ដូចប្រិយមិត្តតាមដានវិស័យបវរកញ្ញាជ្រាបមកហើយថាភាពចម្រូងចម្រាសការប្រកួត Miss Grand International 2024 ដែលខាងកម្ពុជាធ្វើជាសហម្ចាស់ផ្ទះត្រូវបញ្ឈប់ពាក់កណ្តាលទីបង្កឱ្យផ្ទុះកក្រើកយ៉ាងខ្លាំង។ ជុំវិញបញ្ហានេះអ្នកគាំទ្របានពោលសោកស្តាយនិងអាណិតជាងគេទៅកាន់ ប៊ី សុធារី ដែលជាបេក្ខភាពតំណាងប្រទេសកម្ពុជា។ បើតាមដំណឹង ប៊ី សុធារី សម្រេចចិត្តមិនបន្តការប្រកួតនៅលើឆាកអន្តរជាតិក្នុងកម្មវិធីនេះឡើយ។
នេះជាឆ្នាំចុងក្រោយនៅក្នុងវិស័យបវរកញ្ញាសម្រាប់ ប៊ី សុធារី បន្ទាប់ពីការប្រកួតកម្មវិធីសម្រស់នានាដែលបោះជំហានចូល Grand ខណៈនាងបានត្រៀមខ្លួនរួចរាល់នៅក្នុងកម្មវិធីប្រកួតនេះហើយ ប៊ី សុធារី ពិតជាធ្វើបានល្អក្នុងការប្រកួតទាំងការរៀបចំខ្លួន ដើរ និងការប្រើប្រាស់ភាសាអង់គ្លេសផងដែរ។ ដើម្បីបន្ថែមទំនុកចិត្តខ្លួនឯង ប៊ី សុធារី ក៏បានកែកុនដើមទ្រូងទៀត ពោលនាងគឺបានត្រៀមខ្លួនយ៉ាងរួចរាល់ក្នុងការប្រកួតកម្មវិធីសម្រស់នេះ ស្របពេលដែលអ្នកគាំទ្រជាច្រើនជឿថា សុធារី នឹងអាចចូលដល់TOPណាមួយមិនខានក្នុងការប្រកួត។

ប៉ុន្តែជារឿងដ៏គួរឱ្យសោកស្តាយជាមួយនឹងការអាណិតទៅកាន់ ប៊ី សុធារី ព្រោះតែបញ្ហាផ្ទុះឡើងចម្រូងចម្រាសរវាងភាគីខាងកម្ពុជានិងថៃដែលចាប់ដៃគ្នាធ្វើជាម្ចាស់ផ្ទះក្នុងការប្រកួត Miss Grand International លើកដំបូងមានបញ្ហាមិនអាចដោះស្រាយគ្នាបានត្រូវបញ្ឈប់ពាក់កណ្តាលទី។ បើតាមដំណឹងដែលមានការចែករំលែកតៗគ្នា ប៊ី សុធារី បានសម្រេចចិត្តមិនបន្តក្នុងការប្រកួត Miss Grand International ឡើយ បើទោះបីនេះជាបញ្ហារវាងអ្នកគ្រប់គ្រងនិងអ្នកគ្រប់គ្រងក្តី។
ការសម្រេចចិត្តមិនបន្តការប្រកួតនេះដែរ អ្នកគាំទ្រក៏បានគោរពតាមការសម្រេចចិត្តរបស់ ប៊ី សុធារី ហើយក៏បានពោលអាណិតនាងដូចគ្នា។
គួរឱ្យដឹងថា ប៊ី សុធារី ជាបវរកញ្ញាម្នាក់ដែលប្រឡូកក្នុងវិស័យសម្រស់ធ្លាប់តំណាងកម្ពុជាប្រកួតនៅលើឆាកអន្តរជាតិមានដូចជាកម្មវិធី Miss Universe 2017 និង Miss Charm 2023 នៅវៀតណាម និងកម្មវិធីខាងលើនេះដែលត្រូវបញ្ឈប់ពាក់កណ្តាលទី៕