នាថ្ងៃទី៧ ខែសីហា ឆ្នាំ២០២៤ មានការបាក់ច្រាំងទន្លេដែលប្រឈមការគំរាមគំហែងការបាក់ស្រុតច្រាំងនៅចំណុចភូមិពាមក្រៅ ឃុំពាមកោះស្នា ស្រុកស្ទឹងត្រង់ ខេត្តកំពង់ចាម។
នៅក្នុងហេតុការណ៍នេះ មិនបានបង្កផលខូចខាតទ្រព្យសម្បត្តិ ឬផ្ទះសម្បែងបងប្អូនប្រជាពលរដ្ឋឡើយ ក៏ប៉ុន្តែវាបានបង្កជាការព្រួយបារម្ភដល់ពលគាត់ដែលរស់តាមបណ្តោយមាត់ទន្លេ។
ជុំវិញករណីនេះរដ្ឋបាលខេត្តកំពង់ចាម បានចាត់ក្រុមជំនាញដាក់បេខ្សាច់ ឬបោះថ្មទប់បន្ថែមទៀត ខណៈការបាក់ស្រុតច្រាំងលើកនេះមានប្រវែងដល់ទៅ៨០ម៉ែត្រ និងជម្រៅជាង៤ម៉ែត្រឯណោះ។
កន្លងទៅមន្ត្រីជំនាញបានធ្វេីការដាក់បេខ្សាច់និងថ្មទប់តាមច្រាំងទន្លេនៅចំណុចនេះជាច្រេីនមកហេីយ ដោយស្ថានភាពអាកាសធាតុប្រែប្រួលផង ទន្លេបន្តហក់ឡេីង ហេីយកន្លែងខ្លះបន្តស្រុតបាក់ដីភូមិបែបនេះ។
គួរបញ្ជាក់ផងដែរថា បច្ចុប្បន្នច្រាំងទន្លេមេគង្គដែលកំពុងគំរាមគំហែងដីភូមិរបស់អ្នកឃុំពាមកោះស្នា ស្រុកស្ទឹងត្រង់ ខណៈតំបន់ខ្លះអាជ្ញាធរ រួមមន្ត្រីជំនាញ កំពុងទប់ស្កាត់កុំឱ្យមានការបាក់ស្រុតតទៅទៀត៕
