្រទេសថៃ ៖ កាលពីថ្ងៃទី២ ខែសីហា ឆ្នាំ២០២៤ សារព័ត៌មានថៃរាយការណ៍ថា នាយកដ្ឋានធនធានរ៉ែបានចុះត្រួតពិនិត្យនៅបរិវេណឧទ្យានជាតិមួយកន្លែង ក្រោយពីមានអ្នកប្រទះឃើញដានជើងលើថ្មមានលក្ខណៈស្រដៀងដានជើងសត្វដាយណូស័រ ហើយលទ្ធផលការពិនិត្យបង្ហាញថា គឺជាដានជើងដាយណូស័រពិតមែន ។ វាជាដាយណូស័រ Theropods ដើរជើង២ ស៊ីសាច់ និងមានអាយុប្រមាណ១២០លានឆ្នាំមុន ។

លោក កូម៉េត ពុទ្ធថាសន ប្រធានការិយាល័យគ្រប់គ្រងតំបន់អភិរក្ស លេខ១១ បានមកកាន់តំបន់ឧទ្យានជាតិភូហ៊ីនរ៉ងក្លា (Phu hin rong kla national park) ព្រមទាំងមន្ត្រីការិយាល័យធនធានរ៉ែតំបន់២, អ្នកជំនាញផ្នែកធរណីវិទ្យា, មន្ត្រីពាក់ព័ន្ធ និងភ្ញៀវទេសចរដែលបានឃើញដានជើងដាយណូស័រដំបូងគេ ដើម្បីត្រួតពិនិត្យដានជើងដាយណូស័រនៅបរិវេណបោះតង់របស់ឧទ្យានជាតិភូហ៊ីនរ៉ងក្លា ។

ការចុះត្រួតពិនិត្យដានជើងដាយណូស័រនេះ ក្រោយពីមានការចែកចាយព័ត៌មានក្នុងបណ្តាញសង្គមពីដានជើងលើថ្មស្រដៀងនឹងដានជើងដាយណូស័រនៅបរិវេណឧទ្យានជាតិភូហ៊ីនរ៉ងក្លា ស្ថិតនៅស្រុកណាខនថៃ ខេត្តពិស្នុលោក ។ ហេតុនេះ លោក ឡាំយ៉ង ស៊ីស្វេក ប្រធានឧទ្យានជាតិភូហ៊ីនរ៉ងក្លា បានទាក់ទងទៅកាន់នាយកដ្ឋានធនធានរ៉ែ ដើម្បីឱ្យអ្នកជំនាញមកត្រួតពិនិត្យថា តើវាជាដានជើងដាយណូស័រមែនឬក៏អត់ ។

លទ្ធផលការពិនិត្យជំហានដំបូងរបស់នាយកដ្ឋានធនធាតិរ៉ែបង្ហាញថា វាជាដានជើងរបស់ដាយណូស័រពិតមែន ដែលស្ថិតនៅលើថ្មភក់ និងមានអាយុប្រមាណ១២០លានឆ្នាំមុន ។ ពួកគេបានពិនិត្យឃើញដានជើងដាយណូស័រនៅលើថ្មរហូតដល់ជាង១០កន្លែង ហើយដានជើងនេះបានដើរជា២ជួរ ។ ដានជើងភាគច្រើន គឺជាដានជើងរបស់ដាយណូស័រដើរជើង២ ស៊ីសាច់ ដែលមានទំហំចាប់ពីមធ្យម រហូតដល់ធំ ។ លើសពីនេះ ដានជីងនីមួយៗបង្ហាញថា មានម្រាមជើងចំនួន៣ យ៉ាងច្បាស់ ។

រីឯភ្ញៀវទេសចរដែលចូលចិត្តស្រាវជ្រាវតំបន់ធម្មជាតិនិយាយថា បានឃើញដានជើងសត្វនៅបរិវេណនេះលើកដំបូង កាលពីឆ្នាំ២០២០ ប៉ុន្តែពេលនោះ ខ្លួនពុំទាន់ប្រាកដចិត្តថា ជាដានជើងដាយណូស័រទេ ។ ក្រោយមក ខ្លួនក៏បានមកស្រាវជ្រាវនៅបរិវេណនេះជាច្រើនលើក រហូតដល់ប្រាកដចិត្តថា វាជាដានជើងដាយណូស័រ ទើបជម្រាបទៅមន្ត្រីឧទ្យានជាតិ និងបង្ហោះក្នុងបណ្តាញសង្គមផងដែរ ។

ក្រុមមន្ត្រីពាក់ព័ន្ធ និងអ្នកជំនាញនានានឹងចុះត្រួតពិនិត្យដានជើងដាយណូស័រទាំងនេះបន្ថែមទៀត ព្រមទាំងប្រមូលព័ត៌មានស្រាវជ្រាវ ដើម្បីអភិវឌ្ឍន៍បរិវេណនេះឱ្យក្លាយជាតំបន់ទេសចរណ៍ធម្មជាតិសម្រាប់ការសិក្សាស្រាវជ្រាវផ្នែកធរណីវិទ្យានាថ្ងៃអនាគត ។ រីឯភ្ញៀវទេសចរអាចធ្វើដំណើរយ៉ាងងាយស្រួលដើម្បីមកកម្សាន្ត និងសម្រាកនៅទីនេះ ។

កន្លងមក គេធ្លាប់បានឃើញដានជើងដាយណូស័រនៅឧទ្យានជាតិភូហ៊ីនរ៉ងក្លា ហើយលើកនេះ គឺជាការរកឃើញលើកទី២ ដែលនៅឆ្ងាយពីដានជើងចាស់ប្រមាណ៣៥គីឡូម៉ែត្រ ហើយវាជាដាយណូស័រប្រភេទ Theropods ដូចគ្នា ។ បរិវេណដានជើងដាយណូស័រថ្មីនេះ គឺជាទីលានចតឧទ្ធម្ភាគចក្រនៅក្បែរកន្លែងបោះតង់របស់ឧទ្យានជាតិនេះ ៕

ប្រទេសចិន ៖ កាលពីថ្ងៃទី៣១ ខែកក្កដា ឆ្នាំ២០២៤ សារព័ត៌មានបរទេសរាយការណ៍ថា ខ្យល់ព្យុះឈ្មោះខាមិ បានបោកបក់មកលើប្រទេសចិន និងធ្វើឱ្យហ្វូងត្រីធំរាប់រយក្បាលលោតចេញពីទន្លេព្រមៗគ្នានៅទីក្រុង Shenyang ។ វាធ្វើឱ្យអ្នកឃើញហេតុការណ៍នេះរំភើប និងភ្ញាក់ផ្អើលយ៉ាងខ្លាំង ដោយសារពួកគេពុំធ្លាប់ឃើញបែបនេះពីមុនមក ។

សារព័ត៌មានចិនរាយការណ៍ថា ខ្យល់ព្យុះឈ្មោះខាមិ បានបោកបក់មកលើប្រទេសចិន ហើយបណ្តាលឱ្យហ្វូងត្រីធំរាប់រយក្បាលលោតចេញពីទន្លេព្រមៗគ្នា ។ ទន្លេនេះហូរកាត់តាមទីក្រុង Shenyang នៅខេត្តលៀវនីង ដែលជាទីក្រុងឧស្សាហកម្មដ៏ធំបំផុតរបស់ប្រទេសចិន ។ ក្រោយពីប្រទេសចិនកើតគ្រោះរាំងស្ងួតរួចមក ក៏មានភ្លៀងធ្លាក់ខ្លាំងបំផុតនៅទីក្រុង Shenyang ក្នុងរយៈពេល៧៣ឆ្នាំ ។

កាលពីថ្ងៃទី២៧ ខែកក្កដា ឆ្នាំ២០២៤ សារព័ត៌មានស៊ីនហួររាយការណ៍ថា ភ្លៀងធ្លាក់ខ្លាំងបែបនេះ គឺដោយសារឥទ្ធិពលខ្យល់ព្យុះខាមិ ដែលជាខ្យល់ព្យុះលើកទី៣ នៅឆ្នាំ២០២៤ ។ វាបានធ្វើឱ្យកម្រិតទឹកក្នុងអាងស្តុកទឹក ស្មើជាង៤០កន្លែងនៅទូទាំងខេត្តលៀវនីង កើនឡើងខ្ពស់ ហើយអាជ្ញាធរបានបង្ហូរទឹកចេញពីអាងស្តុកទឹក ។

ចំណែកភ្នាក់ងារឧតុនិយមនៅខេត្តលៀវនីងឱ្យដឹងថា តំបន់ភាគច្រើនក្នុងខេត្តនេះនៅតែប្រឈមជាមួយភ្លៀងធ្លាក់ខ្លាំង រហូតដល់ថ្ងៃទី៣០ ខែកក្កដា ។ រីឯអាជ្ញាធរខេត្ត លៀវនីង បានចុះត្រួតពិនិត្យនៅតាមតំបន់ផ្សេងៗ ដើម្បីទប់ទល់ជាមួយគ្រោះទឹកជំនន់ដែលអាចកើតឡើង ។

បើទោះជាឥទ្ធិពលខ្យល់ព្យុះខាមិ បានធូរស្បើយហើយក្តី ប៉ុន្តែវានៅតែធ្វើឱុ្យមានភ្លៀងធ្លាក់ខ្លាំងជាបន្តបន្ទាប់នៅប្រទេសចិន និងបណ្តាលឱ្យទំនប់ទឹក ដែលទប់ទឹកទន្លេនៅខេត្តហ៊ូណាន ភាគខាងត្បូងប្រទេសចិន បាក់រលំប្រវែងជាង៧៧ម៉ែត្រ ។ ហេតុនេះ រដ្ឋាភិបាលចិនបានបញ្ជូនភ្នាក់ងារសង្គ្រោះជាង១.០០០នាក់ មកជួយជម្លៀសពលរដ្ឋរងគ្រោះដោយទឹកជំនន់ ជាង៣.០០០នាក់ ព្រមទាំងជួយគ្នាជួសជុលទំនប់ទឹក ។

ពួកគេបានបង្កើតទ្វារទំនប់ទឹកចំនួន៤៥កន្លែង ដើម្បីការពារទឹកពីទន្លេយ៉ាលូដែលបានកើនឡើងខ្ពស់ កុំឱ្យហូរលិចទីក្រុង ។ ខ្យល់ព្យុះខាមិ បានបោកបក់មកកាន់ខេត្តហ្វូចៀន កាលពីថ្ងៃទី២៥ ខែកក្កដា បានធ្វើឱ្យពលរដ្ឋរស់នៅខេត្តនេះប្រមាណ៦៣ម៉ឺននាក់ ជួបការលំបាកយ៉ាងខ្លាំង ខណៈពលរដ្ឋជិតពាក់កណ្តាលក្នុងខេត្តបានចាកចោលផ្ទះពួកគេ ។ ក្រៅពីនេះ មានពលរដ្ឋយ៉ាងហោចណាស់១៥នាក់ បានស្លាប់ដោយសារការបាក់ដីនៅខេត្តហ៊ូណាន ភាគខាងត្បូងប្រទេសចិន ៕

ប្រទេសបារាំង ៖ មហាជនភាគច្រើនឆ្ងល់ថា តើវាបណ្តាលមកពីទឹកទន្លេ Seine របស់ប្រទេសបារាំងពុំស្អាតឬយ៉ាងណា ទើបធ្វើឱ្យកីឡាករកាណាដាម្នាក់ ដែលចូលរួមប្រកួតហែលទឹកទន្លេនេះក្អួតរហូតដល់១០លើក នៅពេលហែលទឹកមកដល់ចំណុចគោលដៅ?

វាមានរឿងធ្វើឱ្យមហាជនប្រកែកគ្នាមិនអស់មិនហើយ អំពីករណីគុណភាពរបស់ទឹកទន្លេ Seine នៅប្រទេសបារាំង ។ រីឯគណៈកម្មការប្រកួតកីឡាអូឡាំពិកបញ្ជាក់ថា ទឹកទន្លេ Seine ស្អាតគ្រប់គ្រាន់សម្រាប់ប្រើប្រាស់ជាកន្លែងឱ្យកីឡាករប្រកួតហែលទឹក ក្នុងកីឡាអូឡាំពិក ឆ្នាំ២០២៤ ។

ប៉ុន្តែមហាជនពុំចាំបាច់ប្រកែកគ្នាបន្តទៀតទេ ពីព្រោះបើតាមទូរទស្សន៍ឃើញថា កីឡាករហែលទឹករូបនេះបានក្អួតភ្លាមៗ ។ នេះជាចម្លើយទៅកាន់អ្នកតាមដានការប្រកួតកីឡាអូឡាំពិកនៅទូទាំងពិភពលោកថា គុណភាពទឹករបស់ទន្លេនេះគ្មានស្តង់ដារ ។ បើតាមការត្រួតពិនិត្យកាលពីខែមិថុនា ឆ្នាំ២០២៤ បង្ហាញថា ទន្លេនេះមានមេរោគម្យ៉ាងឈ្មោះ អ៊ីខូឡៃ ខ្ពស់ពីកម្រិតទឹកធម្មតា រហូតដល់១០ដងឯណោះ ។

កីឡាករក្នុងរូបភាពដែលយើងគ្រប់គ្នាបានឃើញនេះឈ្មោះ Tyler Mislawchuk ជនជាតិកាណាដា អាយុ២៩ឆ្នាំ បានចូលរួមប្រកួតហែលទឹក កាលពីថ្ងៃទី៣១ ខែកក្កដា ឆ្នាំ២០២៤ ។ ប៉ុន្តែក្រោយពីលោកហែលទឹកទៅដល់គោលដៅ លោកពុំបានអបអរសារទរនឹងជ័យជម្នះទេ ប៉ុន្តែលោកបានក្អួតចង្អោរ ។ លោកនិយាយថា លោកបានក្អួតរហូតដល់១០លើក ក្រោយពីហែលទឹករួច ។

កន្លងមក អភិបាលក្រុងប៉ារីស លោកស្រី Anne Hidalgo ធ្លាប់បានចុះហែលទឹកទន្លេ Seine ដែលមានមនុស្សម្នាជាច្រើននាក់ឈរមើល ។ បន្ទាប់ពីហែលទឹករួច លោកស្រីបានផ្តល់សម្ភាសន៍ជាមួយសារព័ត៌មានថា ៖ «ទឹកទន្លេនេះស្អាតណាស់ វាត្រជាក់បន្តិច តែវាមិនអាក្រក់ទេ» ។

ទោះយ៉ាងណា កីឡាករហែលទឹកឈ្មោះ Tyler Mislawchuk បានមកដល់គោលដៅក្នុងលេខរៀងទី៩ ដោយចំណាយពេល១ម៉ោង និង៤៤នាទី ២៥វិនាទី ។ រីឯមេដាយមាស បានទៅកីឡាករ Alex Yee របស់អង់គ្លេស, មេដាយប្រាក់ បានទៅកីឡាករ Hayden Wilde របស់នូវែលសេឡង់ និងមេដាយសំរិទ្ធ បានទៅកីឡាករ Leo Berger ៕