងាញ់ៗជាមួយបងប្អូនគ្រួសារ ឬមិត្តភក្តិដោយសេរី ដែលកន្លែងនេះគឺពិតជាសក្តិសមបំផុតសម្រាប់ភ្ញៀវទេសចរណាដែលចូលចិត្តធម្មជាតិ និងការផ្សងព្រេង។ ដើមឡើយ ស្ទឹងដំណាក់ក្បូនគឺជាទីតាំងវារីអគ្គិសនីមួយ ប៉ុន្តែដោយសក្តានុពលធម្មជាតិ ដែលមានទឹកហូរថ្លាឆ្វង់ ព្រៃឈើដុះអមមាត់ទឹកផ្ដល់ជាម្លប់ត្រឈឹងត្រឈៃដល់ភ្ញៀវទេសចរ បានធ្វើឱ្យតំបន់នេះក្លាយជាទីតាំងទេសចរណ៍ធម្មជាតិថ្មីមួយក្នុងខេត្តកោះកុង។

ក្រៅពីស្ទឹងដំណាក់ក្បូនដែលជាគោលដៅដ៏ទាក់ទាញបំផុតក្នុងខេត្តកោះកុង ក៏មានរមណីយដ្ឋានល្បីៗជាច្រើនផ្សេងទៀតនៅក្នុងខេត្តនេះផងដែរដូចជា កោះកុងក្រៅ, ទឹកធ្លាក់តាតៃ, កោះស្តេច, ឆ្នេរនេសាទ, ពាមក្រសោម, ជីផាត, ឆ្នេរផ្កាយ៧, ឆ្នេរបារាំង, ភ្នំម្រេចកង្កែបអារ៉ែង, ទឹកធ្លាក់ឆាយយោង, និងកោះស្រឡៅ។ គួរបញ្ជាក់ដែរថា កោះកុងគឺជាខេត្តមួយស្ថិតនៅភាគនិរតីនៃប្រទេសកម្ពុជា ដែលមានផ្ទៃដីប្រមាណ ១១១៦០ គីឡូម៉ែត្រការ៉េ និងមានប្រជាជនរស់នៅប្រមាណ ១២៥,៩០២ នាក់គិតក្នុងឆ្នាំ ២០១៩៕