ដូចជាពាក្យគេនិយាយថា ពាក្យសម្តីអាចនិយាយកុហកបានប៉ុន្តែកែវភ្នែកមិនអាចកុហកបាននោះទេ។ តួយ៉ាងដូចជាតារាចម្រៀង ជី ដេវីត បានឱបលាប្អូនស្រីដោយការអាល័យនិងក្តុកក្តួលជាទីបំផុតប៉ុន្តែធ្វើខ្លួនដូចធម្មតាតែទឹកមុខវិញមិនដូច្នេះទេក្នុងគ្រាដែលប្អូនស្រីលោកទៅបន្តការសិក្សាថ្នាក់អនុបណ្ឌិតនៅសហរដ្ឋអាម៉េរិក។ យ៉ាងណាលោកក៏បាននិយាយដែរថាទោះទឹកភ្នែកលោកស្រក់តែជាទឹកភ្នែកដែលមានមោទនភាពជាមួយក្តីរំពឹងថាពេលប្អូនស្រីតែម្នាក់គត់របស់លោកមានឈ្មោះថា ងួន ចាន់ដារីយ៉ា ត្រលប់មកវិញនឹងជួយមាតុភូមិកំណើត។

កាលពីខែកក្កដា កន្លងមកនេះ តារាចម្រៀង ជី ដេវីត បានសម្តែងមោទនភាពទៅកាន់ប្អូនស្រីសំណព្វចិត្ត នឹងទៅបន្តការសិក្សានៅសហរដ្ឋអាម៉េរិកនៅសាកលវិទ្យាល័យ ហាវៃ នៅម៉ាណូអា ដែលកញ្ញាជាអតីតនិស្សិតមហាវិទ្យាល័យបុរាណ្យវិទ្យាជំនាន់ទី២៩ ដែលជំរុញឱ្យការសម្រេចចិត្តរបស់លោកកាលពី១៣ឆ្នាំមុនជាការសម្រេចចិត្តដ៏អស្ចារ្យបំផុតក្នុងជីវិតលោក។ ធ្មេចបើកៗពេលវេលាដែលប្អូនស្រីលោកដែលបញ្ចាប់ថ្នាក់បរិញ្ញាបត្រនៅមហាវិទ្យាល័យបុរាណវិទ្យា ឯកទេស បុរាណវិទ្យា នៃសាកលវិទ្យាល័យភូមិន្ទវិចិត្រសិល្បៈត្រូវចាកចេញពីមាតុភូមិកំណើតហើយ។

នៅយប់ថ្ងៃទី៧ សីហា ជី ដេវីត ទេព បូព្រឹក្ស និងក្រុមគ្រួសារបានមកជូនដំណើរ ងួន ចាន់ដារីយ៉ា ក្នុងការចាកចេញទៅបន្តការសិក្សានៅសហរដ្ឋអាម៉េរិក។ ជី ដេវីត បានបង្ហោះវីដេអូខ្លីឱបប្អូនស្រីដោយក្តីអាល័យពេញដោយកែវភ្នែកនឹករលឹក ព្រួយបារម្ភនិងរូបភាពពីរសន្លឹកអមដោយចំណងជើងថា «ខ្ញុំរីករាយចំពោះដំណើរផ្សងព្រេងជីវិតបងប្អូនយើងទាំងពីរដូចរឿងប្រលោមលោក យ៉ាងហោចណាស់អ្នកបានធ្វើឱ្យខ្ញុំស្រក់ទឹកភ្នែកដោយមោទនភាពអរគុណសម្រាប់ពាក្យសន្យា ខ្ញុំសូមជូនពរឱ្យដំណើរផ្សងព្រេងលើដែនដីថ្មីរបស់អ្នកប្រកបដោយជោគជ័យ។ ដុះខាត់ចំណេញវិជ្ជារបស់អ្នកហើយវិលត្រលប់មកជួយមាតុភូមិយើងវិញ»។

ចិត្តជាបងប្រុសម្នាក់ មិននិយាយស្តីច្រើនឬបង្ហាញកាយវិការញឹកញាប់ពីទំហំក្តីស្រលាញ់ដាក់ប្អូនស្រី តែអ្នកគាំទ្រដឹងថា ជី ដេវីត ពិតជាស្រលាញ់ប្អូនស្រីខ្លាំងចំណែកឯកែវភ្នែកលោកគឺពោរពេញដោយការស្រលាញ់ អាឡោះអាល័យជាទីបំផុតនិងក្តីបារម្ភចំពោះប្អូនស្រីក្នុងការចាកចេញទៅឆ្ងាយរាប់ម៉ឺនយោជន៍នេះ៕

កូឡា រចនា អតីតបេក្ខភាព The Voice Cambodia រដូវកាលទី៣កូនក្រុមរបស់លោក ណុប បាយ៉ារិទ្ធ ត្រូវបានទស្សនិកជនសរសើរពីភាពតស៊ូរបស់នាងក្នុងការប្រកួតប្រជែងវិស័យចម្រៀង។ ថ្មីៗនេះនៅលើបណ្តាញសង្គមទិកតុកកំពុងផ្ទុះការចាប់អារម្មណ៍ឡើងវិញនូវបទចម្រៀង«ហៅសុបិន»ដែលជាសំនៀងដើមរបស់តារាចម្រៀង ឱក សុគន្ធកញ្ញា បន្ទាប់ពី កូឡា រចនា បានយកបទនេះមក Cover ។

គេចាំបានថា អំឡុងពេល កូឡា រចនា វិលមកប្រកួតក្នុងកម្មវិធីលំដាប់ថ្នាក់ពិភពលោក The Voice Cambodia រដូវកាលទី៣ កាលពីមួយឆ្នាំមុន គ្រូបង្វឹកទាំងបួនគឺចាំនាងច្បាស់តែម្តង។ ការចងចាំនេះដោយសារតែ កូឡា រចនា ជាបេក្ខនារីមួយរូបតស៊ូខ្លាំងនៅលើវិថីសិល្បៈមួយនេះបើទោះបីជាបរាជ័យជាច្រើនដងក្តី បន្ទាប់ពីធ្លាប់ចូលរួមប្រកួតកម្មវិធី Cambodian Idol តាំងពីរដូវកាលទី១ និងកម្មវិធី Beat The Best ។ ភាពតស៊ូមិនបោះបង់នេះកាន់តែដុសខាត់សមត្ថភាពរបស់ រចនា កាន់តែខ្លាំងក្នុងការប្រកួត The Voice រហូតកៅអីទាំង៤បង្វិលទៅនាងតែម្តងនិងបានក្លាយជាកូនក្រុមរបស់លោក ណុប បាយ៉ារិទ្ធ។

ដ្បិតការប្រកួតនាកម្មវិធីចុងក្រោយនេះ កូឡា រចនា ពុំទទួលបានជោគជ័យប៉ុន្តែសមត្ថភាពរបស់នាងក៏ត្រូវមហាជនមើលឃើញពីការខិតខំប្រឹងប្រែងរបស់នាង និងបានលេចមុខតាមកម្មវិធីប្រគំតន្រ្តីមួយចំនួនផងដែរ។

ថ្មីៗនេះទៀតសោត កូឡា រចនា កំពុងមានសន្ទុះគាំទ្រខ្លាំងពីអ្នកលេងបណ្តាញសង្គមបន្ទាប់ពី Cover បទ «ហៅសុបិន» របស់ អ្នកនាង ឱក សុគន្ធកញ្ញា។ បទនេះបានក្លាយជានិន្នាការនៅលើបណ្តាញសង្គមមានអ្នកចូលលេងដាក់បទចម្រៀងនេះ រាប់ម៉ឺននាក់ និងធ្វើឱ្យបទចម្រៀងមួយបទនេះផ្ទុះកក្រើកឡើងវិញម្តងទៀត។

មិនត្រឹមតែទទួលបានការគាំទ្រមានការលេងច្រើននៅលើបណ្តាញសង្គមទិកតុកប៉ុណ្ណោះទេមួយបទនេះដែល កូឡា រចនា Cover ក៏ទទួលបានការគាំទ្រនៅលើបណ្តាញសង្គមយូធូបដូចគ្នាត្រឹមតែរយៈពេល១០ថ្ងៃមានការស្តាប់រាប់ម៉ឺនដងជាមួយនឹងមតិសរសើរថានាងច្រៀងពីរោះ។ បច្ចុប្បន្ន រចនា គឺជាអ្នកចម្រៀងនៅផាប់មួយកន្លែងឈ្មោះថា បាត់បង ដែលមានទីតាំងនៅរាជធានីភ្នំពេញ៕

តារាសម្តែង Faye Malisorn តួស្រីដ៏ល្បីល្បាញក្នុងប្រភេទរឿង GL ម្តងហើយម្តងទៀតបញ្ជាក់ថាជាហ្វេនរបស់ វណ្ណដា តារាចម្រៀងរ៉េបខ្មែរមួយរូប។ ឃើញការស្រលាញ់របស់ Faye មកកាន់ វណ្ណដា បែបនេះអ្នកគាំទ្រពិតជារំភើបចិត្តខ្លាំងខណៈកន្លងមកនាងបានសរសើរបទ វណ្ណដា ពេញៗមាត់និងនៅតែបន្តស្តាប់របស់តារារ៉េបរូបនេះជាញឹកញាប់។

ប្រិយមិត្តទស្សនិកជនមួយចំនួនធំជ្រាបមកហើយថាកន្លងមកនេះតារាសម្តែង Faye Malisorn តារាសម្តែងកំពុងល្បីក្នុងរឿងប្រភេទ GL និងជា Miss Grand Thailand 2016 បានធ្វើឱ្យអ្នកគាំទ្រផ្ទុះការចាប់អារម្មណ៍យ៉ាងខ្លាំងកក្រើកពេញបណ្តាញសង្គម។ ការចាប់អារម្មណ៍នេះបន្ទាប់ពីឃើញវីដេអូមួយដែលតារាស្រីរូបនេះនិយាយដោយផ្ទាល់មាត់និងសរសើរបទចម្រៀង Time To Rise របស់ វណ្ណដា ជាមួយព្រឹទ្ធាចារ្យ គង់ណៃ ថាពិតជាអស្ចារ្យខ្លាំង។

នាថ្មីៗនេះទៀតសោត ពោលគឺនៅល្ងាចថ្ងៃទី៧ សីហា តារាសម្តែង Faye បានបង្ហោះវីដេអូ Story នៅលើបណ្តាញសង្គម Instagram កំពុងតែរីករាយថ្ងៃឈប់សម្រាកស្ថិតនៅក្នុងរថយន្តដែលកំពុងតែជក់ចិត្តដិតអារម្មណ៍ស្តាប់បទចម្រៀងរបស់ វណ្ណដា មានចំណងជើងថា «សង្ក្រាន្តស្គាល់ស្នេហ៍»។ ក្នុងវីដេអូខ្លីនេះគេបានឃើញតារាស្រីល្បីក្នុងរឿងប្រភេទ GL រូបនេះកំពុងតែអង្រួនខ្លួនតាមចង្វាក់ភ្លេងនិងរីករាយយ៉ាងខ្លាំងជាមួយបទចម្រៀង វណ្ណដា ដែលបានចេញកាលពីចូលឆ្នាំខ្មែរមកនេះ។

នេះមិនមែនជាលើកទី១នោះទេសម្រាប់តារាសម្តែង Faye ដែលបង្ហាញការចូលចិត្តស្តាប់របស់ វណ្ណដា បង្ហាញទៅកាន់អ្នកគាំទ្ររបស់ខ្លួនដែលនេះអាចបញ្ជាក់ថា តារាសម្តែងស្រីរូបនេះពិតជាហ្វេនម្នាក់របស់ វណ្ណដា ពិតៗមិនមែនលំៗនោះទេមានការស្តាប់ជាហូរហែងាចនឹងស្គាល់បទចម្រៀងរបស់ វណ្ណដា ច្រើនមិនខាន។ ឃើញសកម្មភាពនេះអ្នកគាំទ្រក៏បានបង្ហាញការពេញចិត្តយ៉ាងខ្លាំងព្រោះពួកគេក៏ជាអ្នកគាំទ្រ Faye ហើយ Faye ក៏ជាអ្នកគាំទ្រ វណ្ណដា មកវិញដូចគ្នា។

គេចាំបានថាកាលពីកន្លងមក គ្រាន់តែចេញភ្លេងនិងសំឡេងរបស់លោកតា គង់ ណៃ ភ្លាម តារាស្រីរូបនេះដឹងថាជាបទចម្រៀងរបស់កម្ពុជាតែម្តងរួមជាការសរសើរថា អស្ចារ្យ ឡូយខ្លាំងណាស់ និងបាននិយាយទៀតថាបទ Time To Rise បាននិយាយពីវប្បធម៌របស់ប្រទេសកម្ពុជា។

គួរបញ្ជាក់ថាតារាសម្តែង Faye Malisorn បច្ចុប្បន្នមានវ័យ៣១ឆ្នាំបានសាងប្រជាប្រិយភាពទាំងក្នុងស្រុកនិងក្រៅស្រុកបន្ទាប់ពីសម្តែងរឿងប្រភេទស្រីស្រលាញ់ស្រី (GL) ខណៈនាងក៏ជា Miss Grand Thailand ឆ្នាំ២០១៦ និងលំដាប់រងទី២ Miss Grand International ផងដែរ៕

ប្រិយមិត្តអ្នកគាំទ្រមានការចាប់អារម្មណ៍យ៉ាងខ្លាំងបន្ទាប់ពីឃើញតារាស្រី មាលា កូនខ្មែរកាត់បារាំងដែលកំពុងឡើងកូដ ថតរូបយ៉ាងស្និទ្ធស្នាលជាមួយបវរកញ្ញា ពេជ្រ វត្តីសារ៉ាវឌ្ឍី ថែមទាំងផ្តល់ស្នាមថើបមាត់ឱ្យគ្នាទៀត។ ឃើញស្រីស្អាតប៉ះស្រីស្អាតនិងថើបគ្នាបែបនេះអ្នកគាំទ្រមើលអ្នកទាំងពីរសឹងតែភ្លេចដកដង្ហើម ខណៈអ្នកខ្លះក៏មានបំណងការចង់ឱ្យពួកគេសម្តែងរឿងប្រភេទ GL ផងដែរ។

ជឿជាក់ថាសម្រាប់អ្នកតាមដានវិស័យសិល្បៈជ្រាបមកហើយថា តារាម៉ូដែល មាលា ដែលមានម្តាយជាជនជាតិខ្មែរនិងឪពុកជាជនជាតិបារាំងកំពុងឡើងកូដយ៉ាងខ្លាំងក្នុងវិស័យសិល្បៈនៅប្រទេសកម្ពុជា។ ត្រឹមតែរយៈពេលខ្លីប៉ុណ្ណោះ មាលា បានក្តោបឱកាសទីផ្សារបានយ៉ាងច្រើនសន្ធឹកសន្ធាប់ទាំងខ្សែភាពយន្តខ្នាតធំ ស្ប៉តពាណិជ្ជកម្ម សម្តែងក្នុង MV រួមទាំងការងារសិល្បៈជាច្រើនទៀត។ មិនត្រឹមតែមានទីផ្សារសិល្បៈប៉ុណ្ណោះទេ មាលា ក៏មានជំនួញផ្ទាល់ខ្លួនលក់ផលិតផលសម្រាប់មិត្តនារីៗទៀតផង។

អ្វីដែលកាន់តែចាប់អារម្មណ៍កន្លងមកនេះ មាលា បានធ្វើឱ្យអ្នកគាំទ្រមានការចាប់អារម្មណ៍នៅពេលថតរូបស៊ិចស៊ីជាមួយបវរកញ្ញា កុយ អេនណា លំដាប់រងទី១ Miss Grand Cambodia 2023 ផ្ទុះពេញបណ្តាញសង្គម។ នាពេលថ្មីៗនេះទៀតសោត អ្នកគាំទ្រក៏បានឃើញ បវរកញ្ញា ពេជ្រ វត្តីសារ៉ាវឌ្ឍី និងមាលា បានថតរូបជាមួយគ្នាស្រស់ស្អាតទាំងទ្វេតែម្តង។

តាមរយៈវីដេអូខ្លីដែលបានចែករំលែកនៅលើបណ្តាញសង្គមនៅយប់ថ្ងៃទី៧ ខែសីហា ស្រីស្អាត មាលា និង ពេជ្រ វត្តីសារ៉ាវឌ្ឍី Miss Grand Cambodia 2022 បានស្ថិតនៅក្នុងសំលៀកបំពាក់ពណ៌សទាំងទ្វេប្រៀបដូចជាកូនក្រមុំ។ អ្នកទាំងពីរបានបញ្ចេញសកម្មភាពស្និទ្ធស្នាលទៅតាម Concept របស់ពួកគេអបជាមួយនឹងផ្កាកូលាបពណ៌សថែមទៀតកាន់តែដូចជាគូស្នេហ៍ពិតៗ។ អ្វីដែលធ្វើឱ្យអ្នកគាំទ្រមើលហើយញញឹមតែម្នាក់ឯងសឹងតែភ្លេចដកដង្ហើមនោះគឺគេបានឃើញ ពេជ្រ វត្តីសារ៉ាវឌ្ឍី ហក់ទៅថើបមាត់ មាលា តែម្តង។

ឃើញវីដេអូស្រីស្អាតប៉ះស្រីស្អាតប្រៀបដូចជាគូស្នេហ៍កំពុងប្រលោមស្នេហ៍គ្នានេះបានធ្វើឱ្យអ្នកគាំទ្រមានការរំភើបចិត្តទៅជាមួយ។ អ្នកលេងបណ្តាញសង្គមបានបង្ហាញចំណាប់អារម្មណ៍ថា ស្វីតដល់ឋានព្រះច័ន្ទ ស្អាតគួរឱ្យស្រលាញ់ទាំងពីរ បើបានរឿង GL មួយទៀតមិនដឹងល្អមិចទេ សមជាមួយគ្នាណាស់។

គួរបញ្ជាក់ថា កន្លងមកនេះ ពេជ្រ វត្តីសារ៉ាវឌ្ឍី ធ្លាប់សម្តែងប្រភេទរឿងស្រីស្រលាញ់ស្រីរួចមកហើយក្នុងការផ្សព្វផ្សាយផលិតផលមួយ ប្រសិនបើមាលា និង ពេជ្រ វត្តីសារ៉ាវឌ្ឍី បានចាប់ដៃគូសម្តែងរឿង GL ជាមួយគ្នាពិតមែនប្រាកដជាផ្អើលអ្នកគាំទ្រមិនខាន៕

កាលពីវេលាម៉ោង ២៣:០០នាទី ថ្ងៃទី៧ ខែសីហា ឆ្នាំ២០២៤ នៅត្រង់ចំណុចភូមិអូរតាគាំ១ សង្កាត់ទួលតាឯក ក្រុងបាត់ដំបង អធិការដ្ឋាននគរបាល ក្រុងបាត់ដំបង បានចុះធ្វើការបង្ក្រាបករណី ជួញដូរដោយខុសច្បាប់នូវសារធាតុញៀន។

នៅក្នុងហេតុការណ៍៍នេះ សម្ថកិច្ចឃាត់ខ្លួនបានជនសង្ស័យម្នាក់ ឈ្មោះ ឈួម សុខវណ្ណី ហៅ ឃ្លោក ភេទប្រុស អាយុ ៣៧ឆ្នាំ មានទីលំនៅភូមិកគោ ឃុំជ្រៃ ស្រុកថ្មគោល ខេត្តបាត់ដំបង។

សមត្ថកិច្ចជំនាញបានដកហូតវត្ថុតាង រកឃើញមានគ្រឿងញៀនគ្រាប់រាងមូលសំប៉ែតពណ៌ផ្កាឈូកចំនួន ១៩៧៦គ្រាប់កាំភ្លើងម៉ាក ROLOចំនួន ១ដើម មានគ្រាប់ចំនួន ២៥គ្រាប់ និងសំបកគ្រាប់ចំនួន៦។

ក្រោយពីឃាត់ខ្លួន ជនសង្ស័យ រួមជាមួយវត្ថុតាង រហូតមកដល់ពេលនេះ ត្រូវបានកម្លាំងជំនាញអធិការនគរបាលក្រុង កំពុងក៏សាងសុំណុំរឿងដើម្បីចាត់ការតាមនីតិវិធីច្បាប់៕