ប្រទេសម៉ុងតេណេហ្គ្រោ ៖ កាលពីថ្ងៃទី១២ ខែសីហា ឆ្នាំ២០២៤ សារព័ត៌មានបរទេសរាយការណ៍ថា ពលរដ្ឋរស់នៅប្រទេសម៉ុងតេណេហ្គ្រោ (ស្ថិតនៅភាគអាគ្នេយ៍តំបន់អឺរ៉ុប) បានបង្ហាញការបារម្ភពីចំនួនភ្ញៀវទេសចរបរទេសច្រើនលើសលប់មកលេងទីក្រុង Kotor ជាទីក្រុងបេតិកភណ្ឌពិភពលោក របស់ម៉ុងតេណេហ្គ្រោ ក្រោយពីទីក្រុងនេះធ្លាប់ជាកន្លែងថតភាពយន្តដ៏ល្បីល្បាញរឿង «James Bond» ។

ពលរដ្ឋម៉ុងតេណេហ្គ្រោនិយាយថា ចំនួនភ្ញៀវទេសចរបរទេសមកកម្សាន្តនៅប្រទេសរបស់ពួកគេច្រើនលើសលប់នាពេលបច្ចុប្បន្ន បានបណ្តាលឱ្យការធ្វើចរាចរតាមផ្លូវនានាក្នុងទីក្រុងកកស្ទះយ៉ាងខ្លាំង ។ ទីក្រុង Kotor មានទីតាំងនៅជាប់ឆ្នេរសមុទ្រ គឺជាទីក្រុងដ៏ស្រស់ស្អាតរបស់ប្រទេសម៉ុងតេណេហ្គ្រោ ត្រូវបានអង្គការយូណេស្កូចុះបញ្ជីជាបេតិកភណ្ឌពិភពលោក កំពុងតែប្រឈមនឹងបញ្ហាស្ទះចរាចរណ៍ ពីព្រោះផ្លូវតូចៗក្នុងទីក្រុងនេះពោរពេញទៅដោយភ្ញៀវទេសចរបរទេសមកលេងនៅរដូវក្តៅ ។

ទីក្រុង Kotor ដែលជាប់ឆ្នេរសមុទ្រមួយនេះ ធ្លាប់បានបង្ហាញក្នុងភាពយន្តរឿង James Bond ដែលបានចាក់បញ្ចាំងកាលពីឆ្នាំ២០០៦ ។ បន្ទាប់មក ទីក្រុងនេះក៏បានក្លាយជាគោលដៅទេសចរណ៍ដ៏ពេញនិយមរបស់ភ្ញៀវទេសចរបរទេស និងមាននាវាកម្សាន្តយ៉ាងច្រើនសំដៅមកទីក្រុងនេះជាហូរហែនាពេលបច្ចុប្បន្ន ។

វិស័យទេសចរណ៍បានរួមចំណែក១ផ្នែក ក្នុងចំណោម៤ផ្នែក សម្រាប់ការអភិវឌ្ឍសេដ្ឋកិច្ចរបស់ប្រទេសម៉ុងតេណេហ្គ្រោ និងផ្តល់ប្រាក់ចំណូលប្រមាណ២៤,៥% របស់ផលិតផលក្នុងស្រុកសរុប (GDP) របស់ប្រទេសនេះ កាលពីឆ្នាំ២០២២ ។

ពលរដ្ឋម៉ុងតេណេហ្គ្រោម្នាក់ដែលធ្វើការក្នុងហាងលក់វត្ថុអនុស្សាវីយ៍ក្នុងទីក្រុងឆ្នេរសមុទ្រនិយាយថា ចំនួនភ្ញៀវទេសចរបរទេសមកលេងទីក្រុងឆ្នេរសមុទ្រច្រើនពេក វាធ្វើឱ្យអ្នកស្រុករស់នៅក្នុងតំបន់ប្រឈមនឹងបញ្ហាកកស្ទះចរាចរណ៍យ៉ាងខ្លាំង និងគ្មានកន្លែងចតរថយន្តទេ ។

ចំណែកលោក ចូវ៉ានរូស្ទិក ជាបុគ្គលិកភ្នាក់ងារទេសចរណ៍ប្រចាំតំបន់ទទួលស្គាល់ថា ជីវិតរស់នៅរបស់អ្នកស្រុកនៅទីនេះ កាន់តែលំបាកខ្លាំងឡើងក្នុងរដូវកាលមានភ្ញៀវទេសចរច្រើន ពីព្រោះចំនួននាវាកម្សាន្តមកចតនៅពាសពេញកំពង់ផែ បានកើនឡើងពីមួយឆ្នាំទៅមួយឆ្នាំ ។

លោក ចូវ៉ានរូស្ទិក សន្និដ្ឋានថា នឹងមាននាវាកម្សាន្តរបស់ភ្ញៀវទេសចរធ្វើដំណើរមកកាន់ទីក្រុង Kotor នឹងស្មើប្រមាណ៥០០គ្រឿងនៅឆ្នាំ២០២៤ ។ បច្ចុប្បន្ន ភ្ញៀវទេសចរបរទេសដែលជិះនាវាកម្សាន្ត ពួកគេត្រូវចំណាយប្រាក់ចំនួន១អឺរ៉ូក្នុងម្នាក់ (ឬស្មើជាង៣ពាន់រៀល) មុនពេលចូលក្នុងទីក្រុង Kotor ៕

Pura 70 Ultra ដែលជាស្មាតហ្វូនដ៏មានឥទ្ធិពលបំផុតរបស់ក្រុមហ៊ុនចិន Huawei បានយកឈ្នះទូរស័ព្ទកំពូលៗជាច្រើនក្នុងការសាកល្បងថាមពលថ្ម។
នេះបើយោងតាម TeckNick ដែលជាបណ្តាញ YouTube បច្ចេកវិទ្យាមានអ្នកជាវជិត ៥ សែននាក់ បានសាកល្បងអាយុកាលថ្មរបស់ស្មាតហ្វូនឈានមុខគេចំនួន ៧ ម៉ូដែលរួមមាន Samsung Galaxy S24 Ultra, Huawei Pura 70 Ultra, Xiaomi 14 Ultra, Vivo X100 Ultra, Vivo X100 Pro, Honor Magic6 Pro និង iPhone 15 Pro Max ។

មុនពេលចាប់ផ្តើម ទូរស័ព្ទនីមួយៗត្រូវបានបញ្ចូលថ្មឱ្យពេញរហូតដល់ ១០០% ក្នុងនោះគេសង្កេតឃើញថា Xiaomi 14 Ultra គឺជាស្មាតហ្វូនដែលឆាប់អស់ថ្មបំផុត បន្ទាប់ពីប្រើប្រាស់អស់រយៈពេល ៧ ម៉ោង ហើយ Vivo X100 Ultra, Galaxy S24 Ultra, និង iPhone 15 Pro Max គឺសុទ្ធតែជាស្មាតហ្វូនដែលមានថាមពលថ្មខ្សោយបន្ទាប់ពីប្រើប្រាស់ត្រឹមរយៈពេល ៨ ទៅ ៩ ម៉ោងជាប់គ្នា។ ទោះជាយ៉ាងណាក្រឡែកមកមើល Huawei Pura 70 Ultra វិញគឺមានថាមពលថ្មខ្លាំងបំផុត អាចប្រើប្រាស់បានរហូតដល់ ១១ ម៉ោង ត្រូវបានគេទទួលស្គាល់ថាជាស្មាតហ្វូនដែលកាន់ថ្មយូរជាងគេបង្អស់ឈរនៅចំណាត់ថ្នាក់លេខ ១ ។

ខណៈ Honor Magic6 Pro និង Vivo X100 Pro ឈរនៅចំណាត់ថ្នាក់លេខ ២-៣ រៀងគ្នា។ ក្រៅពីសមត្ថភាពថ្មគេហទំព័រ TeckNick ក៏យកចិត្តទុកដាក់លើសីតុណ្ហភាពនៅពេលធ្វើតេស្តផងដែរ ព្រោះនេះជាកត្តាសំខាន់ដែលប៉ះពាល់ដល់អាយុកាលថ្ម និងដំណើរការទាំងមូលរបស់ឧបករណ៍។ នៅក្នុងការធ្វើតេស្តនេះ Xiaomi 14 Ultra មានការកើនឡើងសីតុណ្ហភាពខ្ពស់បំផុតរហូតដល់ ៤០.៦ អង្សាសេនៅចុងបញ្ចប់ ហើយiPhone 15 Pro Max ជាប់ចំណាត់ថ្នាក់លេខ ២ ដែលមានសីតុណ្ហភាព ៣៩.៣ អង្សាសេ និង Galaxy S24 Ultra ៣៦.៤ អង្សាសេ Vivo X100 Ultra និង X100 Pro ទាំងពីរបានកត់ត្រា ៣៤.៨ និង ៣៤.៧ អង្សាសេ។

ទន្ទឹមនឹងនេះ Huawei Pura 70 Ultra រក្សាសីតុណ្ហភាពត្រជាក់បំផុតត្រឹមតែ ៣២.៨ អង្សាសេប៉ុណ្ណោះ ដែលបង្ហាញពីការគ្រប់គ្រងកំដៅប្រកបដោយប្រសិទ្ធភាពនៅលើស្មាតហ្វូននេះ។ គួរបញ្ជាក់ដែរថា Huawei Pura 70 Ultra ក៏ជាស្មាតហ្វូនដែលមានកាមេរ៉ាល្អបំផុតផងដែរ ត្រូវបានចេញលក់ដំបូងនៅថ្ងៃទី ១៨ ខែមេសា ឆ្នាំ២០២៤ ដោយស្មាតហ្វូននេះត្រូវបានគេកក់ទុកយ៉ាងលឿននៅលើហាងអនឡាញរបស់ក្រុមហ៊ុន Huawei ក្នុងរយៈពេលត្រឹមតែមួយនាទីប៉ុណ្ណោះ៕

ប្រទេសអ៊ីតាលី ៖ ក្រុមអ្នកស្រាវជ្រាវមកពីវិទ្យាស្ថានបច្ចេកវិទ្យាអ៊ីតាលីបានផលិតឆ្កែយន្តឈ្មោះ VERO (Vacuum cleaner Equipped Robot) ដើម្បីប្រមូលកន្ទុយបារីនៅតាមទីសាធារណៈ ដោយការបំពាក់ម៉ាស៊ីនបូមធូលីនឹងជើងរបស់វា ។ ឆ្កែយន្តអាចដើរបណ្តើរ ធ្វើការបណ្តើរ តាមរយៈការប្រើប្រាស់ប្រព័ន្ធកាមេរ៉ា និងបច្ចេកវិទ្យាសិប្បនិម្មិត (AI) ។

ក្រុមអ្នកស្រាវជ្រាវមកពីវិទ្យាស្ថានបច្ចេកវិទ្យាអ៊ីតាលីនិយាយថា ការផលិតឆ្កែយន្តនេះឡើង ដោយសារពួកគេមិនពេញចិត្តពេលឃើញមនុស្សម្នាបោះចោលកន្ទុយបារីនៅឆ្នេរសមុទ្រ និងបោះតាមកន្លែងចង្អៀតផ្សេងៗដែលពិបាកបោសសម្អាត ។ លើសពីនេះ កន្ទុយបារីជាច្រើនទៀតត្រូវបានគេបោះចោលក្នុងបំពង់បង្ហូរទឹកស្អុយ ហើយនៅទីបំផុត កន្ទុយបារីទាំងនេះបានហូរចូលក្នុងទឹកសមុទ្រធ្វើឱ្យប៉ះពាល់បរិស្ថានយ៉ាងខ្លាំង ។

ហេតុនេះ ក្រុមអ្នកស្រាវជ្រាវក៏បានផលិតឆ្កែយន្តនេះដើម្បីដោះស្រាយបញ្ហាសំរាមកន្ទុយបារីនៅទីសាធារណៈ ដោយការបំពាក់ម៉ាស៊ីនបូមធូលីនៅជើងរបស់វាសម្រាប់ឱ្យវាដើរបណ្តើរ ធ្វើការបណ្តើរ ។ រីឯប្រព័ន្ធកាមេរ៉ា និងបច្ចេកវិទ្យា AI ដែលបានបំពាក់ក្នុងឆ្កែយន្ត នឹងជួយឱ្យវាអាចដើរទៅមុខដោយខ្លួនឯង និងស្គាល់កន្ទុយបារីដើម្បីកម្ចាត់យ៉ាងមានប្រសិទ្ធភាព ។

ឆ្កែយន្តនេះអាចប្រមូលកន្ទុយបារីនៅតាមទីសាធារណៈរហូតដល់៩០% ហើយក្រៅពីការប្រមូលកន្ទុយបារី ឆ្កែយន្តនឹងកត់ត្រាទិន្នន័យពីបរិមាណសំរាមដែលបានបោះចោលនៅតាមកន្លែងនីមួយៗផងដែរ ។ នៅពេលវាជួបសំរាមធំៗជាងកន្ទុយបារី ដូចជា ៖ ដបទឹកបរិសុទ្ធ ឬប្រអប់ភីសា ឆ្កែយន្តនេះនឹងរាយការណ៍ពីទីតាំងសំរាមធំ ដើម្បីឱ្យមនុស្ស ឬគ្រឿងយន្តផ្សេងមកប្រមូលសំរាមជំនួសវា ។

នាថ្ងៃអនាគត ក្រុមអ្នកស្រាវជ្រាវនឹងអភិវឌ្ឍន៍បច្ចេកវិទ្យាឆ្កែយន្ត VERO ដើម្បីឱ្យវាអាចប្រមូលសំរាមធំៗបាន ដូចជា ៖ ដបទឹកបរិសុទ្ធ និងសំរាមផ្លាស្ទិក ។ បើតាមទិន្នន័យរបស់អង្គការសុខភាពពិភពលោក បង្ហាញថា ក្នុង១ឆ្នាំៗ មានកន្ទុយបារីត្រូវបានបោះចោលប្រមាណ៤លាន៥សែនលានដុំ ។ កន្ទុយបារីផ្ទុកនូវសារធាតុគីមីយ៉ាងច្រើន ដែលធ្វើឱ្យប៉ះពាល់ដល់បរិស្ថានឆ្នេរសមុទ្រ, ត្រីសមុទ្រ និងប្រភពទឹកសាបផ្សេងៗ ។

ហេតុនេះ ឆ្កែយន្ត VERO នឹងអាចជួយប្រមូលកន្ទុយបារីយ៉ាងច្រើននៅតាមទីសាធារណៈ និងមឆ្នេរសមុទ្ររបស់ប្រទេសអ៊ីតាលី ដោយសារអ្នកជក់បារីបោះចោលផ្តេសផ្តាស និងមើលរំលងពីផលប៉ះពាល់បរិស្ថានបណ្តាលមកពីកន្ទុយបារី ៕

ប្រទេសចិន៖ បញ្ញាសិប្បនិម្មិត AI គឺជាវិស័យបច្ចេកវិទ្យាដ៏សំខាន់បំផុតមួយរបស់ពិភពលោក ដែលបច្ចុប្បន្នប្រទេសចិនកំពុងនាំមុខគេក្នុងវិស័យទាំងនេះ ដោយមានក្រុមហ៊ុនចំនួន ១.៦៧ លាន។
យោងតាមការចេញផ្សាយដោយវេទិកាមូលដ្ឋានទិន្នន័យអាជីវកម្ម Qichacha កាលពីថ្ងៃទី ១០ ខែសីហា បានឱ្យដឹងថា ក្នុងរយៈពេល ៦ ខែដំបូងនៃឆ្នាំ ២០២៤ ប្រទេសចិនបានបន្ថែមក្រុមហ៊ុនទាក់ទងនឹង AI ថ្មីជាង ២៣៧,០០០ ដែលចំនួននេះជួយបង្កើនចំនួនសហគ្រាសនៅក្នុងវិស័យបញ្ញាសិប្បនិម្មិតនៅក្នុងប្រទេសចិនរហូតដល់ ១.៦៧ លាន។ ដូច្នេះក្រុមហ៊ុនកាន់តែច្រើនកំពុងត្រូវបានបង្កើតឡើងជាបន្តបន្ទាប់នៅពេលដែលប្រទេសចិនជំរុញការអភិវឌ្ឍន៍វិស័យបច្ចេកវិទ្យាដ៏សំខាន់នេះ។

យោងតាម SCMP ចំនួននៃការចុះឈ្មោះអាជីវកម្មថ្មីនៅក្នុងប្រទេសចិននាពេលបច្ចុប្បន្នគឺបានឈានដល់កំណត់ត្រាច្រើនជាង ៤៦៧,០០០ ដោយក្នុងចំណោមក្រុមហ៊ុនទាំងនោះ មានក្រុមហ៊ុនជាង ១.៤៨ លានស្មើនឹងជិត ៩០% ត្រូវបានបង្កើតឡើងកាលពីឆ្នាំ ២០១៧ នៅពេលដែលរដ្ឋាភិបាលចិនបានដាក់ចេញនូវផែនការអភិវឌ្ឍន៍បញ្ញាសិប្បនិម្មិតជំនាន់ក្រោយ ដោយមានគោលដៅធ្វើឱ្យប្រទេសនេះក្លាយជាអ្នកត្រួសត្រាយសកលក្នុងវិស័យ AI នេះ។ ដូច្នេះមកទល់ពេលនេះមិនទាន់មានប្រទេសណាវ៉ាដាច់ប្រទេសចិនក្នុងវិស័យ AI ទេ។

ដោយសព្វថ្ងៃប្រទេសចិនគឺជា “ខ្លា AI” ខណៈក្រុមហ៊ុននីមួយៗរកប្រាក់ចំណេញបានរាប់ពាន់លានដុល្លារពីវិស័យនេះ ហើយអាជីវកម្មជាច្រើនទៀតដូចជា Baidu, ByteDance, Alibaba… ក៏កំពុងបង្កើតគំរូ AI ដែលត្រូវបានគេចាត់ទុកថាមានគុណភាពខ្ពស់ផងដែរ។ ជាការពិតណាស់ការមកដល់នៃ AI បាននឹងកំពុងបង្កើតរលកថ្មីមិនត្រឹមតែក្នុងវិស័យបច្ចេកវិទ្យាប៉ុណ្ណោះទេ ប៉ុន្តែក៏មានទិដ្ឋភាពជាច្រើននៃជីវិតផងដែរ។ ក្នុងរយៈពេលប៉ុន្មានឆ្នាំកន្លងមកនេះ ប្រទេសចិនគឺបានក្លាយជាប្រទេសឈានមុខគេមួយក្នុងការអភិវឌ្ឍន៍ AI នៅលើពិភពលោក។ ដូច្នោះហើយ គោលដៅរបស់ប្រទេសចិនគឺដើម្បីក្លាយជាមជ្ឈមណ្ឌលច្នៃប្រឌិត AI ឈានមុខគេនៅឆ្នាំ ២០៣០ និងបង្កើនតម្លៃនៃឧស្សាហកម្ម AI របស់ប្រទេសនេះដល់ជាង ១ ពាន់ពាន់លានយន់ក្នុងឆ្នាំដដែល។

ជាក់ស្តែង ប្រទេសចិនបានបែងចែកគោលដៅនេះជាបីដំណាក់កាល និងកំណត់ស្តង់ដារសម្រាប់ឆ្នាំ ២០២០, ២០២៥ និង ២០៣០ ព្រមទាំងបានដាក់ចេញនូវគោលនយោបាយមួយចំនួនដែលរួមមាន ” Internet + AI ” និង ” ផែនការអភិវឌ្ឍ AI ជំនាន់ក្រោយ ” ក្នុងគោលបំណងលើកទឹកចិត្តដល់ឧស្សាហកម្ម និងកំណើន។ ខណៈពេលដែលលោកខាងលិចកំពុងប្រកួតប្រជែងដើម្បីបង្កើតមុខងារ AI ថ្មី ក្រុមហ៊ុនចិនក៏កំពុងផ្តោតលើការអនុវត្តជាក់ស្តែងផងដែរ។ ហេតុនេះចិនគឺជាប្រទេសឈានមុខគេក្នុងលោកដែលមានក្រុមហ៊ុនបច្ចេកវិទ្យា AI ច្រើនជាងគេបំផុត ដោយមាន ១.៦៧ លានក្រុមហ៊ុន ច្រើនជាង ៦ ដងបើធៀបនឹងសហរដ្ឋអាមេរិក៕

សហរដ្ឋអាមេរិក៖ បន្ទាប់ពីការប្រកួតកីឡាអូឡាំពិកឆ្នាំ ២០២៤ នៅទីក្រុងប៉ារីសប្រទេសបារាំងរយៈពេល ១៩ ថ្ងៃបានបញ្ចប់ ម្ចាស់ផ្ទះកីឡាអូឡាំពិកថ្មីគឺបានទៅលើប្រទេសអ៊ីតាលី និងសហរដ្ឋអាមេរិក។
នេះបើយោងតាមការចុះផ្សាយរបស់ NBC New York កាលពីពេលថ្មីៗនេះបានឱ្យដឹងថា ព្រឹត្តិការណ៍កីឡាអូឡាំពិករដូវរងាឆ្នាំ ២០២៦ នឹងធ្វើឡើងនៅប្រទេសអ៊ីតាលីក្នុងទីក្រុង Milan និង Cortina d’Ampezzo ហើយកីឡាអូឡាំពិករដូវក្តៅឆ្នាំ ២០២៨ វិញនឹងធ្វើឡើងនៅសហរដ្ឋអាមេរិកក្នុងទីក្រុង Los Angeles ដោយរដ្ឋាភិបាលអាមេរិគ្រោងចំណាយ ៧ ពាន់លានដុល្លារសម្រាប់កីឡាអូឡាំពិកឆ្នាំ ២០២៨ ខាងមុខនេះ។

ទោះជាយ៉ាងណាការចំណាយនេះគឺទាបជាងព្រឹត្តិការណ៍កីឡាអូឡាំពិក ២០២៤ របស់ទីក្រុងប៉ារីស ដោយរដ្ឋាភិបាលបារាំងបានចំណាយរហូតដល់ ១០ ពាន់លានដុល្លារឯណោះ។ ទោះបីជាយ៉ាងនេះក្តីព្រឹត្តិការណ៍កីឡាអូឡាំពិកទីក្រុងប៉ារីសហាក់មានការរិះគន់ពីអត្តពលិកជាច្រើនជុំវិញពិភពលោក ចំពោះការមិនយកចិត្តទុកដាក់ និងការខ្វះអនាម័យ។ ដូច្នេះគណៈកម្មាធិការរៀបចំរបស់អ៊ីតាលី និងអាមេរិកសន្យាថា នៅពេលខ្លួនក្លាយជាម្ចាស់ផ្ទះកីឡាអូឡាំពិកឆ្នាំ ២០២៦ និង ២០២៨ នឹងរៀបចំកម្មវិធីនេះឱ្យល្អបំផុត។

មូលហេតុដែលអាមេរិកមិនចំណាយប្រាក់ច្រើនទៅលើព្រឹត្តិការណ៍កីឡាអូឡាំពិកឆ្នាំ ២០២៨ គឺដោយសារគណៈកម្មាធិការចង់សន្សំសំចៃ និងមិនវិនិយោគលើបរិក្ខារថ្មីនោះទេ ប៉ុន្តែផ្តោតលើការយកចិត្តទុកដាក់ទៅលើអត្តពលិក និងអនាម័យវិញ។ គួរបញ្ជាក់ដែរថា ទីក្រុង Los Angeles គឺមានបទពិសោធន៍ធ្វើជាម្ចាស់ផ្ទះកីឡាអូឡាំពិកចំនួនបីដងហើយគឺនៅឆ្នាំ ១៩៣២, ១៩៨៤ និង ២០២៨ ខាងមុខនេះ។ កីឡាអូឡាំពិកគឺជាប្រភេទកីឡាអន្តរជាតិចម្រុះដែលត្រូវបានបែងចែកជាពីរព្រឹត្តិការណ៍គឺ ព្រឹត្តិការណ៍កីឡាអូឡាំពិករដូវក្តៅ និងព្រឹត្តិការណ៍កីឡាអូឡាំពិករដូវរងារ។

ព្រឹតិ្តការណ៍ទាំងពីរនេះត្រូវបានប្រារព្ធឡើងជារៀងរាល់បួនឆ្នាំម្តង ប៉ុន្តែក្រោយមកវាក៏ត្រូវផ្លាស់ប្តូរមកត្រឹម ២ ឆ្នាំម្តងវិញ។ កាលពីឆ្នាំ ២០២០ ទីក្រុងតូក្យូរបស់ប្រទេសជប៉ុនគឺជាម្ចាស់ព្រឹត្តិការណ៍កីឡាអូឡាំពិក ហើយនៅឆ្នាំ ២០២២ ទីក្រុងប៉េកាំងរបស់ប្រទេសចិនគឺជាម្ចាស់ព្រឹត្តិការណ៍កីឡាអូឡាំពិកនេះ។ កីឡាអូឡាំពិកត្រូវបានកត់ត្រាទុកដំបូងក្នុងឆ្នាំ ៧៧៦ មុនគ.ស ក្នុងទីក្រុងអូឡាំព្យ៉ានៃប្រទេសក្រិច ហើយត្រូវបានបង្កើតជាផ្លូវការនៅឆ្នាំ ១៨៩៦ ដូច្នេះប្រទេសក្រិកគឺជាប្រភពកំណើតដើមរបស់កីឡាអូឡាំពិកនេះ៕

សារព័ត៌មាន AFP រាយការណ៍ថា ពលរដ្ឋចិនចំនួន១៦នាក់ត្រូវបានរ.ន្ទះបា.ញ់ ក្នុងពេលតែមួយក្រោយពីមេឃធ្លាក់ភ្លៀងយ៉ាងខ្លាំង កាលពីថ្ងៃទី១១ ខែសីហា ឆ្នាំ២០២៤ ហើយពួកគេក៏រត់ទៅជ្រកភ្លៀងក្នុងខ្ទមចម្ការ ។ ហេតុការណ៍គួរឱ្យតក់ស្លុ.ត នេះបានកើតឡើងនៅទីក្រុង Changzhou ខេត្ត Jiangsu ស្ថិតនៅភាគខាងកើតប្រទេសចិន ។

អាជ្ញាធរនិយាយថា ដំបូលខ្ទមបានបាក់ធ្លាក់សង្កត់លើមនុស្សទាំងអស់ដែលកំពុងជ្រកភ្លៀងក្រោយពេលរន្ទះបាញ់ភ្លាម ហើយអាជ្ញាធរបានបញ្ជូនអ្នករងរបួសទៅកាន់មន្ទីរពេទ្យ ។ មនុស្សរងរបួសធ្ងន់ធ្ងរក្នុងហេតុការណ៍នេះស្មើនឹង៦នាក់ ហើយពួកគេបានស្លាប់នាពេលបន្ទាប់ រីឯមនុស្ស១០នាក់ទៀតរួចផុតពីគ្រោះថ្នាក់ ខណៈគ្រូពេទ្យកំពុងតែព្យាបាលយ៉ាងដិតដល់ ។

ក្រៅពីនេះ អាជ្ញាធរបានដាស់តឿនឱ្យពលរដ្ឋទាំងអស់ប្រុងប្រយ័ត្នខ្លួន ដោយសារបច្ចុប្បន្ន ប្រទេសចិនបានប្រឈមនឹងអាកាសធាតុប្រែប្រួលនៅរដូវក្តៅ និងមានភ្លៀងធ្លាក់ខ្លាំងនៅតំបន់ភាគខាងកើត និងខាងត្បូង ។ រីឯតំបន់ជាច្រើននៅភាគខាងជើងប្រទេសចិនមានអាកាសធាតុក្តៅខ្លាំង ដោយសារសីតុណ្ហភាពកើនឡើងខ្ពស់ជាបន្តបន្ទាប់ ។

គួរបញ្ជាក់ថា កាលពីខែកក្កដា ឆ្នាំ២០២៤ មានភ្លៀងធ្លាក់យ៉ាងខ្លាំងនៅតំបន់ភាគខាងជើងខេត្ត Shanxi ប្រទេសចិន ដែលបណ្តាលឱ្យបាក់ស្ពាន និងមានមនុស្សស្លាប់រហូតដល់៣៨នាក់ផងដែរ ។

ដោយឡែក សារព័ត៌មាន AFP រាយការណ៍ថា មានរន្ទះបាញ់ភ្ញៀវទេសចរនៅឆ្នេរសមុទ្រក្បែរទីក្រុងទេសចរណ៍ Alba Adriatica ខេត្ត Teramo ភាគកណ្តាលប្រទេសអ៊ីតាលី កាលពីថ្ងៃទី៣ ខែសីហា កន្លងមក ដែលបណ្តាលឱ្យភ្ញៀវទេសចររងរបួស៣នាក់ ក្នុងនោះម្នាក់រងរបួសធ្ងន់ ។

រីឯសារព័ត៌មានអ៊ីតាលីរាយការណ៍ថា អ្នករងរបួសធ្ងន់ម្នាក់ត្រូវបានបញ្ជូនតាមឧទ្ធម្ភាគចក្រទៅកាន់មន្ទីរនៅក្បែរនេះ ។ ភ្នាក់ងារការពារជនស៊ីវិលរបស់អ៊ីតាលីបានជូនដំណឹងអំពីស្ថានភាពអាកាសធាតុនៅតំបន់កណ្តាលប្រទេស ព្រមទាំងដាស់តឿនឱ្យពលរដ្ឋប្រយ័ត្នគ្រោះថ្នាក់ដែលបណ្តាលមកពីភ្លៀងធ្លាក់ខ្លាំង និងផ្គររន្ទះ ៕

ប្រទេសកាណាដា ៖ ចង្កឹះឈើប្រើប្រាស់រួចបានក្លាយជាសំរាមរហូតដល់ជាង១សែនចង្កឹះនៅទីក្រុង Vancouver ប្រទេសកាណាដា ទើបធ្វើឱ្យវិស្វករម្នាក់ដែលរស់នៅទីក្រុងមើលឃើញពីបញ្ហានេះ និងប្រមូលចង្កឹះឈើមកផលិតជាគ្រឿងសង្ហារិមប្រណីត ។ គំនិតថ្មីនេះបានក្លាយជាជម្រើសល្អមួយក្នុងការប្រើប្រាស់ធនធានដែលមិនបំផ្លាញបរិស្ថាន ។

វិស្វករអាល្លឺម៉ង់រស់នៅប្រទេសកាណាដា បានប្រមូលចង្កឹះឈើដែលប្រើប្រាស់រួចហើយមកផលិតជាគ្រឿងសង្ហារិមមិនប៉ះពាល់បរិស្ថាន និយាយថា ៖ «ក្នុងនាមខ្ញុំជាវិស្វករ ខ្ញុំចង់ពិសោធន៍ឱ្យមនុស្សគ្រប់គ្នាឃើញថា វត្ថុគ្មានតម្លៃដូចជាសំរាម ក៏អាចយកវាមកផលិតជាសម្ភារៈមានតម្លៃបានដែរ» ។

លោក Felix Bock ជាវិស្វករអាល្លឺម៉ង់រស់នៅទីក្រុង Vancouver មានគំនិតថ្មីមួយ គឺការប្រមូលចង្កឹះឈើប្រើប្រាស់រួចនៅតាមភោជនីយដ្ឋានផ្សេងៗក្នុងទីក្រុង ដែលស្មើនឹងជាង១សែនចង្កឹះក្នុង១ថ្ងៃ ដើម្បីផលិតជាគ្រឿងសង្ហារិមយ៉ាងស្រស់ស្អាត ។

ហេតុនេះ លោកក៏ចាប់ផ្តើមប្រមូលចង្កឹះឈើនៅតាមភោជនីយដ្ឋានផ្សេងៗជារៀងរាល់សប្តាហ៍ និងជំហានដំបូង លោកបានសាកល្បងយកវាមកផលិតជាទ្រនាប់កែវ និងជ្រុញ ។ នេះជាចំណុចចាប់ផ្តើមរបស់ ChopValue ជាក្រុមហ៊ុនផលិតគ្រឿងសង្ហារិមឈើប្រណីត ។

រយៈពេល៦០ឆ្នាំកន្លងមក តម្រូវការប្រើប្រាស់ចង្កឹះឈើបានកើនឡើងរហូតដល់៦០% នៅទូទាំងពិភពលោក ដែលធ្វើឱ្យការកាប់ដើមឈើកើនឡើង ស្របពេលតម្រូវការប្រើប្រាស់ចង្កឹះកើនឡើង ។ ដូច្នេះ ក្រុមហ៊ុនជាច្រើនបានជ្រើសរើសដើមឫស្សីមកផលិតជាចង្កឹះប្រើប្រាស់រួចបោះចោល ពីព្រោះវាជារុក្ខជាតិដុះលូតលាស់លឿន និងរឹងមាំ ប៉ុន្តែចង្កឹះឈើទាំងនេះ ក៏ក្លាយជាសំរាមពាសពេញពិភពលោក ។

លោក Felix Bock និយាយថា វត្ថុថ្មីដែលផលិតនេះមានភាពស្រស់ស្អាតដូចឈើនៅតំបន់ក្តៅ ហើយលោកសង្ឃឹមថា គ្រឿងសង្ហារិមប្រណីតផលិតពីចង្កឹះទាំងនេះ នឹងជួយលើកទឹកចិត្តដល់ជាងឈើផ្សេងៗឱ្យពិចារណាយកជម្រើសមាននិរន្តរភាព ចៀសវាងប្រើប្រាស់ធនធានធម្មជាតិព្រៃឈើមកផលិតជាគ្រឿងសង្ហារិមប៉ះពាល់បរិស្ថាន ។

ក្រុមហ៊ុន ChopValue បានយកសំរាមចង្ហឹះជាង១៥០លានចង្កឹះមកកែច្នៃឡើងវិញ ព្រមទាំងកាត់បន្ថយការបញ្ចេញកាបូនឌីអុកស៊ីតទៅលើបរិយាកាសយ៉ាងច្រើន ។ ជាមួយគ្នានេះ ក្រុមហ៊ុនក៏មានរោងចក្រផលិតគ្រឿងសង្ហារិមមិនប៉ះពាល់បរិស្ថាននៅប្រទេសចំនួន៩ ទៀតផង ។

វិស្វករអាល្លឺម៉ង់បញ្ជាក់ថា ៖ «ខ្ញុំសង្ឃឹមថា ថ្ងៃអនាគត ទីក្រុងទាំងអស់នឹងយកសំរាមមកកែច្នៃឡើងវិញ ជំនួសការដឹកជញ្ជូនសំរាមចេញពីទីក្រុង ពីព្រោះសំរាមមិនរលាយទៅណាទេ ។ ហេតុនេះ បើយើងអាចផលិតវត្ថុថ្មីមិនប៉ះពាល់បរិស្ថាន គឺយើងនឹងអាចផ្លាស់ប្តូរសំរាមឱ្យក្លាយជាធនធានថ្មី ដូចគ្នានឹងការផលិតទំនិញមានគុណភាពខ្ពស់» ៕