ថ្មីៗនេះ ក្រុមហ៊ុន សាមសុង បានធ្វើការបញ្ចេញផលិតផលអេឡិកត្រូនិករបស់ខ្លួនជាច្រើន ក្នុងនោះសុទ្ធសឹងតែជាផលិតផលដែលបំពាក់ដោយកំពូលមុខងារ AI ដ៏ទំនើបឆ្លាតវៃ។

ហើយស្របពេលសន្ទុះនៃការគាំទ្រពីអតិថិជនមានការកើនឡើងខ្លាំង ក្រុមហ៊ុន សាមសុង ក៏សម្រេចចិត្តបើកទីតាំង Showroom ជាថ្មី ដែលត្រូវបានដាក់សម្ពោធជាផ្លូវការនៅថ្ងៃទី 08 សីហា ឆ្នាំ 2024 ដែលមានទីតាំងនៅតាមបណ្ដោយមហាវិថីព្រះមុនីវង្ស ជាប់នឹងគល់ស្ពានអាកាសបឹងត្របែក ដោយមានការចូលរួមយ៉ាងច្រើនកុះករពីសំណាក់ភ្ញៀវកិត្តិយស ព្រមទាំងអ្នកជំនាញ Review ផលិតផលអេឡិកត្រូនិកជាច្រើនរូបទៀតផង។

មិនតែប៉ុណ្ណោះ អតិថិជនយ៉ាងច្រើនកុះករបានចូលរួមទស្សនា ក៏ដូចជាធ្វើការតេស្តផ្ទាល់នូវបច្ចេកវិទ្យា AI ជំនាន់ថ្មីចុងក្រោយដែលបំពាក់លើផលិតផលអេឡិកត្រូនិករបស់ សាមសុង។

ទីតាំង Showroom ថ្មីនេះ មានការដាក់តាំងគ្រប់ផលិតផលអេឡិកត្រូនិកទាំងអស់របស់ សាមសុង ដែលមានដូចជា ទូរទស្សន៍ ទូទឹកកក ម៉ាស៊ីនបោកសម្លៀកបំពាក់ស៊េរីថ្មី ម៉ាស៊ីនត្រជាក់ ម៉ូនីទ័រ ជាពិសេស ក៏មានជាប្រភេទគ្រឿងបរិក្ខារទំនើបៗជាច្រើន សម្រាប់បំពាក់ក្នុងអគារពាណិជ្ជកម្ម ដូចជា ម៉ាស៊ីនត្រជាក់គ្រប់ប្រភេទ (Aircon System Solution), ទូរទស្សន៍សម្រាប់បំពាក់ក្នុងសណ្ឋាគារ (Hotel TV Solution), ស្លាកសញ្ញាឌីជីថល (Digital Signage Solution) ។ល។

គួរបញ្ជាក់ផងដែរថា ទីតាំង ហាងទំនើបសាមសុង (Samsung Multi Store) ក៏មានវត្តមាននៅលើទឹកដី ខេត្តសៀមរាប ផងដែរ ដូច្នេះអតិថិជនក៏អាចទៅធ្វើការតេស្តសាកល្បងផលិតផលគ្រប់ប្រភេទរបស់ សាមសុង បានផងដែរ។

បើយោងតាមលោក Hyung Geun Lee អគ្គនាយកគ្រប់គ្រង សាខាក្រុមហ៊ុន ថៃសាមសុងអេឡិកត្រូនិក ប្រចាំប្រទេសកម្ពុជា បានមានប្រសាសន៍បន្ថែមដែរថា “ការគាំទ្ររបស់អតិថិជនជាទីស្រលាញ់ទាំងអស់បានធ្វើឱ្យក្រុមហ៊ុនសាមសុង រីកចម្រើនខ្លាំងឈានមកដល់ចំណុចនេះ ហើយតំណាងឱ្យក្រុមហ៊ុន សាមសុង សូមថ្លែងអំណរគុណយ៉ាងជ្រាលជ្រៅបំផុត ជាពិសេស ដល់ដៃគូសហការ តំណាងចែកចាយតូចធំ នៅទូទាំងប្រទេសកម្ពុជា ដែលតែងតែជឿជាក់ និងគាំទ្រឥតងាករេ។ ហើយគោលបំណងនៃការបើកសម្ពោធទីតាំង Showroom ថ្មី នេះ គឺដើម្បីផ្ដល់ភាពងាយស្រួលដល់អតិថិជនក្នុងការស្វែងរកផលិតផលរបស់ សាមសុង ក៏ដូចជាមកទស្សនា និងធ្វើការតេស្តផ្ទាល់បានគ្រប់ផលិតផលអេឡិកត្រូនិកសាមសុង AI ដ៏ឆ្លាតវៃផងដែរ។”

ក្រុមហ៊ុន សាមសុង ធ្វើឱ្យការរស់នៅរបស់លោកអ្នកឱ្យកាន់តែប្រសើរឡើង និងរីករាយជាមួយផលិតផលរបស់ សាមសុង ដែលបំពាក់មកជាមួយនូវកំពូលបច្ចេកវិទ្យា AI ដ៏ទំនើប ទាន់សម័យបំផុត។

សម្រាប់ព័ត៌មានលម្អិតបន្ថែម សូមអញ្ជើញមកទស្សនាផលិតផលដោយផ្ទាល់ ឬ តេស្តដោយផ្ទាល់ដៃនៅតាមហាងទំនើបសាមសុងដែលមានទីតាំងដូចខាងក្រោម:

– អគារលេខ 839C មហាវិថីព្រះមុនីវង្ស (ផ្លូវ93) សង្កាត់ផ្សារដើមថ្កូវ ខណ្ឌចំការមន រាជធានីភ្នំពេញ
– ផ្ទះលេខ503 ផ្លូវស៊ីវុត្ថា សង្កាត់ស្វាយដង្គំ ក្រុងសៀមរាប ខេត្តសៀមរាប

ឬ ក៏អាចចូលទៅកាន់ Facebook: SamsungCambodia, IG: samsungcambodia, TikTok: samsungcambodia ឬ ក៏អាចធ្វើការទំនាក់ទំនងទៅកាន់ផ្នែកសេវាបម្រើអតិថិជន 24/7 ឥតគិតថ្លៃតាមរយៈទូរស័ព្ទលេខ៖ 1800-20 32 32!

សហរដ្ឋអាមេរិក ៖ កំណាត់ឈើនេះបានអណ្តែតឈរក្នុងបឹងអស់រយៈពេលជាង១២០ឆ្នាំ បានក្លាយជាកំណាត់ឈើដ៏អាថ៌កំបាំងមួយដែលអ្នកវិទ្យាសាស្ត្រពុំអាចបកស្រាយបាន ។ ប៉ុន្តែអ្នកស្រុកមានជំនឿថា កំណាត់ឈើមានថាមពលពិសេសអាចគ្រប់គ្រងផ្ទៃដី, ផ្ទៃមេឃ និងអាកាស ។ នៅលើពិភពលោកនេះ មិនថាដុំដី, ថ្ម, ដើមស្មៅ ឬសូម្បីតែកំណាត់ឈើ ក៏បានក្លាយជាវត្ថុអាថ៌កំបាំងដែលគ្មានការបកស្រាយ ។

សារព័ត៌មាន KBN នឹងបង្ហាញលោកអ្នកឱ្យស្គាល់កំណាត់ឈើមួយឈ្មោះថា កំណាត់ឈើអាថ៌កំបាំង ដែលមានប្រវត្តិគួរឱ្យចាប់អារម្មណ៍នៅលើពិភពលោក ។ កំណាត់ឈើនេះឈ្មោះ «Old Man of The Lake» ឬ «បុរសជរាក្នុងបឹង» ដែលមានសភាពពុកផុយអណ្តែតក្នុងបឹង Crater នៅរដ្ឋ Oregon សហរដ្ឋអាមេរិក អស់រយៈពេលជាង១២០ឆ្នាំ ។ ប៉ុន្តែអ្វីគួរឱ្យចាប់អារម្មណ៍មិនចាញ់អាយុរបស់វានោះ គឺវាបានអណ្តែតឈរក្នុងទឹក ។

ចំណែកប្រវត្តិរបស់កំណាត់ឈើនេះ គឺកាលពីឆ្នាំ១៨៩៦ លោក Joseph S. Diller ជាអ្នកស្រាវជ្រាវផ្នែកភូមិសាស្ត្របាននិយាយពីកំណាត់ឈើធំ ពណ៌ស ដែលបានអណ្តែតក្នុងបឹង Crater ក្រោយពីលោកឃើញវាដោយចៃដន្យ ។ ៥ឆ្នាំក្រោយមក លោក Joseph ឃើញកំណាត់ឈើនេះប្តូរទីតាំងក្នុងចម្ងាយ៤០០ម៉ែត្រ ហើយធ្វើឱ្យលោកចង់ស្រាវជ្រាវពីវាឱ្យបានច្បាស់លាស់ ។ លោកឃើញថា វាអាចអណ្តែតទឹកឆ្ងាយរហូតដល់ជាង៤០០ម៉ែត្រឯណោះ ក្នុងរយៈពេលត្រឹមតែ១ថ្ងៃ ។

មនុស្សភាគច្រើនអាចគិតវា គ្មានអ្វីចម្លែកទេ ដែលកំណាត់ឈើបានអណ្តែតតាមខ្សែទឹកហូរ ប៉ុន្តែលោក Joseph និយាយថា ទឹកក្នុងបឹងនេះនៅស្ងៀម មិនហូរទៅណាទេ ហើយកំណាត់ឈើពុំគួរអណ្តែតឆ្ងាយឡើយ ។ ក្រោយមក លោកក៏បានស្រាវជ្រាវពីជាតិកាបូនរបស់កំណាត់ឈើ ហើយរកឃើញថា កំណាត់ឈើមានអាយុយ៉ាងហោចណាស់ ៤៥០ឆ្នាំ ហើយវាចំណាយពេលអណ្តែតក្នុងបឹងជ្រៅបំផុតនៅអាមេរិក ប្រមាណ១២០ឆ្នាំ ។

អ្នកជំនាញជឿថា កំណាត់ឈើអាថ៌កំបាំងនេះអណ្តែតក្នុងទឹកដោយសារការបាក់ដី ហើយមូលហេតុដែលវាអណ្តែតឈរបែបនេះ គឺគ្មានអ្នកណាម្នាក់អាចបកស្រាយបានច្បាស់លាស់ឡើយ ។ កំណាត់ឈើភាគច្រើនបានអណ្តែតផ្តេក ប៉ុន្តែសម្រាប់កំណាត់ឈើមានប្រវែង៩ម៉ែត្រ និងមានទទឹង៦១សង់ទីម៉ែត្រនេះ បែរជាអណ្តែតទឹកឈរអស់ជាច្រើនឆ្នាំ ។ បើទោះជានៅផ្នែកខាងចុងរបស់វាពុកផុយអាចលិចទឹកក្តី ប៉ុន្តែវានៅតែអណ្តែតឈរអាចឱ្យមនុស្សឈរលើវាពុំគួរឱ្យជឿ ។

អ្នកវិទ្យាសាស្ត្រខ្លះជឿថា វាមានសមតុល្យរវាងកំណាត់ឈើផ្នែកខាងលើទឹក និងក្រោមទឹក ។ ការលើកឡើងមួយគួរឱ្យជឿជាក់បំផុត គឺកំណាត់ឈើនេះអណ្តែតចុះឡើងអស់ជាច្រើនសតវត្សរ៍ ដោយសារឫសរបស់វាអាចជាប់គ្នាជាមួយដុំថ្មនៅក្រោមទឹក ទើបធ្វើឱ្យផ្នែកម្ខាងរបស់កំណាត់ឈើលិចក្នុងទឹក ។ ប៉ុន្តែក្រោយមក ដុំថ្មនេះរបូតពីឫសឈើ រីឯផ្នែកដែលលិចទឹកក៏ចាប់ផ្តើមមានទម្ងន់ធ្ងន់ដោយសារការស្រូបទឹក ។ ហេតុនេះ ផ្នែកកំណាត់ឈើដែលលិចទឹក នឹងមានទម្ងន់ធ្ងន់ជាងផ្នែកខាងលើ ។

ទោះយ៉ាងណា គ្មានអ្នកណាដឹងមូលហេតុពិតប្រាកដពីមូលហេតុដែលកំណាត់ឈើអណ្តែតទឹកឈរទេ ពីព្រោះបច្ចុប្បន្ន គ្មានដុំថ្ម ឬស្លាកស្នាមណាមួយដែលអាចបញ្ជាក់ថា មានដុំថ្មធ្លាប់ពាក់ព័ន្ធជាមួយឫសកំណាត់ឈើពីមុនឡើយ ។ ហេតុនេះ អ្នកភូមិមានជំនឿថា កំណាត់ឈើនេះមានថាមពលពិសេសអាចគ្រប់គ្រងអាកាសធាតុនៅបរិវេណនេះ ។

កាលពីឆ្នាំ១៩៨០ មានអ្នកវិទ្យាសាស្ត្រមួយក្រុមបានមកស្រាវជ្រាវបឹង Crater និងបានចងកំណាត់ឈើនេះឱ្យនៅស្ងៀមមួយកន្លែង ដើម្បីចៀសវាងគ្រោះថ្នាក់ពេលពួកគេជិះទូកស្រាវជ្រាវ ។ ប៉ុន្តែក្រោយពីកំណាត់ឈើនេះត្រូវបានចងមួយកន្លែង ស្រាប់តែអាកាសធាតុនៅបរិវេណនេះផ្លាស់ប្តូរភ្លាមៗ គឺពីមេឃស្រឡះល្អក្លាយជាខ្យល់ព្យុះ និងមានព្រិលធ្លាក់នាពេលបន្ទាប់ ខណៈវាជាខែសីហា មិនមែនជាខែធ្លាក់ព្រិល ។ បន្ទាប់មក ក្រុមអ្នកវិទ្យាសាស្ត្រក៏បានស្រាយចំណងកំណាត់ឈើវិញ ហើយអាកាសធាតុក៏ស្ងប់ស្ងាត់ដូចមុន ។

បច្ចុប្បន្ន កំណាត់ឈើ «Old Man of The Lake» នៅតែជាអាថ៌កំបាំងនៅឡើយ ដែលធ្វើឱ្យបឹង Crater ក្លាយជាតំបន់ទេសចរណ៍គួរឱ្យចាប់អារម្មណ៍មួយក្នុងរដ្ឋ Oregon សហរដ្ឋអាមេរិក ។ ចុះលោកអ្នកវិញយល់ឃើញយ៉ាងណាដែរ ពាក់ព័ន្ធនឹងកំណាត់ឈើនេះ?

នៅលើពិភពលោកយើងនេះគឺមានទ្វីបទាំងអស់ចំនួន ៧ រួមមាន៖ ទ្វីបអាស៊ី, អឺរ៉ុប, អាហ្វ្រិក, អាមេរិកខាងជើង, អាមេរិកខាងត្បូង, អង់តាក់ទិក និងអូស្ត្រាលី។ ប៉ុន្តែតើអ្នកដឹងទេថា ក្នុងចំណោមទ្វីបទាំងអស់នេះ ទ្វីបណាដែលសម្បូរទៅដោយសារធាតុរ៉ែសំខាន់ៗច្រើនជាងគេ? សារធាតុរ៉ែសំខាន់ៗដូចជាទង់ដែង លីចូម នីកែល cobalt មាស ពេជ្រ ផ្លាទីន និងអ៊ុយរ៉ាញ៉ូម គឺស្ថិតនៅទ្វីបអាហ្វ្រិកទាំងអស់ ដែលទ្វីបនេះកាន់កាប់ ៦៥ ភាគរយនៃដីបង្កបង្កើនផលរបស់ពិភពលោក និង ១០ ភាគរយនៃប្រភពទឹកសាបដែលអាចកកើតឡើងវិញបានខាងក្នុងរបស់ភពផែនដី។ ដូច្នេះអាហ្វ្រិកគឺជាទ្វីបដែលសម្បូរទៅដោយសារធាតុរ៉ែសំខាន់ៗច្រើនជាងគេបំផុតនៅលើពិភពលោក។

សព្វថ្ងៃតម្រូវការសកលសម្រាប់សារធាតុរ៉ែសំខាន់ៗ ជាពិសេសលីចូម កំពុងតែកើនឡើងជាលំដាប់ ដើម្បីសម្រេចបាននូវគោលដៅថាមពលស្អាត និងការបញ្ចេញកាបូន។ លើសពីនេះសារធាតុរ៉ែដូចជាទង់ដែង នីកែល cobalt គឺជាធាតុផ្សំដ៏សំខាន់នៅក្នុងបច្ចេកវិទ្យាថាមពលស្អាតដែលកំពុងរីកចម្រើននាពេលបច្ចុប្បន្ននេះ ចាប់ពីទួរប៊ីនខ្យល់ និងបន្ទះស្រូបពន្លឺព្រះអាទិត្យ រហូតដល់រថយន្តអគ្គិសនី និងឧបករណ៍ឆ្លាតវៃផ្សេងៗជាដើម។ នៅទូទាំងពិភពលោក អាហ្រ្វិកបានលេចចេញជាទ្វីបដែលមានធនធានរ៉ែសំខាន់ៗច្រើនជាងគេ ដោយទ្វីបនេះកំពុងត្រូវបានដាក់ជាតួអង្គសំខាន់មួយនៅក្នុងខ្សែសង្វាក់ផ្គត់ផ្គង់នៃធនធានរ៉ែទាំងនេះ មានន័យថា ប្រសិនបើទ្វីបផ្សេងមានតម្រូវការ នោះទ្វីបអាហ្វ្រិកនឹងមានការផ្គត់ផ្គង់។

យោងតាមការវាយតម្លៃទីផ្សារសារធាតុរ៉ែសំខាន់ៗឆ្នាំ ២០២៣ របស់ទីភ្នាក់ងារថាមពលអន្តរជាតិ (IEA) តម្រូវការលោហធាតុទាំងនេះត្រូវបានគេរំពឹងថានឹងកើនឡើងយ៉ាងខ្លាំង ដោយរំពឹងថានឹងកើនឡើងទ្វេដងនៅឆ្នាំ ២០៣០ និងបួនដងនៅឆ្នាំ ២០៥០។ ដោយប្រាក់ចំណូលប្រចាំឆ្នាំត្រូវបានគេរំពឹងថានឹងឈានដល់ ៤០០ ពាន់លានដុល្លារអាមេរិក – លើសពីតម្លៃ នៃការជីកយករ៉ែធ្យូងថ្មនៅទូទាំងពិភពលោកក្នុងឆ្នាំ ២០២០ ទៅទៀត។

សម្រាប់លីចូម IEA បាននិយាយថា តម្រូវការសកលសម្រាប់លីចូមក៏បានកើនឡើងបីដងពីឆ្នាំ ២០១៧ ដល់ឆ្នាំ ២០២២ ផងដែរ ដោយទទួលបានប្រាក់ចំណូលរហូតដល់ ៣២០ ពាន់លានដុល្លារអាមេរិក។ ហេតុនេះសម្រាប់លោកអ្នកដែលគិតថាអាហ្វ្រិកគឺជាទ្វីបក្រីក្រសូមគិតឡើងវិញម្តងទៀត ព្រោះបច្ចុប្បន្នប្រទេសជាច្រើននៅលើទ្វីបនេះគឺមានការអភិវឌ្ឍជឿនលឿនខ្លាំងគួរឱ្យកត់សម្គាល់៕

ប្រទេសស្កុតឡេន ៖ ភូមិដ៏ស្រស់ស្អាតមួយឈ្មោះ Old Village of Lawers ដែលមានទីតាំងស្ថិតនៅជាប់មាត់បឹង Tay ក្នុងទីក្រុង Perthshire ប្រទេសស្កុតឡេន ត្រូវបានប្រកាសលក់ក្នុងតម្លៃជាង១៤ម៉ឺនដុល្លារអាមេរិកប៉ុណ្ណោះ ថែមទាំងមានឆ្នេរខ្សាច់ផ្ទាល់ខ្លួនទៀតផង ។ ប៉ុន្តែគ្មានអ្នកណាម្នាក់ហ៊ានទិញភូមិនេះទេ បើទោះជាវាស្រស់ស្អាត និងមានតម្លៃថោកយ៉ាងណាក៏ដោយ ដោយសារល្បីថា ជាភូមិខ្មោចលង ។

នៅភូមិនេះមានសំណង់ចាស់ៗ ដូចជា ៖ វិហារចាស់បាក់បែក ដែលបានសាងសង់ឡើងកាលពីឆ្នាំ១៦៦៩, ផ្ទះសម្បែង, រោងម៉ាស៊ីនកិនស្រូវ, ផ្ទៃដីសម្រាប់ធ្វើចម្ការ និងសម្ភារៈជាច្រើនទៀត ។ អ្វីគួរឱ្យចាប់អារម្មណ៍នោះ គឺភូមិនេះត្រូវបានគេប្រកាសលក់ក្នុងតម្លៃត្រឹមតែ១សែន២ម៉ឺន៥ពាន់ផោន (ឬស្មើជាង១៤ម៉ឺនដុល្លារអាមេរិក) ប៉ុណ្ណោះ ខណៈភូមិនេះមានផ្ទៃដីធំទូលាយ, វាលស្មៅស្អាត, ព្រៃឈើ និងមានឆ្នេរខ្សាច់ផ្ទាល់ខ្លួន ។

ប៉ុន្តែចំណុចមួយដែលធ្វើឱ្យមនុស្សភាគច្រើនពុំហ៊ានដីភូមិនេះធ្វើកម្មសិទ្ធិ ដោយសារមានរឿងដំណាលគួរឱ្យព្រឺសម្បុរអស់ជាច្រើនសតវត្សរ៍មកហើយ ។ ភូមិនេះធ្លាប់ជាកម្មសិទ្ធិរបស់ស្ត្រីម្នាក់ឈ្មោះ The Lady of Lawers ហើយគេជឿថា នាងនៅតែតាមលងបន្លាចអ្នកមករស់នៅភូមិនេះរហូតដល់បច្ចុប្បន្ន ជាពិសេស ការទស្សន៍ទាយហេតុការណ៍មុនរបស់នាង ។

បើតាមទិន្នន័យកត់ត្រាក្នុងប្រវត្តិសាស្ត្របញ្ជាក់ថា ស្ត្រីឈ្មោះ The Lady of Lawers គឺជាសុភាពនារីរស់នៅក្នុងភូមិនេះ ហើយនាងបានទស្សន៍ទាយហេតុការណ៍មុនយ៉ាងច្រើន ហើយការទស្សន៍ទាយរបស់នាងបានក្លាយជាការពិតជាច្រើនលើកទៀតផង ។

ជាក់ស្តែង នាងបានទស្សន៍ទាយថា នឹងមានការដឹកជញ្ជូនអ្នកដំណើរជាមួយផ្សែងភ្លើងឆ្លងកាត់បរិវេណនេះ ស្រាប់តែក្រោយមក គេបានធ្វើផ្លូវរថភ្លើងឆ្លងកាត់បរិវេណនេះពិតមែន ។ លើសពីនេះ នាងទាយថា នឹងមាននាវាប្រើប្រាស់កម្លាំងផ្សែងភ្លើងលិចក្នុងបឹង Tay ហើយធ្វើឱ្យមានគ្រោះថ្នាក់យ៉ាងធំ ដែលនាងបាននិយាយមុនពេលផលិតនាវាប្រើប្រាស់កម្លាំងផ្សែងភ្លើង ។

ក្រៅពីនេះ នាងបានដាំដើមឈើនៅភាគខាងជើងព្រះវិហារ ហើយនាងនិយាយថា នៅពេលដើមឈើទាំងនេះធំមានកម្ពស់រហូតដល់កំពូលព្រះវិហារ ព្រះវិហារនឹងវិនាសហិនហោច ។ ក្រោយមក ដើមឈើរបស់នាង និងព្រះវិហារបានខូចខាតយ៉ាងខ្លាំងដោយសារខ្យល់ព្យុះបោកបក់ គឺហេតុការណ៍នេះកើតឡើងក្នុងពេលដើមឈើមានកម្ពស់ស្មើនឹងកំពូលព្រះវិហារ ។

ក្រៅពីនេះ ស្ត្រីឈ្មោះ The Lady of Lawers ក៏បានទស្សន៍ទាយហេតុការណ៍ជាច្រើនទៀត ដែលធ្វើឱ្យមនុស្សម្នាពុំហ៊ានទិញភូមិនេះរហូតមកដល់បច្ចុប្បន្ន ។ ប្រសិនបើលោកអ្នកមានប្រាក់ជាង១៤ម៉ឺនដុល្លារអាមេរិកក្នុងដៃ តើលោកអ្នកហ៊ានចំណាយប្រាក់នេះទិញភូមិដ៏ស្រស់ស្អាត និងសម្បូរទៅដោយការចងចាំក្នុងប្រវត្តិសាស្ត្រ ព្រមជាមួយការទស្សន៍ទាយគួរឱ្យភ័យខ្លាចបែបនេះដែរឬទេ?

ឆ្កែ ឬឆ្មាគឺជាសត្វចិញ្ចឹមដ៏ពេញនិយមបំផុតនៅលើពិភពលោក មិនថាប្រជាជនក្នុងប្រទេសណានោះទេភាគច្រើនគឺសុទ្ធតែចិញ្ចឹមសត្វទាំងពីរនេះ ដោយសារពួកវាមានភាពស្មោះត្រង់ជាមួយម្ចាស់ រហ័សរហួន និងគួរស្រឡាញ់។ ទោះជាយ៉ាងណាសត្វដ៏គួរឱ្យស្រឡាញ់នេះក៏អាចបំផ្លាញទ្រពសម្បត្តិរបស់យើងបានផងដែរ ប្រសិនបើអ្នកធ្វេសប្រហែសនូវរឿងអ្វីមួយ ដូច្នេះអ្នកគួរឃ្លាំមើលពួកវាជានិច្ច។ ជាឧទាហរណ៍ជាក់ស្តែង កាលពីថ្ងៃទី៧ ខែកក្កដា ឆ្នាំ២០២៤ ផ្ទះមួយខ្នងនៃទីក្រុង Tulsa ក្នុងរដ្ឋអូក្លាហូម៉ាប្រទេសសហរដ្ឋអាមេរិក ត្រូវបានអគ្គីភ័យឆាប់ឆេះបណ្តាលឱ្យផ្ទះរបស់ម្ចាស់ឆ្កែរងការខូចខាតយ៉ាងធ្ងន់ធ្ងរបំផុត ដោយសារឆ្កែធ្វើរឿងមួយនេះ។

យោងតាម CBS News ឆ្កែបានខាំ Power Bank ជាច្រើនដងបណ្តាលឱ្យថ្ម Lithium-ion ផ្ទុះ និងបង្កជាភ្លើងឆេះផ្ទះយ៉ាងសន្ធោរសន្ធៅ ទោះជាយ៉ាងណាវាមិនរីករាលដល់ផ្ទះជិតខាងនោះទេ ហើយក៏មិនប៉ះពាល់ដល់អាយុជីវិតម្ចាស់ ឬសត្វចិញ្ចឹមដែរ ដោយបច្ចុប្បន្នផ្ទះនេះត្រូវបានគេពន្លត់រួចរាល់អស់ហើយ។ ទោះបីជាយ៉ាងនេះក្តី នាយកដ្ឋានពន្លត់អគ្គីភ័យបានសេចក្តីណែនាំថា គ្រប់ម្ចាស់សត្វចិញ្ចឹមទាំងអស់គួរតែមានការប្រុងប្រយ័ត្នឱ្យបានខ្ពស់ ព្រោះប្រសិនបើកាលណាឆ្កែ ឬឆ្មាខាំខ្សែសាកទូរស័ព្ទនៅពេលកំពុងបញ្ចូលថ្ម ឬ Power Bank ឬវត្ថុអគ្គិសនីផ្សេងទៀត ស្របពេលអ្នកកំពុងគេងគឺវាពិតជាមានហានិភ័យខ្ពស់នៃការបាត់បង់ជីវិតណាស់។

គួរបញ្ជាក់ដែរថា ផ្ទះនេះត្រូវបានរងការខូចខាតយ៉ាងធ្ងន់ធ្ងរដោយអគ្គីភ័យដែលបណ្តាលឱ្យនាយកដ្ឋានពន្លត់អគ្គីភ័យ ព្រមានប្រជាជនអាមេរិកទូទាំងប្រទេសអំពីអគ្គីភ័យអាគុយលីចូមអ៊ីយ៉ុងនេះ។ យោងតាមអ្នកនាំពាក្យ Andy Little ថ្មលីចូម-អ៊ីយ៉ុងអាចបញ្ចេញឧស្ម័នពុលនៅពេលដែលវាផ្ទុះ ដូច្នេះលោកអ្នកត្រូវទុកវាឱ្យឆ្ងាយពីកុមារ និងសត្វចិញ្ចឹម ក៏ដូចជាការកែច្នៃឡើងវិញ និងប្រើប្រាស់វាឱ្យបានត្រឹមត្រូវតាមការណែនាំសុវត្ថិភាព។ លោក Andy Little ក៏បានបន្តទៀតថា “ថ្មនេះគឺអាចផ្ទុះបានគ្រប់ពេលវេលា ដោយសារហេតុផលជាច្រើនដូចជាការបរាជ័យឧបករណ៍ ការឡើងកំដៅខ្លាំង ការបញ្ចូលថាមពលលើស ឬប្រើឆ្នាំងសាកដែលមិនឆបគ្នា៕

ប្រទេសវៀតណាម ៖ សារព័ត៌មានបរទេសឈ្មោះ odditycentral រាយការណ៍ថា មានស្ត្រីម្នាក់អាយុ៤៩ឆ្នាំ រស់នៅខេត្តឡុងអាន (Long An) ប្រទេសវៀតណាម បានផ្តល់បទសម្ភាសន៍ជាមួយសារព័ត៌មានថា អ្នកស្រីមានលក្ខណៈខុសប្លែកពីមនុស្សទូទៅ គឺអ្នកស្រីដេកពុំលក់អស់រយៈពេលជាង៣០ឆ្នាំហើយ ។ ប៉ុន្តែអ្នកស្រីនៅតែមានកម្លាំងកំហែងធ្វើការទាំងថ្ងៃ ទាំងយប់ ដើម្បីឱ្យការងាររួចរាល់តាមការកុម្ម៉ង់របស់អតិថិជន ។

ស្ត្រីវៀតណាមរូបនេះឈ្មោះ Nguyen Ngoc My Kim រៀបរាប់ថា អ្នកស្រីប្រកបមុខរបរជាជាងកាត់ដេរសម្លៀកបំពាក់ ហើយដោយសារអ្នកស្រីពុំបានដេកលក់អស់រយៈពេលជាច្រើនឆ្នាំ ទើបធ្វើឱ្យមនុស្សម្នាជាច្រើនស្គាល់អ្នកស្រី ហើយគេដាក់ឈ្មោះអ្នកស្រីថា «ជាងដេរសម្លៀកបំពាក់ពុំធ្លាប់ដេកលក់» ។ អ្នកស្រីរីករាយដែលគេដាក់ឈ្មោះឱ្យបែបនេះ ហើយគិតថា វាជាឈ្មោះស័ក្តិសមនឹងអ្នកស្រីយ៉ាងខ្លាំង ។

អ្នកស្រីរៀបរាប់បន្តថា ជារៀងរាល់ថ្ងៃ អ្នកស្រីត្រូវធ្វើការរហូតដល់យប់ជ្រៅ ដើម្បីឱ្យការងាររួចរាល់ទាន់ពេលវេលាកុម្ម៉ង់របស់អតិថិជន ហើយអ្នកស្រីបារម្ភថា បើអ្នកស្រីដេកលក់នោះ មុខជាដេរសម្លៀកបំពាក់ឱ្យអតិថិជនមិនទាន់ទេ ។ ពេលមួយ អ្នកស្រីមានអារម្មណ៍ថា អ្នកស្រីពុំចាំបាច់ដេកលក់ក៏បាន ហើយចាប់ពីពេលនោះមក អ្នកស្រីក៏ឈប់ដេករហូតមកដល់បច្ចុប្បន្ន ។

ពីដំបូង អ្នកស្រីពុំបានដេកលក់អស់រយៈពេលជាច្រើនថ្ងៃជាប់ៗគ្នា ហើយវាពុំត្រឹមតែធ្វើឱ្យអ្នកស្រីចង់ដេកលក់គ្រប់ពេលវេលានោះទេ ប៉ុន្តែវាធ្វើឱ្យអ្នកស្រីធ្វើការខុសឆ្គងជាច្រើនលើក ដោយសារអ្នកស្រីហត់នឿយ, អស់កម្លាំង, ឈឺក្បាល និងជួបគ្រោះថ្នាក់ផងដែរ ។ ប៉ុន្តែក្រោយពីអ្នកស្រីពុំបានដេកលក់អស់រយៈពេលជាច្រើនខែ រហូតដល់ច្រើនឆ្នាំ ភ្នែក និងរាងកាយក៏ចាប់ផ្តើមមានទម្លាប់បែបនេះ ហើយចាប់ពីពេលនោះមក អ្នកស្រីដេកពុំលក់ទេ បើទោះជាចង់ដេកយ៉ាងណាក្តី ។

គ្រូពេទ្យពុំបានបកស្រាយពីអាការៈដេកពុំលក់របស់អ្នកស្រី Nguyen Ngoc ទេ ប៉ុន្តែអ្នកស្រីបានក្លាយជាមនុស្សល្បីល្បាញម្នាក់នៅប្រទេសវៀតណាម ដោយសារការដេកពុំលក់ ។ អ្នកស្រីអះអាងថា មនុស្សម្នាបានឃើញអ្នកស្រីធ្វើការទាំងថ្ងៃ ទាំងយប់ ពីព្រោះផ្ទះអ្នកស្រីបានបើកអំពូលភ្លើងគ្រប់ពេលវេលា ហើយទ្វារផ្ទះក៏បើករហូតដែរ ។ ហេតុនេះ មនុស្សម្នាអាចដើរចូលផ្ទះអ្នកស្រីបាន ឬមកមើលអ្នកស្រីធ្វើការក៏បានដែរ បើពួកគេចង់មើល ៕

ប្រទេសចិន៖ ទោះបីជាអឺរ៉ុប និងអាមេរិកដំឡើងពន្ធនាំចូល ១០០% ដើម្បីកាត់បន្ថយការនាំចូលរបស់ចិនក៏ដោយ ក៏ចិននៅតែជាប្រទេសនាំចេញរថយន្តអគ្គិសនីច្រើនជាងគេនៅលើពិភពលោកដដែល។
យោងតាម CNN នៅឆមាសទីមួយនៃឆ្នាំ ២០២៤ នេះចិនបានវ៉ាដាច់ជប៉ុនក្លាយជាប្រទេសដែលនាំចេញរថយន្តអគ្គិសនីច្រើនជាងគេនៅលើពិភពលោក ខណៈកាលពីមុនជប៉ុនគឺជាទីផ្សាររថយន្តដ៏ធំបំផុតក្នុងលោក ដែលនាំចេញរថយន្តច្រើនជាងគេ។ ទោះជាយ៉ាងណាក្នុងរយៈពេល ៦ ខែដំបូងនៃឆ្នាំនេះ ការនាំចេញរបស់ប្រទេសជប៉ុនគឺបានធ្លាក់ចុះ ០.៣% ធៀបនឹងរយៈពេលដូចគ្នាកាលពីឆ្នាំមុន មកនៅតិចជាង ២.០២ លានគ្រឿង។

ខណៈក្រុមហ៊ុនផលិតរថយន្តនៅក្នុងប្រទេសចិនវិញគឺបាននាំចេញរថយន្តជាង ២.៧៩ លានគ្រឿងក្នុងរយៈពេលដូចគ្នា កើនឡើងរហូតដល់ ៣១% ឯណោះ។ នេះបើយោងតាមសមាគមក្រុមហ៊ុនផលិតរថយន្តចិន ការនាំចេញរួមមានរថយន្តដឹកអ្នកដំណើរប្រហែល ២.៣៤ លានគ្រឿង និងរថយន្តពាណិជ្ជកម្មប្រហែល ៤៥៤.០០០ គ្រឿង បើធៀបនឹងជប៉ុនមានរថយន្តនាំចេញត្រឹមតែ ១.៨៣ លានគ្រឿង និងរថយន្តពាណិជ្ជកម្មប្រហែល ១៨៧,០០០ គ្រឿងប៉ុណ្ណោះ។

ក្នុងចំណោមការនាំចេញយានយន្តរបស់ប្រទេសចិនក្នុងឆមាសទីមួយនៃឆ្នាំ ២០២៤ នេះ រថយន្តសាំង និងម៉ាស៊ូតបានកើនឡើង ៣៦% ដល់ជិត ២.១៩ លានគ្រឿង ហើយការនាំចេញរថយន្តអគ្គិសនីក៏បានកើនឡើង ១៣ ភាគរយដល់ប្រមាណ ៦០៥ ០០០ គ្រឿងផងដែរ។ ក្នុងរយៈពេល ៦ ខែដំបូងនៃឆ្នាំនេះ ក្រុមហ៊ុននាំចេញរថយន្តកំពូលទាំង ៥ ក្នុងចំណោមក្រុមហ៊ុនផលិតរថយន្តរបស់ចិនគឺ Chery, SAIC, Changan, Geely និង BYD ។ ហេតុនេះការនាំចេញរថយន្តរបស់ក្រុមហ៊ុន Chery ឈានដល់ប្រហែល ៥៣២,០០០ ខណៈ SAIC មានប្រហែល ៤៣៩,០០០ គ្រឿង។

រីឯក្រុមហ៊ុន Changan វិញក៏បាននាំចេញរថយន្តប្រហែល ២៨៥,០០០ គ្រឿង Geely ២៤២,០០០ និង BYD ២០៧,០០០ គ្រឿង។ គួរបញ្ជាក់ដែរថាកាលពីឆ្នាំ ២០២៣ ចិនគឺជាម្ចាស់ជើងឯកពិភពលោកក្នុងការនាំចេញរថយន្តអគ្គិសនីច្រើនជាងគេ ហើយនៅឆមាសទីមួយនៃឆ្នាំ ២០២៤ នេះចិននៅតែបន្តវ៉ាដាច់ប្រទេសជប៉ុនក្នុងការនាំចេញរថយន្តអគ្គិសនីច្រើនជាងគេដដែល។ ដូច្នេះបច្ចុប្បន្នម៉ាកយីហោរបស់ចិនមានចំនួន ១១% នៃទីផ្សាររថយន្តអគ្គិសនីនៅអឺរ៉ុបក្នុងខែមិថុនា ទោះបីជាមានការដំឡើងពន្ធនាំចូល ១០០% ក៏ដោយ ក៏ចិននៅតែជាទីផ្សារនាំចេញរថយន្តអគ្គិសនីដ៏សំខាន់បំផុតនៅលើពិភពលោក៕

ប្រទេសនូវែលសេឡង់ ៖ រឿងរ៉ាវដ៏ស្មុគស្មាញនេះបានកើតឡើងលើអ្នកដំណើររបស់ក្រុមហ៊ុនអាកាសចរណ៍មួយឈ្មោះ Qantas Airline ដែលធ្វើដំណើរចាកចេញពីទីក្រុង Los Angeles សហរដ្ឋអាមេរិក ទៅកាន់ទីក្រុង Auckland ប្រទេសនូវែលសេឡង់ ។ ពេលចុះពីលើយន្តហោះ មន្ត្រីអន្តោប្រវេសន៍នូវែលសេឡង់បានតម្រូវឱ្យពួកគេបង់ប្រាក់ពិន័យដោយសារផ្លែប៉ោម១ផ្លែ ។

អ្នកដំណើរលើយន្តហោះទាំងអស់បានទទួលអាហារថ្ងៃត្រង់ ព្រមទាំងផ្លែប៉ោមផងដែរពីបុគ្គលិកអាកាសចរណ៍ ។ ប៉ុន្តែអ្នកដំណើរជាច្រើននាក់បរិភោគតែអាហារថ្ងៃត្រង់ប៉ុណ្ណោះ រួចហើយពួកគេក៏យកផ្លែប៉ោមដាក់ក្នុងកាបូបរៀងៗខ្លួន និងចុះពីលើយន្តហោះ ។

ប៉ុន្តែនៅពេលពួកគេដើរមកដល់កន្លែងត្រួតពិនិត្យអ្នកដំណើរចេញ-ចូលប្រទេស មន្ត្រីអន្តោប្រវេសន៍នូវែលសេឡង់ ក៏តម្រូវឱ្យពួកគេបង់ប្រាក់ពិន័យក្នុងម្នាក់ចំនួន២០០ដុល្លារនូវែលសេឡង់ (ឬស្មើ១១៦ដុល្លារអាមេរិក) ដោយសារបានយកផ្លែប៉ោមចុះពីយន្តហោះចូលប្រទេសនូវែលសេឡង់ ។

មន្ត្រីអន្តោប្រវេសន៍និយាយថា នៅពេលអ្នកដំណើរបំពេញព័ត៌មានធ្វើដំណើរ គឺបានបញ្ជាក់ថា ពួកគេនឹងពុំយករបស់អ្វីមួយខុសច្បាប់ចូលប្រទេសនូវែលសេឡង់ទេ ប៉ុន្តែមន្ត្រីអន្តោប្រវេសន៍បានត្រួតពិនិត្យឃើញផ្លែប៉ោមក្នុងកាបូបអ្នកដំណើរ ។ ហេតុនេះ មន្ត្រីអន្តោប្រវេសន៍នឹងពិន័យពួកគេតាមច្បាប់របស់នូវែលសេឡង់ ជាពិសេស ការយកបន្លែ, ផ្លែឈើ និងគ្រឿងទេសចូលនូវែលសេឡង់ ។

អ្នកដំណើរជាច្រើននាក់មិនពេញចិត្តនឹងការបង់ប្រាក់ពិន័យនេះឡើយ ហើយអ្នកដំណើរខ្លះដល់ថ្នាក់ស្រក់ទឹកភ្នែកទៀតផង ពេលមន្ត្រីអន្តោប្រវេសន៍តម្រូវឱ្យបង់ប្រាក់ពិន័យករណីយកផ្លែប៉ោមចូលនូវែលសេឡង់ ខណៈពួកគេពុំបានទិញផ្លែប៉ោមនេះ ។ វាមិនមែនជាករណីតែមួយដែលតម្រូវឱ្យអ្នកដំណើរបង់ប្រាក់ពិន័យទេ ពីព្រោះកន្លងមក ក៏មានករណីដូចគ្នានេះដែរ ពាក់ព័ន្ធនឹងការយកផ្លែឈើចុះពីយន្តហោះ ។

ហេតុនេះ បើលោក-អ្នកមានគម្រោងធ្វើដំណើរទៅក្រៅប្រទេស គួរតែប្រុងប្រយ័ត្នករណីយកផ្លែឈើពីលើយន្តហោះដាក់ចូលកាបូប ពីព្រោះប្រទេសនីមួយៗមានច្បាប់ខុសៗគ្នាពាក់ព័ន្ធនឹងការយកចំណីអាហារចូលប្រទេសរបស់គេ ។ បើមិនដូច្នោះទេ លោក-អ្នកអាចត្រូវមន្ត្រីអន្តោប្រវេសន៍ឱ្យបង់ប្រាក់ពិន័យដូចអ្នកដំណើររបស់ក្រុមហ៊ុនអាកាសចរណ៍ Qantas Airline ៕