តារាចម្រៀងរ៉េបល្បីឈ្មោះ ជី ដេវីត បានបង្ហើបប្រាប់អ្នកគាំទ្ររបស់ខ្លួននៅក្នុងការ Live ថាលោកឈប់ថត MV ថ្លៃៗហើយ មិនបានប្រយោជន៍ទេឈប់ថតហើយគឺរាងតែម្តង។ បើតាមសម្តីដោយផ្ទាល់របស់តារាចម្រៀង ទេព បូព្រឹក្ស នៅក្នុងបទសម្ភាសន៍សខ្មៅ MV ទេវរាជ គឺចំណាយ១៨ម៉ឺនដុល្លារ ខណៈមានពាក្យចចាមអារ៉ាមថាថតអស់៣០ម៉ឺនដុល្លារ។ ការបង្ហើបដូចនេះធ្វើឱ្យហ្វេនៗមួយចំនួនថាការដែល ជី ដេវីត និយាយបែបនេះដោយសារតែពេលខ្លះការលះបង់ធំធេងតែមិនសូវបានគេលើកតម្កើងទាំងខំប្រឹងដើម្បីវប្បធម៌។

គេចាំបានថា MV ទេវរាជ ដែលមានការរៀបចំសម្ពោធដ៏អធិកអធមកាលពីកន្លងមកនេះ ដែលជា MV ជួយលើកតម្កើនវប្បធម៌ខ្មែរធ្វើឱ្យមានការចាប់អារម្មណ៍យ៉ាងខ្លាំង ខណៈ MV «ទេវរាជ» របស់ ទេព បូព្រឹក្ស គឺចាយពេលជាង២ឆ្នាំក្នុងការផលិតទើបចេញជារូបរាងនិងមានពាក្យចចាមអារ៉ាមថាចំណាយដើមទុនរហូតដល់៣០ម៉ឺនដុល្លារ។ ទោះជាយ៉ាងណាកន្លងមកថ្មីៗនេះអំឡុងពេល ទេព បូព្រឹក្ស ចូលរួមផ្តល់បទសម្ភាសន៍ សខ្មៅ បានបង្ហាញថាទឹកប្រាក់គឺខ្ទង់១៨ម៉ឺនដុល្លារ។ មិនត្រឹមតែ MV ទេវរាជ ប៉ុណ្ណោះទេដែលជួយលើកស្ទួយវប្បធម៌ខ្មែរ ប៉ុន្តែ MV «ចតុរង្គគុនខ្មែរ» ដែលចេញបន្ទាប់ពីបទ ទេវរាជ ក៏បានជួយលើកស្ទួយគុនខ្មែរផងដែរ។

ការចំណាយលុយច្រើនៗក្នុងការផលិត MV ដើម្បីបង្ហាញពីវប្បធម៌ខ្មែររបស់ ជី ដេវីត និង ទេព បូព្រឹក្ស គឺបានធ្វើឱ្យមហាជនសាទរនៃការខិតខំប្រឹងប្រែងរបស់អ្នកទាំងពីរ ប៉ុន្តែក៏ជារឿងដ៏គួរឱ្យសោកស្តាយដូចគ្នា បន្ទាប់ពីតារាចម្រៀង ជី ដេវីត បានបង្ហើបប្រាប់អ្នកគាំទ្រដែរថា ឈប់ថត MV ថ្លៃៗទៀតហើយ។

ក្នុងការជជែកជាមួយអ្នកគាំទ្រនៅក្នុងការ Live និងបានចែករំលែកបន្តនៅលើបណ្តាញសង្គមទិកតុក ជី ដេវីត បានខ្សឹបប្រាប់អ្នកគាំទ្រថា «ឈប់ថត MV ថ្លៃៗហើយ អត់បានប្រយោជន៍ទេ និយាយមែនឈប់ហើយ MV ថ្លៃៗឈប់ហើយ រាងហើយ…»។ ការបង្ហើបពីសំណាកតារាចម្រៀង ជី ដេវីត ក្នុងការឈប់ផលិត MV ថ្លៃៗនេះបានធ្វើឱ្យអ្នកគាំទ្រខ្លះបង្ហាញការសោកស្តាយផងដែរ ខណៈមួយចំនួនទៀតបានលើកឡើងថាការសម្រេចចិត្តនេះដោយសារតែពេលខ្លះការលះបង់ធំធេងតែមិនសូវបានគេលើកតម្កើងទាំងខំប្រឹងដើម្បីវប្បធម៌។

គួរបញ្ជាក់ថា កាលពីថត MV វីរៈនារី មានការលើកឡើងថា ជី ដេវីត និង ទេព បូព្រឹក្ស លក់ឡានដើម្បីផលិត៕

តារាចម្រៀង កៅ សុភា ទម្លាយគ្មានសល់នៅក្នុងទ្រនំចាស់មិនបានជួយអ្វី ធ្វើគ្រប់សព្វបែបយ៉ាងនិងចំណាយលុយដោយខ្លួនឯង សូម្បីតែសិល្បករក្រៅស្រុកក៏ចំណាយលុយផ្ទាល់ខ្លួនជាមួយសិល្បករផ្សេងទៀត។ ចំណែកឯ សង្ហា វិញក៏លើកឡើងដែរថា ក្រុមហ៊ុនចាស់លោកមិនបានបណ្តុះជំនាញលើទេពកោសល្យរបស់ខ្លួនឡើយចំណែកការផលិតបទចម្រៀងវិញគឺប្រើស្ទូឌីយូផ្ទាល់ខ្លួន។ ការឆ្លើយតបផាំងៗរបស់ កៅ សុភា និង សង្ហា នេះបន្ទាប់ពីមានគេសរសើរថាបារមីអស្ចារ្យធ្វើឱ្យតារាល្បីមានជំនាញទោះបីចាកចេញក៏បង្វឹកអ្នកដទៃបាន។

ដូចទស្សនិកជនមួយផ្នែកធំជ្រាបមកហើយថា សិល្បករ ជូវី លីន និង កៅ សុភា បន្ទាប់ពីចាកចេញពីផលិតកម្មបារមី បានធ្វើឱ្យបណ្តាញសង្គមកក្រើកយ៉ាងខ្លាំងខណៈរឿងរ៉ាវពីមួយទៅមួយកាន់តែលេចចេញឡើងជាបន្តបន្ទាប់។ ថ្មីៗនេះនៅពេលកម្មវិធីប្រលងចម្រៀងរ៉េបថ្មីប្រកាសពី សង្ហា ជា Music Producers បានធ្វើឱ្យកម្តៅកាន់តែក្តៅខ្លាំងជាមួយពាក្យសន្យាដ៏មុតមាំរបស់លោក ជៀសវាងរូបភាពអយុត្តិធម៌ណាមួយ និងសំដីសំដៅដែលបង្ហាញពីការមានចេតនាបំបាក់ទឹកចិត្តស្មារតីរបស់បេក្ខជនក្មេងជំនាន់ក្រោយ។

ទន្ទឹមនឹងទទួលបានតំណែងថ្មីនេះ ក៏មានគណនីមួយចូលទៅខម្មិនថា «សុទ្ធតែក្មេងៗពី Baramey ដល់ចឹងបានដឹងថាបារមីអស្ចារ្យអាចធ្វើឱ្យតារាល្បី និងមានជំនាញ ពេលចេញក៏អាចបង្រៀន បង្វឹកអ្នកដទៃបានទៀត ឡូយៗៗ»។ ការលើកឡើងរបស់គណនី Serey Man បានធ្វើឱ្យ កៅ សុភា ឆួលចុងច្រមុះចេញមកឆ្លើយតបថា «ប្រាប់បានអត់បង្វឹកបែបណាខ្លះបានខ្ញុំអ្នកនៅនឹងខ្ញុំអត់ដឹង? សរសេរបទខ្លួនឯង និពន្ធខ្លួនឯង ដល់ថ្នាក់ចេះProduce Beat ខ្លួនឯង Perform មិនថាឆាកតូចមិនថាឆាកធំរកBandខ្លួនឯង Team ធ្វើការយប់អត់មានលុយ Overtime ខ្ញុំចេញលុយខ្លួនឯងទិញម្ហូបញាំជុំគ្នា ទៅឆាកធំស្រុកក្រៅទិញសំបុត្រយន្តហោះឱ្យខ្លួនឯងនិងManagerខ្ញុំ តារាអន្តរជាតិមកពីស្រុកក្រៅពួកខ្ញុំArtistម៉ាននាក់នេះចូលលុយគ្នានាំពួកគាត់ដើរលេងអស់ជិត៤ពាន់ នេះហើយបង្វឹកមែន?»។

មិនត្រឹមតែ កៅ សុភា ចេញមកទម្លាយបែបនេះទេ ណុំ ចាន់រតនៈ ហៅ សង្ហា ក៏បានចូលមកឆ្លើយតបឱ្យអស់ចង្ងល់ទាក់ទងនឹងផលិតកម្មចាស់ថា «អរគុណដែលសរសើថាខ្ញុំឡូយ តែការពិតខ្ញុំចង់ប្រាប់ថា ក្រុមហ៊ុនចាស់របស់ខ្ញុំមិនដែលបានInvested លើជំនាញ រឺទេពកោសល្យដែលខ្ញុំមាននៅថ្ងៃនេះទេ សូម្បី Studioដើម្បីផលិតបទក៏ខ្ញុំប្រើstudioផ្ទាស់ខ្លួនដែរ»។

គួរបញ្ជាក់ថា កម្មវិធីប្រលងចម្រៀងរ៉េបថ្មីបានប្រមូលផ្តុំនូវសិល្បករជាច្រើនរូបទើបធ្វើឱ្យមានការពិភាក្សា វែកញែក និងឡើងកម្តៅខ្លាំងនៅលើបណ្តាញសង្គម៕

ម៉ៃយ៉ា Miss Queen Cambodia 2023 ដែលតំណាងកម្ពុជាក្នុងការប្រកួត Miss International Queen 2024 លើទឹកដីប្រទេសថៃបានទទួលរងនូវពាក្យសម្តីរិះគន់មួយចំនួនពីអ្នកលេងបណ្តាញសង្គមបន្ទាប់ពីឆ្លើយចម្លើយផ្ទុយពីសំណួររួមទាំងការបង្ហាញទេពកោសល្យនៅក្នុងការប្រកួត។ ឃើញមានការរិះគន់ពីខ្មែរគ្នាឯង មិនបានផ្តល់កម្លាំងដល់ ម៉ៃយ៉ា បែបនេះ ងិន ម៉ារ៉ាឌី
និង ភឹម ស្រីនោ បានលើកឡើងទឹកចិត្តដោយសម្តីកក់ក្តៅទៅកាន់ ម៉ៃយ៉ា ក្នុងកាលៈទេសៈដ៏តានតឹងមួយនេះ។

ម៉ៃយ៉ា បានរងនូវការវែកញែកយ៉ាងច្រើនពីអ្នកលេងបណ្តាញសង្គមដោយអ្នកខ្លះក៏បានបញ្ចេញមតិរិះគន់ និងអ្នកខ្លះទៀតក៏បានលើកទឹកចិត្ត ម៉ៃយ៉ា ឱ្យប្រឹងប្រែងបន្តទៀតនៅក្នុងការប្រកួតដែលតំណាងឱ្យប្រទេសកម្ពុជាទាំងមូល។ Miss Queen Cambodia 2023 ត្រូវគេរិះគន់បណ្តុះបង្អាប់ពីសមត្ថភាព ថែមទាំងមានការចោទប្រកាន់ជាប់ព្រោះសែ ព្រោះតែនាងធ្វើមិនបានល្អបន្ទាប់ពីពិធីករសួរសំណួរផ្សេង ម៉ៃយ៉ា បានផ្តល់ចម្លើយផ្សេង ចំណែកក្នុងវិញ្ញាសារTalent Show ម៉ៃយ៉ា បានបកស្រាយបទថៃក៏ត្រូវគេឌឺដងផ្លែផ្កាលើបណ្តាញសង្គមទិកតុកទៀត។

ក្នុងកាលៈទេសៈមិនទទួលបានការលើកទឹកចិត្តពីប្រជាជនខ្មែរមួយចំនួនបានធ្វើឱ្យបវរកញ្ញាចក្រវាលកម្ពុជាឆ្នាំ២០២១ ចេញមកលើកទឹកចិត្ត ម៉ៃយ៉ា និងមិនយល់ពីអ្នកមួយចំនួនមនុស្សមិនមែនទេវតាតែងមានកំហុសត្រូវបានគេរិះគន់ជាន់ពន្លិច។ Miss Universe Cambodia 2021 រូបនេះបានបង្ហោះថា«សូមបងប្អូនទាំងអស់គ្នាចូលរួមលើកទឹកចិត្ត គាំទ្រដល់ miss queen Cambodia យើងផង love you queen»។ ងិន ម៉ារ៉ាឌី បានបង្ហោះប្រយោគមួយទៀតថា «ខ្ញុំពិតជាមិនយល់ទាល់តែសោះហេតុអី្វមនុស្សមួយចំនួននៅតែមិនបានយល់ពីទឹកចិត្តការលះបង់និងភាពខិតខំប្រឹងប្រែងរបស់បេក្ខភាពទៅប្រកួតក្នុងកម្មវិធីនីមួយៗ។ មនុស្សមិនមែនទេវតាទេ កំហុសតែងតែកើតមានតិចតួចជារឿងធម្មតា ហេតុអ្វីចូលចិត្តម្ល៉េះអារបៀបរិះគន់ដើម្បីជាន់ពន្លិច ឫ bully គ្នាអីហ្នឹង ។ អំឡុងការប្រកួតបេក្ខភាពគឺត្រូវការបំផុតការលើកទឹកចិត្តពីសំណាក់មិត្តអ្នកគាំទ្រសូមទោស បើខ្ញុំនិយាយខុស . Keep fighting ម៉ៃយ៉ា»។

មិនត្រឹមតែបវកញ្ញាចក្រវាលរូបនេះប៉ុណ្ណោះដែលផ្តល់កម្លាំងចិត្តទៅកាន់ម៉ៃយ៉ា ក្នុងនោះ ភឹម ស្រីនោ Miss Grand Cambodia 2023 ក៏បានលើកទឹកចិត្តបេក្ខភាពតំណាងប្រទេសរូបនេះដូចគ្នា។ ភឹម ស្រីនោ បានលើកឡើងថា «បើខ្មែរមិនគាំទ្រខ្មែរបានអ្នកណាមកគាំទ្រទៅ»។ Miss Grand Cambodia 2023 បានលើកឡើងទៀតថា «នាងខ្ញុំសុំចិត្តដល់បងប្អូនទាំងអស់គ្នា
សូមជួយគាំទ្រដល់បវរកញ្ញាគ្រប់រូបដែលតំណាងឱ្យប្រទេសកម្ពុជា ទោះពេលខ្លះអ្នកទាំងអស់គ្នាអាចនឹងពេញចិត្តឬមិនពេញចិត្តទៅលើរូបគាត់ ប៉ុន្តែអ្នកទាំងអស់គ្នាក៏មិនត្រូវប្រើពាក្យសម្តីរបស់អ្នកប៉ះពាល់ដល់អារម្មណ៍របស់ពួកគាត់ដែរ! ពីព្រោះអ្វីដែលពួកគាត់ត្រូវការពីអ្នក គឺសេចក្តីស្រលាញ់ និងការគាំទ្រតែប៉ុណ្ណោះ! ចូររួមគ្នាជាធ្លុងមួយ ដើម្បីភាពរឹងមាំ និងមុខមាត់របស់ប្រទេសជាតិយើង!»។

នៅក្នុងកិច្ចសម្ភាសន៍កម្មវិធីទូរទស្សន៍ថៃប៉ុស្តិ៍លេខ៣ ម៉ៃយ៉ា ក៏បាននិយាយថានាងមិនបានទទួលការគាំទ្រពីប្រទេសរបស់ខ្លួន ប៉ុន្តែមិនអីនោះទេនាងនឹងបន្តប្រឹងប្រែងដើម្បីប្រទេសខ្លួនឯងនិងដើម្បីសមភាពយេនឌ័រ៕

តារាចម្រៀង ថុល សុទិភិ កាន់តែមានភាពជោគជ័យនៅក្នុងអាជីពសិល្បៈឡើងកូដជាបន្តបន្ទាប់ទាំងវិស័យចម្រៀងមានការទទួលស្គាល់ពីមហាជន ជីវិតគូកាន់តែមានភាពរលូនជាមួយអ្នកជំនួញអនឡាញ ឡុង ម៉ានីន។ មិនត្រឹមតែប៉ុណ្ណោះ ភិទិ បានក្លាយជាតារាចម្រៀងជំនាន់ក្រោយដែលឆក់យកតំណែងនៃការផ្សព្វផ្សាយទឹកបរិសុទ្ធស៊េរីថ្មី COLEE ជាមួយរៀមច្បងល្បីៗជាច្រើនរូប។ អាជីពសិល្បៈក៏រលូន ជីវិតគូក៏ស្រស់បំព្រង ភិទិ និងគូស្នេហ៍ក៏ទើបទិញរថយន្តទំនើបផងដែរ។

ទស្សនិកជនអ្នកតាមដានវិស័យសិល្បៈជ្រាបមកហើយថា ថុល សុភិទិ គឺជាអ្នកចម្រៀងរះថ្មីនៅក្នុងអាជីពសិល្បៈដែលមានការទទួលស្គាល់ពីមហាជនច្រើនរាល់បទចម្រៀងរបស់លោកមួយៗគឺសុទ្ធតែទទួលបានការគាំទ្រខ្លាំងពីមហាជនមានការចូលស្តាប់រាប់លានដង។ មិនត្រឹមតែជោគជ័យលើវិថីសិល្បៈ ថុល សុភិទិ កាន់តែមានភាពរីករាយជាមួយគូស្នេហ៍ដែលជាអ្នកជំនួញអនឡាញល្បីឈ្មោះ ឡុង ម៉ានីន បន្ទាប់ពីពុះពារឧបសគ្គជាមួយគ្នាមក។

ទន្ទឹមនឹងភាពជោគជ័យលើជីវិតសិល្បៈ ចំណែកឯជីវិតគូ ក៏ស្រស់បំព្រងដូចផ្កាត្រូវទឹកសន្សើម ថុល សុភិទិ ក្លាយជាតារាចម្រៀងជំនាន់ក្រោយមួយរូបបានផ្សព្វផ្សាយផលិតផលទឹកបរិសុទ្ធស៊េរីថ្មី COLEE ជាមួយរៀមច្បងដូចជាអ្នកនាង ឱក សុគន្ធកញ្ញា តារាសម្តែង ទេព រិនដារ៉ូ បវរកញ្ញា ពេជ្រ វត្តីសារ៉ាវឌ្ឍី តារាកំប្លែងនាយ ពាក់មី ពិធីករ ពិធីការិនី ដ៏មានប្រជាប្រិយភាព ឌីជេ ណាណា និង លោក ជា វិបុល រួមទាំងគូស្នេហ៍ Influencers ល្បីឈ្មោះ ហេងវិសាល និង ជា ស្រីនា។
នេះបញ្ជាក់ឱ្យឃើញថាឥទ្ធិពលរបស់ តារាចម្រៀង ថុល សុភិទិ ជាតារាចម្រៀងជំនាន់ក្រោយពិតជាក្តោបឱកាសទីផ្សារពាណិជ្ជកម្មមិនធម្មតាដែលត្រូវបានជ្រើសរើសឱ្យផ្សព្វផ្សាយទឹកសុទ្ធស៊េរីថ្មី COLEE ដែលមានគុណភាពខ្ពស់ ស្តង់ដាគុណភាពអាល្លឺម៉ង់ បច្ចេកវិទ្យាចុងក្រោយ Nano R.O Filter ជាមួយតារាល្បីៗលំដាប់ប្រទេសជាច្រើនរូបទៀត។

ការងារសិល្បៈកាន់តែរលូនលេចមុខតាមកម្មវិធីតន្រ្តីជាច្រើន ទីផ្សារពាណិជ្ជកម្មជាមួយ COLEE ដែលជាប្រ៊េនកំពុងល្បីឈ្មោះនៅលើទីផ្សារ ថុល សុភិទិ និងគូស្នេហ៍ដែលខិតខំលើវិស័យអនឡាញនោះទីបំផុតក៏សម្រេចក្តីប្រាថ្នាទិញរថយន្តស៊េរីទំនើបមានការស៊ុបប្រាយគ្នាធ្វើឱ្យអ្នកគាំទ្ររំភើបជំនួសបិទមាត់មិនជិត៕