ព្រះពុទ្ធបដិមាធំមួយអង្គ ដែលកំពុងសាងសង់ជិតរួចរាល់ហើយ បាននឹងបង្ហាញវត្តមានយ៉ាងខ្ពស់ត្រដែត ស្ថិតនៅក្នុងវត្តមួយកន្លែងក្នុងខេត្តពោធិ៍សាត់ បានបណ្តាលឲ្យមហាជនគ្រប់ៗរូបកោតសរសើរព្រោងព្រាត។

យោងតាមការបង្ហោះនៅលើបណ្តាញសង្គមហ្វេសបុករបស់ ឯកឧត្តម ខូយ រីដា អភិបាលនៃគណៈអភិបាលខេត្តពោធិ៍សាត់ បានបង្ហាញរូបភាពប៉ុន្មានសន្លឹកដោយភ្ជាប់មកជាមួយនឹងខ្លឹមសារថា «ព្រះពុទ្ធបដិមា កម្ពស់៤៩ម៉ែត្រ ស្ថិតនៅក្នុងវត្តកែវវិជ័យ ស្រុកកណ្តៀង ខេត្តពោធិ៍សាត់»។

ព្រះបដិមាកម្ពស់៤៩ ម៉ែត្រ មានព្រះភក្រ្តយ៉ាងសមសួន ដែលរំលេចដោយពណ៌ទឹកមាសក្រហមឆ្អិនឆ្អៅ កំពុងតែបង្ហាញខ្លួនយ៉ាងខ្ពស់ត្រដែត ស្ថិតនៅក្នុងវត្តកែវវិជ័យ ដែលបច្ចុប្បន្នកំពុងតែសាងសង់ជិតរួចរាល់ហើយ នៅសល់តែផ្នែកខាងក្រោមបន្តិចតែប៉ុណ្ណោះ។

ព្រះពុទ្ធបដិមាស្ថិតនៅក្នុងកាយវិការ ដែលព្រះអង្គឲ្យអភ័យដល់សព្វសត្វទាំងពួង ពោលគឺជារូបតំណាងពេលដែលព្រះពុទ្ធ ទ្រង់សម្តែងព្រះធម៌ក្នុងទីណាមួយ ទ្រង់ឈរឬអង្គុយ ដែលមានលើកព្រះហស្ថស្តាំលាឡើងលើ និងព្រះហស្ថឆ្វេងសំយ៉ុងចុះក្រោមស្របនឹងព្រះកាយ។

ព្រះពុទ្ធបដិមាមួយអង្គនេះ គឺស្ថិតក្រោមការដឹកនាំកសាងដោយព្រះអង្គគ្រូ ព្រះព្រហ្មាភិរ័ត កែវ កន ព្រះរាជាគណៈថ្នាក់កិត្តិយស គណៈមហានិកាយ នៃព្រះរាជាណាចក្រកម្ពុជា និងជាព្រះពោធិវង្សាវិមល មេគណខេត្តពោធិ៍សាត់ ជាព្រះចៅអធិការវត្តកែវវិជ័យ ។

យោងតាមការបញ្ជាក់នាពេលកន្លងមកបានឲ្យដឹងថា ព្រះពុទ្ធបដិមាអង្គនេះបានចាប់ផ្តើមកសាងនៅថ្ងៃទី ១ ខែតុលា ឆ្នាំ២០២២ ដែលចំណាយទឹកប្រាក់ប្រមាណនឹងជាង ៥០ ម៉ឺនដុល្លារ។ ជាមួយគ្នានេះ ពុទ្ធបរិស័ទគ្រប់ៗរូបក៏អាចចូលរួមចំណែកសន្សំបុណ្យកុសលតាមសទ្ធាជ្រះថ្លា ក្នុងការកសាងព្រះពុទ្ធបដិមានេះបានផងដែរ៕

ប្រទេសចិន៖ Pingtang គឺជាស្ពានខ្ពស់ជាងគេទីបីនៅលើពិភពលោក ស្ថិតក្នុងខេត្ត Guizhou ភាគនិរតីនៃប្រទេសចិន ដែលមានខ្សែកាបច្រើនផ្នែកប្រវែង ២,១៣៥ ម៉ែត្រជាមួយកម្ពស់ ៣៣២ ម៉ែត្រ បានកំពុងធ្វើឱ្យពិភពលោកភ្ញាក់ផ្អើលយ៉ាងខ្លាំងនៅសំណង់ដ៏អស្ចារ្យមួយនេះដោយសាររចនាសម្ព័ន្ធរបស់វាគឺមិនធម្មតាឡើយ។
ស្ពាន Pingtang ត្រូវបានសាងសង់ដែលមានសសរបេតុងខ្ពស់ជាងគេលើពិភពលោក និងឆ្លងកាត់តាមជ្រលងភ្នំដ៏ជ្រៅ ធំទូលាយ ដែលធ្វើឱ្យវាក្លាយជាចំណុចតភ្ជាប់ដ៏សំខាន់សម្រាប់ផ្លូវហាយវេ Pingtang-Luodian ។

ការសាងសង់នេះត្រូវបានចំណាយថវិកាសរុប ១,៥ ពាន់លានយន់ (ប្រហែល ២១៥ លានដុល្លារអាមេរិក)។ ហើយត្រូវបានដាក់ឱ្យដំណើរការជាផ្លូវការនៅថ្ងៃទី ៣០ ខែធ្នូ ឆ្នាំ២០១៩ ជាស្ពានដែលរចនាដោយវិស្វករស្ត្រីរយៈពេលជាង ២៥ ឆ្នាំ ដែលស្ពាននេះនឹងកាត់បន្ថយពេលវេលាធ្វើដំណើររវាង Pingtang និង Luodian ពីជាងពីរម៉ោងកន្លះមកនៅប្រហែលមួយម៉ោងវិញ។ អ្វីដែលកាន់តែពិសេសនោះគឺថា ស្ពានដ៏ល្អឥតខ្ចោះមួយនេះនឹងជួយកាត់បន្ថយភាពក្រីក្រក្នុងតំបន់ជាច្រើនដូចជា Guizhou យូណាន និងតំបន់ស្វយ័ត Guangxi Zhuang។

ជាមួយនឹងទេសភាពដ៏ស្រស់ស្អាត និងទេសភាពដ៏អស្ចារ្យនៃរចនាសម្ព័ន្ធ ស្ពាន Pingtang មិនត្រឹមជាស្ពាននៅលើពពក និងឆ្លងកាត់ជ្រលងភ្នំប៉ុណ្ណោះទេ ប៉ុន្តែវាក៏ជានិមិត្តសញ្ញាការតាំងចិត្ត និងសមត្ថភាពរបស់មនុស្សក្នុងការធ្វើអ្វីមួយដែលមិនអាចទៅរួច។ ស្ពាននេះត្រូវបានគេស្គាល់ថាជាស្ពានបេតុងខ្ពស់ជាងគេបំផុតនៅលើពិភពលោក ដោយឈរនៅចំណាត់ថ្នាក់លេខ ៣ ក្នុងចំណោមស្ពានខ្ពស់ជាងគេបំផុតទាំង ១០០ របស់ពិភពលោក។

គួរបញ្ជាក់ដែរថា ខេត្ត Guizhou ភាគនិរតីនៃប្រទេសចិនគឺមានស្ពានល្បីៗជាច្រើនរហូតដល់ ៤៦ សុទ្ធតែស្ថិតក្នុងខេត្ត Guizhou ទាំងអស់។ ក្នុងរយៈពេល ៤ ទសវត្សរ៍ចាប់តាំងពីកំណែទម្រង់ និងការបើកដំណើរការស្ពាន Pingtang របស់ប្រទេសចិនមក អ្នកសាងសង់ស្ពានជាច្រើនជំនាន់បានបង្កើតអព្ភូតហេតុផ្នែកវិស្វកម្មផ្សេងៗគ្នា ខណៈពេលដែលកំពុងប្រយុទ្ធនឹងបញ្ហាប្រឈមផ្នែកបច្ចេកវិទ្យានៅលើផ្ទៃដីដ៏លំបាក ពួកគេបានយកឈ្នះនៅការសាងសង់ស្ពានដ៏ល្អឥតខ្ចោះនេះយ៉ាងជោគជ័យមិនធ្លាប់មាន៕

ផែនដីរបស់យើងគឺមានការប្រែប្រួលឥតឈប់ឈរជាពិសេសគឺការឡើងកម្តៅខ្លាំងតែម្តង ដោយគ្រប់ទីកន្លែងទាំងអស់នៅទូទាំងពិភពលោកកំពុងជួបប្រទះនឹងឥទ្ធិពលកម្តៅ។ ទោះជាយ៉ាងណាទីក្រុងមួយនេះគឺចម្លែកបំផុត ដោយសារវាមានអាកាសធាតុត្រជាក់គ្រប់ពេល ទោះបីផែនដីក្តៅយ៉ាងណាក៏ដោយ ក៏ទីក្រុងនេះនៅតែត្រជាក់ខ្លាំងផងដែរ។ ដូច្នេះតើអ្នកដឹងទេថា ទីក្រុងណាដែលត្រជាក់បំផុតក្នុងលោក? ហើយលោកអ្នកចង់ទៅរស់នៅដែរឬទេ? នេះបើយោងតាម Live Science ទីក្រុង Yakutsk ដែលស្ថិតនៅក្បែរទន្លេ Lena ភាគខាងកើតស៊ីបេរី ប្រទេសរុស្ស៊ី គឺជាទីក្រុងត្រជាក់បំផុតតែមួយគត់នៅលើពិភពលោកជាមួយសីតុណ្ហភាព -៦០ អង្សារសេ។

ទីក្រុង Yakutsk បច្ចុប្បន្នមានមនុស្សរស់ប្រហែល ៣៣៦,២០០ នាក់ដោយពួកគេច្រើនធ្វើការឱ្យ Alrosa ដែលជាក្រុមហ៊ុនដំណើរការអណ្តូងរ៉ែពេជ្រនៅក្នុងទីក្រុង។ ក្នុងនោះមាន ២-៣ ពាន់នាក់គឺជាអ្នកវិទ្យាសាស្ត្រ និងអ្នកស្រាវជ្រាវ។ ទោះបីជាទីក្រុងនេះស្ថិតនៅក្នុងសីតុណ្ហភាព -៦០ អង្សារសេនៃតំបន់អង់តាក់ទិកក៏ដោយ ក៏វាមិនប៉ះពាល់ដល់ការរស់នៅរបស់មនុស្សនៅទីនេះដែរ។ នោះក៏ព្រោះតែមនុស្សតែងតែស្លៀកសម្លៀកបំពាក់ក្រាស់ៗ និងផ្តល់ភាពកក់ក្តៅដល់ខ្លួនឯងជានិច្ច។ នៅក្នុងបទសម្ភាសន៍ជាមួយ BBC អ្នកស្រុកមួយចំនួនបាននិយាយថា ពួកគេមិនដែលស្គាល់ពន្លឺព្រះអាទិត្យទេ ពោលគឺមិនដែលជួបប្រទះនឹងអាកាសធាតុក្តៅឡើយ ដោយពួកគេបានជួបប្រទះតែភាពត្រជាក់គ្រប់ពេលវេលា។

ពួកគេក៏បានបន្ថែមទៀតថា ខណៈពេលដែល Yakutsk ជាទីក្រុងត្រជាក់បំផុតក្នុងលោក ក៏មានកន្លែងមួយទៀតដែលមានសីតុណ្ហភាពត្រជាក់ជាង Yakutsk ផងដែរនោះគឺជាទីក្រុង Oymyakon ដែលមានប្រជាជនប្រហែល ៥០០ នាក់បានឈានដល់សីតុណ្ហភាពត្រជាក់បំផុតរហូតដល់ -៧១.២ អង្សាសេ។ វាជារឿងដ៏គួរឱ្យភ្ញាក់ផ្អើលដែលទីក្រុងទាំងពីរមានអាកាសធាតុត្រជាក់ខ្លាំងបែបនេះ ប៉ុន្តែនៅតែមានមនុស្សរស់នៅបាន។ លោក Alex DeCaria សាស្ត្រាចារ្យផ្នែកឧតុនិយមនៅសាកលវិទ្យាល័យ Millersville ក្នុងរដ្ឋ Pennsylvania សហរដ្ឋអាមេរិក បាននិយាយថា តំបន់ស៊ីបេរីគឺមានអាកាសធាតុត្រជាក់ខ្លាំងដោយសារតែ “ការរួមបញ្ចូលគ្នានៃរយៈទទឹងខ្ពស់ និងផ្ទៃដីដ៏ធំ”។

សីតុណ្ហភាពត្រជាក់នេះ ទំនងជាកើតឡើងនៅលើទ្វីបអង់តាក់ទិក នៃតំបន់ស៊ីបេរី ដោយសារតែសំណើមទាប និងផ្ទៃមេឃច្បាស់អនុញ្ញាតឱ្យវិទ្យុសកម្មរលកវែងដែលបញ្ចេញដោយផែនដី ទៅដល់កំពូលនៃបរិយាកាស បញ្ចេញទៅក្នុងលំហ ដែលនាំឱ្យសីតុណ្ហភាពផ្ទៃត្រជាក់។ លើសពីនេះកន្លែងទាំងពីរនេះក៏ស្ថិតនៅក្នុងជ្រលងភ្នំក្នុងតំបន់ ហ៊ុព័ទ្ធដោយដីក្នុងតំបន់ផងដែរ ជាហេតុធ្វើឱ្យទីក្រុង Yakutsk និង Oymyakon ដែលសុទ្ធតែជាទីក្រុងស្ថិតនៅតំបន់ស៊ីបេរីទទួលបានសីតុណ្ហភាពត្រជាក់ខ្លាំងបែបនេះ៕

ប្រទេសថៃ ៖ នាយករដ្ឋមន្ត្រីថ្មីប្រទេសថៃ លោកស្រី ផេថងថាន ស៊ីណាវ៉ាត់ បានថ្លែងអំណរគុណនាយករដ្ឋមន្ត្រីប្រទេសកម្ពុជា, ម៉ាឡេស៊ី និងសិង្ហបុរី ខណៈនាយករដ្ឋមន្ត្រីទាំង៣រូប បានបង្ហាញនូវក្តីរីករាយដែលលោកស្រីបានឡើងកាន់តំណែងជានាយករដ្ឋមន្ត្រីថៃ ទី៣១ ។ លោកស្រីបញ្ជាក់ថា នឹងប្តេជ្ញាសហការជិតស្និទ្ធជាមួយនាយករដ្ឋមន្ត្រីប្រទេសទាំង៣ ។

នៅថ្ងៃទី១៩ ខែសីហា ឆ្នាំ២០២៤ សារព័ត៌មានថៃរាយការណ៍ថា លោកស្រី ផេថងថាន ស៊ីណាវ៉ាត់ នាយករដ្ឋមន្ត្រីថៃបានសរសេរក្នុងបណ្តាញសង្គម X ទៅកាន់មេដឹកនាំប្រទេសជិតខាងចំនួន៣ រួមមាន ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា, លោក Anwar Ibrahim នាយករដ្ឋមន្ត្រីម៉ាឡេស៊ី និងលោក Lawrence Wong នាយករដ្ឋមន្ត្រីសិង្ហបុរី ។

លោកស្រីថ្លែងថា សូមអរគុណសម្តេចមហាបវរធិបតី ហ៊ុន ម៉ាណែត ដែលសម្តេចបានចូលរួមបង្ហាញក្តីរីករាយមុនគេ ពេលលោកស្រីធ្វើជានាយករដ្ឋមន្ត្រី ហើយលោកស្រីបញ្ជាក់ កម្ពុជា គឺជាប្រទេសនៅជិតខាង និងជាដៃគូយុទ្ធសាស្ត្ររបស់ថៃ ។ ប្រទេសថៃនឹងធ្វើពិធីអបអរខួបលើកទី៧៥ឆ្នាំ នៃការបង្កើតទំនាក់ទំនងការទូតរវាងកម្ពុជា និងថៃ នៅឆ្នាំ២០២៥ ហើយថៃនឹងសហការយ៉ាងជិតស្និទ្ធជាមួយកម្ពុជា ដើម្បីបង្កើនទំនាក់ទំនងរវាងគ្នាទៅវិញទៅមក ។

លោកស្រី ផេថងថាន ស៊ីណាវ៉ាត់ ក៏បានថ្លែងអំណរគុណដល់នាយករដ្ឋមន្ត្រីម៉ាឡេស៊ី លោក Anwar Ibrahim ផងដែរ ដែលលោកបានសរសេរក្នុងបណ្តាញសង្គម X ដើម្បីចូលរួមរីករាយ ដែលលោកស្រីឡើងកាន់តំណែងជានាយករដ្ឋមន្ត្រីប្រទេសថៃ ។

លោកស្រីបញ្ជាក់ថា ថៃ និងម៉ាឡេស៊ី ជាប្រទេសជិតខាងគ្នាដែលមានទំនាក់ទំនងល្អយូរមកហើយ ។ កិច្ចសហការជិតសិ្នទ្ធរយៈពេលកន្លងមកក្នុងការងាររបស់អតីតនាយករដ្ឋមន្ត្រីថៃ និងនាយករដ្ឋមន្ត្រីម៉ាឡេស៊ី បានជួយជំរុញដល់ទំនាក់ទំនងរវាងប្រទេសទាំងពីរបន្ថែមទៀត ។ លោកស្រីសង្ឃឹមថា នឹងសហការជាមួយនាយករដ្ឋមន្ត្រីម៉ាឡេស៊ី ក្នុងការជំរុញមិត្តភាព, កិច្ចសហការជិតស្និទ្ធ ដើម្បីផលប្រយោជន៍ប្រទេសទាំងពីរ ។

ក្រៅពីនេះ លោកស្រីក៏បានថ្លែងអំណរគុណដល់លោក Lawrence Wong នាយករដ្ឋមន្ត្រីសិង្ហបុរីផងដែរ ដែលលោកបានបង្ហាញក្តីរីករាយមកកាន់លោកស្រីពេលឡើងជានាយករដ្ឋមន្ត្រីថៃ ។

លោកស្រីថ្លែងថា ថៃ និងសិង្ហបុរី គឺជាមិត្តនឹងគ្នា ព្រមទាំងជាដៃគូជិតស្និទ្ធ ។ ក្នុងឱកាសប្រទេសទាំងពីរប្រារព្ធខួប៦០ឆ្នាំ នៃទំនាក់ទំនងការទូតនៅឆ្នាំ២០២៥ លោកស្រីសង្ឃឹមថា នឹងសហការជាមួយនាយករដ្ឋមន្ត្រីសិង្ហបុរីយ៉ាងជិតស្និទ្ធ ដើម្បីផលប្រយោជន៍របស់ប្រទេសទាំងពីរ និងក្នុងតំបន់បន្តទៀត ៕

ប្រទេសវៀតណាម ៖ កាលពីថ្ងៃទី១៧ ខែសីហា ឆ្នាំ២០២៤ សារព័ត៌មានបរទេសរាយការណ៍ថា ការិយាល័យនយោបាយវៀតណាមបានបញ្ជាឱ្យស្ថាប័នរដ្ឋាភិបាលគ្រប់លំដាប់ថ្នាក់អភិវឌ្ឍន៍ជំនាញភាសាបរទេសរបស់កូនសិស្សតាមសាលារៀននៅទូទាំងប្រទេស ។ ប្រទេសវៀតណាមនឹងកំណត់អង់គ្លេសជាភាសាទី២ ក្នុងសាលារៀនបន្តិចម្តងៗ ធនធានមនុស្សជំនាន់ក្រោយនឹងមានជំនាញភាសាបរទេស ។

ការិយាល័យនយោបាយវៀតណាម គឺជាស្ថាប័នមួយដែលមានអំណាចខ្ពស់បំផុតក្នុងការសម្រេចចិត្តផ្នែកនយោបាយ និងយុទ្ធសាស្ត្រសំខាន់ៗនៅប្រទេសវៀតណាម បានកំណត់គោលនយោបាយដាក់បញ្ចូលអង់គ្លេសជាភាសាទី២ កាលពីថ្ងៃទី១២ ខែសីហា កន្លងមក ។ គោលនយោបាយនេះ គឺផ្អែកលើមតិរបស់គណៈកម្មាធិការមជ្ឈិមបក្សកុម្មុយនិស្តវៀតណាម កាលពីឆ្នាំ២០១៣ ។

គោលនយោបាយបញ្ចូលអង់គ្លេសជាភាសាទី២ គឺផ្តោតលើកំណែទម្រង់វិស័យអប់រំសំខាន់ និងទូលំទូលាយ ដើម្បីបំពេញតម្រូវការកំណែទម្រង់ផ្នែកឧស្សាហកម្ម និងភាពទាន់សម័យ ។ មន្ត្រីការិយាល័យនយោបាយវៀតណាមបញ្ជាក់ថា ប្រទេសវៀតណាមចាំបាច់ត្រូវតែពង្រឹងគុណភាពធនធានមនុស្សជំនាន់ក្រោយ និងអភិវឌ្ឍន៍ជំនាញភាសាបរទេសរបស់កូនសិស្ស ហើយវៀតណាមនឹងប្រើប្រាស់អង់គ្លេសជាភាសាទី២ ក្នុងសាលារៀនបន្តិចម្តងៗ ។

Bui Thi Thanh Truc ជាសាស្ត្រាចារ្យ និងនាយកផ្នែកភាសាបរទេសនៃសាកលវិទ្យាល័យបរទេស និងបច្ចេកវិទ្យាព័ត៌មានក្នុងទីក្រុងហូជីមិញ និយាយថា នៅពេលអង់គ្លេសក្លាយជាភាសាទី២ ក្នុងសាលារៀនវៀតណាមហើយ ភាសាអង់គ្លេសនឹងត្រូវប្រើប្រាស់ក្នុងឯកសារសិក្សា, សៀវភៅសិក្សា, ការទំនាក់ទំនង និងការបង្រៀនមុខវិជ្ជាមួយចំនួនយ៉ាងទូលំទូលាយ ។

បច្ចុប្បន្ន សាលារៀនរដ្ឋជាច្រើនកន្លែងនៅទីក្រុងហាណូយ, ទីក្រុងហូជីមិញ, ខេត្តបាក់សាង និងខេត្តក្វាងនីន បានសាកល្បងបង្រៀនកូនសិស្សជាភាសាអង់គ្លេសសម្រាប់មុខវិជ្ជាគណិតវិទ្យា និងវិទ្យាសាស្ត្រ ៕

ប្រទេសចិន ៖ កាលពីថ្ងៃទី១៩ ខែសីហា ឆ្នាំ២០២៤ សារព័ត៌មានបរទេសរាយការណ៍ថា រដ្ឋាភិបាលចិននឹងផ្តល់ប្រាក់ឧបត្ថម្ភលើសមុនទ្វេដង ដើម្បីជំរុញឱ្យពលរដ្ឋរបស់ខ្លួនយករថយន្តចាស់ៗមកប្តូររថយន្តថ្មី ។ ការផ្តល់ប្រាក់ឧបត្ថម្ភនេះ គឺពលរដ្ឋមកអាចយករថយន្តចាស់របស់ពួកគេមកប្តូរយករថយន្តអគ្គិសនី និងរថយន្តប្រេងឥន្ធនៈថ្មី ។

សារព័ត៌មាន China Xinhua News បានរាយការណ៍ កាលពីថ្ងៃទី១៦ ខែសីហា ថា ក្រសួងពាណិជ្ជកម្ម និងស្ថាប័នពាក់ព័ន្ធរបស់រដ្ឋាភិបាល ចំនួន៦ នៅប្រទេសចិនបានចេញសេចក្តីប្រកាសថា រដ្ឋាភិបាលនឹងបង្កើនវិធានការជំរុញផ្នែកហិរញ្ញវត្ថុ ដើម្បីជំរុញឱ្យពលរដ្ឋឈប់ប្រើប្រាស់រថយន្តចាស់ៗ និងប្តូរមកទិញរថយន្តថ្មី ។

សេចក្តីប្រកាសនេះបញ្ជាក់ថា រដ្ឋាភិបាលនឹងផ្តល់ប្រាក់ឧបត្ថម្ភឱ្យពលរដ្ឋលើសមុនទ្វេដងសម្រាប់ការទិញ-លក់រថយន្ត ឬយករថយន្តចាស់មកប្តូររថយន្តអគ្គិសនីថ្មី ខណៈកន្លងមក រដ្ឋាភិបាលចិនផ្តល់ប្រាក់ឧបត្ថម្ភចំនួន១ម៉ឺនយាន់ (ឬស្មើ១.៤២៨ដុល្លារអាមេរិក) មកស្មើនឹង២ម៉ឺនយាន់ (ឬស្មើ២.៨៥៧ដុល្លារអាមេរិក) ។

រីឯការផ្តល់ប្រាក់ឧបត្ថម្ភសម្រាប់ការទិញរថយន្តប្រេងឥន្ធនៈ ក៏កើនឡើងផងដែរ គឺកើនពី៧.០០០យាន់ (ឬស្មើ១.០០០ដុល្លារអាមេរិក) ទៅ១៥.០០០យាន់ (ឬស្មើ២.១៤២ដុល្លារអាមេរិក) ។ គោលនយោបាយនេះបានផ្តល់ប្រាក់សម្រាប់ពលរដ្ឋដែលបានដាក់ពាក្យស្នើសុំប្រាក់ ចាប់ពីថ្ងៃទី២៤ ខែមេសា ឆ្នាំ២០២៤ រហូតដល់ថ្ងៃទី១០ ខែមករា ឆ្នាំ២០២៥ ។

បើតាមឯកសារបញ្ជាក់ថា ការលក់រថយន្តអគ្គិសនីថ្មីដឹកអ្នកដំណើរនៅប្រទេសចិន គឺស្មើជិត៥លានគ្រឿង ខណៈការលក់រថយន្តប្រេងឥន្ធនៈដឹកអ្នកដំណើរ ស្មើប្រមាណ៦លាន៥សែន៧ម៉ឺនគ្រឿង គិតចាប់ពីខែមករា ដល់ខែកក្កដា ឆ្នាំ២០២៤ ។ តួលេខនេះបានកើនឡើង៣៣,៧% និងធ្លាក់ចុះ១៥% តាមលំដាប់ បើប្រៀបធៀបប្រចាំឆ្នាំ ។

ទោះយ៉ាងណា ការខ្វះខាតតម្រូវការមានប្រសិទ្ធភាព គឺជាបញ្ហាប្រឈមមួយសម្រាប់សេដ្ឋកិច្ចចិន ហើយការកំណត់គោលនយោបាយខាងលើ គឺដើម្បីលើកកម្ពស់ការទិញរថយន្តថ្មី ។ របាយការណ៍លទ្ធផលការងាររបស់រដ្ឋាភិបាលចិន ប្រចាំឆ្នាំ២០២៤ កំណត់ថា នឹងគាំទ្រគម្រោងពាណិជ្ជកម្មទំនិញប្រើប្រាស់ដើម្បីជំរុញតម្រូវការក្នុងប្រទេស ៕