ក្រុមហ៊ុនធំៗជាច្រើនរបស់អាមេរិកកំពុងប្រឈមមុខនឹងការលំបាកនៅក្នុងប្រទេសចិន
បរទេស៖ ក្រុមហ៊ុនធំៗដូចជា McDonald’s, Starbucks , Coca-Cola, និង Apple បានកត់ត្រាប្រាក់ចំណូលរបស់ពួកគេធ្លាក់ចុះខ្លាំងក្នុងទីផ្សារប្រទេសចិននៅត្រីមាសទីពីរនៃឆ្នាំ ២០២៤ នេះ។
យោងតាម CNBC ដែលបានចុះផ្សាយកាលពីថ្ងៃទី៧ ខែកក្កដាថា បច្ចុប្បន្នប្រាក់ចំណូលនៅក្នុងទីផ្សារអន្តរជាតិរបស់ McDonald’s បានថយចុះ ១.៣% បើធៀបនឹងរយៈពេលដូចគ្នាកាលពីឆ្នាំមុន ដែលនេះអាចមកពីការធ្លាក់ចុះខ្លាំងមិនធ្លាប់មាននៅក្នុងទីផ្សារចិនទើបធ្វើឱ្យប្រាក់ចំណូលនៅក្នុងទីផ្សារអន្តរជាតិរបស់ McDonald’s ថយចុះខ្លាំងបែបនេះ។ 
លោក Christopher Kempczinskin ប្រធាន និងជានាយកប្រតិបត្តិ McDonald’s បានអត្ថាធិប្បាយបន្ទាប់ពីបានចេញផ្សាយរបាយការណ៍ហិរញ្ញវត្ថុត្រីមាសទី ២ ថា “យើងកំពុងប្រឈមមុខនឹងការលំបាកយ៉ាងខ្លាំងនៅក្នុងប្រទេសចិន ដោយសារអតិថិជនចិនភាគច្រើនបានងាកទៅរកផលិតផលក្នុងស្រុកជាជាងក្រៅស្រុក។ រីឯក្រុមហ៊ុន Starbucks វិញក៏បានឃើញការធ្លាក់ចុះ ១៤% នៃការលក់របស់ខ្លួនក្នុងទីផ្សារចិននៅត្រីមាសទីពីរធៀបនឹងឆ្នាំមុនផងដែរ ខណៈនៅសហរដ្ឋអាមេរិកធ្លាក់ចុះត្រឹមតែ ២% ប៉ុណ្ណោះ។ ចំណែកក្រុមហ៊ុនភេសជ្ជៈ Coca-Cola វិញក៏ដូចទៅនឹង McDonald’s និង Starbucks ដែរដោយប្រាក់ចំណូលរបស់ពួកគេនៅក្នុងទីផ្សារចិនបានថយចុះខ្លាំងមិនគួរឱ្យជឿ ខណៈដែលតួលេខនេះជប៉ុន កូរ៉េ និងនៅអាស៊ីអាគ្នេយ៍កើនឡើង។ 
លោក James Quincey ប្រធាន និងជានាយកប្រតិបត្តិក្រុមហ៊ុន Coca-Cola បានអត្ថាធិប្បាយថា “សេដ្ឋកិច្ចធំទីពីររបស់ពិភពលោកប្រហែលជាកំពុងទទួលរងនូវបញ្ហារចនាសម្ព័ន្ធជាច្រើន ដូចជាអចលនទ្រព្យ និងតម្លៃ”។ ទោះជាយ៉ាងណាក៏ដោយ លោកបានសន្មតថាការធ្លាក់ចុះនៃការលក់នេះគឺដោយសារតែការផ្លាស់ប្តូរជាបណ្តើរៗរបស់ក្រុមហ៊ុនចំពោះផលិតផលទឹកសារធាតុរ៉ែ ទឹកតែ និងទឹកផ្លែឈើ ដើម្បីសម្របតាមរសជាតិក្នុងស្រុក។
ចំពោះក្រុមហ៊ុនស្មានហ្វូន Apple វិញក៏មិនខុសពីក្រុមហ៊ុនធំៗខាងលើនេះដែរ ដោយការលក់ស្មានហ្វូននៅក្នុងប្រទេសចិនដីគោកបានធ្លាក់ចុះ ៦.៥% នៅក្នុងត្រីមាសទីពីរ បើធៀបនឹងរយៈពេលដូចគ្នាកាលពីឆ្នាំមុន។ ក្រៅពីក្រុមហ៊ុន McDonald’s, Starbucks , Coca-Cola, និង Apple ក្រុមហ៊ុនអាហារ General Mills ក៏បានកត់ត្រាការធ្លាក់ចុះនៃអារម្មណ៍អ្នកប្រើប្រាស់នៅក្នុងត្រីមាសទីពីរផងដែរ។ លើសពីនេះហាងការ៉េម Haagen-Dazs និងហាងនំប៉ាវ Wanchai Ferry ដែលជាកម្មសិទ្ធិរបស់ក្រុមហ៊ុន General Mills ក៏បានឃើញការលក់ធ្លាក់ចុះពីរខ្ទង់កាលពីត្រីមាសមុនផងដែរ។
ទោះជាយ៉ាងណាក៏ដោយ មិនមែនគ្រប់ម៉ាកទំនិញប្រើប្រាស់ទាំងអស់ត្រូវប្រឈមមុខនឹងការលំបាកនោះទេ ។ ក្រុមហ៊ុនសំលៀកបំពាក់កាណាដា Goose បាននិយាយថាការលក់នៅក្នុងទីផ្សារប្រទេសបានកើនឡើង ១២.៣% ដល់ ១៥.៩ លានដុល្លារនៅក្នុងត្រីមាសទីពីរ។ ហើយក្រុមហ៊ុនស្បែកជើងកីឡា Nike ក៏បានកត់ត្រាកំណើនដ៏ល្អផងដែរ។ ដូចគ្នានេះដែរ Adidas ក៏បានឃើញការលក់កើនឡើង ៩% នៅក្នុងត្រីមាសទីពីរនៃទីផ្សារប្រទេសចិនផងដែរ ដោយបច្ចុប្បន្នរួមចំណែក ១៤% នៃប្រាក់ចំណូលសុទ្ធរបស់ក្រុមហ៊ុន។ ទន្ទឹមនឹងនេះក្រុមហ៊ុន Skechers ក៏បានកត់ត្រាការកើនឡើង ៣.៤% នៃប្រាក់ចំណូលនៅក្នុងទីផ្សារដែលមានមនុស្សរាប់ពាន់លាននាក់នេះ។ ក្រុមហ៊ុនរំពឹងថាសេដ្ឋកិច្ចធំទីពីររបស់ពិភពលោកនឹងបន្តងើបឡើងវិញ ហើយស្ថានភាពនឹងប្រសើរឡើងនៅក្នុងឆមាសទីពីរនៃឆ្នាំនេះ៕
នាយករដ្ឋមន្ត្រីថៃ លោក ស្រេតថា ថាវីស៊ីន សង្ឃឹមថា ការធ្វើឱ្យកាស៊ីណូនៅប្រទេសថៃស្របច្បាប់នឹងជួយទាក់ទាញការវិនិយោគពីក្រៅប្រទេស និងបង្កើនប្រាក់ចំណូលពីវិស័យទេសចរណ៍ផងដែរ ។ កាលពីឆ្នាំ២០២៣ ប្រទេសថៃទទួលបានប្រាក់ចំណូលពីវិស័យទេសចរណ៍ រហូតដល់១លាន២សែនលានបាត ហើយចាប់ពីខែមករា ដល់ខែកក្កដា ឆ្នាំ២០២៤ ភ្ញៀវទេសចរបរទេសបានធ្វើដំណើរមកថៃ ស្មើជាង២០លាននាក់ កើនឡើង៣៤% បើធៀបពីមួយឆ្នាំទៅមួយឆ្នាំ ។
.png)
