តារាចម្រៀង លីម តិចម៉េង ម្ចាស់ពាន Cambodian Idol រដូវកាលទី៤ បានចេញមុខបកស្រាយយ៉ាងក្តៅគគុកករណីមានការភាន់ច្រឡំដោយមានការយក Live របស់លោកជាច្រើនខែមកហើយមកលាយឡំជុំវិញរឿងតំបន់ត្រីកោណអភិវឌ្ឍន៍ កម្ពុជា ឡាវ វៀតណាម (CLV) ។ លោកថា លោកជាអ្នកចម្រៀងមិនមែនជាអ្នកនយោបាយនោះទេសូមកុំឱ្យមានការយល់ច្រឡំធ្វើឱ្យលោកមានបញ្ហា។ សម្តេចតេជោ ក៏បានកោតសរសើរដល់តារាចម្រៀងវ័យក្មេងរូបនេះដែលបានចេញបកស្រាយទាំងយប់ដើម្បីបញ្ជាក់ពីការយល់ច្រឡំលើបញ្ហានេះ។

នៅយប់ថ្ងៃទី១១ សីហា លីម តិចម៉េង បានចេញវីដេអូបកស្រាយជាង៦នាទីបន្ទាប់ពីមានគេយកវីដេអូចាស់លោកទៅផ្សារភ្ជាប់បញ្ហាផ្សេងៗជាពិសេសរឿងនយោបាយ។ តិចម៉េង បានបង្ហាញថាវីដេអូនោះគឺលោកបាន Live ជាយូរមកហើយហើយអត្ថន័យក្នុងវីដេអូគឺលោកចង់និយាយ៣សាច់រឿងទី១ទាក់ទងនឹងរឿងចម្រូងចម្រាសកីឡាប្រដាល់ កីឡាករណាដែលឈ្នះដណ្តើមខ្សែក្រវាត់តែងទទួលបានការគាំទ្រការស្វាគមន៍។ ចំណែកឯកីឡាករណាចាញ់តែងតែទទួលបានការជិះជាន់ដោយជនជាតិខ្មែរគ្នាឯង។ លីម តិចម៉េង បានបកស្រាយថារឿងទី២ទាក់ទងនឹងបញ្ហាដែលបានគិតថាប្រទេសថៃចម្លងប្រាសាទអង្គរវត្តពីយើងដោយមានបំណងនិយាយបែបក្នុងន័យស្ថាបនានិងរឿងទី៣និយាយទាក់ទងនឹងហ្វេនរបស់លោកផ្ទាល់ដោយឱ្យហ្វេនៗធ្វើអ្វីដែលល្អ ចេះស្រលាញ់គ្នាប្រសិនជាលោកត្រូវបានគេជេរឬហ្វេនៗឈ្លោះគ្នាឯង។

តារាចម្រៀងរូបនេះបានបន្ថែមដែរថា វីដេអូដែលលោកបានLive និយាយខាងលើនេះគឺបានលុបហើយប៉ុន្តែមានអ្នកមួយចំនួនបានថតយកកន្លែងហ្នឹងហើយបានផ្សារភ្ជាប់ទាក់ទងរឿងផ្សេងៗជាពិសេសគឺរឿងនយោបាយតែម្តងដែលវីដេអូនោះមានតាំងពីយូរមកហើយរហូតក្រោយមកផ្ទុះរឿងCLV ដែលធ្វើឱ្យមានការងឿងឆ្ងល់ច្រើនថាលោកនិយាយពាក់ព័ន្ធនឹងរឿងនេះឬយ៉ាងណា។ តិចម៉េង ថាលោកពុំបាននិយាយពាក់ព័ន្ធនឹងបញ្ហាCLVនោះទេមិនបាននិយាយទាក់ទងនឹងនយោបាយឡើយព្រោះលោកជាអ្នកចម្រៀងមិនមានជាអ្នកនយោបាយចេះដឹងអ្វីនោះទេហើយគោលបំណងរបស់លោកគឺចង់ឱ្យសាធារណជនទាំងក្នុងស្រុកក្រៅស្រុកទៅណាក៏ដោយដែលមានឈាមជាខ្មែរឱ្យចេះស្រលាញ់គ្នា កុំឱ្យមានការយល់ច្រឡំធ្វើឱ្យលោកមានបញ្ហា។

ជាមួយនឹងការបកស្រាយនេះដែរសម្តេចតេជោ ក៏បានលើកឡើងនៅលើបណ្តាញសង្គមដែរថា «សូមស្តាប់ការបកស្រាយរបស់តារាចម្រៀងល្បីឈ្មោះ លីម តិចម៉េងដែលពួកជ្រុលនិយមបំពុលសង្គមលួចយកវីដេអូដែលលុបចោលរាប់ខែមកហើយមកបង្ហោះសាជាថ្មីដើម្បីផ្សាភ្ជាប់ជាមួយនយោបាយរឿងCLVក្នុងគោលដៅបង្កចលាចលនិងបំផ្លាញតារាចម្រៀងដែលគួរឱ្យស្រឡាញ់រូបនេះ។ ពុកសូមកោតសរសើរនិងអរគុណកូនប្រុសដែលបានចេញមកបកស្រាយទាំងយប់ដើម្បីរួមចំណែករក្សាសន្តិភាពស្ថេរភាពនយោបាយ បញ្ចប់ការ យល់ច្រឡំនិងធ្វើឱ្យក្រុមនិយមជ្រុលបរាជ័យលើរឿងមួយនេះ។ ម្នាលក្រុមនិយមជ្រុលតើពួកអ្នកចេះត្រឹមកុហកបោកប្រាស់ហ្នឹងឬ?គួររកវិធីសាស្ត្រថ្លៃថ្នូរដើម្បីជួយដល់ជាតិ»៕

តារាចម្រៀងក្នុងទ្រនំសាន់ដេ លោក យឿន សូត្រអនុស្សាវរីយ៍ បានស្រក់ទឹកភ្នែក បង្ហោះនៅលើបណ្តាញសង្គមជាច្រើនដងដង្ហើយហៅប្រពន្ធកូនត្រឡប់មកវិញដែលធ្វើឱ្យអ្នកគាំទ្រមានការចាប់អារម្មណ៍យ៉ាងខ្លាំង។ ជុំវិញមូលហេតុដែលប្រពន្ធលោកចាកចោលលោកនេះ យឿន សូត្រអនុស្សាវរីយ៍ មិនបានបញ្ជាក់ហេតុផលឡើយ ខណៈសាធារណជនមួយផ្នែកធំទើបតែដឹងថាលោកមានប្រពន្ធមានកូន ដោយសារកន្លងមកលោកហាក់មិនបានបង្ហាញឡើយថែមទាំងមានរឿងអាស្រូវជាមួយនារីម្នាក់ធ្វើការនៅប្រទេសកូរ៉េទៀត។

ថ្មីៗនេះ យឿន សូត្រអនុស្សាវរីយ៍ ម្ចាស់បទ «ទីងមោង» និងប្រភេទបទមនោសញ្ចេតនាជាច្រើនទៀតដែលបានចេញនៅក្នុងផលិតកម្មសាន់ដេ បានចេញវីដេអូស្រក់ទឹកភ្នែកនៅលើបណ្តាញសង្គទិកតុក និងបង្ហោះរូបនារីម្នាក់អះអាងថាជាប្រពន្ធនៅលើបណ្តាញសង្គមដោយចង់ឱ្យនាងត្រឡប់មករកខ្លួនវិញ។ តាមរយៈខ្លឹមសារដែលតារាចម្រៀងរូបនេះបានបង្ហោះនៅលើបណ្តាញសង្គមទិកតុកអមដោយទឹកភ្នែកថា « អូននៅទីណាអូនប្តីនឹកអូនណាស់»។

ងាកទៅបណ្តាញសង្គមហ្វេកប៊ុកវិញ តារាចម្រៀងរូបនេះបានបង្ហោះជាបន្តបន្ទាប់ថា «បងខុសហើយអូនអូនមកវិញមក, បងខំរកអូនណាស់ ប្រពន្ធសំលាញ់បងនឹកអូនណាស់, ត្រូវគ្នាវិញទៅប្រពន្ធសំលាញ់, ប្តីដឹងខុសហើយអូន»។ ការបង្ហោះរបស់តារាចម្រៀងរូបនេះបានធ្វើឱ្យអ្នកចំនួនបានលើកទឹកចិត្ត ចំណែកឯអ្នកខ្លះទៀតបង្ហាញការមិនពេញចិត្តដែលមានការចែកចាយរឿងនេះ ខណៈមួយចំនួនទៀតទើបតែបានដឹងថាលោកមានប្រពន្ធកូនហើយ។

ភាពងឿងឆ្ងល់របស់សាធារណជនទៅលើរឿងលើឯកជនភាពរបស់ យឿន សូត្រអនុស្សាវរីយ៍ ពុំធ្លាប់បានដឹងដំណឹងរៀបការឡើយថែមទាំងមានកូនម្នាក់ហើយ អ្វីដែលមហាជនបានដឹងទូទៅចំពោះតារាចម្រៀងរូបនេះក្នុងរឿងអាស្រូវកន្លងមកគឺជំពាកលុយមិនសងគេនិងរឿងអាស្រូវកាលពីមួយថ្ងៃមុន ត្រូវនឹងខែសីហា ឆ្នាំ២០២៣ ល្បីខ្ទរខ្ទារពេញប្រទេសគឺមានសម្ព័ន្ធភាពស៊ីជម្រៅជាមួយនារីម្នាក់ធ្វើការនៅប្រទេសកូរ៉េរហូតគម្រាមប្តឹងប្តល់គ្នាទៀត។ ទោះយ៉ាងណា ក្រោយពីមានការគំរាមថាចែកចាយរូបភាពស្រាប់តែ យឿន សូត្រអនុស្សាវរីយ៍ចេញមុខសូមទោសដើម្បីបញ្ចប់រឿងតែម្តង៕

អ្នកនាង នាង សុវ៉ាតនា ហៅឌីជេ ណាណា បានកោតសរសើរទេពកោសល្យតន្រ្តីនិងសមត្ថភាពរបស់ តារារ៉េប វណ្ណដា ប៉ុន្តែបានបង្ហាញការមិនចូលចិត្តលើទៅលើរូបភាពបង្ហាញបារីនិងគ្រឿងស្រវឹង។ ក្នុងនោះពិធីការិនីរូបនេះចង់ឱ្យអ្នកមានឥទ្ធិពលទាំងឡាយព្យាយាមបង្ហាញគំរូល្អៗដល់ក្មេងជំនាន់ក្រោយ។

ការបង្ហាញខ្លួនរបស់ វណ្ណដា ក្នុងការសម្តែងបទ «Time To Rise» នៅឯពិធីបិទកីឡាអូឡាំពិកប៉ារីសឆ្នាំ២០២៤ បានធ្វើឱ្យមានការចាប់អារម្មណ៍ភ្លូកទឹកភ្លូកដីមិនមែនតែប្រជាជនកម្ពុជាប៉ុណ្ណោះទេ។ កាសែតបារាំង សារព័ត៌មានអន្តរជាតិនានា រួមទាំងប្រទេសជិតខាងដែលឧស្សាហ៍ចុះផ្សាយភាពអវិជ្ជមានរបស់កម្ពុជាក៏បានបង្ហាញអារម្មណ៍មោទនភាពដូចគ្នាដែលតារាចម្រៀងរូបនេះមានវត្តមានក្នុងការសម្តែងព្រឹត្តិការណ៍កីឡាដ៏អស្ចារ្យនិងធំបំផុតលើពិភពលោក។

មិនត្រឹមតែហ្វេនៗប៉ុណ្ណោះទេ អ្នកក្នុងចង្កោមសិល្បៈជាច្រើនរូបក៏បានបង្ហាញអារម្មណ៍មានមោទភាពចំពោះតារារ៉េប វណ្ណដា ដូចគ្នាដែលសាងភាពលេចធ្លាធ្វើឱ្យជាតិសាសន៍ដទៃកាន់តែស្គាល់ពីប្រទេសកម្ពុជាបានកាន់តែច្រើន។ ជាមួយគ្នានេះឌីជេ ណាណា ដែលជាពិធីការិនីនិងជាអ្នកនិយាយលើកទឹកចិត្តតាមបណ្តាញសង្គមដ៏មានប្រជាប្រិយភាពក៏បានសរសើរទៅលើសមត្ថភាពរបស់ វណ្ណដា ដូចគ្នាហើយអ្នកនាងក៏ហ៊ាននិយាយត្រង់ៗចំពោះរូបភាពដែលមិនពេញចិត្តសកម្មភាពចំនួនពីររបស់ វណ្ណដា។

ថ្ងៃទី១២ សីហា ឌីជេ ណាណា បានចែករំលែកការសម្តែងរបស់ វណ្ណដា ក្នុងព្រឹត្តិការណ៍បិទកីឡាអូឡាំពិកថា «មិនចូលចិត្តតែមួយទេគឺការបង្ហាញបារី និងគ្រឿងស្រវឹងក្នុងMVនានាកន្លងមក តែក៏មិនអាចបដិសេធទេពកោសល្យ និងសមត្ថភាពរបស់គាត់ដែរ ហើយការសម្តែងមួយនេះ ពិតជាគួរឱ្យស្ញប់ស្ញែងមែន។ សង្ឃឹមថាមនុស្សមានឥទ្ធិពលទាំងឡាយ នឹងព្យាយាមបង្ហាញគំរូល្អៗដល់ក្មេងៗជំនាន់ក្រោយ»។

ការលើកឡើងរបស់ ឌីជេ ណាណា បានក្លាយជាប្រធានបទជជែកវែកញែកយ៉ាងក្តៅគគុកមួយដោយអ្នកខ្លះក៏បង្ហាញការយល់ស្របនៅការលើកឡើងនេះ ខណៈអ្នកខ្លះបានបកទៅកាន់ ឌីជេ ណាណា វិញថា រូបនាងក៏មានចំណុចខ្លះដែលគេមិនពេញចិត្តដូចគ្នា។

គួរបញ្ជាក់ថា នៅព្រឹកថ្ងៃទី១២ សីហា ម៉ោងនៅកម្ពុជាដែលត្រូវនឹងយប់ថ្ងៃទី១១ សីហា នៅទីក្រុងប៉ារីស មហាជនមានការភ្ញាក់ផ្អើលអមដោយអារម្មណ៍មោទនភាពយ៉ាងខ្លាំងចំពោះតារារ៉េប ម៉ាន់ វណ្ណដា ដែលក្លាយជាសិល្បកររ៉េបកម្ពុជាដំបូងបានចូលរួមសម្តែងក្នុងពិធីបិទកីឡាអូឡាំពិក ដែលជាព្រឹត្តិការណ៍កីឡាធំបំផុតលើពិភពលោក។ ប្រវត្តិសាស្រ្តថ្មីនេះនាំមកនូវមោទនភាពពន់ពេកក្នុងការបង្ហាញវិស័យតន្រ្តីកម្ពុជាទៅកាន់ពិភពលោក ខណៈ វណ្ណដា បានស្លៀកសំលៀកបំពាក់បែបខ្មែរយ៉ាងស្រស់សង្ហានៅលើឆាកដ៏អស្ចារ្យនេះ៕

ពិធីការិនី ពេជ្រ ច័ន្ទធីតា បានធ្វើឱ្យទស្សនិកជនមានការចាប់អារម្មណ៍ជាថ្មីបន្ទាប់ពី Cover បទកំពុងល្បី «ថែការចងចាំ» របស់ ពេជ្រ សូលីកា។ ទស្សនិកជនបានសរសើរថានាងច្រៀងពីរោះពហុជំនាញទាំងការធ្វើជាពិធីការិនីក៏លេចធ្លោចំណែកឯការច្រៀងវិញក៏បាន។ មែនទែនទៅមុននឹងជោគជ័យអាជីពពិធីការិនី ពេជ្រ ច័ន្ទធីតា គឺធ្លាប់ចូលប្រកួតកម្មវិធីCambodian Idol រដូវកាលទី១ ថែមទាំងធ្លាប់មានបទចម្រៀងផ្ទាល់ខ្លួនផងដែរ។

«ថែការចងចាំ» ជាបទមនោសញ្ចេតនាឈឺចាប់ នៅតែព្រួយបារម្ភសុខទុក្ខរបស់គេ និងចងចាំតែម្នាក់ឯង ហើយគ្មានអ្នកផ្សេងមកជំនួសស្នេហាមួយនេះបានដែលជាសំនៀងដើមរបស់តារាចម្រៀង ពេជ្រ សូលីកា បានទម្លាក់កាលពីថ្ងៃទី២៦ ខែកក្កដា។ មួយបទនេះកំពុងតែទទួលបានការគាំទ្រពីទស្សនិកជនមានការស្តាប់ជាង១លានដងហើយ ខណៈនៅបន្តជាប់នៅលើឆាណែលយូធូបTrending លេខ១ មកទល់ថ្ងៃទី១០ ខែសីហា លើឆាណែលរបស់ ពេជ្រ សូលីកា។

ថ្មីៗនេះទៀតសោតពិធីការិនី ពេជ្រ ច័ន្ទធីតា បានធ្វើឱ្យមានការចាប់អារម្មណ៍ពីសំណាកហ្វេនៗក្រោយពី Cover ខ្លីទៅលើបទចម្រៀងមួយនេះ។ ទឹកដមសំឡេងរបស់ ធីតា ត្រូវបានអ្នកលេងបណ្តាញសង្គមជាច្រើនសរសើរថាពីរោះរួមជាមួយនឹងសរសើរថានាងពហុជំនាញពេញខ្លួន។
ទស្សនិកជនមួយចំនួនដឹងរួចមកហើយ ហើយក៏ប្រហែលជាអ្នកមួយចំនួនអាចមិនទាន់ដឹងមុននឹងបោះជំហានទទួលភាពជោគជ័យលើអាជីពពិធិការិនី ពេជ្រ ច័ន្ទធីតា គឺជាអតីតបេក្ខភាពកម្មវិធី Cambodian Idol រដូវកាលទី១។ លើសពីនេះ ពេជ្រ ច័ន្ទធីតា ក៏មានបទចម្រៀងផ្ទាល់ខ្លួនផងដែរមានចំណងជើងថា «សេ្នហ៍ខ្ញុំនៅទីណា?»។

ក្រៅពីការងារសិល្បៈមានភាពរលូនលេចមុខតាមកម្មវិធីជាច្រើនងាកទៅកាន់ជីវិតឯកជនវិញ ពេជ្រ ច័ន្ទធីតា ក៏បានគូដណ្តឹងផងដែររង់ចាំតែថ្ងៃចូលរោងជ័យប៉ុណ្ណោះ៕

កាលពីថ្ងៃទី ១១ ខែសីហានេះ យោងតាមប្រភពសារព័ត៌មានរបស់ប្រទេសបារាំង Le Parisien បានចុះផ្សាយអំពីតារារ៉េបវណ្ណដា ក្រោមចំណងជើងថា«ពិធីបិទកីឡាអូឡាំពិកឆ្នាំ២០២៤ តើតារារ៉េបសញ្ជាតិខ្មែរ លោកវណ្ណដា គឺជានរណា?»

យោងតាមខ្លឹមសារចុះផ្សាយរបស់កាសែតបារាំង Le Parisien បានរៀបរាប់ថា៖ «កាលពីថ្ងៃទី១១ ខែសីហានេះ វណ្ណដាបានចូលរួមសម្តែងក្នុងពិធីបិទការប្រកួតកីឡាអូឡាំពិកឆ្នាំ២០២៤ នៅឯទីក្រុងបារីស ប្រទេសបារាំង។ នៅពេលបង្ហាញខ្លួននៅលើឆាក តារាចម្រៀងរ៉េបកម្ពុជារូបនេះ បានក្លាយទៅជាប្រធានបទគួរជាទីចាប់អារម្មណ៍ក្នុងចំណោមពលរដ្ឋបារាំងភាគច្រើន»។

«វណ្ណដា គឺជាតារាចម្រៀងរ៉េបសញ្ជាតិខ្មែរ អាយុ ២៧ ឆ្នាំ ដែលទំទុកច្រៀងរបស់គាត់គឺជាការលាយបញ្ចូលគ្នារវាងសំនៀងជាភាសាខ្មែរនិងអង់គ្លេស។ វណ្ណដា ត្រូវបានគេស្គាល់ថាជាតារារ៉េបដ៏ល្បីល្បាញប្រចាំតំបន់អាស៊ី មានអ្នក Subscribe ដល់ទៅជាង ៤ លាននាក់នៅលើយូធូបផ្លូវការ តែទទួលបាននូវការចូលទស្សនាច្រើនជាងមួយពាន់លានដង ជាហេតុនាំឲ្យលោកបានក្លាយទៅជាសិល្បករមួយរូបដែលគេទទួលស្គាល់លំដាប់ថ្នាក់អន្តរជាតិ»។

«កាលពីមិថុនា ឆ្នាំ២០២៤ លោកវណ្ណដា ជាសិល្បករខ្មែរដំបូង ដែលមានឱកាសបានចូលរួមសម្តែងនៅឯមហោស្រពតន្ត្រី Sabaidee Fest សហរដ្ឋអាមេរិក។ វណ្ណដា បានចាប់ផ្តើមនិពន្ធបទចម្រៀងដំបូងក្នុងឆ្នាំ ២០០៩ ហើយក៏បានសាងកេរ្តិ៍ឈ្មោះនៅលើវិថីសិល្បៈជាបន្តបន្ទាប់ ចាប់តាំងពីពាក់កណ្តាលឆ្នាំ ២០១០មក»។

កាសែតបារាំង Le Parisien បានលើកឡើងទៀតថា «នៅឆ្នាំ ២០២០ វណ្ណដាបានបោះជំហានទៅមុខកាន់តែខ្លាំងនៅលើវិថីសិល្បៈ ពិសេសគឺការបញ្ចេញបទ “Time to Rise” កាលពី ៣ ឆ្នាំមុន ដែលមានអ្នកចូលទស្សនារហូតដល់ទៅ ១២៣ លានដងនៅលើ YouTube ។ គិតមកទល់ពេលនេះ ក្នុងចំណោមបទចម្រៀងខ្មែរទាំងអស់ មានតែបទរបស់វណ្ណដាតែមួយគត់ ដែលមានអ្នកចូលទស្សនាលើសពី ១០០ លានដង។ តាមរយៈបទ “Time to Rise” តារាចម្រៀងរូបនេះ បានរួមបញ្ចូលគ្នារវាងតន្ត្រីបុរាណ និងការរ៉េបសម័យទំនើប អមដោយឧបករណ៍បុរាណដូចជា ចាប៉ីដងវែង ដែលនេះគឺជាចំណុចខ្លាំងរបស់លោកផងដែរ»៕