ក្រុមចម្រៀង ក្មេងខ្មែរ ទទួលយកមិនបានក្រោយដឹងថាសមាជិកពីរនាក់ដើរចេញពីក្រុម D-Man

ដំណឹងដែលសមាជិកពីរនាក់គឺ សុខ សម្បត្តិ និង SPEED សម្រេចចិត្តដើរចេញពីក្រុម D-Man ដោយជ្រើសផ្លូវធ្វើជាសិល្បករទោលធ្វើឱ្យអ្នកគាំទ្របង្ហាញការសោកស្តាយយ៉ាងខ្លាំង។ មិនត្រឹមតែអ្នកគាំទ្រប៉ុណ្ណោះទេដែលពិបាកទទួលយករឿងនេះសូម្បីតែក្រុមចម្រៀង ក្មេងខ្មែរ ក៏បង្ហាញថាទទួលយកមិនបានដូចគ្នា។

កាលពីល្ងាចថ្ងៃទី៣១ ខែកក្កដា ក្រុមចម្រៀង D-Man ដែលមានសមាជិក៥នាក់ និងកំពុងទទួលបានការគាំទ្រច្រើនពីមហាជនបានចេញសេចក្តីប្រកាសជាផ្លូវការដោយមានសមាជិកចំនួនពីរនាក់សម្រេចចិត្តចាកចេញពីក្រុម។ ក្នុងសេចក្តីប្រកាសគូសបញ្ជាក់ថាចាប់តាំងពីឆ្នាំ២០១៩មកដល់បច្ចុប្បន្ន មានរយៈពេល៥ឆ្នាំដែល D-Man បានប្រែក្លាយខ្លួនជាក្រុម ចម្រៀង ផ្តោតសំខាន់លើការផលិតចម្រៀងនិងក្បាច់រាំ។ ចាប់ពីពេលនោះមក D-Man ទទួលបាននូវសមត្ថផល បទពិសោធន៍ល្អៗ និងពេលវេលាដ៏អស្ចារ្យជាច្រើន ជាមួយក្រុមនិងអ្នកគាំទ្រ។ វាជាអនុស្សាវរីយ៍មួយដ៏មានន័យ សម្រាប់ពួកយើងទាំងប្រាំ»។

ក្នុងលិខិតបានបញ្ជាក់ទៀតថា បច្ចុប្បន្ន D-Man បានដើរមកដល់កន្លែងមួយដែលសមាជិករបស់ពីររូប SAMBATH SOK and SPEED សម្រេចជ្រើសដំណើរថ្មីមួយជាសិល្បករទោល ដើម្បីផ្តោតសំខាន់បន្ថែមក្នុងដំណើរសិល្បៈរៀងៗ ខ្លួនក្នុងនាមជា Solo Artist! ចំណែកក្រុម D-Man និងបន្តដំណើរទៅមុខដោយ សមាជិកបីនាក់ ទៀតគឺ MENG, RAK និង PISETH។

ដំណឹងដែលសមាជិកពីររូបដើរចេញពីក្រុម D-Man នេះបានធ្វើឱ្យអ្នកគាំទ្រមានការសោកស្តាយជាខ្លាំងព្រោះក្រុមនេះកំពុងតែទទួលបានការគាំទ្រពីមហាជន។

មិនត្រឹមតែទស្សនិកជនជាអ្នកគាំទ្របង្ហាញការសោកស្តាយចំពោះដំណឹងចាកចេញរបស់ សុខ សម្បត្តិនិង SPEED ប៉ុណ្ណោះទេក្រុម ក្មេងខ្មែរដែលមានសមាជិកពីររូបគឺ ជា សុជាតិ និង កៅ ពន្លឺ ក៏បង្ហាញការសោកស្តាយដូចគ្នា។

ក្មេងខ្មែរ បានសរសេរនៅលើបណ្តាញសង្គមនាព្រឹកថ្ងៃទី២ សីហា ថា «ប្អូនៗខំប្រឹងមកយូរហើយ មកដល់ពេលនេះ ទទួលយកមិនបានទេ។ ក្រុមដែលបងស្រលាញ់ជាងគេ តាំងពីយើងចាប់ដៃគ្នាដំបូង»៕